సాక్షి, అమరావతి: ఆరోగ్యశ్రీ నెట్‌వర్క్‌ ఆసుపత్రులకు రూ.203 కోట్లు బిల్లు చెల్లింపులు చేపట్టినట్లు ఆరోగ్యశ్రీ ముఖ్య కార్యనిర్వహణాధికారి (సీఈవో) డాక్టర్‌ లక్ష్మిషా మంగళవారం తెలిపారు. మిగతా బిల్లుల చెల్లింపులు వీలైనంత త్వరగా చేపడతామన్నారు. ఆసుపత్రుల యాజమాన్యాలు సహకరించాలని విజ్ఞప్తి చేశారు. ఈ పథకం కింద పేద, మధ్యతరగతి రోగులకు ఉచిత వైద్యసేవలు అందించేందుకు ప్రాధాన్యత ఇస్తున్నట్లు తెలిపారు. పెండింగ్‌ బిల్లుల చెల్లింపులపై ఆరోగ్యశ్రీ ట్రస్ట్‌ అధికారులు, ఆంధ్రప్రదేశ్‌ స్పెషాలిటీ హాస్పిటల్‌ అసోసియేషన్‌ (ఆశా) ప్రతినిధుల మధ్య చర్చలు జరుగుతున​ సంగతి తెలిసిందే. మరోవైపు.. రాష్ట్ర వ్యాప్తంగా ఆరోగ్యశ్రీ సేవలు యథావిధిగా కొనసాగుతున్నాయని ఆరోగ్యశ్రీ సీఈవో డాక్టర్‌ లక్ష్మిషా స్పష్టం చేశారు.

లేఅవుట్లను సందర్శించిన ఢిల్లీ సెక్రటేరియట్‌ బృందం ప్రత్తిపాడు: ఇళ్లు ఎలా ఉన్నాయి? నిర్మాణానికి ఎంత ఖర్చయింది? ప్రభుత్వం ఎంత ఇచ్చింది? మీకు అదనంగా ఎంత ఖర్చయింది? కాలనీలో వసతులు ఎలా ఉన్నాయి? అంటూ ఢిల్లీ సెక్రటేరియట్‌ అధికారుల బృందం హౌసింగ్‌ లబ్ధిదారులను అడిగి తెలుసుకున్నారు. ప్రత్తిపాడులోని జగనన్న హౌసింగ్‌ లే అవుట్‌ను మంగళవారం మధ్యాహ్నం ఢిల్లీ సెక్రటేరియట్‌లో అసిస్టెంట్‌ సెక్షన్‌ ఆఫీసర్లుగా చేస్తున్న ఆరుగురు అధికారుల బృందం సందర్శించింది. సెక్రటేరియట్‌ ఏఎస్‌ఓలు జలేష్‌యాదవ్‌, అమర్‌దీప్‌ చౌహాన్‌, ధృవ్‌ దమిజా, కపిల్‌, పూజా, శృతి కాలనీలోని ఇళ్లను పరిశీలించి లబ్ధిదారులతో మాట్లాడారు. విద్యుత్‌ సౌకర్యం, డ్రెయినేజీ సౌకర్యం, మంచి నీటి కుళాయిలు ఉన్నాయా లేవా అన్న విషయాలను గృహాల్లోకి వెళ్లి పరిశీలించారు. కాలనీలో ఇబ్బందులు లేవని లబ్ధిదారులు బృందానికి వివరించారు. రాష్ట్ర ప్రభుత్వం తమకు ఉచితంగా ఇంటి స్థలాన్ని అందించిందని, రిజిస్ట్రేషన్‌ చేసి మరీ తమకు డాక్యుమెంట్లు అందజేసిందని వెల్లడించారు. రిజిస్ట్రేషన్‌ డాక్యుమెంట్లను బృంద సభ్యులకు చూపించి ఆనందం వ్యక్తం చేశారు. ● అనంతరం నడింపాలెం గ్రామంలో బృందం పర్యటించింది. సంపద కేంద్రం (సాలిడ్‌ వేస్ట్‌ మేనేజ్‌మెంట్‌ సెంటర్‌)లో గ్రామ పంచాయతీ చేస్తున్న వర్మీ కంపోస్టు తయారీని పరిశీలించారు. నాణ్యత బాగుండటంతో అధికారుల బృందం 12 ప్యాకెట్లను కొనుగోలు చేసింది. ● తుమ్మలపాలెంలో పర్యటించిన బృందం ఆ గ్రామంలో అమలవుతున్న జలజీవన్‌ మిషన్‌ పథకాన్ని పరిశీలించింది. బృందం వెంట నోడల్‌ ఆఫీసర్‌ నాగానంద్‌, అసిస్టెంట్‌ నోడల్‌ ఆఫీసర్‌ జీవీఆర్‌ గుప్తా, డీపీఆర్‌సి డీటీఎం నాగేశ్వరరావు, ప్రత్తిపాడు మండల ఇన్‌చార్జి ఈవోపీఆర్డీ షేక్‌ ఖాజా, పంచాయతీ కార్యదర్శి జాన్‌పీరా తుమ్మలపాలెం శివాజీ తదితరులు ఉన్నారు.

కొరిటెపాడు(గుంటూరు): గుంటూరు జిల్లాలో సోమవారం ఉదయం నుంచి మంగళవారం ఉదయం వరకు మూడు మండలాల్లో వర్షం పడింది. మంగళగిరి మండలంలో 16.6 మిల్లీమీటర్లు, తుళ్ళూరు మండలంలో 5.8 మి.మీ., కొల్లిపర మండలంలో 5.2 మి.మీ. చొప్పున వర్షం పడింది. మే 21 వరకు జిల్లాలో సాధారణ వర్షపాతం 42.2 మి.మీ నమోదు కావాల్సి ఉండగా, ఇప్పటి వరకు 83.8 మి.మీ. వర్షపాతం నమోదైంది. కాశీలో నృత్యనీరాజనానికి తెనాలి చిన్నారులు తెనాలి: పట్టణానికి చెందిన నృత్యశిక్షణ సంస్థ శ్రీకళ్యాణి కూచిపూడి ఆర్ట్స్‌ అకాడమీకి అరుదైన అవకాశం లభించింది. పవిత్ర పుణ్యక్షేత్రమైన కాశీలో శ్రీకాశీ విశ్వనాథ్‌స్వామి ఆలయంలో నర్తించే అవకాశం లభించింది. భారత్‌ ఆర్ట్స్‌ అకాడమీ, ఏబీసీ ఫౌండేషన్‌, శ్రీకాశీ విశ్వేశ్వర ట్రస్ట్‌ సంయుక్త ఆధ్వర్యంలో ఈనెల 25న అక్కడ జరిగే నృత్యనీరాజనంలో నృత్యాంశాలను ప్రదర్శించనున్నట్టు అకాడమీ వ్యవస్థాపకురాలు, ప్రముఖ నృత్యగురువు డాక్టర్‌ చల్లా బాలత్రిపుర సుందరి తెలిపారు. తెనాలి నుంచి తమ బృందానికి మాత్రమే ఈ అవకాశం లభించిందని చెప్పారు. తనతోపాటు వలివేటి మోక్షిత, చలమలశెట్టి మహతి, వల్లూరు వరలక్ష్మి, పావని, భావజ్ఞసాయి సహా మొత్తం 21 మంది అక్కడ బృంద నాట్యాలను ప్రదర్శించనున్నట్టు వివరించారు. బృందంలోని కొంతమందితో బయలుదేరి వెళ్లారు.

● సచివాలయ ఉద్యోగి హత్య కేసును ఆత్మహత్యగా చిత్రీకరించొద్దు ● పొన్నూరు అంబేడ్కర్‌ సెంటర్‌లో కుటుంబ సభ్యుల నిరసన ● దారుణం జరిగి 14 రోజులైనా చర్యల్లేవని ఆందోళన పొన్నూరు: సచివాలయ ఉద్యోగి హత్యకు కారకులైన వారిని వెంటనే అరెస్టు చేయాలని కోరుతూ బాధిత కుటుంబ సభ్యులు సోమవారం పట్టణంలోని అంబేడ్కర్‌ సెంటర్‌లో బైఠాయించి నిరసన వ్యక్తం చేశారు. హత్యను, ఆత్మహత్యగా చిత్రీకరించేందుకు పోలీసులు యత్నిస్తున్నారని ఆరోపించారు. వివరాల ప్రకారం కొల్లిపర మండలం సిరిపురం గ్రామానికి చెందిన తుల్లిమిల్లి కిషోర్‌బాబు పట్టణ పరిధిలోని సచివాలయంలో ఎమినిటీస్‌ సెక్రటరీగా పనిచేస్తున్నాడు. తన భార్య చంద్రకళ సచివాలయ మహిళా పోలీస్‌గా విధులు నిర్వహిస్తోంది. వీరిద్దరికీ 11 నెలల క్రితం వివాహం జరిగింది. తన భార్య బదిలీపై మాచర్ల నుంచి పొన్నూరు రావడంతో కిషోర్‌బాబు కూడా పొన్నూరుకు బదిలీ చేయించుకున్నాడు. హఠాత్తుగా ఈనెల 7న కిషోర్‌బాబు నిడుబ్రోలు చెరువులో శవంగా తేలాడు. పోలీసులు ఆత్మహత్యగా కేసు నమోదు చేశారు. మృతుడి ఒంటిపై గాయాలను గుర్తించిన కుటుంబ సభ్యులు కిషోర్‌బాబు మృతిపై అనుమానాలు ఉన్నాయని, అతని భార్య, కుటుంబ సభ్యులపై పోలీసులకు ఫిర్యాదు చేశారు. పోలీసుల అజాగ్రత్త వల్లే హత్య కేసు నమోదై 14 రోజులు గడుస్తున్నా కిషోర్‌బాబు హత్యకు కారకులైన వారిపై చర్యలు తీసు కోలేదని, నిందితులను తప్పించేందుకు పోలీసులు యత్నిస్తున్నారని ఆరోపిస్తూ అతడి కుటుంబ సభ్యులు సోమవారం నిరసన చేపట్టారు. అనంతరం విలేకరులతో మాట్లాడారు. భార్య, బావమరుదులు, వారి పెదనాన్న తనను హత్య చేసేందుకు యత్నిస్తున్నారని, వారి నుంచి రక్షణ కల్పించాలని కోరుతూ ఈ నెల 6న కిషోర్‌బాబు పోలీసులకు ఫిర్యాదు చేశాడని, అప్పుడే వారు చర్యలు తీసుకుని ఉంటే కిషోర్‌బాబు బతికి ఉండేవాడని ఆవేదన వ్యక్తం చేశారు. ఆ రాత్రే కిషోర్‌బాబు శవమై చెరువులో తేలాడని కన్నీరుమున్నీరయ్యారు. కిషోర్‌బాబు మృతిపై పూర్తిస్థాయి విచారణ చేపట్టి నిందితులను అరెస్టు చేయాలని డిమాండ్‌ చేశారు. అనంతరం కుటుంబ సభ్యులు నిరాహార దీక్ష చేపట్టేందుకు సిద్ధమవడంతో రూరల్‌ ఎస్‌ఐ భార్గవ్‌ ఘటన స్థలానికి చేరుకొని బాధితులకు సర్దిచెప్పి న్యాయం జరిగేలా చేస్తానని హామీ ఇచ్చారు.న్యాయం చేయండి నా కొడుకును దారుణంగా కొట్టి చంపిన వారిని వారిని వెంటనే అరెస్టు చేయాలి. కేసును నీరుగార్చేందుకు పోలీసులు యత్నిస్తున్నారు. హత్యకు గురైన నాకొడుకు మరణాన్ని ఆత్మహత్యగా చిత్రీకరించేందుకు నా చేత సంతకం చేయించుకున్నారు. వెంటనే బాధ్యులపై కేసు నమోదు చేసి కఠిన శిక్ష పడేలా చేయాలి. న్యాయం చేయాలని కోరుతున్నా. – ప్రేమలత, కిషోర్‌బాబు తల్లి

గుంటూరు మెడికల్‌: ఆణిముత్యాల్లాంటి ఎందరో వైద్యులను ప్రపంచానికి అందించిన ఘనత దక్కించుకున్న గుంటూరు వైద్య కళాశాల అభివృద్ధికి సీఎం వైఎస్‌ జగన్‌మోహన్‌రెడ్డి ప్రత్యేక కృషి చేశారు. గతంలో ఎన్నడూ లేని విధంగా ఎప్పటి నుంచో ఖాళీగా ఉన్న వైద్యులు, వైద్య సిబ్బంది పోస్టులను భర్తీ చేశారు. అదనంగానూ పోస్టులు మంజూరు చేశారు. కళాశాల అభివృద్ధి కోసం ప్రత్యేకంగా నిధులు విడుదల చేశారు. 52 పీజీ సీట్లు వైద్య కళాశాలకు తీసుకొచ్చిన ఘనత సీఎం వైఎస్‌ జగన్‌మోహన్‌రెడ్డికే దక్కుతోంది. ఆయన పాలనలో వైద్యకళాశాల సువర్ణాధ్యాయాన్ని లిఖించింది. చరిత్ర ఘనమే గుంటూరు వైద్య కళాశాల 1946లో ప్రారంభమైంది. ప్రపంచ వ్యాప్తంగా ఎక్కడకు వెళ్లినా గుంటూరు వైద్య కళాశాలలో చదువుకున్న వైద్యులు కనిపిస్తారు. భారతదేశంలో ఏర్పాటైన తొలి రెండు వైద్య కళాశాలల్లో గుంటూరు ఒకటి. అప్పటి ఉమ్మడి మద్రాసు రాష్ట్ర ఆరోగ్యశాఖ మంత్రి ఆచంట రుక్మిణమ్మ కృషి ఫలితంగా ఆంధ్ర తొలి ముఖ్యమంత్రి టంగుటూరి ప్రకాశం పంతులు చొరవతో గుంటూరు వైద్య కళాశాల ఏర్పాటైంది. ఎంతో మంది రాజకీయ నాయకులను అందించిన ఘన చరిత్ర కలిగిన గుంటూరు వైద్య కళాశాల అభివృద్ధికి గతంలో ఎవరూ చూపని చొరవను ముఖ్యమంత్రి వైఎస్‌ జగన్‌మోహన్‌రెడ్డి చూపించారనడంలో ఎలాంటి సందేహం లేదు. ఇవిగో సీఎం చేసిన విప్లవాత్మక మార్పులు ● గుంటూరు వైద్య కళాశాల చరిత్రలో కనీవినీ ఎరుగని రీతిలో ఒకే ఏడాదిలో 34 పీజీ సీట్లు మంజూరు చేసిన ఘనత సీఎం వైఎస్‌ జగన్‌కే దక్కుతోంది. ఈ ఐదేళ్లలో మొత్తం 52 పీజీ సీట్లు కళాశాలకు మంజూరు చేయడం విశేషం. ● గుంటూరు వైద్య కళాశాల ఏర్పడి 75 ఏళ్లు గడిచినా ఎంతో కీలకమైన ప్రిన్సిపాల్‌ పోస్టుకు అడిషనల్‌ డీఎంఈ హోదా లేదు. దీనివల్లనేషనల్‌ మెడికల్‌ కమిషన్‌ (ఎన్‌ఎంసీ) తనిఖీల సమయంలో అడిషనల్‌ డీఎంఈ హోదా లేని ప్రిన్సిపాల్‌ వల్ల ఇబ్బందులు పడేవారు. దీనిని గుర్తించిన సీఎం వైద్య కళాశాల ప్రిన్సిపాల్‌ పోస్టుకు అడిషనల్‌ డీఎంఈ హోదాకల్పించారు. ● గతంలో ప్రొఫెసర్లు, అసోసియేట్‌లు, అసిస్టెంట్‌ ప్రొఫెసర్లు ప్రమోషన్లు లేక అవస్థలు పడేవారు. సీఎంగా వైఎస్‌ జగన్‌మోహన్‌రెడ్డి బాధ్యతలు చేపట్టాక కళాశాల బోధనా సిబ్బంది, అందరికీ ప్రమోషన్లు ఇచ్చారు. ● ఎప్పటి నుంచో ఖాళీగా ఉన్న వైద్యుల పోస్టులను భర్తీ చేశారు. వైద్య విద్యార్థులకు నాణ్యమైన విద్యా బోధన, రోగులకు సత్వర మెరుగైన చికిత్సలు అందించేందుకు అదనంగా పోస్టులనూ రాష్ట్ర ప్రభుత్వం మంజూరు చేసింది. ● ప్రొఫెసర్లు 15, అసోసియేట్‌ ప్రొఫెసర్లు 15, అసిస్టెంట్‌ ప్రొఫెసర్లు 31 పోస్టులు నూతనంగా మంజూరు చేసి అరుదైన రికార్డును సీఎం వైఎస్‌ జగన్‌మోహన్‌రెడ్డి సృష్టించారు. ● వైద్య కళాశాలలో సుమారు 25 ఏళ్లుగా ఖాళీగా ఉన్న 32 పారా మెడికల్‌ పోస్టులు భర్తీ చేసి అదనంగానూ పోస్టులు మంజూరు చేశారు. మెడికల్‌ ఆంకాలజీ, సర్జికల్‌ ఆంకాలజీ, హాస్పిటల్‌ అడ్మినిస్ట్రేషన్‌, ఎమర్జన్సీ మెడిసిన్‌ వైద్య విభాగాలను నూతనంగా మంజూరు చేశారు. పలు వైద్య విభాగాల్లో అదనంగా యూనిట్లు మంజూరు చేశారు. నిధులు మంజూరు గతంలో ఎన్నడూ లేని విధంగా వైద్య కళాశాల అభివృద్ధి కోసం సీఎం వైఎస్‌ జగన్‌మోహన్‌రెడ్డి నాడు–నేడు కార్యక్రమంలో భాగంగా రూ.500 కోట్లు మంజూరు చేశారు. వైద్య కళాశాలకు అనుబంధంగా ఉన్న ప్రభుత్వ ఛాతి, సాంక్రమిత వ్యాధుల ఆస్పత్రి అభివృద్ధికి రూ.50 కోట్లు మంజూరు చేశారు. వైద్య కళాశాలలో పీజీ సీట్లకు వసతులు కల్పించేందుకు రూ.50 కోట్లు మంజూరు చేశారు. మైక్రో బయాలజీ, పెథాలజీ, బ్లడ్‌బ్యాంక్‌, డెర్మటాలజీ వైద్య విభాగాల్లో కోట్లాది రూపాయలతో వైద్య పరికరాలు అందజేశారు. అభివృద్ధికి సీఎం వైఎస్‌ జగన్‌ ప్రత్యేక కృషి ప్రత్యేకంగా రూ.500 కోట్లు మంజూరు గతంలో ఎన్నడూ లేని విధంగా ఒకేసారి 52 పీజీ సీట్లు కేటాయింపు నూతనంగా వైద్య విభాగాల ఏర్పాటుకు చర్యలు వైద్యులు, వైద్య సిబ్బంది పోస్టుల భర్తీ