ధరూరు: మండలంలో మంగళవారం రాత్రి భారీ ఈదురు గాలులకు పంట నష్టం వాటిల్లింది. రాత్రి 9 గంటల నుంచి 11 గంటల వరకు భారీగా గాలులు వీచాయి. దీంతో పాటు భారీగా వీచిన గాలులతో చెట్లు, పంటలు నేలకొరాగాయి. గాలి దాటికి విద్యుత్‌ సరపాను నిలిపివేశారు. మండలంలోని బూరెడ్డిపల్లి గ్రామ శివారులో భారీ వర్షానికి రైతు ఆనంద్‌రెడ్డి పొలంలో దాదాపు 100 మునక్కాయల చెట్లు విరిగిపోయాయి. గత ఏడాది కూడా ఇదే తరహాలోనే మునగ చెట్టు నేలకొరిగి తీవ్ర నస్టాల పాలయ్యారు. మంగళవారం రాత్రి 8 గంటల నుంచి 10.30 గంటల వరకు విద్యుత్‌ సరఫాను నిలిపివేశారు. అక్కడక్కడ వర్షాలు కురవడంతో బుధవారం వాతావరణం కాస్త చల్లబడడంతో జనం ఉక్కపోత, మండే ఎండల నుంచి ఉపశమనం పొందారు. నేలకొరిగిన పంటలు.. విరిగిన చెట్లు

రాజోళి: కేంద్రంలో రానున్నది బీజేపి ప్రభుత్వమేనని అలంపూర్‌ మాజీ ఎమ్మెల్యే రావుల రవీంద్ర నాథ్‌ రెడ్డి అన్నారు. మండల కేంద్రమైన రాజోళితో పాటు చిన్నదన్వాడ,నసనూరు,మాన్‌దొడ్డి తదిదర గ్రామాల్లో ఆయన ఎన్నికల ప్రచారం నిర్వహించారు. చిన్న దన్వాడలో 50 మందికి పైగా పార్టీలో చేరగా వారికి కండువాలు కప్పి, పార్టీలోకి ఆహ్వానించారు. రాజోళిలో మాజీ ఎంపీటీసీలు, మాజీ సర్పంచులను ఆయన కలిసి మాట్లాడారు. కేంద్రంలో నరేంద్ర మోదీ మూడో సారి ప్రధాని కాబోతున్నారని, ప్రస్తుతం వీస్తున్న బీజేపి గాలిలో బీఆర్‌ఎస్‌, కాంగ్రెస్‌ పార్టీలు రెండవ స్థానం కోసం మాత్రమే పోటీ పడుతున్నాయని అన్నారు. మోదీ తీసుకువచ్చిన సంక్షేమ పథకాల వల్ల దేశంలోని పేదలకు ఎంతో మేలు జరిగిందని అన్నారు. కార్యక్రమంలో మండల అధ్యక్షుడు సంజీవ రెడ్డి, బల్గెర శివారెడ్డి, జిల్లా ఉపాధ్యక్షుడు మదుసూదన్‌ గౌడ్‌, స్వప్న,రమాదేవి తదిదరులు పాల్గొన్నారు.

గద్వాల అర్బన్‌: రెడ్‌క్రాస్‌ సొసైటీ వ్యవస్థాపకుడు హెన్రీ డ్యూనాంట్‌ జన్మదినం, ప్రపంచ రెడ్‌క్రాస్‌ దినోత్సవాన్ని బుధవారం జిల్లా కేంద్రంలోని బాలసదనంలో ఘనంగా జరుపుకొన్నారు. ఈ కార్యక్రమానికి ముఖ్య అతిథిగా ప్రిన్సిపల్‌ సీనియర్‌ సివిల్‌ జడ్జి గంట కవిత హాజరయ్యారు. హెన్రీ డ్యూనాంట్‌ చిత్రపటానికి పూలమాల వేసి నివాళులర్పించారు. ఆనంతరం బాలసదనంలోని చిన్నారులకు పండ్లను పంపిణీ చేశారు. ఈ సందర్భంగా జడ్జి మాట్లాడుతూ ప్రపంచ వ్యాప్తంగా ఇండియన్‌ రెడ్‌క్రాస్‌ సామాజిక సేవకు పునరంకితం కావడం ఎంతో అభినందనీయమన్నారు. రెడ్‌క్రాస్‌ సేవలు గద్వాల జిల్లాలో ఇంకా పురోగతి చెందాలని, అందుకు తనవంతు సహకారం అందిస్తానని తెలిపారు. కార్యక్రమంలో రెడ్‌క్రాస్‌ సోసైటి చైర్మన్‌ రమేష్‌, డిడబ్ల్యూఓ సుధారాణి, డీసీపీఓ నర్సింహ్మ తదితరులు ఉన్నారు.

అర్హులు అందరికీ రుణాలిస్తాం పంట పెట్టుబడుల్లో భాగంగా పంట రుణాలకు దరఖాస్తు చేసుకునే అర్హులైన రైతులందరికి రుణాలు అందిస్తాం. 2023–24 ఆర్థిక సంవత్సరంలో రుణ లక్ష్యం మేరకు రుణాలు అందించేందుకు చర్యలు తీసుకున్నాం. అయితే చాలా మంది రైతులు తమ పంట రుణాలను బ్యాంకులకు వెళ్లి రెన్యువల్‌ చేసుకోలేదు. – అయ్యపురెడ్డి, ఎల్‌డీఎం ● 2023–24లో జిల్లాకు రూ.3530.58 కోట్లు పంట రుణ లక్ష్యం ● 53.27 శాతం మాత్రమే చేరిన వైనం ● రెన్యువల్స్‌ చేయించుకోని రైతులు ● రుణమాఫీ ప్రధాన కారణం గద్వాల న్యూటౌన్‌: 2023–24 ఆర్థిక సంవత్సరానికి గాను జిల్లాలో పంట రుణ లక్ష్యం నెరవేరలేదు. నిర్ధేశించిన లక్ష్యంలో 53.27 శాతం మాత్రమే రుణ లక్ష్యం అయ్యింది. రుణమాఫీ అవుతుందన్న ఉద్దేశ్యంతో చాలా మంది రైతులు తమ పంట రుణాలను రెన్యువల్స్‌ చేయించుకోలేదు. దీని ఫలితంగానే పంటరుణ లక్ష్యం నెరవేరలేదని బ్యాంకర్లు అంటున్నారు. పంట రుణ పరిమితి మేర రుణాలు పంటలపై ఆయా బ్యాంకులు ఆ ఆర్థిక సంవత్సరంలో నిర్దేశించిన పంట రుణ పరిమితి మేరకు రైతులకు రుణాలు అందిస్తాయి. ఇందులో బాగంగా ఆయా బ్యాంకుల వారీగా రెండు సీజన్‌లకు రుణ లక్ష్యాన్ని లీడ్‌ బ్యాంక్‌ అధికారులు నిర్ధేశిస్తారు. అయితే రైతులు సీజన్‌కు ముందు లేదా సీజన్‌ మధ్యలో పంట రుణాల కోసం బ్యాంకులను ఆశ్రయిస్తారు. అంతకుముందు ఏడాదిలో సంబందిత రైతు తాను తీసుకున్న రుణాన్ని చెల్లించవచ్చు లేదా చెల్లించకపోయిన వడ్డీ చెల్లించి, మరో పంటను వేస్తున్నట్లు వ్యవసాయ అధికారుల దృవీకరణ పత్రాన్ని సమర్పించి లేదా తనకు ఎక్కువగా ఉన్న భూమిపై మళ్లీ రుణాన్ని తీసుకోవచ్చు. ఇలా రైతు బ్యాంకుకు వచ్చి రెన్యూవల్‌ చేసుకుంటేనే బ్యాంకులు పంట రుణాలు అందిస్తాయి. అయితే గడిచిన అసెంబ్లీ ఎన్నికలకు ముందు అప్పటి ప్రభుత్వం రుణమాఫీ ప్రకటించింది. దీంతో చాలా మంది రైతులు తమ రుణాలు మాఫీ అవుతాయన్న ఉద్ధేశ్యంతో పంట రుణాలు తీసుకోవడానికి వెళ్లలేదు. అయితే ఈ రుణమాఫీ కొంత గందరగోళానికి దారి తీసింది. చాలా మంది రైతులకు వచ్చిన మాఫీ వడ్డీకే సరిపోయింది. అదికూడా అందరికి రాలేదు. ఇదే సమయంలో ఎన్నికల తర్వాత రుణమాఫీ చేస్తామని ప్రస్తుత ప్రభుత్వం కూడా ప్రకటించింది. దీనివల్ల కూడా రైతులు బ్యాంకులకు వెళ్లి రెన్యూవల్‌ చేసుకోలేదు. పంట రుణాలను రెన్యువల్‌ చేసుకుంటే రుణమాఫీ కాదేమో అన్న భయం అన్నదాతలను వెంటాడింది. వీటి ఫలితంగానే 2023–24 ఆర్థిక సంవత్సరానికి సంబందించి పంట రుణాలకై బ్యాంకులకు నిర్ధేశించిన లక్ష్యం నెరవేరలేదు. ఇదిలా ఉంటే చాలా మంది రైతులు పంట పెట్టుబడులకై అధిక వడ్డీలకు ప్రైవేట్‌గా అప్పులు చేశారు. జిల్లా పరిస్థితి ఇలా.. నడిగడ్డ వ్యవసాయ ఆధారిత జిల్లా. ఇక్కడ వ్యవసాయమే ప్రధాన జీవనాధారం. జూరాల, ఆర్డీఎస్‌ ప్రాజెక్ట్‌లతో పాటు, నెట్టెంపాడు ఎత్తిపోథల పథకం, దీని కింద ఏడు రిజర్వాయర్లు, వందకు పైగా చెరువులు, కుంటలు ఉన్నాయి. వీటికి అదనంగా బోర్లు, బావులు కూడా ఇక్కడి రైతులు ఏర్పాటు చేసుకున్నారు. ఏటా రెండు సీజన్‌లలో దాదాపు 5లక్షల ఎకరాల వరకు వివిద రకాల పంటలు సాగు చేస్తుంటారు. ఇంకా పండ్లతోటలు, కూరగాయలు పండిస్తున్నారు. అయితే జిల్లాలో సన్న, చిన్నకారు రైతులు వేల సంఖ్యలో ఉన్నారు. రైతుబంధు, పీఎం కిసాన్‌ సమ్మాన్‌ యోజన వంటి పంట పెట్టుబడుల పథకాలు కేంద్ర, రాష్ట్రాలు అమలు చేస్తున్నా, వాటితో పూర్తి పంట పెట్టుబడుల అవసరాలు తీరడం లేదు. దీంతో వీరంతా బ్యాంకులు అందించే పంట రుణాలనే పంట పెట్టుబడులుగా ఉపయోగిస్తూ, సేద్యం చేస్తున్నారు.

నాగర్‌కర్నూల్‌ ఎంపీ రాములు పార్టీకి వెన్నుపోటు పొడిచి బీజేపీలో చేరారని.. బీఆర్‌ఎస్‌ ఏం తక్కువ చేసిందో ప్రజలకు చెప్పాలని కేటీఆర్‌ డిమాండ్‌ చేశారు. బీజేపీ మళ్లీ అధికాంలోకి వస్తే, రాజ్యాంగం రద్దు చేస్తోందని.. ఎస్సీ, ఎస్టీ, బీసీ, మైనార్టీలు రిజర్వేషన్లు కోల్పోతారని ఆందోళన వ్యక్తంచేశారు. నిత్యావసర ధరలు పెంచడంతో పాటు రిజర్వేషన్లు రద్దు చేస్తానన్న మోదీని పార్లమెంట్‌ ఎన్నికల్లో ఓడించి తగిన బుద్ధి చెప్పాలని పిలుపునిచ్చారు. ప్రవీణ్‌కుమార్‌ను ఎంపీగా గెలిపిస్తే, ఈప్రాంతానికి గౌరవం పెరుగుతుందని.. స్థానికుడైన ఆర్‌ఎస్‌పీని అత్యధిక మెజార్టీతో గెలిపించాలని కోరారు.