లేనిపక్షంలో పార్లమెంట్‌ ఎన్నికలను బహిష్కరిస్తామని రైతుల తీర్మానం బల్మూర్‌: ఉమామహేశ్వర రిజర్వాయర్‌ అనుమతులను వెంటనే రద్దుచేయాలని.. లేనిపక్షంలో పార్లమెంట్‌ ఎన్నికలను బహిష్కరిస్తామని రైతులు తేల్చిచెప్పారు. ఈమేరకు సోమవారం బల్మూర్‌లో రిజర్వాయర్‌ వ్యతిరేక పోరాట కమిటీ ఆధ్వర్యంలో తీర్మానం చేశారు. అనంతరం కలెక్టరేట్‌కు చేరుకొని అధికారులకు తీర్మాన పత్రాన్ని అందజేశారు. ఈసందర్భంగా రైతులు మాట్లాడుతూ ఉమామహేశ్వర రిజర్వాయర్‌ నిర్మాణంతో అనంతవరం, బల్మూర్‌, మైలారం గ్రామాలకు చెందిన రైతుల భూములు సుమారు 2 వేల ఎకరాలు ముంపునకు గురవుతాయని తెలిపారు. రైతుల అభిప్రాయాలను పరిగణనలోకి తీసుకోకుండా రిజర్వాయర్‌ నిర్మాణానికి అనుమతులు ఇవ్వడంతో పాటు నిధులు మంజూరు చేయడం ఎంతవరకు సమంజసమని ప్రశ్నించారు. రిజర్వాయర్‌తో రైతులు రోడ్డున పడటంతో పాటు గ్రామాల ఉనికికే ముప్పు ఉంటుందన్నారు. రిజర్వాయర్‌ అనుమతులను రద్దుచేస్తేనే, పార్లమెంట్‌ ఎన్నికల్లో ఓట్లు వేస్తామని స్పష్టంచేశారు. కార్యక్రమంలో కమిటీ అధ్యక్షుడు అనంత సీతారాంరెడ్డి, ఉపాధ్యక్షులు తిరుపతయ్య, రాసమోని మహేష్‌, రేణు, ప్రధానకార్యదర్శి వర్కాల రాములు, నాగయ్య, జానకీ రాములు ఖదీర్‌, లాల్‌ అహ్మద్‌, బాలకృష్ణ, శివశంకర్‌ పాల్గొన్నారు.

నాగర్‌కర్నూల్‌: ఓటుహక్కు అందరి బాధ్యత అని.. అర్హులైన ప్రతి ఒక్కరూ స్వేచ్ఛగా ఓటుహక్కు వినియోగించుకోవాలని అదనపు కలెక్టర్‌ కె.సీతారామారావు అన్నారు. లోక్‌సభ ఎన్నికల్లో భాగంగా నాగర్‌కర్నూల్‌ ఆర్డీఓ కార్యాలయంలో ఏర్పాటుచేసిన పోస్టల్‌ బ్యాలెట్‌ ఫెసిలిటేషన్‌ సెంటర్‌లో సోమవారం ఓటుహక్కు వినియోగించుకున్నారు. ఈసందర్భంగా అదనపు కలెక్టర్‌ మాట్లాడుతూ ఎన్నికల విధుల్లో పాల్గొనే అధికారులు, సిబ్బంది పోస్టల్‌ బ్యాలెట్‌ ద్వారా ఓటుహక్కు వినియోగించుకోవాలని సూచించారు. పార్లమెంట్‌ ఎన్నికల్లో వందశాతం ఓటింగ్‌ లక్ష్యంతో ముందుకుసాగాలని తెలిపారు. క్రీడాకారిణికి అభినందన నాగర్‌కర్నూల్‌ క్రైం: ఇటీవల దుబాయ్‌లో నిర్వహించిన 21వ ఏషియన్‌ అథ్లెటిక్స్‌ చాంపియన్‌షిప్‌ 400 మీటర్ల పరుగుపందెంలో జిల్లా కేంద్రానికి చెందిన సాయిసంగీత ప్రతిభ కనబర్చి గోల్డ్‌మెడల్‌ సాధించింది. ఈసందర్భంగా సోమవారం జిల్లా పోలీసు కార్యాలయంలో సాయి సంగీతను ఎస్పీ గైక్వాడ్‌ వైభవ్‌ రఘునాథ్‌ అభినందించారు. భవిష్యత్‌లో ఒలంపిక్స్‌లో పాల్గొని దేశానికి మంచిపేరు తీసుకురావాలని ఆకాంక్షించారు. కార్యక్రమంలో అదనపు ఎస్పీ రామేశ్వర్‌, డీసీఆర్‌బీ డీఎస్పీ సత్యనారాయణ, శ్యాంసుందర్‌, మల్లేష్‌ తదితరులు పాల్గొన్నారు. నల్లమలలో ఈదురుగాలుల బీభత్సం ● విరిగిన చెట్ల కొమ్మలు.. విద్యుత్‌ సరఫరాలో అంతరాయం అచ్చంపేట/అచ్చంపేట రూరల్‌ /ఉప్పునుంతల: నల్లమలలో సోమవారం పెద్దఎత్తున ఈదురుగాలులు వీచాయి. గాలుల ధాటికి చెట్లకొమ్మలు విరగడంతో విద్యుత్‌ స్తంభాలు నేలకొరిగాయి. పలు ప్రాంతాలకు విద్యుత్‌ సరఫరాలో అంతరాయం ఏర్పడింది. ఉప్పునుంతలకు చెందిన తాళ్ల శేఖర్‌ పొలంలో వేసుకున్న రేకులషెడ్‌ ధ్వంసమైంది. అచ్చంపేట మండలంలోని కన్యతండాలో నాలుగు ఇళ్ల పైకప్పు రేకులు కొట్టుకుపోయాయి. సుమారు రూ. 2లక్షల వరకు ఆస్తినష్టం వాటిల్లిందని బాధిత కుటుంబాలు ఆవేదన వ్యక్తంచేశారు. వాతావరణంలో ఏర్పడిన మార్పులు కారణంగా ఆదివారం రాత్రి అమ్రాబాద్‌, పదర, అచ్చంపేట మండలాల్లో చిరుజల్లులు కురిశాయి. మరోవైపు భానుడి భగభగ.. మరోవైపు భానుడు నిప్పుల సెగలు రేపుతున్నాడు. ఏప్రిల్‌ 15వ తేదీ వరకు ఆరెంజ్‌ అలర్ట్‌లో ఉన్న ఉష్ణోగ్రతలు.. ఈనెల 2నుంచి రెడ్‌ అలర్ట్‌ స్థాయికి చేరాయి. సోమవారం వెల్దండలో 45.8, కల్వకుర్తిలో 45.1 డిగ్రీల ఉష్ణోగ్రత నమోదైంది. బిజినేపల్లిలో 44.8, కోడేరు, అచ్చంపేట మండలం ఐనోలు 44.6, పెద్దకొత్తపల్లి మండలం చెన్నపురావుపల్లి 44.4, వంగూరు మండలం కిష్టంపల్లి 44.1, కల్వకుర్తి మండలం వెలికల్‌ 43.9, వెల్దండ మండలం బొల్లంపల్లి 43.8, తాడూరు మండలం వెంగంపల్లి, కొల్లాపూర్‌ 43.5, బల్మూర్‌ మండలం కొండారెడ్డిపల్లి, పెద్దకొత్తపల్లి, అచ్చంపేట 43.3, ఉప్పునంతల మండలం వెల్టూర్‌ 43.1, ఉప్పునుంతల 42.9, చారకొండ మండలం సిర్సనగండ్ల 42.8, కల్వకుర్తి మండలం తోటపల్లి 42.7, బల్మూర్‌ మండలం కొండనాగులు, ఊర్కొండ, పెంట్లవెల్లి మండలం జట్రపోల్‌ 42.6, తెలకపల్లి మండలం పెద్దూరు, పాలెం 42.4, నాగర్‌కర్నూల్‌ 42.3, లింగాల, కుమ్మెర 42.1, బిజినేపల్లి మండలం మన్ననూర్‌, పెద్దముద్దునూర్‌, తెలకపల్లి 41.9, తిమ్మాజిపేట, తూడుకుర్తి, అమ్రాబాద్‌ 40.4, పదర 39.9, వట్టవర్లపల్లిలో 39.7 డిగ్రీల ఉష్ణోగ్రతలు నమోదయ్యాయి.

బిజినేపల్లి: బీఆర్‌ఎస్‌ ఎంపీ అభ్యర్థి ఆర్‌ఎస్‌ ప్రవీణ్‌కుమార్‌ తనపై నిరాధర ఆరోపణలు, అసత్య ప్రచారం చేస్తే సహించనని ఎమ్మెల్యే కూచుకుళ్ల రాజేష్‌రెడ్డి అన్నారు. నాగర్‌కర్నూల్‌కు నిజమైన ఎమ్మెల్యే మర్రి జనార్దన్‌రెడ్డి అని, నకిలీ ఎమ్మెల్యే రాజేష్‌రెడ్డి అంటూ ఇటీవల ఆర్‌ఎస్‌పీ మాట్లాడటంపై మండిపడ్డారు. సోమవారం తిమ్మాజిపేటలో మండలస్థాయి ముఖ్య కార్యకర్తల సమావేశం నిర్వహించారు. ఈసందర్భంగా ఎమ్మెల్యే మాట్లాడుతూ ఆర్‌ఎస్‌ ప్రవీణ్‌కుమార్‌ మతితప్పి మాట్లాడుతున్నారని.. ఇదేవిధంగా ప్రవర్తిస్తే ప్రజలే తగిన బుద్ధి చెబుతారని హెచ్చరించారు. ప్రజలు తిరస్కరించిన వ్యక్తిని పక్కన పెట్టుకుని ఎలా తిరుగుతున్నావని విమర్శించారు. కాంగ్రెస్‌ పార్టీ ఇచ్చిన హామీ మేరకు ఆరు గ్యారంటీలను తప్పనిసరిగా అమలు చేస్తామన్నారు. ప్రజలకు కాంగ్రెస్‌ ప్రభుత్వంపై పూర్తి నమ్మకం ఉందన్నారు. పార్లమెంట్‌ ఎన్నికల్లో నాగర్‌కర్నూల్‌ స్థానం నుంచి కాంగ్రెస్‌ అభ్యర్థి మల్లు రవి భారీ మెజార్టీతో గెలుపొందడం ఖాయమన్నారు. కార్యకర్తలు కలిసికట్టుగా పనిచేయాలని సూచించారు. సమావేశంలో ఎమ్మెల్సీ కుచుకూళ్ల దామోదర్‌రెడ్డి, జెడ్పీటీసీలు రోహిణి, సుమిత్ర, నాయకులు శ్రీనివాస్‌ బహదూర్‌, దానం బాలరాజ్‌, లక్ష్మీనారాయణ, ఉస్మాన్‌ రావూఫ్‌, దేవస్వామి, నాగసాయిలు, బెన్నీ, మనోహార్‌ తదితరులు ఉన్నారు.

కల్వకుర్తి టౌన్‌: పార్లమెంట్‌ ఎన్నికల నిర్వహణలో ఎలాంటి పొరపాట్లకు తావివ్వొద్దని రిటర్నింగ్‌ అధికారి, కలెక్టర్‌ ఉదయ్‌కుమార్‌ అన్నారు. పట్టణంలోని సీబీఎం కళాశాలలో ఏర్పాటుచేసిన స్ట్రాంగ్‌రూంలో ఈవీఎంల కమిషనింగ్‌ పక్రియను సోమవారం పరిశీలించారు. ఫెసిలిటేషన్‌ సెంటర్‌లో పోస్టల్‌ బ్యాలెట్‌ వివరాలను తెలుసుకున్నారు. అనంతరం బీఈడీ కళాశాలలో పీఓ, ఏపీఓలకు ఏర్పాటుచేసిన శిక్షణ కార్యక్రమంలో కలెక్టర్‌ పాల్గొని మాట్లాడారు. పోలింగ్‌ రోజున ఉదయం 5:30 గంటలకు మాక్‌పోల్‌ నిర్వహించి, నిర్ణీత సమయంలో పోలింగ్‌ ప్రారంభించాలని సూచించారు. పోలింగ్‌ కేంద్రా ల్లో ఓటర్లకు ఎలాంటి ఇబ్బందులు తలెత్తకుండా అన్ని ఏర్పాట్లు చేయాలని ఆదేశించారు. 17సీ, పీఓ డైరీల నిర్వహణ, పోలింగ్‌ ప్రాసెస్‌ తదితర అంశాలను వివరించారు. ఓటరు స్లిప్పుల పంపిణీ వివరాలను ఏఆర్‌ఓ శ్రీనుతో తెలుసుకున్నారు. ఎన్నికల అధికారులు పాల్గొన్నారు. పీయూలో సిలబస్‌ మార్పుపై సమీక్ష మహబూబ్‌నగర్‌ ఎడ్యుకేషన్‌: పాలమూరు యూనివర్సిటీలో బీఈడీ విద్యార్థులకు సిలబస్‌లో మార్పులు చేయడంపై సోమవారం అధికారులు సమీక్షా సమావేశం నిర్వహించారు. ఈ మేరకు ఉమ్మడి మహబూబ్‌నగర్‌ జిల్లాలోని పలు ప్రైవేటు బీఈడీ కళాశాలల ప్రిన్సిపాళ్లు, బీఓఎస్‌లు, హెచ్‌ఓడీలతో పీయూ రిజిస్ట్రార్‌ మధుసూదన్‌రెడ్డి మాట్లాడుతూ విద్యార్థులకు సిలబస్‌లో మార్పులు చేపట్టిన నేపథ్యంలో అధ్యాపకులు, ప్రిన్సిపాళ్లు పలు చర్యలు తీసుకోవాలని సూచించారు.

నడిగడ్డలోని బంగ్లా రాజకీయాలు అందరికీ తెలుసు. పొద్దున చెరొకవైపు ఉన్న వారు.. రాత్రయ్యే సరికి ఒకచోటికి చేరుతారు. మొన్న జరిగిన అసెంబ్లీ ఎన్నికల్లో కాంగ్రెస్‌ను ఓడించేందుకు బీఆర్‌ఎస్‌, బీజేపీ ఒకటయ్యాయి. అదే బంగ్లా రాజకీయం ఈ ప్రాంతంలో నడుస్తోంది. అదే బంగ్లా రాజకీయానికి గుణపాఠం చెప్పి శాశ్వతంగా సమాధి కట్టాలి. కృష్ణా, తుంగభద్ర నది మధ్యలో ఉన్న నడిగడ్డ పౌరుషానికి, పోరాటానికి పెట్టింది పేరు. నడిగడ్డ బిడ్డలు ఎవరికై న మాట ఇస్తే తల తెగి కిందపడ్డా సరే ఆ మాట నుంచి ఒక్క అడుగు వెనుకేయరు. ఎన్ని కష్టాలు వచ్చినా ఇచ్చిన మాట కోసం నిలబడతారు. 70 ఏళ్ల తర్వాత మన పాలమూరుకు తెలంగాణకు నాయక్వతం వహించే అవకాశం వచ్చింది. మన ప్రాంతంలో పెండింగ్‌లో ఉన్న ప్రాజెక్టులు ప్రధానంగా గట్టు, తుమ్మిళ్ల, ఆర్డీఎస్‌ ఆధునికీకరణ, ఎరవ్రల్లి చౌరస్తా నుంచి రాయచూరు వరకు నాలుగు లైన్‌లు, పాలమూరు–రంగారెడ్డి పూర్తి చేసుకోవడానికి మీరందరూ కాంగ్రెస్‌కు అండగా ఉండాలి. నాగర్‌కర్నూల్‌ కాంగ్రెస్‌ అభ్యర్థి మల్లురవిని గెలిపించాలి. మీరందరూ డిసెంబర్‌లో కేసీఆర్‌ను ఓడించి పని అయిపోయిందని అనుకుంటున్నారు. డిసెంబర్‌లో జరిగిన ఎన్నికలు సెమీఫైనల్స్‌. ఈ నెల 13న ఫైనల్స్‌ తెలంగాణ వర్సెస్‌ గుజరాత్‌ మధ్య జరుగుతున్నాయి. గుజరాత్‌ను ఓడించి తెలంగాణను గెలిపించుకుందాం. – రేవంత్‌రెడ్డి, ముఖ్యమంత్రి