రైతులను ఆదుకోవడంలో రేవంత్ విఫలం: హరీష్ రావు

సాక్షి, వనపర్తి: కాంగ్రెస్ ప్రభుత్వ నిర్లక్ష్యం వల్లే పాలమూరు ప్రాంతంలో కరువు పరిస్థితులు ఏర్పడ్డాయని మాజీ మంత్రి, బీఆర్ఎస్‌ ఎమ్మెల్యే హరీష్ రావు విమర్శించారు. శ్రీశైలం, జూరాల నుంచి అందుబాటులో ఉన్న కృష్ణా జలాలను పూర్తిస్థాయిలో వినియోగించకపోవడంతో రైతులు తీవ్రంగా నష్టపోతున్నారని ఆరోపించారు. బీఆర్ఎస్‌ హయాంలో ఎనిమిదేళ్ల పాటు రెండు పంటలు పండిన ప్రాంతంలో ఈసారి తొలి పంట కూడా ఎండిపోయిందని అన్నారు."కృష్ణా నీటిని ఎత్తకుండా పాలమూరుకు కరువు తీసుకొచ్చారు. బీఆర్‌ఎస్‌ హయాంలో ఎప్పుడూ పంటలు ఎండిపోలేదు. ప్రజలకు భరోసా ఇవ్వడంలో రేవంత్‌ రెడ్డి విఫలం అయ్యారు. కాంగ్రెస్‌ నిర్లక్ష‍్యంతోనే రాష్ట్రంలో కరెంట్‌ కష్టాలు వచ్చాయి. కాంగ్రెస్‌ చేసిన పాపం ప్రజలకు శాపంగా మారింది. ప్రజల సంక్షేమం సీఎం రేవంత్‌కు పట్టదని, కాంగ్రెస్‌ పాలనలో రైతులు తీవ్ర అవస్థలు పడుతున్నారు" అని హరీష్ రావు మండిపడ్డారు.అంతేకాదు కల్వకుర్తి ఎత్తిపోతల పథకం ద్వారా గతంలో 50 టీఎంసీల నీటిని ఎత్తిపోస్తే.. కాంగ్రెస్ ప్రభుత్వం కేవలం 18 టీఎంసీలకే పరిమితమైందని విమర్శించారు. శ్రీశైలం, జూరాల నుంచి వెంటనే నీటిని విడుదల చేసి రైతులను ఆదుకోవాలని డిమాండ్ చేశారు. కరువుతో పంటలు నష్టపోయిన రైతులకు పరిహారం, యాసంగి రైతుబంధు అందించాలని ఆయన కోరారు.కరువు మండలాల ప్రకటనకే ప్రభుత్వం పరిమితమైందని, కరువు పరిస్థితులను పరిశీలించేందుకు తక్షణమే కేంద్ర బృందాన్ని పంపించాలని డిమాండ్ చేశారు. రైతులకు ధైర్యం చెప్పేందుకే తాము పర్యటిస్తున్నామని తెలిపారు.ఇదీ చదవండి: ‘కౌంటింగ్‌లో పూర్తి అప్రమత్తంగా ఉండండి’

రాప్తాడు బాలికకు వైఎస్ జగన్ పరామర్శ

సాక్షి, అమరావతి: అనంతపురం జిల్లా రాప్తాడులోని జిల్లా పరిషత్‌ ఉన్నత పాఠశాలలో ఉన్మాది దాడిలో తీవ్రంగా గాయపడిన బాలికను వైఎస్సార్‌సీపీ అధ్యక్షుడు, మాజీ ముఖ్యమంత్రి వైఎస్‌ జగన్‌మోహన్‌ రెడ్డి పరామర్శించారు. బెంగళూరులోని మణిపాల్‌ ఆస్పత్రిలో చికిత్స పొందుతున్న బాలికను వైఎస్‌ జగన్‌ పరామర్శించారు.ఈ క్రమంలోనే డాక్టర్లతో మాట్లాడిన వైఎస్‌ జగన్‌.. బాలిక ఆరోగ్య పరిస్థితిని అడిగి తెలుసుకున్నారు. ఆమెకు అందిస్తున్న వైద్య సేవల వివరాలను వైఎస్‌ జగన్‌ తెలుసుకున్నారు. అనంతరం బాలిక కుటుంబ సభ్యులను కూడా పరామర్శించి, వారికి ఆయన ధైర్యం చెప్పారు. ఇదీ చదవండి: ఆసుపత్రి బెడ్‌పై రాక్షసుడు.. ఆ యోచనలో వైద్యులు..!

‘కౌంటింగ్‌లో పూర్తి అప్రమత్తంగా ఉండండి’

సాక్షి, తాడేపల్లి: రేపు(మంగళవారం, నవంబర్‌ 3వ తేదీ) మున్సిపల్, కార్పొరేషన్ ఎన్నికల కౌంటింగ్ నేపథ్యంలో వైఎస్సార్‌సీపీ శ్రేణులు పూర్తి అప్రమత్తంగా ఉండాలని పార్టీ స్టేట్ కోఆర్డినేటర్ సజ్జల రామకృష్ణారెడ్డి సూచించారు. కౌంటింగ్‌లో ప్రతీ ఓటును కాపాడుకోవాలన్నారు. ఈ మేరకు పార్టీ ముఖ్య నాయకులతో సోమవారం( నవంబర్‌ 2వ తేదీ) ఆయన టెలికాన్ఫరెన్స్ నిర్వహించారు. రేపు జరగనున్న కౌంటింగ్ ఏర్పాట్లు, తీసుకోవాల్సిన జాగ్రత్తలపై ఆయన చర్చించారు.ఈ సందర్భంగా సజ్జల మాట్లాడుతూ.. కౌంటింగ్‌లో ప్రతి ఓటునూ కాపాడుకోవాల్సిన అవసరముందన్నారు. నామినేషన్ల నుంచి పోలింగ్ వరకు అధికార టీడీపీ ప్రజాస్వామ్య వ్యవస్థలను దుర్వినియోగం చేసిందని ఆరోపించారు. పోలీసు యంత్రాంగం, ఎన్నికల అధికారులు అధికార పార్టీకి అనుకూలంగా వ్యవహరించారని విమర్శించారు.కౌంటింగ్ కేంద్రాల్లో సీసీ కెమెరాలు, వెబ్‌కాస్టింగ్ పనితీరును పార్టీ ఏజెంట్లు నిరంతరం పర్యవేక్షించాలని సూచించారు. ఏవైనా లోపాలు గుర్తిస్తే వెంటనే లిఖిత పూర్వకంగా ఫిర్యాదు చేయాలన్నారు. బ్యాలెట్ బాక్సుల సీల్స్, ఏజెంట్ల సంతకాలు, ఓట్ల లెక్కింపు ప్రక్రియను క్షుణ్ణంగా పరిశీలించాలని చెప్పారు. ఒక్క ఓటు కూడా తారుమారు కాకుండా జాగ్రత్తలు తీసుకోవాలని స్పష్టం చేశారు.తుది ఫలితాలు ప్రకటించి, అవసరమైన పత్రాలపై సంతకాలు పూర్తయ్యే వరకు కౌంటింగ్ ఏజెంట్లు కేంద్రాలను విడిచి పెట్టకూడదని సూచించారు. అధికార పార్టీ ప్రలోభాలు, పోలీసుల ఒత్తిళ్లు, తప్పుడు కేసులు, ఘర్షణలకు చేసే ప్రయత్నాలను సంయమనంతో ఎదుర్కోవాలని పార్టీ నేతలకు ఆయన దిశానిర్దేశం చేశారు.ఇక నవంబర్ 5న జరగనున్న జెడ్పీటీసీ, ఎంపీటీసీ ఎన్నికలను కూడా మరింత ప్రతిష్టాత్మకంగా తీసుకోవాలని సజ్జల కోరారు. ప్రతి పోలింగ్ కేంద్రంలో సీసీ కెమెరాలు, వెబ్‌కాస్టింగ్ ఏర్పాటు చేసేలా ఎన్నికల అధికారులను కోరాలన్నారు. కేవలం గెలిచిన స్థానాలే కాకుండా, సాధించిన ఓట్లు, ఓట్ల శాతం కూడా ముఖ్యమని పేర్కొన్నారు. ప్రతి ఓటు, ప్రతి వార్డు, ప్రతి డివిజన్ పార్టీకి అదనపు బలమని గుర్తించి, నాయకులు, కార్యకర్తలు సమన్వయంతో పనిచేయాలన్నారు.ఇదీ చదవండి: రాప్తాడు బాలికకు వైఎస్ జగన్ పరామర్శ

రెండు చోట్ల ఓట్లు ఉంటే తొలగించాలా... వద్దా?: అమిత్‌ షా

హైదరాబాద్‌: నగరంలో బీజేపీ సోమవారం మహా పాదయాత్ర నిర్వహించింది. ఇందులో కేంద్ర మంత్రులు అమిత్‌ షా, కిషన్‌ రెడ్డి, ఇతర బీజేపీ నేతలు పాల్గొన్నారు. బషీర్‌బాగ్‌ జగ్జీవన్‌రామ్‌ విగ్రహం నుంచి బీజేపీ పాదయాత్ర నిర్వహించింది. అబిడ్స్‌ మీదుగా ఎంజే మార్కెట్‌ వరకు బీజేపీ పాదయాత్ర కొనసాగింది. ఎంజే మార్కెట్‌లో అమిత్‌ షా కార్నర్‌ మీటింగ్‌ నిర్వహించారు. ఇవాళ హైదరాబాద్‌లో చార్మినార్‌ వద్ద భాగ్యలక్ష్మి అమ్మవారిని కూడా అమిత్‌షా దర్శించుకుని, ప్రత్యేక పూజలు చేశారు.పాదయాత్ర ముగిశాక నిర్వహించిన సభలో అమిత్‌ షా జై శ్రీరాం నినాదాలతో ప్రసంగాన్ని ప్రారంభించారు. తెలంగాణలో బీజేపీ ప్రభుత్వం కావాలా? వద్దా? అని అన్నారు. ప్రజాస్వామ్యాన్ని కాపాడాలని, అరాచకాన్ని అంతం చేయాలని పిలుపునిచ్చారు. ‘‘సర్దార్‌ పటేల్‌ లేకుంటే భారత్‌లో హైదరాబాద్‌ విలీనం అయ్యేది కాదు. అరాచక శక్తులను బీజేపీ అంతం చేస్తోంది. చొరబాటుదారులను ఓటు బ్యాంకుగా మార్చుకోవాలని కాంగ్రెస్‌ చూస్తోంది. 13 కోట్ల ఓట్లను తొలగించారని రాహుల్‌ గాంధీ అంటున్నారు. రెండు చోట్ల ఓట్లు ఉంటే తొలగించాలా... వద్దా? ఎస్‌ఐఆర్‌తో అక్రమ వలసదారులను తొలగిస్తున్నాం. కాంగ్రెస్‌ అండ్‌ కో ఎస్‌ఐఆర్‌ ఆపాలని చూస్తోంది. దేశంలో కాంగ్రెస్‌ వెంటిలేటర్‌పై ఉంది. ప్రధానిగా మోదీ 12 ఏళ్లు పూర్తి చేసుకున్నారు. మోదీపై అవినీతి ఆరోపణలు లేవు. తెలంగాణలో ఆర్‌ఆర్‌ ట్యాక్స్‌ వసూలు చేస్తున్నారు. 2014లో మోదీ గెలిచారు అప్పుడు ఎస్‌ఐఆర్‌ ఉందా? 2019లోనూ మోదీ విజయం సాధించారు.. అప్పుడు ఎస్‌ఐఆర్‌ ఉందా? కాంగ్రెస్‌కు మాక్‌ పార్లమెంటే కరెక్ట్‌. అందులోనైనా రాహుల్‌ ప్రధాని రోల్‌ ఎంచుకోవాలి. ఎందుకంటే రాహుల్‌ ఎప్పటికీ ప్రధాని కాలేరు’’ అని అమిత్‌ షా తెలిపారు.