లాటిన్ అమెరికా దేశం బ్రెజిల్లో ఎగసిపడిన అగ్నికీలలు అంతులేని విషాదాన్ని రేపాయి. పడగెత్తిన నిప్పు ఆనందోత్సాహాల్లో తేలియాడుతున్న వందలాది మంది విద్యార్థుల ప్రాణాలు తోడేసింది. నిప్పుకు తోడయిన నిర్దయ పొగ సంతోషాలతో ఆడిపాడుతున్న యువతీయువకుల ఆయువును అనంతవాయువుల్లో కలిపేసింది. మనసు లేని మంటలు సృష్టించిన విలయంతో బ్రెజిల్లోని యూనివర్సిటీ పట్టణం శాంటా మారియా శవాల కుప్పగా మారింది. శోకసంద్రమై తల్లడిల్లింది.
దక్షిణ బ్రెజిల్ శాంటా మారియా నగరంలో జనంతో కిక్కిరిసిన ‘కిస్ క్లబ్’లో ఆదివారం(జనవరి27న) వేకువ జామున రెండు గంటల సమయంలో ఆకస్మికంగా భారీ అగ్ని ప్రమాదం సంభవించడంతో 232 మంది మృత్యువాత పడ్డారు. 131 మంది గాయపడ్డారు. వీరిలో చాలా మంది పరిస్థితి విషమంగా ఉండటంతో మృతుల సంఖ్య పెరిగే అవకాశముందని భావిస్తున్నారు. మృతులంతా విద్యార్థులే కావడం గుండెను పిండేసే విషాదం.
‘కిస్ క్లబ్’లో యూనివర్సిటీ విద్యార్థుల పార్టీ జరుగుతుండగా ఉన్నట్టుండి మంటలు ఎగసిపడ్డాయి. క్లబ్ అంతా అగ్నికీలలు, దట్టమైన పొగ కమ్ముకోవడంతో ఏం జరుగుతోందో అర్థంకాక అందరూ ప్రాణాలు అరచేతిలో పెట్టుకుని తలో దిక్కుకు పరిగెత్తారు. బయటకు వెళ్లేందుకు ఒకే ఒక ద్వారం ఉండడంతో ఒకరినొకరు తోసుకుంటూ బయటకు పరుగులు తీశారు. దీంతో తొక్కిసలాట జరిగింది. చాలా మంది పొగతో ఊపిరాడక, కొందరు తొక్కిసలాటలో మరణించారు. అగ్ని ప్రమాదానికిగల కారణాలు తెలియలేదని పోలీసులు చెప్పారు. అయితే, పార్టీలో పైరోటెక్నిక్స్(జ్వాలా విన్యాసాలు)తో కూడిన రాక్ బ్యాండ్ సంగీత కార్యక్రమం జరుగుతున్నప్పుడు అగ్ని ప్రమాదం సంభవించినట్టు స్థానిక మీడియా వెల్లడించింది.
‘కిస్ క్లబ్’ ఘోరకలితో బ్రెజిల్ ప్రజలు విషాదంలో మునిగిపోయారు. ‘ఇది విచారకరమైన ఆదివారం’ అంటూ ట్విట్టర్లో సంతాప సందేశాలు ఉంచారు. ప్రమాదం నేపథ్యంలో దేశాధ్యక్షురాలు దిల్మా రౌసెఫ్ చిలీ పర్యటనను కుదించుకుని హుటాహుటిన స్వదేశానికి తిరిగి వచ్చారు. పర్యటనల కంటే బ్రెజిల్ప్రజలే తనకు ముఖ్యమని ఆమె స్పష్టం చేశారు. ప్రమాద బాధితులకు అన్నిరకాలుగా సహాయమందించాలని ఆదేశించారు.
నైట్క్లబ్లలో గత విషాదాలివీ 2009: రష్యాలోని లేమ్ హార్స్ నైట్క్లబ్లో భారీ అగ్నిప్రమాదం. బాణసంచా కారణంగా మంటలు. 152 మంది దుర్మరణం.
2009: బ్యాంకాక్లోని శాంటికా నైట్క్లబ్లో బాణ సంచా పేలుళ్లతో ఎగసిపడ్డ అగ్ని కీలలు. 67 మంది మృతి.
2004: అర్జెంటినాలోని బ్యూనోస్ ఎయిర్స్లోని నైట్క్లబ్లో అగ్ని ప్రమాదం. 194 మంది దుర్మరణం.
2003: రోడ్ ఐలాండ్ నైట్క్లబ్లో వేదికపై జ్వాలా విన్యాసాల కారణంగా అగ్నిప్రమాదం. 100 మంది మృతి.
2002: వెనిజువెలాలోని కారకస్లో ఉన్న లా గోజిరా డిస్కోథెక్లో అగ్ని ప్రమాదం. మృతులు 50 మంది.
2000: చైనాలోని లూయాంగ్ క్లబ్లో వెల్డింగ్ చేస్తుండగా అగ్ని ప్రమాదం. 309 మంది దుర్మరణం.