ఫ్రెంచ్‌ సీరియల్‌ కిల్లర్‌ చార్లెస్‌ శోభరాజ్‌ను విడుదల చేయాలని సుప్రీం కోర్టు ఆదేశించిన సంగతి తెలిసిందే. ఆయన వయసు 78 ఏళ్లు కావడంతో వయసు రీత్య విడుదల చేయాలని నేపాల్‌ సుప్రీం కోర్టు పేర్కొనడంతో.. ఆయన శుక్రవారం నేపాల్‌ జైలు నుంచి విడుదలయ్యారు. ఈ మేరకు ఆయనను విలేకరులు ఇంటర్య్వూలో  తాను చాలా గొప్పగా భావిస్తున్నానని శోభరాజ్‌ చెప్పారు. తాను చేయాల్సింది చాలా ఉందని, చాలా మంది వ్యక్తులపై దావా వేయాలని అన్నారు. ఆయన ప్రస్తుతం దోహా మీదుగా విమానంలో ఫ్రాన్స్‌కి వెళ్లనున్నాడు. మిమ్మల్ని సీరియల్‌ కిల్లర్‌గా తప్పుగా వర్ణించారని భావిస్తున్నారా అని విలేకరులు ప్రశ్నించగా..ఔను అని చెప్పాడు. నెట్‌ఫిక్స్‌లో 'సిరిస్‌ ది సర్పెంట్‌'లో శోభరాజ్‌ జీవిత చరిత్రలో 1970లలోని 20 హత్యలతో ముడిపడిన కథను తెరకెక్కించారు. భారత్‌లో 1976లో అరెస్టు అయ్యాడు. ఐతే 2003లో నేపాల్‌కు వెళ్లాడు, అక్కడ జర్నలిస్ట్‌ అతనిని గుర్తించి అరెస్టు చేశాడు. చివరికి 1970లలో చేసిన జంట హత్యలకు గాను అక్కడ 21 ఏళ్లు జైలు శిక్ష అనుభవించాడు. ఈ వారంలోనే అతని ఆరోగ్య కారణాల దృష్ట్యా విడులై ఫ్రాన్స్‌కి పయనమయ్యాడు. (చదవండి: సీరియల్‌ కిల్లర్‌ చార్లెస్‌ శోభరాజ్‌ విడుదలకు ఆదేశాలు)

ఛార్లెస్‌ శోభరాజ్‌.. ఫ్రెంచ్‌ సీరియల్‌కిల్లర్‌. సినిమాలు, న్యూస్‌ల ద్వారా చాలామందికి ఈ పేరు పరిచయం ఉండే ఉంటుంది. కామెడీ సినిమాల్లోనూ ఈ పేరు రిఫరెన్స్‌ కనిపిస్తుంటుంది. కానీ, ఊహాకు కూడా అందనంత కరడుగట్టిన నేరస్తుడు ఇతను. నేరాలు చేయడంలో శోభరాజ్‌ది ఓ ప్రత్యేకమైన శైలి. నేరం చేశాక దొరక్కుండా ఉండేందుకు ఎంతకైనా తెగిస్తాడు. ఆ తీరు ఓ పామును తలపిస్తుంది. అందుకేనేమో అతన్ని ‘ది సర్పెంట్‌’ అని కూడా పిలుస్తుంటారు. ఇతని చేతిలో బలైన పర్యాటకులు బికినీలో శవాలుగా తేలడంతో.. ‘బికినీ కిల్లర్‌’గా ఛార్లెస్‌ శోభరాజ్‌కు పేరు ముద్ర పడిపోయింది.  హ్యాండ్సమ్‌ లుక్‌, స్టైలిష్‌ వేషధారణ, ఎవరినైనా ఇట్టే ఆకట్టుకోగలిగే ఆ రూపం వెనుక.. ముసుగు గనుక తొలగిస్తే క్రూరమైన స్వభావం బయటపడుతుంది. నమ్మిన్నోళ్లను నట్టేట ముంచుతూ.. తాను మాత్రం చట్టాలకు దొరక్కకుండా తిరగడం ఇతని ప్రత్యేకత.  ఆ తప్పించుకోవడం కోసం అతను వేసే స్కెచ్‌.. సినిమాటిక్‌గా ఉంటుంది. జైలుకు వెళ్లొచ్చినా.. క్రిమినల్‌గా తనకు దక్కిన అపకీర్తిని సైతం దర్జాగా ఆస్వాదించిన నైజం అతనిది. సినిమాల్లో చూపించే ప్రొఫెషనల్‌ కిల్లర్‌ల పాత్రకు స్ఫూర్తి.. ఛార్లెస్‌ శోభరాజ్‌ వ్యక్తిత్వం.  1963 నుంచి 1976 మధ్యకాలంలో నేరాలతో ప్రపంచవ్యాప్తంగా గుర్తింపు దక్కింది . 70వ దశకంలో..  పర్వతశ్రేణుల గుండా కాలినడకన సంచరించే పాశ్చాత్య పర్యాటకులనే(Hippie trail)లక్ష్యంగా చేసుకుని నేరాలకు తెగబడ్డాడు. ప్రపంచవ్యాప్తంగా సుమారు 20 మంది టూరిస్టులను చంపిన ఈ ఫ్రెంచ్‌ సీరియల్‌ కిల్లర్‌.. ఒక్క థాయ్‌లాండ్‌లోనే 14 మందిని హతమార్చాడు. థాయ్‌ బాధితుల్లో చాలామంది బికినీలో శవాలుగా కనిపించడంతో అతనికి బికినీ కిల్లర్‌ అనే ముద్రపడింది.  తండ్రి ఉన్నా లేనట్లే! వియత్నాంలోని సైగాన్‌(ప్రస్తుతం హో చి మిన్హ్‌ సిటీ) సువిశాలమైన నగరం. అక్కడ భారత్‌కు చెందిన వ్యాపారవేత్త శోభరాజ్‌ హాట్చంద్‌ భవ్నాని, ఓ దుకాణంలో పని చేసే ట్రన్‌ లోవాంగ్‌ ఫున్‌లకు డేటింగ్‌ చేశారు. ఈ జంటకు సహజీవనం ద్వారా పుట్టిన బిడ్డ ఛార్లెస్‌ శోభరాజ్‌. ఏప్రిల్‌ 6వ తేదీన 1944లో జన్మించిన ఆ బిడ్డ పూర్తి పేరు చార్లెస్ గురుముఖ్ శోభరాజ్ హాట్‌చంద్ భవనాని. బిడ్డ పుట్టిన కొన్నిరోజులకే ఆ తండ్రి దూరమయ్యాడు. తోడు వదిలేసి వెళ్లిపోవడంతో.. ఛార్లెస్‌ తల్లి ఫ్రాన్స్‌కు వలస వెళ్లింది. అక్కడ ఓ ఫ్రెంచ్‌ ఆర్మీ లెఫ్టినెంట్‌ను వివాహం చేసుకుంది. అయితే.. ఆ జంటకు పుట్టిన సంతానం కారణంగా తనను నిర్లక్ష్యం చేస్తున్నారేమో అనే భావనలోకి కూరుకుపోయాడు ఛార్లెస్‌ శోభరాజ్‌. మానసికంగా దిగజారి కుంగిపోయాడు. సమాజంపై, బంధాలపై విరక్తి చెందాడు.  అలా అతని బుర్రలో టీనేజీ వయసులోనే క్రూర-నేర స్వభావం మొలకలెత్తడం మొదలైంది.  యవ్వనంలో ఉన్నప్పుడు చిన్న చిన్న నేరాలకు పాల్పడడం మొదలుపెట్టాడు. ఛార్లెస్‌ శోభరాజ్‌.. ఓ చోరీ కేసులో 1963లో తొలిసారి జైలుకు వెళ్లాడు. కానీ, అప్పటికే అతని బుర్ర నిండా క్రిమినల్‌ ఆలోచనలే నిండిపోయి ఉన్నాయి. దీంతో అక్కడి అధికారులను మచ్చిక చేసుకుని.. సకల భోగాలు అనుభవించాడు. ఆపై ఓ రిచ్‌ వలంటీర్‌తో పరిచయం పెంచుకున్నాడు. పెరోల్‌ మీద బయటకు వచ్చిన ఛార్లెస్‌ శోభరాజ్‌.. పిక్‌పాకెట్‌ నేరాల నుంచి పెద్ద పెద్ద దందాలతో ప్యారిస్‌లో బడా క్రిమినల్‌గా ఎదిగాడు. ఛార్లెస్‌ శోభరాజ్‌ హత్యకు పన్నే కుట్రలు సైతం ప్లానింగ్‌గా ఉంటాయి. బాధితులకు తాగే వాటిలో, తినే వాటిలో విషపు గుళికలు ఇచ్చేవాడు. ఆయుష్షు గట్టిదైతే ప్రాణాలతో బయటపడేవాళ్లు. అలాంటి ఘటనతోనే మరోసారి అరెస్ట్‌ అయ్యాడు ఛార్లెస్‌ శోభరాజ్‌.    1976లో.. కొందరు కాలేజీ విద్యార్థులపై డ్రగ్స్‌, విషపు గోళీలతో హత్యాయత్నానికి పాల్పడ్డాడు. అయితే వాళ్లంతా ప్రాణాలతో బయటపడడం.. పోలీసులకు ఫిర్యాదు చేయడంతో జులై నెలలో శోభరాజ్‌ అరెస్ట్‌ అయ్యాడు. మరికొద్ది రోజుల్లో శిక్షా కాలం ముగుస్తుందనగా.. పుట్టినరోజు వంకతో జైలు హోం గార్డులకు మత్తు మందు కలిపిన స్వీట్లు పంచి తప్పించుకున్నాడు.  ఛార్లెస్‌ శోభరాజ్‌(యవ్వనంలో..) ప్రేమ.. పెళ్లి.. దగా యవ్వనంలో ఛార్లెస్‌ శోభరాజ్‌ నేరాలకు అడ్డూ అదుపు లేకుండా పోయింది. మొదటిసారి జైలుకు పోయి వచ్చాక.. ప్యారిస్‌లో విచ్చల విడిగా దోపిడీలు, కుంభకోణాలకు పాల్పడ్డాడు. ఆ సమయంలోనే.. చంతల్‌ కొంపాగ్నోన్‌ అనే పర్షియన్‌ అమ్మాయితో ప్రేమ వ్యవహారం నడిపించాడు. ఈ ఇద్దరూ వివాహం చేసుకోవాలనుకునే టైంకి.. శోభరాజ్‌ జైలుకు వెళ్లాల్సి వచ్చింది. ఎనిమిది నెలల శిక్ష తర్వాత బయటకు వచ్చి.. కొంపాగ్నోన్‌ను వివాహంచేసుకున్నాడు.  అయితే.. మళ్లీ అరెస్ట్‌ను తప్పించుకునేందుకు గర్భవతిగా ఉన్న భార్యతో కలిసి దేశం విడిచి పారిపోయాడు. దారిలో ఫేక్‌ డాక్యుమెంట్లతో ప్రయాణిస్తూ.. టూరిస్టులను దోచుకుని.. చివరికి ముంబైకి చేరుకున్నాడు. అక్కడే కూతురు పుట్టింది. ఉష అనే పేరు పెట్టుకున్నారు ఆ దంపతులు. భార్య కోరిక మేరకు నేరాలకు బ్రేక్‌ వేసినప్పటికీ.. కార్ల దొంగతనం, స్మగ్లింగ్లు చేసుకుంటూ పోయాడు రహస్యంగా. ఆపై ఈజీ మనీ కోసం గ్యాంబ్లింగ్‌ వైపు అడుగులు వేశాడు.  1973లో ఢిల్లీ హోటల్‌ అశోకలో నగల దొంగతనం కేసులో పట్టుబడ్డాడు.  భార్య సహకారంతో అనారోగ్యం డ్రామా ఆడి తప్పించుకున్నాడు. అయితే గంటల వ్యవధిలోనే తిరిగి వెంటనే పట్టేసుకున్నారు. ఆపై కన్నతండ్రి సహకారంతో జైలు నుంచి విడుదలై.. కాబూల్‌(అఫ్గనిస్తాన్‌) పారిపోయాడు. అక్కడ టూరిస్టులను దొచుకుంటూ.. మళ్లీ అరెస్ట్‌ అయ్యాడు.  అక్కడ ఢిల్లీ తరహాలో స్కెచ్‌ వేసి తప్పించుకోవాలనుకున్నాడు. అనారోగ్యం నటించి.. ఆపై హాస్పిటల్‌ గార్డులకు మత్తుమందు ఇచ్చి ఎస్కేప్‌ అయ్యాడు. ఈ క్రమంలో.. భార్యా కూతురిని అక్కడే వదిలేసి ఇరాన్‌ పరారయ్యాడు. దీంతో చంతల్‌ కొంపాగ్నోన్‌ గుండె బద్ధలు అయ్యింది. బతిమాలి బిడ్డను ప్యారిస్‌కు భద్రంగా పంపించి.. తానూ శిక్షాకాలం పూర్తయ్యాక అక్కడికి చేరుకుంది. అప్పటి నుంచి ఆమె శోభరాజ్‌ ముఖం కూడా చూడలేదు.. చూడాలనుకోవట్లేదు!. ఇరాన్‌ నుంచి నుంచి మిడిల్‌ ఈస్ట్‌ దేశాల్లో తన బంధువు ఆండ్రె భాగస్వామ్యంతో దోపిడీలు, నేరాలకు పాల్పడ్డాడు. గ్రీస్‌లో ఈ ఇద్దరూ అరెస్ట్‌​ అయ్యారు. అక్కడా పోలీసుల కళ్లు గప్పి ఆండ్రెను వదిలేసి పారిపోయాడు. ఆపై పలు దేశాలకు దోపిడీలకు, హత్యలకు పాల్పడ్డ శోభరాజ్‌.. తన నేరాలకు సహకరించేలా అనుచర గణం తయారు చేసుకుని.. సమయం వచ్చినప్పుడు వాళ్లను పోలీసులకు ఇరికిస్తూ.. తాను మాత్రం దొరక్కుండా తప్పించుకుని తిరుగుతుండేవాడు.  భారత్‌లో ఛార్లెస్‌ శోభరాజ్‌ 1976 నుంచి 21 ఏళ్లపాటు జైలు  శిక్ష అనుభవించాడు. అందుకు కారణం..  ఫ్రెంచ్‌ టూరిస్టులతో వెళ్తున్న ఓ బస్సులో విషప్రయోగానికి పాల్పడి.. అందులో ఓ ఇజ్రాయెల్‌ పౌరుడ్ని చంపినందుకు.  ఆపై విడుదలై.. పారిస్‌కు వెళ్లాడు. తిరిగి 2003లో నేపాల్‌కు చేరుకుని.. జంట హత్యల కేసు, నకిలీ పాస్‌పోర్ట్‌ వినియోగం నేరాలకుగానూ జీవిత ఖైదుతో శిక్ష అనుభవించాడు. చివరికి.. డిసెంబర్‌ 21, 2022న నేపాల్‌ సుప్రీం కోర్టు ఆదేశాల మేరకు అతని విడుదలకు లైన్‌ క్లియర్‌ అయ్యింది. 78 ఏళ్ల వయసులో ఆరోగ్యం క్షీణించడం, సత్‌ప్రవర్తన, దాదాపు శిక్షాకాలం(95 శాతం) పూర్తి చేసుకోవడం కారణాలతో.. విముక్తి కల్పించింది నేపాల్‌ అత్యున్నత న్యాయస్థానం. కానీ, నేపాలీ పోలీసులు మాత్రం అతని విడుదలకు ససేమీరా అంటున్నారు. సుప్రీం కోర్టు ఏ కేసులో అతన్ని విడుదల చేయాలని చెప్పిందో స్పష్టత లేదని అభ్యంతరం వ్యక్తం చేస్తున్నారు. 2010లో ఇండో-నేపాలీ ఇంటర్‌ప్రెటర్‌, యువ లాయర్‌ నిహిత బిస్వాస్‌ను జైల్‌లోనే వివాహం చేసుకున్నాడు. ఆమె ఛార్లెస్‌ శోభరాజ్‌ తరపున వాదించిన లాయర్‌ కూతురు., అంతేకాదు.. వయసులో 44 ఏళ్లు చిన్నది కూడా. ఆకర్షనీయమైన అతని రూపానికి తాను ముగ్ధురాలిని అయ్యానని ప్రకటించుకుందామె. 2017లో గుండె ఆపరేషన్‌ కోసం రక్తదానం సైతం చేసిందామె. జైలు నుంచి భర్తను విడిపించుకునేందుకు ఆమె చేసిన ప్రయత్నాల గురించి.. అంతర్జాతీయ మీడియా తరచూ కథనాలు ప్రచురిస్తూ వచ్చేది.   అసలు హత్యలెందుకు? డ్రగ్స్‌, విషం, మత్తు మందు.. తినే తాగే వాటిల్లో కలిపి నేరాలకు పాల్పడుతుంటాడు ఛార్లెస్‌ శోభరాజ్‌. ఆపై చంపేసి.. దోచుకుంటాడు. కొన్ని సందర్భాలు..  చంపిన వాళ్ల ఐడెంటిటీలనే ఉపయోగించుకుని ఊళ్లు పట్టుకుని తిరిగిన సందర్భాలు ఉన్నాయి. ప్రపంచవ్యాప్తంగా అతను 20 మందిని చంపినట్లు చెప్తుంటారు. కానీ, అందులో పదిహేను మాత్రమే అతని ఖాతాలో ధృవీకరణ అయ్యింది. మొత్తంగా అతను 30 హత్యలకు పాల్పడి ఉంటారని ఒక అంచనా. ఈ నేర చరిత అంతటితోనే ఆగిపోలేదు. ఫ్రాన్స్‌, గ్రీస్‌, మలేషియా, ఇరాన్‌, టర్కీ, అఫ్గనిస్తాన్‌, పాకిస్థాన్‌, నేపాల్‌, భారత్‌, థాయ్‌లాండ్‌లో.. నేరాలకు పాల్పడ్డాడు. ఛార్లెస్‌ శోభరాజ్‌ నేరచరిత నుంచి బయటకు రాని విషయాలెన్నో.  అసలు నేరస్థుడిగా ఎందుకు మారాడు? ఆ నేరాల వెనుక ఉద్దేశం ఏంటన్న దానిపై అతను పెదవి విప్పకపోవడంతో.. ఒక క్లారిటీ అంటూ లేకుండా పోయింది.  ఛార్లెస్‌ శోభరాజ్‌ మీద.. నాలుగు బయోగ్రఫీలు, మూడు డాక్యుమెంటరీలతో పాటు మే ఔర్‌ ఛార్లెస్‌ పేరిట ఓ హిందీ చిత్రం వచ్చింది. అలాగే.. 2021లో ది సెర్పెంట్‌ పేరుతో బీబీసీ/నెట్‌ఫ్లిక్స్‌ వాళ్లు ఎనిమిది భాగాలుగా తీసిన డ్రామా సిరీస్‌ కూడా పాపులారిటీ సంపాదించుకున్నాయి.

ఖాట్మాండు: ఫ్రెంచ్‌ సీరియల్‌ కిల్లర్‌ చార్లెస్‌ శోభరాజ్‌కు.. 19 ఏళ్ల  జైలు శిక్ష తర్వాత ఊరట లభించింది. వయసు రీత్యా అతన్ని విడుదల చేయాలని నేపాల్‌ సుప్రీంకోర్టు ఆదేశించింది. ఇద్దరు అమెరికన్‌ టూరిస్టులను హత్య చేసిన ఆరోపణలపై చార్లెస్‌ శోభరాజ్‌ 2003 నుంచి నేపాల్‌ జైలులో శిక్ష అనుభవిస్తున్నాడు. అతని వయసు ఇప్పుడు 78 ఏళ్లు. 1975లో శోభరాజ్‌ నేపాల్‌లో నకిలీ పాస్‌పోర్ట్‌తో ప్రవేశించడం.. అమెరికా పౌరుడు 29 ఏళ్ల కొన్నీ జో బోరోన్‌జిచ్‌, అతని స్నేహితురాలు 26 ఏళ్ల కెనడియన్‌ లారెంట్‌ క్యారియర్‌ ఇద్దర్నీ హత్య చేసిన నేరంపై నేపాల్‌ జైలులో శిక్ష అనుభవిస్తున్నాడు. శోభరాజ్‌ తండ్రి భారతీయుడు. తల్లి వియత్నాం వాసి. శోభరాజ్‌కు ఫ్రెంచ్‌ పౌరసత్వం ఉంది. పూర్తి పేరు చార్లెస్ గురుముఖ్ శోభరాజ్ హాట్‌చంద్ భవనాని. అతని ఫోటో నేపాల్‌లోని ఒక వార్త పత్రికలో ప్రచురితమవ్వడంతో ఆచూకీ ప్రపంచానికి తెలిసింది. జంట హత్యలు చేసినందుకుగానూ ఖాట్మండులోని సెంట్రల్‌ జైలులో 20 ఏళ్లు శిక్ష, నకిలీ పాస్‌పోర్ట్‌ ఉపయోగించినందుకు గానూ ఒక ఏడాది జైలు శిక్ష కలిపి మొత్తం 21 ఏళ్లు జైలు శిక్షను అనుభవించాడు. అంతేగాదు రూ. 2 వేలు జరిమానా కూడా చెల్లించాడు. ఈ కరడుగట్టిన నేరస్తుడి గురించి సినిమాల్లో రిఫరెన్సులు ఉండడం, అతనిపై పలు సినిమాలు కూడా రావడం తెలిసిందే.  (చదవండి: రష్యా సైనికుల్లో సన్నగిల్లుతున్న ధైర్యం.. చావు తప్ప మరో మార్గం లేదంటూ..)


 ఖాట్మండూ: అంతర్జాతీయ నేరస్తుడు ఛార్లెస్‌ శోభరాజ్‌కు ఓపెన్‌హార్ట్‌ సర్జరీ చేయించేందుకు నేపాల్‌ ప్రభుత్వం ముందుకు వచ్చింది. వివిధ నేరాల కింద గత పన్నెండేళ్లుగా అతడు ఖాట్మండూ శివారులో ఉన్న సెంట్రల్‌ జైలులో జీవిత ఖైదు అనుభవిస్తున్నాడు. శోభరాజ్‌ ఆరోగ్యం క్షీణిస్తుండటంతో వైద్యుల బృందం పరీక్షలు జరిపి ఆపరేషన్‌ అవసరమని స్పష్టం చేసింది. ఖాట్మండూలోని షాహిద్‌ గంగాలాల్‌ ఆస్పత్రిలో అతడికి సోమవారం చికిత్స చేయనున్నారు. ఇందుకు అయ్యే ఖర్చునంతా నేపాలీ ప్రభుత్వం భరించనుందని వైద్యులు తెలిపారు.
 
 భారత, వియత్నాం దంపతులకు పుట్టిన ఛార్లెస్‌ శోభరాజ్‌(73) ఫ్రెంచి పౌరుడు. బికినీ కిల‍్లర్‌గా గుర్తింపు పొందిన 1970 దశకంలో ఇతడు సుమారు 20 మందిని హత్య చేసినట్లు ఆరోపణలున్నాయి. 1975లో జరిగిన అమెరికా దేశస్థురాలు కోనీ జో బ్రొన్‌జిక్‌ హత్య కేసులో ఖాట్మండూ జైలులో 2003 నుంచి శిక్ష అనుభవిస్తున్నాడు. నేపాల్‌ జీవిత ఖైదు 20 ఏళ్లు ఉంటుంది. ఇతడిపై మరిన్ని కేసులుండటంతో ఖైదు ముగిసి బయటకు వచ్చిన తర్వాత కూడా ఇతడికి స్వేచ్ఛ లభించే అవకాశాలు లేవు. ఇతడి చేతుల్లో ప్రాణాలు కోల్పోయిన వారిలో ఎక్కువమంది విదేశీ యాత్రికులే కావటం గమనార్హం.


 కట్మాండ్: ఉగ్రవాద సంస్థలకు తాను ఆయుధాలు సరఫరా చేశానని గతంలోనే ప్రకటించిన సీరియల్ బికినీ కిల్లర్, అంతర్జాతీయ నేరగాడు చార్లెస్ శోభరాజ్ ఆందోళన చెందుతున్నాడు. గత కొన్ని రోజులుగా తీవ్ర అనారోగ్య సమస్యలతో బాధపడుతున్న శోభరాజ్‌కు ఇటీవల గుండెపోటు వచ్చింది. ఈ శనివారం శోభరాజ్‌కు కట్మాండులోని గంగాలాల్ హార్ట్ సెంటర్‌లో ఓపెన్ హార్ట్ సర్జరీ నిర్వహించనున్నారు. అయితే ఆపరేషన్ తర్వాత తాను బతికే ఉంటానన్న నమ్మకం లేదని.. ఇలాగా తాను కొందరికి ఫోన్ చేయాలని అందుకు పర్మిషన్ ఇవ్వాలని జైలు అధికారులను శోభరాజ్ కోరాడు.
 
 శోభరాజ్ గుండెలో ఓ వాల్వ్ పూర్తిగా దెబ్బతిందని త్వరగా వైద్యం చేయాలని డాక్టర్లు అతడికి సూచించారు. అయితే తన సొంత దేశమైన ఫ్రాన్స్ లోని ప్యారిస్‌లో సర్జరీకి పర్మిషన్ ఇవ్వాలని విజ్ఞప్తి చేయగా అవకాశం ఇవ్వలేదు. ఫ్రాన్స్‌లో అయితే ఆపరేషన్ రిస్క్ 1 శాతం ఉండగా, కట్మాండులో మాత్రం రిస్క్ 3-5శాతం ఉంటుంది. దీంతో తన ప్రాణాలు పోతాయన్న భయం శోభరాజ్‌కు పట్టుకుందని ఆయనకు గత ఐదేళ్లుగా ట్రీట్‌మెంట్ ఇస్తున్న సీనియర్ డాక్టర్ తెలిపారు. ఓ వాల్వ్ దెబ్బతిన్నది. జూన్ 10న సర్జరీ నిర్వహిస్తాం. అతడి పరిస్థితి నార్మల్‌గానే ఉంది కానీ అతడిలో ప్రాణభయం పెరిగిపోయిందని డాక్టర్లు చెబుతున్నారు.
 
 '2016 చివరలో జైలు నుంచి విడుదలై ఫ్రాన్స్ వెళ్లి సర్జరీ చేయించుకోవాలి అనుకున్నాను. నేపాల్ సుప్రీంకోర్టులో ఇటీవల విచారణకు హాజరు కాగా.. నేపాల్ లోనే నువ్వు చావడం ఖాయమని నాపై కేసు వేసిన వ్యక్తి బెదిరించాడు. దీంతో ప్యారిస్‌లో సర్జరీ చేయించుకునేందుకు పర్మిషన్ ఇప్పించాలని ఫ్రాన్స్ ఎంబసీకి నేను రాశాను. ఆరోగ్యం బాగాలేని కారణంగా త్వరగా విడుదల చేయాలని మరోసారి విజ్ఞప్తి చేస్తాను. కట్మాండు నుంచి ప్యారిస్ వెళ్లి నేను చేయాల్సిన పనులు పూర్తిచేయాలని భావిస్తున్నానని' చార్లెస్ శోభరాజ్  చెప్పినట్లు సమాచారం.
 
 ఆగ్నేయ ఆసియా కేంద్రంగా దాదాపు డజనుకు పైగా దేశాలకు చెందిన మహిళలను అతి క్రూరంగా హత్యచేయడంతోపాటు మాదకద్రవ్యాలు, అక్రమ ఆయుధాల సరఫరా తదితర నేరాల్లో ఆరితేరిన శోభరాజ్‌.. న్యూఢిల్లీలోని తీహార్ జైల్లో సెక్యూరిటీ సిబ్బందికి మత్తు మందు ఇచ్చి 1986లో పరారయ్యాడు. ఆపై అమెరికా మహిళ కొనీ జో బ్రాజించ్ హత్య కేసులో కాట్మండు జైలులో సుమారు 20 ఏళ్లు శిక్ష అనుభవించాడు. 2003లో ఓ క్యాసినో నుంచి తప్పించుకునే క్రమంలో కట్మాండు పోలీసులకు చిక్కి ప్రస్తుతం అక్కడే జైలు శిక్ష అనుభవిస్తున్నాడు.


 సినిమా కంటే ఎక్కువగా ప్రైమ్ టైమ్ లో క్రైమ్ వార్తలు ప్రసారం చేస్తున్న మీడియానే యువతకు నేర సంబంధిత విషయాలు చెబుతుందంటున్నాడు బాలీవుడ్ నటుడు రణదీప్ హుడా. మరి ఆయన తాజా చిత్రం 'మై ఔర్ చార్లెస్' ఏమైనా శాంతిప్రవచనాలు బోధిస్తుందా? అని ప్రశ్నిస్తే మాత్రం డొంక తిరుగుడుగా..
 
 'మేము తెరకెక్కిస్తున్న చార్లెస్ శోభరాజ్ సాధారణ వ్యక్తేమీ కాదు. అతని ప్రతి అడుగు ఓ సంచలనమే. బికినీ కిల్లర్ గా పేరు పొందిన ఆయన దేశంలోనే అత్యంత పటిష్ఠమైన తీహార్ జైలు నుంచి పారిపోయాడు. ఫ్రాన్స్ ఫ్యాషన్ రంగంలో పాదం మోపాడు ఎన్నెన్నో దేశాల్లో ఎన్నెన్నో నేరాలు.. ఇలాంటి ట్విస్టుల కంటే ఒక సినిమా కథకు ఇంకేం కావాలి చెప్పాండి' అంటూ సమాధానమిచ్చాడు.
 
 ఆగ్నేయ ఆసియా కేంద్రంగా దాదాపు డజనుకు పైగా దేశాలకు చెందిన మహిళలను అతి క్రూరంగా హత్యచేయడంతోపాటు మాదకద్రవ్యాలు, అక్రమ ఆయుధాల సరఫరా తదితర నేరాల్లో ఆరితేరి.. ప్రస్తుతం కఠ్మాండు జైలులో యావజ్జీవ శిక్ష అనుభవిస్తున్నాడు చార్లెస్ శోభరాజ్. అతడిని పట్టుకునే క్రమంలో ఎదురైన అనుభవాలను వివరిస్తూ ఓ ఢిల్లీ పోలీస్ ఆఫీసర్ పుస్తకం రాశారు. దాని ఆధారంగా  దర్శకుడు ప్రవాల్ రమణ్ 'మై ఔర్ చార్లెస్' సినిమా తీశారు. చార్లెస్ శోభరాజ్ పాత్రలో రణదీప్ హుడా, రిచా చడ్డా, ఆదిల్ హుస్సేన్ ఇతర పాత్రల్లో నటిస్తున్న ఈ చిత్రం అక్టోబర్ 30న విడుదల కానుంది.


 అంతర్జాతీయ ఉగ్రవాద సంస్థ తాలిబాన్ కు తాను ఆయుధాలు సరఫరా చేశానని సీరియల్ కిల్లర్, బికినీ కిల్లర్ గా పేరొందిన చార్లెస్ శోభరాజ్ వెల్లడించారు. తీహార్ జైల్లో జైష్ ఏ మహ్మద్ సంస్థ అధినేత మసూద్ అజర్ తనకు పరిచయం ఏర్పడిందని శోభరాజ్ తెలిపారు. అంతేకాకుండా అమెరికా గూఢచార సంస్థ సీఐఏతో కూడా గతంలో సన్నిహిత సంబంధాలున్నాయన్నారు. 
  
 1999 డిసెంబర్ లో కాట్మండ్ నుంచి కాంధార్ వెళ్లే ఇండియన్ ఎయిర్ లైన్స్ విమానం హైజాక్ తర్వాత ప్రయాణికులను విడిపించేందుకు మసూద్ తోపాటు మరో ఇద్దరు ఉగ్రవాదులను విడిచిపెట్టారని.. ఆతర్వాత తాను మసూద్ లు కలుసుకున్నామని.. ఆయుధాల కోసం తాలిబాన్లు మాదక ద్రవ్యాలను అమ్మేవారని శోభరాజ్ తెలిపారు. మసూద్ తో ఉన్న పరిచయంతో తాలిబాన్లకు చైనా నేరస్థులతో కలిసి ఆయుధాల డీలర్ గా పనిచేశానన్నారు. 
  
 అరెస్ట్ అయ్యాక తనతో సీఐఏతో తెగతెంపులు చేసుకుందని, తనకు ఎలాంటి సహాయం చేయలేదని, ఉగ్రవాదంపై పోరాటానికి తాను తన ప్రాణాలను పణంగా పెట్టానని శోభరాజ్ అన్నారు. 2003లో ఇరాక్ యుద్ద సమయంలో సద్దాం హుస్సేన్ ఏజెంట్ ను తాను కలిశానని శోభరాజ్ అన్నారు. 
  
 తీహార్ జైల్లో శిక్ష అనుభవిస్తున్న సమయంలో సెక్యూరిటీ సిబ్బందికి స్వీట్స్ లో మత్తు మందు కలిపి ఇచ్చి 1986లో జైలు నుంచి పరారయ్యాడు. అమెరికా మహిళ కొనీ జో బ్రాజించ్ హత్య కేసులో కాట్మండ్ జైలులో సుమారు 20 ఏళ్లు శిక్ష అనుభవించాడు. శోభరాజ్ తన జీవిత కాలంలో 50 శాతం పలు నేరాల్లో శిక్ష అనుభవించాడు. తన జీవితంలో అనేక విషయాలను ఇటీవల మీడియాతో పంచుకున్నాడు.