సిరిసిల్ల: ఓటు హక్కు ఉన్న ప్రతిఒక్కరూ ఓటు హక్కును వినియోగించుకోవాలని స్వీప్‌ నోడల్‌ అధికారి, అదనపు డీఆర్‌డీవో గొట్టె శ్రీనివాస్‌ అన్నారు. జిల్లా సమాఖ్య ఆఫీస్‌లో మంగళవారం ఓటు వినియోగంపై స్వీప్‌ ఆధ్వర్యంలో అవగాహన సదస్సు నిర్వహించారు. ఈ సందర్భంగా శ్రీనివాస్‌ మాట్లాడుతూ పార్లమెంటు ఎన్నికల్లో ఓటు వేయడం అందరి బాధ్యత అన్నారు. కలెక్టర్‌ అనురాగ్‌ జయంతి ఆదేశాల మేరకు శ్రీఐ ఓటు ఫర్‌ ష్యూర్‌శ్రీ ఓటు హక్కు నా బాధ్యతశ్రీ అని ప్రతిజ్ఞ చేయించారు. ఓటు హక్కుపై విలేజీ ఆర్గనైజర్లకు, వీఓ ప్రెసిడెంట్లకు, వీఓఏలకు అవగాహన కల్పించారు. ఈ కార్యక్రమంలో డీపీఎం సుధారాణి, జిల్లా సమాఖ్య ప్రతినిధులు పాల్గొన్నారు. ‘రైతుబంధు జమపై ఓర్వలేకపోతున్న బీజేపీ’వేములవాడ: రాష్ట్రంలోని రైతులకు రైతుబంధు నిధులను తమ ఖాతాలో జమ చేయడాన్ని బీజేపీ ఓర్వలేకపోతుందని ప్రభుత్వ విప్‌, వేములవాడ ఎమ్మెల్యే, ఆది శ్రీనివాస్‌ ఒక ప్రకటనలో పేర్కొన్నారు. రైతుభరోసాను రాష్ట్ర ప్రభుత్వం చెప్పిన సమయానికి రైతుల బ్యాంకు ఖాతాల్లో జమ చేసిందన్నారు. ఈసీ అస్త్రంగా చేసుకొని బీజేపీ రైతుల ఖాతాలో పడిన నిధులను ఆపేలా కుట్రలు చేసిందన్నారు. 2018 ఎన్నికల సమయంలో ఎన్నికల రోజునే కేసీఆర్‌ రైతుబంధు డబ్బులు చేశారని తెలిపారు. అప్పుడు నోరుమెదపని బీజేపీ, ఆపని ఈసీ ఇప్పుడు ఎందుకు ఆపిందన్నారు. రైతుల ప్రయోజనాల కోసం కృషి చేశామని తెలిపారు. వచ్చే ఎన్నికల్లో రైతు వ్యతిరేక బీజేపీకి తగిన గుణపాఠం చెపుతామన్నారు. ప్రజల పక్షాన బీఆర్‌ఎస్‌గంభీరావుపేట: అధికారంలో ఉన్నా ప్రతిపక్షంలో ఉన్నా బీఆర్‌ఎస్‌ ఎప్పటికీ ప్రజల పక్షమేనని టెస్కాబ్‌ చైర్మన్‌ కొండూరి రవీందర్‌రావు అన్నారు. మంగళవారం గంభీరావుపేటలోని బీఆర్‌ఎస్‌ కార్యాలయంలో ఏర్పాటు చేసిన విలేకరుల సమావేశంలో మాట్లాడారు. 23 ఏళ్లుగా బీఆర్‌ఎస్‌ పార్టీ కేసీఆర్‌ ఆధ్వర్యంలో ప్రజలతో మమేకం అయ్యిందన్నారు. కేసీఆర్‌ చేపట్టిన బస్సు యాత్రతో కాంగ్రెస్‌ పార్టీలో గుబులు పుట్టిందన్నారు. వరినాట్ల సమయంలో ఇవ్వాల్సిన రైతుబంధును కోతలు పూర్తయ్యాక ఇస్తున్నారని ఎద్దేవా చేశారు. ప్రస్తుత పార్లమెంట్‌ ఎన్నికల్లో ప్రశ్నించే గొంతుక బీఆర్‌ఎస్‌ అభ్యర్థి వినోద్‌కుమార్‌ అన్నారు. సమావేశంలో ఎంపీపీ వంగ కరుణ, జెడ్పీటీసీ విజయ, మండల, పట్టణ అధ్యక్షులు వెంకటస్వామి, వెంకట్‌, లక్ష్మణ్‌, సురేందర్‌రెడ్డి, లింగం, హరీశ్‌, రవి, రాజు పాల్గొన్నారు. యారన్‌ సబ్సిడీ సాధనకు పోరాటంసిరిసిల్లటౌన్‌: బతుకమ్మ చీరలు నేసిన కార్మికులకు ప్రభుత్వం నుంచి రావాల్సిన యారన్‌ సబ్సిడీకై పోరాడుతామని పవర్‌లూమ్స్‌ వర్కర్స్‌ యూనియన్‌ రాష్ట్ర అధ్యక్షుడు మూశం రమేశ్‌ అన్నారు. మంగళవారం సిరిసిల్లలోని పార్టీ ఆఫీస్‌లో నిర్వహించిన విలేకరుల సమావేశంలో మాట్లాడారు. రాష్ట్ర ప్రభుత్వం కాలయాపన చేస్తున్న నేపథ్యంలో సబ్సిడీ సాధనకు బుధవారం నెహ్రూనగర్‌లో కార్మికులతో సమావేశం నిర్వహిస్తున్నామని తెలిపారు. కార్యాచరణ చేపట్టి సబ్సిడీ డబ్బులు వచ్చే వరకు పోరాడుతామన్నారు. నాయకులు నక్క దేవదాసు, సిరిమల్ల సత్యం, గుండు రమేశ్‌, కంది మల్లేశం తదితరులు పాల్గొన్నారు. పోస్టల్‌ బ్యాలెట్‌ను సద్వినియోగం చేసుకోవాలిసిరిసిల్ల: పార్లమెంట్‌ ఎన్నికల విధులకు హాజరయ్యే ఉద్యోగులందరూ పోస్టల్‌ బ్యాలెట్‌ను సద్వినియోగం చేసుకోవాలని పోస్టల్‌ బ్యాలెట్‌ నోడల్‌ ఆఫీసర్‌ లక్మీరాజం కోరారు. పోస్టల్‌ బ్యాలెట్‌ వినియోగానికి వేములవాడలోని నూతన లైబ్రరీ భవనం, సిరిసిల్ల గీతానగర్‌లోని జిల్లా పరిషత్‌ ఉన్నత పాఠశాలలో ఫెసిలిటేషన్‌ కేంద్రాలను ఏర్పాటు చేశామని అన్నారు. బుధవారం ఆఖరి రోజు అని తెలిపారు.

● పోలీసుల ఆంక్షలతో ఇబ్బందులు ● బయట నుంచే రాజన్నకు మొక్కులు వేములవాడ: ప్రధాని నరేంద్ర మోదీ బుధవారం ఉదయం వేములవాడకు వస్తుండటంతో రెండు రోజులుగా ప్రత్యేక పోలీసులు గట్టి బందోబస్తు ఏర్పాటు చేస్తున్నారు. మంగళవారం సైతం పోలీసులు ఆంక్షలు విధించడంతో వేకువజామునే కొంతమంది భక్తులు రాజన్నను దర్శించుకొని మొక్కులు చెల్లించుకున్నారు. ఉదయం రెండు గంటల పాటు ఆలయాన్ని మూసేసి ప్రధాని మోదీ దర్శనంపై అధికారులు ట్రయల్స్‌ నిర్వహించారు. ఈ క్రమంలో భక్తులు ఆలయంలోకి వెళ్లే అవకాశాలు లేకపోవడంతో బయటి నుంచే మొక్కుకుని వెనుదిరిగారు. మంగళవారం మధ్యాహ్నం నుంచే పోలీసులు ఆలయాన్ని తమ ఆధీనంలోకి తీసుకోవడంతో ఆలయ అధికారులు సైతం ఇబ్బందులు పడాల్సి వచ్చింది. దుకాణాలు బంద్‌ ఆలయ పరిసరాలు, ప్రధాని వెళ్లే మార్గంలోని దుకాణాలను మంగళవారం మధ్యాహ్నం నుంచి బుధవారం మధ్యాహ్నం వరకు మూసివేయాలని పోలీసులు ప్రతీ దుకాణదారుడికి సూచించారు. దుకాణాల ముందున్న సామగ్రిని తొలగించాలని ఆదేశించారు. దీంతో మంగళవారం ఉదయం నుంచి దుకాణాలు మూసివేసుకోవడంతో రోడ్లన్నీ బోసిపోయి కనిపించాయి. పోలీసులతో వాగ్వాదం ప్రధాని మోదీ పర్యటన సందర్భంగా పోలీసులు విఽధించిన ఆంక్షలతో పురప్రముఖులు, వ్యాపారులు, స్థానికులు, పాత్రికేయులకు పోలీసులతో వాగ్వాదం తప్పలేదు. సమీపంలోని తమ ఇళ్లలోకి వెళ్లేందుకు సైతం పోలీసులు అనుమతించకపోవడంతో వారంతా ఉద్వేగానికి లోనయ్యారు. ఫొటోలు, వీడియో కవరేజ్‌కి వెళ్లిన జర్నలిస్టులకు సైతం పోలీసులతో వాగ్వాదం జరిగింది.

సాక్షి ప్రతినిధి, కరీంనగర్‌: ఈసారి పార్లమెంట్‌ ఎన్నికల్లో బీజేపీ గెలుపు తథ్యమని ఎంపీ బండి సంజయ్‌కుమార్‌ అన్నారు. రెండోసారి పార్లమెంట్‌ బరిలో నిలిచిన ఆయన ఈసారి వార్‌ వన్‌ సైడేనని ధీమా వ్యక్తం చేశారు. తమ వ్యూహం ప్రధాని మోదీ అని, కరీంనగర్‌ ప్రజలే తమ బలమని పేర్కొన్నారు. బీఆర్‌ఎస్‌, కాంగ్రెస్‌ అభ్యర్థులు గడీల వారసులు, తాను గరీబోళ్ల బిడ్డనని, పైగా పక్కా లోకల్‌ అన్నారు. గెలిచినా, ఓడినా తాను ఇక్కడే ఉంటానని, వారు ఓడిపోతే ముఖం చూపించరని ఎద్దేవా చేశారు. ‘సాక్షి’ ఇంటర్వ్యూలో ఆయన మరిన్ని ఆసక్తికర విషయాలు వెల్లడించారు.

సిరిసిల్లటౌన్‌: వేములవాడలో బుధవారం నిర్వహించే ప్రధాని మోదీ పర్యటనను అడ్డుకుంటామని ఓయూ జేఏసీ చైర్మన్‌ కొత్తపల్లి తిరుపతి, బహుజన స్టూడెంట్స్‌ ఫెడరేషన్‌ రాష్ట్ర ఉపాధ్యక్షుడు పులిగింటి వేణుగోపాల్‌ అన్నారు. మంగళవారం సిరిసిల్ల ప్రెస్‌క్లబ్‌లో ఏర్పాటు చేసిన విలేకరుల సమావేశంలో మాట్లాడారు. బ్యాంకుల ధనాన్ని కార్పొరేట్లకు దోచిపెట్టారని, మధ్య, దిగువ తరగతి రైతులకు ఒక్క రూపాయి రుణమాఫీ చేయలేదని విమర్శించారు. ఆలయాల అభివృద్దికి బీజేపీ ప్రవేశపెట్టిన పథకంలో వేములవాడ ఆలయాన్ని ఎందుకు చేర్చలేదో బండి సంజయ్‌ సమాధానం చెప్పాలన్నారు. నాయకులు ముదునిపెల్లి సాయి, చౌడారపు రాజు, దుబాల కుమార్‌ తదితరులు పాల్గొన్నారు. కార్మిక హక్కులను కాలరాసిన మోదీ కార్మిక వర్గాల హక్కులను ప్రధాని మోదీ కాలరాశారని ఏఐటీయూసీ జిల్లా కార్యదర్శి కడారి రాములు అన్నారు. మంగళవారం సిరిసిల్ల కార్మిక భవనంలో ఏర్పాటు చేసిన సమావేశంలో మాట్లాడారు. ఏడాదికి రెండు కోట్ల ఉద్యోగాలిస్తామని పదేళ్లయినా నిరుద్యోగులకు న్యాయం చేయలేదన్నారు. నాయకులు అజ్జ వేణు, అనందం పాల్గొన్నారు.

● తడిసిన ధాన్యం.. రాలిన మామిడికాయలు ● నేలవాలిన విద్యుత్‌ స్తంభాలు ● రైతులు అధైర్యపడొద్దు: కలెక్టర్‌సిరిసిల్ల: జిల్లావ్యాప్తంగా మంగళవారం మధ్యాహ్నం ఈదురు గాలులతో కూడిన వర్షం బీభత్సం సృష్టించింది. ప్రకృతి కన్నెర్రతో అన్నదాతలు ఆగమయ్యారు. రైతులు ఆరుగాలం శ్రమించి పండించిన శ్రమఫలాన్ని అమ్ముకునేందుకు సిద్ధం చేసిన వడ్లు తడిశాయి. వరి కోతలు పూర్తిచేసి ధాన్యం కొనుగోలు కేంద్రాల్లో ఆరబెట్టిన ధాన్యం తడిసి ముద్దయింది. ధాన్యం కొనుగోలు కేంద్రాల్లో టార్పాలిన్లు లేక వడ్ల కుప్పలు తడిసిపోయాయి. కొందరు రైతులు కవర్లు కప్పి రక్షించే ప్రయత్నం చేయగా భారీగా కురిసిన వర్షంతో చిన్నపాటి పాయగా వరద పారింది. జిల్లాలోని వేములవాడ రూరల్‌, ముస్తాబాద్‌, ఇల్లంతకుంట, ఎల్లారెడ్డిపేట, బోయినపల్లి, వీర్నపల్లి, కోనరావుపేట మండలాల్లో వర్షాలు పడ్డాయి. కోనరావుపేట మండలం వట్టిమల్లలో దాదె జలపతి అనే రైతుకు చెందిన బర్రె పిడుగు పాటుకు మరణించింది. రైతుకు రూ.70వేల నష్టం వాటిల్లింది. జిల్లావ్యాప్తంగా 259 ధాన్యం కొనుగోలు కేంద్రాలను ఏర్పాటు చేసి ఇప్పటి వరకు 1,41,390 మెట్రిక్‌ టన్నుల ధాన్యాన్ని కొనుగోలు చేశారు. మరో లక్షన్నర మెట్రిక్‌ టన్నుల ధాన్యం కొనుగోలు కేంద్రాల్లో నిల్వ ఉంది. రెండు, మూడు రోజుల్లో తూకం వేసేందుకు సిద్ధంగా ఉన్న ధాన్యం తడవడంతో రైతులు తీవ్ర ఆవేదనకు లోనయ్యారు. మళ్లీ వడ్లను ఆరబెట్టి అమ్ముకోవాల్సిన దుస్థితి దాపురించింది. ఇప్పటికే 17 శాతం తేమ కోసం రోజుల తరబడి ఆరబెట్టిన రైతులు మళ్లీ వడ్లను ఆరబెట్టడం కష్టంగా ఉంటుంది. జిల్లాలోని పలు ప్రాంతాల్లో రేకులషెడ్లు కూలిపోయాయి. ఇళ్ల పైకప్పులు కొట్టుకుపోయాయి. రాలిన మామిడికాయలు విపరీతమైన వేగంగా వీచిన గాలులతో చెట్లపై ఉన్న మామిడి కాయలు నేలరాలాయి. కొందరు రైతులు మామిడి కాయలను తెంపి మార్కెట్‌కు తరలించగా మరికొందరు రైతులు ఇంకా చెట్లపైనే ఉంచడంతో గాలులతో నేలకూలాయి. మామిడితోటలను కాంట్రాక్టు తీసుకున్న వారు ఆర్థికంగా నష్టపోయారు. జిల్లాలోని చీర్లవంచ, నాయినోరిపల్లె ప్రాంతాల్లోని మామిడి తోటల్లో కాయలు రాలాయి. తడిసి ముద్దయిన కార్మిక క్షేత్రం సిరిసిల్ల కార్మిక క్షేత్రం అకాల వర్షంతో తడిసి ముద్దయింది. వేగంగా వీచిన గాలులతో రేకుల షెడ్లు కొట్టుకుపోయాయి. సిరిసిల్లలో వీధి వ్యాపారులు ఇబ్బందులు పడ్డారు. రోడ్లపై వర్షం నీరు చేరింది. ఎన్నికల ప్రచారానికి ఆటంకంగా మారింది. విద్యాసంస్థలు కట్టిన ఫ్లెక్సీలు కొట్టుకుపోయాయి. ఎండలు, ఉక్కపోతతో ఉక్కిరిబిక్కిరి అయిన జనం కాస్త ఊపిరి పీల్చుకున్నారు.