సాక్షి,ముంబై: చైనీస్ ఈ-కామర్స్, రిటైల్, టెక్నాలజీ, ఇన్వెస్ట్‌మెంట్ దిగ్గజం అలీబాబా షాకింగ్‌ నిర్ణయం తీసుకుంది. One97 కమ్యూని కేషన్స్ (పేటీఎం) నుంచి పూర్తిగా నిష్క్రమించింది.   బ్లాక్‌డీల్‌ ద్వారా రెండు కోట్లకు పైగా  పేటీఎం షేర్లను విక్రయించింది. ఇండియా ఈకామర్స్‌ బిజినెస్‌లోకి భారీ పెట్టుబడులతో దూసుకొచ్చిన అలీబాబా (పేటీఎం)లో తన మొత్తం వాటాలను అమ్మేసింది. తాజా నివేదికల ప్రకారం బ్లాక్‌డీల్‌ ద్వారా శుక్రవారం మొత్తం 3.4 శాతం ఈక్విటీ లేదా 2.1 కోట్ల షేర్లను విక్రయించింది.  జొమాటో, బిగ్‌బాస్కెట్‌ తరువాత తాజాగా అలీబాబా వాటాలను పూర్తిగి సెల్‌ చేసింది. ఎన్‌ఎస్‌ఈలో మొత్తం 4.73 కోట్ల షేర్లు చేతులు మారినట్లు డేటా చూపించింది. మొత్తం టర్నోవర్ రూ.3,097 కోట్లుగా ఉంది. రెండు వారాల సగటు 8 లక్షల షేర్లకు వ్యతిరేకంగా మొత్తం 19.61 లక్షల  పేటీం షేర్లు బీఎస్‌ఈలో చేతులు మారాయి.  ఫలితంగా పేటీఎం షేరు  7.85 శాతం తగ్గి రూ.650.75 వద్ద ముగిసింది.  కాగా 2023లో ఇప్పటివరకు స్క్రిప్ 22 శాతం పెరిగింది. పేటీఎంలోని 6.26 శాతం ఈక్విటీ వాటా ఉన్న అలీబాబా జనవరిలో 3.1 శాతం విక్రయించింది. విజయ్ శేఖర్శర్మ నేతృత్వంలోని కంపెనీ గత ఏడాది ఇదే త్రైమాసికంలో రూ.778.5 కోట్ల నష్టంతో పోలిస్తే 50 శాతం తగ్గి, డిసెంబర్ త్రైమాసికంలో నష్టాలను రూ.392 కోట్లకు తగ్గించుకుంది. సాఫ్ట్‌బ్యాంక్ మద్దతున్న పేటీఎం ఆదాయం గత ఏడాది త్రైమాసికంలో రూ.1,456 కోట్ల నుంచి 42 శాతం పెరిగి రూ.2,062 కోట్లను ఆర్జించింది.


 సాక్షి, అమవరావతి: సోమవారం మార్కెట్లు నష్టాల్లో ముగిసినా జీవీకే ఇన్‌ఫ్రా షేరు 10 శాతం పెరిగి రూ. 6.90 వద్ద ముగిసింది. ఒకానొక దశలో రూ.7.45 గరిష్ట స్థాయికి చేరినా చివరకు క్రితం ముగింపుతో పోలిస్తే 60 పైసల లాభంతో రూ. 6.90 వద్ద ముగిసింది. మార్కెట్ ప్రారంభంలోనే బ్లాక్‌డీల్ జరగడంతో ఈ కౌంటర్లో రోజంతా భారీగా లావాదేవీలు జరిగాయి. సాధారణంగా రెండు ఎక్స్ఛేంజీల్లో కలిపి రోజుకు 63 లక్షల షేర్లు (30 రోజుల సగటు) మారుతుంటే సోమవారం ఒక్కరోజే సుమారు 10 కోట్ల షేర్లు చేతులు మారడం గమనార్హం. ఉదయం 9.25 నిమిషాలకు రూ. 6.30 ధర వద్ద 5.71 కోట్ల షేర్లు బ్లాక్‌డీల్ రూపంలో చేతులు మారాయి.
 ఈ డీల్ విలువ రూ. 36 కోట్లు.  హెచ్‌ఎస్‌బీసీ గ్లోబల్ ఇన్వెస్ట్‌మెంట్ ఫండ్స్ మారిషస్ లిమిటెడ్ తన షేర్లను హెచ్‌ఎస్‌బీసీ గ్లోబల్ ఇన్వెస్ట్‌మెంట్ ఫండ్స్ ఇండియన్ ఈక్విటీకి మార్చినట్లు బీఎస్‌ఈ డేటా వెల్లడిస్తోంది. ఒకానొక దశలో రాకేష్ ఝున్‌ఝున్‌వాలా జీవీకే షేర్లను పెద్ద ఎత్తున కొనుగోలు చేస్తున్నట్లు మార్కెట్లో పుకార్లు షికార్లు చేశాయి. జీవీకేలో ప్రమోటర్లకు 54.25 శాతం వాటా ఉండగా, మార్కెట్ క్యాప్ రూ.1,094 కోట్లుగా ఉంది.