శివాజీనగర: హాసన్‌ జేడీఎస్‌ ఎంపీ ప్రజ్వల్‌ రేవణ్ణ లైంగిక దాడుల వ్యవహారంలో బాధితురాలిని కిడ్నాప్‌ చేశారన్న కేసులో ఎమ్మెల్యే హెచ్‌.డీ.రేవణ్ణ బెయిల్‌ పిటిషన్‌పై బెంగళూరులోని ప్రజా ప్రతినిధుల ప్రత్యేక న్యాయస్థానం మంగళవారం విచారణ జరిపింది. బెయిలుపై మీ వైఖరేమిటో చెప్పాలని సిట్‌కు నోటీసులు జారీచేసింది. రేవణ్ణ తరఫు న్యాయవాది సీవీ నాగేశ్‌ వాదన వినిపిస్తూ బెయిల్‌ ఇవ్వాలని కోరారు. సిట్‌ న్యాయవాది వాదిస్తూ నిందితుడు పోలీస్‌ల స్వాధీనంలో ఉన్నపుడు బెయిల్‌ ఎలా సాధ్యమని, విచారణ సాగదని పేర్కొన్నారు. ఇరువర్గాల మధ్య ముమ్మరంగా వాదనలు సాగాయి. జడ్జి విచారణను బుధవారానికి వాయిదా వేశారు. వైద్య పరీక్షలు బనశంకరి: రేవణ్ణకు మంగళవారం బౌరింగ్‌ ఆసుపత్రిలో వైద్య పరీక్షలు నిర్వహించారు. ఆరోగ్యంగా బాగా లేదని చెప్పడంతో ఆయనను సిట్‌ అధికారులు ఆసుపత్రికి తరలించారు. వైద్యులు ఆయనకు వైద్య పరీక్షలు చేసి ఇబ్బంది ఏమీ లేదని చెప్పారు.

బనశంకరి: ఇళ్లల్లో ఉపయోగించే వివిధ రకాల క్లీనింగ్‌ ఉత్పత్తులకు ఉన్న గిరాకీ దృష్ట్యా వాటి మాదిరిగానే నకిలీ ఉత్పత్తులను తయారుచేసి అమ్మడం బెంగళూరులో పెరిగిపోయింది. ఏది నకిలీ, ఏది అసలో తెలియనంతగా ఉంటున్నాయి. దీనిపై ఫిర్యాదులు రావడంతో నగర పోలీసులు దాడులు చేసి ఓ గోదాములో దాచిన రూ.95 లక్షల విలువచేసే నకిలీ ఉత్పత్తులను స్వాధీనం చేసుకున్నారు. ఆవలహళ్లి రామపుర, బీదరహళ్లిలో ఫ్యాక్టరీ కమ్‌ గోదాములో దాడులు చేసినట్లు పోలీస్‌ కమిషనర్‌ బీ.దయానంద్‌ తెలిపారు. విల్సన్‌ గార్డెన్‌ పోలీసులు కేసు నమోదు చేశారు. సీఎం, డీసీఎంపై పోస్టర్లు శివాజీనగర: ప్రజ్వల్‌ అశ్లీల వీడియోల వ్యవహారం నేపథ్యంలో ఐటీ సిటీలో గుర్తుతెలియని వ్యక్తులు డిప్యూటీ సీఎం డీకే శివకుమార్‌కు వ్యతిరేకంగా పోస్టర్లు అంటించారు. వీడియోల సూత్రధారి డీకే అని న్యాయవాది దేవరాజేగౌడ ఆరోపించిన మరుసటి రోజే సీఎం సిద్దరామయ్య, డీకే శివకుమార్‌కు విరుద్ధంగా బసవేశ్వరనగర, రాజాజీనగర, సదాశివనగరతో పాటుగా అనేకచోట్ల పోస్టర్లను అతికించారు. యువతులను ఉపయోగించి తార్పుడు పనులు చేస్తుంటారు అంటూ అందులో తీవ్రమైన రాతలు రాశారు. ఓటేసిన యడ్డి ఫ్యామిలీ శివమొగ్గ: బీజేపీ మాజీ సీఎం బీఎస్‌.యడియూరప్ప, ఆయన తనయులు ఎంపీ రాఘవేంద్ర, పార్టీ రాష్ట్ర అధ్యక్షుడు విజయేంద్ర, వారి సతీమణులు కలిసి జిల్లాలోని శికారిపురలోని మాళెరకెరెలో ఓటు వేశారు. స్థానిక నివాసం నుంచి పోలింగ్‌ కేంద్రానికి వచ్చి ఓటు వినియోగించుకున్నారు. అంతకుముందు హుచ్చరాయ స్వామి ఆలయంలో, తరువాత రాఘవేంద్రస్వామి మఠానికి వెళ్ళి పూజలు చేశారు. ఓటేసిన తరువాత యడ్డి మాట్లాడుతూ రెండో విడతలో మొత్తం 14 సీట్లలో బీజేపీ గెలుస్తుందని, రాష్ట్రంలో 28 స్థానాల్లో 26 సీట్లు తమవేనని అన్నారు. రాఘవేంద్రని అరెస్టు చేయాలి: ఈశ్వరప్ప శివమొగ్గ: శివమొగ్గలో స్వతంత్ర అభ్యర్థిగా బరిలో ఉన్న బీజేపీ నేత ఈశ్వరప్ప పార్టీ అభ్యర్థి బి.వై.రాఘవేంద్రపైన మండిపడ్డారు. తాను రెబెల్‌గా పోటీ నుంచి తప్పుకున్నానని, కాబట్టి బీజేపీకే ఓటు వేయాలని రాఘవేంద్ర, అతని అనుచరులు దుష్ప్రచారం చేశారని ఆరోపించారు. పోటీ నుంచి తప్పుకోలేదని, కానీ ఓటర్లని తప్పుదారి పట్టించడానికి తప్పుడు ప్రచారం సాగించారని మంగళవారం ఓటేసిన తరువాత దుయ్యబట్టారు. రాఘవేంద్రను వెంటనే అరెస్టు చేయాలని అన్నారు. పెన్‌డ్రైవ్‌ కేసులో డీకేశి హస్తం● జిల్లాల్లో జేడీఎస్‌ ఆందోళనలు శివాజీనగర: హాసన్‌ పెన్‌డ్రైవ్‌ కేసు వెనుక ఉప ముఖ్యమంత్రి డీకే శివకుమార్‌ హస్తం ఉందని ఆరోపిస్తూ జేడీఎస్‌ కార్యకర్తలు నిరసనకు దిగారు. బెంగళూరుతో పాటు రాష్ట్ర వ్యాప్తంగా జేడీఎస్‌ కార్యకర్తలు ఆందోళనలు నిర్వహించి టైర్లకు నిప్పు పెట్ట్టి ఆగ్రహం వ్యక్తం చేశారు. డీకే శివకుమార్‌, మాజీ ఎంపీ ఆర్‌ఎల్‌ శివరామేగౌడకు వ్యతిరేకంగా నినాదాలు చేశారు. అలాగే ముఖ్యమంత్రి సిద్దరామయ్యపై కూడా ధ్వజమెత్తారు. పలుచోట్ల జేడీఎస్‌ కార్యకర్తలను పోలీసులు అరెస్ట్‌ చేశారు. వీరబ్రహ్మేంద్రస్వామి ఆలయానికి పాదయాత్ర పావగడ: శ్రీమద్విరాట్‌ వీర బ్రహ్మేంద్రస్వామి దర్శనం కోసం తాలూకాలోని నీలమ్మనహళ్లి గ్రామానికి చెందిన భక్తులు వైఎస్సార్‌ కడప జిల్లా ప్రొద్దుటూరు తాలూకా బనగానపల్లికి మంగళవారం పాదయాత్రగా బయల్దేరారు. వర్షాలు సక్రమంగా కురిసి పంటలు పండి రైతులు, ప్రజలు సుఖ సంతోషాలతో ఉండాలని ఆకాంక్షిస్తూ బ్రహ్మం గారి దర్శనానికి వెళ్తున్నామని ఆలయ సమితి అధ్యక్షుడు గంగాధర స్వామి తెలిపారు. ఇరుముడితో 30 మంది స్వామి వారి భక్తులు, 30 మంది ఇతరులు పాదయాత్ర చేపట్టినట్లు తెలిపారు.

సాక్షి, బళ్లారి: కన్నడనాట చివరిదైన రెండో దశ లోక్‌సభ ఎన్నికల్లో ఉత్తర కర్ణాటకలో 14 లోక్‌సభ స్థానాలకు మంగళవారం జరిగిన ఎన్నికలు శాంతియుతంగా ముగిశాయి. రాష్ట్రంలోని 28 లోక్‌సభ స్థానాలకు గాను 14 సీట్లకు గత నెల 26న ఎన్నికలు జరగడం తెలిసిందే. ఇప్పుడు ఉత్తర, మధ్య కర్ణాటక పరిధిలోని మిగతా నియోజకవర్గాల్లో ఓటర్లు తీర్పు ఇచ్చారు. దీంతో ఎన్నికల యజ్ఞానికి ముగింపు పలికినట్లయింది. ఎక్కడెక్కడ? బళ్లారి, రాయచూరు, కొప్పళ, ధారవాడ, దావణగెరె, బాగల్‌కోటె, బీదర్‌, కలబుర్గి, విజయపుర, శివమొగ్గ, ఉత్తర కన్నడ, బెళగావి, చిక్కోడి, హావేరి నియోజకవర్గాల్లో పోలింగ్‌ సాగిది. బీజేపీ నుంచి మాజీ సీఎంలు బసవరాజ్‌ బొమ్మై, జగదీష్‌ శెట్టర్‌, ఎంపీ అభ్యర్థులు బీ.శ్రీరాములు, బీ.వై. రాఘవేంద్ర, ప్రహ్లాద్‌ జోషి తదితర ప్రముఖులు పోటీలో నిలిచారు. నెల రోజుల నుంచి ఒకవైపు కాంగ్రెస్‌, మరోవైపు బీజేపీ–జేడీఎస్‌ కూటమి అభ్యర్థులు భగభగలాడే ఎండల్లో ముమ్మర ప్రచారం చేశారు. ప్రధాని మోదీ, కాంగ్రెస్‌ అగ్రనేతలు రాహుల్‌, ప్రియాంక గాంధీ తమ పార్టీల సభల్లో పాల్గొని విమర్శల వర్షం కురిపించారు. తరలివచ్చిన ఓటర్లు దాదాపు ప్రతి నియోజకవర్గంలో ఓటర్లు బాగానే తరలివచ్చారు. ఉదయం నుంచి పోలింగ్‌ కేంద్రాల ముందు వరుసలు కట్టారు. పురుషుల కంటే మహిళా ఓటర్లలో ఉత్సాహంగా ఎక్కువగా కనిపించింది. దివ్యాంగులు, వృద్ధులు కూడా తరలివచ్చారు. దీంతో ఓ పోలింగ్‌ బూత్‌ చూసినా రద్దీగా దర్శనమిచ్చింది. సాయంత్రం వరకూ ఓటర్లు క్యూలో నిలబడి ఓటేశాకే వెనుదిరిగారు. ప్రముఖులు క్యూలో నిలబడి తమ ఓటు హక్కును వినియోగించుకున్నారు. కనీసం 75 – 80 శాతం పోలింగ్‌ నమోదై ఉంటుందని అంచనాలున్నాయి. రెండో దశ పోలింగ్‌ ప్రశాంతంగా ముగియడంతో ఇక అభ్యర్థుల భవితవ్యం ఈవీఎంల్లో నిక్షిప్తమైంది. గత ఎన్నికల్లో ఉత్తర కర్ణాటకలో బీజేపీ దాదాపు అన్ని స్థానాలను గెలుచుకుంది. ఈసారి ఆ పట్టు కొనసాగేనా అన్నది చూడాలి. ఉత్తర కన్నడ జిల్లా హళియాళ తాలూకా గరదొడ్డిలో ఆఫ్రికా మూలవాసులైన సిద్ది మహిళలు మహాలక్ష్మి గ్రేట్‌● కాలితోనే ఓటేసిన దివ్యాంగురాలు అన్ని అవయవాలు సక్రమంగా ఉన్నవారు కూడా ఓటు వేయడానికి బద్దకిస్తుంటారు. కానీ ఈ చిత్రంలో కనిపిస్తున్న దివ్యాంగురాలు ఎన్‌.మహాలక్ష్మి ఉత్సాహంగా ఓటు వేసి ఆదర్శంగా నిలిచారు. ఆమెకు పుట్టుకతోనే రెండు చేతులు లేవు. దీంతో కాళ్లనే చేతులుగా చేసుకుని చదువు నేర్చుకున్నారు. సొంతంగా అన్ని పనులు చేసుకుంటారామె. లోక్‌సభ ఎన్నికలలో విజయనగర జిల్లా కూడ్లిగి తాలూకా గుండమునుగులో ఓటు వేస్తున్న దృశ్యం. కాలితోనే సంతకం చేసి కాలి వేలుకు సిరా గుర్తు తీసుకున్నారు. ఉత్తర కర్ణాటకలో 14 లోక్‌సభ స్థానాలకు పోలింగ్‌ భారీగా తరలివచ్చిన ఓటర్లు ఈవీఎంలలో పార్టీల భవిత ఇక ఫలితాల కోసం నిరీక్షణ ఒకే కుటుంబంలో 96 మంది ఓటర్లు హుబ్లీ: ధార్వాడ లోక్‌సభ ఎన్నికల్లో 96 మంది సభ్యులు ఉన్న బృహత్‌ కుటుంబం ఓటేసింది. హుబ్లీ తాలూకా నుల్వి గ్రామానికి చెందిన కంటప్ప కొప్పద కుటుంబంలో నాలుగు తరాల వారు కలిసి ఉంటున్నారు. కుటుంబ సభ్యులు మీడియాతో మాట్లాడుతూ గత నాలుగు ఎన్నికలలో అందరూ కలిసి ఓటేస్తున్నట్లు చెప్పారు. రాత్రి 7 గంటలకు 70.03 శాతం పోలింగ్‌ ఇలా

● హోటల్‌లో ఎగబడిన ఓటర్లు శివమొగ్గ: ఓటు హక్కు చాలా విలువైనది, ఓటేసి వస్తే టిఫిన్లు ఫ్రీ అని శివమొగ్గలోని శుభం హోటల్‌ యజమాని ప్రకటించాడు. దీంతో ఓటేసినవారు పోలోమంటూ హోటల్‌కు రావడంతో రద్దీ ఏర్పడింది. ఓటు వేసిన సిరా గుర్తు చూపిస్తే టిఫిన్‌, టీ, కాఫీలు ఉచితంగా ఇచ్చారు. మధ్యాహ్నం 12 గంటల వరకు ఈ ఆఫర్‌ అందుబాటులో ఉంది. ఓటర్ల కోసం ప్రత్యేక కౌంటర్‌లను పెట్టారు. ఉచితంగా మసాల దోసె, పలావ్‌ ఇచ్చి అభినందించారు. ముఖ్యంగా ఓటర్లు మసాల దోసె కోసం ఎగబడ్డారు. యజమాని ఉదయ్‌ కదంబ మాట్లాడుతూ ఉచితమని చెప్పడం వల్ల వెయ్యి నుంచి 1500 వరకు మంది రావొచ్చని అనుకున్నా. కానీ సుమారు 5 వేల మందికి పైగా వచ్చారు. అయినా కూడా అందరికీ ఉపాహారం ఇచ్చామని, తమ వల్ల 5 వేల మంది ఓటు వేశారన్న సంతోషంగా ఉందని అన్నారు. బిట్‌కాయిన్‌ నిందితుడు శ్రీకి అరెస్టు దొడ్డబళ్లాపురం: బిట్‌ కాయిన్‌ కేసులో ప్రధాన నిందితుడు శ్రీకి ఆలియాస్‌ శ్రీక్రిష్ణను సీఐడీ ప్రత్యేక దర్యాప్తు అధికారులు అరెస్టు చేసారు. 2020లో రూ.1000 కోట్ల కుంభకోణంలో శ్రీకి అరెస్టయ్యాడు. శ్రీకి గత కొన్ని సంవత్సరాలుగా పలు క్రిప్టో కరెన్సీ విక్రయించే వెబ్‌సైట్లను హ్యాక్‌ చేసి వేలాది బిట్‌ కాయిన్‌లను చోరీ చేసాడు. కర్ణాటక సర్కారుకు చెందిన ఈ–సంగ్రహణ పోర్టల్‌ను కూడా శ్రీకి హ్యాక్‌ చేసాడనే ఆరోపణలున్నాయి. గ్రామంలో ఏనుగు విధ్వంసం మైసూరు: జిల్లాలోని హుణసూరు దగ్గర హొసహళ్ళి గ్రామంలో ఒక అడవి ఏనుగు ప్రవేశించి విధ్వంసానికి పాల్పడింది. సోమవారం రాత్రి చొరబడి కొన్ని పొలాల్లో పంటలను నాశనం చేసింది, తరువాత గ్రామంలోకి వచ్చి ఒక బైకును ధ్వంసం చేసింది. మరో ఇంటి కాంపౌండ్‌ను పడగొట్టింది. ఏనుగు ఆగడాలను చూసి ప్రజలు ఇళ్ల నుంచి బయటకు రాలేదు.

హోసూరు వార్తలు..క్యాంటర్‌ బోల్తా, ముగ్గురు మృతిచిక్కబళ్లాపురం: క్యాంటర్‌ వాహనం బోల్తా పడిన ప్రమాదంలో ముగ్గురు మృతి చెందిన ఘటన సోమవారం అర్ధరాత్రి చిక్కబళ్లాపురం సమీపంలో చోటుచేసుకుంది. పోలీసుల వివరాల మేరకు...కోలారు జిల్లా చిక్కతిరుపతి నుంచి మంచేనహళ్లికి కాంపౌండ్‌ రాళ్లను క్యాంటర్‌లో తీసుకెళ్తుండగా చిక్క సమీపంలోని కనంలో ఓవర్‌ లోడ్‌ కారణంగా క్యాంటర్‌ బోల్తాపడింది. డ్రైవర్‌, రవి, క్యాబిన్‌లో ఉన్న మరో వ్యక్తి బాబాజాన్‌ ప్రాణాపాయం నుంచి తప్పించుకున్నారు. అయితే క్యాంటర్‌ వెనుక రాళ్లపై కూర్చొని వస్తున్న ముత్తణ్ణ, అఫ్జల్‌, చాంద్‌బాషాలు అక్కడికక్కడే మృతి చెందారు. సిమెంట్‌ దిమ్మెలు వారిపై పడటంతో ప్రాణాలు కోల్పోయారు. చిక్కబళ్లాపురం పోలీసులు కేసు నమోదు చేసుకుని దర్యాప్తు చేపట్టారు. అభివృద్ధి పనుల్ని పూర్తిచేయాలి హోసూరు: క్రిష్ణగిరి జిల్లాలో ఎన్నికలకు ముందు నిలిచిపోయిన అభివృద్ధి పనులను యథావిధిగా ప్రారంభించాలని కలెక్టర్‌ శరయు అధికారులను ఆదేశించారు. మంగళవారం క్రిష్ణగిరి కలెక్టరేట్‌లో అధికారులతో సమావేశంలో ఆమె మాట్లాడుతూ జిల్లాలో గ్రామీణాభివృద్ధి శాఖ ద్వారా తాగునీటి సమస్యల పరిష్కారం, విద్యుత్‌ వసతులు, గ్రంథాలయాల ఏర్పాటు, భవన నిర్మాణ పనులు, రోడ్డు నిర్మాణ పనులు, వంతెనల ఏర్పాటు, హోసూరు కార్పొరేషన్‌ పరిధిలో భూగర్భ మురికి కాలువల పనులు చేపట్టాలని, ప్రజల సమస్యలను పరిష్కరించాలని తెలిపారు. ఈ కార్యక్రమంలో డీఆర్‌ఓ సాధన కురల్‌, అదనపు కలెక్టర్‌ వందనా కార్గ్‌, కమిషనర్‌ స్నేహ, సబ్‌కలెక్టర్‌ ప్రియాంక పాల్గొన్నారు. తాగునీటిలో మురుగునీరు హోసూరు: హోసూరు పారిశ్రామిక ప్రాంతమైన చిన్న యలసగిరి ప్రాంతంలో తాగునీటి సరఫరా కోసం ఏర్పాటు చేసిన పైపుల వద్ద మురికి నీరు, ప్లాస్టిక్‌ వ్యర్థాలు పేరుకుపోవడంతో తాగునీటిలో మురుగునీరు కలిసి వస్తున్నట్లు స్థానిక ప్రజలు తెలిపారు. వలస వచ్చిన కుటుంబాలు ఎక్కువ సంఖ్యలో నివాసముంటున్నారు. ఈ ప్రాంతంలో కార్పొరేషన్‌ ద్వారా ఏర్పాటు చేసిన తాగునీటి పైపులు అక్కడక్కడా పగిలిపోవడంతో పాటు వాటి చుట్టూ ప్లాస్టిక్‌ చెత్త, మురుగునీరు పేరుకుపోయిందన్నారు. వాటిని శుభ్రం చేసి సురక్షిత మంచి నీటిని అందజేయాలని డిమాండ్‌ చేశారు. ప్రేమించి పెళ్లాడి.. ఆత్మహత్య కెలమంగలం: ప్రేమించి పెళ్లి చేసుకొన్న దంపతుల మధ్య గొడవలు జరిగి భార్య ఆత్మహత్య చేసుకున్న ఘటన డెంకణీకోట వద్ద చోటుచేసుకొంది. వివరాల మేరకు అంచెట్టి సమీపంలోని సీంగోటై గ్రామానికి చెందిన కూలికార్మికుడు సేతు, అదే ప్రాంతానికి చెందిన పవిత్ర (18)ని ప్రేమించి గత ఏడాది క్రితం పెళ్లి చేసుకొన్నాడు. కానీ వారు తరచూ పోట్లాట పడేవారు. దీంతో విరక్తి చెందిన పవిత్ర ఆదివారం పురుగుల మందు తాగింది, గమనించిన స్థానికులు డెంకణీకోట ప్రభుత్వ ఆస్పత్రికి తరలించారు. ఫలితంలేక సోమవారం రాత్రి మృతి చెందింది. పెళ్లి జరిగి ఏడాది మాత్రమే కావడంతో హోసూరు సబ్‌ కలెక్టర్‌ ప్రియాంక విచారణ చేపట్టారు. ఆలయాల్లో నగలు చోరీ క్రిష్ణగిరి: జిల్లా కేంద్రం క్రిష్ణగిరి సమీపంలో గుర్తు తెలియని దుండగులు ఆలయాల తలుపులు బద్దలగొట్టి నగలను దోచుకెళ్లిన ఘటనపై మత్తూరు పోలీసులు విచారణ చేస్తున్నారు. మత్తూరు సమీపంలోని చిన్నఆలహళ్లి గ్రామంలోని మురుగన్‌ ఆలయంలో షణ్ముగం అర్చకులుగా పనిచేస్తున్నాడు. సోమవారం సాయంత్రం ఆలయంలో పూజలు ముగించుకొని తాళాలు వేసి ఇంటికెళ్లాడు. మంగళవారం ఉదయం ఆలయం వద్దకెళ్లిన ఇతనికి తాళాలు పగులగొట్టిన విషయం కంటబడింది. మూలవిరాట్‌కు అలంకరించిన రూ. 60 వేలు విలువ చేసే నగలను గుర్తు తెలియని దుండగులు దోచుకెళ్లినట్లు తెలిసింది. అదే విధంగా అదే ప్రాంతంలోని గ్రామదేవత కాళియమ్మ ఆలయంలో తాళిబొట్టును దోచుకెళ్లినట్లు స్థానిక ప్రజలు మత్తూరు పోలీసులకు ఫిర్యాదు చేశారు. పోలీసులు కేసు నమోదు చేసుకొని విచారణ చేస్తున్నారు. అనారోగ్యంతో మహిళ ఆత్మహత్య క్రిష్ణగిరి: అనారోగ్యంతో బాధపడుతూ పలు ఆస్పత్రుల్లో చికిత్స పొందినా ఫలితం లేకపోవడంతో జీవితంపై విరక్తి చెందిన మహిళ ఉరివేసుకొని ఆత్మహత్య చేసుకొన్న ఘటన నాగరసంబట్టి పోలీస్‌స్టేషన్‌ పరిధిలో చోటు చేసుకొంది. వివరాలు... క్రిష్ణగిరి జిల్లా నాగరసంబట్టి సమీపంలోని తట్టకల్‌ గ్రామానికి చెందిన మునిస్వామి భార్య నాగవేణి (25)కి ఐదేళ్ల క్రితం వివాహం జరిగింది. వీరికి ఒక కుమారుడు. కొద్ది రోజులుగా నాగవేణి అనారోగ్యంతో బాధపడుతూ ఉంది. చికిత్సలు చేయించినా ఫలితం లేకపోవడంతో సోమవారం ఇంట్లో ఎవరూ లేని సమయంలో ఉరివేసుకొని ఆత్మహత్య చేసుకొంది. ఈ ఘటనపై నాగరసంబట్టి పోలీసులు కేసు నమోదు చేసుకొని విచారణ చేపట్టారు. బైక్‌ ప్రమాదంలో కార్మికుడు మృతి కెలమంగలం: ద్విచక్రవాహనం నుంచి కిందపడిన కార్మికుడు తీవ్ర గాయాలై మరణించాడు, ఈ ఘటన డెంకణీకోట వద్ద జరిగింది. వివరాల మేరకు అంచెట్టి సమీపంలోని పారండపల్లి గ్రామానికి చెందిన మారస్వామి (40). సోమవారం సాయంత్రం బైక్‌ మీద వెళ్తూ గేరెట్టి వద్ద కిందపడ్డాడు. తీవ్ర గాయాలేర్పడిన ఇతన్ని స్థానికులు చికిత్స కోసం ధర్మపురి ప్రభుత్వ ఆస్పత్రికి తరలించగా అక్కడ చనిపోయాడు. అంచెట్టి పోలీసులు కేసు నమోదు చేశారు. బేకరి, హోటళ్లలో అధికారుల తనిఖీలు హోసూరు: హోసూరు కార్పొరేషన్‌ పరిధిలోని బేకరి, హోటళ్లు, వాణిజ్య కాంప్లెక్స్‌లలో పారిశుద్ద శాఖాధికారులు ఆకస్మిక తనిఖీలు నిర్వహించారు. ఈ సందర్భంగా నిషేధిత ప్లాస్టిక్‌ వస్తువులను స్వాధీనపరుచుకొని జరిమానా విధించారు. పట్టణంలోని ఎంజీ రోడ్డు, బాగలూరు రోడ్డు, రాయకోట రోడ్డు, ఆవలపల్లి రోడ్డు తదితర ప్రాంతాల్లో పాస్టిక్‌ కవర్ల వినియోగిస్తున్నారని, పారిశుద్ద శాఖాధికారులకు సమాచారం అందింది. ఆ మేరకు అధికారులు ప్రకాష్‌ రమేష్‌, ఉదయ్‌కుమార్‌, గిరి తదితరుల బృందం ఆకస్మిక తనిఖీలు నిర్వహించి 30 కిలోల ప్లాస్టిక్‌ కవర్లను స్వాధీనం చేసుకున్నారు. కెలమంగలం: అంచెట్టి ప్రాంతంలో మంగళవారం సాయంత్రం వీచిన భారీ గాలులకు బొప్పాయి చెట్లకు తీవ్ర నష్టం వాటిల్లింది. క్రిష్ణగిరి జిల్లా వ్యాప్తంగా భారీ గాలులు వీస్తుండగా గత రెండు రోజులుగా అక్కడక్కడా భారీ వర్షాలు కురుస్తున్నాయి. ఈ క్రమంలో మంగళవారం సాయంత్రం అంచెట్టి సమీపంలోని తక్కట్టి, అర్థగల్‌ ప్రాంతాల్లో ఈదురు గాలులతో పాటు భారీ వర్షం కురిసింది. ఆ సమయంలో అర్థకల్‌ గ్రామానికి చెందిన రైతు సిద్ధరాజ్‌కు చెందిన ఎకరంలో నాటిన సుమారు 400 బొప్పాయి చెట్లు నేలకొరిగాయి, తోట మొత్తం దెబ్బతింది. అలాగే పొలంలో ఏర్పాటు చేసిన సోలార్‌ ప్యానెల్స్‌, అక్కడ వేసిన షెడ్లు ఎగిరిపోయాయి. దెబ్బతిన్న బొప్పాయి చెట్లకు తమిళనాడు ప్రభుత్వం నష్టపరిహారం అందించాలని బాధిత రైతు విజ్ఞప్తి చేశాడు.