సాక్షి, హైదరాబాద్‌: కేంద్ర ప్రభుత్వం స్వయం ప్రతిపత్తి కలిగిన సంస్థలను కూడా గుప్పిట పెట్టుకుని ఆడిస్తోందని.. ఈడీ, సీబీఐ వంటి దర్యాప్తు సంస్థలతో పాటు ఎన్నికల కమిషన్‌ కూడా బీజేపీ కనుసన్నల్లో పనిచేస్తోందని బీఆర్‌ఎస్‌ వర్కింగ్‌ ప్రెసిడెంట్‌ కేటీ రామారావు ఆరోపించారు. బీఆర్‌ఎస్‌ అధినేత కేసీఆర్‌ ఎన్నికల ప్రచారంపై 48 గంటల నిషేధంతో ఎన్నికల కమిషన్‌ వైఖరి బయటపడిందని విమర్శించారు. గురువారం బీఆర్‌ఎస్‌ కార్యాలయం తెలంగాణ భవన్‌లో కేటీఆర్‌ మీడియాతో మాట్లాడారు. వివరాలు ఆయన మాటల్లోనే.. ‘‘జాతులు, మతాల ఆధారంగా స్వయంగా ప్రధాని మోదీ, కేంద్ర హోంమంత్రి అమిత్‌ షా వైషమ్యాలు రెచ్చగొడుతూ విద్వేషపూరిత ప్రసంగాలు చేస్తున్నారు. ప్రత్యర్థి పార్టీలను తిడుతూ అధికారిక సోషల్‌ మీడియా ఖాతాల ద్వారా బీజేపీ విషం చిమ్ముతోంది. బీజేపీ కాకుండా ఇతరులు అధికారంలోకి వస్తే.. సంపదను ఎక్కువ పిల్లలున్న ముస్లింలకు దోచిపెడతారంటూ వారు వ్యాఖ్యలు చేస్తున్నా ఈసీ నుంచి ఉలుకూపలుకూ లేదు. ఆ వ్యాఖ్యలపై 20వేల మందికిపైగా పౌరులు ఈసీకి ఫిర్యాదు చేసినా చర్యలు తీసుకునే ధైర్యం లేక.. మోదీకి బదులుగా బీజేపీ అధ్యక్షుడు నడ్డాకు నోటీసులు ఇచ్చింది. ఎన్నికల్లో దేవుడు, మతాన్ని ప్రస్తావించడం నేరమని తెలిసీ.. అమిత్‌ షా, పలువురు బీజేపీ నేతలు శ్రీరాముడి ఫొటో పట్టుకుని ఓట్లు అడుగుతున్నారు. అయినా వారికి నోటీసులు, చర్యలు లేవు. వ్యక్తిత్వ హననాలు, వ్యక్తిగత దూషణలు ఈసీకి కనిపించడం లేదు. కేసీఆర్‌పై రాకెట్‌ వేగంతో చర్యలు తీసుకున్న ఎన్నికల కమిషన్‌ నిజంగా స్వతంత్ర సంస్థ అయితే.. మోదీ, రేవంత్‌లపై ఎందుకు చర్యలు తీసుకోవడం లేదు? రాజ్యాంగాన్ని అపహాస్యం చేసేలా ఈసీ వైఖరి ఉంది. ఒక పార్టీ, కొందరు నాయకులు ఆధీనంలో ఉన్నట్టు కనిపిస్తోంది. ఆ మాటలేమైనా ప్రవచనాలా? ‘నిరోధ్‌లు, పాపడాలు అమ్ముకోండి..’అంటూ కాంగ్రెస్‌ నేత చేసిన వ్యాఖ్యలను తప్పుపడుతూ కేసీఆర్‌ ఒక్క మాట మాట్లాడితే.. 48 గంటల పాటు మాట్లాడకుండా గొంతు నొక్కారు. బీఆర్‌ఎస్‌ నుంచి సీఎం రేవంత్‌పై ఎనిమిది ఫిర్యాదులు.. మంత్రులు ఉత్తమ్, పొన్నం ప్రభాకర్, జూపల్లి కృష్ణారావు, కొండా సురేఖ తదితరుల వ్యాఖ్యలపై 27 ఫిర్యాదులు చేసినా ఈసీ స్పందించలేదు. ఏప్రిల్‌ 10న తుక్కుగూడ సభలో రేవంత్‌రెడ్డి చేసిన వ్యాఖ్యలు ఈసీకి ప్రవచనాలు, సుభాíÙతాలు, సూక్తుల్లా కనిపించాయా? రేవంత్‌ మాటలను ఉటంకించడానికి సంస్కారం అడ్డువస్తోంది. అలాంటి వ్యాఖ్యలపై ఈసీ చర్యలేవి? కూడబలుక్కుని నిషేధం పెట్టారు కేసీఆర్‌ బస్సుయాత్రతో కాంగ్రెస్, బీజేపీలకు దడ పుట్టింది. ప్రజలు కేసీఆర్‌కు బ్రహ్మరథం పడుతున్నారనే వార్తలు, నిఘా సంస్థల నివేదికలు వారికి కంటగింపుగా మారాయి. బీఆర్‌ఎస్‌కు 8 నుంచి 12 సీట్లు వస్తాయని సర్వేలు చెప్తుండటం, జన స్పందన చూసి కాంగ్రెస్, బీజేపీ నేతలకు నిద్ర పట్టడం లేదు. దీంతో బడే భాయ్‌ మోదీ, చోటే భాయ్‌ రేవంత్‌ కూడబలుక్కుని కేసీఆర్‌ ప్రజల వద్దకు వెళ్లకుండా నిషేధం పెట్టారు. ఈ అప్రజాస్వామిక ప్రయత్నాలకు ప్రజలు ఓటుతో బుద్ధి చెప్పాలి. స్వేచ్ఛాయుత వాతావరణంలో, పారదర్శకంగా వ్యవహరించాల్సిన ఎన్నికల కమిషన్‌.. కేసీఆర్‌ ప్రచారాన్ని నిషేధించింది. కొందరిని మాత్రం ప్రజలు, ప్రత్యర్థుల మీదకు అచ్చోసిన ఆంబోతుల్లా వదిలేసింది.రేవంత్‌పై క్రిమినల్‌ కేసు పెట్టాలి హాస్టళ్ల మూసివేతపై ఉస్మానియా యూనివర్సిటీ చీఫ్‌ వార్డెన్‌ గతేడాది ఇచ్చిన సర్క్యులర్, స్టాంప్‌ను ఫోర్జరీ చేసి ‘ఎక్స్‌’ఖాతాలో పోస్ట్‌ చేసిన సీఎం రేవంత్‌రెడ్డిపై క్రిమినల్‌ కేసు పెట్టాలి. ఉస్మానియా వర్సిటీ చీఫ్‌ వార్డెన్‌ ఇచ్చిన సర్క్యులర్‌ను బీఆర్‌ఎస్‌ అధినేత కేసీఆర్‌ ‘ఎక్స్‌’లో పోస్ట్‌ చేశారు. దాంతో ఓయూ చీఫ్‌ వార్డెన్‌కు రిజి్రస్టార్, సదరన్‌ డిస్కం నుంచి నోటీసులు ఇప్పించారు. అంతటితో ఆగకుండా గత ఏడాది చీఫ్‌ వార్డెన్‌ ఇచ్చిన సర్క్యులర్‌ను రేవంత్‌ పోస్ట్‌ చేసి ప్రజలను తప్పుదోవ పట్టించారు. రేవంత్‌ ఫోర్జరీ డాక్యుమెంట్‌ను ‘ఎక్స్‌’లో పోస్ట్‌ చేసిన బీఆర్‌ఎస్‌ సోషల్‌ మీడియా కన్వీనర్‌ మన్నె క్రిషాంక్‌ను పోలీసులు అరెస్టు చేశారు. క్రిషాంక్‌ పెట్టిన సర్క్యులర్‌ తప్పు అని ఓయూ అధికారులు నిరూపిస్తే.. చంచల్‌గూడ జైలుకు వెళ్లేందుకు నేను సిద్ధం. రేవంత్‌పై ఓయూ విద్యార్థులు చేసిన ఫిర్యాదుపై పోలీసులు కేసు నమోదు చేయాలి. ఈసీ నిజంగా స్వతంత్ర సంస్థ అయితే రేవంత్‌పై చర్యలు తీసుకోవాలి’’అని కేటీఆర్‌ డిమాండ్‌ చేశారు.

నడిగూడెం: దేశ ప్రజల భవిష్యత్‌ కోసమే ఇండియా కూటమి ఏర్పాటు అయిందని రాష్ట్ర నీటిపారుదల శాఖ మంత్రి ఉత్తమ్‌కుమార్‌రెడ్డి అన్నారు. గురువారం సూర్యాపేట జిల్లా నడిగూడెం మండల కేంద్రంలో కోదాడ ఎమ్యెల్యే పద్మావతి, నల్లగొండ ఎంపీ అభ్యర్థి కుందూరు రఘువీర్‌రెడ్డిలతో కలిసి నిర్వహించిన ప్రచార సభలో ఆయన మాట్లాడారు. ఈ లోక్‌సభ ఎన్నికలు చాలా కీలకమని, బీజేపీ ప్రభుత్వం గడిచిన 10 ఏళ్లలో దేశ ప్రజల కోసం చేసిందేమీ లేదని అన్నారు.బీజేపీ సర్కార్‌ మతపరంగా ప్రజలను విభజించి పాలిస్తోందన్నారు. మోదీ హయాంలో నిత్యావసర సరుకుల ధరలు పెరగడంతో పాటు, గ్యాస్, పెట్రోల్, డీజిల్‌ ధరలు విపరీతంగా పెంచారన్నారు. దీంతో ప్రజలకు భారంగా మారిందన్నారు. దేశంలో మెజారిటీ లోక్‌సభ స్థానాలను కాంగ్రెస్‌ పార్టీ గెలుచుకుంటుందని, రాహుల్‌ గాంధీ ప్రధాని కాబోతున్నారని ఆయన ధీమా వ్యక్తం చేశారు. రాష్ట్రంలో ఈ పదేళ్లలో బీఆర్‌ఎస్‌ కూడా చేసిందేమీ లేదని, లోక్‌సభ ఎన్నికల అనంతరం ఆ పార్టీ మనుగడలేకుండా పోతుందని అన్నారు. కేసీఆర్‌ పాలనలో అధికార దుర్వినియోగం జరిగిందని, అవినీతి, అక్రమాలు చోటు చేసుకున్నాయని, పోలీసు శాఖను ఇష్టారాజ్యంగా వాడుకున్నారని ధ్వజమెత్తారు. లోక్‌సభ ఎన్నికల అనంతరం అర్హులైన పేదలందరికీ ఇళ్లు, రేషన్‌ కార్డులు పంపిణీ చేస్తామని తెలిపారు. మాజీ మంత్రి కుందూరు జానారెడ్డి, మాజీ ఎమ్యెల్యే వేనేపల్లి చందర్‌రావు ఈ సభలో పాల్గొన్నారు.

గెనీబెన్‌ నాగాజీ ఠాకోర్‌. ఉత్తర గుజరాత్‌లో కాంగ్రెస్‌ ప్రముఖ నేతల్లో ఒకరు. అసెంబ్లీలో పారీ్టకి బలమైన గొంతుక. సభలో ధాటైన ప్రసంగాలతో ఆకట్టుకుంటారు. క్షేత్రస్థాయిలో బలమైన పునాది కలిగిన ప్రజాప్రతినిధి. ఇటీవలి అసెంబ్లీ ఎన్నికల్లో బీజేపీ హవా నడుమ కూడా వావ్‌ స్థానం నుంచి విజయం సాధించారు. తన నియోజకవర్గంలో అందరినీ పేరుపేరునా పలకరించే నాయకురాలు. ఎవరింట్లో ఎలాంటి కార్యక్రమమైనా తప్పనిసరిగా హాజరవుతారు. బనస్కాంత లోక్‌సభ స్థానం నుంచి కాంగ్రెస్‌ తరఫున బరిలో దిగి బీజేపీకి గట్టి సవాలే విసురుతున్నారు... పంచాయతీ నుంచి... 2017 అసెంబ్లీ ఎన్నికలు గెనీబెన్‌ రాజకీయ జీవితంలో కీలక మలుపు. వావ్‌ నుంచి బీజేపీ సీనియర్‌ నేత, మంత్రి శంకర్‌ చౌదరీని ఓడించడంతో ఆమె పేరు రాష్ట్రమంతటా మారుమోగిపోయింది. ఆమెకు కేవలం రెండో ఎన్నికలవి. జైన్‌ విశ్వభారతి ఇన్‌స్టిట్యూట్‌ నుంచి పొలిటికల్‌ సైన్స్‌ చదువుతూ గ్రాడ్యుయేషన్‌ మధ్యలోనే వదిలేశారు. పంచాయతీ సభ్యురాలిగా చేశారు. 2012లో కాంగ్రెస్‌ వావ్‌ నుంచి టికెటిచి్చంది. అప్పుడు 12వేల ఓట్లతో ఓడినా 2017లో విజయం సాధించారు. కాంగ్రెస్‌ నుంచి అసెంబ్లీకి ఎన్నికైన ముగ్గురు మహిళల్లో ఒకరు.క్రౌడ్‌ ఫండింగ్‌తో నిధుల సేకరణ... బనస్కాంత జిల్లాలో అన్ని సామాజికవర్గాల వారూ తనను సోదరిగా భావిస్తారంటారు గెనీబెన్‌. ఎన్నికల ఖర్చు కోసం నియోజకవర్గంలో క్యూ ఆర్‌ కోడ్‌ను క్రియేట్‌ చేసి మరీ క్రౌడ్‌ ఫండింగ్‌ ద్వారా నిధులు సేకరిస్తున్నారు. ‘‘బీజేపీకి బలమైన ఆర్థిక వనరులున్నాయి. నాకున్నది విలువలు, సామాజిక సూత్రాలే. అయినా బలమైన సిద్ధాంతంతో పోరాడేవారిని ఎవరూ ఓడించలేరు. కనుక దేశంలో స్వేచ్ఛ, ప్రజాస్వామ్యం ఫరిడవిల్లడానికి తోచిన సాయం చేయండి’’ అని ప్రజలను కోరుతున్నారు. రాజస్తాన్, పాకిస్తాన్‌తో సరిహద్దులో ఉన్న లోక్‌సభ స్థానం బనస్కాంత. ‘సీమ దర్శన్‌’ పేరుతో ఇక్కడ సరిహద్దు పర్యాటక స్థలం కూడా ఉంది. ఇక్కడ ఠాకోర్‌ ఓటర్లు 18 శాతం, చౌదరి ఓటర్లు 13 శాతం ఉన్నారు.వివాదాస్పద వ్యాఖ్యలు... కులాంతర, మతాంత వివాహాలను నిషేధిస్తు ఠాకోర్‌ సామాజికవర్గం తీసుకున్న నిర్ణయాన్ని గెనీబెన్‌ సమరి్థంచడం వివాదం రేపింది. యువతులకు మొబైల్‌ఫోన్లను నిషేధించడాన్ని కూడా ఆమె సమరి్థంచారు. ‘‘బాలికలకు మొబైల్‌ఫోన్లను నిషేధించడంలో తప్పు లేదు. మొబైల్స్‌కు దూరంగా ఉండి బాగా చదువుకోవాలి’’ అని సూచించడంపై చాలా విమర్శలే వచ్చాయి.   – సాక్షి, నేషనల్‌ డెస్క్‌   

మూసాపేట/రహమత్‌నగర్‌: గ్రామాల్లోని ప్రజలు కాంగ్రెస్‌ మాయమాటలు నమ్మి మోసపోయారని బీఆర్‌ఎస్‌ వర్కింగ్‌ ప్రెసిడెంట్‌ కె. తారక రామారావు చెప్పారు. ఆరు గ్యారంటీల పేరు చెప్పి గద్దెనెక్కిన రేవంత్‌ సర్కారు ఇంకా ఆ హా మీలను అమలు చేయట్లేదని ఆరోపించారు. లోక్‌సభ ఎ న్నికల్లో బీఆర్‌ఎస్‌కు ప్రజలు 10–12 సీట్లు అందిస్తే బీజేపీ, కాంగ్రెస్‌లను కూకటివేళ్లతో పెకిలించి తెలంగాణ రాష్ట్రా  న్ని కేసీఆర్‌ శాసిస్తారని చెప్పారు. పార్టీ మల్కాజిగిరి అభ్యర్థి రాగిడి లక్ష్మారెడ్డి, సికింద్రాబాద్‌ అభ్యర్థి టి.పద్మారావు గౌడ్‌ తరఫున గురువారం హైదరాబాద్‌లోని మూసాపేట, రహమత్‌నగర్‌ డివిజన్‌ శ్రీరాంనగర్‌లలో నిర్వహించిన రో డ్‌షోలలో ఆయన పాల్గొన్నారు. జీహెచ్‌ఎంసీ ఎన్నికలతోపాటు నగర పరిధిలోని అసెంబ్లీ స్థానాల్లో బీఆర్‌ఎస్‌ ఎమ్మె ల్యేలను గెలిపించినట్లుగానే నగరంలోని లోక్‌సభ స్థానా ల్లోనూ తమ పార్టీ అభ్యర్థులను గెలిపించాలని కోరారు. కాంగ్రెస్‌ పాలనలో కరెంటు కోత.. నీటి కొరత కేసీఆర్‌ ఉన్నప్పుడు హైదరాబాద్‌ సహా తెలంగాణలో ఎక్కడా కరెంటు కోతలు లేవని గుర్తుచేశారు. కానీ ఇప్పుడు రోజుకు 4–5 సార్లు కరెంటు పోతోందన్నారు. మంచినీటి కోసం ట్యాంకర్లపై ఆధారపడాల్సి వచ్చిందని ఆవేదన వ్యక్తం చేశారు. కష్టపడి తెచ్చిన కంపెనీలు గుజరాత్, తమిళనాడుకు వెళ్లిపోయాయని చెప్పారు. రాష్ట్రానికి ఉన్న అవకాశాలను పోగొట్టే అసమర్థ సీఎం రేవంత్‌రెడ్డి అని కేటీఆర్‌ దుయ్యబట్టారు. కాంగ్రెస్‌ ఎంపీ అభ్యర్థి పట్నం సునీతారెడ్డి డమ్మీ అని, ఆమెను ఎక్కడి నుంచో ఇక్కడకు తీసుకొచ్చారని విమర్శించారు.  బీజేపీవి మత రాజకీయాలు.. ప్రధాని మోదీ తెలంగాణకు బుల్లెట్‌ ట్రైన్‌ తీసుకురాలేదని, మెట్రో రైలు ప్రాజెక్టుకు నిధులు, మూసీ సుందరీకరణకు నిధులు ఇవ్వలేదని కేటీఆర్‌ ఆరోపించారు. తెలంగాణతోపాటు పక్కనున్న ఆంధ్రప్రదేశ్‌కు కూడా మోదీ ఏమి చేయలేదని విమర్శించారు. బీజేపీ అక్కరకు రాని చుట్టమంటూ ఎద్దేవా చేశారు. ఆయన కేవలం హిందూ ముస్లింల పేరుతో ఓట్లు దండుకొని మత రాజకీయాలు చేస్తున్నారని దుయ్యబట్టారు. యాదాద్రి శ్రీలక్ష్మీ నరసింహ స్వామి ఆలయాన్ని కేసీఆర్‌ పునర్నిర్మించినా ఎప్పుడూ ప్రచారం చేసుకోలేదని చెప్పారు. దేవుళ్లను అడ్డుపెట్టుకొని రాజకీయం చేయవచ్చా? అని ప్రశ్నించారు. మోదీ, రేవంత్‌లు బడే భాయ్, చోటే భాయ్‌ బడే భాయ్‌ మోదీ, చోటా భాయ్‌ రేవంత్‌రెడ్డి మాటలను నమ్మొద్దని కేటీఆర్‌ ప్రజలను హెచ్చరించారు. ఢిల్లీలో మోదీ, గల్లీలో కేడీ మాయల మాటలు చెబుతున్నారని మండిపడ్డారు. ఎన్నికలకు ముందు ఇష్టమొచ్చినట్లు హామీలిచ్చిన రేవంత్‌రెడ్డి.. పేదవారిని ఆదుకొనే ఒక్క పథకమైనా చేశారా అని ప్రశ్నించారు. నాలుగున్నర నెలల్లో చిల్లర మాటలు, ఉద్దెర పనులు తప్ప రేవంత్‌ ఏమీ చేయలేదని విమర్శించారు. కేసీఆర్‌ హైదరాబాద్‌ను అభివృద్ధి చేస్తే రేవంత్‌ నాశనం చేస్తున్నారని దుయ్యబట్టారు. జూన్‌ 2న హైదరాబాద్‌ను కేంద్రపాలిత ప్రాంతంగా మార్చాలని బీజేపీ కుట్రపన్నుతోందని కేటీఆర్‌ ఆరోపించారు. బీజేపీ ప్రయత్నాన్ని అడ్డుకోవాలంటే పార్లమెంటులో కేసీఆర్‌ పంపే గులాబీదళం ఉండాలన్నారు. అందుకోసం మల్కాజిగిరి ప్రజల తరఫున మాట్లాడే రాగిడి లక్ష్మారెడ్డి, పద్మారావులను అధిక మెజారిటీతో గెలిపించాలని ఆయా రోడ్‌ షోలలో కేటీఆర్‌ ప్రజలను కోరారు. ఈ కార్యక్రమంలో కూకట్‌పల్లి ఎమ్మెల్యే మాధవరం కృష్ణారావు, జూబ్లీహిల్స్‌ ఎమ్మెల్యే మాగంటి గోపీనాథ్, ఎమ్మెల్సీ నవీన్‌కుమార్, శంబీపూర్‌ రాజు, కార్పొరేటర్లు, నాయకులు, కార్యకర్తలు పాల్గొన్నారు. 

సాక్షి, యాదాద్రి: ఈసారి భువనగిరి ఎంపీ సెగ్మెంట్‌లో త్రిముఖ పోరు నెలకొంది. సిట్టింగ్‌ స్థానాన్ని కాపాడుకోవాలని కాంగ్రెస్‌ సర్వశక్తులూ ఒడ్డుతుండగా, తొలిసారి పాగా వేయాలని బీజేపీ అన్ని ప్రయత్నాలు చేస్తోంది. ఒకసారి ఎంపీ స్థానాన్ని కైవసం చేసుకున్న బీఆర్‌ఎస్‌ మరోసారి గెలుపు కోసం పోరాడుతోంది. సీపీఎం మాత్రం లక్ష ఓట్ల సాధన లక్ష్యంతో ప్రచారంలో దూసుకుపోతోంది. అయితే ప్రధానంగా కాంగ్రెస్, బీఆర్‌ఎస్, బీజేపీ మధ్యేరసవత్తర పోరు సాగుతోంది. నియోజకవర్గాల పునర్విభజనలో భాగంగా 2009లో భువనగిరి లోక్‌సభ నియోజకవర్గంగా ఏర్పాటైంది. అప్పుడు జరిగిన ఎన్నికల్లో కాంగ్రెస్, 2014లో జరిగిన ఎన్నికల్లో టీఆర్‌ఎస్, 2019లో ఎన్నికల్లో కాంగ్రెస్‌ గెలుపొందింది. ఈ ఎన్నికల్లో బీజేపీ నుంచి డాక్టర్‌ బూర నర్సయ్యగౌడ్, కాంగ్రెస్‌ తరఫున చామల కిరణ్‌కుమార్‌రెడ్డి, బీఆర్‌ఎస్‌ నుంచి క్యామ మల్లే‹Ù, సీపీఎం అభ్యర్థిగా ఎండీ జహంగీర్‌ పోటీలో ఉన్నారు.  బూర నర్సయ్యగౌడ్‌ బీజేపీబీఆర్‌ఎస్‌ను వీడి బీజేపీలోకి బూరభువనగిరిలో టీఆర్‌ఎస్‌ నుంచి ఎంపీగా గెలిచిన డాక్టర్‌ బూర నర్సయ్యగౌడ్‌ మునుగోడు ఉప ఎన్నిక సందర్భంగా 2022లో బీజేపీలో చేరారు. తొలి విడతలోనే బీజేపీ టికెట్‌ సంపాదించారు. ప్రధాని మోదీ చరిష్మాతోపాటు తనకున్న వ్యక్తిగత పరిచయాలు, తాను ఎంపీగా చేసిన అభివృద్ధి కార్యక్రమాలను ప్రచారం చేసుకొని ఓట్లు రాబట్టుకునే ప్రయత్నం చేస్తున్నారు. ఏడు అసెంబ్లీ సెగ్మెంట్లలో బీజేపీ ఒక్క ఎమ్మెల్యే కూడా గెలవలేదు. చెప్పుకోదగ్గ ఓట్లు కూడా ఆ ఎన్నికల్లో రాబట్టుకోలేకపోయింది. గౌడ సామాజికవర్గ ఓట్లు అత్యధికంగా ఉండడం, బీసీ నినాదం, బీఆర్‌ఎస్‌ లోని పాత పరిచయాలతో క్రాస్‌ ఓటింగ్, మాదిగ ఓట్లు బీజేపీకి కలిసి వచ్చే అంశంగా భావిస్తున్నారు.  క్యామ మల్లేష్‌ బీఆర్‌ఎస్‌సామాజికవర్గ సమీకరణలో క్యామ మల్లేష్‌రంగారెడ్డి జిల్లా డీసీసీ అధ్యక్షుడిగా పనిచేసిన క్యామ మల్లేష్‌ బీఆర్‌ఎస్‌లో చేరారు. క్యామ మల్లేష్‌ది గొల్లకుర్మ సామాజికవర్గం. కేసీఆర్‌ చరిష్మా, బీఆర్‌ఎస్‌ పార్టీని నమ్ముకొని ప్రచారాన్ని సాగిస్తున్నా రు. గత అసెంబ్లీ ఎన్నికల్లో ఒక జనగామలో తప్ప, ఆరు నియోజకవర్గాల్లో కాంగ్రెస్‌ ఎమ్మెల్యేలే గెలిచారు. కాంగ్రెస్‌ ఆరు గ్యారంటీలు, రుణమాఫీ అంశాలను ఎండగడు తూ ప్రజల్లో విస్తృతంగా ప్రచారం నిర్వహిస్తున్నారు. తన సామాజిక వర్గానికి చెందిన ఓట్లపై అధికంగా ఆధారపడ్డారు. దీనికితోడు బీఆర్‌ఎస్‌ ఓటు బ్యాంకు కలిసివస్తుందన్న నమ్మకంతో ఉన్నారు. బీసీ నినాదం కూడా వినిపిస్తున్నారు. గులాబీ ద్వితీయ శ్రేణి నాయకత్వం మాత్రం మొక్కుబడిగా ప్రచారాన్ని నిర్వహిస్తోంది.  కిరణ్‌కుమార్‌రెడ్డి కాంగ్రెస్‌కోమటిరెడ్డి ఆధ్వర్యంలో చామల కాంగ్రెస్‌ అభ్యర్థి చామల కిరణ్‌కుమార్‌రెడ్డి గెలుపు బాధ్యతలను భువనగిరి పార్లమెంట్‌ ఇన్‌చార్జ్, మునుగోడు ఎమ్మె ల్యే కోమటిరెడ్డి రాజగోపాల్‌రెడ్డి తీసుకున్నారు. నియోజకవర్గ కేంద్రాలు, మున్సిపాలిటీలు, మండల కేంద్రాల్లో రోడ్‌ షోలు, కార్నర్‌ మీటింగ్‌లతో కోమటిరెడ్డి స్థానిక ఎమ్మెల్యేలు, అభ్యర్థితో కలిసి ప్రచారం చేశారు. కోమటిరెడ్డి సోదరులను గెలిపించిన భువనగిరి ప్రజలు తన సోదరుడులాంటి చామలను గెలిపిస్తే అన్ని రంగాల్లో అభివృద్ధి చేసి చూపిస్తానని ప్రజలను కోరుతున్నారు. తన సామాజికవర్గ ఓట్లు, మైనార్టీ ఓట్లపై ఎక్కువగా ఆశలు పెట్టుకున్నారు. ఇక్కడ కాంగ్రెస్‌కు సీపీఐ మద్దతు ఇస్తోంది.  సెమీ అర్బన్‌ నియోజకవర్గం భువనగిరి లోక్‌సభ స్థానం పరిధి సెమీ అర్బన్‌గా ఉంది. రంగారెడ్డి జిల్లా ఇబ్రహీంపట్నం, భువనగిరి, మునుగోడు, ఆలేరులోని కొంతప్రాంతం హెచ్‌ఎండీఏలో ఉంది. జనగామ, తుంగతుర్తి, నకిరేకల్, ఆలేరు, మునుగోడు నియోజకవర్గాలు పూర్తిగా గ్రామీణ ప్రాంతంలో ఉన్నాయి. వ్యవసాయం ప్రధాన వృత్తిగా ప్రజలు జీవిస్తున్నారు. పారిశ్రామిక ప్రగతి అంతంగా మాత్రంగానే ఉంది. హైదరాబాద్‌కు ఈస్ట్‌కు శివారులో ఉన్నా, ప్రగతి మాత్రం వెనుకబడి ఉంది.  పోటీలో సీపీఎం  రాష్ట్రం మొత్తంలో సీపీఎం పోటీ చేస్తున్న ఏకైక లోక్‌సభ నియోజకవర్గం భువనగిరి. ఆ పార్టీ జిల్లా కార్యదర్శి ఎండీ.జహంగీర్‌ను అభ్యర్థిగా పోటీలో నిలిపింది. లక్ష ఓట్లు సాధించడమే లక్ష్యంగా ప్రచారాన్ని నిర్వహిస్తోంది. వివిధ వర్గాల కారి్మకుల ఓట్లపై కన్నేసింది.  ప్రభావితం చేసే అంశాలు  పెండింగ్‌ రైల్వే, సాగునీటి ప్రాజెక్టులు జాతీయ రహదారుల విస్తరణ జాప్యం కాళేశ్వరం భూసేకరణలో కోల్పోయిన భూములకు పరిహారం చేనేత కార్మికుల, ఐటీ కారిడార్, పారిశ్రామిక కారిడార్‌ల ఏర్పాటు టూరిజం, డ్రైపోర్టు, ఎయిమ్స్‌లో పూర్తి స్థాయి వైద్యం  గౌడ, గొల్లకుర్మ, ఎస్సీ, ఎస్టీ, ముదిరాజ్, పద్మశాలి, మున్నూరుకాపు, రెడ్డి సామాజికవర్గ ఓటర్లు  2019 లోక్‌సభ ఎన్నికల ప్రధానపార్టీల అభ్యర్థుల ఓట్లు ఇలా... కోమటిరెడ్డి వెంకట్‌రెడ్డి (కాంగ్రెస్‌) 5,32,795 (44.37 శాతం) బూరనర్సయ్యగౌడ్‌ (టీఆర్‌ఎస్‌) 5,27,576 (43.94 శాతం) పీవీ శ్యాంసుందర్‌రావు (బీజేపీ) 65,451 (5.45 శాతం)  

లక్నో: ఉత్తరప్రదేశ్‌లోని రాయ్‌బరేలీ, అమేథీ స్థానాలపై సస్పెన్స్‌కు కాంగ్రెస్‌ తెరదించింది. అందరి ఊహలు పటాపంచల్‌ చేస్తూ లోక్‌సభ ఎన్నికలకు రాయ్‌బరేలీ నుంచి రాహుల్‌ గాంధీ బరిలోకి దిగుతున్నారు. ఇక హై ఓల్టేజ్‌ స్థానం అమేథీ నుంచి కాంగ్రెస్‌ సీనియర్‌ నేత కిషోరీలాల్‌ శర్మ పోటీ చేస్తున్నారు. ఈయన గాంధీ, నెహ్రూ కుటుంబానికి చిరకాల విధేయుడు.కాగా రాయ్‌బరేలీ నుంచి ప్రియాంక గాంధీ పోటీ చేస్తారనే ఊహాగానాలు వెలువడ్డాయి. కానీ తాజా ప్రకటనతో ఆమె ప్రత్యక్ష ఎన్నికల పోటీ నుంచి తప్పుకున్నట్లే తెలుస్తోంది.  ఇప్పటికే వయనాడ్‌ నుంచి మరోసారి నామినేషన్‌ దాఖలు చేసిన రాహుల్‌..  అమేథీలో పోటీకి ఆయన ముందు నుంచి నిరాసక్తి చూపుతూ వస్తున్నారు. కానీ రాహుల్‌ను రాయ్‌బరేలీలో రంగంలోకి దింపి కాంగ్రెస్‌ షాక్‌ ఇచ్చింది. అయితే అమేథీలో 2019 ఎన్నికల్లో బీజేపీ నేత స్మృతి ఇరానీ చేతిలో రాహుల్‌ ఘోర ఓటమిని చవిచూశారు.2004 నుంచి 2014 వరకు రాయ్‌బరేలీలో ఆయన తల్లి సోనియా గాంధీ ప్రాతినిథ్యం వహించారు. కానీ ఈసారి ఆమె రాజ్యసభకు వెళ్లడంతో అక్కడ పోటీకి మరో వ్యక్తి అవసరం వచ్చింది. దీంతో ప్రతిష్టాత్మకమైన ఈ స్థానం నుంచి పోటీ చేసేందుకు రాహుల్ సిద్ధమయ్యారు. బీజేపీ అభ్యర్థి దినేష్ ప్రతాప్ సింగ్‌తో పోటీ పడుతున్నారు. ఇక ఉత్తరప్రదేశ్‌లో మొత్తం 80 లోక్‌సభ స్థానాలు ఉండగా..కాంగ్రెస్‌ 17 చోట్ల పోటీ చేస్తోంది. మిగతా 63 స్థానాల్లో ఇండియా కూటమిలో మిత్రపక్షమైన సమాజ్‌వాదీపార్టీ, ఇతర ప్రాంతీయ పార్టీలో పోటీ చేస్తున్నాయి.ఎవరీ కిషోరీలాల్‌ శర్మకిషోరీలాల్‌ శర్మీ 1939 సెప్టెంబర్‌ 25న జన్మించారు. ప్రస్తుతం ఆయన వయసు 84 సంవత్సరాలు.పంజాబ్‌లోని లుధియానాకు చెందిన ఆయనకు గత 40 ఏళ్లుగా కాంగ్రెస్‌తో అనుబంధం ఉంది. 1983లో తొలిసారి అమేథీకి వచ్చి అప్పటి నుంచి నియోజకవర్గంలో పార్టీ తరపున పనిచేస్తూ వస్తున్నారు. కిషోరి లాల్ శర్మ మాజీ ప్రధాని రాజీవ్ గాంధీకి అత్యంత సన్నిహితుడని పార్టీ వర్గాలు చెబుతున్నాయి.1991లో రాజీవ్ గాంధీ హత్య తర్వాత గాంధీ కుటుంబంతో అతని బంధం మరింత బలపడింది.సోనియా గాంధీ 1999లో అమేథీ నుంచి తొలిసారి గెలుపొందడంలో కేఎల్ శర్మ కీలక పాత్ర పోషించారు.రాహుల్ కోసం సోనియా గాంధీ సీటు వదులుకున్న తర్వాత అమేథీ, రాయ్‌బరేలీలో శర్మ పార్టీ వ్యవహారాలను నిర్వహిస్తున్నారు.25 ఏళ్లలో తొలిసారిగత 25 ఏళ్లలో నెహ్రూ-గాంధీ కుటుంబానికి చెందిన వ్యక్తి అమేథీ ఎన్నికల బరిలో కనిపించకపోవడం ఇదే తొలిసారి. చివరిసారి 1998లో గాంధీయేతర కుటుంబ సభ్యుడిని  అమేథీ నుంచి పోటీకి దింపారు. కాంగ్రెస్ సీనియర్ నాయకుడు కెప్టెన్ సతీష్ శర్మను పోటీచేశారు.  అయితేబీ జేపీ అభ్యర్థి సంజయ సిన్హ  చేతిలో ఆయన ఓడిపోయారు. అంతకు ముందు 1996 ఎన్నికలలో శర్మ భారతీయ జనతా పార్టీకి చెందిన రాజా మోహన్ సింగ్‌పై విజయం సాధించారు.

ఏపీలో ఎన్నికల ప్రచారంలో సీనియర్లు ఎందుకు కనిపించటం లేదు.. టిక్కెట్లు దక్కలేదని అలిగారా.. లేదంటే పురందేశ్వరి కుట్రా రాజకీయాలతో సీనియర్లు గుర్రుగా ఉన్నారా?. సొంత పార్టీని టీడీపీకి తాకట్టుపెట్టేసారని మండిపడుతున్నారా.. అందుకే ప్రచారాలకి దూరంగా ఉంటున్నారా?. ఎన్నికల వేళ ఏపీ బీజేపీలో ఏం జరుగుతోంది.ఏపీ బీజేపీ ఎన్నికల ప్రచారానికి సీనియర్లు దూరంగా ఉండటం పార్టీలో దుమారం రేపుతోంది. పురందేశ్వరి వైఖరితో విసుగెత్తిన సీనియర్లు పార్టీ ప్రచారంలో ఎక్కడా పాల్గొనడం లేదు. పార్టీలో మొదటి నుంచి కష్టపడిన వారికి కాకుండా తెలుగుదేశం పార్టీ నుంచి రాత్రికి రాత్రే బీజేపీలో చేరిన వారికి  సీట్లు ఇవ్వడంతో సీనియర్లు తీవ్ర ఆగ్రహంగా ఉన్నట్లు ప్రచారం జరుగుతోంది.ఏపీలో బీజేపీ, టీడీపీ, జేనసేన కూటమిగా ఏర్పడి పోటీ చేస్తోంది. ఇక, ఎన్నికల్లో సీనియర్లు చాలా మంది ఒంటరి పోరే బీజేపీకి మంచిదని సూచించినా పురందేశ్వరితో పాటు టీడీపీ నుంచి బీజేపీలో చేరిన సీఎం రమేష్, సుజనా చౌదరి లాంటి నేతల లాబీయింగ్‌తో పొత్తు కుదరింది కానీ.. మొదట నుంచి పొత్తులో బీజేపీకి నష్టం కలిగేలా నిర్ణయాలు జరిగాయి.టిక్కెట్ల దగ్గర నుంచి అభ్యర్ధుల ఎంపిక వరకు అన్నీ టీడీపీ డైరక్షన్‌లో పురందేశ్వరి తీసుకున్న నిర్ణయాలు సీనియర్లకి రుచించలేదు. కనీసం 25 అసెంబ్లీ, ఎనిమిది ఎంపీ సీట్ల కోసం పోటీ పడిన బీజేపీకి కేవలం ఆరు పార్లమెంట్, పది అసెంబ్లీ స్ధానాలు దక్కాయి. ఈ స్ధానాలలో అయినా బీజేపీ అభ్యర్ధులకి అవకాశం ఇవ్వాలని.. పార్టీలో మొదటి నుంచి కష్టపడిన వారికి ప్రాదాన్యత ఉండాలని బీజేపీ సీనియర్లు ఆశించారు. అందులో భాగంగానే జీవీఎల్ విశాఖ ఎంపీ స్థానానికి, రాజమండ్రి స్థానానికి సోము వీర్రాజు, ఏలూరు పార్లమెంట్ స్థానానికి తపనా చౌదరి, హిందూపూర్‌కి విష్ణువర్ధన్ రెడ్డి వంటి నేతలు ప్రయత్నించారు. పార్టీ కోసం పనిచేసిన తమకు టిక్కెట్లు వస్తాయని భావించారు.అయితే, పురందేశ్వరి రాజకీయాలతో వీరెవరికీ టిక్కెట్లు దక్కకపోగా.. ఇతర పార్టీల నుంచి వచ్చిన వారికి టిక్కెట్లలో ప్రాధానత్య ఇచ్చి వారికే టికెట్లు కేటాయించారు. టీడీపీ సుధీర్ఘకాలంగా ఉండి గత ఎన్నికల తర్వాత బీజేపీలో చేరిన సీఎం రమేష్, సుజనా చౌదరి, ఆదినారాయణరెడ్డి, కొత్తపల్లి గీతలకి టిక్కెట్లు దక్కాయి. ఇక గతేడాది బీజేపీ చేరిన మాజీ సీఎం కిరణ్ కుమార్ రెడ్డి సైతం ఎంపీ టిక్కెట్లు దక్కించుకున్నారు. బీజేపీ పోటీ చేస్తున్న ఆరు ఎంపీ స్థానాల్లో ఐదు స్థానాలు ఇతర పార్టీల నుంచి వచ్చిన వారికే దక్కాయి.అంతేకాకుండా.. చివరి నిమిషంలో టీడీపీ నుంచి రోషన్నని చేర్చుకుని బద్వేలు టిక్కెట్ ఇవ్వడం.. అనపర్తిలో మొదట ప్రకటించిన మాజీ సైనికుడిని కాదని రాత్రికి రాత్రి టీడీపీ నుంచి నల్లమిల్లి రామకృష్ణారెడ్డిని చేర్చుకుని టిక్కెట్ ఇవ్వడంపైనా సీనియర్లు అసహనంగా ఉన్నారు. కాగా, పురందేశ్వరి తన స్వార్ధం కోసం బీజేపీని టీడీపీకి తాకట్టు పెట్టేయడంపై సీనియర్లంతా వ్యతిరేకంగానే ఉన్నారు. ఈ నేపథ్యంలోనే పురందేశ్వరి వైఖరితో విసుగెత్తిన సీనియర్లు ఎన్నికల ప్రచారానికి దూరంగా ఉన్నట్లు ప్రచారం జరుగుతోంది.ఇక, విశాఖ టిక్కెట్ ఆశించి చివరి వరకు ప్రయత్నించి భంగపడ్డ రాజ్యసభ సభ్యులు జీవీఎల్ నరసింహరావు ఎక్కడా ఎన్నికల ప్రచారంలో కనిపించడం లేదు. ఉత్తరాంధ్రలో బీజేపీ బలోపేతానికి తీవ్రంగా కృషి చేసిన జీవీఎల్‌ తీవ్ర మనస్థాపంతో ఉన్నారని ప్రచారం జరుగుతోంది. అందుకే ఆయన ఢిల్లీకి పరిమితమైనట్లు తెలుస్తోంది. ఇక సోము వీర్రాజు రాజమండ్రి ఎంపీ స్ధానం కోసం పోటీ పడ్డారు. అయితే రాష్ట్ర పార్టీ అధ్యక్షురాలు పురందేశ్వరికి ఆ టిక్కెట్ దక్కడంతో మౌనంగా ఉండిపోయారు. దాదాపు నాలుగన్నర దశాబ్ధాలగా పార్టీ కోసం పనిచేయడంతో పాటు స్ధానికుడైన తనను కాదని పురందేశ్వరికి టిక్కెట్ ఇవ్వడంపై ఆయన అసంతృప్తిగానే ఉన్నా కూడా పార్టీ ఆదేశాల మేరకు ఆమె నామినేషన్ కార్యక్రమంలో మాత్రమే పాల్గొన్నారు. ఆ తర్వాత పురందేశ్వరి తనతో దూరంగా ఉండటంతో ఎన్నికల ప్రచారానికి సోము వీర్రాజు దూరంగా ఉన్నట్లు తెలుస్తోంది.ఇక ఏలూరు ఎంపీ టిక్కెట్ కోసం ప్రయత్నించిన తపనా చౌదరి కూడా చివరి వరకు రెబెల్ అభ్యర్ధిగా పోటీ చేయాలని భావించారు. అయితే, పార్టీ అధిష్టానం నుంచి వచ్చిన ఆదేశాలతో వెనక్కి తగ్గిన తపనా చౌదరి ఎన్నికల ప్రచారానికి మాత్రం దూరంగా ఉన్నారు. జాతీయ స్ధాయి నాయకులు పాల్గొనే సభలలో మాత్రమే ఈ సీనియర్లంతా కనిపించి వెళ్లిపోతున్నారు. ఇక హిందూపూర్ టిక్కెట్ కోసం ప్రయత్నించి విఫలమైన విష్ణువర్ధన్ రెడ్డి కూడా ఎన్నికల ప్రచారంలో కనిపించడం లేదు. విష్ణు వర్ధన్ రెడ్డి కేవలం రాష్ట్ర కార్యాలయానికే పరిమితమయ్యారు.మరోవైపు శ్రీపీఠం పరిపూర్ణానందస్వామి రెబెల్ అభ్యర్ధిగా కదిరి అసెంబ్లీ, హిందూపూర్ పార్లమెంట్ బరిలో నిలబడటం కూటమి నేతలకి కలవరం కలిగిస్తోంది. ఇక గన్నవరం అసెంబ్లీ నుంచి బీజేపీ రెబెల్‌గా బరిలో ఉన్న కొరుప్రోలు శ్రీనివాసరావుపై పార్టీ అధిష్టానం వేటువేసినప్పటికీ కూటమి పేరుతో టీడీపీకి మేలు జరిగేలా తీసుకున్న నిర్ణయాలు బీజేపీని పూర్తిగా ముంచేసేలా కనపడుతున్నాయి. ఈ నేపథ్యంలో ఎన్నికల ప్రచారంలో ప్రధాని మోదీ ఏపీకి రానున్నారు. కొద్దిరోజుల్లోనే జాతీయ నాయకుల ప్రచారాలు ఉండటంతో సీనియర్లు ఏం చేస్తారనేది ఆసక్తికరంగా మారింది.

బెంగళూరు: లోక్‌సభ ఎన్నికల వేళ కర్ణాటక రాజకీయాల్లో ఊహించని పరిణామాలు చోటుచేసుకుంటున్నాయి. దేశవ్యాప్తంగా సంచలనం రేపిన కర్ణాటక లైంగిక వేధింపుల కేసులో ప్రధాన నిందితుడైన ప్రజ్వల్‌ రేవణ్ణకు మరో షాక్‌ తగిలింది. తాజాగా అతడిపై అత్యాచారం కేసు నమోదైంది.వివరాల ప్రకారం.. కర్ణాటకలో సంచనలంగా మారిన ప్రజ్వల్‌ రేవణ్ణ లైంగిక వేధింపుల కేసు విషయంలో పోలీసులు మరో కీలక నిర్ణయం తీసుకున్నారు. తాజాగా ప్రజ్వల్‌పై అత్యాచారం కేసు నమోదైంది. లైంగిక వేధింపు ఆరోపణలు ఎదుర్కొంటున్న ప్రజ్వల్‌పై సిట్‌ అధికారులు పలు సెక్షన్ల కింద కేసు బుక్‌ చేశారు. ఐపీసీ సెక్షన్‌ 376 (బీ) (ఎన్‌), 506, 354(ఏ)(2), 354(బీ), 354(సీ), ఐటీ చట్టం కింద కేసు ఫైల్‌ చేశారు. ఈ ఎఫ్‌ఐఆర్‌లో ప్రజ్వల్‌ రేవణ్ణను ఏకైక నిందితుడిగా చేర్చారు. కాగా, ఇది ప్రజ్వల్‌పై నమోదైన రెండో కేసు.ఇదిలా ఉండగా.. ఈ కేసును ప్రత్యేక దర్యాప్తు సంస్థ సిట్‌ దర్యాప్తు చేపడుతోంది. ఇందులో భాగంగా విచారణకు హాజరవ్వాలని నోటీసులు జారీ చేసింది. 24 గంటల్లోగా ఎస్పీ సీమా లాట్కార్‌ ముందు హాజరుకావాలని ఆదేశించింది. అయితే, తనకు సమయం కావాలని ప్రజ్వల్‌ రేవణ్ణ సిట్‌ అధికారులను కోరారు. Karnataka government's special investigation team (SIT) filed a rape case against Janata Dal (Secular)'s Hassan MP #PrajwalRevanna. This is the second #FIR against Prajwal Revanna, who is also the grandson of JDS chief and former PM HD Deve Gowda.The FIR against JDS' (cont) pic.twitter.com/A6tKUIFsYu— News Daily 24 (@nd24_news) May 3, 2024 ఈ నేపథ్యంలో ప్రజ్వల్‌ ట్విట్టర్‌ వేదికగా‘సిట్‌ ముందు హాజరుకావడానికి ఏడు రోజుల సమయం కావాలి. ఇప్పుడు నేను బెంగళూరులో లేను’ అంటూ ఒక పోస్టు చేశాడు. కాగా, ప్రజ్వల్‌ అభ్యర్థనను సిట్‌ తిరస్కరించింది. ఈ మేరకు గురువారం ఉదయం మరోసారి సమన్లు పంపింది. అనంతరం కొద్దిసేపటికే ఆయనపై లుక్‌ అవుట్‌ నోటీసులు కూడా జారీ చేసింది. ఈ నేపథ్యంలోనే తాజాగా ఆయనపై అత్యాచారం కేసు కూడా నమోదు చేసింది.ప్రస్తుతం ప్రజ్వల్‌ జర్మనీలో ఉన్నట్లు తేలింది. లైంగిక వేధింపుల ఆరోపణలు వెలుగులోకి వచ్చిన వెంటనే ప్రజ్వల్‌.. డిప్లొమాటిక్‌ పాస్‌పోర్ట్‌ ఉపయోగించి ఏప్రిల్‌ 28న జర్మనీ పారిపోయారు. ఈ క్రమంలో మరోవైపు అతడి పాస్‌పోర్ట్‌ రద్దు చేసి, ప్రజ్వల్‌ను భారత్‌కు రప్పించటంలో సాయం చేయాలని ప్రధాని మోదీని కర్ణాటక సీఎం సిద్ధరామయ్య కోరారు. మరోవైపు విచారణకు హాజరు కాకపోతే దేశానికి తిరిగి వచ్చిన వెంటనే ప్రజ్వల్‌ను అరెస్ట్‌ చేసే అవకాశం ఉంది.  

ఇండోర్ (మధ్యప్రదేశ్): ఓటర్లకు ఉచితంగా సినిమా టికెట్లు ఇస్తామంటోంది మధ్యప్రదేశ్‌లోని ఇండోర్‌ జిల్లా ఎన్నికల అధికార యంత్రాంగం. అయితే ఇది ఓటేసినందుకు కాదు.. మరి ఎందుకో ఈ కథనంలో తెలుసుకోండి..ఇండోర్‌ లోక్‌సభ స్థానానికి మే 13న పోలింగ్‌ జరగనుంది. ఈ నేపథ్యంలో మే 4 నుండి మే 8 వరకు ఓటరు స్లిప్‌లను ఇంటింటికీ పంపిణీ చేసే ప్రక్రియను జిల్లా ఎన్నికల యంత్రాంగం చేపట్టనుంది.  నిర్ణీత వ్యవధిలోగా బీఎల్‌ఓలు ఓటరు స్లిప్‌ను అందిచకపోతే వాట్సాప్ లేదా టెలిఫోన్‌లో ఫిర్యాదు నమోదు చేయవచ్చని జిల్లా ఎన్నికల అధికారి, కలెక్టర్ ఆశీష్ సింగ్ ఓటర్లకు విజ్ఞప్తి చేశారు.ఓటరు స్లిప్పులు అందని ఓటర్లు తమ అసెంబ్లీ నియోజకవర్గం, పోలింగ్ స్టేషన్ వివరాలతో జిల్లా ఎన్నికల హెల్ప్‌లైన్ వాట్సాప్ నంబర్ 9399338398 లేదా ల్యాండ్‌లైన్ నంబర్ 0731-2470104, 0731-2470105లో మే 10వ తేదీ వరకు ఫిర్యాదు చేయవచ్చు. ఫిర్యాదు నిజమైనదని తేలితే బీఎల్‌ఓపై చర్యలు తీసుకోవడంతోపాటు సరైన సమాచారం ఇచ్చిన ఓటర్లకు బహుమతిగా నగరంలోని సినిమా థియేటర్‌లో సినిమా చూసేందుకు రెండు సినిమా టిక్కెట్లను ఉచితంగా అందజేస్తారు.

కోల్‌కతా: లోక్‌సభ ఎన్నికల వేళ పశ్చిమ బెంగాల్‌లో షాకింగ్‌ ఘటన వెలుగుచూసింది. బెంగాల్‌ గవర్నర్‌ సీవీ ఆనంద బోస్‌పై ఓ మహిళా ఉద్యోగి లైంగిన వేధింపుల ఆరోపణలు చేశారు. దీంతో, ఈ ఘటన రాజకీయంగా సంచలనంగా మారింది.వివరాల ప్రకారం.. బెంగాల్‌ రాజ్‌భవన్‌లో పని చేస్తున్న తాత్కాలిక మహిళా ఉద్యోగి.. గవర్నర్ డాక్టర్ సీవీ ఆనంద బోస్‌పై లైంగిక వేధింపుల ఆరోపణలు చేశారు. గవర్నర్‌ తనను లైంగికంగా వేధించారని ఆరోపిస్తూ.. హరే స్ట్రీట్ పోలీస్ స్టేషన్‌లో ఆమె ఫిర్యాదు చేశారు. ఉద్యోగం ఆశచూపి గవర్నర్ తనపై పలుసార్లు లైంగికంగా వేధించారని సదరు మహిళ ఆరోపించింది. ఈ నేపథ్యంలో ఆమె ఫిర్యాదు ప్రకారం పోలీసులు కేసు నమోదు చేసి దర్యాప్తు చేస్తున్నట్టు తెలిపారు.ఇదిలా ఉండగా.. సదురు ఉద్యోగిని ఆరోపణలను గవర్నర్‌ ఆనంద బోస్‌ ఖండించారు. ట్విట్టర్‌ వేదికగా ఆనంద్‌ బోస్‌ స్పందిస్తూ..‘ఇది దురుద్దేశంతో అల్లిన కట్టుకథ. ఇదంతా కల్పితమే. ఎన్నికల్లో లబ్ది పొందడం కోసమే ఇలాంటి తప్పుడు ఆరోపణలు చేస్తున్నారు. ఎవరైనా నన్ను కించపరచడం ద్వారా ఎన్నికల ప్రయోజనాలను కోరుకుంటే.. వారికి దేవుడి ఆశీస్సులు ఉండాలని కోరుకుంటున్నాను. బెంగాల్‌లో హింస, అవినీతికి వ్యతిరేకంగా నా పోరాటాన్ని ఎవరూ ఆపలేరు’ అని కామెంట్స్‌ చేశారు. “Truth shall triumph. I refuse to be cowed down by engineered narratives. If anybody wants some election benefits by maligning me, God Bless them. But they cannot stop my fight against corruption and violence in Bengal.”— Raj Bhavan Kolkata (@BengalGovernor) May 2, 2024 మరోవైపు.. ఇప్పటికే బెంగాల్‌ ప్రభుత్వం, గవర్నర్‌ మధ్య సంబంధాలు అంతంతమాత్రంగా ఉన్నాయి. మరోవైపు.. లోక్‌సభ ఎన్నికల నేపథ్యంలో ప్రధాని మోదీ బెంగాల్‌లో రెండు రోజుల పాటు ప్రచారం చేయనున్నారు. ఇలాంటి నేపథ్యంలో గవర్నర్‌పై లైంగిక వేధింపుల ఆరోపణలు రావడం బీజేపీకి షాకిచ్చినట్టు అయ్యింది. ఇక, ఈ వ్యవహారంపై అధికార తృణముల్‌ కాంగ్రెస్‌ పార్టీ నేతలు సైతం గవర్నర్‌పై మండిపడుతున్నారు.