న్యూయార్క్‌: మహిళా టెన్నిస్‌ ప్రపంచంలో దిగ్గజ క్రీడాకారిణుల్లో ఒకరిగా పేరు తెచ్చుకున్న సెరెనా విలియమ్స్‌ త్వరలోనే పెళ్లికూతురు కానుంది. ఇంటర్నెట్‌లో సామాజిక వార్తల కలబోతగా చెప్పుకునే రెడిట్‌ వెబ్‌సైట్‌ సహ వ్యవస్థాపకుడు 32 ఏళ్ల అలెక్సిస్‌ ఒహానియాన్‌తో గురువారం తన నిశ్చితార్థం జరిగింది.
 
 గత ఏడాది కాలంగా వీరిద్దరు ప్రేమించుకుంటున్నారు. అయితే ఎలాంటి ఆర్భాటానికి వెళ్లకుండా రహస్యంగా వీరి ఎంగేజిమెంట్‌ జరిగింది. ఈ విషయాన్ని సెరెనా తన రెడిట్‌ ఖాతాలో కవితాత్మకంగా పేర్కొనే వరకు ఎవరికీ తెలీదు. ముందుగా తనే పెళ్లి ప్రతిపాదన తేవడంతో అంగీకరించినట్టు సెరెనా పేర్కొంది. వచ్చే నెలలో ఆస్ట్రేలియన్‌ ఓపెన్‌లో పాల్గొనబోతున్న 35 ఏళ్ల సెరెనా గతంలో పలువురు ప్రముఖులతో ప్రేమాయణం సాగించింది.