ఖమ్మం సహకారనగర్‌: ఖమ్మం లోక్‌సభ నియోజకవర్గ పరిధిలో పోలింగ్‌ కేంద్రాల వారీగా ఈవీఎంల కేటాయింపు పూర్తయిందని ఎన్నికల రిటర్నింగ్‌ అధికారి, కలెక్టర్‌ వీ.పీ.గౌతమ్‌ అన్నారు. కలెక్టరేట్‌లో శనివారం ఆయన ఎన్నికల పరిశీలకుడు డాక్టర్‌ సంజయ్‌ జి.కోల్టేతో కలిసి ర్యాండమైజేషన్‌ను పరిశీలించి మాట్లాడారు. ఏడు అసెంబ్లీ నియోజకవర్గాల పరిధి లో కేటాయించిన ఈవీఎంల వివరాలను రాజకీయ పార్టీల ప్రతినిధులకు అందజేశామని తెలిపారు. ఆతర్వాత నియోజకవర్గాల వారీగా అదనంగా అవసరమైన ఈవీఎంలను స్ట్రాంగ్‌ రూంలకు తరలించారు. కలెక్టరేట్‌ ఆవరణలోని ఈవీఎం గోదాం నుండి అసెంబ్లీ నియోజకవర్గాల వారీగా స్ట్రాంగ్‌రూమ్‌లకు ఈవీఎంలను తరలించగా కలెక్టర్‌ పరిశీలించారు. అదనపు కలెక్టర్‌ డి.మధుసూదన్‌నాయక్‌, కేఎంసీ కమిషనర్‌ ఆదర్శ్‌ సురభి, డీఆర్వో రాజేశ్వరి, ఉద్యోగి రాంబాబు తదితరులు పాల్గొన్నారు. పోస్టల్‌ బ్యాలెట్‌ ఓటింగ్‌లో జాగ్రత్త ఖమ్మంరూరల్‌: పోస్టల్‌ బ్యాలెట్‌ ఓటింగ్‌ను జాగ్రత్తగా నిర్వహించాలని కలెక్టర్‌ వీ.పీ.గౌతమ్‌ సూచించారు. ఖమ్మం రూరల్‌ తహసీల్‌లో పోస్టల్‌ బ్యాలెట్‌ ఫెసిలిటేషన్‌ సెంటర్‌ను శనివారం ఆయన పరిశీలించి ఉద్యోగులకు సూచనలు చేశారు. ఓటింగ్‌ పారదర్శకంగా జరిగేలా చూడాలని, ప్రతీ అంశాన్ని జాగ్రత్తగా పరిశీలించాలని చెప్పారు. ఆతర్వాత కలెక్టర్‌ గౌతమ్‌, సీపీ సునీల్‌దత్‌ పొన్నేకల్‌లోని శ్రీ చైతన్య ఇంజనీరింగ్‌ కళాశాలలో ఏర్పాటు చేసిన స్ట్రాంగ్‌ రూంలు, ఓట్ల లెక్కింపు కేంద్రాన్ని పరిశీలించి ఏర్పాట్లపై భద్రత, ఏర్పాట్లపై సూచనలు చేశారు. వివిధ శాఖల అధికా రులు శ్యాంప్రసాద్‌, శ్రీలత, రామకృష్ణ పాల్గొన్నారు.

మధిర/ఎర్రుపాలెం: హామీలు అమలును విస్మరించిన కాంగ్రెస్‌కు గుణపాఠం చెప్పేలా లోక్‌సభ ఎన్నికల్లో తనను గెలిపించాలని ఖమ్మం లోక్‌సభ బీఆర్‌ఎస్‌ అభ్యర్థి నామ నాగేశ్వరరావు కోరారు. తెలంగాణ ప్రజల హక్కులను పరిరక్షించుకోవాలంటే పార్లమెంట్‌లో బీఆర్‌ఎస్‌ ఎంపీలు ఉండాల్సిన అవసరముందన్నారు. మధిర, ఎర్రుపాలెం మండలం బనిగండ్లపాడులో శనివారం రాత్రి నిర్వహించిన ఎన్నికల ప్రచార సభల్లో ఆయన మాట్లాడారు. అసెంబ్లీ ఎన్నికల్లో కాంగ్రెస్‌ ఇచ్చిన ఆరు గ్యారంటీలను నమ్మి ఓట్లు వేసిన తాము తప్పు చేశామని ఇప్పటికే ప్రజలు గుర్తించాన్నారు. ఈనేపథ్యాన అన్నివర్గాల ప్రజలకు మేలు చేసిన బీఆర్‌ఎస్‌కు ఓటు వేసి గెలిపించాలని కోరారు. అంతేతప్ప మరోమారు కాంగ్రెస్‌ అభ్యర్థిని గెలిపించి తప్పు చేయొద్దని పిలుపునిచ్చారు. ఈ సమావేశాల్లో ఈకార్యక్రమంలో జడ్పీ చైర్మన్‌ లింగాల కమల్‌రాజ్‌, మాజీ ఎమ్మెల్యే కొండబాల కోటేశ్వరరావు, డీసీసీబీ చైర్మన్‌ మాజీ కూరాకుల నాగభూషణం, జెడ్పీటీసీ శీలం కవిత, మున్సిపల్‌ చైర్‌ పర్సన్‌ మొండితోక లతతో పాటు నాయకులు, ప్రజాప్రతినిధులు రావూరి శ్రీనివాసరావు, పల్లపోతు వెంకటేశ్వరరావు, బిక్కి కృష్ణప్రసాద్‌, అరిగే శ్రీనివాసరావు, చిత్తారు నాగేశ్వరరావు, చావా రామకృష్ణ, పంబి సాంబశివరావు, బొగ్గుల భాస్కర్‌రెడ్డి, చావా వేణు, కూనా నరేందర్‌రెడ్డి, అబ్బూరి రామన్‌ తదితరులు పాల్గొన్నారు.బీఆర్‌ఎస్‌ ఎంపీ అభ్యర్థి నామ

●సీఎం రేవంత్‌రెడ్డి మధ్యాహ్నం 11:50 గంటలకు ప్రగతి మైదనంలోని హెలీప్యాడ్‌ వద్ద దిగారు. ●12 గంటలకు ప్రకాశం స్టేడియానికి, 12:03 గంటలకు వేదికపైకి వచ్చారు. ●12:05 గంటలకు శాలువలతో మంత్రులు, జిల్లా కాంగ్రెస్‌ నాయకులు సన్మానించారు. ●12:48 గంటల నుంచి 1:14 గంటలకు వరకు ప్రసంగించారు. ●డిప్యూటీ సీఎం భట్టి విక్రమార్కు 12:36 నుంచి 12:46 గంటల వరకు ప్రసంగించారు. ●సీఎంను ప్రసంగానికి పిలిచాక ఉప ముఖ్యమంత్రిని ప్రసంగించాల్సిందిగా కొత్తగూడెం ఎమ్మెల్యే కూనంనేని కోరారు. ●సభలో ఉక్కపోత ఎక్కువ ఉండగా, దూర ప్రాంతాల నుంచి వచ్చిన ప్రజలు జర్మనీ టెంట్‌ నుంచి బయటకు వెళ్లారు. ●సీఎం సభ జరుగుతుండగా ప్రజలు వాటర్‌ ప్యాకెట్లు విసురుకున్నారు. ●సీఎం మాట్లాడుతుండగా ఉక్కపోత తట్టుకో లేక సభికులు సభా ప్రాంగణం నుంచి బయటకు వెళ్లారు. ●సీఎం ప్రసంగం ముగిశాక, క్వానాయ్‌ వెళ్లే వరకు ప్రజలను ప్రకాశం స్టేడియం నుంచి బయటకు రాకుండా గేట్లకు పోలీసులు తాళం వేశారు. ●కేంద్ర ప్రభుత్వం తెలంగాణకు గాడిద గుడ్డు ఇచ్చిందంటూ సీఎం గుడ్డు ఆకారం చూపించారు. –కొత్తగూడెంరూరల్‌

● బీఆర్‌ఎస్‌ బీజేపీకి బీ టీమే.. ● మంత్రులు పొంగులేటి శ్రీనివాసరెడ్డి, తుమ్మల నాగేశ్వరరావుసత్తుపల్లి: బీజేపీ మళ్లీ గెలిచినా.. రాహుల్‌గాంధీని ప్రధానమంత్రిని చేసుకోలేకపోయినా రాజ్యాంగం ప్రమాదంలో పడుతుందని, ఎస్సీ, ఎస్టీ, బీసీ, మైనార్టీ రిజర్వేషన్లను రద్దు చేస్తారని రాష్ట్ర మంత్రి పొంగులేటి శ్రీనివాసరెడ్డి తెలిపారు. సత్తుపల్లి బస్టాండ్‌ సెంటర్‌లో శనివారం రాత్రి ఏర్పాటుచేసిన కార్నర్‌ మీటింగ్‌లో ఆయన మంత్రి తుమ్మల నాగేశ్వరరావు, ఎమ్మెల్యే డాక్టర్‌ మట్టా రాగమయి, ఖమ్మం లోక్‌సభ అభ్యర్ధి రామసహాయం రఘురాంరెడ్డితో కలిసి పాల్గొన్నారు. ఈ సందర్భంగా పొంగులేటి మాట్లాడుతూ కులాలు, మతాలు, ప్రాంతాల మధ్య విద్వేషాలు రెచ్చగొట్టి రాజకీయ లబ్ధితో మూడోసారి ప్రధాని కావాలని నరేంద్రమోదీ కలలు కంటున్నారని తెలిపారు. పదేళ్లు అధికారంలో ఉన్న బీజేపీ తెలంగాణకు ఏమీ ఇవ్వకపోగా.. మాజీ సీఎం కేసీఆర్‌ దోచుకున్న రూ.లక్షన్నర కోట్లను కాపాడుకునేందుకు బీజేపీతో చీకటి ఒప్పందం చేసుకున్నారని విమర్శించారు. బీజేపీకి బీఆర్‌ఎస్‌ బీ టీంగా వ్యవహరిస్తున్నందునే నామ నాగేశ్వరరావు గెలిస్తే కేంద్ర మంత్రి పదవి వస్తుందని ప్రచారం చేస్తున్నారని తెలిపారు. ఆగస్టు 15 కల్లా రుణమాఫీ.. సీఎం రేవంత్‌రెడ్డి చెప్పినట్లు ఆగస్టు 15 కల్లా రైతుల రుణమాఫీ చేస్తామని, రైతు భరోసా అందని రైతులకు త్వరలో అందిస్తామని రాష్ట్ర తుమ్మల నాగేశ్వరరావు తెలిపారు. మచ్చలేని రామసహాయం రఘురాంరెడ్డి కుటుంబం నెహ్రూ, ఇందిరా, రాజీవ్‌గాంధీతో కలిసి పని చేసిందన్నారు. ప్రజల అవసరాల కోసం ఆస్తులు ఇచ్చిన ఆ కుటుంబ సభ్యులైన రఘురాంరెడ్డిని భారీ మెజార్టీతో గెలిపించాలని కోరారు. కాగా, సత్తుపల్లి ప్రాంతానికి గోదావరిజలాలు తీసుకురావడం తన చిరకాల కోరిక అని తెలిపారు. అనంతరం అభ్యర్థి రఘురాంరెడ్డి మాట్లాడుతూ జిల్లా మంత్రుల సహకారంతో జిల్లా అభివృద్ధికి పాటుపడేలా తనకు గెలిపించాలని విజ్ఞప్తి చేశారు. ఎమ్మెల్యే డాక్టర్‌ మట్టా రాగమయి, దయానంద్‌ మాట్లాడుతూ లోక్‌సభ ఎన్నికల్లో కాంగ్రెస్‌ అభ్యర్థికి 50వేల మెజార్టీ తగ్గకుండా పార్టీ శ్రేణులు పని చేయాలని సూచించారు. సత్తుపల్లి గత ఐదేళ్లు మాఫియా చేతుల్లోకి ఉందని విమర్శించారు. డీసీసీ అధ్యక్షుడు పువ్వాళ్ల దుర్గా ప్రసాద్‌, నాయకులు మువ్వా విజయబాబు, పిడమర్తి రవి, నున్నా రామకృష్ణ, ఉడతనేని అప్పారావు, చల్లగుళ్ల నర్సింహారావు, తోట సుజలరాణి, గాదె చెన్నారావు, ఎం.డీ.కమల్‌పాషా, ఎస్‌.కే.మౌలాలీ, దూదిపాల రాంబాబు, మందపాటి పద్మజ్యోతిరెడ్డి, మోరంపూడి పాండు, దండు ఆదినారాయణ పాల్గొన్నారు.

రఘునాథపాలెం: ఇటీవల రోడ్డు ప్రమాదంలో గాయపడిన మండలంలోని కామంచికల్‌కు చెందిన సీపీఎం నాయకుడు చెరుకూరి మురళీ కృష్ణ(59) చికిత్సపొందుతూ శనివారం మృతి చెందారు. గత నెల 23న ఖమ్మంలో జరిగిన రోడ్డు ప్రమాదంలో గాయపడిన మురళీకృష్ణకు ఖమ్మంలోని ప్రైవేట్‌ ఆస్పత్రిలో చికిత్స చేయిస్తున్నారు. శనివారం పరిస్థితి విషమించి మృతి చెందగా.. ఆయన మృతదేహాన్ని స్వగ్రామానికి తీసుకొచ్చారు. ఈ సందర్భంగా సీపీఎం రాష్ట్ర, జిల్లా కార్యదర్శులు తమ్మినేని వీరభద్రం, నున్నా నాగేశ్వరరావు తదితరులు మురళీకృష్ణ మృతదేహం వద్ద నివాళులర్పించి కుటుంబ సభ్యులను పరామర్శించారు. నాయకులు యర్రా శ్రీకాంత్‌, ఎస్‌.నవీన్‌రెడ్డి, నండ్ర ప్రసాద్‌తోతో పాటు సీపీఐ, బీఆర్‌ఎస్‌ నాయకులు పలువురు కూడా ఆయన మృతదేహం వద్ద నివాళులర్పించారు.చికిత్స పొందుతున్న వ్యక్తి... కామేపల్లి: మండలంలోని బాసిత్‌నగర్‌కు చెందిన బాదావత్‌ రవి(38) ఆత్మహత్యాయత్నానికి పాల్పడగా చికిత్స పొందుతూ శనివారం మృతి చెందాడు. మద్యానికి బానిసైన ఆయన కుటుంబాన్ని పట్టించుకోకపోవడంతో భార్య సుశీల మందలించింది. దీంతో శుక్రవారం తెల్లవారుజామున పురుగుల మందు తాగిన రవిని ఖమ్మం తరలించి చికిత్స చేయిస్తుండగా మృతి చెందాడు. ఘటనపై ఆయన భార్య ఫిర్యాదుతో కేసు నమోదు చేసినట్లు ఎస్‌ఐ ప్రవీణ్‌కుమార్‌ తెలిపారు. వడదెబ్బతో ఒకరు.. తల్లాడ: మండలంలోని అన్నారుగూడెంకు చెందిన తాళ్లూరి దర్గయ్య(45) వడదెబ్బతో మృతి చెందాడు. గతంలో వివిధ పత్రికల్లో జర్నలిస్టుగా పనిచేసిన ఆయన శుక్రవారం వడదెబ్బ కారణంగా అస్వస్థతకు గురైన ఆయనకు ఆర్‌ఎంపీ వద్ద ప్రాథమిక చికిత్స అనంతరం ఖమ్మం తరలించారు. అక్కడ చికిత్స చేయిస్తుండగా పరిస్థితి విషమించడంతో శనివారం మృతి చెందాడు. దర్గయ్యకు భార్య, ఇద్దరు కుమారులు ఉండగా, వివిధ పార్టీల నాయకులు, జర్నలిస్టులు ఆయన మృతదేహం వద్ద నివాళులర్పించారు. బావిలో మునిగి వ్యక్తి... రఘునాథపాలెం: మండలంలోని కోయచలకకు చెందిన కూలీ బొరిగర్ల నర్సయ్య(43) ఈతకు వెళ్లి ప్రమాదవశాత్తు బావిలో మునిగి మృతి చెందాడు. ఆయన భార్య, కుమారుడి నుంచి విడిపోయి కొన్నేళ్లుగా తల్లి వద్దే ఉంటూ కూలీ పనులు చేస్తున్నాడు. వేసవిలో రోజు మాదిరి శనివారం గ్రామ సమీపాన బావిలో ఈతకు వెళ్లిన ఆయన నీటిలో మునగగా పైకి రాలేదు. దీంతో అనుమానం వచ్చిన యువకులు వెతకగా బావి అడుగున నాచు తీగలకు చుటుటకుని ఉండడంతో బయటకు తీసుకురాగా అప్పటికే నర్సయ్య మృతి చెందాడు. ఘటనపై రఘునాథపాలెం పోలీసులు కేసు నమోదు చేయగా.. నిరుపేద అయిన ఆయన అంత్యక్రియల కోసం గ్రామస్తులు విరాళాలు సేకరించారు.