నిజామాబాద్‌నాగారం: అథ్లెటిక్స్‌ సంఘంలో రాజకీయ నాయకుల పెత్తనంతో క్రీడాకారులు ఇబ్బంది పడుతున్నారు. టోర్నీలను, ఎంపికలను పూర్తిగా వ్యాపారంగా మార్చేస్తున్నారని ఆరోపణలు వెల్లువెత్తుతున్నాయి. నిబంధనల ప్రకారం క్రీడలకు సంబంధించిన అసోసియేషన్‌ ఇంటర్నేషనల్‌, జాతీయస్థాయి క్రీడాకారులకే ప్రాధాన్యత ఉంటుంది. జిల్లా అథ్లెటిక్స్‌ అసోసియేషన్‌లో మాత్రం రాజకీయ నాయకులదే పైచేయి. క్రీడాకారులకు ఏ రోజు కూడా శిక్షణ ఇచ్చిన దాఖలాలు లేవు. టోర్నీలు, ఎంపికల పేరుతో పోటీలు నిర్వహిస్తున్నామని ఎంట్రీ ఫీజులు, బహుమతులు, సర్టిఫికెట్లు అంటూ డబ్బులు దండుకుంటున్న ఘటనలు ఎన్నో ఉన్నాయి. అథ్లెటిక్స్‌లో రన్నింగ్‌, లాంగ్‌జంప్‌, హైజంప్‌, తదితర వాటిలో సాధన చేస్తేనే ఇతర క్రీడల్లో నైపుణ్యం వస్తుంది. అలాంటి అథ్లెటిక్స్‌లో రాజకీయ నాయకుల ప్రమేయంతో క్రీడాకారులకు అన్యాయం జరుగుతోంది. నిబంధనలు తూచ్‌ జిల్లాలో బాక్సింగ్‌, ఫుట్‌బాల్‌, హాకీ లాంటి క్రీడా సంఘాల్లో అధ్యక్ష, కార్యదర్శిలు సీనియర్‌ క్రీడాకారులు ఉండడంతో క్రీడాకారులు అంతర్జాతీయ స్థాయికి ఎదుగుతున్నారు. అథ్లెటిక్స్‌లో ఇప్పటి వరకు ఏ ఒక్క క్రీడాకారుడు కూడా జాతీయ స్థాయిలో పతకం తీసుకరాలేకపోయారు. క్రీడలను నాశనం చేయడానికే రాజకీయ నాయకుల ప్రాతినిథ్యం పెరుగుతుందంటున్నారు. క్రీడా సంఘాలకు సీనియర్‌ క్రీడాకారులు, పతకాలు సాధించిన వారు అధ్యక్ష, కార్యదర్శిలతో పాటు సభ్యులుగా ఉంటే క్రీడాకారులకు న్యాయం జరుగుతుంది. సంఘాల్లో రాజకీయ నేతలు ఉండొద్దు క్రీడాకారులకు న్యాయం జరగాలన్నా, శిక్షణ ఇ వ్వాలన్నా క్రీడా సంఘాల్లో సీనియర్‌ క్రీడాకారు లు, పతకాలు సాధించిన వారే అధ్యక్ష, కార్యదర్శులు, సభ్యులుగా ఉండాలి. రాజకీయ నాయకు ల ప్రమేయం వల్ల అన్యాయం జరుగుతుంది. కొ న్ని క్రీడా సంఘాలు టోర్నీలు, ఎంపికలు, సర్టిఫికే ట్లు, బహుమతులు అంటూ డబ్బులు దండుకొని తీరని అన్యాయం చేస్తున్నాయి. ఇది సరైన పద్ధతి కాదు. కాంగ్రెస్‌ ప్రభుత్వం క్రీడలకు, క్రీడాకారుల కు న్యాయం చేయడానికి కృషి చేయాలి. – సయ్యద్‌ ఖైసర్‌, అథ్లెటిక్స్‌లో జాతీయ స్థాయి గోల్డ్‌ మెడలిస్టుస్టేడియాలు కూల్చేసినా మౌనమే..జిల్లా కేంద్రంలోని ఖలీల్‌వాడిలో గతంలో కాంగ్రెస్‌ ప్రభుత్వం అధికారంలో ఉన్న సమయంలో రాజీవ్‌గాంధి స్టేడియాన్ని రూ.3 కోట్లతో నిర్మించారు. అభివృద్ధి చేయాల్సి ఉన్నా అథ్లెటిక్స్‌, ఇతర సంఘాలు పట్టించుకోలేదు. స్టేడియాన్ని కూల్చివేసే సమయంలో కూడా అడ్డుకోలేదు. పాత కలెక్టరేట్‌ మైదానాన్ని తరలించడానికి బీఆర్‌ఎస్‌ ప్రభుత్వం కుట్రలు చేసినా ప్రస్తుతం ఉన్న సంఘాలు పట్టించుకోలేదు. రాజకీయ నాయకులు క్రీడా సంఘాల్లో పేరు కోసం వచ్చి క్రీడాకారులకు తీరని అన్యాయం చేస్తున్నారు. జిల్లా కేంద్రంలో కనీసం ఇప్పటి వరకు సింథటిక్‌ ట్రాక్‌ లేదు. రాజకీయ నాయకుల వల్లే అన్యాయం జరుగుతుందని అథ్లెటిక్‌ సీనియర్‌ క్రీడాకారులు ఆవేదన చెందుతున్నారు. క్రీడాకారుల జీవితాలతో ఆడుకుంటున్నారు టోర్నీ, ఎంపికలను వ్యాపారంగా మార్చేస్తున్న వైనం నిబంధనలు గాలికి..

బాల్కొండ: శ్రీరాంసాగర్‌ ప్రాజెక్ట్‌లో చేపలు పడుతూ జీవనం పొందుతున్న మత్స్యకారులను పాప్లెట్‌ చేపలు పరేషాన్‌ చేస్తున్నాయి. ప్రాజెక్ట్‌లో మూడేళ్లుగా పాప్లెట్‌ చేపలు ఎక్కువగా దొరుకుతాయని మత్స్యకారులు దిక్కు తోచని స్థితిలో పడిపోతున్నారు. మార్కెట్‌లో ఈ రకం చేపలకు డిమాండ్‌ లేదంటు వ్యాపారులు మత్స్యకారుల వద్ద నుంచి రూ.20కే కిలో కొనుగోలు చేస్తున్నారు. దీంతో చేపలు వేటాడిన ప్రయోజనం లేదంటూ మత్స్యకారులు ఆవేదన చెందుతున్నారు. మూడేళ్ల నుంచి.. గతంలో ప్రాజెక్ట్‌లో పాప్లెట్‌ చేపలు కనిపించలేదు. మూడేళ్ల నుంచి ఈ చేపలు ఎక్కువగా దొరుకుతున్నాయి. ఈ చేపల్లో ముళ్లు అధికంగా ఉండటంతో తినడానికి ప్రజలు ఇష్టపడరని మత్స్యకారులు అంటున్నారు. ప్రభుత్వం ఏటా 62 లక్షల చేప పిల్లలను ఉచితంగా ప్రాజెక్ట్‌లో వదులుతుంది. అలా వదిలినప్పుడే పాప్లెట్‌ రకం వచ్చి చేరి ఉంటాయని మత్స్యకారులు అనుమానం వ్యక్తం చేస్తున్నారు. సాధారణంగా బొత్స, రోహు, బంగారు తీగ రకం చేప పిల్లలను ప్రాజెక్ట్‌లో వదులుతారు. మూడేళ్ల నుంచి ప్రాజెక్ట్‌లో ఆ చేపలు కనిపించడం లేదు. పాప్లెట్‌ రకం గరిష్టంగా రెండు నుంచి మూడు కిలోల బరువు మాత్రమే ఉంటుంది. రోజంతా వేటాడిన 10 నుంచి 15 కిలోల చేపలు చిక్కడం లేదు. రూ.20కి కిలో అమ్మితే పెట్రోలు ఖర్చులు రావడం లేదని ఆందోళన చెందుతున్నారు. అధిక సంతానం పాప్లెట్‌ రకం చేపల్లో అధిక సంతాన ఉత్పత్తి ఉంటుంది. అంతే కాకుండ ఇతర చేప పిల్లలను, గుడ్లను ఇవి తినేస్తాయి. దీంతో ప్రాజెక్ట్‌లో ఇతర చేపలు తగ్గి ఇవి విపరీతంగా పెరుగుతున్నాయి. ప్రస్తుతం ప్రాజెక్ట్‌లో నీటి మట్టం తగ్గిన ఇతర చేపలు చిక్కడం లేదు. ప్రాజెక్ట్‌లో చేపల కరువు ఏర్పడిందని మత్స్యకారులు ఆవేదన వ్యక్తం చేస్తున్నారు. కిలో రూ.20కి కొనుగోలు చేస్తున్న వ్యాపారులు ఇబ్బందులు పడుతున్న మత్స్యకారులుడిమాండ్‌ లేదు.. మూడేళ్ల నుంచి ప్రాజెక్ట్‌ లో పాప్లెట్‌ చేపలే చిక్కుతున్నాయి. వీటికి మార్కెట్‌లో డిమాండ్‌ లేక పోవడంతో వ్యాపారులు తీసుకోవడం లేదు. సీడ్‌ వేసినప్పుడే మో సం జరిగింది. ప్రభుత్వం మత్స్యకారులను ఆదు కోవాలి. – కుమార్‌, మత్స్యకారుడు, పోచంపాడ్‌కొంటలేరు.. ప్రాజెక్ట్‌లో వేటకు వెళితే పాప్లెట్‌ రకం చేపలే చిక్కుతున్నాయి. ఈ రకం చేపలను కిలోకు రూ.20కి కూడా వ్యాపారులు కొనుగోలు చేయడం లేదు. దీంతో చేపలు వేటాడిన లాభం లేకుండా పోతుంది. – నర్సింలు, మత్స్యకారుడు, పోచంపాడ్‌

సాక్షి, హైదరాబాద్‌: రాష్ట్రంలోని అగ్రికల్చర్‌, ఫార్మసీ, ఇంజనీరింగ్‌ కాలేజీల్లో ప్రవేశానికి జేఎన్‌టీయూహెచ్‌ నిర్వహిస్తున్న ఉమ్మడి ప్రవేశ పరీక్ష (టీఎస్‌ఈఏపీ సెట్‌) బుధవారం ప్రశాంతంగానే ముగిసింది. అయితే, మంగళవారం కురిసిన అకాల వర్షం కారణంగా హైదరాబాద్‌ సహా పలు ప్రాంతాల్లో విద్యుత్‌ అంతరాయం ఏర్పడింది. పరీక్ష కేంద్రాల్లో అనేక చోట్ల విద్యుత్‌ లేకపోవడం, ఇంటర్నెట్‌ సదుపాయం గంటల తరబడి అందుబాటులోకి రాకపోవడంతో సెట్‌కు సమస్యలు తలెత్తాయి. హైదరాబాద్‌లోని పలు పరీక్ష కేంద్రాల్లో కొద్దిసేపు కంప్యూటర్లు మొరాయించినట్టు విద్యార్థులు తెలిపారు. కానీ తక్షణమే అధికారులు స్పందించి ప్రత్యేక ఏర్పాట్లు చేశారు. ఉదయం నుంచే అదనంగా జనరేటర్లను సిద్ధం చేశారు. నెట్‌వర్క్‌ సమస్యలను కొన్ని నిమిషాల వ్యవధిలోనే పరిష్కరించినట్టు అధికారులు తెలిపారు. మంగళవారం మొదలైన ఫార్మసీ, అగ్రికల్చర్‌ విభాగానికి చెందిన సెట్‌ రెండో రోజు కూడా జరిగింది. ఈ రెండు రోజులకు కలిపి 1,00,254 మంది దరఖాస్తులు చేసుకున్నారు. ఇందులో 90 శాతం విద్యార్థులు పరీక్ష రాసినట్టు అధికారవర్గాలు తెలిపాయి. ఇంజనీరింగ్‌ సెట్‌కు పక్కా ఏర్పాట్లు రాష్ట్రంలోని దాదాపు 175 కాలేజీల్లో ఉన్న 1.06 లక్షల ఇంజనీరింగ్‌ సీట్ల భర్తీకి జేఎన్‌టీయూహెచ్‌ నిర్వహించే సెట్‌ గురువారం మొదలవుతుంది. ఈ పరీక్షకు ఏపీ, తెలంగాణ నుంచి 2,54,532 మంది విద్యార్థులు దరఖాస్తులు చేసుకున్నారు. సగం మందికిపైగా విద్యార్థులు హైదరాబాద్‌ కేంద్రం నుంచే పరీక్ష రాస్తున్నారు. దీంతో హైదరాబాద్‌లో 4 జోన్లు ఏర్పాటు చేశారు. వర్షం, గాలి దుమారం అనుభవాలను దృష్టిలో ఉంచుకుని ముందస్తు జాగ్రత్తలు తీసుకున్నట్టు అధికారులు తెలిపారు. అన్ని కేంద్రాల్లోనూ జనరేటర్లు అందుబాటులో ఉండేలా చర్యలు తీసుకున్నామని చెప్పారు. నెట్‌వర్క్‌ సమస్య రాకుండా కూడా అదనపు ఏర్పాట్లు చేస్తున్నామని వెల్లడించారు. ముగిసిన అగ్రి, ఫార్మా సెట్‌ వర్షంతో విద్యుత్‌ అంతరాయం ఇబ్బందులు పడ్డ విద్యార్థులు అనేక చోట్ల కొద్ది సేపు మొరాయించిన సర్వర్లు

నిజామాబాద్‌ రూరల్‌ : పార్లమెంట్‌ ఎన్నికల పోలింగ్‌ తేది సమీపిస్తోంది. ఓటర్లు ఆలోచించి ఓటు వేయాలి. అవినీతి లేని సమాజం కోసం మంచి నాయకుడిని ఎన్నుకోవాలి. భావితరాలను దృష్టిలో ఉంచుకొని అవినీతి లేని సమాజాన్ని స్థాపించే వ్యక్తులకు, కష్టసుఖాల్లో అండగా నిలిచే నాయకులను గెలిపించాలి. ఎవరికి ఓటు వేస్తే అభివృద్ధి చేస్తారని ఆలోచించాలని మేధావులు సూచిస్తున్నారు. మే 13న ప్రతి ఒక్కరు ఓటు హక్కు వినియోగించుకోవాలి అంటున్నారు. ప్రలోభాలకు లొంగకుండా నిర్భయంగా ఓటు వేయాలి. అవినీతి లేని సమాజం కోసం నిర్భయంగా ఓటు వేద్దాం

కాళేశ్వరం బ్యారేజీల విషయంలో సర్కార్‌ పునరాలోచనసాక్షి, హైదరాబాద్‌: కాళేశ్వరం ప్రాజెక్టులోని మేడిగడ్డ, అన్నారం, సుందిళ్ల బ్యారేజీలకు నిర్వహించాల్సిన అత్యవసర మరమ్మతులను సూచిస్తూ కేంద్ర జలసంఘం(సీడబ్ల్యూసీ) మాజీ చైర్మన్‌ చంద్రశేఖర్‌ అయ్యర్‌ నేతృత్వంలోని నిపుణుల కమిటీ తాజాగా మధ్యంతర నివేదిక సమర్పించినా.. మరమ్మతులు తక్షణమే ప్రారంభమయ్యే సూచన లు కనిపించడం లేదు. వానాకాలం ప్రారంభానికి నెల రోజులే మిగిలి ఉండగా, ఆలోగా అయ్యర్‌ కమిటీ సిఫారసు చేసిన తాత్కాలిక మరమ్మతులను పూర్తి చేయడం సాధ్యం కాదని నీటిపారుదల శాఖ వర్గాలు స్పష్టం చేస్తున్నాయి. మేడిగడ్డ బ్యారేజీలోని 7వ నంబర్‌ బ్లాక్‌కు నిర్వహించే మరమ్మతులు తాత్కాలికమేని, మళ్లీ ఏదైనా జరగదని గ్యారెంటీ ఇవ్వలేమని అయ్యర్‌ కమిటీ తేల్చిచెప్పడంతో రాష్ట్ర ప్రభుత్వం పునరాలోచనలో పడింది. ఈ నేపథ్యంలో కమిటీ నివేదికపై అధ్యయనం కోసం నీటి పారుదల శాఖలోని ఇంజనీర్లతో ఓ కమిటీని వేయా లని నిర్ణయం తీసుకున్నట్టు తెలిసింది. ఈ కమిటీ నివేదిక సమర్పించిన తర్వాతే రాష్ట్ర ప్రభుత్వం బ్యారేజీలకు మరమ్మతుల విషయంలో నిర్ణయం తీసుకునే అవకాశం ఉందని సమాచారం. అయ్యర్‌ కమిటీ చేసిన సిఫారసుల్లో కొన్నింటిని మాత్రమే వానాకాలం ప్రారంభానికి ముందు అమలు చేసేందుకు అవకాశముందని అధికారవర్గాలు తెలిపాయి. కమిటీ సూచించిన పనులకు సంబంధించిన డిజైన్లు, డ్రాయింగ్స్‌ను తయారు చేసి ఆమోదం తీసుకోవడానికి చాలా సమయం పడుతుందని ఆ వర్గాలు పేర్కొంటున్నాయి. ఆలోగా వర్షాకాలం ప్రారంభం అవుతుందని చెపుతున్నాయి. అయ్యర్‌ కమిటీ మధ్యంతర నివేదిక సమర్పించిన తర్వాతే బ్యారేజీలకు అత్యవసర మరమ్మతులను నిర్వహి స్తామని గతంలో రాష్ట్ర ప్రభుత్వం ప్రకటించిన విషయం తెలిసిందే. మేడిగడ్డ బ్యారేజీ భవితవ్యంపై అయ్యర్‌ కమిటీ ప్రశ్నలు రేకెత్తించిన నేపథ్యంలో మరమ్మతులు చేపట్టిన తర్వాత ఏదైనా అనుకోని సంఘటన జరిగితే దానికి బాధ్యత వహించాల్సి వస్తుందనే భావనతో ప్రభుత్వం ఆచితూచి నిర్ణయం తీసుకోవాలని యోచిస్తోంది. కాగా, మరో వారం రోజులు గడిచిన తర్వాతే మరమ్మతులు చేపట్టే అంశంపై కొంత స్పష్టత వచ్చే అవకాశముందని నీటిపారుదల శాఖ వర్గాలు పేర్కొంటున్నాయి. అయ్యర్‌ కమిటీ నివేదికపై అధ్యయనానికి ఇంజనీర్లతో మరో కమిటీ వేయాలని నిర్ణయం ఆ కమిటీ సూచనల తర్వాతే ముందడుగు మేడిగడ్డ బ్యారేజీకి మరమ్మతులు చేసినా గ్యారంటీ లేదన్న అయ్యర్‌ కమిటీ