బెంగళూరు, సాక్షి:  ఎలక్ట్రానిక్‌ సిటీ సమీపంలో రేవ్‌ పార్టీ కలకలం రేగింది. ఆదివారం అర్ధరాత్రి  బర్త్‌ డే పార్టీ పేరుతో పెద్ద ఎత్తున రేవ్‌ పార్టీని నిర్వహించగా.. పోలీసులు దాడి చేశారు.  ఈ రేవ్ పార్టీలో మందుతో పాటు పెద్ద ఎత్తున డ్రగ్స్ వాడకం కూడా జరిగింది. పట్టుబడ్డ వాళ్లలో సినీ ప్రముఖులు కూడా ఉన్నట్లు సమాచారం.సదరు జీఆర్‌ ఫామ్‌హౌస్‌ హైదరాబాద్‌‌ కాన్‌కార్డ్‌ సంస్థకు గోపాల్‌ రెడ్డికి చెందినదిగా పోలీసులు గుర్తించారు. హైదరాబాద్‌కు చెందిన ఓ వ్యక్తి ఈ పార్టీని ఏర్పాటు చేసినట్లు, విమానంలో యువతీయువకులను తరలించినట్లు పోలీసులు నిర్ధారించారు. తెల్లవారుజామున 3 వరకు జరుగుతున్న రేవ్‌ పార్టీపై పక్కా సమాచారంతో పోలీసులు దాడులు నిర్వహించారు. రేవ్ పార్టీలో పోలీసులకు భారీగా డ్రగ్స్‌, కోకైన్‌ లభ్యమయ్యాయి. కర్ణాటక, తెలుగు రాష్ట్రాలకు చెందిన వంద మందిని పోలీసులు అదుపులోకి తీసుకున్నారు. పార్టీలో 25 మందికి పైగా యువతులు ఉన్నారు. సుమారు 15 విలువైన కార్లను పోలీసులు సీజ్‌ చేశారు. రేవ్‌ పార్టీలో తెలుగు సీనీ ఇండస్టీకి చెందిన వారు ఉన్నట్లు బయటకు రావడం కలకలం రేపుతోంది. ప్రస్తుతం కేసు నమోదు చేసుకుని దర్యాప్తు చేపట్టారు బెంగళూరు సీసీబీ పోలీసులు. ఆ కథనాల్ని ఖండించిన కాకాణిరేవ్‌పార్టీలో దొరికిన ఓ కారుతో ఏపీ మంత్రి కాకాణి గోవర్థన్‌కు సంబంధం ఉన్నట్లు కొన్ని మీడియా సంస్థలు వార్తలు ప్రచురిస్తున్నాయి. దీనిపై ఆయన స్పందించారు. బెంగళూర్‌ రేవ్‌ పార్టీలో దొరికిన కారుతో నాకు సంబంధం లేదు. కారుపై స్టిక్కర్‌ ​ఒరిజినాలా? ఫొటో కాపీనా? అనేది పోలీసులే తేలుస్తారు. 2023తో ఆ స్టిక్కర్‌ కాలపరిమితి ముగిసింది అని కాకాణి అన్నారు.నాకు సంబంధం లేదు: సినీ నటి హేమ‘‘నేను హైదరాబాద్ లోనే ఉన్నాను. నాకు బెంగుళూరు రేవ్ పార్టీ తో సంబంధం లేదు. అనవసరంగా నన్ను లాగుతున్నారు. కన్నడ మీడియా, సోషల్ మీడియాలో వస్తున్న వార్తల్లో నిజం లేదు’’ అని సినీ నటి హేమ ప్రకటించారు.

ఈ చిత్రంలో కనిపించే రైతు పేరు ఎం.వెంకటకృష్ణ. కర్నూలు మండలం గార్గేయపురానికి చెందిన ఈయన 2023 జూన్‌లో జాతీయ గ్రామీణ ఉపాధి హామీ పథకం కింద ఒక ఎకరాలో పీకేఎం–1 రకం మునగ సాగు చేశారు. ఎకరాకు 448 మొక్కలు నాటుకున్నారు. నాటిన నాలుగైదు నెలల్లోనే పూత వచ్చింది. ఆరు నెలలకు కాపు రాగా.. మొదటి సారి తెంపిన కాయలను చూసి రైతు దంపతులు ఆనందంతో మురిసిపోయారు. మొదటిసారిగా వచ్చిన పంటతో రైతుకు రూ. లక్ష వరకు నికర ఆదాయం వచ్చింది. రెండో ఏడాది పంట మరింత పెరిగే అవకాశం ఉందని రైతు వెంకటకృష్ణ తెలిపారు.

● మునగ ఆకుల్లో ప్రొటీన్లు, కార్బోహైడ్రేట్లు, కాల్షియం, పొటాషియం, మెగ్నీషియం, ఐరన్‌, విటమిన్‌–ఎ, సి, బి కాంప్లెక్స్‌, బీటా–కెరోటిన్‌, అమైనో యాసిడ్స్‌, ఫినోలిక్‌లతో పాటు 40 కంటే ఎక్కువ రకాల యాంటీఆక్సిడెంట్లు ఉన్నాయి. ● విటమిన్‌ సీ రోగనిరోధక శక్తిని మెరుగుపరుస్తుంది. ● కాల్షియం, మెగ్నీషియం ఎముకలకు బలాన్ని అందిస్తాయి. ● మోతాదులో మునగాకుల రసాన్ని తాగితే శరీరంలోని హానికరమైన బ్యాక్టీరియా మూత్రం ద్వారా బయటకు వెళ్లిపోతుంది. ● ఇందులో ఉండే పీచు జీర్ణవ్యవస్థతో పాటు పొట్టను ఆరోగ్యంగా ఉంచుతుంది. ● రక్తహీనతను ఎదుర్కోవటానికి మునగ సహాయపడుతుంది. ● ఇందులో ఉండే క్లోరోజెనిక్‌ యాసిడ్‌తో షుగర్‌ లెవల్స్‌ కంట్రోల్‌ అవుతాయి.

కర్నూలు (న్యూటౌన్‌)/కౌతాళం: ఇసుక అక్రమ రవాణాకు అడ్డుకట్టవేసేలా రీచ్‌లలో సీసీ కెమెరాలను ఏర్పాటు చేసి నిరంతరం పర్యవేక్షణ చేయాలని జిల్లా కలెక్టర్‌ డాక్టర్‌ జి సృజన అధికారులను ఆదేశించారు. ఆదివారం ఆదోని డివిజన్‌ పరిధిలోని కౌతాళం మండలం గుడికంబాళి, మరళి గ్రామాల్లోని ఇసుక ర్యాంపులను, నదితీరంలో రీచ్‌లను జిల్లా కలెక్టర్‌ డాక్టర్‌ జి సృజన, ఆదోని సబ్‌ కలెక్టర్‌ శివనారాయణ్‌ శర్మ, జిల్లా మైనింగ్‌ డిప్యూటీ డైరెక్టర్‌ రాజశేఖర్‌తో కలిసి ఆకస్మికంగా తనిఖీ చేశారు. ర్యాంపులో నిల్వ ఉన్న ఇసుక వివరాల గురించి జిల్లా మైనింగ్‌ డిప్యూటీ డైరెక్టర్‌ టి రాజశేఖర్‌ అడిగి తెలుసుకున్నారు. ఈ సందర్భంగా జిల్లా కలెక్టర్‌ మాట్లాడుతూ.. ఇసుక అక్రమ తవ్వకాలను అరికట్టేందుకు జిల్లా కమిటీని ఏర్పాటు చేసినట్లు తెలిపారు. ఈ కమిటీ నిత్యం ఇసుక రీచ్‌లను తనిఖీ చేస్తుందని, ఎవరైనా నదుల్లో యంత్రాలతో ఇసుకను తరలిస్తే క్రిమినల్‌ కేసులు నమోదు చేస్తామని హెచ్చరించారు. ప్రభుత్వం అనుమతి ఇచ్చిన ప్రదేశంలోనే ఇసుకను సేకరించాలన్నారు. సుప్రీంకోర్టు, ప్రభుత్వ నిబంధనలను అతిక్రమించి ఇసుక ర్యాంపుల్లో లోడింగ్‌ చేసిన ఇసుకను లారీల్లో తరలిస్తే జరిమానాలు వసూలు చేస్తామని, కేసులు నమోదు చేస్తామని హెచ్చరించారు. లారీలు, టిప్పర్లు, జేసీబీలు వెళ్లే దారిలో ఇసుక రీచ్‌ల వద్ద సీసీ కెమెరాలు ఉండేటట్లు ఏర్పాటు చేయాలని ఆదేశించారు. మరళి ఇసుక రీచ్‌ వద్ద తుంగభద్ర నదిలో ఇసుక తోడు యంత్రం గుర్తించి దానిని సీజ్‌ చేయాలని ఆదోని సబ్‌ కలెక్టర్‌ ఆదేశించారు. అయితే యంత్రం ఉన్న ప్రదేశం కర్ణాటక ప్రాంతం కావడంతో అధికారులు ఆ ప్రాంత అధికారులకు తెలిపారు. ఇరిగేషన్‌ ఎగ్జిక్యూటివ్‌ ఇంజినీర్‌ శైలేశ్వర్‌, కౌతాళం తహసీల్దార్‌ అలెగ్జాండర్‌, ఎంవీఐ శశిరదీప్తి, ఆయా శాఖల అధికారులు పాల్గొన్నారు. అక్రమ తవ్వకాలను అరికట్టేందుకు జిల్లా కమిటీ ఏర్పాటు సుప్రీం కోర్టు, ప్రభుత్వ నిబంధనలు ఉల్లంఘిస్తే చర్యలు తప్పవు జిల్లా కలెక్టర్‌ డాక్టర్‌ జి. సృజన హెచ్చరిక

కర్నూలు(అగ్రికల్చర్‌): రైతులకు మునగ సాగు కలసి వస్తోంది. పెట్టుబడి వ్యయం కాస్త ఎక్కువగా ఉండటంతో గ్రామీణాభివృద్ధి శాఖ జాతీయ గ్రామీణ ఉపాధి హామీ పథకం కింద ప్రోత్సాహాలు అందిస్తోంది. ఇది చిన్న, సన్నకారు రైతులు, ఎస్సీ, ఎస్టీ రైతులకు ఆశాదీపంగా మారింది. ఉమ్మడి కర్నూలు జిల్లాలో 2022–23 సంవత్సరం నుంచి ఉపాధి నిధులతో మునగసాగుకు అవకాశం కల్పించారు. 2023–24లో సాగు గణనీయంగా పెరిగింది. 2024–25లో సాగును మరింత ప్రోత్సహించేందుకు నీటి యాజమాన్య సంస్థ అధికారులు చర్యలు తీసుకుంటున్నారు. ప్రస్తుతం వర్షాలు విస్తారంగా కురుస్తుండటంతో రైతులు మునగ సాగుకు సిద్ధమవుతున్నారు. వంద శాతం సబ్సిడీ ఈ ఏడాది మునగసాగు పెద్ద ఎత్తున చేపట్టి చిన్న, సన్నకారు రైతుల ఆదాయాన్ని పెంచడానికి గ్రామీణాభివృద్ధి శాఖ చర్యలు చేపట్టింది. జాతీయ గ్రామీణ ఉపాధి హామీ పథకం కింద మునగ సాగుకు వంద శాతం సబ్సిడీ లభిస్తుంది. ఎకరాకు రూ.1.10 లక్షల వరకు రెండేళ్లలో చెల్లిస్తారు. జాబ్‌కార్డు కలిగి ఐదు ఎకరాలలోపు భూమి కలిగిన సన్న, చిన్నకారు రైతులందరూ ఇందుకు అర్హులే. 2022–23లో 105 ఎకరాల్లో సాగు చేయగా.. 2023–24లో 550 ఎకరాలకు పెరిగింది. ఈ ఏడాది ఉమ్మడి జిల్లాలో 1000 ఎకరాల్లో చేపట్టాలనే లక్ష్యంతో డ్వామా అధికారులు ఉన్నారు. వర్షాలు పడుతుండటంతో మునగసాగుపై ఆసక్తి ఉన్న రైతులను గుర్తించడం, పరిపాలన అనుమతులు తీసుకోవడం, ఆ వెంటనే పిట్టింగ్‌ పనులు చేపట్టడానికి అవసరమైన చర్యలు తీసుకుంటున్నారు. ఒక్కసారి మొక్కలు నాటుకొని మంచి యాజమాన్య పద్ధతులు పాటిస్తే ఆరేళ్ల పాటు పంట వస్తుంది. మునగలో అనేక రకాల పోషకాలు ఉన్నాయి. అందువల్ల మార్కెట్‌లో వీటికి ప్రత్యేకంగా డిమాండ్‌ ఉంది. మొక్కలు సిద్ధం మునగ సాగుకు ఆసక్తి కలిగిన రైతులకు జిల్లా నీటియాజమాన్య సంస్థ ఉచితంగా మొక్కలు సరఫరా చేస్తోంది. కర్నూలు జిల్లాలో అత్యధికంగా మొక్కలు నాటుకొని సాగుచేస్తారు. నంద్యాల జిల్లాలో ఎక్కువ మంది మునగ విత్తనాలు విజయవాడ ప్రాంతం నుంచి తెచ్చుకొని నాటుకుంటారు. జూన్‌ 15 నుంచి జూలై మొదటి వారం వరకు మొక్కలు నాటితే నవంబరు నెలల్లో చెట్లు పూతకు వస్తాయి. జనవరిలో కాపు వస్తుంది. రైతులు కనిష్టంగా పావు ఎకరా నుంచి గరిష్టంగా ఎకరా వరకు ఉపాధి నిధులతో మునగ సాగు చేసుకోవచ్చు. ఎకరాకు 448 మొక్కలు నాటుకోవాల్సి ఉంటుంది. మునగ సాగుతో చిన్న, సన్నకారు, ఎస్సీ, ఎస్టీ రైతులు లాభాలు పొందవచ్చు. నికరాదాయం మునగ సాగు చేపట్టిన రైతులు మొదటి పంటలోనే పెట్టుబడి వ్యయం పోనూ రూ.80 వేల నుంచి రూ.లక్ష వరకు నికరాదాయం పొందవచ్చు. నర్సరీల్లో సాగుకు అవసరమైన పీకేఎం–1 రకం మొక్కలను సిద్ధంగా ఉన్నాయి. ఈ రకం మొక్కకు 220 కాయలు వచ్చే అవకాశం ఉంది. కాయలు 75 సెంటీమీటర్ల పొడవు ఉండి 150 గ్రాముల బరువు ఉంటాయి. మునగ సాగుకు నీటి అవసరం కూడా తక్కువగా ఉంటుంది. దిగుబడి ఎక్కువగా ఉండటం, మార్కెట్‌లో డిమాండ్‌ అధికంగా ఉండటంతో రైతులు మునగ సాగుపై ఆసక్తి చూపుతున్నారు. సిద్ధంగా లక్ష మొక్కలు ఉపాధి హామీ పథకం కింద మునగ సాగుకు ప్రాధాన్యత ఇస్తున్నాం. జిల్లాలో ప్రస్తుతానికి లక్ష మొక్కలు సిద్ధంగా ఉన్నాయి. ఈ ఏడాది కర్నూలు జిల్లాలో కనీసం 500 ఎకరాల్లో మునగ అభివృద్ది చేయాలనే లక్ష్యంతో ఉన్నాం. గత రెండేళ్లలో మునగ సాగు చేసిన రైతులు మంచి ఫలితాలు సాధించారు. ఈ ఏడాదికి సంబంధించి రైతుల గుర్తింపు ప్రక్రియ చురుగ్గా సాగుతోంది. మునగ సాగుపై ఆసక్తి ఉన్న రైతులు సంబంధింత ఏపీవోలను సంప్రదించాల్సి ఉంది. పూర్తి వివరాలకు ప్లాంటేషన్‌ మేనేజర్‌ 91211 03297 నంబరుకు ఫోన్‌ చేయవచ్చు. – అమరనాథరెడ్డి, ప్రాజెక్టు డైరెక్టర్‌, డ్వామా