● హాజీపూర్‌ మండల కేంద్రంలో ఒకరి దారుణహత్య మంచిర్యాలరూరల్‌(హాజీపూర్‌): వివాహేతర సంబంధం ఒకరి ప్రాణం తీసింది. అక్రమ సంబంధం కారణంగా ఒకరిని దారుణంగా హత్య చేసిన సంఘటన హాజీపూర్‌ మండల కేంద్రంలో చోటు చేసుకుంది. పోలీసులు తెలిపిన ప్రకారం సంఘటనకు సంబంధించిన వివరాలు ఇలా ఉన్నాయి. మండల కేంద్రానికి చెందిన మల్యాల నరేష్‌ (32), నిరోషా దంపతులకు 8 నెలల కుమార్తె సంతానం. ప్రస్తుతం నిరోషా మళ్లీ గర్భం దాల్చడంతో పుట్టింటికి వెళ్లింది. నరేశ్‌ కొంతకాలంగా స్థానికంగా ఉన్న ఓ వివాహితతో అక్రమ సంబంధం కొనసాగిస్తున్నాడు. సదరు మహిళ సోదరుడు చైతన్యకు విషయం తెలియడంతో తీవ్రంగా మందలించాడు. అయినా పట్టించుకోకుండా అక్రమ సంబంధం కొనసాగిస్తూ వస్తున్నాడు. మంగళవారం రాత్రి నరేష్‌ తన సోదరితో ఉన్నట్లు సమాచారం తెలుసుకున్న చైతన్య మద్యం సేవించి నేరుగా ఇంటికి వెళ్లి నరేష్‌తో గొడవకు దిగాడు. గట్టిగా తోసేయడంతో నరేష్‌ కిందపడి పోగా చైతన్య పక్కనే ఉన్న బండరాయితో కొట్టడంతో అక్కడికక్కడే మృతి చెందాడు. సమాచారం తెలుసుకున్న మంచిర్యాల రూరల్‌ సీఐ ఆకుల అశోక్‌, హాజీపూర్‌ ఎస్సై గోపతి సురేష్‌ సంఘటన స్థలాన్ని సందర్శించి మృతదేహాన్ని మంచిర్యాల ప్రభుత్వ ఆస్పత్రికి తరలించారు. మృతుని తండ్రి నర్సయ్య ఫిర్యాదు మేరకు కేసు నమోదు చేసి నిందితుడు చైతన్యను అరెస్టు చేసి రిమాండ్‌కు తరలించినట్లు సీఐ అశోక్‌ తెలిపారు.

ఒకరి మృతికి కారకులైన ఇద్దరికి జైలుశిక్షభీమిని: కన్నెపెల్లి మండలంలోని లింగాల గ్రామ పంచాయతీకి చెందిన చౌదరి వెంకన్న మృతికి కారకులైన ఇద్దరికి జైలుశిక్ష, జరిమానా విధిస్తూ మంచిర్యాల కోర్టు జడ్జి తీర్పునిచ్చినట్లు కన్నెపెల్లి ఎస్సై గంగారం తెలిపారు. లింగాల గ్రామానికి చెందిన చౌదరి వెంకన్న భార్య లక్ష్మి దన్నూరి రాజుతో అక్రమ సంబంధం పెట్టుకోవడంతో మనస్తాపానికి గురైన వెంకన్న 25 మార్చి 2019లో పురుగుల మందు తాగి ఆత్మహత్య చేసుకున్నాడు. మృతుని సోదరుడు చౌదరి మధుకర్‌ ఇచ్చిన ఫిర్యాదు మేరకు అప్పటి ఎస్సై రాజ్‌కుమార్‌ కేసు నమోదు చేసి దర్యాప్తు చేపట్టారు. బుధవారం అదనపు పబ్లిక్‌ ప్రాసిక్యూటర్‌ మదన్‌మోహన్‌, కోర్టు కానిస్టేబుల్‌ గట్టయ్య నిందితులను కోర్టులో ప్రవేశపెట్టగా నేరం రుజువుకావడంతో చౌదరి లక్ష్మికి ఐదేళ్లు, దన్నూరి రాజుకు మూడేళ్ల జైలుశిక్షతో పాటు ఇరువురికి రూ.వెయ్యి జరిమానా విధించినట్లు ఎస్సై తెలిపారు. చోరీ కేసులో నిందితుడి అరెస్టునెన్నెల: జెండా వెంకటాపూర్‌ గ్రామంలోని ఎస్కోరి కృష్ణవేణికి చెందిన కిరాణం షాపులో చోరీకి పాల్పడిన అదే గ్రామానికి చెంది దూట శశికాంత్‌ను బుధవారం అరెస్టు చేసినట్లు ఎస్సై ప్రసాద్‌ తెలిపారు. ఏప్రిల్‌ 2న రాత్రి దుకాణం తలుపులు గడ్డపారతో పగులగొట్టి బీరువాలో ఉన్న ఐదు తులాల బంగారు ఆభరణాలు, రూ.20 వేల నగదు దొంగిలించినట్లు తెలిపారు. బాధితురాలి ఫిర్యాదు మేరకు కేసు నమోదు చేసి ఆధారాలు సేకరించామన్నారు. వేలి ముద్రల ఆధారంగా నిందితుడిని పట్టుకున్నట్లు తెలిపారు. నిందితుని వద్ద నుంచి బంగారం స్వాధీనం చేసుకుని కోర్టులో హాజరు పరిచినట్లు ఎస్సై తెలిపారు. సింగరేణి రిటైర్డు కార్మికుడు ఆత్మహత్యమందమర్రిరూరల్‌: ఉరేసుకుని సింగరేణి రిటైర్డు కార్మికుడు ఆత్మహత్య చేసుకున్న సంఘటన మండలంలో చోటు చేసుకుంది. ఎస్సై రాజశేఖర్‌ తెలిపిన వివరాల ప్రకారం రామకృష్ణాపూర్‌ పోలీస్‌స్టేషన్‌ పరిధిలోని వెంకటాపూర్‌కు చెందిన సల్లూ రి బానయ్య (59) అనే సింగరేణి రిటైర్డ్‌ కార్మికుడి భార్య ఎనిమిదేళ్ల క్రితం మృతి చెందింది. దీంతో మనస్తాపానికి గురై మ ద్యానికి బానిసయ్యాడు. బుధవారం ఇంట్లో దూలానికి చీరతో ఉరేసుకుని ఆత్మహత్యకు పాల్పడ్డాడు. మృతుని కుమారుడు రాజ్‌కుమార్‌ ఇచ్చిన ఫిర్యాదు మేరకు కేసు దర్యాప్తు జరుపుతున్నట్లు ఎస్సై తెలిపారు.

● తాటి, ఈత చెట్లపై నిప్పులు కురిపిస్తున్న భానుడు ● ఎండ తీవ్రతకు మాడిపోతున్న చెట్లు ● కల్లు పారకం తగ్గి ఉపాధి కోల్పోతున్న గీత కార్మికులు 3 లీటర్లకు మించి పారుతలేదు ఎండల తీవ్రతకు పండుతాళ్ల నుంచి కల్లు సరిగా పారుత లేదు. పదేళ్ల క్రితం ఉన్న పరిస్థితులు ఇప్పుడు లేవ్‌. పండుతాళ్లు అప్పట్ల దినాం పది లీటర్లకు తక్కువ కాకుండా కల్లు పారేటివి. ఇప్పుడు రోజుకు 3 లీటర్లు కూడా పారడం గగనమవుతోంది. – ములుగూరి సురేందర్‌గౌడ్‌, గీత వృత్తి దారుడు బెల్లంపల్లి: ప్రకృతి పరంగా అత్యంత సహజ సిద్ధంగా కల్లును అందించే ఈత, తాటి వనాలపై భానుడు ఉగ్రరూపం ప్రదర్శిస్తున్నాడు. ఎండ తీవ్రతకు కల్లు పారకం చెట్లు విలవిలలాడుతున్నాయి. ఏపుగా ఎదిగిన చెట్లు కళ్లముందే నిలువున ఎండి పోయి నిర్జీవంగా మారుతుండటంతో వాటిపై ఆధారపడిన గీత వృత్తిదారులు (గౌడ కులస్తులు) ఆవేదన చెందుతున్నారు. ఇప్పటికే అనేకమంది గీత వృత్తిని వదులుకుని ప్రత్యామ్నాయ ఉపాధి మార్గాలను ఎంచుకుంటున్నారు. నిలువునా ఎండిపోతూ.. వేసవి తీవ్రత మానవులపైనే కాదు పశుపక్ష్యాదులతోపాటు వృక్షాలపై సైతం తీవ్ర ప్రభావం చూపుతోంది. ఉదయం 9 నుంచి సాయంత్రం 5 గంటల వరకు నిప్పుల వర్షం కురిపిస్తున్నాడు. జిల్లాలో పగటి ఉష్ణోగ్రత గరిష్టంగా 42 డిగ్రీల నుంచి 45 డిగ్రీలకు పైగా నమోదవుతోంది. నిప్పుల కుంపటిగా మారుతుండటంతో తాటి, ఈత వనాలు తాళలేకపోతున్నాయి. చెట్టు మొగి (చివరి) భాగం ఎండ తీవ్రతకు మాడిపోతున్నాయి. తాటాకులు పచ్చదనం కోల్పోయి నిర్జీవంగా మారుతున్నాయి. ఈత చెట్ల పరిస్థితి కూడా దయనీయంగా ఉంది. దినదినం భూగర్భజలాలు అండుగంటి పోతుండటంతో ఈత, తాటి వనాలకు సరిపడినంత నీరు అందడంలేదు. కల్లు పారకంపై ప్రభావం మండు వేసవిలోనూ తాటి, ఈత వనాలు కల్లును అందిస్తాయి. ఈ సీజన్‌లో తాటి చెట్లను పండుతాళ్లు అని సంబోధిస్తారు. ప్రకృతి తాటిచెట్లకు ముంజలు, ఈత చెట్లకు పండ్లను ప్రసాదిస్తుంది. ఎండ తీవ్రత అధికంగా ఉండటంతో చెట్ల నుంచి కల్లు పారకం తగ్గుముఖం పడుతోంది. దశాబ్దకాలం క్రితం వరకు ఎండాకాలంలోనూ ఒక్కో తాటి చెట్టు రోజుకు గరిష్టంగా 8 లీటర్ల నుంచి 10 లీటర్ల వరకు కల్లు పారగా కొంతకాలం నుంచి ఎండ తీవ్రతకు 3 లీటర్లకు మించి కల్లు పారడం లేదని గీత వృత్తిదారులు వాపోతున్నారు. ఈ పరిణామాల ప్రభావంతో అనేకమంది గీత వృత్తిదారులు ఉపాధి లేక అనాదిగా వస్తున్న గీత వృత్తిని వదులుకుని ప్రత్యామ్నాయ మార్గాలను ఎంచుకుంటున్నారు. బతుకు దెరువు కోసం ఇతర ప్రాంతాలకు వలసపోతున్నారు. కులవృత్తిపై ఆధారపడిన గీత కా ర్మికుల జీవనోపాధిని పెంపొందించడానికి ప్రభుత్వం తగి న సహాయ సహకారాలు అందించాలని కోరుతున్నారు. జిల్లాలో వనాల సంతతి తాటి, ఈత వనాలు జిల్లా నలుమూలల వ్యాపించి ఉన్నాయి. జిల్లాలో 18 మండలాలు ఉండగా వీటి పరిధిలో 1,76,891 ఈత చెట్లు , 37,016 తాటి చెట్లు ఉండగా 2,016 మంది గీత వృత్తి దారులు జీవనోపాధి పొందుతున్నట్లు ఎకై ్సజ్‌ శాఖ గణాంకాలు స్పష్టం చేస్తున్నాయి.

మంచిర్యాలటౌన్‌: జిల్లా బ్యాడ్మింటన్‌ అసోసియేషన్‌ ఆధ్వర్యంలో జిల్లా కేంద్రంలోని రంగంపేట్‌లోని మాస్టర్‌(రూబీ) బ్యాడ్మింటన్‌ అకాడమీలో గత నెల 29న ప్రారంభమైన ఉచిత బ్యాడ్మింటన్‌ శిక్షణ శిబిరం బుధవారం ముగిసింది. ఈ కార్యక్రమానికి జిల్లా బ్యాడ్మింటన్‌ అసోసియేషన్‌ సెక్రెటరీ పుల్లూరి సుధాకర్‌, ఆర్థోపెడిక్‌ వైద్యుడు ప్రవీణ్‌కుమార్‌ హాజరై క్రీడాకారులకు మెడల్స్‌ అందజేశారు. బ్యాడ్మింటన్‌ అసోసియేషన్‌ ట్రెజరర్‌ సత్యపాల్‌రెడ్డి, జాయింట్‌ సెక్రెటరీ మధు, రూబీ బ్యాడ్మింటన్‌ అకాడమీ బాధ్యుడు నరసింహస్వామి, కోచ్‌ సాయినాథ్‌ పాల్గొన్నారు.

● కొనసాగుతున్న తొలివిడత ప్రవేశాల ప్రక్రియ ● ఉమ్మడి జిల్లాలో 13 ప్రభుత్వ, 30కి పైగా ప్రైవేటు డిగ్రీ కళాశాలలునిర్మల్‌ఖిల్లా: ఇంటర్‌ ఉత్తీర్ణులైన విద్యార్థులు డిగ్రీ మొదటి సంవత్సరంలో ప్రవేశానికి దోస్త్‌ (డిగ్రీ ఆన్‌లైన్‌ సర్వీసెస్‌ ఆఫ్‌ తెలంగాణ) ప్రక్రియ కొనసాగుతోంది. ఉమ్మడి జిల్లాలోని ప్రభుత్వ, ప్రైవేటు డిగ్రీ కళాశాలల్లో 2024–25 విద్యా సంవత్సరానికి గానూ బీఏ, బీకాం, బీఎస్సీ, బీసీఏ, బీబీఏ, బీబీఎం, తది తర కోర్సుల్లో ప్రవేశానికి రిజిస్ట్రేషన్‌ ప్రక్రియ కొనసాగుతోంది. ఉమ్మడి ఆదిలాబాద్‌ జిల్లాలోని డిగ్రీ కళాశాలలన్నీ కాకతీయ విశ్వవిద్యాలయం పరిధిలో ఉన్నాయి. దరఖాస్తు చేసుకునే విద్యార్థుల సందేహాల నివృత్తికి ప్రభుత్వ డిగ్రీ కళాశాలల్లో సహాయ కేంద్రాలు ఏర్పాటు చేశారు. ఆన్‌లైన్‌లో వివరాలు నమోదులో జాగ్రత్తగా వ్యవహరించాలని, తప్పుగా నమోదు చేసినట్లు నిర్ధారించుకుంటే హెల్ప్‌లైన్‌ కేంద్రాలను సంప్రదించాలని కోరుతున్నారు. సంప్రదాయ కోర్సులకు డిమాండ్‌.. ఉమ్మడి ఆదిలాబాద్‌ జిల్లాలో మొత్తం 13 ప్రభుత్వ డిగ్రీ కళాశాలలు, దాదాపు 30 వరకు ప్రైవేటు డిగ్రీ కళాశాలలు ఉన్నాయి. ఇందులోని అన్ని రకాల కోర్సుల్లో కలిపి దాదాపు 18 వేలకు పైగా సీట్లు అందుబాటులో ఉన్నట్లు సంబంధిత అధికారులు పేర్కొంటున్నారు. డిగ్రీలో సంప్రదాయ కోర్సులకు ఆదరణ ఎక్కువగా ఉంది. మారుతున్న కాలానికి అనుగుణంగా విద్యార్థుల భవిష్యత్‌ను దృష్టిలో పెట్టుకొని ప్రభుత్వం కొత్తరకం ఉపాధి కోర్సులను కూడా ప్రారంభిస్తోంది. ప్రవేశాలు మూడు దశల్లో... డిగ్రీ కళాశాలల్లో ప్రవేశాలు మూడు విడతల్లో జరగనున్నాయి. మే 6 నుంచి మొదటి ఫేజ్‌ రిజిస్ట్రేషన్‌ ప్రక్రియ ప్రారంభమైంది. రూ.200 రుసుంతో రిజిస్ట్రేషన్‌కు అవకాశం కల్పించారు. ఈ నెల 20 నుండి 30 వరకు వెబ్‌ ఆప్షన్లు ఇవ్వాలి. జూన్‌ 6న తొలి విడత సీట్ల కేటాయింపు ఉంటుంది. జూన్‌ 7 నుండి 12 వరకు కేటాయించబడిన కళాశాలల్లో సెల్ఫ్‌ రిపోర్ట్‌ చేయాల్సి ఉంటుంది. నిర్దేశించిన తేదీల ప్రకారం రెండవ దశ, మూడవ దశ లో అడ్మిషన్‌ ప్రక్రియ కొనసాగుతుంది. రెండో దశ.. రూ.400 రుసుంతో జూన్‌ 6 నుంచి 13 వరకు సెకండ్‌ ఫేజ్‌ రిజిస్ట్రేషన్‌ నిర్వహించనున్నారు. జూన్‌ 6 నుంచి 14 వరకు సెకండ్‌ ఫేజ్‌ వెబ్‌ ఆప్షన్లు ఉంటాయి. జూన్‌ 18న రెండో దశ సీట్ల కేటాయింపు జరుగుతుంది. జూన్‌ 19 నుంచి 24 వరకు సెల్ఫ్‌ రిపోర్టుకు అవకాశం కల్పించారు. మూడో దశ.. జూన్‌ 19 నుంచి 25 వరకు ‘దోస్త్‌’ మూడో దశ రిజిస్ట్రేషన్‌ ఉండనుంది. రూ.400 రుసుంతో మూడో విడత రిజిస్ట్రేషన్‌కు అవకాశం కల్పించారు. జూన్‌ 19 నుంచి 25 వరకు మూడో దశ వెబ్‌ ఆప్షన్లు ఉంటాయి. జూన్‌ 29న మూడో దశ సీట్ల కేటాయింపు జరుగుతుంది. జులై 8 నుంచి డిగ్రీ కళాశాలల తరగతులు ప్రారంభమవుతాయి. మొబైల్‌ యాప్‌ ద్వారా కూడా దరఖాస్తు.. మొబైల్‌ యాప్‌ ద్వారా కూడా దోస్త్‌ దరఖాస్తు చేసుకోవచ్చని హెల్ప్‌ డెస్క్‌ అధికారులు పేర్కొంటున్నారు. స్మార్ట్‌ఫోన్లలోని ప్లే స్టోర్‌ నుంచి డిగ్రీ దోస్త్‌ యాప్‌ డౌన్‌లోడ్‌ చేసుకోవాలి. ఇందులో సూచించిన ప్రకారం మొబైల్‌ నంబర్‌ ఓటీపీతో వెబ్‌సైట్లోకి ప్రవేశించి సంబంధిత రిజిస్ట్రేషన్‌ ప్రక్రియను పూర్తి చేయవచ్చు. వెబ్‌ ఆప్షన్ల తర్వాత ఏ కాలేజీలో సీట్‌ అలాట్‌ అయిందో కూడా తెలుసుకోవచ్చు. వెబ్‌ ఆప్షన్స్‌ నమోదు సమయంలో జాగ్రత్తగా వ్యవహరించాలని సమీపంగా ఉన్న వాటిని ముందుగా ఎంచుకుని ఆ తర్వాత ప్రాధాన్యత క్రమంలో దూరంగా ఉన్న వాటిని పెట్టుకోవాలని సూచిస్తున్నారు. కోర్సులు కూడా తమకు నచ్చిన వాటిని తొలుత, ఆ తర్వాత ప్రాధాన్యత క్రమంలో ఎంపిక చేసుకోవాలని కోరుతున్నారు. సద్వినియోగం చేసుకోవాలి ప్రస్తుతం పోటీ ప్రపంచంలో ఎన్నో కొత్త కోర్సులు అందుబాటులోకి వస్తున్నాయి. వృత్తి విద్యా కోర్సులతో పాటు సంప్రదాయ డిగ్రీ కోర్సులకు సైతం డిమాండ్‌ ఉంది. కిందిస్థాయి ఉద్యోగాల నుంచి సివిల్స్‌ వరకు జరిగే పోటీ పరీక్షలలో డిగ్రీ సిలబస్‌ నుంచే ప్రశ్నలు వస్తున్నాయి. డిగ్రీ కనీస అర్హతగా కొనసాగుతోంది కాబట్టి విద్యార్థులు కోర్సును ఎంచుకునే ముందు ఆలోచించి ఎంపిక చేసుకోవాలి. పట్టుదలతో శ్రమించి తగిన నైపుణ్యాలు పెంపొందించుకుంటే భవిష్యత్‌లో మంచి రంగంలో స్థిరపడేందుకు అవకాశం ఉంటుంది. – డా.రవికుమార్‌, అసిస్టెంట్‌ ప్రొఫెసర్‌, దోస్త్‌ జిల్లా సమన్వయకర్త, నిర్మల్‌