పాడేరు రూరల్‌: జిల్లా కేంద్రమైన పాడేరు పట్టణంలో శనివారం అక్రమ దుకాణాల తొలగింపు ప్రక్రియ ఉద్రిక్తతకు దారితీసింది. ముందస్తు సమాచారం ప్రకారమే తాము దుకాణాలను తొలగిస్తున్నామని పాడేరు మేజర్‌ పంచాయతీ ప్రత్యేక అధికారి రమేష్‌ స్పష్టం చేశారు. సిబ్బంది, వ్యాపారుల మధ్య వాగ్వాదం తొలగింపు చర్యలను చిరు వ్యాపారులు అడ్డుకోవడంతో పంచాయతీ, రెవెన్యూ సిబ్బంది, వ్యాపారులకు మధ్య తీవ్ర వాగ్వాదం చోటుచేసుకుంది. పరిస్థితి ఉద్రిక్తంగా మారడంతో పోలీసులు రంగప్రవేశం చేసి ఇరువర్గాలను శాంతింపజేశారు. దీంతో గొడవ సద్దుమణిగింది. ఈ సందర్భంగా ఈవో మాట్లాడుతూ పట్టణంలోని పీఎంఆర్‌సీ జంక్షన్‌ నుంచి రేకుల కాలనీ వరకు రహదారికి ఇరువైపులా ఉన్న అక్రమ దుకాణాలను పోలీసుల సహాయంతో తొలగించామని తెలిపారు. అలాగే తలారిసింగి అగ్నిమాపక కేంద్రం (ఫైర్‌ స్టేషన్‌) నుంచి ఆర్టీసీ కాంప్లెక్స్‌ మీదుగా పాత బస్టాప్‌ వరకు ప్రధాన రహదారికి ఇరువైపులా ఉన్న ఆక్రమణలను పూర్తిగా తొలగిస్తామన్నారు. పాడేరు జిల్లా కేంద్రం కావడంతో రోజురోజుకు వాహనాల తాకిడి, ప్రజల రద్దీ పెరుగుతోందన్నారు. ప్రభుత్వ ఆదేశాల మేరకు ఫుట్‌పాత్‌ ఆక్రమణలను తొలగిస్తున్నామని, ఎవరైనా అడ్డుకుంటే పోలీస్‌ కేసులు తప్పవని హెచ్చరించారు. పట్టణ సుందరీకరణ, ట్రాఫిక్‌ నియంత్రణ కోసం అన్ని వర్గాల ప్రజలు, ప్రజాప్రతినిధులు, వ్యాపార నిర్వాహకులు సహకరించాలని కోరారు. ఈ కార్యక్రమంలో రెవెన్యూ, పంచాయతీ సిబ్బంది శేషగిరిరావు, చిన్ని, రాంనాయుడు తదితరులు పాల్గొన్నారు. అడ్డుకున్న వ్యాపారులు ముందస్తు సమాచారంతోనే చర్యలు.. ఈవో రమేష్‌ పోలీసుల రంగ ప్రవేశంతోసద్దు మణిగిన వివాదం

● విలువ రూ.రూ.34,93,031 ● పాడేరు డీఎస్పీ అభిషేక్‌ వెల్లడి పాడేరు: గంజాయి అక్రమ రవాణా ద్వా రా ఆస్తులు కూడబెట్టిన ఒక స్మగ్లర్‌కు చెందిన ఆస్తులను జప్తు చేసినట్లు పాడే రు డీఎస్పీ అభిషేక్‌ వెల్లడించారు. శనివారం సాయంత్రం తన కార్యాలయంలో ఏర్పాటు చేసిన విలేకరుల సమావేశంలో ఆయన వివరాలను వెల్లడించారు.పాడేరు మండలం, డి.గొందూరు పంచాయతీ, పాలమామిడిశంక గ్రామానికి చెందిన డుంబేరి సతీష్‌ గతంలో గంజాయి వ్యాపారం చేస్తూ పలుమార్లు పోలీసులకు పట్టుబడ్డాడు. అతనిపై మొత్తం నాలుగు కేసులు నమోదు కాగా వీటిలో ఒకటి పాడేరు పోలీస్‌ స్టేషన్‌ పరిధిలోనిది. గంజాయి విక్రయాల ద్వారా సతీష్‌ భారీగా ఆస్తులు సంపాదించాడనే సమాచారంతో పాడేరు సీఐ దీనబంధు నేతృత్వంలో ఆర్థిక విచారణ చేపట్టారు. దీనిలో భాగంగా ఒక భవనం, ఒక కారును గుర్తించి సీజ్‌ చేశారు. వీటి వివరాలను చైన్నెలోని కాంపిటెంట్‌ అథారిటీకి పంపించారు. అధికారులు క్షుణ్ణంగా తనిఖీలు చేసిన అనంతరం, ఆ ఆస్తుల విలువ రూ.34,93,031 గా నిర్ధారించి వాటిని జప్తు చేశారు. జప్తు చేసిన వీటిని కొనుగోలు చేసేందుకు ఎవరికీ అవకాశం లేదని డీఎస్పీ స్పష్టం చేశారు. గతంలో గంజాయి వ్యాపారం చేసిన వారిపై, ప్రస్తుతం చేస్తున్న వారిపై గట్టి నిఘా ఉంచామని డీఎస్పీ తెలిపారు. అక్రమ సంపాదనతో కూడబెట్టిన వారి ఆస్తులపై కూడా విచారణ కొనసాగుతుందని ఆయన హెచ్చరించారు. ఈ సమావేశంలో పాడేరు సీఐ దీనబంధు పాల్గొన్నారు.

పాడేరు: తిరుమల తిరుపతి దేవస్థానం పవిత్రతను దెబ్బతీస్తూ, హిందువుల మనోభావాలతో ఆటలాడుకుంటున్న టీటీడీ చైర్మన్‌ బీఆర్‌ నాయుడును తక్షణమే పదవి నుంచి తొలగించాలని పాడేరు ఎమ్మెల్యే, వైఎస్సార్‌సీపీ జిల్లా అధ్యక్షుడు మత్స్యరాస విశ్వేశ్వరరాజు డిమాండ్‌ చేశారు. మోదకొండమ్మ ఆలయంలో ప్రత్యేక పూజలు పార్టీ అధిష్టానం ఆదేశాల మేరకు శనివారం గిరిజనుల ఇలవేల్పు పాడేరు మోదకొండమ్మ తల్లి ఆలయంలో వైఎస్సార్‌సీపీ శ్రేణులు నిరసన కార్యక్రమం చేపట్టాయి. మాజీ మంత్రి, పార్టీ గాజువాక నియోజకవర్గ పరిశీలకుడు పసుపులేటి బాలరాజుతో కలిసి ఎమ్మెల్యే విశ్వేశ్వరరాజు అమ్మవారికి ప్రత్యేక పూజలు నిర్వహించారు. ప్రభుత్వంపై విమర్శలు.. ఈ సందర్భంగా ఎమ్మెల్యే మాట్లాడుతూ, అత్యంత పవిత్రమైన పుణ్యక్షేత్రానికి చైర్మన్‌గా ఉంటూ వివాదాస్పదంగా వ్యవహరిస్తున్న బీఆర్‌ నాయుడును ముఖ్యమంత్రి చంద్రబాబు వెనకేసుకురావడం సిగ్గుచేటని విమర్శించారు. మహిళల గౌరవం గురించి గొప్పలు చెప్పే సీఎం, ఇన్ని ఆరోపణలు వస్తున్నా ఆయనపై ఎందుకు చర్యలు తీసుకోవడం లేదని ప్రశ్నించారు. తిరుమల ఖ్యాతిని మంటగలిపేలా ప్రవర్తిస్తున్న వ్యక్తిని వెంటబెట్టుకుని ఒంటిమెట్ట ఉగాది వేడుకల్లో పాల్గొనడం ఏమిటని నిలదీశారు. పోరాటం ఆపేది లేదు మాజీ మంత్రి పసుపులేటి బాలరాజు మాట్లాడుతూ.. కళంకితుడైన వ్యక్తి చైర్మన్‌ పదవిలో కొనసాగడం సమంజసం కాదన్నారు. ప్రభుత్వం వెంటనే స్పందించి ఆయన్ను తొలగించకపోతే వైఎస్సార్‌సీపీ ఆధ్వర్యంలో పోరాటాన్ని ఉధృతం చేస్తామని హెచ్చరించారు. ఈ కార్యక్రమంలో వైఎస్సార్‌సీపీ జిల్లా అధికార ప్రతినిధి కూడా సురేష్‌కుమార్‌, రాష్ట్ర ప్రచార కమిటీ కార్యదర్శి కూతంగి సూరిబాబు, మండల అధ్యక్షులు సీదరి రాంబాబు, నుర్మానీ మత్స్యకొండం నాయుడు, వైఎస్‌ ఎంపీపీలు కుడుముల సత్యనారాయణ, కుంతూరు కనకాలమ్మ, మాజీ ఎంపీపీ మత్స్యరాస వెంకటగంగరాజు, మాజీ పీఏసీఎస్‌ అధ్యక్షురాలు లకే రామసత్యవతి, పెద్ద సంఖ్యలో పార్టీ శ్రేణులు పాల్గొన్నారు. అపవిత్రమైన వ్యక్తిని తొలగించాలి: అరకు ఎమ్మెల్యే రేగం మత్స్యలింగం అరకులోయ టౌన్‌: పవిత్రమైన తిరుమల తిరుపతి దేవస్థానం (టీటీడీ) చైర్మన్‌గా ఉన్న బీఆర్‌ నాయుడుని వెంటనే ఆ పదవి నుంచి తొలగించాలని అరకు ఎమ్మెల్యే రేగం మత్స్యలింగం డిమాండ్‌ చేశారు. వైఎస్సార్‌సీపీ అధ్యక్షుడు, మాజీ ముఖ్యమంత్రి వైఎస్‌ జగన్‌మోహన్‌ రెడ్డి పిలుపు మేరకు శనివారం స్థానిక వేంకటేశ్వర స్వామి ఆలయంలో వైఎస్సార్‌సీపీ నాయకులతో కలిసి ఆయన ప్రత్యేక పూజలు నిర్వహించారు. ఈ సందర్భంగా బీఆర్‌ నాయుడు గోబ్యాక్‌, వివాదాస్పద వ్యక్తిని చైర్మన్‌ పదవి నుంచి తొలగించాలి.. అంటూ నినాదాలు చేశారు. అనంతరం ఎమ్మెల్యే మాట్లాడుతూ.. ముఖ్యమంత్రి చంద్రబాబుకు స్వామి వారు మంచి బుద్ధిని ప్రసాదించాలని, టీటీడీ చైర్మన్‌ పదవి నుంచి బీఆర్‌ నాయుడును మార్చాలని ప్రార్థించినట్లు తెలిపారు. అపవిత్రమైన వ్యక్తిని చైర్మన్‌గా కొనసాగిస్తే ప్రపంచవ్యాప్తంగా ఉన్న కోట్ల మంది భక్తుల మనోభావాలు దెబ్బతింటాయన్నారు. బీఆర్‌ నాయుడుకు కొమ్ముకాస్తున్న చంద్రబాబు ఇప్పటికై నా మేల్కొని అతడిని వెంటనే తొలగించి తిరుమల పవిత్రతను కాపాడాలన్నారు. ఉమ్మడి విశాఖ జెడ్పీ చైర్‌పర్సన్‌ జల్లిపల్లి సుభద్ర మాట్లాడుతూ కలియుగ దైవం తిరుమల శ్రీవారి ఆలయ చైర్మన్‌పై ఇన్ని ఆరోపణలు వస్తున్నా ముఖ్యమంత్రి ఎందుకు చర్యలు తీసుకోవడం లేదు? హిందూ ధర్మంపై ప్రేమ చూపే ప్రధాని మోదీ, సనాతన ధర్మం గురించి మాట్లాడే డిప్యూటీ సీఎం పవన్‌ కల్యాణ్‌ ఈ విషయంలో ఎందుకు నోరు మెదపడం లేదు? అని ప్రశ్నించారు. 2029లో జగనన్న మళ్లీ ముఖ్యమంత్రి అవుతారని, కూటమి ప్రభుత్వ ఆరాచకాలకు ప్రజలే గుణపాఠం చెబుతారని ఆమె అన్నారు. మాజీ ఎమ్మెల్యే, పార్టీ రాష్ట్ర ఎస్టీ సెల్‌ అధ్యక్షురాలు కొట్టగుళ్లి భాగ్యలక్ష్మి మాట్లాడుతూ మహిళలకు కనీస గౌరవం ఇవ్వని వ్యక్తిని టీటీడీ చైర్మన్‌గా నియమించి చంద్రబాబు తిరుమల ప్రతిష్టను దిగజారుస్తున్నారన్నారు. తిరుపతిలో ఈ ఘటనపై నిరసన తెలిపిన మహిళలపై దాడి చేయడం దారుణం అన్నారు. వైఎస్సార్‌సీపీ రాష్ట్ర ఎస్టీ సెల్‌ ప్రధాన కార్యదర్శి పాంగి చిన్నారావు, యువజన విభాగం రాష్ట్ర ఉపాధ్యక్షుడు రేగం చాణక్య, ఉమ్మడి విశాఖ ఎస్టీ సెల్‌ మాజీ అధ్యక్షుడు అశోక్‌ కుమార్‌, సర్పంచ్‌లు పెట్టెలి సుస్మిత, ఇరగాయి బుటికి, పాగి అప్పారావు, రాధిక, హరి, మండల పార్టీ అధ్యక్షులు రామూర్తి, పాంగి పరశురామ్‌, ఎంపీటీసీలు దురియా ఆనంద్‌ కుమార్‌, శత్రుఘ్న, రామచందర్‌, మాజీ ఎంపీపీ శెట్టి నీలవేణి,వైస్‌ ఎంపీపీ కిల్లో రామన్న, కల్చరల్‌ వింగ్‌ నియోజకవర్గ అధ్యక్షుడు పెట్టెలి సుక్రయ్య, నాయకులు శోభ సోమేశ్వరి, చినసత్యం, నర్సింగరావు పాల్గొన్నారు. అరకులో నినాదాలు చేస్తున్న ఎమ్మెల్యే రేగం మత్స్యలింగం, ఉమ్మడి విశాఖ జెడ్పీ చైర్‌పర్సన్‌ సుభద్ర,మాజీ ఎమ్మెల్యే భాగ్యలక్ష్మి, వైఎస్సార్‌సీపీ నేతలుపాడేరులో మోదకొండమ్మ ఆలయ ఆవరణలో బీఆర్‌ నాయుడుకు వ్యతిరేకంగా నినాదాలు చేస్తున్న ఎమ్మెల్యే విశ్వేశ్వరరాజు, మాజీ మంత్రి బాలరాజు, వైఎస్సార్‌సీపీ శ్రేణులు బీఆర్‌ నాయుడును చైర్మన్‌ పదవి నుంచి తొలగించండి ఎమ్మెల్యే, వైఎస్సార్‌సీపీ జిల్లా అధ్యక్షుడు మత్స్యరాస విశ్వేశ్వరరాజు డిమాండ్‌ రాష్ట్ర ప్రభుత్వం తీరుపై పాడేరు, అరకులో నిరసనలు ఆలయాల్లో ప్రత్యేక పూజలు

రిజర్వేషన్లపై సుప్రీంకోర్టు తీర్పును పునఃసమీక్షించాలి ఉదయం నుంచి క్యూలైన్‌లో నిలబడ్డా జ్వరంతో ఈనెల 2వతేదీ గురువారం జిల్లా ఆస్పత్రిలో ఇన్‌పేషెంట్‌గా చేరా. వైద్యులు రక్తపరీక్షలు చేయించమన్నారు. శనివారం ఉదయం నుంచి మధ్యాహ్నం వరకు క్యూలైన్‌లో నిల్చుని తీవ్ర ఇబ్బందులు పడ్డా. మధ్యాహ్నం 3గంటలకు పరీక్షలకు రక్తం సేకరించారు. – గెమ్మెలి గున్మమ్మ, బిరిమిశాల, పాడేరు మండలం సాక్షి, పాడేరు: జిల్లావ్యాప్తంగా సీజనల్‌ జ్వరాలు విజృంభిస్తున్నాయి. దీంతో పాడేరు జిల్లా సర్వజన ఆస్పత్రికి రోగుల తాకిడి గణనీయంగా పెరిగింది. అయితే, రక్తపరీక్షల నిర్వహణలో ఎదురవుతున్న ఇబ్బందులతో రోగులు తీవ్ర నరకం చూస్తున్నారు. ప్రతిరోజూ 200 నుంచి 300 మందికి పైగా రోగులు రక్తపరీక్షల కోసం గంటల తరబడి క్యూలైన్లలో నిలబడలేక అవస్థలు పడుతున్నారు. జ్వరపీడితులతో రద్దీ జిల్లా ఆస్పత్రి కావడంతో అన్ని ప్రాంతాల నుంచి జ్వరపీడితుల రద్దీ అధికంగా ఉంది. ప్రాథమిక ఆరోగ్య కేంద్రాల నుంచి కూడా అత్యవసర కేసులను పాడేరు ఆస్పత్రికే రిఫర్‌ చేస్తున్నారు. రోజువారీ ఓపీ సంఖ్య 500 దాటుతుండగా, వారిలో సుమారు 200 మందికి పైగా రక్తపరీక్షలు అవసరమవుతున్నాయి. ● ప్రస్తుతం రక్తపరీక్షల విభాగాన్ని ఆస్పత్రిలోని ఒక ఇరుకై న వరండాలో ఏర్పాటు చేశారు. అక్కడ సరైన గాలి వెలుతురు లేకపోవడంతో రోగులు ఊపిరి పీల్చుకోవడానికి ఇబ్బంది పడుతున్నారు. కనీసం ఫ్యాన్ల సౌకర్యం కూడా లేకపోవడంతో, తీవ్ర జ్వరంతో ఉన్న రోగులు ఆ ఉక్కపోతకు అల్లాడిపోతున్నారు. సిబ్బంది కొరత.. ఒక్కరితోనే పరీక్షలు రక్తపరీక్షల విభాగంలో రోగుల సంఖ్యకు తగ్గట్టుగా సిబ్బంది లేరు. ఓపీ రాసేందుకు ఇద్దరు ఉన్నప్పటికీ, రక్త నమూనాలు సేకరించడానికి ఒక్కరు మాత్రమే అందుబాటులో ఉండటంతో తీవ్ర జాప్యం జరుగుతోంది. రోజుకు వందలాది మంది వస్తున్నా, అదనపు కౌంటర్‌ ఏర్పాటు చేయడంలో అధికారులు నిర్లక్ష్యం వహిస్తున్నారని రోగులు మండిపడుతున్నారు. ఇన్‌పేషెంట్లకూ తప్పని తిప్పలు గతంలో ఆస్పత్రిలో చేరిన ఇన్‌పేషెంట్ల వద్దకే సిబ్బంది వెళ్లి రక్త నమూనాలు సేకరించేవారు. కానీ ఇప్పుడు పరిస్థితి మారింది. తీవ్ర అస్వస్థతతో ఉన్న రోగులు కూడా సహాయకుల సాయంతో నడుచుకుంటూ లేదా చక్రాల కుర్చీలపై పరీక్షా కేంద్రానికి రాక తప్పడం లేదు. ఆలస్యంగా రిపోర్టులు: మలేరియా, డెంగ్యూ, టైఫాయిడ్‌ వంటి వ్యాధుల నిర్థారణకు రక్త నమూనాల సేకరణలో జాప్యం జరగడమే కాకుండా, రిపోర్టులు ఇవ్వడంలోనూ తీవ్ర ఆలస్యమవుతోంది. ఇక్కడ పూర్తిస్థాయి సిబ్బందికి బదులుగా ఎక్కువ మంది ట్రైనీ విద్యార్థులే విధులు నిర్వహిస్తున్నారనే విమర్శలు వినిపిస్తున్నాయి. రిపోర్టులు సకాలంలో రాకపోవడంతో రోగులకు సత్వర వైద్యం అందడం లేదని వారి సహాయకులు ఆవేదన వ్యక్తం చేస్తున్నారు. పాడేరు రూరల్‌: మత విద్వేషాలకు తావులేకుండా సుప్రీంకోర్టు ఇచ్చిన తీర్పును పునఃపరిశీలించాలని క్రైస్తవ సంఘాల నాయకులు డిమాండ్‌ చేశారు. శనివారం క్రిస్టియన్‌ రైట్స్‌ ప్రొటెక్షన్‌ సమితి ఆధ్వర్యంలో పాస్టర్స్‌ ఫెలోషిప్‌ అసోసియేషన్‌ నాయకులు పాస్టర్‌ తిమోతి, మత్స్యరాజుల నేతృత్వంలో భారీ ర్యాలీ నిర్వహించారు. అనంతరం కలెక్టరేట్‌ అధికారులకు, సబ్‌ కలెక్టర్‌కు వినతిపత్రం అందజేశారు. ఈ సందర్భంగా వారు మాట్లాడుతూ.. రాజ్యాంగ నిర్మాత డాక్టర్‌ బి.ఆర్‌. అంబేద్కర్‌ రాసిన రాజ్యాంగం ప్రకారం పాలకులందరూ ప్రజలందరినీ సమానంగా చూడాలని కోరారు. అన్నదమ్ములుగా కలిసిమెలిసి ఉంటున్న హిందూ, క్రైస్తవ, మైనారిటీ వర్గాల మధ్య రాజకీయాల కోసం మత విద్వేషాలు రెచ్చగొట్టడం తగదన్నారు. క్రైస్తవ మతాన్ని స్వీకరించిన ఎస్సీ, ఎస్టీ, బీసీ, ఓసీ సామాజిక వర్గాల వారికి రిజర్వేషన్లు వర్తించవని చెప్పడం భావ్యం కాదన్నారు. సుప్రీంకోర్టు తీర్పును పునఃసమీక్షించి, గతంలో ఉన్న విధంగానే రిజర్వేషన్లను కొనసాగించాలని డిమాండ్‌ చేశారు. ఈ విషయంలో కేంద్ర, రాష్ట్ర ప్రభుత్వాలు సానుకూలంగా స్పందించకపోతే భవిష్యత్తులో ఉద్యమాన్ని మరింత ఉధృతం చేస్తామని హెచ్చరించారు. ఈ కార్యక్రమంలో పాస్టరర్ల సంఘ నాయకులు సల్మాన్‌, బాబురావు, జాన్‌, జోసెఫ్‌, యోబు, ప్రేమ్‌ కుమార్‌, చిన్నారావు తదితరులు పాల్గొన్నారు. రక్తపరీక్షల విభాగంలో రక్తపరీక్షల విభాగం విస్తరిస్తాం రక్తపరీక్షల విభాగం సేవలను విస్తరించేందుకు చర్యలు తీసుకుంటున్నాం. వరండాకు ఆనుకుని ఉన్న విశాలమైన గదిలో రక్తపరీక్షల విభాగం ఏర్పాటుకు నిర్ణయించాం. అక్కడ ఫ్యాన్లు, ఇతర సౌకర్యాలు అందుబాటులో ఉంచుతాం. రక్తపరీక్షలు వేగవంతానికి తగిన చర్యలు తీసుకుంటాం. – డాక్టర్‌ ఎర్రయ్య, ఇన్‌చార్జి డిప్యూటీ సూపరింటెండెంట్‌, జిల్లా ఆస్పత్రి, పాడేరు క్రైస్తవ సంఘాల డిమాండ్‌ పాడేరు జిల్లా ఆస్పత్రిలో రోగుల పాట్లు రక్తపరీక్షల కోసం గంటల తరబడి నిరీక్షణ! ఊపిరి సలపక అవస్థలు ఉక్కిరిబిక్కిరి అవుతున్న రోగులు

● రంగబయలులో విషాదం ముంచంగిపుట్టు: మండలంలోని అత్యంత మారుమూల ప్రాంతమైన రంగబయలు పంచాయతీలో ప్రకృతి ప్రకోపానికి ఒక గిరిజనుడు ప్రాణాలు కోల్పోయాడు. ఈ విషాదకర సంఘటన ఆలస్యంగా వెలుగులోకి వచ్చింది. రంగబయలు గ్రామానికి చెందిన సీసా గాసి (68) అనే గిరిజన రైతు శుక్రవారం సాయంత్రం తన పొలంలో పనులు చేసుకుంటుండగా, ఒక్కసారిగా ఈదురుగాలులతో కూడిన భారీ వర్షం మొదలైంది. వర్షం నుంచి రక్షణ పొందేందుకు ఆయన సమీపంలోని ఒక చెట్టు నీడకు వెళ్లారు. దురదృష్టవశాత్తూ అదే సమయంలో ఆ చెట్టుపై పిడుగు పడటంతో, గాసి తీవ్రంగా గాయపడి అక్కడికక్కడే స్పృహ తప్పి పడిపోయారు. ఆ దారి వెంబడి వెళ్తున్న స్థానికులు గమనించి ఆయనను గ్రామానికి తరలించే ప్రయత్నం చేసినప్పటికీ, అప్పటికే ఆయన ప్రాణాలు విడిచారు. కష్టపడి పనిచేసే వయసు మళ్లిన రైతు ఇలా అకాల మరణం చెందడం గ్రామంలో తీవ్ర విషాదాన్ని నింపింది. ఈ విషయం తెలుసుకున్న వైస్‌ ఎంపీపీ భాగ్యవతి, సర్పంచ్‌ దనియా, మండల వైఎస్సార్‌సీపీ నేతలు దేవా, బలరాజు శనివారం రంగబయలు గ్రామాన్ని సందర్శించారు. గాసి మృతదేహానికి పూలమాలలు వేసి నివాళులర్పించారు. మృతుడి కుటుంబ సభ్యులను పరామర్శించి, వారికి తమ ప్రగాఢ సానుభూతిని తెలియజేశారు. అనంతరం గ్రామస్తుల సమక్షంలో అంత్యక్రియలు పూర్తి చేశారు.

పాడేరు రూరల్‌: జిల్లా కేంద్రమైన పాడేరు పట్టణంలో శనివారం అక్రమ దుకాణాల తొలగింపు ప్రక్రియ ఉద్రిక్తతకు దారితీసింది. ముందస్తు సమాచారం ప్రకారమే తాము దుకాణాలను తొలగిస్తున్నామని పాడేరు మేజర్‌ పంచాయతీ ప్రత్యేక అధికారి రమేష్‌ స్పష్టం చేశారు. సిబ్బంది, వ్యాపారుల మధ్య వాగ్వాదం తొలగింపు చర్యలను చిరు వ్యాపారులు అడ్డుకోవడంతో పంచాయతీ, రెవెన్యూ సిబ్బంది, వ్యాపారులకు మధ్య తీవ్ర వాగ్వాదం చోటుచేసుకుంది. పరిస్థితి ఉద్రిక్తంగా మారడంతో పోలీసులు రంగప్రవేశం చేసి ఇరువర్గాలను శాంతింపజేశారు. దీంతో గొడవ సద్దుమణిగింది. ఈ సందర్భంగా ఈవో మాట్లాడుతూ పట్టణంలోని పీఎంఆర్‌సీ జంక్షన్‌ నుంచి రేకుల కాలనీ వరకు రహదారికి ఇరువైపులా ఉన్న అక్రమ దుకాణాలను పోలీసుల సహాయంతో తొలగించామని తెలిపారు. అలాగే తలారిసింగి అగ్నిమాపక కేంద్రం (ఫైర్‌ స్టేషన్‌) నుంచి ఆర్టీసీ కాంప్లెక్స్‌ మీదుగా పాత బస్టాప్‌ వరకు ప్రధాన రహదారికి ఇరువైపులా ఉన్న ఆక్రమణలను పూర్తిగా తొలగిస్తామన్నారు. పాడేరు జిల్లా కేంద్రం కావడంతో రోజురోజుకు వాహనాల తాకిడి, ప్రజల రద్దీ పెరుగుతోందన్నారు. ప్రభుత్వ ఆదేశాల మేరకు ఫుట్‌పాత్‌ ఆక్రమణలను తొలగిస్తున్నామని, ఎవరైనా అడ్డుకుంటే పోలీస్‌ కేసులు తప్పవని హెచ్చరించారు. పట్టణ సుందరీకరణ, ట్రాఫిక్‌ నియంత్రణ కోసం అన్ని వర్గాల ప్రజలు, ప్రజాప్రతినిధులు, వ్యాపార నిర్వాహకులు సహకరించాలని కోరారు. ఈ కార్యక్రమంలో రెవెన్యూ, పంచాయతీ సిబ్బంది శేషగిరిరావు, చిన్ని, రాంనాయుడు తదితరులు పాల్గొన్నారు. అడ్డుకున్న వ్యాపారులు ముందస్తు సమాచారంతోనే చర్యలు.. ఈవో రమేష్‌ పోలీసుల రంగ ప్రవేశంతోసద్దు మణిగిన వివాదం

ప్రమాదవివరాలు తెలుసుకుంటున్న ఎస్‌ఐ సన్నిబాబు, (ఇన్‌సెట్‌) రామ్మూర్తి మృతదేహం నక్కపల్లి: జాతీయరహదారిపై వెదుళ్లపాలెం జంక్షన్‌ వద్ద శుక్రవారం అర్ధరాత్రి జరిగిన రోడ్డుప్రమాదంంలో ఒక వ్యక్తి మరణించగా మరో ఐదుగురు తీవ్రంగా గాయపడ్డారు. ఎస్‌ఐ సన్నిబాబు తెలిపిన వివరాలు ఇలా ఉన్నాయి. విజయనగరం జిల్లా గంట్యాడ మండలం గింజేరి గ్రామానికి చెందిన సుమారు 10 మంది వ్యాన్‌లో ఒంగోలు వెళ్లారు.అక్కడ ఫంక్షన్‌ చూసుకుని తిరుగు ప్రయాణమయ్యారు. వీరు ప్రయాణిస్తున్న వ్యాన్‌ నక్కపల్లి సమీపంలో వెదుళ్లపాలెం జంక్షన్‌ వద్ద రోడ్డుపక్కన పార్క్‌చేసిన ఉన్న లారీని వెనుకనుంచి ఢీకొంది. ఈఘటనలో వ్యాన్‌లో డ్రైవర్‌ పక్కన కూర్చొన్న రాజాన రామ్మూర్తి(60) తీవ్రగాయాలతో అక్కడికక్కడే మరణించాడు.వ్యాన్‌లో ఉన్న ఐదుగురు తీవ్రంగా గాయపడ్డారు. వీరిలోవిజయనగరం జిల్లా ఎస్‌.కోట మండలం కొట్టాంకు చెందిన దండుపాటి శాంతి, ఇదే మండలం చామలపల్లిగ్రామానికి చెందిన జుత్తాడ దేవి,కొత్తవలస మండలం ముమ్మలోడుపాలెంకు చెందిన మంతిన దుర్గమ్మ, చామలపల్లి గ్రామానికి చెందిన రాపర్తి రామలక్ష్మి,గింజేరి గ్రామానికి చెందిన నానిపల్లి లక్ష్మి ఉన్నారు. వీరికి నక్కపల్లి ఆస్పత్రిలో ప్రాథమిక చికిత్స అందించి విశాఖ కేజీహెచ్‌కు తరలించినట్లు ఎస్‌ఐ తెలిపారు.

మద్దిలపాలెం: గజల్‌ విద్వాంసుడు డాక్టర్‌ గజల్‌ శ్రీనివాస్‌ తన గానంతో విశాఖ వాసులను ఉర్రూతలూ గించారు. విశాఖ మ్యూజిక్‌ అండ్‌ డ్యాన్స్‌ అకాడమీ ఆధ్వర్యంలో శనివారం మద్దిలపాలెం కళాభారతి ఆడిటోరియంలో గజల్‌ శ్రీనివాస్‌ను గజల్‌ కళాభారతి పురస్కారంతో కళాభారతి ట్రస్ట్‌ ప్రతినిధులు ఎం.ఎస్‌.ఎన్‌.రాజు, గుమ్మూలూరి రాంబాబు, పైడా కృష్ణప్రసాద్‌ సత్కరించారు. వైస్‌ అడ్మిరల్‌ కె.శ్రీనివాస్‌, స్పిరిట్యుయల్‌ గురు మౌలానా అమిర్‌ ఉద్దీన్‌ మలక్‌ సాహెబ్‌, స్థానిక వస్త్ర వ్యాపార అధిపతి శ్రీ మల్లిక్‌, అధ్యక్ష, కార్యదర్శులు రూ.20 వేలు నగదు బహుమతులను అందజేశారు. ఈ సందర్భంగా కళాభారతి ట్రస్ట్‌ కార్యదర్శి రాంబాబు మాట్లాడుతూ మూడు సార్లు గిన్నిస్‌బుక్‌ ప్రపంచ రికార్డు అందుకుని, 150 భాషల్లో గజల్స్‌ పాడుతూ, అనేక దేశాల్లో గజల్‌ కార్యక్రమాలు చేస్తూ అందరి మన్ననలు పొందిన తెలుగు తేజం డాక్టర్‌ గజల్‌ శ్రీనివాస్‌ అని కొనియాడారు. గజల్‌ శ్రీనివాస్‌ మాట్లాడుతూ ఇప్పటికే తనకు కొన్ని వందల బిరుదు సత్కారాలు జరిగాయన్నారు. కళలకు నిలయమైన కళాభారతి పేరుతో గజల్‌ కళాభారతి అనే సత్కారం మొదటిసారి అందుకోవడం చాలా ఆనందంగా ఉందన్నారు. అనంతరం జరిగిన గజల్‌ గాత్ర కచేరీలో ఆయన పలు గజల్స్‌ పాడి శ్రోతలను మైమరపించారు. భారతం, భాగవతం, రామాయణం, వంటి పుణ్య గ్రంథాల నుంచి క్లుప్తంగా గానం చేసి ఆధ్యాత్మికత భావాన్ని కల్పించారు.

నర్సీపట్నం: జాతరలో దళితుడిని కొట్టిన స్పీకర్‌ అయ్యన్నపాత్రుడు బహిరంగ క్షమాపణ చెప్పాలని విదసం విస్తృత దళిత సంఘాల ఐక్యవేదిక రాష్ట్ర కన్వీనర్‌ డాక్టర్‌ బూసి వెంకటరావు డిమాండ్‌ చేశారు. పండగలో డప్పు కొట్టడానికి వచ్చిన దళితుడిని స్పీకర్‌ చెంప పగల గొట్టడాన్ని నిరసిస్తూ ఐక్య వేదిక ఆధ్వర్యంలో శనివారం నర్సీపట్నం అబిద్‌ సెంటర్‌లోని డాక్టర్‌ బి.ఆర్‌.అంబేడ్కర్‌ వద్ద ప్లకార్డులతో నిరసన తెలియజేశారు. ఈ సందర్భంగా ఆయన మాట్లాడుతూ వేల మంది సమక్షంలో దళితుడిని బహిరంగంగా కొట్టడం స్పీకర్‌ అహంకారానికి నిదర్శనమన్నారు. పండగలో ప్రజలంతా సంతోషంతో ఉంటే, దళితులను లక్ష్యంగా చేసుకుని దాడికి దిగడం అమానుషమన్నారు. తప్పును సరిదిద్దుకోకుండా బాధితుడిని బెదిరించి రాజకీయ ప్రకటన ఇప్పించడం ఆయన దిగజారుడుతనానికి నిదర్శనమన్నారు. తమకు రాజకీయాలు అనవసరమని, తప్పు ఎవరు చేసినా చట్టం ముందు అందరూ సమానమే అన్నారు. నేతల నాగేశ్వరరావు మాట్లాడుతూ అయ్యన్నపాత్రుడుకు దళితులను అవమానించటం పరిపాటిగా మారిందన్నారు. పదవి ఉంటే నేల మీద నిలబడు అన్నారు. మట్ల అప్పారావు అధ్యక్షతన జరిగిన ఈ కార్యక్రమంలో విదసం నాయకులు లావణ్య, గోడి వెంకటేశ్వరరావు, అల్లంపల్లి ఈశ్వరరావు, ఈరెల్లి సుదీర్‌కుమార్‌, చెక్క రాంబాబు, తాతబాబు తదితరులు పాల్గొన్నారు. స్పీకర్‌ దళితుడిని కొట్టడం అమానుషం: కె.వి.పి.ఎస్‌ నర్సీపట్నం: అమ్మవారి జాతరలో డప్పు కొట్టడానికి వచ్చిన దళితుడిని స్పీకర్‌ అయ్యన్నపాత్రుడు కొట్టడం అమానుషమని కె.వి.పి.ఎస్‌. నాయకులు పేర్కొన్నారు. రాజ్యాంగ పదవిలో ఉన్న స్పీకర్‌ ఈ విధంగా దాడి చేయటం దారుణమన్నారు. స్పీకర్‌ వంటి వ్యక్తుల వల్లే దళితులపై దాడులు నానాటికీ పెరుగుపోతున్నాయన్నారు. తక్షణమే స్పీకర్‌ అయ్యన్న బహిరంగ క్షమాపణ చెప్పాలని డిమాండ్‌ చేశారు.

నర్సీపట్నం: పట్టణంలోని లాడ్జీలో కర్ణాటక వ్యక్తి తీవ్ర గాయాల పాల య్యాడు. అతడితోపాటు వచ్చిన వారు బి.ఎన్‌.సాగర్‌ పేరు మీద లాడ్జిలో రూమ్‌ తీసుకున్నారు. రెండు రోజులుగా నలుగురు కలిసి ఉంటున్నారు. శనివారం రాత్రి రూమ్‌లో బీరు సీసాలు పడి ఉన్నాయి. వారిలో ఒకరిపై దాడి జరిగింది. దాడికి గురైన వ్యక్తి అపసార్మక స్థితిలో పడి ఉన్నాడు. లాడ్జీ సిబ్బంది పోలీసులకు సమాచారం ఇచ్చారు. క్షతగాత్రుడితో దిగిన బి.ఎన్‌.సాగర్‌, మరో ఇద్దరు రూమ్‌ నుంచి పరారయ్యారు. తీవ్ర గాయాలతో ఉన్న వ్యక్తిని పోలీసులు సమీపంలోని ఏరియా ఆస్పత్రికి తరలించారు. కేసు దర్యాప్తు చేస్తున్నామని ఏఎస్సై కృష్ణమూర్తి తెలిపారు.

బయ్యవరం వద్ద పాదయాత్ర ముగించి ధ్యానం చేస్తూ విశ్రమిస్తున్న దిగంబర జైన ముని ఆచార్య ప్రముఖ్‌ సాగర్‌ జి మహారాజ్‌ కశింకోట: సకల జీవుల పట్ల ప్రేమ, గౌరవం,కరుణ కలిగి ఉండాలని దిగంబరజైన ముని ఆచార్య ప్రముఖ్‌ సాగర్‌జి మహారాజ్‌ ఉద్బోధించారు. మండలంలోని బయ్యవరం గ్రామానికి దిగంబర జైన మునులైన సాగర్‌జి మహారాజ్‌ సహా ప్రభాకర్‌ సాగర్‌ చేపట్టిన మంగళ అహింస పాద యాత్ర శనివారం సాయంత్రం చేరింది. ఈ సందర్భంగా మాట్లాడుతూ సకల జీవుల పట్ల ప్రేమ, గౌరవం,కరుణ కలిగి ఉండాలనే సందేశాన్ని బోధించడానికి దేశ వ్యాప్తంగా పాదయాత్రలు చేస్తున్నామన్నారు. గత ఏడాది నవంబర్‌ 30న కోల్‌కత్తా నుంచి చేపట్టిన పాద యాత్ర కర్నాటకలోని బెంగళూరుకు వచ్చే జులై వరకు సాగనుందన్నారు. ప్రతి రోజు సుమారు 25 కిలో మీటర్లు యాత్ర చేస్తున్నట్టు చెప్పారు.

ఆరిలోవ: దళిత డప్పు కళాకారుడు నాగులాపల్లి రాందాస్‌పై దాడి చేసిన స్పీకర్‌ అయ్యన్నపాత్రుడుపై ఎస్సీ ఎస్టీ అట్రాసిటీ కేసు పెట్టి అరెస్ట్‌ చేయాలని వైఎస్సార్‌ సీపీ ఎస్సీ సెల్‌ విభాగం రాష్ట్ర అధికార ప్రతినిధి, అనకాపల్లి జిల్లా ఎస్సీ విభాగం పరిశీలకుడు అల్లంపల్లి రాజుబాబు డిమాండ్‌ చేశారు. పోలీసులు సుమోటోగా తీసుకుని కేసు నమోదు చేయాలన్నారు. మద్దిలపాలెంలో పార్టీ కార్యాలయంలో ఆయన మాట్లాడారు. చంద్రబాబు ప్రభుత్వంలో దళితులపై దాడులు, హత్యలు ఎక్కువయ్యాయని మండిపడ్డారు. నిన్న స్పీకర్‌ అయ్యన్నపాత్రుడు నర్సీపట్నంలో మరిడిమాండ జాతరలో దళిత డప్పుకళాకారుడి చెంపపై కొట్టారు..మొన్న డిప్యూటీ స్పీకర్‌ రఘురామకృష్ణంరాజు ఆకివీడులో దళిత పేటలో శ్రీరామనవమి వేడుకలో 300 మంది కిరాయి రౌడీలతో దళితలపై దాడులు చేయించి, వీరిలో 57 మంది దళిత యువకులపై హత్యాయత్న కేసులను బనాయించారన్నారు. ఇద్దరూ గౌరవమైన రాజ్యాంగబద్ధమైన పదవుల్లో ఉండి దళితలపై దాడులకు పాల్పడడం హేయమన్నారు. ఇటీవల దళితుడైన మంద సాల్మాన్‌ హత్య చేశారని, రైల్వే కోడూరు జనసేన ఎమ్మెల్యే అరవ శ్రీధర్‌ బాధితురాలు, దళిత మహిళపై సదరు ఎమ్మెల్యే అనుచరుడు నడిరోడ్డుపై దాడికి పాల్పడ్డాడని వాపోయారు. ప్రభుత్వం తీరు మారకుంటే వచ్చే ఎన్నికల్లో దళితులంతా తగిన బుద్ధి చెప్పడం ఖాయమని హెచ్చరించారు.

చోడవరం: వైఎస్సార్‌సీపీ హయాంలోనే అన్ని గ్రామాలు అభివృద్ధి చెందాయని మాజీ మంత్రి గుడివాడ అమర్‌నాథ్‌ తెలిపారు. పంచాయతీ సర్పంచ్‌ల పదవీ ముగిసిన నేపథ్యంలో వైఎస్సార్‌సీపీ నుంచి ప్రాతినిధ్యం వహిస్తున్న నియోజకవర్గంలోని 91 మంది సర్పంచ్‌లను శనివారం ఘనంగా సత్కరించారు. చోడవరంలో జరిగిన సన్మాన సభలో చోడవరం, బుచ్చెయ్యపేట, రావికమతం, రోలుగుంట మండలాల నుంచి వివిధ గ్రామాల సర్పంచ్‌లు, మండల నాయకులు పెద్ద సంఖ్యలో పాల్గొన్నారు. ఈ సందర్భంగా అమర్‌నాథ్‌ మాట్లాడుతూ గాంధీజీ కలలు గన్న గ్రామ స్వరాజ్యం వైఎస్సార్‌సీపీ హయాంలో అప్పటి ముఖ్యమంత్రి జగన్‌మోహన్‌రెడ్డి నెరవేర్చారన్నారు. పంచాయతీలను బలోపేతం చేస్తూ గ్రామ సచివాలయ వ్యవస్థను తెచ్చారన్నారు. అన్ని శాఖల సచివాలయ ఉద్యోగులు సర్పంచ్‌ల పర్యవేక్షణలో పనిచేసే మహోన్నత విధానాన్ని తెచ్చారన్నారు. సచివాలయ వ్యవస్థలో వలంటీర్లను తెచ్చి సంక్షేమ పథకాలన్నీ నేరుగా ప్రజల ఇంటి వద్దకే అందించేలా చేశారని కొనియాడారు. ప్రభుత్వ కార్యాలయాల చుట్టూ ప్రజలు తిరగకుండా ప్రతీ పని వలంటీర్ల ద్వారా సచివాలయంలోనే జరిగేలా ఒక కొత్త వ్యవస్థను తెచ్చి దేశ చరిత్రలో రికార్డు సృష్టించిన ఘనత జగన్‌మోహన్‌రెడ్డిదే అన్నారు. ప్రతీ పంచాయతీలో రూ. 2.5 కోట్లతో పంచాయతీ భవనాలు, సచివాలయం, కమ్యూనిటీ ఆస్పత్రి, రైతు భరోసా కేంద్రం కట్టించి, ఆయా కార్యాయాల్లోనే పూర్తి స్థాయిలో ప్రజలు సేవలు అందించారన్నారు. పార్టీ జిల్లా అధ్యక్షుడు బొడ్డేడ ప్రసాద్‌ మాట్లాడుతూ ఐదేళ్లపాటు గ్రామ స్థాయిలో ప్రజలకు ఎంతో సేవలు అందించిన సర్పంచ్‌లకు అభినందనలు తెలిపారు. కార్యక్రమంలో వైఎస్సార్‌సీపీ అనకాపల్లి పార్లమెంటు పరిశీలకురాలు శోభా హైమావతి, చోడవరం నియోజకవర్గ పరిశీలకుడు గండి రవికుమార్‌, రాష్ట్ర కార్యదర్శి ఏడువాక సత్యారావు, సంయుక్త కార్యదర్శి దొండ రాంబాబు, జెడ్పీటీసీ పోతల శ్రీనివాసరావు, సర్పంచ్‌ల సంఘం అధ్యక్షుడు నాగులాపల్లి రాంబాబు, ఎంపీపీలు గాడి కాసు, పైల రాజు, యర్రంశెట్టి శ్రీనివాసరావు, వైస్‌ ఎంపీపీలు బైన ఈశ్వరరావు, దొండా నారాయణమూర్తి, శరగడం నాగేశ్వరరావు, తదితరులు పాల్గొన్నారు.

పరుగు పోటీలో పాల్గొన్న పోలీస్‌ అధికారులు ఆరిలోవ(విశాఖ తూర్పు): అనకాపల్లి జిల్లా పోలీస్‌ శాఖ ఆధ్వర్యంలో విశాఖపట్నంలోని విశాలాక్షినగర్‌ ఆర్మ్‌డ్‌ రిర్వ్‌డ్‌ పోలీస్‌ మైదానంలో శనివారం పోలీస్‌ వార్షిక స్పోర్ట్స్‌ అండ్‌ గేమ్స్‌ మీట్‌ సంబరాలు ఘనంగా ప్రారంభమయ్యాయి. ముఖ్య అతిథి అనకాపల్లి జిల్లా ఎస్పీ తుహిన్‌ సిన్హా సంబరాలను ప్రారంభించారు. ఈ సందర్భంగా ఎస్పీ మాట్లాడుతూ ఇలాంటి క్రీడా పోటీలు పోలీస్‌ విభాగంలో ఐపీఎస్‌ స్థాయి నుంచి కానిస్టేబుల్‌ వరకు ఒకే వేదికపైకి తీసుకువస్తుందని తెలిపారు. తోటి సిబ్బందితో పరిచయాలు పెంచుకొని సత్సంబంధాలు ఏర్పాటు చేసుకోవడానికి దోహదపడతాయన్నారు. ఆయా పోటీల్లో అనకాపల్లి, పరవాడ, నర్సీపట్నం, సబ్‌ డివిజన్లతోపాటు ఆర్మ్‌డ్‌ రిజర్వ్‌డ్‌ విభాగానికి చెందిన పోలీస్‌ అధికారులు, సిబ్బంది ఉత్సాహంగా పాల్గొని ప్రతిభ చూపారు. కార్యక్రమంలో అదనపు ఎస్పీలు, సీఐలు, ఎస్‌ఐలు, సిబ్బంది పాల్గొన్నారు.

దేవరాపల్లి: స్థానిక ప్రాథమిక ఆరోగ్య కేంద్రం పరిధిలోని గరిశింగి సచివాలయంలో ఏఎన్‌ఎంగా విధులు నిర్వర్తిస్తున్న జి.రాజ్యలక్ష్మి పాడేరులో శుక్రవారం ఆత్మహత్యకు యత్నించిన ఘటనపై జిల్లా వ్యాధి నిరోధక టీకాల అధికారి (డీఐవో) చంద్రశేఖర్‌దేవ్‌ స్థానిక పీహెచ్‌సీలో శనివారం విచారణ జరిపారు. పీహెచ్‌సీ వైద్యాధికార్లు ఈ.పూజ్యమేఘన, డి.వనజల నుంచి ఆయన వివరాలను సేకరించారు. స్థానిక పీహెచ్‌సీ హెల్త్‌ సూపర్‌వైజర్‌ పుష్పరాజ్‌ వేధింపులకు గురి చేయడంతోనే తీవ్ర మనస్తాపంతో ఆత్మహత్యకు యత్నించినట్లు తెలిసింది. హెల్త్‌ సూపర్‌వైజర్‌ వేధింపులపై ఇటీవల స్థానిక ఎంపీడీవోకు సైతం ఏఎన్‌ఎం రాజ్యలక్ష్మి ఫిర్యాదు చేసినట్లు స్థానిక పీహెచ్‌సీ వైద్యులు తెలిపారు. ఆమె ఫిర్యాదు మేరకు సూపర్‌వైజర్‌ను అదే రోజు మరో సబ్‌సెంటర్‌కు తాత్కాలింగా మార్పు చేశామని స్థానిక పీహెచ్‌సీ వైద్యాధికారి పూజ్యమేఘన తెలిపారు. ఆరోపణలు ఎదుర్కొంటున్న హెల్త్‌ సూపర్‌వైజర్‌ పుష్పరాజ్‌ను సైతం ప్రశ్నించారు. ఆత్మహత్యకు యత్నించిన రాజ్యలక్ష్మి ఆరోగ్య పరిస్థితిని పాడేరు వైద్యులు, బంధువులను అడిగి తెలుసుకుంటున్నామని డీఐవో చంద్రశేఖర్‌దేవ్‌ తెలిపారు. ఆమె ఆరోగ్యం పూర్తిగా కుదుటపడిన అనంతరం పూర్తి స్థాయిలో విచారణ చేపడతామన్నారు. కాగా ఎనిమిది నెలలు క్రితం ఆమె బదిలీపై దేవరాపల్లి పీహెచ్‌సీకి వచ్చారు.

సాక్షి, అల్లూరి జిల్లా: అల్లూరి సీతారామరాజు జిల్లాలో భూ ప్రకంపనలు చోటుచేసుకున్నాయి. ముంచంగిపుట్టు, అరకు లోయ, పాడేరు, హుకుంపేట సహా పలు ప్రాంతాల్లో భూప్రకంపనలు సంభవించాయి. కొన్ని సెకన్ల పాటు భూమి కంపించింది. దీంతో ప్రజలు భయంతో ఇళ్ల నుంచి పరుగులు తీశారు. ఇళ్లలోని సామాన్లు చెల్లాచెదరయ్యా­యి. ఇంతకుముందెన్నడూ ఈ ప్రాంతంలో భూమి కంపించలేదని స్థానికులు తెలిపారు.జోలాపుట్టు, సుజనకోట ప్రాంతాల్లో కూడా భూమి కంపించినట్టు ఆ ప్రాంతాలకు చెందిన వారు తెలిపారు. శనివారం రాత్రి సుమారు 11:33 గంటల సమయంలో అల్లూరి జిల్లాలోని పలు ప్రాంతాల్లో 30 సెకండ్ల పాటు స్వల్ప భూప్రకంపనలు సంభవించినట్లు చెబుతున్నారు. రిక్టర్‌స్కేల్‌పై భూకంప తీవ్రత 4.4గా నమోదైంది. ఒడిశా సరిహద్దులోనూ భూమి కంపించింది. ఒడిశాలోని కోరాపుట్‌ ప్రాంతంలో భూకంప కేంద్రాన్ని అధికారులు గుర్తించారు.గూడూరులో 41.2 డిగ్రీల ఉష్ణోగ్రతశ్రీపొట్టి శ్రీరాములు నెల్లూరు జిల్లా గూడూరులో శనివారం 41.2 డిగ్రీల ఉష్ణోగ్రత నమోదైంది. తిరుపతి జిల్లా రేణిగుంటలో 41.1 డిగ్రీలు, కృష్ణా జిల్లా పెదపారుపూడిలో 40.9, చిత్తూరు జిల్లా నగరిలో 40.4, పార్వతీపురం జిల్లా వీరఘట్టంలో 40.3, విజయనగరం జిల్లా గుర్లలో 40.1, పల్నాడు జిల్లా గురజాల 39.8, నంద్యాల జిల్లా గుల్లదుర్తి, కర్నూలు జిల్లా తోవిలో 39.7 డిగ్రీల చొప్పున గరిష్ట ఉష్ణోగ్రతలు నమోదయ్యాయి.ఆదివారం 17 మండలాల్లో తీవ్ర వడగాలులు, 32 మండలాల్లో వడగాలులు వీచే అవకాశం ఉందని విపత్తుల నిర్వహణ సంస్థ తెలిపింది. శ్రీకాకుళం జిల్లా ఆముదాలవలస, బుర్జ, హిర మండలం, జలుమూరు, లక్ష్మీనర్సంపేట, పాతపట్నం, సారవకోట, సరుబుజ్జిలి మండలాలు, విజయనగరం జిల్లా గుర్ల, సంతకవిటి మండలాలు, పార్వతీపురం మన్యం జిల్లా పాలకొండ, సీతంపేట మండలాలు..పోలవరం జిల్లా గంగవరం, కూనవరం మండలాలు, తూర్పుగోదావరి జిల్లా గోకవరం మండలాల్లో తీవ్ర వడగాలులు వీచే అవకాశం ఉందని పేర్కొంది. మరోవైపు దక్షిణ కోస్తాంధ్ర, దాని పరిసర ప్రాంతాలపై ఉపరితల ఆవర్తనం విస్తరించి ఉండడంతో సోమవారం నుంచి 3 రోజులపాటు ఉత్తరాంధ్ర, కోస్తాంధ్రలో పలుచోట్ల పిడుగులతో కూడిన వర్షాలు కురిసే అవకాశం ఉందని వాతావరణ శాఖ తెలిపింది.

మంటలను అదుపులోకి తెస్తున్న అగ్నిమాపక సిబ్బంది నాతవరం: గుర్తుతెలియని వ్యక్తులు నిప్పు పెట్టడంతో మండలంలోని ఎం.బి.పట్నంలో గడ్డివాము, పశువుల పాకలు దగ్ధమయ్యాయి. గ్రామానికి చెందిన వి.రాజుబాబు తన పొలంలో పశువుల మకాం వద్ద గడ్డి వాము, పాకలు వేసుకున్నాడు. శుక్రవారం గుర్తు తెలియని వ్యక్తులు నిప్పుపెట్టడంతో మంటలు చెలరేగాయి. సమాచారం అందుకున్న నర్సీపట్నం అగ్నిమాపక కేంద్రం ఎస్‌ఐ అప్పలస్వామి, సిబ్బంది హుటాహుటిన వచ్చి మంటలను అదుపు చేశారు. గడ్డి వాము, పశువుల పాకలు దగ్ధమవడంతో రూ. 50 వేలకు పైగా ఆస్తి నష్టం జరిగినట్టు అంచనా.

ఐఎన్‌ఎస్‌ తారాగిరి, అరిధామన్‌లను జాతికి అంకితం చేసిన రక్షణ మంత్రి తారాగిరి వార్‌షిప్‌ని జాతికి అంకితం చేస్తున్న రక్షణమంత్రి రాజ్‌నాథ్‌సింగ్‌ మహారాణిపేట(విశాఖ): విశాఖలో కేంద్ర రక్షణ మంత్రి రాజ్‌నాథ్‌ సింగ్‌ పర్యటన సందర్భంగా భారత నౌకాదళానికి చెందిన కీలక ప్రాజెక్టులు ముందుకు సాగాయి. ప్రాజెక్ట్‌–17ఏలో భాగమైన అత్యాధునిక యుద్ధనౌక ఐఎన్‌ఎస్‌ తారాగిరిని జాతికి అంకితం చేశారు. 75 శాతం పైగా స్వదేశీ సాంకేతికతతో నిర్మితమైన ఈ నౌక దేశ సముద్ర భద్రతను బలోపేతం చేయడంలో కీలకంగా నిలుస్తుందని పేర్కొన్నారు. అదే సమయంలో అత్యంత రహస్యంగా విశాఖ షిప్‌బిల్డింగ్‌ సెంటర్‌లో అణు శక్తితో నడిచే జలాంతర్గామి అరిధామన్‌ను కూడా నౌకాదళానికి సమర్పించారు. అరిహంత్‌ శ్రేణిలో మూడో ఈ సబ్‌మైరెన్‌ సుమారు 7,000 టన్నుల సామర్థ్యంతో, 80 శాతం స్వదేశీ సాంకేతికతతో నిర్మితమై, కే–4 క్షిపణులను మోసుకెళ్లగలదు. దీని ద్వారా భారతదేశం తన ‘న్యూక్లియర్‌ ట్రయాడ్‌’ సామర్థ్యాన్ని మరింత బలోపేతం చేసుకుంది. పర్యటనలో భాగంగా ఐఎన్‌ఎస్‌ డేగా వద్ద కేంద్ర మంత్రికి కలెక్టర్‌ ఎం.అభిషిక్త్‌ కిషోర్‌, సీపీ శంఖబ్రత బాగ్చి, కోస్ట్‌గార్డ్‌, నేవీ అధికారులు స్వాగతం పలికారు.

ప్రియుడు పెళ్లికి నిరాకరించడంతోనే దేవరాపల్లి: ఓ యువకుడు ప్రేమ పేరుతో నమ్మించి, పెళ్లికి నిరాకరించడంతోనే తీవ్ర మనస్తాపం చెందిన గిరిజన యువతి దూసరి లక్ష్మి (22) ఆత్మహత్య చేసుకుంది. దేవరాపల్లిలో గత నెల 30న అల్లూరి సీతారామరాజు జిల్లా అనంతగిరి మండలం పినకోట పంచాయతీ శివారు కొరపర్తికి చెందిన గిరిజన యువతి లక్ష్మి ఆత్మహత్య చేసుకున్న సంగతి విధితమే. ఈ కేసుకు సంబంధించిన వివరాలను స్థానిక పోలీస్‌ స్టేషన్‌లో శుక్రవారం సాయంత్రం సీఐ కె.కృష్ణ, స్థానిక ఎస్‌ఐ వి.సత్యనారాయణతో కలిసి అనకాపల్లి ఇన్‌చార్జి డీఎస్పీ ఈ.శ్రీనివాసులు తెలిపిన వివరాలిలా ఉన్నాయి. అనంతగిరి మండలం కొరపర్తి గ్రామానికి చెందిన దూసరి లక్ష్మి దేవరాపల్లిలోని ఓ ప్రైవేటు క్లినిక్‌లో ల్యాబ్‌ అసిస్టెంట్‌గా పనిచేస్తోంది. దేవరాపల్లికి చెందిన ట్రాక్టర్‌ డ్రైవర్‌ కొల్లి లోకేష్‌ (24)కు ఐదేళ్ల క్రితం లక్ష్మితో పరిచయం ఏర్పడింది. పరిచయం కాస్తా ప్రేమగా మారడంతో పెళ్లి చేసుకుంటానని నమ్మించి శారీరకంగా వాడుకున్నాడు. అయితే ఆమె పెళ్లి ప్రస్తావన తీసుకురాగా, నిందితుడు లోకేష్‌ మీది తక్కువ కులం అని, పెళ్లి చేసుకోవడం కుదరదని నిరాకరించాడు. ప్రియుడు నమ్మించి మోసగించడాన్ని తట్టుకోలేని లక్ష్మి తీవ్ర మనస్తాపంతో గత నెల 30న తాను నివాసం ఉంటున్న ఇంటిలో ఫ్యాన్‌కు ఉరి వేసుకుని ఆత్మహత్యకు పాల్పడింది. మృతురాలి తండ్రి దూసరి పెంటయ్య ఫిర్యాదు మేరకు కేసు నమోదు చేసిన పోలీసులు అన్ని కోణాల్లో దర్యాప్తు ప్రారంభించారు. ఈ నేపథ్యంలోనే గిరిజన యువతిని వంచించి ఆత్మహత్యకు కారకుడైన లోకేష్‌ను రైవాడ జలాశయం సమీపంలో శుక్రవారం అదుపులోకి తీసుకున్నారు. నిందితుడు లోకేష్‌పై ఎస్సీఎస్టీ అట్రాసిటీ, ఆత్మహత్యకు ప్రేరేపించడం, పెళ్లి చేసుకుంటానని మోసగించడానికి సబంధించిన పలు సెక్షన్ల కింద కేసు నమోదు చేసి అరెస్టు చేశామని ఇన్‌చార్జి డీఎస్పీ చెప్పారు . నిందితుడిని కోర్టులో హాజరుపరచనున్నట్టు ఆయన తెలిపారు.

ఏయూక్యాంపస్‌: విశాఖపట్నం చాంబర్‌ ఆఫ్‌ కామర్స్‌ అండ్‌ ఇండస్ట్రీ(వీసీసీఐ) ఆధ్వర్యంలో శుక్రవారం బీచ్‌ రోడ్డులోని ఒక హోటల్‌లో స్పీకర్‌ మీట్‌ కార్యక్రమం నిర్వహించారు. గూగుల్‌ ఇండియా కస్టమర్‌ ఎంగేజ్‌మెంట్‌ విభాగాధిపతి మైత్రేయి గణపతి కీలకోపన్యాసం అందించారు. ఈ సందర్భంగా ఆమె మాట్లాడుతూ కస్టమర్‌ ఎంగేజ్‌మెంట్‌ను బలోపేతం చేయడం, కొత్త అవకాశాలను అందిపుచ్చుకోవడంలో ఏఐ టెక్నాలజీ పాత్రను వివరించారు. అభివృద్ధి చెందుతున్న డిజిట్‌ ప్రపంచంలో ఎంసెస్‌ఎంఈలు, పరిశ్రమల వాటాదారులకు ఎంతో ఉపయుక్తంగా ఈ ప్రసంగం నిలచింది. వీసీసీఐ అధ్యక్షుడు ఎం.సుదర్శన్‌ స్వామి ప్రారంభోపన్యాసం అందించారు. మ్యాపిల్‌ సాఫ్ట్‌వేర్‌ ప్రైవేట్‌ లిమిటెడ్‌ సీఈవో శివ్‌కుమార్‌ మాట్లాడుతూ సాంకేతికత స్వీకరించడం, ఆవిష్కరణలు, భవిష్యత్‌కు సిద్ధమైన వ్యాపార వ్యూహాలను వివరించారు. డబ్ల్యూఎన్‌ఎస్‌ ఉపాధ్యక్షుడు ఆర్‌.ఎల్‌.నారాయణ మోడరేటర్‌గా నిర్వహించిన రెండో సెషన్‌లో కృష్ణ మోహన్‌, నీరజ్‌ సార్ధా, కీర్తన ఆనంద్‌, రాజేష్‌ పూసర్ల, పవన్‌ తదితరులు వ్యాపార విస్తరణ వ్యవస్థలకు సంబంధించిన విభిన్న అంశాలపై తమ అభిప్రాయాలను వ్యక్తం చేస్తూ చర్చలో పాల్గొన్నారు. వీసీసీఐ కార్యదర్శి పి.రాజేష్‌ వందన సమర్పణ చేశారు.

అచ్యుతాపురం రూరల్‌: సెజ్‌ పరిసర ప్రాంతాల్లో కాపర్‌ వైరు చోరీ చేసిన ఓ వ్యక్తిని అచ్యుతాపురం పోలీసులు శుక్రవారం అరెస్టు చేశారు. ఈ ఏడాది జనవరి, మార్చి నెలల్లో సెజ్‌ పరిధిలో ఉన్న మెగా ఇంజినీరింగ్‌ కంపెనీలో రూ.1.50 లక్షల విలువైన వైరును గాజువాకలోని కణితి రోడ్డుకు చెందిన గడ్డిపాటి తిలక్‌ కుమార్‌ చోరీ చేసినట్టు పోలీసులు తెలిపారు. ఈ వైరును విక్రయించగా వచ్చిన నగదుతో ఓ కారు కొనుగోలు చేసినట్టు వారు చెప్పారు. ఆ కారులో దర్జాగా వచ్చి చోరీలకు పాల్పడుతున్నట్టు వారు తెలిపారు. ఇతనిపై ఇప్పటికే గాజువాక, శ్రీకాకుళం, విజయనగరం, అనకాపల్లి, విశాఖపట్నం పరిధిలో పలు పోలీసు స్టేషన్లలో చోరీ కేసులు నమోదైనట్టు ఎస్‌ఐ సుధాకర్‌ తెలిపారు.

కంచరపాలెం: గాజువాకలో గత నెల 29న దారుణ హత్యకు గురైన దళిత మహిళ పోలిపల్లి మౌనిక ఘటనపై ఉన్నత స్థాయి జ్యూడిషియల్‌ విచారణ జరపాలని పలు ప్రజా సంఘాల నేతలు డిమాండ్‌ చేశారు. శుక్రవారం తాటిచెట్లపాలెం సంజీవయ్య కాలనీ–1లో మహిళా, దళిత సంఘాలు, స్థానిక కాలనీ యూత్‌ ఆధ్వర్యంలో మీడియా సమావేశం నిర్వహించారు. ఈ సందర్భంగా ప్రగతిశీల మహిళా సంఘం రాష్ట్ర అధ్యక్షురాలు లక్ష్మి మాట్లాడుతూ.. మౌనికను అత్యంత కర్కశంగా హతమార్చిన నేవీ ఉద్యోగి రవీంద్ర పట్ల పోలీసులు వ్యవహరిస్తున్న తీరు అనేక అనుమానాలకు తావిస్తోందని మండిపడ్డారు. నిందితుడికి నేర చరిత్ర లేదని, మృతదేహాన్ని ఏం చేయాలో పాలుపోక లొంగిపోయాడని పోలీసులు చెప్పడం విడ్డూరంగా ఉందన్నారు. ఒకవైపు నిందితుడు కిటికీలోంచి వెళ్లి తలుపు తీశాడని చెబుతూనే, మరోవైపు పరస్పర విరుద్ధమైన స్టేట్‌మెంట్లు ఇవ్వడం వెనుక అసలు నిజాన్ని దాచే ప్రయత్నం జరుగుతోందని ఆరోపించారు. మృతురాలు దళిత సామాజిక వర్గానికి చెందిన మహిళ కావడమే ఈ నిర్లక్ష్యానికి కారణమని నేతలు ధ్వజమెత్తారు. పోలీసుల దర్యాప్తుపై తమకు నమ్మకం లేదని, వాస్తవాలు వెలుగులోకి రావాలంటే తక్షణమే జ్యూడిషియల్‌ విచారణ చేపట్టాలని డిమాండ్‌ చేశారు. కార్యక్రమంలో ఐద్వా జిల్లా నాయకురాలు అనురాధ, ఎన్‌ఎఫ్‌ఐడబ్ల్యూ ప్రతినిధి బేగం, సీఎమ్మెస్‌ నేత లలిత, చింతాడ సూర్యం, న్యాయవాదులు గిరిధర్‌, పద్మ, దళిత సంఘాల నాయకులు కొత్తపల్లి వెంకటరమణ, పీవోడబ్ల్యూ ప్రతినిధులు, స్థానిక యువత పెద్ద సంఖ్యలో పాల్గొన్నారు.మహిళ, దళిత ప్రజాసంఘాల నేతల డిమాండ్‌

హెడ్‌ నర్సుల పోస్టింగ్‌ల్లోసీఎంవోకు ఫిర్యాదు 13న కమిటీ విచారణ మహారాణిపేట: వైద్య ఆరోగ్యశాఖలో ఇటీవల జరిగిన హెడ్‌ నర్సుల పదోన్నతులు, పోస్టింగ్‌ల వ్యవహారం తీవ్ర దుమారం రేపుతోంది. ఈ ప్రక్రియలో భారీగా అక్రమాలు జరిగాయని, పెద్ద ఎత్తున ముడుపులు చేతులు మారాయని ఆరోపణలు వెల్లువెత్తుతున్నాయి. వైద్య ఆరోగ్యశాఖ ప్రాంతీయ డైరెక్టర్‌ డాక్టర్‌ రాధారాణి ఆధ్వర్యంలో ఇటీవల హెడ్‌ నర్సులకు పదోన్నతులు కల్పించి, పలు ఆస్పత్రుల్లో పోస్టింగ్‌లు జారీ చేశారు. అయితే ఈ పదోన్నతులు, పోస్టింగ్‌ల వెనుక లక్షలాది రూపాయల అవినీతి జరిగిందని విశాఖ సిటిజెన్‌ ఫోరం రాష్ట్ర ఆర్గనైజింగ్‌ సెక్రటరీ బీవీకే బాబ్జీ ముఖ్యమంత్రి చంద్రబాబునాయుడుకు లిఖితపూర్వకంగా ఫిర్యాదు చేశారు. పదోన్నతులు పొందిన పలువురు నర్సుల నుంచి భారీగా డబ్బులు వసూలు చేశారని ఆయన తన లేఖలో ఆరోపించారు. ముఖ్యమంత్రి కార్యాలయానికి అందిన ఈ ఫిర్యాదుపై స్పందించిన ఉన్నతాధికారులు, దీనిపై సమగ్ర విచారణ జరపాల్సిందిగా కలెక్టర్‌ను ఆదేశించారు. ఈ మేరకు కలెక్టర్‌ ఆ ఫిర్యాదును కేజీహెచ్‌ సూపరింటెండెంట్‌ డాక్టర్‌ ఐ. వాణికి పంపించారు. అయితే హెడ్‌ నర్సుల పదోన్నతుల వ్యవహారం తన పరిధిలోకి రాకపోవడంతో.. సూపరింటెండెంట్‌ ఆ లేఖను తిరిగి వైద్య ఆరోగ్యశాఖ రీజినల్‌ డైరెక్టర్‌కు బదిలీ చేశారు. దీనిపై స్పందించిన ఉన్నతాధికారులు.. వైద్య ఆరోగ్యశాఖ రీజినల్‌ ట్రైనింగ్‌ సెంటర్‌ (మేల్‌) ప్రిన్సిపాల్‌ డాక్టర్‌ మీనాక్షిని విచారణ అధికారిగా నియమించారు. ఈ నెల 13న ఈ వ్యవహారంపై డాక్టర్‌ మీనాక్షి పూర్తి స్థాయిలో విచారణ జరిపి ప్రభుత్వానికి నివేదిక సమర్పించనున్నారు. ఆ ముగ్గురే కీలకం.. ముఖ్యమంత్రికి అందిన ఫిర్యాదులో ఏపీ ప్రభుత్వ నర్సుల సంఘం నాయకులపై తీవ్రస్థాయిలో ఆరోపణలు ఉన్నాయి. నర్సుల సంఘం జిల్లా అధ్యక్షురాలు గంగాభవాని, కార్యదర్శి వరలక్ష్మి, ఈసీ సభ్యురాలు గౌరి.. పదోన్నతి పొందిన మొత్తం 30 మంది నర్సుల నుంచి భారీగా డబ్బులు వసూలు చేశారని ఫిర్యాదులో స్పష్టంగా పేర్కొన్నారు. ఈ నేపథ్యంలో సదరు 30 మంది నర్సులతో పాటు ఆరోపణలు ఎదుర్కొంటున్న ఈ ముగ్గురు నాయకురాళ్లను కూడా విచారణ అధికారి ప్రత్యేకంగా ప్రశ్నించనున్నారు. అంతేకాకుండా సంఘం అధ్యక్ష, కార్యదర్శులు తమ రోజువారీ విధులను సక్రమంగా నిర్వర్తించడం లేదని కూడా ఫిర్యాదులో ఆరోపించారు. వీరికి కేటాయించిన వార్డుల్లో డ్యూటీలు చేయకుండా, నిత్యం క్లాక్‌ రూమ్‌లోనే ఉంటూ అక్కడి నుంచే సెటిల్‌మెంట్లు చేస్తున్నారని విమర్శించారు. నర్సింగ్‌ సూపరింటెండెంట్‌ అండదండలతోనే.. మిగతా నర్సులందరికీ ఎప్పటికప్పుడు డ్యూటీలు మారుస్తున్నప్పటికీ, వీరు మాత్రం ఏళ్ల తరబడి ఒకే వార్డులో తిష్టవేశారని ఫిర్యాదులో ఆక్షేపించారు. నర్సింగ్‌ సూపరింటెండెంట్‌ పద్మావతి అండదండలతోనే వీరు ఇలా రెచ్చిపోతున్నారని, ఎవరికై నా తమకు అనుకూలమైన డ్యూటీలు లేదా మంచి పోస్టింగ్‌లు కావాలంటే వీరిని కలిసి అడిగినంత ఇచ్చుకుంటే.. పద్మావతిని మేనేజ్‌ చేసి డ్యూటీలు వేయిస్తున్నారని ఆరోపణలు ఉన్నాయి. కాగా ఈ ఆరోపణలపై ఏపీ ప్రభుత్వ నర్సుల సంఘం జిల్లా అధ్యక్ష, కార్యదర్శులు గంగాభవాని, వరలక్ష్మి స్పందిస్తూ.. తమకు సంబంధిత అధికారుల నుంచి ఇంకా ఎలాంటి నోటీసులు రాలేదని, విచారణ అధికారి కోరితే అన్ని వివరాలు అందజేయడానికి సిద్ధంగా ఉన్నామని తెలిపారు.

పెదగంట్యాడ: గాజువాక ప్రాంతానికి చెందిన ఇద్దరు మహిళా న్యాయవాదులు జూనియర్‌ సివిల్‌ జడ్జిలుగా ఎంపికై సరికొత్త చరిత్ర సృష్టించారు. పట్టుదల ఉంటే ఏ వయసులోనైనా విజయం సాధించవచ్చని ధర్మాల లలిత శ్రీ నిరూపించగా, యువ న్యాయవాది కొట్టాన బిందు తొలి అడుగుల్లోనే అత్యున్నత శిఖరాన్ని అధిరోహించారు. వివాహమైన 15 ఏళ్ల తర్వాత జడ్జిగా లలిత శ్రీ ధర్మాల లలిత శ్రీ ప్రస్థానం ఎందరికో స్ఫూర్తిదాయకం. వివాహమైన 15 ఏళ్ల తర్వాత ఆమె ఉన్నత చదువులపై దృష్టి సారించారు. ముందుగా పీజీ పూర్తి చేసి, ఆపై ఎల్‌ఎల్‌బీ పట్టా పొందారు. న్యాయవాదిగా ప్రాక్టీస్‌ చేస్తూనే సివిల్‌ జడ్జి పరీక్షలకు సిద్ధమయ్యారు. కేవలం రెండో ప్రయత్నంలోనే జూనియర్‌ సివిల్‌ జడ్జిగా ఎంపికై తన కలని సాకారం చేసుకున్నారు. తొలి అడుగులోనే విజయం సాధించిన బిందు : జీవీఎంసీ స్టాండింగ్‌ కౌన్సిల్‌ సీనియర్‌ న్యాయవాది ఎం. శాంతి కుమార్తె కొట్టాన బిందు కూడా జడ్జిగా ఎంపికయ్యారు. సబ్బవరంలోని దామోదరం సంజీవయ్య జాతీయ న్యాయ విశ్వవిద్యాలయంలో ఎల్‌ఎల్‌బీ పూర్తి చేసిన ఈమె, సీనియర్‌ న్యాయవాది వెన్నెల ఈశ్వరరావు వద్ద జూనియర్‌ లాయర్‌గా ప్రాక్టీస్‌ చేస్తున్నారు. వృత్తిలో రాణిస్తూనే జూనియర్‌ సివిల్‌ జడ్జిగా విజయం సాధించారు. గాజువాక బార్‌ అసోసియేషన్‌ నుంచి ఒకేసారి ఇద్దరు మహిళలు న్యాయమూర్తులుగా ఎంపిక కావడంపై బార్‌ అసోసియేషన్‌ అధ్యక్షురాలు యశోధర వేదమణి హర్షం వ్యక్తం చేశారు. ధర్మాల లలితాశ్రీ కొట్టాన బిందు జూనియర్‌ సివిల్‌ జడ్జిలుగా ఇద్దరు మహిళలు

తాటిచెట్లపాలెం: ఈస్ట్రన్‌ రైల్వే పరిధిలో జరుగుతున్న నిర్వహణ పనుల కారణంగా ఈ మార్గంలో నడిచే పలు రైళ్లను ఏప్రిల్‌ నుంచి జూన్‌ 30వ తేదీ వరకు దారి మళ్లిస్తున్నట్లు వాల్తేర్‌ డివిజన్‌ సీనియర్‌ డీసీఎం పవన్‌కుమార్‌ తెలిపారు. ● ఏప్రిల్‌ 6, 13, 20, 27, మే 4, 11, 18, 25, జూన్‌ 1, 8, 15, 22, 29వ తేదీల్లో తాంబరం–సిల్‌ఘాట్‌ టౌన్‌(15629) నాగోన్‌ ఎక్స్‌ప్రెస్‌, తిరుగు ప్రయాణంలో ఏప్రిల్‌ 3,10,17,24, మే 1,8,15,22,29 జూన్‌ 5,12,19,26వ తేదీల్లో సిల్‌ఘాట్‌ టౌన్‌–తాంబరం(15630) నాగోన్‌ ఎక్స్‌ప్రెస్‌లు మళ్లించబడిన మార్గంలో వయా అసన్‌సోల్‌, అండల్‌, సయింథియా మీదుగా రాకపోకలు సాగిస్తాయి. ● ఈ నెల 2,9,16,23,30 మే 7,14,21,28, జూన్‌ 4,11,18,25వ తేదీల్లో తాంబరం–న్యూ టిన్‌సుకియా (15929) ఎక్స్‌ప్రెస్‌, తిరుగు ప్రయాణంలో ఈ నెల 6,13,20,27 మే 4,11,18,25 జూన్‌ 1,8,15,22,29వ తేదీల్లో న్యూ టిన్‌సుకియా–తాంబరం(15930)ఎక్స్‌ప్రెస్‌లు మళ్లించబడిన మార్గంలో వయా అసన్‌సోల్‌, అండల్‌, సయింథియా మీదుగా రాకపోకలు సాగిస్తాయి. ● ఈ నెల 8,15,22,29 మే 6,13,20,27 జూన్‌ 3,10,17,24వ తేదీలల్లో డాక్టర్‌ ఎంజీఆర్‌ చైన్నె సెంట్రల్‌–న్యూ జల్పయ్‌గురి (22611) సూపర్‌ఫాస్ట్‌ ఎక్స్‌ప్రెస్‌, తిరుగు ప్రయాణంలో ఈ నెల10,17,24 మే 1,8,15,22,29 జూన్‌ 5,12,19,26వ తేదీల్లో న్యూ జల్పయ్‌గురి–డాక్టర్‌ ఎంజీఆర్‌ చైన్నె సెంట్రల్‌ (22612) సూపర్‌ఫాస్ట్‌ ఎక్స్‌ప్రెస్‌లు మళ్లించబడిన మార్గంలో వయా అసన్‌సోల్‌, అండల్‌, సయింథియా మీదుగా రాకపోకలు సాగిస్తాయి. ● ఈ నెల 4,11,18,25 మే 2,9,16,23,30 జూన్‌ 6,13,20,27వ తేదీల్లో ఎస్‌ఎంవీటి బెంగళూరు–కామాఖ్య (12551)ఎక్స్‌ప్రెస్‌, తిరుగు ప్రయాణంలో ఈ నెల 8,15,22,29 మే 6,13,20,27 జూన్‌ 3,10,17,24వ తేదీల్లో కామాఖ్య– ఎస్‌ఎంవీటీ బెంగళూరు (12552) ఎక్స్‌ప్రెస్‌లు మళ్లించబడిన మార్గంలో వయా అసన్‌సోల్‌, అండల్‌, సయింథియా మీదుగా రాకపోకలు సాగిస్తాయి.

సింహాచలం: ఈ నెల 17న గంధం అమావాస్య పురస్కరించుకుని వరాహ పుష్కరిణి వద్ద స్నానాలు ఆచరించేందుకు వచ్చే భక్తుల సౌకర్యార్ధం పటిష్ట ఏర్పాట్లు చేస్తున్నట్లు సింహాచలం దేవస్థానం ఈవో జె.వెంకటరావు తెలిపారు. వరాహ పుష్కరిణి వద్ద ఏయే ఏర్పాట్లు చేయాలో శుక్రవారం ఆయన పరిశీలించారు. భక్తులు కోనేరులో దిగే సమయంలో ఎలాంటి అపశ్రుతులు చోటుచేసుకోకుండా పటిష్టమైన బారికేడ్లు ఏర్పాటు చేయాలని సూచించారు. గజ ఈతగాళ్లను, కోనేరు పరిసర ప్రాంతాల్లో విద్యుత్‌ దీపాలు ఏర్పాటు చేయాలన్నారు. పరిశుభ్రతకు అత్యంత ప్రాధాన్యత ఇవ్వాలని, ఎక్కడా చెత్త ఉండకూడదని ఆదేశించారు. నీటిలో లోతైన ప్రదేశాలకు వెళ్లకుండా హెచ్చరిక బోర్డులను ఏర్పాటు చేయాలన్నారు. ఆయన వెంట ఈఈలు రాంబాబు, వెంకటరమణ, డీఈ తాతాజీ ఉన్నారు.

జాగ్రత్త పడితేనే జవజీవం అన్నట్లుగా.. మారుతున్న వాతావరణ పరిస్థితులకు అనుగుణంగా రైతులు తమ సాగు విధానాన్ని మార్చుకోవాలి. శాస్త్రవేత్తల సూచనలు పాటిస్తూ ప్రత్యామ్నాయ పంటల వైపు అడుగులు వేస్తేనే పొంచి ఉన్న ఎల్‌నినో ముప్పు నుంచి బయటపడి గిరిజన వ్యవసాయాన్ని నిలబెట్టుకోవచ్చని శాస్త్రవేత్తలు సూచిస్తున్నారు. మళ్లాల్సినగిరి సాగుకు ఎల్‌నినో గండం● నీటి పొదుపే శ్రీరామరక్ష ● చిరుధాన్యాలు, ప్రత్యామ్నాయ పంటలే శ్రేయస్కరం ● గిరి రైతులకు శాస్త్రవేత్తల సూచనమారుతున్న కాలంవిత్తే సమయం మార్చుకోవాలికాలం మారితే.. సాగు మారాలి అన్నట్లుగా.. మారుతున్న వాతావరణ పరిస్థితులకు అనుగుణంగా మన విత్తే సమయాన్ని, పంటల ఎంపికను మార్చుకోవాలి. చింతపల్లి ప్రాంతీయ వ్యవసాయ పరిశోధన స్థానంలో ఇటీవల జరిగిన సదస్సులో శాస్త్రవేత్తలు సూచించినట్లుగా, ఏజెన్సీ రైతులు అప్రమత్తంగా ఉంటేనే ఎల్‌ నినో ముప్పు నుంచి బయటపడగలం. పొంచి ఉన్న వర్షాభావం చింతపల్లి: ప్రకృతి ఒడిలో సాగే ఏజెన్సీ వ్యవసాయానికి ఎల్‌నినో ముప్పు పొంచి ఉంది. రానున్న రోజుల్లో వర్షపాతం గణనీయంగా తగ్గే అవకాశం ఉందని ఇప్పటి నుంచి వాతావరణ శాస్త్రవేత్తలు హెచ్చరిస్తూ గిరిజన రైతులను అప్రమత్తం చేస్తున్నారు. ఈ పరిస్థితుల్లో సాగు పద్ధతుల్లో మార్పులు చేసుకోకపోతే భారీ నష్టాలు తప్పవని విశాఖ తుపాను హెచ్చరికల కేంద్రం శాస్త్రవేత్త డాక్టర్‌ కుమార్‌ ఇటీవల స్థానిక ప్రాంతీయ వ్యవసాయ పరిశోధన స్థానంలో నిర్వహించిన సదస్సులో స్పష్టం చేశారు. పసిఫిక్‌ మహాసముద్ర ఉపరితల ఉష్ణోగ్రతల్లో వచ్చే మార్పుల వల్ల ఏర్పడే ఎల్‌ నినో ప్రభావంతో రుతుపవనాలు బలహీనపడతాయి. దీనివల్ల ఏజెన్సీ ప్రాంతంలో సగటు కంటే తక్కువ వర్షపాతం నమోదు కావొచ్చు. భూగర్భ జలాలు అడుగంటి, సాగునీటి ఎద్దడి ఏర్పడే అవకాశం ఉంది. ఉష్ణోగ్రతలు పెరిగి పంటలు త్వరగా ఎండిపోతాయి. ఎక్కువ నీటిపై ఆధారపడే పంటలు ఈ పరిస్థితుల్లో తీవ్రంగా నష్టపోయే అవకాశం ఉందని శాస్త్రవేత్తలు సూచిస్తున్నారు. కాఫీ: ఏజెన్సీ ప్రాంతానికి కాఫీ ఒక ప్రధాన జీవనాధారం. ఇది చాలా సున్నితమైన పంట. దీనికి మితమైన ఉష్ణోగ్రత (15ని డిగ్రీల నుంచి నుంచి 28ని డిగ్రీలు), అధిక ఆర్ద్రత ఉండాలి. పూత పూసే సమయంలో (మార్చి–ఏప్రిల్‌) తేలికపాటి వర్షాలు చాలా అవసరం. ఎల్‌నినో వల్ల ఉష్ణోగ్రతలు పెరిగితే కాఫీ గింజలు సరిగ్గా ఊరవు. తేమ తగ్గిపోవడం వల్ల వైట్‌ స్టెమ్‌ బోరర్‌ వంటి పురుగులు ఆశించే ప్రమాదం ఉంది. సమయానికి వర్షాలు లేకపోతే దిగుబడి పడిపోతుంది. మిరియం: ఉష్ణోగ్రత 10ని డిగ్రీల నుంచి 30ని డిగ్రీల మధ్య ఉండాలి. ఏడాదికి 150 నుంచి 250 సెంటీమీటర్ల వర్షం అవసరం. ముఖ్యంగా పూత పూసే సమయంలో (మే–జూన్‌ నెలల్లో) తొలకరి చినుకులు పడటం చాలా కీలకం.గాలిలో తగినంత తేమ ఉంటేనే మిరియాల తీగలు ఆరోగ్యంగా పెరుగుతాయి. వర్షాలు తగ్గితే పూత రాలుతుంది. పూత దశలో చిరుజల్లులు కురిస్తేనే పరాగసంపర్కం జరుగుతుంది. వర్షాలు ఆలస్యమైనా.. అసలు కురవకపోయి పూత ఎండిపోయి రాలిపోతుంది. మిరియం తీగలు ఎండ తీవ్రతను అస్సలు తట్టుకోలేవు. వాతావరణంలో వేడి పెరిగితే ముక్కు పురుగు, వేరు కుళ్లు తెగులు ఆశించే అవకాశం ఎక్కువగా ఉంటుంది. వరి: గిరిజన రైతులు పల్లపు ప్రాంతాల్లో, గెడ్డల వెంట వరిని ప్రధానంగా సాగు చేస్తున్నారు. ఈ పంటకు నిరంతరం నీటి లభ్యత ఉండాలి. సాగు కాలంలో కనీసం 100–150 సెంటీమీటర్ల వర్షపాతం అవసరం. ఎల్‌నినో వల్ల వర్షాభావం నెలకొంటే నారుమళ్లు ఎండిపోతాయి. నీరు తక్కువైతే పొట్ట దశలో గింజ పాలుపోసుకోదు. దీనివల్ల తాలు ఎక్కువగా వస్తుంది. ఎక్కువ వేడి వల్ల ఆకు ముడత తెగుళ్లు పెరిగే అవకాశం ఉందని శాస్త్రవేత్తలు సూచిస్తున్నారు. చిరుధాన్యాలు: రాగులు, సామలు, కొర్రలు ఏజెన్సీ ప్రాంతపు సంప్రదాయ పంటలు.ఇవి తక్కువ నీటితో పండే పంటలు. వీటికి 25ని డిగ్రీల నుంచి 35ని డిగ్రీల ఉష్ణోగ్రత సరిపోతుంది. తక్కువ వర్షపాతం (50–70 సెంటీమీటర్లు) ఉన్నా ఇవి తట్టుకోగలవు. మిగిలిన పంటలతో పోలిస్తే వీటికి ముప్పు తక్కువే. కానీ, విత్తే సమయంలో అస్సలు వర్షం లేకపోతే మొలక శాతం తగ్గుతుంది.అయితే, వరితో పోలిస్తే ఎల్‌నినో పరిస్థితుల్లో రైతును ఆదుకునేవి ఇవే. రాజ్‌మా: శీతాకాలంలో ఏజెన్సీలో పండే అత్యంత విలువైన పంట.దీనికి చల్లని వాతావరణం (15 డిగ్రీల నుంచి 25డిగ్రీలు) ఉండాలి. పూత, కాయ దశలో తక్కువ తేమ, పగటిపూట మితమైన ఎండ ఉండాలి. ఎల్‌నినో వల్ల శీతాకాలంలో కూడా ఉష్ణోగ్రతలు పెరిగితే రాజ్‌మా పూత సరిగ్గా రాదు. మంచు కురవాల్సిన సమయంలో వేడి గాలులు వీస్తే కాయ సైజు తగ్గిపోతుంది, గింజ నాణ్యత దెబ్బతింటుంది.ఎల్‌నినో ప్రభావం వల్ల రానున్న రోజుల్లో వర్షాభావ పరిస్థితులు తలెత్తే అవకాశాలు ఉన్నాయని విశాఖ తుపాను హెచ్చరికల కేంద్రం శాస్త్రవేత్త డాక్టర్‌ కుమార్‌ తెలిపారు. ఇటీవల చింతపల్లి ప్రాంతీయ వ్యవసాయ పరిశోధన స్థానంలో జరిగిన సదస్సులో పలు సూచనలు చేశారు. రైతులు తమ సాగు పద్ధతుల్లో మార్పులు చేసుకోవాలన్నారు. వర్షాలు తక్కువగా కురిసే అవకాశం ఉన్నందున, ఎక్కువ నీరు అవసరమయ్యే పంటలను తగ్గించాలని, చిరుధాన్యాలు, రాజ్‌మా, వలిసెలు (అలసందలు) వంటి తక్కువ నీటితో పండే పంటలపై మొగ్గు చూపాలని పేర్కొన్నారు. మారుతున్న వాతావరణ పరిస్థితులకు అనుగుణంగా విత్తే సమయం, సాగునీటి యాజమాన్యంలో రైతులు అప్రమత్తంగా ఉండాలన్నారు.

సింహాచలం: ‘మీరు స్వామి వారి దర్శనానికి వచ్చి ఆయన ఉంగరాన్నే దొంగిలిస్తారా? మర్యాదగా ఇచ్చేయండి.. లేదంటే పోలీసులకు అప్పగిస్తాం’ అంటూ అర్చకులు గద్దిస్తుంటే, భక్తులు బిత్తరపోయారు. నిష్కల్మషమైన భక్తితో కొండెక్కిన తమను ‘దొంగలు’ అనడమేమిటి? పైగా చేతులకు తాళ్లు కట్టి బంధించడమేమిటి? అని ఆవేదనతో కన్నీటి పర్యంతమయ్యారు. కానీ, అదంతా ’దొంగ–పోలీస్‌’ ఆటలా సాగే ఒక అద్భుతమైన ఆధ్యాత్మిక ఘట్టమని తెలిసి చివరకు ఆనంద డోలికల్లో మునిగిపోయారు. అసలేం జరిగింది? : సింహగిరిపై కొలువైన శ్రీ వరాహ లక్ష్మీనృసింహస్వామి వార్షిక కల్యాణోత్సవాల్లో భాగంగా శుక్రవారం ఉదయం ‘వినోదోత్సవం’ కనువిందుగా జరిగింది. గురువారం రాత్రి జరిగిన మృగయోత్సవంలో (వేట ఉత్సవం) స్వామివారి ఉంగరం పోయిందని, అది భక్తులే తీశారని అర్చకులు సరదాగా నిలదీసే ఘట్టమే ఈ ఉత్సవ విశేషం. బంధీలుగా వీఐపీలు.. సామాన్యులు రాజగోపురం వద్ద స్వామివారి ఉత్సవమూర్తి గోవిందరాజస్వామి ఏడు పరదాల చాటున వేంజేసి ఉండగా.. ప్రధానార్చకులు కరి సీతారామాచార్యులు స్వామివారి దూతగా మారి.. చేతిలో కర్ర, తాడు పట్టుకుని భక్తులను బంధించి తీసుకువచ్చారు. గాజువాకకు చెందిన వ్యాపారవేత్త సాగర్‌, ఇంజనీరింగ్‌ విద్యార్ధి ప్రణతి, విశాఖకు చెందిన ఫిజియోథెరపిస్టు రేష్మి, విజయనగరానికి చెందిన ఆమె సోదరి భార్గవి, ఒడిశాలోని జాజ్‌పూర్‌కి చెందిన ప్రభుత్వ వైద్య విద్యార్థులు, శ్రీహరిపురానికి చెందిన భరత్‌, హేమ, తెలంగాణ చీఫ్‌ సెక్రటరీ రామకృష్ణారావు కుమారుడు సిద్ధార్థ, కోడలు నిత్య, పాతపట్నం మాజీ ఎమ్మెల్యే రెడ్డి శాంతి, జర్నలిస్టుల సంఘం జాతీయ కార్యదర్శి గంట్ల శ్రీనుబాబు, పలువురు నూతన దంపతులతోపాటు దేవస్థానం ఈవో జె.వెంకటరావు దంపతులను కూడా వదలకుండా తాళ్లతో బంధించి స్థానాచార్యుల ముందు ప్రవేశపెట్టారు. సీసీ కెమెరా సాక్ష్యం ఉంది.. ఇచ్చేయండి! స్థానాచార్యులు రాజగోపాల్‌ భక్తులను ప్రశ్నించిన తీరు అత్యంత సహజంగా సాగింది. ‘మీరు దొంగతనం చేసిన దృశ్యాలు సీసీ కెమెరాల్లో ఉన్నాయి’ అని ఆయన గర్జించడంతో భక్తులు హడలిపోయారు. భక్తుల చేతికి ఉన్న ఉంగరాలు చూపిస్తూ.. ‘ఇదే స్వామివారి ఉంగరం’ అని అర్చకులు నిలదీయడంతో చాలామంది భక్తులు ఆవేశంతో, మరికొందరు బాధతో కన్నీళ్లు పెట్టుకున్నారు. ట్విస్ట్‌ ఏమిటంటే: అందరినీ బంధించిన ప్రధానార్చకుడిని, అందరినీ ప్రశ్నించిన స్థానాచార్యుడిని, ఏఈవోలను కూడా చివర్లో తాళ్లతో బంధించడం ఈ ఉత్సవంలో హైలైట్‌గా నిలిచింది. పరదా వెనుక దొరికిన ‘నిజమైన’ దొంగ భక్తుల విచారణ ముగిసిన తర్వాత, స్వామివారి పల్లకీకి ఉన్న ఏడు పరదాలను ఒక్కొక్కటిగా తొలగించారు. ఆశ్చర్యంగా ఆఖరి పరదా చాటునే స్వామివారి ఉంగరం లభ్యమైంది. అంటే దొంగ మరెవరో కాదు.. ఆ స్వామివారే అని తేలడంతో భక్తులంతా ఒక్కసారిగా నవ్వుల్లో మునిగిపోయారు. తమను దొంగలుగా పట్టుకోవడం కూడా ఆ నృసింహుడి లీలగా భావించి భక్తులు పులకించిపోయారు.

పాడేరు రూరల్‌: ఆదివాసీల హక్కులు, చట్టాల పరిరక్షణ కోసం కూటమి ప్రభుత్వం మెడలు వంచైనా పోరాడుతామని ఆదివాసీ జేఏసీ జిల్లా చైర్మన్‌ రామారావుదొర స్పష్టం చేశారు. ప్రజా సమస్యల పరిష్కారం, గిరిజన చట్టాల రక్షణ కోరుతూ ఆదివాసీ జేఏసీ నిర్వహించిన 146 రోజుల సత్యాగ్రహ యాత్ర శుక్రవారంతో ముగిసింది. ఈ సందర్భంగా పాడేరులో భారీ ముగింపు ర్యాలీ నిర్వహించారు. స్థానిక తలారిసింగి నుంచి ప్రారంభమైన ఈ ర్యాలీ ఆర్టీసీ కాంప్లెక్స్‌, సినిమా హాల్‌ సెంటర్‌ మీదుగా పాత పాడేరులోని అంబేడ్కర్‌ సెంటర్‌ వరకు కొనసాగింది. అనంతరం జరిగిన సభలో రామారావుదొర మాట్లాడుతూ ఆదివాసీ ప్రాంతాల్లో హక్కులు, చట్టాలు రోజురోజుకూ దిగజారిపోతున్నాయని ఆవేదన వ్యక్తం చేశారు. 5వ షెడ్యూల్‌ ప్రాంతాల్లో ఆదివాసీలకు సార్వభౌమాధికారం ఉన్నప్పటికీ, అభివృద్ధి ఫలాలు మాత్రం గిరిజనేతరులకే అందుతున్నాయని విమర్శించారు.ఎన్నికల సమయంలో కూటమి నాయకులు ఇచ్చిన హామీలను విస్మరించారని ఆయన మండిపడ్డారు. రెండేళ్లు కావస్తున్నా నిరుద్యోగ భృతి ఊసే లేదని ధ్వజమెత్తారు.అరకు బహిరంగ సభలో చంద్రబాబు ఇచ్చిన హామీ మేరకు ప్రత్యేక డీఎస్సీ నిర్వహించి ఉపాధ్యాయ పోస్టులు భర్తీ చేయడంలో ప్రభుత్వం విఫలమైందని విమర్శించారు. జీవో నంబర్‌ 3ను తక్షణ పునరుద్ధరించాలని లేదా దానికి ప్రత్యామ్నాయంగా 100 శాతం రిజర్వేషన్‌ కల్పించే జీవోను తీసుకురావాలని డిమాండ్‌ చేశారు. ప్రజలకు ఇచ్చిన హామీలను అమలు చేయకుండా రాష్ట్రంలో రెడ్‌ బుక్‌ రాజ్యాంగాన్ని నడిపిస్తున్నారని ఆయన ఆరోపించారు. ప్రభుత్వానికి ఆదివాసీల పట్ల చిత్తశుద్ధి ఉంటే వెంటనే గిరిజన ప్రాంతాల్లో ఉద్యోగ రిజర్వేషన్లు కల్పించాలని, లేనిపక్షంలో ఉద్యమాన్ని ఉధృతం చేస్తామని హెచ్చరించారు. అఖిల భారత గిరిజన ఉద్యోగుల సంఘం అధ్యక్షులు ఎం. ఈశ్వరరావు, ఆదివాసీ ఫెడరేషన్‌ రాష్ట్ర నాయకులు చిట్టపుల్లి శ్రీనివాస పడాల్‌, నాయకులు కిల్లు గంగన్న పడాల్‌, వెంకటరమణ, నందు, సింహాచలం, బాబూజీ పాల్గొన్నారు. కూటమి ప్రభుత్వం మెడలు వంచైనా హక్కులు సాధించుకుంటాం ఆదివాసీ జేఏసీ జిల్లా చైర్మన్‌ రామారావుదొర హెచ్చరిక 146 రోజుల సత్యాగ్రహ యాత్ర ముగింపు

● సింహగిరిపై ముగిసిన అప్పన్న వార్షిక కల్యాణ మహోత్సవాలు సింహాచలం: సింహగిరిపై వారం రోజులుగా జరుగుతున్న శ్రీ వరాహ లక్ష్మీనృసింహస్వామి వార్షిక కల్యాణమహోత్సవాలు శుక్రవారం రాత్రితో ఘనంగా ముగిశాయి. కల్యాణోత్సవాల ముగింపు పురస్కంచుకుని సాయంత్రం నుంచి స్వామికి శ్రీ పుష్పయాగం విశేషంగా నిర్వహించారు. కల్యాణ ఉత్సవమూర్తులు గోవిందరాజస్వామి, శ్రీదేవి, భూదేవి అమ్మవార్లకు పూల అంకరణ చేసి ఆలయ కల్యాణమండపంలో శేషతల్పంపై ఆళ్వారులతో సహా వేంజేపచేశారు. విష్వక్సేనపూజ, పుణ్యాహవాచనం జరిపారు. ద్వాదశి ఆరాధనలతో, పలు రకాల పుష్పాలతో పుష్పాంజలి సేవ చేశారు. విశేష హారతులు అందించారు. అనంతరం భోగమండపంలో ఊంజల్‌ సేవ ఘనంగా నిర్వహించారు. భక్తులు అశేషంగా కార్యక్రమాల్లో పాల్గొని స్వామిని దర్శించుకున్నారు. దేవస్థానం స్థానాచార్యులు టి.పి.రాజగోపాల్‌, ప్రధానార్చకులు గొడవర్తి శ్రీనివాసాచార్యులు, సీతారామాచార్యులు, అర్చకులు ఈ సేవను నిర్వహించారు. దేవస్థానం ఈవో జె.వెంకటరావు దంపతులు పాల్గొన్నారు.

చింతపల్లి: ప్రభుత్వం అందిస్తున్న సంక్షేమ పథకాలను గిరిజన కాఫీ రైతులు సద్వినియోగం చేసుకోవాలని జెడ్పీటీసీ పోతురాజు బాలయ్య పడాల్‌ పిలుపునిచ్చారు. శుక్రవారం చింతపల్లిలోని ఉద్యానవన నర్సరీ శిక్షణ కేంద్రం (హెచ్‌ఎన్‌టీసీ) లో ఐటీడీఏ కాఫీ అసిస్టెంట్‌ డైరెక్టర్‌ లకే బొంజుబాబుతో కలిసి ఆయన రైతులకు పరికరాలను పంపిణీ చేశారు. ఇందులో భాగంగా కాఫీ బేబీ పల్పింగ్‌ యూనిట్లు, మిరియాలు కోసే నిచ్చెనలు, టార్పాలిన్లను అందజేశారు. ప్రభుత్వం రైతుల ప్రయోజనం కోసం ఉచితంగా అందజేస్తున్న పరికరాలను ప్రతి రైతు వినియోగించుకోవాలని ఆయన కోరారు. ఆధునిక పరికరాలను ఉపయోగించి పంట దిగుబడిని పెంచుకోవడమే కాకుండా, నాణ్యమైన ఉత్పత్తుల ద్వారా అధిక ఆదాయం పొందేందుకు కృషి చేయాలని సూచించారు. ఐటీడీఏ పరిధిలోని మాక్స్‌ సొసైటీల ద్వారా కాఫీ విక్రయాలు జరిపితే రైతులకు మరిన్ని పథకాలు వర్తిస్తాయని ఆయన పేర్కొన్నారు. గతంలో జీసీసీని నమ్మి గిరిజన రైతులు నష్టపోయారని ఈ సందర్భంగా ఆయన ఆవేదన వ్యక్తం చేశారు. ఈ కార్యక్రమంలో రైతులకు నిచ్చెనలు 400, బేబీ పల్పింగ్‌ మిషన్లు 400, టార్పాలిన్లు 100 పంపిణీ చేశారు. ఈ కార్యక్రమంలో కాఫీ ఏఈవో ధర్మారాయ్‌, గూడెంకొత్తవీధి, జి.మాడుగుల కాఫీ అసిస్టెంట్లు అరుణకుమారి, బాబూరావుతో పాటు పలువురు కాఫీ రైతులు, కూటమి నాయకులు పాల్గొన్నారు.జెడ్పీటీసీ పోతురాజు బాలయ్య పడాల్‌

జి.మాడుగుల: మండల కేంద్రంలోని గంతకొండపై కొలువై ఉన్న శ్రీ మత్స్య మాడుగులమ్మ తల్లి జాతర మహోత్సవాలను వచ్చే నెల 3వ తేదీ నుంచి 5వ తేదీ వరకు అత్యంత వైభవంగా నిర్వహించాలని ఉత్సవ కమిటీ, గ్రామ పెద్దలు నిర్ణయించారు. శుక్రవారం స్థానిక మాడుగులమ్మ తల్లి ఆలయ ఆవరణలో గ్రామస్తులతో ఏర్పాటు చేసిన సమావేశంలో జాతర నిర్వహణపై చర్చించి, నూతన ఉత్సవ కమిటీని ఏకగ్రీవంగా ఎన్నుకున్నారు. ఉత్సవ కమిటీ అధ్యక్షుడిగా మత్స్యరాస రామరాజు, ప్రధాన కార్యదర్శులుగా గసాడి రెడ్డిబాబు, ఎం. నారాయణరాజు, కూర్మరాజు, ఎం. మత్స్యరాజు, ఎం. సింహచలంరాజు, ఎం. మత్స్యరాజు (మాస్టర్‌), కిముడు వెంకటరమణ, గౌరవ అధ్యక్షులుగా మాజీ మంత్రులు మత్స్యరాస బాలరాజు, ఎం. మణికుమారి, జెడ్పీటీసీ డాక్టర్‌ మత్స్యరాస వెంకటలక్ష్మి, మాజీ ఎంపీపీ మత్స్యరాస వరహాలమ్మ, హెచ్‌ఎం మత్స్యరాస వరహారాజు, ఎంపీటీసీ ఎం. విజయకుమారి నియమితులయ్యారు. ఉపాధ్యక్షులుగా మత్స్యరాస వెంకటగంగరాజు (బుజ్జి), సర్పంచ్‌ కిముడు రాంబాబు, ఎం. సత్యనారాయణరాజు, ఎం. రామచంద్రరాజు, సహాయ కార్యదర్శులుగా ఎస్‌.కె. రెహ్మాన్‌, సత్తిబాబు, రాము, బ్రహ్మాజీ, శ్రీను, గంగాధర్‌, వరహాలుదొర, ఎం. నాగరాజు, మైనారావు, కోశాధికారిగా ఎస్‌కే అమీర్‌, సహాయ కోశాధికారిగా అచ్చుతరావు, ఆర్గనైజింగ్‌ సభ్యులుగా బి. అరుణ్‌కుమార్‌, టి. సత్యనారాయణ, సిహెచ్‌. వెంకటరమణ, వి. శ్రీను, జి. గణేష్‌, సీహెచ్‌. శేఖర్‌ను నియమించారు. వీరితో పాటు కొంతమందిని కమిటీ సభ్యులుగా నియమించారు. మూడు రోజుల పాటు జరిగే ఈ ఉత్సవాలను విజయవంతానికి సహకరించాలని కోరారు.ఏర్పాటైన ఉత్సవ కమిటీ

మరమ్మతులు● డ్యామ్‌ సేఫ్టీ బృందం హెచ్చరికతో కదిలిన యంత్రాంగం ముంచంగిపుట్టు: ఆంధ్ర – ఒడిశా రాష్ట్రాల ఉమ్మడి ప్రాజెక్టు అయిన మాచ్‌ఖండ్‌ జలవిద్యుత్‌ కేంద్రానికి ప్రధాన నీటి వనరుగా ఉన్న జోలాపుట్టు జలాశయానికి ఎట్టకేలకు మరమ్మతులు పూర్తయ్యాయి. దశాబ్దా ల చరిత్ర కలిగిన ఈ జలాశయ గేట్లకు రంగులు వేసి, సాంకేతిక లోపాలను సరిదిద్ది కొత్త హంగులు అద్దారు. బృందం తనిఖీలతో.. ఇటీవలే జాతీయ డ్యామ్‌ సేఫ్టీ బృందం ఈ అతి పురాతనమైన జలాశయాన్ని సందర్శించింది. ఈ సందర్భంగా గేట్ల పనితీరు, నీటి నిల్వ సామర్థ్యం, భద్రతా ప్రమాణాలను క్షుణ్ణంగా పరిశీలించింది. గేట్లు తుప్పు పట్టి ఉండటం, పలు సాంకేతిక సమస్యలు ఉండటాన్ని గుర్తించిన అధికారులు.. జలాశయ అధికారులపై అసహనం వ్యక్తం చేస్తూ పలు సూచనలు చేశారు. యుద్ధప్రాతిపదికన మరమ్మతులు కేంద్ర బృందం హెచ్చరికలతో స్పందించిన జలాశయ అధికారులు.. వెంటనే అన్ని గేట్లు, యంత్రాలకు గ్రీజు వేయించి, నలుపు రంగులు దిద్దించారు. అత్యవసర సమయాల్లో గేట్లు ఎత్తేటప్పుడు లేదా నీటిని విడుదల చేసేటప్పుడు ఎటువంటి సాంకేతిక అడ్డంకులు ఎదురుకాకుండా ముందస్తు జాగ్రత్తలు తీసుకుంటున్నట్లు అధికారులు వెల్లడించారు. హెచ్చరిస్తే గాని కదలని తీరుపై విమర్శలు జోలాపుట్టు జలాశయం గేట్లు తుప్పు పట్టి ప్రమాదకరంగా మారుతున్నాయని గతంలో అనేకసార్లు పత్రికల్లో కథనాలు వచ్చినప్పటికీ అధికారులు ఏమాత్రం స్పందించలేదు. తీరా జాతీయ స్థాయి అధికారులు వచ్చి తనిఖీ చేసి పరిస్థితి తీవ్రతను హెచ్చరిస్తే తప్ప పనులు ప్రారంభించకపోవడం అధికారుల నిర్లక్ష్యానికి నిదర్శనమని స్థానికులు విమర్శిస్తున్నారు. ఇప్పటికై నా భద్రతా ప్రమాణాలను నిరంతరం పర్యవేక్షించాలని ఏవోబీ ప్రజలు కోరుతున్నారు.

ఆంధ్రా–ఒడిశా సరిహద్దు ప్రాంతం ప్రకృతి రమణీయతకు అద్దంపడుతోంది. పర్యాటకులనే కాకుండా సినీ ప్రపంచాన్నీ ఆకర్షిస్తోంది. దీంతో ఎన్నో సినిమా సన్నివేశాలకు నిలయంగా మారింది. పలు సుందర దృశ్యాలు కెమెరాలకు చిక్కుతున్నాయి. ఈ సుందర ప్రదేశాల్లో మౌలిక సదుపాయాలు కల్పిస్తే రానున్న కాలంలో మరింత ప్రాధాన్యతను సంతరించుకుంటుంది.ముంచంగిపుట్టు: మన్యం.. ప్రకృతి అందాలకు పేరుగాంచింది. ఇందులోనూ ఆంధ్ర–ఒడిశా సరిహద్దు ప్రాంతం మరింత ప్రత్యేకతను సంతరించుకుంది. ఒకవైపు దీవులను తలపించే జోలాపుట్టు అందాలు మరోవైపు పచ్చని కొండలతో నిండిన ప్రశాంత వాతావరణం ప్రకృతి ప్రేమికులను ఎంతగానో ఆకట్టుకుంటుంది. ఈ ప్రాంతంలోని సుందర ప్రకృతి దృశ్యాలు సినీ దర్శకులను సైతం కట్టిపడేస్తోంది. దీంతో సినిమా షూటింగ్‌లు తరచూ జరుగుతున్నాయి. చిత్రీకరణ జరిగే ప్రాంతాలు జోలాపుట్టు జలాశయం ఆంధ్రా–ఒడిశా రాష్ట్రాల సరిహద్దులో సుమారు 250 పైగా గ్రామాలకు విస్తరించి ఉంది. జలాశమం మధ్యలో మట్టిదిబ్బలు అందమైన దీవులను తలపించేలా దర్శనమిస్తున్నాయి. ఇక్కడున్న మత్స్యగెడ్డ అందాలు అందరిని కట్టిపడేస్తున్నాయి. మెలికలు తిరుగుతూ ఎత్తైన గిరుల మధ్య ప్రవాహించే మత్స్యగెడ్డ అందాలు ప్రత్యేక ఆకర్షణగా నిలుస్తున్నాయి. ఇక్కడున్న మాచ్‌ఖండ్‌ జలవిద్యుత్‌ కేంద్రానికి చేరేందుకు ఏర్పాటుచేసిన వించ్‌ ప్రయాణం ఓ అద్భుతం.. ఈ ప్రయాణాన్ని కూడా సినిమాల్లో చిత్రీకరిస్తున్నారు. డుడుమ, మాచ్‌ఖండ్, మత్స్యగెడ్డ సుందర ప్రదేశాలకు వచ్చి లోకేషన్‌లు చూసిన ప్రముఖ డైరెక్టర్లు, ఫోటోగ్రాఫర్లు కెమెరాలో బంధించి వెళ్తున్నారు. మౌలిక సదుపాయాలు లేక అవస్థలు ప్రకృతి అందాలకు నిలయంగా మారిన ఏవోబీలోని తరచూ సినిమా షూటింగ్‌లు జరుతున్నా కనీస మౌలిక సదుపాయాలు లేక సిని చిత్ర బృందం అవస్థలు పడుతున్నారు. సినిమా షూటింగ్‌లు, పర్యాటకులు పెరుగుతున్న సౌకర్యాలు కల్పన లేక ప్రభుత్వాలు విఫలమైయ్యాయి. బస చేసేందుకు కాటేజీలు, రెసిడెన్సీలు లేక పర్యాటకులు ఉండలేకపోతున్నారు. ఇక్కడ బస చేసేందుకు కాటేజీలు, హోటళ్లు లేకపోవడంతో సినిమా షూటింగ్‌ చేసే వారు అరకు, పాడేరు తదితర ప్రాంతాల నుంచి సుమారు 50 నుంచి 70 కిలోమీటర్లు ప్రయాణించి ఈ ప్రాంతానికి రావాల్సిన పరిస్థితి నెలకొంది. దీంతో సమయం వృథా అవుతుంది. ఇరు రాష్ట్రాల ప్రభుత్వాలు స్పందించి ఈ ప్రాంతంలో మౌలిక సదుపాయాలు కల్పి స్తే పర్యాటకుల సంఖ్య పెరుగుతుందని పలువురు చెబుతున్నారు. చిత్రీకరించిన సినిమాలు » 2021లో ‘హనుమాన్‌’ సినిమా షూటింగ్‌ జరిగింది. ప్రశాంత్‌ వర్మ దర్శకత్వంలో హిరోగా తేజ సజ్జా, హిరోయిన్‌గా అమృత అయ్యర్‌లపై పలు పాటాలు, సన్నివేశాలను చిత్రీకరించారు. » 2022లో ‘ఇట్లు మారేడుమిల్లి ప్రజానీకం’ సినిమా షూటింగ్‌కు మూడు రోజులు పాటు జరిగింది. హిరో అల్లరి నరేష్, హిరోయిన్‌ ఆనందిపై పాటను మత్స్యగెడ్డ ఒడ్డున చిత్రీకరించారు. » 2023లో ఏవోబీ సరిహద్దు ప్రాంతమైన వంతాల ఘాట్‌లో ‘పుష్ప–2’ సినిమాలో లారీ ఛేజింగ్‌ సన్నివేశాలను దర్శకుడు సుకుమార్‌ చిత్రీకరించారు. » 2024లో మాచ్‌ఖండ్‌ జలవిద్యుత్‌ కేంద్రం పరిసరాల ప్రాంతాల్లో ప్రముఖ సినీ డైరెక్టర్‌ జాగర్లమూడి రాధాక్రిష్ణ(క్రిష్) దర్శకత్వంలో ‘ఘాటీ’ సినిమా షూటింగ్‌ జరిగింది. హిరోయిన్‌ అనుష్క శెట్టి, ప్రముఖ నటుడు జగపతిబాబు, జాన్‌ విజయ్‌లపై సన్నివేశాలు, యాక్షన్‌ సీన్లు చిత్రీకరించారు. » 2024 సంవత్సరం అక్టోబర్‌లో ‘రాబిన్‌హుడ్‌’ చిత్రంలోని హీరో నితిన్, హీరోయిన్‌ శ్రీలీలపై కొన్ని సన్నివేశాలు షూటింగ్‌ తీశారు. » 2025లో సరిహద్దులోని పలు ప్రాంతాల్లో దర్శకుడు రాజమౌళి, హీరో మహేష్‌బాబుల షూటింగ్‌ గుట్టు చప్పుడు కాకుండా జరిగింది. అందాలు అద్భుతం ఏవోబీ ప్రకృతి అందాలు అద్భుతంగా ఉన్నాయి. డుడుమ జలపాతం, మాచ్‌ఖండ్‌ వించ్‌ హౌస్‌లో ప్రయా ణం మధుర అనుభూతి ఇస్తుంది. సినిమా షూటింగ్‌లకు అనువైన ప్రాంతం. మొదట వారం రోజులు సినిమా షూటింగ్‌ చేస్తే చాలు అనుకున్నాను. కానీ రెండు వారాలుగా సినిమా షూటింగ్‌ జరుగుతుంది. నేను చూసిన అందమైన లొకేషన్‌లో మాచ్‌ఖండ్‌ జలవిద్యుత్‌ కేంద్రం, డుడుమ జలపాతం ఒకటి. ఈ ప్రాంతం చిత్రీకరణకు బాగుంది. – జాగర్లపూడి రాధాక్రిష్ణ షూటింగ్‌లకు అనువైన ప్రాంతం కేరళ, గోవాలలోనే సినిమా షూటింగ్‌కు మంచి లోకేషన్‌ లు ఉన్నాయని అనుకుంటారు. కాని ఆంధ్ర–ఒడిశాసరిహద్దు ప్రాంతమైన మాచ్‌ఖండ్‌ జలవిద్యుత్‌ కేంద్రం పరిసర ప్రాంతాల్లో చాలా అందమైన లోకేషన్లు ఉన్నాయి. ఎతైన కొండల నడుమ మత్స్యగెడ్డ ఒంపులు తిరుగుతూ వెళ్తున్న దృశ్యం చూస్తూ చాలా ఎంజాయ్‌ చేస్తున్నాను. ఇక్కడి ప్రకృతి అందాలు బాగున్నాయి. రానున్న రోజుల్లో ఎక్కువ షూటింగ్‌లు జరిగే అవకాశాలున్నాయి. – జగపతిబాబు, ప్రముఖ సినీ నటుడు

జి.మాడుగుల: యువత మాదకద్రవ్యాలకు దూరంగా ఉండి, ఉజ్వల భవిష్యత్తును నిర్మించుకోవాలని అల్లూరి జిల్లా పాడేరు సబ్‌ డివిజనల్‌ పోలీస్‌ అధికారి ఆర్‌. అభిషేక్‌ పిలుపునిచ్చారు. ఎస్పీ అమిత్‌ బర్ధర్‌ ఆదేశాల మేరకు, మండలంలోని మద్దిగరువు గ్రామంలో గురువారం భారీ స్థాయిలో కమ్యూనిటీ పోలీసింగ్‌ కార్యక్రమాన్ని నిర్వహించారు. ఈ సందర్భంగా ఆయన మాట్లాడుతూ.. మాదకద్రవ్యాల వినియోగం వల్ల కలిగే ఆరోగ్య, సామాజిక, చట్టపరమైన దుష్పరిణామాలపై ప్రజలకు అవగాహన కల్పించారు. గంజాయి వంటి వ్యసనాలు యువత జీవితాలను నాశనం చేయడమే కాకుండా, కుటుంబ వ్యవస్థపై తీవ్ర ప్రభావం చూపుతాయని హెచ్చరించారు. వీటితో పాటు సైబర్‌ నేరాలు మరియు రోడ్డు భద్రతా నియమాలపై కూడా అవగాహన కల్పించారు. పోటీ పరీక్షలకు సిద్ధమవుతున్న నిరుద్యోగ యువతకు కాకినాడ శ్యామ్‌ ఇన్‌స్టిట్యూట్‌ ఆధ్వర్యంలో ఉచితంగా స్టడీ మెటీరియల్‌ను పంపిణీ చేశారు. భవిష్యత్తులోనూ విద్యార్థులకు అండగా ఉంటామని ఈ సందర్భంగా ఆయన హామీ ఇచ్చారు. మెగా వాలీబాల్‌ టోర్నమెంట్‌లో గిరిజన ప్రాంతాల నుంచి 20 జట్లు పాల్గొన్నాయి. ప్రథమస్థానం సాధించిన మద్దిగరువు జట్టుకు రూ.10 వేల నగదు, వాలీబాల్‌ కిట్‌, ద్వితీయ స్థానం సాధించిన మడతకొండ జట్టురే నై.5 వేల నగదు, వాలీబాల్‌ కిట్‌, సూరిమెట్ట, బొయితిలి జట్లకు క్రికెట్‌ కిట్లను అందజేశారు. అనంతరం స్థానిక మహిళలకు చీరలు పంపిణీ చేసి, పోలీస్‌ శాఖ పట్ల సానుకూల దృక్పథాన్ని పెంపొందించారు. కార్యక్రమానికి విచ్చేసిన ప్రజలందరికీ పోలీస్‌ శాఖ ఆధ్వర్యంలో భోజన సదుపాయం కల్పించారు. ఈ కార్యక్రమంలో సీఐ శ్రీనివాసరావు, ఎంపీపీ అప్పలరాజు, ఎస్‌ఐ సాయిరాం పడాల్‌, పోలీస్‌ సిబ్బంది పాల్గొన్నారు.పాడేరు డీఎస్పీ అభిషేక్‌

● కలెక్టర్‌ దినేష్‌కుమార్‌ ● బదిలీపై వెళ్తున్న ఆయనకు ఘనంగా ఆత్మీయ వీడ్కోలు పాడేరు: గిరిజన ప్రాంతంలో కలెక్టర్‌గా పని చేయడం తన అదృష్టమని, రెండేళ్లకు పైగా స్థానిక గిరిజనులతో మమేకమై వారి సమస్యల పరిష్కారానికి కృషి చేశానని జిల్లా కలెక్టర్‌ దినేష్‌ కుమార్‌ అన్నారు. గిరిజనులతో ఎంతో అనుబంధాన్ని ఏర్పరుచుకున్నానని, జిల్లాను విడిచి వెళ్లడం బాధగా ఉందని ఆయన పేర్కొన్నారు. ఏపీఐఐసీ ఎండీగా బదిలీపై వెళ్తున్న కలెక్టర్‌ దినేష్‌ కుమార్‌కు గురువారం కలెక్టరేట్‌ కార్యాలయ సమావేశ మందిరంలో జిల్లా అధికారులు ఘనంగా ఆత్మీయ వీడ్కోలు కార్యక్రమాన్ని నిర్వహించారు. ఇంచార్జ్‌ జాయింట్‌ కలెక్టర్‌, ఐటీడీఏ పీవో తిరుమణి శ్రీపూజ, అసిస్టెంట్‌ కలెక్టర్‌ సాహిత్‌ సహా వివిధ శాఖల అధికారులు కలెక్టర్‌తో తమకున్న పని అనుభవాన్ని, అనుబంధాన్ని ఈ సందర్భంగా గుర్తు చేసుకున్నారు. జిల్లా అధికారులతో పాటు పలు ప్రజా, గిరిజన సంఘాల నాయకులు కలెక్టర్‌ను దుశ్శాలువాలతో ఘనంగా సన్మానించారు. అంతకుముందు, పట్టణంలోని పాత బస్టాండ్‌ అంబేడ్కర్‌ సెంటర్‌ నుంచి సినిమా హాల్‌ సెంటర్‌, ఆర్టీసీ కాంప్లెక్స్‌, తలారిసింగ్‌ జంక్షన్‌ మీదుగా కలెక్టరేట్‌ వరకు సుమారు రెండు కిలోమీటర్ల మేర కలెక్టర్‌కు వీడ్కోలు పలుకుతూ భారీ ర్యాలీ నిర్వహించారు.

● స్థానిక నిరుద్యోగ యువతకు ఉపాధి కల్పించాలి ● ప్రజాభిప్రాయ సేకరణలోగ్రామస్తుల డిమాండ్‌సీలేరు: గతంలో ఇచ్చిన హామీలనే గాలికి వదిలేశారు.. ఇప్పుడు కొత్త ప్రాజెక్టు అంటే నమ్మేదెలా?.. అంటూ సీలేరు గ్రామస్తులు, ప్రజా ప్రతినిధులు ఆవేదన వ్యక్తం చేశారు. సీలేరు గుంటవాడ రిజర్వాయర్‌లో ప్రతిపాదించిన వాటర్‌ ఏరోడ్రోమ్‌ ప్రాజెక్టుపై గురువారం ఏపీ జెన్‌కో కల్యాణ మండపంలో ఏపీ కాలుష్య నియంత్రణ మండలి ఆధ్వర్యంలో ఏపీ ఎయిర్‌ పోర్ట్‌ డవలప్‌మెంట్‌ కార్పొరేషన్‌ లిమిటెడ్‌ నిర్వహించిన ప్రజాభిప్రాయ సేకరణ సభ వాడివేడిగా సాగింది. ఈ సందర్భంగా స్థానిక ప్రజా ప్రతినిధులు మాట్లాడుతూ, గత ఏడాది పంప్డ్‌ స్టోరేజ్‌ ప్రాజెక్టు (1350 మెగావాట్లు) సమయంలో ఇచ్చిన హామీలు ఇప్పటికీ అమలుకు నోచుకోలేదని ఆరోపించారు. వాటర్‌ ఏరోడ్రోమ్‌ ప్రాజెక్టులో వచ్చే ఉద్యోగ, ఉపాధి అవకాశాలను సీలేరు నిరుద్యోగులకే కేటాయించాలని, ఎంతమందికి ఉద్యోగాలిస్తారో ముందే రాతపూర్వక హామీ ఇవ్వాలని డిమాండ్‌ చేశారు. ఈ ప్రాజెక్టు ద్వారా వచ్చే ఆదాయంలో 50 శాతం నిధులను సీలేరు ప్రాంత అభివృద్ధి పనులకే ఖర్చు చేయాలని కోరారు. దశాబ్దాల క్రితం జలవిద్యుత్‌ కేంద్రం కోసం పనిచేసిన కూలీల వారసులకు, స్థానికులకు ఈ ప్రాజెక్టుల్లో తగిన గుర్తింపు, హక్కులు కల్పించాలని వారు కోరారు. ఈ డిమాండ్లు నెరవేర్చినప్పుడే ప్రాజెక్టు నిర్మాణానికి గ్రామం తరఫున పూర్తి సహకారం అందిస్తామని గ్రామస్తులు తేల్చి చెప్పారు. పర్యావరణానికి ఢోకా లేదు.. కాలుష్య నియంత్రణ మండలి ఈఈలు సరిత, ఉపేంద్ర, టూరిజం డీవీఎం జగదీష్‌ మాట్లాడుతూ.. ఈ ప్రాజెక్టు వల్ల పర్యావరణానికి, అటవీ సంపదకు ఎలాంటి హాని జరగదని వివరించారు. ఇది పూర్తిగా నీటిపై తేలుతూ ఉండేలా డిజైన్‌ చేసిన ప్రాజెక్ట్‌ అని, దీనివల్ల పక్షులకు కూడా ఇబ్బంది ఉండదని స్పష్టం చేశారు. ఏపీ ఎయిర్‌ పోర్ట్స్‌ డెవలప్‌మెంట్‌ కార్పొరేషన్‌ ప్రతినిధులు, పెద్ద సంఖ్యలో స్థానికులు పాల్గొన్నారు. పర్యాటక రంగ అభివృద్ధిని పెంచేలా ప్రాజెక్టులు : ఐటీడీఏ పీవో తిరుమణి శ్రీ పూజ జిల్లాలో పర్యాటక అభివృద్ధి మరింత పెంచేలా ఈ ప్రాజెక్టులు రాష్ట్రంలో జిల్లాను మొదటి స్థానంలో నిలుపుతాయని పాడేరు ఐటీడీఏ పీవో తిరుమణి శ్రీపూజ అన్నారు. స్థానికులకు ఉద్యోగ ఉపాధి అవకాశాలు కల్పించేలా చర్యలు తీసుకుంటామని అన్నారు. రూ 16.45 కోట్లతో నిర్మించే ఈ ప్రాజెక్టు వల్ల పర్యాటక రంగానికి ఎంతో మేలు జరుగుతుందన్నారు. లంబసింగి నుంచి సప్పర్ల రెయిన్‌గేజ్‌, ఘాట్‌ రోడ్‌ దారాలమ్మ ఆలయం, సీలేరు జల విద్యుత్‌ కేంద్రం, జలపాతాలకు సందర్శకుల తాకిడి పెరుగుతుందన్నారు. ఇటువంటి కీలక ప్రాజెక్ట్‌ల నిర్మాణానికి ప్రతిఒక్కరూ సహకరించాలని కోరారు. తహసీల్దార్‌ అన్నాజీరావు, ఎంపీటీసీ సాంబమూర్తి, సర్పంచ్‌ దుర్జో, ఉపసర్పంచ్‌ వల్లి ప్రసాద్‌, గిరిజన సంఘ ప్రతినిధులు పాల్గొన్నారు.

ముంచంగిపుట్టు: విధి నిర్వహణలో సమయపాలన పాటించని గ్రామ సచివాలయ ఉద్యోగులపై కఠిన చర్యలు తీసుకుంటామని అరకు ఎమ్మెల్యే రేగం మత్స్యలింగం హెచ్చరించారు. గురువారం మండలంలోని కర్రిముఖిపుట్టు సచివాలయాన్ని ఆయన ఆకస్మికంగా తనిఖీ చేశారు. ఐదుగురు ఉద్యోగులు ఉండాల్సిన చోట ఉదయం 11 గంటలైనా కేవలం ఇద్దరు మాత్రమే ఉండటంపై ఆయన తీవ్ర అసహనం వ్యక్తం చేశారు. ప్రజలకు అందుబాటులో ఉండని సిబ్బందిపై చర్యలు తీసుకోవాలని అధికారులను ఆదేశించారు. అనంతరం ఆయన స్థానిక జెడ్పీ ఉన్నత పాఠశాలను సందర్శించి విద్యార్థుల సమస్యలను అడిగి తెలుసుకున్నారు. విద్యార్థులతో పుస్తకాలు చదివించి, పలు ప్రశ్నలు వేసి వారి విద్యా ప్రమాణాలను పరిశీలించారు. గత ప్రభుత్వంలో నాడు–నేడు పథకంలో కింద మంజూరైన పాఠశాల భవన పనులు అసంపూర్తిగా ఉండటంతో విద్యార్థులు పడుతున్న ఇబ్బందులను చూసి ఆయన ఆవేదన వ్యక్తం చేశారు. ఈ సందర్భంగా ఎమ్మెల్యే మాట్లాడుతూ.. గిరిజన విద్యార్థులకు కనీస వసతులు, మౌలిక సదుపాయాలు కల్పించడంలో కూటమి ప్రభుత్వం పూర్తిగా విఫలమైందని విమర్శించారు. అసంపూర్తిగా ఉన్న పాఠశాల భవన పనుల అంశాన్ని కలెక్టర్‌ దృష్టికి తీసుకెళ్లి పరిష్కరిస్తానని హామీ ఇచ్చారు. ఈ కార్యక్రమంలో వైఎస్సార్‌సీపీ నేతలు అర్జున్‌, కొండబాబుపాల్గొన్నారు.రేషన్‌ బియ్యం పంపిణీలో జాప్యంపై ఆగ్రహం పెదబయలు: కూటమి ప్రభుత్వంలో రేషన్‌ కార్డుదారులకు తిప్పలు తప్పడం లేదని అరకు ఎమ్మెల్యే రేగం మత్స్యలింగం విమర్శించారు. గురువారం ఆయన పెదబయలులోని రేషన్‌ డిపోను ఆకస్మికంగా తనిఖీ చేసి, స్టాక్‌ రిజిస్టర్లను పరిశీలించారు. రోజువారీ విక్రయాల వివరాలు రికార్డుల్లో నమోదు చేయకపోవడంపై జీసీసీ సిబ్బందిపై ఆగ్రహం వ్యక్తం చేశారు. ఈ సందర్భంగా లబ్ధిదారులు ఎమ్మెల్యే దృష్టికి పలు సమస్యలు తీసుకువచ్చారు. సుమారు 100 మంది కార్డుదారులకు ఫింగర్‌ ప్రింట్‌ తీసుకున్నప్పటికీ, రెండు టన్నుల బియ్యం పంపిణీ చేయలేదని ఫిర్యాదు చేశారు. గత రెండు నెలల బకాయిల గురించి అడిగితే పాత సేల్స్‌మన్‌ ఇవ్వాలని, తాము ఈ నెల కోటా మాత్రమే ఇస్తామని ప్రస్తుత సిబ్బంది చెబుతున్నారని ఆవేదన వ్యక్తం చేశారు. ఎమ్మెల్యే చొరవతో బకాయిల పంపిణీ మెషీన్‌లో నమోదైన తర్వాత కూడా బియ్యం ఎందుకు ఇవ్వడం లేదని ఎమ్మెల్యే అధికారులను నిలదీశారు. గత ప్రభుత్వంలో ఇంటి వద్దకే రేషన్‌ అందేదని, నేడు డిపోల చుట్టూ తిరిగినా బియ్యం దొరకని పరిస్థితి నెలకొందని మండిపడ్డారు. ఎమ్మెల్యే ఆదేశాలతో జీసీసీ మేనేజర్‌ అప్పన్న సమక్షంలో లబ్ధిదారులకు గత రెండు నెలల బకాయి రేషన్‌ను వెంటనే పంపిణీ చేశారు. కార్డుదారులకు రేషన్‌ ఇవ్వడంలో కోతలు విధిస్తే సహించేది లేదని ఎమ్మెల్యే హెచ్చరించారు. తమకు న్యాయం చేసిన ఎమ్మెల్యేకు కార్డుదారులు కృతజ్ఞతలు తెలిపారు. వైఎస్సార్‌సీపీ నాయకులు సందడి కొండబాబు పాల్గొన్నారు. అరకు ఎమ్మెల్యే రేగం మత్స్యలింగం హెచ్చరిక

తట్టెడు మట్టికీ సాక్షి ప్రతినిధి, విశాఖపట్నం : తట్టెడు మట్టికీ తలవంచాల్సిందే.. పిక్కెడు రాయికీ పిండుకోవాల్సిందే.. ఉమ్మడి విశాఖ జిల్లాలో ’రాయల్టీ’ పేరిట ఏఎంఆర్‌ సంస్థ సాగిస్తున్న అక్రమ వసూళ్లు సామాన్యుడి నడ్డి విరుస్తున్నాయి. సొంత పొలంలో మట్టి తీసినా, సొంత ఇంటికి రాయి తెచ్చినా.. ఎక్కడ చిన్న ఇసుక కుప్ప కనిపించినా.. ప్రైవేటు సంస్థ ప్రతినిధులు స్కానర్లు పట్టుకుని వాలిపోతున్నారు. లోడును బట్టి వందల రూపాయల నుంచి వేల రూపాయల వరకూ వసూలు చేస్తున్నారనే ఆరోపణలు వినిపిస్తున్నాయి. మైనింగ్‌ శాఖ అండతో గ్రామగ్రామాన చెక్‌పోస్టులు పెట్టి సాగిస్తున్న ఈ ’దోపిడీ’ పర్వంపై జనాల్లో ఆగ్రహం కట్టలు తెంచుకుంటోంది. చెక్‌పోస్టులు.. ఫ్లైయింగ్‌ స్క్వాడ్‌ల దందా వాస్తవానికి గతంలో రాయల్టీ వసూలు బాధ్యతను మైనింగ్‌ శాఖే నిర్వహించేది. అయితే, చంద్రబాబు ప్రభుత్వం వచ్చిన తర్వాత ఈ బాధ్యతను జిల్లాల వారీగా ప్రైవేట్‌ కంపెనీలకు అప్పగించారు. ఇందుకోసం మైనింగ్‌ శాఖ టెండర్లను ఆహ్వానించగా.. విశాఖ జిల్లాలో ఈ టెండర్‌ను ఏఎంఆర్‌ సంస్థ దక్కించుకుంది. టెండర్‌ పొందినప్పటి నుంచి సంస్థ ఎక్కడికక్కడ చెక్‌పోస్టులను ఏర్పాటు చేయడంతో పాటు ప్రత్యేక వాహనాలతో ఫ్లైయింగ్‌ స్క్వాడ్‌ పేరుతో గ్రామాల్లో తిరుగుతోంది. ఎక్కడైనా చిన్న ట్రాక్టర్‌లో మట్టి కనిపించినా, ఎర్రపిక్క కనిపించినా రాయల్టీ చెల్లించాల్సిందేనంటూ ఒత్తిడి తెస్తోంది. తమ సొంత పొలంలో నుంచి మట్టిని తీసుకెళుతున్నా ఎందుకు డబ్బులు ఇవ్వాలని రైతులు ప్రశ్నిస్తున్నారు. ఇక వసూలు చేసే మొత్తాన్ని స్కానర్‌ ద్వారా సేకరిస్తున్నప్పటికీ, ఆ వివరాలను మైనింగ్‌ శాఖకు క్రమం తప్పకుండా సమర్పిస్తున్నారా లేదా అన్నది స్పష్టంగా తెలియడం లేదనే విమర్శలు ఉన్నాయి. వసూలైన డబ్బులు కంపెనీ ఖాతాలోకే వెళుతున్నాయా, లేక సొంత ఖాతాలకు మళ్లుతున్నాయా అన్న అనుమానాలు వ్యక్తమవుతున్నాయి. అంతేకాకుండా, వసూలు చేస్తున్న రాయల్టీకి సరైన బిల్లులు ఇస్తున్నారా అనే అంశాన్ని కూడా మైనింగ్‌ అధికారులు పట్టించుకోవడం లేదని ఆరోపణలు ఉన్నాయి. మొత్తం మీద మైనింగ్‌ శాఖ మౌనంతో ఏఎంఆర్‌ సంస్థ ఇష్టారాజ్యంగా వ్యవహరిస్తోందనే విమర్శలు వ్యక్తమవుతున్నాయి. రాయల్టీ వసూలు పేరుతో రుబాబు..! రాయల్టీ వసూలు బాధ్యతను దక్కించుకున్న ఏఎంఆర్‌ సంస్థ ఎక్కడికక్కడ చెక్‌పోస్టులను ఏర్పాటు చేసుకుంది. చెక్‌పోస్టుల వద్ద ప్రత్యేకంగా సిబ్బందిని నియమించింది. అక్కడ పనిచేసే సిబ్బంది క్వారీల నుంచి వచ్చే వాహనాల లోడ్‌ను గమనిస్తూ, అదనపు లోడు ఉంటే అదనపు రాయల్టీని ముక్కుపిండి వసూలు చేస్తున్నారనే ఆరోపణలు ఉన్నాయి. అంతేకాకుండా ‘ఫ్లైయింగ్‌ స్క్వాడ్‌’ పేరుతో జిల్లా వ్యాప్తంగా తిరుగుతూ, ఎక్కడైనా ఇంటి అవసరాల కోసం మట్టిని తరలిస్తున్నా రాయల్టీ చెల్లించాల్సిందేనంటూ వాలిపోతున్నారు. ఇంటి నిర్మాణం కోసం కొద్దిపాటి పిక్క తీసుకున్నా వందల్లో రాయల్టీ చెల్లించాలంటూ ఒత్తిడి తెస్తున్నారనే ఆరోపణలు వినిపిస్తున్నాయి. ఇక రైతులు తమ సొంత పొలంలో నుంచి మట్టిని తవ్వుకుని ఇంటి నిర్మాణం కోసం తరలిస్తున్నా అక్కడికక్కడే సిబ్బంది చేరుతున్నారు. రాయల్టీ కట్టాల్సిందేనంటూ చెబుతూ, ఎంత మొత్తం చెల్లించాలనే విషయాన్ని స్కానర్‌ ద్వారా చూపించి వసూలు చేస్తున్నట్లు తెలుస్తోంది. ఈ వ్యవహారంపై మైనింగ్‌ అధికారులకు ఫిర్యాదు చేస్తున్నప్పటికీ ‘మాకు సంబంధం లేదు’ అంటూ తప్పుకుంటున్నారనే విమర్శలు వ్యక్తమవుతున్నాయి. రాయల్టీ పేరుతో ఏఎంఆర్‌ రుబాబు ఇంటి నిర్మాణం కోసం పిక్కకు రొక్కం లెక్క ఉమ్మడి జిల్లాలో ఇష్టారాజ్యంగా చెక్‌పోస్టుల ఏర్పాటు ఫ్లైయింగ్‌ స్క్వాడ్‌లతో గ్రామాల్లో వేట ట్రాక్టర్‌ కనిపిస్తే స్కానర్‌ ఓపెన్‌ రూ.వందల నుంచి రూ.వేల వరకూ వసూళ్లు సొంత పొలం మట్టికీ రాయల్టీ తప్పదా..? మైనింగ్‌శాఖ మౌనం విమర్శలకు తావు

నీటమునిగిన శ్రీనివాస్‌తో మైరెన్‌ పోలీసులు ఎస్‌.రాయవరం : రేవుపోలవరం తీరంలో సముద్రంలో మునిగిపోతున్న యువకుడిని గస్తీ నిర్వహిస్తున్న పెంటకోట మైరెన్‌ పోలీసులు కాపాడి సురక్షితంగా ఒడ్డుకు చేర్చారు. ఈ సంఘటన మేరకు మైరెన్‌ ఏఎస్‌ఐ ఎం.కృష్ణ అందించిన వివరాలు ఇలా ఉన్నాయి. మాకవరపాలెం మండలం జి.కోడూరు గ్రామానికి చెందిన చవ్వాకుల శ్రీనివాస్‌ గురువారం 10వ తరగతి చివరి రోజు పరీక్ష రాసి స్నేహితులతో కలిసి సుమారు 10 మంది రేవు పోలవరం తీరానికి వచ్చారు. వీరిలో నలుగురు స్నేహితులు స్నానం కోసం సముద్రంలోనికి దిగారు. ఈ క్రమంలో ఒక్కసారిగా పెద్ద అలరావడంతో శ్రీనివాస్‌ మునిగిపోయాడు. అది గమనించిన మైరెన్‌ పోలీసులు హెచ్‌ఎస్‌ పి.అప్పలరాజు, శ్రీను, కానిస్టేబుల్‌ చినబాబు కలసి సముద్రంలోనికి దిగి శ్రీనివాస్‌ను ఒడ్డుకు చేర్చారు. స్వల్ప అస్వస్థతతో తీరంలో నుంచి బయటపడిన శ్రీనివాస్‌ను చూసి స్నేహితులు ఊపిరి పీల్చుకున్నారు. శ్రీనివాస్‌ ఆరోగ్యం నిలకడగా ఉండడంతో స్వగ్రామానికి పంపారు.

మునగపాక : రైతుల నుంచి ఎటువంటి భూమి సేకరించకుండా, ప్రత్యామ్నాయం చూపకుండా ప్రస్తుతం ఉన్న సాగునీటి కాలువలను ఎలా తవ్వేస్తారంటూ వైఎస్సార్‌సీపీ జిల్లా అధ్యక్షుడు బొడ్డేడ ప్రసాద్‌ ధ్వజమెత్తారు. రైతులకు ప్రత్యామ్నాయం చూపించి సాగునీటి కాలువ పనులు చేపట్టాలని డిమాండ్‌ చేశారు. అంతవరకు పనులు జరగకుండా చూడాలని తహసీల్దార్‌ సత్యనారాయణను కోరారు. వివరాలివి. పూడిమడక రోడ్డు విస్తరణలో భాగంగా మునగపాక మండలం గంగాదేవిపేట నుంచి మున గపాక జంక్షన్‌ వరకు వచ్చే మార్గంలో ఇరువైపులా సాగునీటి కాలువలు ఉండేవి. రహదారి విస్తరణలో ప్రస్తుతం ఉన్న కాలువల ద్వారా వేలాది ఎకరాల పంట పొలాలకు సాగునీరు అందుతూ వచ్చేది. అయితే విస్తరణలో భాగంగా ప్రస్తుతం ఉన్న సాగునీటి కాలువలో రిటైనింగ్‌ వాల్‌ నిర్మించే క్రమంలో పొక్లెయిన్‌ ద్వారా పనులు జరుగుతున్నాయి. విషయం తెలుసుకున్న స్థానిక రైతులు సమస్యను వైఎస్సార్‌సీపీ జిల్లా అధ్యక్షుడు బొడ్డేడ ప్రసాద్‌ దృష్టికి తీసుకువచ్చారు. దీంతో ఆయన గురువారం సంబంధిత ప్రాంతాన్ని పరిశీలించారు. రైతులకు జరుగుతున్న అన్యాయం గుర్తించి సమస్యను తహసీల్దార్‌ సత్యనారాయణ దృష్టికి తీసుకువచ్చారు. ఎటువంటి ప్రత్యామ్నాయం చూపకుండా ప్రస్తుతం ఉన్న సాగునీటి కాలువలను తవ్వేసే కార్యక్రమం ఎలా చేపడతారంటూ ఆగ్రహం వ్యక్తం చేశారు. రహదారి విస్తరణకు తాము సమ్మతమేనని అయితే అధికారుల నిర్లక్ష్యం కారణంగా పంటలు ముంపునకు గురయ్యే ప్రమాదం ఉందన్నారు. ప్రభుత్వం ఆలోచన లేకుండా రైతులకు నష్టం వాటిల్లేలా పనులు చేపట్టడం సరికాదన్నారు. దీంతో స్పందించిన తహసీల్దార్‌ సత్యనారాయణ సంబంధిత అధికారులతో మాట్లాడి రైతులకు సాగునీటి ఇబ్బందులు రాకుండా చర్యలు తీసుకుంటామని హామీ ఇచ్చారు. జెడ్పీటీసీ సభ్యుడు పెంటకోట స్వామి సత్యనారాయణ, వైఎస్సార్‌సీపీ మండల కన్వీనర్‌ ఆడారి అచ్చియ్యనాయుడు, రైతు సంఘ అధ్యక్ష, కార్యదర్శులు ఆడారి మహేష్‌, దాడి శివ, సీపీఎం నేత ఎస్‌.బ్రహ్మాజీ, రైతులు పాల్గొన్నారు.

● గోదావరి డెల్టాకు 12 టీఎంసీలు విడుదల ● చీఫ్‌ ఇంజినీర్‌ కేవీ రాజారావు సీలేరు: ఏపీ జెన్‌కో సీలేరు విద్యుత్‌ కాంప్లెక్స్‌లో గడిచిన వారం రోజులుగా జోరుగా విద్యుత్‌ ఉత్పత్తి జరుగుతుందని కాంప్లెక్స్‌ చీఫ్‌ ఇంజనీర్‌ కేవీ రాజారావు తెలిపారు. గురువారం సీలేరు వచ్చిన ఆయన స్థానిక విలేకరులతో మాట్లాడారు. ప్రస్తుతం ఈ వేసవిలో ఏప్రిల్‌, మే నెలలో రాష్ట్రానికి విద్యుత్‌ ఉత్పత్తి అందించడంలో సిబ్బంది నిరంతరం శ్రమిస్తున్నారన్నారు. దీనిలో భాగంగానే సీలేరు, మాచ్‌ ఖండ్‌, పొల్లూరు జల విద్యుత్‌ కేంద్రాల్లో రోజుకు గత వారం రోజులుగా 9 మిలియన్‌ యూనిట్ల విద్యుత్‌ ఉత్పత్తి జరుగుతుందని అన్నారు. మార్చి నాటికి 2314 మిలియన్‌ యూనిట్లు లక్ష్యం కాగా అంతకు మించి 24 65 మిలియన్‌ యూనిట్ల ఉత్పత్తి చేశామన్నారు. ప్రస్తుతం డొంకరాయి యూనిట్‌లో చేపట్టిన మరమ్మతు పనులు 45 రోజుల్లో పూర్తవుతాయని తెలిపారు. సీలేరు విద్యుత్‌ కాంప్లెక్స్‌లో విద్యుత్‌ ఉత్పత్తికి సంబంధించి బలిమెల జలాశయం నుంచి గడిచిన వారం రోజులుగా రోజుకు 8 క్యూసెక్కులు సీలేరు జలాశయంలోకి తీసుకుంటున్నామని అన్నారు. బుధవారం రాత్రి నుంచి 4వేల క్యూసెక్కులు మాత్రమే విడుదలవుతుందని.. ప్రస్తుతం ఆ నీటితో సీలేరు జల విద్యుత్‌ కేంద్రంలో నాలుగు యూనిట్ల ద్వారా రోజుకు మూడు మిలియన్‌ యూనిట్ల ఉత్పత్తి జరుగుతందని తెలిపారు ప్రస్తుతం బలిమెల జలాశయంలో ఆంధ్రా వాటా నీటిని కలుపుకొని సీలేరు, డొంకరాయి జలాశయంలో మొత్తం 57.2563 టీఎంసీల నీరు ఉందని అన్నారు. ఏప్రిల్‌ ఒకటో తేదీ వరకు డొంకరాయి మెయిన్‌ డ్యామ్‌ ద్వారా గోదావరి డెల్టాకు 12 టీఎంసీల వరకు నీటిని విడుదల చేశామన్నారు. ఆయన వెంట ఎస్‌ఈ జాకీర్‌ హుస్సేన్‌, మోతుగూడెం డీఈ బాలకృష్ణ ఉన్నారు.

నర్సీపట్నం : నర్సీపట్నం మున్సిపాలిటీ పరిధిలోని పెద్ద చెరువులో సృష్టి క్షేత్రం పేరుతో చేస్తున్న అక్రమ నిర్మాణాలపై హైకోర్టు స్టే విధించింది. కోర్టు అదేశాలను అమలు చేయాల్సిన అధికార యంత్రాగం కనీసం పట్టించుకోలేదు. స్పీకర్‌ సిహెచ్‌.అయ్యన్నపాత్రుడు, ఆయన కుమారుడి ఆధ్వర్యంలో చేపట్టిన సృష్టి క్షేత్రం అక్రమ నిర్మాణాలను సవాలు చేస్తూ మాజీ ఎమ్మెల్యే పెట్ల ఉమాశంకర్‌ గణేష్‌ హైకోర్టును ఆశ్రయించారు. పెద్ద చెరువులో ఎలాంటి నిర్మాణాలు చేపట్టడానికి వీల్లేదని కోర్టు ఆదేశించింది. ఈ పిల్‌పై ప్రతివాదులుగా ఉన్న జలవనరులు, కలెక్టర్‌తో పాటు స్పీకర్‌ అయ్యన్నపాత్రుడుకు నోటీసులు జారీ చేసింది. తదుపరి విచారణను జూన్‌ 17కు వాయిదా వేసిన విషయం తెలిసిందే. అయితే కోర్టు ఆదేశాలు ఇచ్చి 24 గంటలు గడుస్తున్నా ఇరిగేషన్‌ అధికారులు ఎటువంటి చర్యలు తీసుకోలేదు. చెరువు మధ్యలో వేస్తున్న రోడ్డు నిర్మాణానికి వినియోగిస్తున్న మిషనరీ ఇంకా అక్కడే ఉంది. ధర్మాసనం ఇచ్చిన ఆదేశాలను అమలు చేసేందుకు వెనకాడుతున్న ఇరిగేషన్‌ అధికారుల వైఖరిని కోర్టు దృష్టికి తీసుకువెళ్లేందుకు మాజీ ఎమ్మెల్యే సిద్ధమవుతున్నట్టు తెలిసింది.

గంభీరంలోని ఇండియన్‌ ఇనిస్టిట్యూట్‌ ఆఫ్‌ మేనేజ్‌మెంట్‌ ప్రాంగణంతగరపువలస: ఆనందపురం మండలం గంభీరం గల ఇండియన్‌ ఇన్‌స్టిట్యూట్‌ ఆఫ్‌ మేనేజ్‌మెంట్‌–విశాఖపట్నం(ఐఐఎంవీ)కు అంతర్జాతీయ స్థాయిలో గుర్తింపు లభించింది. యునైటెడ్‌ కింగ్‌డమ్‌ కేంద్రంగా పనిచేసే బిజినెస్‌ గ్రాడ్యుయేట్స్‌ అసోసియేషన్‌ నుంచి ఐదేళ్ల కాలానికి గాను ఐఐఎంవీ అక్రిడిటేషన్‌ను దక్కించుకుంది. ప్రపంచవ్యాప్తంగా వ్యాపార విద్యలో నాణ్యత, సామాజిక ప్రభావాన్ని గుర్తించే ఈ అక్రిడిటేషన్‌ను పొందిన దేశంలోని అతికొద్ది సంస్థల్లో ఐఐఎంవీ ఒకటిగా నిలవడం విశేషం. ఈ సందర్భంగా ఐఐఎంవీ డైరెక్టర్‌ ప్రొఫెసర్‌ ఎం.చంద్రశేఖర్‌ మాట్లాడుతూ.. ఈ గుర్తింపు అంతర్జాతీయ ప్రమాణాల పట్ల తమకున్న నిబద్ధతకు నిదర్శనమని పేర్కొన్నారు. నాణ్యమైన విద్య, బాధ్యతాయుతమైన నిర్వహణ, నిరంతర అభివృద్ధి అనేవి తమ సంస్థ మూల విలువలని, ఈ అక్రిడిటేషన్‌ వాటిని మరింత ప్రతిబింబిస్తోందన్నారు. ఈ గుర్తింపుతో గ్లోబల్‌ స్థాయిలో ఐఐఎంవీ ప్రతిష్ట మరింత పెరుగుతుందని, తద్వారా విదేశీ భాగస్వామ్యాలు, విద్యార్థుల మార్పిడి కార్యక్రమాలు, అంతర్జాతీయ పరిశోధనలకు కొత్త అవకాశాలు లభిస్తాయని ఆయన ఆశాభావం వ్యక్తం చేశారు.

కొరమీను చేప పిల్లలు విడుదలకు భూమి పూజ చేస్తున్న ప్రజాప్రతినిధులు అధికారులు నాతవరం : చేపల పెంపకానికి ప్రభుత్వం రాయితీపై యూనిట్లు మంజూరు చేస్తుందని ఎంపీడీవో శ్రీనివాస్‌ అన్నారు. మండల కేంద్రంలో గురువారం మూడు కొరమీను చేప పిల్లలు పెంపకం యూనిట్లను ప్రారంభించారు. ఈ సందర్భంగా ఏర్పాటు చేసిన సభలో ఆయన మాట్లాడుతూ వెలుగు పథకంలో కొరమీను చేపల పెంపకం కోసం రాయితీపై మూడు యూనిట్లు మంజూరు చేశామన్నారు. యూనిట్‌కు రూ.4 లక్షల 41వేలు కాగా అందులో రూ.లక్షా 35వేలు సబ్సిడీ ప్రభుత్వం ఇస్తుందన్నారు. ఈ యూనిట్‌ ఏర్పాటు చేసుకునే లబ్ధిదారుకు వ్యవసాయ భూమి, విద్యుత్‌, బోరు సదుపాయం ఉండాలన్నారు. యూనిట్‌ ఏర్పాటు చేసేందుకు బ్యాంకు ద్వారా రుణం ఇస్తామన్నారు. కొరమీను ఏడాదికి మూడు విడతలుగా పంట వస్తుందన్నారు. కార్యక్రమంలో వెలుగు ఏపీఎం కనకరాజు, జిల్లా మహిళా సమాఖ్య సంఘం అధ్యక్షురాలు కోరుబిల్లి మణి, నాతవరం, గన్నవరం పీఏసీఎస్‌ పర్సన్‌ ఇంచార్జిలు అపిరెడ్డి మాణిక్యం, సింగంపల్లి సన్యాసిదేముడు తదితరులు పాల్గొన్నారు.

అనకాపల్లి: అనకాపల్లి సినిమాను ఈనెల 8న దేశవ్యాప్తంగా విడుదల చేయడం జరుగుతుందని సినీదర్శకుడు నక్కిన త్రినాథ్‌ అన్నారు. స్థానిక ప్రైవేట్‌ ఫంక్షన్‌ హాల్లో గురువారం విలేకరుల సమావేశం నిర్వహించారు. ‘అనకాపల్లి’ సినిమాను అనకాపల్లి జిల్లాలో వివిధ ప్రాంతాల్లో నిర్వహించడం జరిగిందన్నారు. అనకాపల్లిపై ఉన్న అభిమానంతో సినిమాను తీయడం జరిగిందని, ఇక్కడ ప్రజలు ఎక్కువగా సినిమాన్ని ఆదరించడమే కాకుండా దేశంలో వివిధ ప్రాంతాల్లో ఈ చిత్రాన్ని పదర్శించి, అనకాపల్లి పేరును చాటడం జరుగుతుందన్నారు. విక్రమ్‌ సహదేవ్‌ హీరోగా సంధ్య వశిష్ట హీరోయిన్‌గా తారక్‌ కొండప్ప విలన్‌గా నటించడం జరిగిందన్నారు. అంతకుముందు సంధ్య వశిష్ట, తారక్‌ కొండప్పలు సినిమా షూటింగ్‌లో వారి అనుభవాలను వివరించారు. కార్యక్రమంలో భవ్యశ్రీ డెవలపర్‌ అధినేత, గవరపాలెం కనకదుర్గమ్మవారి ఆలయ శాశ్వత చైర్మన్‌ కాండ్రేగుల శ్రీరామ్‌, ఆలయ వ్యవస్థాపకుడు పి.వి.రమణ, సహనిర్మాత కుమార్‌రాజా, నూకాంబిక దేవస్థానం మాజీ చైర్మన్‌ కొణతాల మురళీకృష్ణ పాల్గొన్నారు.

నర్సీపట్నం : మాజీ ముఖ్యమంత్రి వై.ఎస్‌.జగన్‌మోహన్‌రెడ్డిని తాడేపల్లి కార్యాలయంలో గురువారం మాజీ ఎమ్మెల్యే పెట్ల ఉమాశంకర్‌ గణేష్‌ మర్యాద పూర్వకంగా కలిసారు. నియోజకవర్గంలో జరుగుతున్న రాజకీయ పరిణామాలను జగన్‌మోహన్‌రెడ్డి దృష్టికి తీసుకువెళ్లినట్టు గణేష్‌ తెలిపారు. తుమ్మపాల: జడ్పీ వైస్‌ చైర్‌పర్సన్‌ భీశెట్టి సత్యవతి, ఆమె కుమారుడు వైఎస్సార్‌సీపీ నియోజకవర్గ నాయకుడు భీశెట్టి జగన్‌ తాడేపల్లిలో వైఎస్సార్‌సీపీ అధినేత, మాజీ ముఖ్యమంత్రి వై.ఎస్‌ జగన్‌మోహన్‌రెడ్డిని గురువారం మర్యాదపూర్వకంగా కలిసారు. దుశ్శాలువాతో సత్కరించి పుష్పగుచ్ఛం అందించారు. ఈ సందర్భంగా జిల్లాలో ప్రస్తుత రాజకీయ పరిస్థితులు, ప్రజా సమస్యలపై ఆయనతో చర్చించినట్లు తెలిపారు. జిల్లాలో సమస్యలను ఆయన దృష్టికి తీసుకెళ్లామని తెలిపారు.

తుమ్మపాల: సోలార్‌ పవర్‌ ప్లాంట్‌ పేరుతో భూసేకరణ ఆపాలంటూ చీడికాడ మండలం జి.కొత్తపల్లి, అడవుల అగ్రహారం, బైలపూడి, చిన్నగోగాడ గ్రామాల ప్రజలు కలెక్టరేట్‌ గేటు వద్ద సీపీఎం ఆధ్వర్యంలో గురువారం నిరసన చేపట్టారు. అనంతరం జాయింట్‌ కలెక్టర్‌కు వినతి పత్రం అందించారు. ఈ సందర్భంగా సీపీఎం మండల కార్యదర్శి ఆర్‌ దేముడు నాయుడు మాట్లాడుతూ జి. కొత్తపల్లిలో సర్వే నంబరు 166,167లో 40 ఎకరాలు, అడవుల అగ్రహారంలో సర్వే నంబరు 63లో 55 ఎకరాలు, బైలపూడిలో సర్వే నంబరు 122లో 60 ఎకరాలు, చిన్న గోగాడలో సర్వే నంబరు2లో 70 ఎకరాలు మొత్తం 225 ఎకరాలకు సాగు నిమిత్తం 65 ఏళ్ల క్రితం రాష్ట్ర ప్రభుత్వం డీ పట్టా ఇచ్చిందన్నారు. 320 మంది పేద రైతు కుటుంబాలు తాతలు, తండ్రుల నాటి నుంచి సాగు చేసుకుంటున్నారని తెలిపారు. ఈ నేపథ్యంలో ఏపీ ఈపీడీసీఎల్‌ ద్వారా రాష్ట్ర ప్రభుత్వం 57.97 మెగావాట్ల సోలార్‌ విద్యుత్‌ ప్లాంట్‌ని నిర్మించనున్నట్లు ప్రకటించిందన్నారు. జీడి, మామిడి, పామాయిల్‌, నువ్వులు, వేరుశనగ వంటి పంటలు పండించుకుంటూ జీవనం సాగిస్తున్న నిరుపేద రైతులు నుంచి భూములు తీసుకుంటే వారి పరిస్థితి ఏంటని ప్రశ్నించారు. రైతుల భూములు లాక్కోవద్దని, సోలార్‌ పవర్‌ ప్లాంట్‌కి వ్యతిరేకంగా ధర్నా నిర్వహించారు. కార్యక్రమంలో ఏ అగ్రహారం సర్పంచ్‌ సలారి గంగశేషు, మాజీ ఎంపీపీ కొల్లి అప్పలనాయుడు, గంటా మాచిరాజు, కన్నబాబు నాగరాజు, చలుగు శ్రీనువాస్‌, రైతులు పాల్గొన్నారు.

పాయకరావుపేట: పట్టణంలో రూ.5.20 కోట్లతో విస్తరిస్తున్న మెయిన్‌ రోడ్డు నిర్మాణంలో నాణ్యత లోపిస్తోందని వైఎస్సార్‌సీపీ జిల్లా అధికార ప్రతినిధి దగ్గుపల్లి సాయిబాబా, ఉప సర్పంచ్‌ జగతా భవానీశ్రీనివాస్‌, పట్టణ శాఖ అధ్యక్షుడు ధనిశెట్టి మహేష్‌ విమర్శించారు. పట్టణంలో దగ్గుపల్లి సాయిబాబా కార్యాలయంలో గురువారం వారు మాట్లాడుతూ వీఎంఆర్‌డీఏ నిధులతో చేపట్టిన విస్తరణ పనుల్లో అధికారుల పర్యవేక్షణ లేదన్నారు. కరెంటు లేకుండానే రాత్రిపూట పనులు చేపడుతున్నారన్నారు. చంద్రబాబు ప్రభుత్వం మిగిలిన మూడేళ్ల పాటు మనుగడ ఉండేలా రోడ్డు నిర్మిస్తున్నారన్న అనుమానాలు వ్యక్తమవుతున్నాయన్నారు. ఆ తర్వాత ఎలా పోయినా పర్వాలేదన్నట్లు కాంట్రాక్టర్లు, కూటమి నాయకుల వ్యవహారశైలి ఉందన్నారు. పూర్తిగా కూటమి నాయకుల కనుసన్నల్లోనే పనులు జరగడం వల్ల నాణ్యత లోపించిందన్నారు. ఎస్టిమేషన్‌లో పేర్కొన్న విధంగా మెటీరియల్‌ను సముపాళ్లలో వినియోగించడం లేదన్నారు. 20 ఎంఎం, 40 ఎంఎం, క్రషర్‌ చిప్స్‌ బూడిద వేయాల్సి ఉండగా, బూడిద మాత్రమే వేస్తున్నారన్నారు. సరిగ్గా రోలింగ్‌ చేయడం లేదన్నారు. రోడ్డు విస్తరణ చేసేందుకు హోం మంత్రి నిర్ణయించినప్పుడు పాయకరావుపేట పట్టణాభివృద్ధిని దృష్టిలో ఉంచుకుని స్వాగతించామన్నారు. రోడ్డుపై చిరువ్యాపారులకు న్యాయం చేయలేదన్నారు. వారికి ప్రత్యామ్నాయ ఏర్పాట్లు ఇంతవరకు చూపలేదన్నారు. 2014లో టీడీపీ ప్రభుత్వంలో రోడ్డు విస్తరణ పనులు ప్రారంభించి ఆపేశారన్నారు. కోర్డు వివాదం కారణంగా వైఎస్సార్‌సీపీ ప్రభుత్వంలో విస్తరణను పక్కన పెట్టి కొత్త రోడ్డు నిర్మించామన్నారు. అదే సమయంలో రోడ్డుకు ఇరువైపులా వేసిన బెర్మ్‌లను ఇప్పుడు తొలగిస్తున్నారన్నారు. తవ్వకాల్లో వచ్చిన గ్రావెల్‌ను అనధికార లేఅవుట్‌లకు తరలిస్తున్నారన్నారు. హోం మంత్రి ఈ రెండు విషయాలపై దృష్టి సారించాలన్నారు. నాసిరకం పనులపై విచారణ జరిపించాలని, బెర్మ్‌ తవ్వకాల్లో వచ్చిన గ్రావెల్‌ను తరలిస్తున్న అనధికార లేఅవుట్లపై చర్యలు తీసుకోవాలని డిమాండ్‌ చేశారు. నాసిరకం పనులపై క్వాలిటీ కంట్రోలు, విజిలెన్స్‌ అధికారులకు ఫిర్యాదు చేయనున్నట్లు తెలిపారు. సమావేశంలో వార్డు సభ్యులు కొప్పిశెట్టి మోహన్‌, పిరాది రాజు, తుమ్మలపల్లి సతీష్‌, బీసీ సెల్‌ అధ్యక్షుడు కేశనకుర్తి సత్తిబాబు, కోనేటి పద్మారావు, పోసిన వీరబాబు, కె. రంగ తదితరులు పాల్గొన్నారు.

తేగాడలోని కస్తూర్భాగాంధీ విద్యాలయంలో పరిశీలిస్తున్న కేంద్ర అధ్యయన బృందం కశింకోట : మండలంలోని తేగాడ వద్ద ఉన్న కస్తూర్భాగాంధీ విద్యాలయాన్ని రాష్ట్ర ఆర్థిక శాఖ ప్రిన్సిపల్‌ కార్యదర్శి రొనాల్డ్‌ రోజ్‌ బృందం గురువారం సందర్శించింది. ఈ సందర్భంగా వ్యర్థాలను అరికట్టడానికి ప్రయోగాత్మకంగా జిల్లాలోని వసతి గృహాలు, కస్తూర్భాగాంధీ విద్యా సంస్థలతోపాటు ఇక్కడ కూడా ఏర్పాటు చేసిన కంపోస్టు ఎరువు తయారీ, వర్షం నీరు, వాడుక నీరు నివారణ కోసం నిర్మించిన ఇంకుడు గొయ్యి, కూరగాయలు పండించేందుకు ఏర్పాటు చేసిన కిచెన్‌ గార్డెన్‌లను బృందం పరిశీలించింది. వాటి నిర్వహణ తీరును అధ్యయనం చేసి సంతృప్తి వ్యక్తం చేసింది. విద్యార్థులతో ఈ కార్యక్రమం అమలుపై ఉన్న అవగాహన గురించి బృందం చర్చించింది. విద్యార్థులు, ఉపాధ్యాయులను అభినందించింది. ఈ సందర్భంగా రోనాల్డ్‌ రోజ్‌ కస్తూర్భా విద్యా సంస్థ ఆవరణలో మొక్కలు నాటారు. బృందంలో ఏపీ ప్రిన్సిపల్‌ కార్యదర్శి రొనాల్డ్‌ రోజ్‌ , డీఈవో అప్పారావునాయుడు, ఎంఈవోలు సురేష్‌కుమార్‌, రమణశ్రీ, ఎంపీడీవో సిహెచ్‌.చంద్రశేఖర్‌రావు పాల్గొన్నారు.

నాతవరం : మండల కేంద్రానికి చెందిన వైఎస్సార్‌సీపీ నేత గుడివాడ వెంకటరమణకు చెందిన గడ్డివాముకు గుర్తు తెలియని వ్యక్తులు నిప్పు పెట్టడంతో కాలిబూడిదైంది. నాతవరం గ్రామ సమీపంలో రెవెన్యూ పరిధిలో సర్వే నెంబరు 336లో సుమారుగా మూడు ఎకరాలు 60 సెంట్లు వ్యవసాయ భూమి ఉంది. ఈ భూమిలో వ్యవసాయం సాగు చేసుకుంటూ పశువులు పాకలు వేసుకుని పాడి పరిశ్రమ నడుపుతున్నారు. గేదెలు, ఆవులు కలిపి 15పైగా పశువులు ఉన్నాయి. పాడి పరిశ్రమ నడుపుతున్న వెంకటరమణ పశువులకు ఏడాది కాలం పాటు మేతకు అవసరమైన ఇటీవల ఆరు ట్రాక్టర్లు ఎండిగడ్డి కొనుగోలు చేసి తన పశువుల మకాం వద్ద నిల్వ చేసుకున్నాడు. ఎప్పటి మాదిరిగా బుధవారం సాయంత్రం వరకూ పశువుల సంరక్షణ చూసి ఇంటికి వచ్చేశారు. బుధవారం అర్ధరాత్రి సమయంలో గడ్డి వాము తగలబడడం చూసి స్థానికులు సమాచారం అందించారు. వెంకటరమణ వెంటనే పశువుల మకాం వద్దకు వెళ్లి చూసేసరికి పెద్ద మంటలతో గడ్డివాములు కాలిపోతుంది. నర్సీపట్నం అగ్నిమాపక కేంద్రానికి సమాచారం ఇవ్వడంతో అగ్నిమాపక వాహనం వచ్చి మంటలను అదుపు చేసిందన్నారు. సమీపంలో ఉన్న పశువులు పాకలు, పశువులకు ప్రమాదం జరగకుండా జాగ్రత్త పడ్డారు. ఇటీవల పాడి పశువుల మేత కోసం సుమారుగా లక్ష రూపాయలతో కొనుగోలు చేసి నిల్వ చేసుకున్న గడ్డివాము పూర్తిగా కాలిపోయిందని బాధితుడు వెంకటమణ ఆవేదన వ్యక్తం చేశారు. వెంకటరమణ నాతవరం గ్రామంలో వైఎస్సార్‌సీపీలో కీలకంగా పని చేస్తుంటాడు. వెంకటరమణ గడ్డివామును ఎవరో కావాలనే తగులబెట్టి ఉంటారని స్థానికులు అనుమానిస్తున్నారు. ఘటనపై బాధితుడు వెంకటరమణ గురువారం తహసీల్దార్‌ చందనరేఖకు ఫిర్యాదు చేశారు.

మునగపాక : మండలంలోని కుంచవానిపాలెం గ్రామానికి చెందిన వ్యక్తి అనుమానాస్పదంగా మృతి చెందినట్టు ఎస్‌ఐ పి.ప్రసాదరావు తెలిపారు.ఇందుకు సంబందించిన వివరాలను ఆయన గురువారం విలేకరులకు తెలిపారు. కుంచవానిపాలెం గ్రామానికి చెందిన పుచ్చ పారిపల్లి (38) ప్రైవేటు కంపెనీలో పనిచేస్తున్నాడు. ఎప్పటిలాగానే బుధవారం పనులు ముగించుకొని ఇంటికి చేరుకొని రాత్రి నిద్రపోయాడు. తెల్లవారు లేచి చూసేసరికి పారిపల్లి మృతి చెంది ఉండడాన్ని గమనించిన కుటుంబ సభ్యులు స్థానిక పోలీసులకు సమాచారం అందించారు. అనుమానాస్పద మృతిగా గుర్తించి కేసు నమోదు చేశారు. పారిపల్లి మృతదేహాన్ని అనకాపల్లి వందపడకల ఆసుపత్రికి పోస్టుమార్టంకు తరలించారు. కేసు నమోదు చేసి దర్యాప్తు చేస్తున్నామని ఎస్‌ఐ ప్రసాదరావు తెలిపారు.

గోవాడ ఫ్యాక్టరీ వద్ద ధర్నా చేస్తున్న కార్మికులు చోడవరం: కార్మికులను నష్టం కలిగించే లేబర్‌ కోడ్స్‌ను వెంటనే రద్దు చేయాలని కోరుతూ సీఐటీయు ఆధ్వర్యంలో గోవాడ సుగర్‌ఫ్యాక్టరీ గేటు వద్ద బుధవారం ధర్నా నిర్వహించారు. లేబర్‌ కోడ్స్‌కు వ్యతిరేకంగా సీఐటీయు ఆధ్వర్యంలో దేశవ్యాప్తంగా నిరసనకు పిలుపు ఇవ్వడంతో దీనిలో భాగంగా గోవాడ ఫ్యాక్టరీ వద్ద కార్మికులు ధర్నా చేశారు. లేబర్‌ కోడ్స్‌ను రద్దు చేసి గతంలో ఉన్న 29 కార్మిక చట్టాలను యథావిధిగా అమలు చేయాలని డిమాండ్‌ చేశారు. కార్మికులను నష్టం కలిగించే చట్టాలను కేంద్రం తీసుకొచ్చిందని, వెంటనే వీటిని రద్దు చేయాలని సీఐటీయు జిల్లా అధ్యక్షుడు వి.వి.శ్రీనివాసరావు, గోవాడ సుగర్స్‌ కార్మిక సంఘం నాయకులు శరగడం రామునాయుడు డిమాండ్‌ చేశారు. ప్రభుత్వ విధానాల వల్ల గోవాడ సుగర్‌ ప్యాక్టరీలో కార్మికులు, రైతులకు తీరని నష్టం కలిగిందని వారు ఆగ్రహం వ్యక్తం చేశారు. తక్షణంలో రైతులు, కార్మికులకు రావలసిన బకాయిలను చెలించాలని వారు డిమాండ్‌చేశారు. ఈ ఆందోళనలో నాయకులు ఎస్‌.వి నాయుడు, రాయి సూరిబాబు, రామకుమార్‌ పాల్గొన్నారు.

మాట్లాడుతున్న సహాయ కార్మికాధికారి సూర్యనారాయణ చోడవరం: కార్మికులకు అన్ని సంక్షేమ పథకాలు అందించేందుకు చర్యలు తీసుకున్నామని కార్మిక శాఖ సహాయ కార్మికాధికారి పి. సూర్యనారాయణ అన్నా రు. బుధవారం చోడవరంలో సబ్బవరం, దేవరాపల్లి, కె.కోటపాడు, చీడికాడ, బుచ్చెయ్య పేట, రావికమతం, మాడుగుల మండలాలకు చెందిన కార్మిక సంఘాలతో ఆయన సమావేశమయ్యారు. గత నెల నుంచి సంక్షేమ పథకాలన్నీ పునరుద్ధరించామ న్నారు. కార్మికుల కుమార్తెల వివాహానికి రూ.40 వేలు, ప్రసూతి ఖర్చులకు రూ. 20వేలు, సహజ మరణానికి రూ.60వేలు, దహన ఖర్చులకు రూ. 20వేలు ఇచ్చే పథకాలు పునరుద్ధరించామన్నారు.

చోడవరం : వైఎస్సార్‌సీపీ నాయకులకు కోర్టులో ఊరట లభించింది. ఆ పార్టీ నాయకులపై పెట్టిన అక్రమ కేసును చోడవరం కోర్టు కొట్టివేస్తూ బుధవారం తీర్పు వెలువరించింది. 12 మంది వైఎస్సార్‌సీపీ నాయకులపై పెట్టిన కేసు నిరాధారమైనదంటూ నిర్దోషులుగా పేర్కొంటూ వారిపై పెట్టిన కేసును కోర్టు కొట్టేసింది. వివరాల్లోకి వెళితే... 2018లో వైఎస్సార్‌సీపీ అధినేత వై.ఎస్‌. జగన్‌మోహన్‌రెడ్డిపై విశాఖపట్నం ఎయిర్‌పోర్టులో ఒక యువకుడు కోడి కత్తితో దాడి చేసి హత్యాయత్నానికి పాల్పడిన విషయం తెలిసిందే. దీనిపై ఆందోళన చెందిన చోడవరం వైఎస్సార్‌సీపీ నాయకులు తమ అధినేతపై జరిగిన హత్యాయత్నానికి పాల్పడిన వారిని శిక్షించాలంటూ శాంతియుతంగా చోడవరం పట్టణంలో నిరసన తెలిపారు. ఈ నిరసనలో ఎటువంటి అవాంఛనీయ సంఘటనలు జరగకపోయినప్పటికీ అప్పటి టీడీపీ ప్రభుత్వం పోలీసులపై ఒత్తిడి తెచ్చి స్థానిక వైఎస్సార్‌సీపీ రాష్ట్ర కార్యదర్శి ఏడువాక సత్యారావు, చోడవరం జెడ్పీటీసీ మారిశెట్టి విజయశ్రీకాంత్‌, చోడవరం ఉపసర్పంచ్‌ పుల్లేటి వెంకట్రావు,బిసీసెల్‌ రాష్ట్ర సంయుక్త కార్యదర్శి పల్లా నర్సింగరావు, మాజీ మార్కెట్‌ కమిటీ చైర్మన్‌ వెంపలి ఆనంద్‌, జిల్లా ప్రతినిధి జ్యోతుల రమేష్‌, సోషల్‌ మీడియా రాష్ట్ర సంయుక్త కార్యదర్శి పందిరి శ్రీనివాసరావు, జిల్లా ఆర్గనైజింగ్‌ కార్యదర్శి ఓరుగంటి నెహ్రూ, జిల్లా ప్రతినిధి వడ్డాది నర్సింహమూర్తి, మండల బీసీసెల్‌ అధ్యక్షుడు సూరిశెట్టి నాగదుర్గగోవింద, మండల పరిషత్‌ ఉపాధ్యక్షుడు శరగడం నాగేశ్వరరావు, పట్టణ అధ్యక్షురాలు అల్లాడ భవానీతో సహా 12 మందిపై అక్రమంగా కేసులు నమోదు చేశారు. అప్పటి నుంచి 9సంవత్సరాలు పాటు వాయిదాలకు కోర్టుకు తిరిగిన ఆ పార్టీ నాయకులకు కోర్టులో ఎట్టకేలకు ఊరట లభించింది. వైఎస్సార్‌సీపీ నాయకుల తరపున ఆ పార్టీ లీగల్‌ అడ్వయిజర్‌ కాండ్రేగుల డేవిడ్‌ కోర్టులో వాదనలు వినిపించారు. అప్పటి తహసీల్దార్‌, ఇద్దరు ఎస్‌ఐలు, పలువురు కానిస్టేబుళ్లు ఈ విచారణలో కోర్టుకు హాజరయ్యారు. చోడవరం జుడీషియల్‌ ఫస్ట్‌క్లాస్‌ మెజిస్ట్రేట్‌ కోర్టు న్యాయమూర్తి స్వర్ణ ఈ కేసును విచారణ చేసి తుది తీర్పు చెప్పారు. నిందితులపై మోపబడిన ఆరోపణలు రుజువు కాకపోవడంతో వారిని నిర్దోషులుగా పరిగణిస్తూ న్యాయమూర్తి కేసును కొట్టివేశారని నిందితుల తరపు న్యాయవాది కాండ్రేగుల డేవిడ్‌ చెప్పారు. ఈ సందర్భంగా వారంతా డెవిడ్‌కు కృతజ్ఞతలు తెలిపారు. తమపై టీడీపీ ప్రభుత్వం అక్రమ కేసులు పెట్టినప్పటికీ న్యాయమే గెలిచిందని వైఎస్సార్‌సీపీ నాయకులు అన్నారు.

ప్రభుత్వ భూముల పరిరక్షణకు● సీఎంఓ కార్యాలయం, పీజీఆర్‌ఎస్‌ దరఖాస్తులపై ప్రత్యేక శ్రద్ధ ● రెవెన్యూ అధికారుల సమీక్షలో కలెక్టర్‌ విజయకృష్ణన్‌తుమ్మపాల: ప్రభుత్వ భూముల పరిరక్షణకు పటిష్ట చర్యలు చేపట్టాలని సంబంధిత అధికారులను కలెక్టర్‌ విజయకృష్ణన్‌ ఆదేశించారు. బుధవారం ఉదయం కలెక్టర్‌ కార్యాలయ సమావేశ మందిరంలో రెవెన్యూ అధికారులతో నిర్వహించిన సమావేశంలో ఆమెతో పాటు జాయింట్‌ కలెక్టర్‌ ఽశౌర్యమాన్‌ పటేల్‌ అధికారులకు పలు సూచనలు జారీ చేశారు.ఈ సందర్భంగా ఆమె మాట్లాడుతూ ప్రస్తుతం ఉన్న భూముల తాలూక తాజా పరిస్థితులను తెలుపుతూ నివేదికలు సమర్పించాలని, సంక్షిష్ట పరిస్థితులకు సంబంధించి తగిన చర్యలు చేపట్టాలని ఆదేశించారు. పట్టాదార్‌ పాస్‌పుస్తకాలు పంపిణీ, రీ సర్వే, వెబ్‌ ల్యాండింగ్‌ పోర్టింగ్‌, తదితర అంశాలపై నిర్వహించాల్సిన విధి విధానాల గురించి ప్రస్తావించారు. మ్యుటేషన్ల ప్రక్రియలో జాప్యాన్ని నివారించేందుకు అధికారులు చర్యలు తీసుకోవాలన్నారు. జీవో నెం. 30 ప్రకారం అందరికీ ఇల్లు కార్యక్రమంపై అధికారులకు దిశా నిర్దేశం చేశారు. సీఎంవో కార్యాలయం నుంచి, పీజీఆర్‌ఎస్‌లో వచ్చిన దరఖాస్తులపై అధికారులు స్వయంగా పరిశీలించి చర్యలు చేపట్టాలన్నారు. 22(ఏ) పెండింగ్‌ కేసుల వివరాలను అడిగి తెలుసుకుని త్వరితగతిన పరిష్కరించేందుకు చర్యలు చేపట్టాలని అధికారులను ఆదేశించారు. కోర్టు కేసుల విషయంలో అధికారుల అప్రమత్తంగా ఉండాలని అన్నారు. చౌక ధరల దుకాణాలు, పెట్రోలు బంకులను ఎప్పటికప్పుడు తనిఖీ చేయాలన్నారు. చౌక ధరల దుకాణాలకు మహిళలు పిల్లలు వచ్చినట్లయితే ముందుగా వారికి సరుకులు పంపిణీ చేయాలని, మంచి నీరు ఏర్పాటు చేయాలని, వైద్య ఆరోగ్య శాఖ అధికారులతో చర్చించి ఓఆర్‌ఎస్‌ ప్యాకెట్లు అందుబాటులో ఉంచాలన్నారు. జిల్లాలో గ్యాస్‌ కొరత లేదని, గ్యాస్‌ ఏజెన్సీలలో ముందస్తు బుకింగ్స్‌ లేకుండా చూడాలని, గ్యాస్‌ సిలిండర్లను డోర్‌ డెలివరీ ద్వారా మాత్రమే అందజేయాలని, గ్యాస్‌ గోడౌన్‌ వద్ద ఎటువంటి డెలివరీలు లేకుండా అధికారులు చర్యలు చేపట్టాలన్నారు. గనులు క్వారీలపై అధికారులు సమన్వయంతో ముందుకు వెళ్లాలన్నారు. ఫైర్‌ క్రాకర్‌ యూనిట్లకు సంబంధించిన తనిఖీ నివేదికలను సమర్పించాలని సంబంధిత అధికారులను ఆదేశించారు. ఈ సమావేశంలో జిల్లా రెవెన్యూ అధికారి వై. సత్యనారాయణ రావు, ఆర్డీవోలు వి.వి. రమణ, షేక్‌ ఆయేషా, స్పెషల్‌ డిప్యూటీ కలెక్టర్లు, తహశీల్దార్లు, డిప్యూటీ తహశీల్దార్లు, పలువురు రెవెన్యూ సిబ్బంది పాల్గొన్నారు.

నర్సీపట్నం: మూడేళ్లకోసారి నిర్వహించే పట్టణ ప్రజల ఇలవేల్పు మరిడమ్మ జాతర కనులపండువగా జరిగింది. రెల్లివీధి నుండి అమ్మను గరగలు నృత్యం, వివిధ కాగితపు పువ్వుల అలంకరణతో తీసుకువచ్చారు. ఊరేగింపులో వివిధ రకాల కళాకారులు, వేషదారుణలతో ఉత్సాహంగా పాల్గొన్నారు. తీన్మార్‌ డప్పులు, అమ్మవారి శక్తి అవతారాలతో కళాకారులు, వివిధ రకాల డప్పు వాద్యకారులు ఊరేగింపులో పాల్గొన్నారు. దారిపొడవునా ప్రజలు ఊరేగింపును తిలకించడానికి బారులు తీరారు. రోడ్లన్నీ కిక్కిరిసిపోయాయి. ఈ ఊరేగింపు సందర్భంగా పోలీసులు ట్రాఫిక్‌ను మళ్లించారు. స్పీకర్‌ చింతకాయల అయ్యన్నపాత్రుడు కుటుంబ సభ్యులు ఊరేగింపులో పాల్గొన్నారు.

హోంగార్డు వెంకటరావు భార్య నీలిమకు చెక్కు అందజేస్తున్న ఎస్పీ తుహిన్‌ సిన్హా అనకాపల్లి: పోలీస్‌ శాఖలో హోంగార్డులు ఒక భాగమేనని ఎస్పీ తుహిన్‌ సిన్హా తెలిపారు. ఇటీవల అనారోగ్యంతో మృతి చెందిన హోంగార్డు డి.వి.వెంకటరావు భార్య నీలిమకు రూ.4,24,120 చెక్కును బుధవారం స్థానిక ఎస్పీ కార్యాలయంలో అందజేశారు. ఈ సందర్భంగా మాట్లాడుతూ విశాఖ ఆర్‌.ఐ.ఎన్‌.ఎల్‌ స్టీల్‌ ప్లాంట్‌లో డిప్యూటేషన్‌పై విధులు నిర్వర్తిస్తూ, అనారోగ్యంతో మరణించిన వెంకటరావు కుటుంబానికి అనకాపల్లి, అల్లూరి సీతారామరాజు జిల్లాల్లో మిగిలిన హోంగార్డులు ఒక రోజు గౌరవ వేతనాన్ని అందజేయడం అభినందనీయమన్నారు. కార్యక్రమంలో ఎ.ఓ సి.హెచ్‌.తిలక్‌ బాబు, ఆఫీస్‌ సూపరింటెండెంట్‌ దేవరాజు, జూనియర్‌ అసిస్టెంట్‌ రమేష్‌ తదితరులు పాల్గొన్నారు.

సాక్షి, విశాఖపట్నం : భారతీయ రైల్వేలో వాల్తేరు విభాగం మునుపెన్నడూ లేని విధంగా చరిత్రాత్మక విజయాలను నమోదు చేస్తూ ప్రగతి పథంలో దూసుకుపోతోందని డీఆర్‌ఎం లలిత్‌ బోహ్రా తెలిపారు. వాల్తేరు డీఆర్‌ఎం కార్యాలయంలో బుధవారం మీడియా సమావేశంలో 2025–26 ఆర్థిక సంవత్సరంలో వాల్తేరు ప్రగతి వివరాలను వెల్లడించారు. ప్రస్తుత ఆర్థిక సంవత్సరంలో అద్భుతమైన పనితీరును కనబరిచిన ఈ విభాగం, దేశవ్యాప్తంగా అత్యధిక ఆదాయం గడించిన విభాగాల్లో ఐదో స్థానాన్ని కై వసం చేసుకుని తన ప్రత్యేకతను చాటుకుందని తెలిపారు. ప్రధానంగా సరుకు రవాణాలో 85.1 మిలియన్‌ టన్నుల రికార్డు స్థాయి లక్ష్యాన్ని చేరుకోవడమే కాకుండా, మునుపటి ఏడాదితో పోలిస్తే 17.25 శాతం వృద్ధిని నమోదు చేసి సరికొత్త అధ్యాయాన్ని లిఖించామన్నారు. వాల్తేరు డీఆర్‌ఎం ఇంకా ఏం చెప్పారంటే.. ఆర్థిక రికార్డులు.. కార్యకలాపాల జోరు వాల్తేరు విభాగం ఈ ఏడాది మొత్తం రూ.11,598 కోట్ల ఆదాయాన్ని ఆర్జించింది. ఇది గతేడాదితో పోలిస్తే 17 శాతం అధికం. ముఖ్యంగా సరుకు రవాణా, రవాణా నిర్వహణలో 150 మిలియన్‌ టన్నుల మైలురాయిని దాటి అగ్రగామిగా నిలిచింది. ప్రయాణికుల రాకపోకలు కూడా గణనీయంగా పెరిగాయి. సుమారు 3.34 కోట్ల మంది ప్రయాణికులు వాల్తేరు రైల్వే సేవలను వినియోగించుకోగా, గత 21 ఏళ్లలో ఎన్నడూ లేని విధంగా ప్రయాణికుల విభాగం ద్వారా రూ.881.37 కోట్ల ఆదాయం సమకూరింది. క్యాటరింగ్‌, పార్కింగ్‌, ప్రకటనలు, టికెట్‌ తనిఖీల ద్వారా కూడా భారీగా ఆదాయం ఆర్జించాం. శరవేగంగా స్టేషన్ల నవీకరణ పనులు వాల్తేరు డివిజన్‌ పరిధిలో అమృత్‌ భారత్‌ స్టేషన్‌ పథకం కింద 15 రైల్వే స్టేషన్లను ఆధునీకరించేందుకు ఎంపిక చేశాం. విశాఖపట్నం ప్రాంతంలో రైలు ఫ్లైఓవర్లు, అదనపు లైన్ల నిర్మాణం, స్టేషన్ల నవీకరణ పనులు శరవేగంగా జరుగుతున్నాయి. ప్రయాణికుల సౌకర్యం కోసం విశాఖపట్నం స్టేషన్‌లో స్లీపింగ్‌ పాడ్స్‌, విశాఖలో 220, విజయనగరంలో 24 డిజిటల్‌ స్క్రీన్‌లు, అత్యాధునిక వెయిటింగ్‌ హాల్స్‌ ఏర్పాటు చేశాం. పండగలు, సెలవుల రద్దీని తట్టుకునేందుకు 300కు పైగా ప్రత్యేక రైళ్లు, 400 అదనపు కోచ్‌లను నడిపాం. విశాఖపట్నం నుంచి తిరుపతి, చర్లపల్లి వెళ్లే ప్రత్యేక రైళ్లను క్రమబద్ధీకరించారు. అరకు, కొరాపుట్‌ కాఫీ బ్రాండ్లను ప్రోత్సహించడానికి ఆయా స్టేషన్లలో ప్రత్యేక విక్రయ కేంద్రాలను ఏర్పాటు చేశాం. ప్లాటినం రేటింగ్‌ కలిగిన హరిత రైల్వే స్టేషన్‌గా విశాఖపట్నం జాతీయ స్థాయిలో గుర్తింపు పొందింది. భద్రతలో రాజీపడే ప్రసక్తే లేదు వాల్తేరు విభాగం సాంకేతికత వినియోగంలోనూ ముందుంది. భద్రత, నిఘా కోసం విశాఖ స్టేషన్‌లో ‘ఆర్క్‌ అర్జున్‌’ అనే కృత్రిమ మేధస్సుతో పనిచేసే రోబోను ప్రవేశపెట్టాం. ఇది నేరస్తులను గుర్తించడంలో, ప్రయాణికులకు మార్గనిర్దేశం చేయడంలో కీలక పాత్ర పోషిస్తోంది. భద్రతా పరంగా అప్రమత్తంగా వ్యవహరించిన సిబ్బందికి ప్రత్యేక అవార్డులు అందజేయడమే కాకుండా, సిబ్బంది నైపుణ్యాన్ని పెంచేందుకు శిక్షణా కార్యక్రమాలు కూడా నిర్వహిస్తున్నాం. మౌలిక వసతుల విస్తరణ రైలు ప్రయాణాన్ని మరింత వేగవంతం చేసేందుకు మౌలిక సదుపాయాల విస్తరణపై విభాగం దృష్టి సారించాం. ఈ ఏడాది జనవరి నాటికి 380 కిలోమీటర్లకు పైగా డబుల్‌ లైన్‌ పనులను పూర్తి చేసి ప్రారంభించడం ఒక పెద్ద విజయం. దీనివల్ల రైళ్ల రాకపోకల్లో జాప్యం తగ్గడమే కాకుండా, సరుకు రవాణా సామర్థ్యం కూడా పెరుగుతుంది. పార్లమెంట్‌లో రైల్వే మంత్రి అశ్వినీ వైష్ణవ్‌ ప్రకటించినట్లుగా.. విశాఖ కేంద్రంగా రైల్వేజోన్‌ త్వరలో రాబోతుందని డీఆర్‌ఎం స్పష్టం చేశారు.

బుచ్చెయ్యపేట: మేజర్‌ పంచాయతీ వడ్డాదిలో శ్మశానానికి వెళ్లేందుకు రహదారి సౌకర్యం లేక పలువురు అవస్థలు పడుతున్నారు. గ్రామంలో కొత్తూరు రెల్లివీధికి చెందిన కొత్తపల్లి రాజు అనారోగ్యంతో బుధవారం మృతి చెందాడు. వీరి శ్మశానం మెయిన్‌ రోడ్డును ఆనుకుని ఉన్న పెద్దేరు కస్పా కాలువ అవతల ఉంది. కాలువపై నుండి వెళ్లేందుకు రహదారి సౌకర్యం లేక కుటుంబ సభ్యులు రాజు మృతదేహంతో కాలువలోకి దిగి అవస్థలు పడ్డారు. మోకాళ్ల లోతు నీటిలో నుంచి దిగి శ్మశానానికి చేరుకుని దహన సంస్కారాలు పూర్తి చేశారు. ఎవరైనా మృతి చెందితే ఈ రోజుతో ఆయనకు కష్టాలు పోయాయి సంతోషంతో దహన సంస్కారాలు చేయాలంటారు. కానీ శ్మశానంకు వెళ్లే రహదారి సౌకర్యం లేక అంతిమయాత్రకు నానా కష్టాలు తప్పడం లేదని పలువురు గ్రామస్తులు ఆగ్రహం వ్యక్తం చేస్తున్నారు. పలు గ్రామాల్లో అవసరం లేకపోయినా పంట పొలాలకు లే అవుట్‌లకు ప్రభుత్వ నిధులతో రోడ్లు వేస్తున్న అధికారులు అవసరం ఉన్న చోట మాత్రం రోడ్డు సదుపాయం కల్పించడం లేదని, నాయకులు ఎక్కడ చెబితే అక్కడే రోడ్లు వేస్తున్నారు తప్ప ప్రజాప్రయోజనాలు పట్టించుకోవడం లేదని ఆవేదన చెందుతున్నారు.

నక్కపల్లి: మండలంలో అప్పలపాయకరావుపేట, నక్కపల్లి గ్రామాల్లో బుధవారం హోం మంత్రి వంగలపూడి అనిత సామాజిక భద్రతా పింఛన్లను పంపిణీ చేశారు. ఆమె మాట్లాడుతూ నేతన్నలకు 200 యూనిట్ల వరకు ఉచితంగా విద్యుత్‌ సరఫరా చేస్తున్నామన్నారు. దీనివల్ల కరెంటు బిల్లుల భారం నుంచి ఉపశమనం పొందవచ్చన్నారు. చేనేత కార్మికురాలితో కలిసి నక్కపల్లిలో మగ్గం నేశారు. వారి నుంచి చీర కొనుగోలు చేశారు. అనంతరం నక్కపల్లి జెడ్పీ ఉన్నత పాఠశాలలో విద్యార్థులతో కలసి మధ్యాహ్న భోజనం చేశారు. భోజనంలో నాణ్యత లోపిస్తే చర్యలు తీసుకుంటామున్నారు. పాఠశాలల్లో మౌలిక సదుపాయాలు ఏ విధంగా ఉన్నాయో విద్యార్థులను అడిగి తెలుసుకున్నారు. ఏపీఐఐసీ పునరావాస కాలనీలో నిర్వాసితుల గృహ ప్రవేశ కార్యక్రమంలో పాల్గొన్నారు. టీడీపీ నియోజకవర్గ ఇన్‌చార్జి కొప్పిశెట్టి వెంకటేష్‌, పీఏసీఎస్‌ పర్సన్‌ ఇన్‌చార్జ్‌ కొప్పిశెట్టి బుజ్జి, ఎంపీడీవో చైతన్య, నాయకులు పాల్గొన్నారు.

ముంచంగిపుట్టు : మత్స్యగెడ్డలో ఏర్పాటుచేయనున్న వాటర్‌ ఏరోడ్రోమ్‌ ప్రాజెక్టులో స్థానిక గిరిజనులకు ఉద్యోగ, ఉపాధి అవకాశాలు కల్పించాలని ఉమ్మడి విశాఖ జిల్లాల జెడ్పీ చైర్‌పర్సన్‌ జల్లిపల్లి సుభద్ర డిమాండ్‌ చేశారు. ఆంధ్ర–ఒడిశా సరిహద్దు ప్రాంతమైన ముంచంగిపుట్టు మండలం జోలాపుట్టు పంచాయతీ కేంద్రంలోని మత్స్యగెడ్డలో మంజూరైన వాటర్‌ ఏరోడ్రోమ్‌ ప్రాజెక్టు ఏర్పాటు కోసం ఏపీ కాలుష్య నియంత్రణ మండలి ఆధ్వర్యంలో ఏపీ ఎయిర్‌ పోర్ట్స్‌ డెవలప్‌మెంట్‌ కార్పొరేషన్‌ లిమిటెడ్‌ ద్వారా బుధవారం ప్రజాభిప్రాయ సేకరణ సదస్సును నిర్వహించారు. జోలాపుట్టు పంచాయతీలోని 11 గ్రామాల నుంచి గిరిజనులు ప్రజాభిప్రాయ సేకరణలో పాల్గొని వారి అభిప్రాయాలు తెలియజేశారు. మాచ్‌ఖండ్‌ జలవిద్యుత్‌ కేంద్రం నిర్మించి 70 ఏళ్ల అవుతున్నా ప్రాజెక్టు వలన భూములు కోల్పోయిన వారికి నేటీకీ ఎటువంటి ఉద్యోగ, ఉపాధి అవకాశాలు లేకుండా పోయాయని, మైదాన ప్రాంతానికి చెందిన వారికే మాచ్‌ఖండ్‌ విద్యుత్‌ కేంద్రంలో ఉద్యోగాలు కల్పిస్తున్నారని, తమకు తీరని అన్యాయం జరిగిందని స్థానిక గిరిజనులు చెప్పారు. ప్రస్తుతం నిర్మించే వాటర్‌ ఏరోడ్రోమ్‌ ప్రాజెక్టులో 85 శాతం ఉద్యోగాలు స్థానిక గిరిజనులకే కల్పిస్తామని తీర్మాణం చేస్తేనే ప్రాజెక్టుకు అనుమతి ఇవ్వాలని వారు డిమాండ్‌ చేశారు. ప్రాజెక్టులో స్థానిక గిరిజనులకే ప్రాధాన్యం కార్యక్రమంలో పాల్గొన్న ఉమ్మడి విశాఖ జిల్లాల జెడ్పీ చైర్‌పర్సన్‌ జల్లిపల్లి సుభద్ర మాట్లాడుతూ వాటర్‌ ఏరోడ్రోమ్‌ ప్రాజెక్టు నిర్మిస్తే జోలాపుట్టు పంచాయతీ గిరిజనులకు న్యాయం జరిగేలా ఉద్యోగ, ఉపాధి అవకాశాలు కల్పించాలని, ఎంత మందికి ఉద్యోగాలు ఇస్తారో స్పష్టమైన తీర్మానం చేయాలన్నారు. ముఖ్యంగా భూ బదలాయింపు చట్టం, గిరిజన హక్కులు, చట్టాలకు ఎటువంటి భంగం కలకుండా చూడాలని, బినామీ వ్యవస్థ ఉండకూడదని స్పష్టం చేశారు. జోలాపుట్టు పరిసర గ్రామాల్లో చేపల వేట చేసే గిరిజనులకు ఇబ్బందులు తలెత్తకుండా చూడాలని, పర్యావరణం కలుషితం కాకుండా ప్రాజెక్టు నిర్మాణం చేయాలన్నారు. ఫిషింగ్‌ టూరిజం ఏర్పాటుకు చర్యలు కార్యక్రమంలో పాల్గొన్న ఇన్‌చార్జి జాయింట్‌ కలెక్టర్‌ , ఐటీడీఏ పీవో తిరుమణి శ్రీపూజ మాట్లాడుతూ అందరి అనుమతులతోనే ప్రాజెక్టు నిర్మించాలనే ప్రజాభిప్రాయ సేకరణ నిర్వహించడం జరుగుతుందన్నారు. స్థానిక గిరిజన యువతీ, యువకులకు ప్రాజెక్టులో ఉద్యోగాల కల్పన కోసం చర్యలు తీసుకుంటామన్నారు. జోలాపుట్టు పరిసర ప్రాంతాలు పర్యాటకంగా అభివృద్ధి చేసేందుకు రూ.16.45కోట్లతో మంజూరైన వాటర్‌ ఏరోడ్రోమ్‌ ప్రాజెక్టు ఉపయోగపడుతుందన్నారు. అన్ని అనుమతులతోనే ప్రాజెక్ట్‌ నిర్మాణం జరుగుతుందని, గిరిజన మత్స్యకారుల కోసం ఫిషింగ్‌ టూరిజం ఏర్పాటుకు చర్యలు తీసుకుంటామన్నారు. విశాఖపట్నం, విజయనగరం కాలుష్య నియంత్రణ మండలి ఈఈలు సరిత, ఉపేంద్ర, టూరిజం డీవీఎం జి.వి.బి.జగదీష్‌, విశాఖకు చెందిన పర్యవరణవేత్త జె.పి.రామారావు, జి.మాడుగుల సీఐ శ్రీనివాసరావు, తహసీల్దార్‌ భాస్కరఅప్పారావు, సర్పంచ్‌ నీలకంఠం, ఎంపీటీసీలు కమల, సుబ్బలక్ష్మీ, వివిధ పార్టీల నేతలు జగబంధు, దశరధి, మూర్తి, ఎండీ సోలెమాన్‌, మణి, ప్రకాశ్‌, రామస్వామి, రాందాసు, భగత్‌రామ్‌, స్థానికులు పాల్గొన్నారు. వాటర్‌ ఏరోడ్రోమ్‌ ప్రాజెక్ట్‌ ఏర్పాటుకు ప్రజాభిప్రాయ సేకరణ గిరిజన హక్కులు, చట్టాలకు విఘాతం కలగకుండా ప్రాజెక్టు నిర్మించాలి జెడ్పీ చైర్‌ పర్సన్‌ జల్లిపల్లి సుభద్ర పూర్తిస్థాయి అనుమతులతోనే పనులు ఇన్‌చార్జి జాయింట్‌ కలెక్టర్‌ , ఐటీడీఏ పీవో తిరుమణి శ్రీపూజ

సీలేరు: అల్లూరి సీతారామరాజు జిల్లా ఒడిశా–పోలవరం సరిహద్దు సీలేరు గుంటవాడ రిజర్వాయర్‌ వద్ద వాటర్‌ ఏరోడ్రోమ్‌ ప్రాజెక్ట్‌ ఏర్పాటు కోసం గురువారం గ్రామసభ నిర్వహించనున్నట్టు తహసీల్దార్‌ అన్నాజీరావు చెప్పారు. ఈ మేరకు సీలేరులోని మారెమ్మ తల్లి ఆలయం ఎదురుగా ఉన్న ఘాట్‌ను ఆయన బృందంతో కలిసి పరిశీలించారు. సర్పంచ్‌ దుర్జోను కలిసి స్థానిక వివరాలను అడిగి తెలుసుకున్నారు. ఈ సందర్భంగా తహసీల్దార్‌ అన్నాజీరావు మాట్లాడుతూ వాటర్‌ ఏరోడ్రోమ్‌ ప్రాజెక్ట్‌ ఏర్పాటు కోసం ఏపీ జెన్‌కో కల్యాణమండపంలో నిర్వహించనున్న గ్రామసభకు జాయింట్‌ కలెక్టర్‌, ఐటీడీఏ పీవో తిరుమణి శ్రీపూజ హాజరుకానున్నట్టు చెప్పారు. ప్రజల సహకారంతో ఈ ప్రాజెక్టు పూర్తయితే అల్లూరి జిల్లాకు రాష్ట్రంలోనే మంచి గుర్తింపు వస్తుందని, పర్యాటకంగా మరింత ఈ ప్రాంతం అభివృద్ధి చెందుతుందన్నారు.

డ్వామా పీడీ విద్యాసాగర్‌ ముంచంగిపుట్టు: ఉపాధి హామీ పథకం ద్వారా జరిగే పనులపై క్షేత్రసాయిలో జవాబుదారీతనంగా ఉపాధి సిబ్బంది పనిచేయాలని జిల్లా డ్వామా పీడీ డి.విద్యాసాగర్‌ అన్నారు. ఉపాధి హామీ పథకం ద్వారా 2024–25 ఆర్థిక సంవత్సరంలో చేపట్టిన పనులపై ప్రజావేదిక కార్యక్రమాన్ని బుధవారం నిర్వహించారు. ఈ మేరకు ఉపాధి పనుల్లో రూ.26.25కోట్లకు, మెటీరియల్‌ ద్వారా రూ.94.81లక్షలు, పంచాయతీ రాజ్‌ శాఖ ద్వారా రూ.6,22,99,000, ట్రైబల్‌ వెల్ఫేర్‌ శాఖ ద్వారా రూ.7,54,58,000, సమగ్ర శిక్ష అభియాన్‌ శాఖ ద్వారా రూ.46లక్షలతో జరిగిన పనులపై ఇటీవల 17వ విడత సామాజిక తనిఖీ నిర్వహించారు. ఈ సందర్భంగా విద్యాసాగర్‌ మాట్లాడుతూ పనులు పారదర్శకంగా జరగాలని, వేతనదారులకు మస్తర్లు సకాలంలో సక్రమంగా వేయాలని ఆదేశించారు.పనుల కల్పనలో అవకతవకలు జరిగితే ఉపేక్షించేది లేదని హెచ్చరించారు. మండలంలో అన్ని పంచాయతీల్లో సామాజిక తనిఖీల్లో రూ.14, 500లు రికవరీ చేయగా, రూ.18,900 అపరాధ రుసుము విధించినట్టు చెప్పారు. ఏపీడీ వెంకటరావు, ఎంపీపీ సీతమ్మ, మండల సర్పంచుల ఫోరం అధ్యక్షుడు రమేష్‌, ఎంపీడీవో ధర్మారావు, ఏపీవోలు సంఘంనాయుడు, వెంటేశ్వర్లు, ఎస్‌ఆర్‌పీలు అప్పారావు, అచ్యుతరావు, డీఆర్‌పీలు నరసింహామూర్తి, రాజేశ్వరరావు, వరహాలమ్మ, సర్పంచులు, ఎంపీటీసీలు, ఉపాధి హామీ పిబ్బంది, వేతనదారులు తదితరులు పాల్గొన్నారు.

● డిమాండ్ల సాధన కోసంయూటీఎఫ్‌ రణభేరి 3.0 ● ఐటీడీఏ కార్యాలయం ఎదుట రీలే దీక్ష పాడేరు : ఎన్నికల ముందు ప్రజలకు ఇచ్చిన సూపర్‌ సిక్స్‌ హామీల మాదిరిగానే ఉద్యోగ, ఉపాధ్యాయులకు సూపర్‌ సిక్స్‌ హామీలను ఇచ్చిన కూటమీ పార్టీలు అధికారంలోకి వచ్చాక ఏ ఒక్క హామీను కూడా పూర్తి స్థాయిలో పరిష్కరించకుండా నిలువునా మోసం చేసిందని యూటీఎఫ్‌ జిల్లా అద్యక్ష, కార్యదర్శులు రఘునాధ్‌, మహేశ్వరరావు ఆరోపించారు. రాష్ట్ర వ్యాప్త కార్యక్రమంలో భాగంగా బుధవారం స్థానిక ఐటీడీఏ ఎదుట యూటీఎఫ్‌ ఆధ్వర్యంలో రణభేరి 3.0 ఒక రోజు రిలే దీక్షను చేపట్టారు. ఈ దీక్షలను యూటీఎఫ్‌ రాష్ట్ర కార్యదర్శి వి.శ్రీలక్ష్మి, గిరిజన ఉద్యోగుల సంఘం జిల్లా అద్యక్షుడు మసాడ ఈశ్వరరావు ప్రారంభించారు. ఈ సందర్భంగా పలువురు నేతలు మాట్లాడుతూ హామీలు అమలుచేయకుండా ఉపాధ్యాయులను చంద్రబాబు మోసం చేశారనన్నారు. ఉద్యోగ, ఉపాద్యాయులపై కూటమీ ప్రభుత్వం అవలంభిస్తున్న తీరుకు నిరసనగా పెద్ద ఎత్తున నినాదాలు చేశారు. పీఆర్సీ కమిషన్‌ను వెంటనే నియమించాలని , ఆర్థిక బకాయిలన్నింటిని తక్షణమే చెల్లించాలని, 29 శాతం ఐఆర్‌ ప్రకటించాలని, పాత డీఏ బకాయిలు చెల్లించాలని, ఓపీఎస్‌ విధానాన్ని అమలు చేయాలని, కేజీబీవీ, ఎంటీఎస్‌ ఉపాద్యాయుల సమస్యలను పరిష్కారించాలని వారంతా ముక్త కంఠంతో డిమాండ్‌ చేశారు. రిలే దీక్షకు పలు సంఘాల మద్దతు యూటీఎఫ్‌ చేపట్టిన దీక్షకు పలు ఉద్యోగ, ఉపాద్యాయ సంఘాల నాయకులు పాల్గొని మద్దతు తెలిపారు. సీపీఎస్‌ జిల్లా అద్యక్షుడు మోరి మోహన్‌బాబు, ప్రతినిధులు యువరాజు, గంపరాయి రమేష్‌, ఉబ్బేటి నరేష్‌, దండకారణ్య ఉద్యోగ సమితి రాష్ట్ర కార్యదర్శి యం.రాజాబాబు, బీటీఏ జిల్లా అద్యక్షుడు వి.వెంకటరమణ, ఏపీ జేఏసీ డివిజన్‌ చైర్మన్‌ కె.సుబ్రమణ్యం, కార్యదర్శి జి.సింహాచలం పాల్గొని సంఘీభావం తెలిపి దీక్షలో కూర్చున్నారు. అనంతరం యూటీఎఫ్‌తో సహా పలు ఉద్యోగ, ఉపాద్యాయ సంఘాల ప్రతినిధులు, నాయకుల సమస్యలపై ఇన్‌చార్జి ఆర్డీవో లోకేశ్వరరావుకు వినతిపత్రాన్ని అందజేశారు. యూటీఎఫ్‌ నాయకులు చీకటి నాగేశ్వరరావు, పార్వతి, చిట్టిబాబు, ధరమారావు, దేముడు, కన్నయ్య, శ్రీను, రాంబాబుతో పాటు జిల్లాలోని పలు మండలాల ప్రతినిధులు పాల్గొన్నారు.

పాడేరు : ఉత్తరాంధ్ర ప్రజల ఆరాధ్య దైవం, గిరిజనుల ఇలవేల్పు పాడేరు మోదకొండమ్మ తల్లి జాతర ఉత్సవాలను ఈ ఏడాది మే 10, 11, 12 తేదీల్లో అత్యంత వైభవంగా నిర్వహించేందుకు అన్ని ఏర్పాట్లు చేస్తున్నామని పాడేరు ఎమ్మెల్యే, మోదకొండమ్మ తల్లి ఆలయ ఉత్సవ కమిటీ అధ్యక్షుడు మత్య్సరాస విశ్వేశ్వరరాజు తెలిపారు. స్థానిక అమ్మవారి ఆలయం అన్నదాన సత్రంలో ఉత్సవ కమిటీ, ఆలయ కమిటీ సభ్యులతో ఆయన బుధవారం సమావేశం నిర్వహించారు. ఈ సందర్భంగా ఎమ్మెల్యే మత్స్యరాస విశ్వేశ్వరరాజు మాట్లాడుతూ గత ఏడాది కన్నా గొప్పగా ఉత్సవాల నిర్వాహణకు కార్యచరణ రూపొందించామన్నారు. ఉత్సవాల సందర్భంగా భక్తులకు ఎటువంటి ఇబ్బందులు లేకుండా పకడ్బందీ ఏర్పాట్లు చేస్తున్నామన్నారు. గిరిజన ప్రాంతంలోని అన్ని వర్గాల భక్తులు ఉత్సవాల నిర్వాహణ కోసం విరివిగా విరాళాలు ఇచ్చి సహకరించాలన్నారు. ఆలయ కమిటీ ప్రధాన కార్యదర్శి కిల్లు కోటిబాబు నాయుడు, ఉత్సవ కమిటీ ప్రతినిధులు పలాసి కృష్ణారావు, కిల్లు గంగన్న పడాల్‌, కుడుముల వెంకటరమణ, మాసాడ ఈశ్వరరావు, వర్తన పిన్నయ్య దొర, బోనంగి వెంకటరమణ, డి.పి. రాంబాబు, టి.ప్రసాద్‌నాయుడు పాల్గొనారు.పాడేరు ఎమ్మెల్యే, మోదకొండమ్మ తల్లి ఆలయ ఉత్సవ కమిటీ అధ్యక్షుడు మత్స్యరాస విశ్వేశ్వరరాజు

పాడేరు రూరల్‌: కార్మిక చట్టాలు, హక్కులు పటిష్టంగా అమలు చేయడంలో కేంద్ర, రాష్ట్ర ప్రభుత్వాలు పూర్తిగా విఫలమైనట్టు ఏఐటీయూసీ జిల్లా అధ్యక్ష, ప్రధాన కార్యదర్శులు జల్లి రాజబాబు, అమర్‌ చెప్పారు. పాడేరు ఐటీడీఏ ముఖద్వారం వద్ద కేంద్ర కార్మిక సంఘాల ఐక్యవేదిక పిలుపుమేరకు ఏఐటీయూసీ జిల్లా సమితి బుధవారం ధర్నా చేపట్టారు. నాయకులు నల్లరిబ్బన్‌లతో కళ్లకు గంతలు కట్టుకొని కేంద్ర, రాష్ట్ర ప్రభుత్వాల తీరుకు వ్యతిరేకంగా నిరసన తెలిపారు. కార్మిక చట్టాలను నిర్వీర్యం చేసేందుకు కేంద్ర, రాష్ట్ర ప్రభుత్వాలు కుట్ర చేస్తున్నాయన్నారు. కేంద్ర ప్రభుత్వం తీసుకొచ్చిన నాలుగు లేబర్‌ కోడ్‌ల వల్ల కార్మికులకు అదనపు పనిభారం పెరుగుతోందని, దీంతో తీవ్ర నష్టం జరుగుతోందన్నారు. కేంద్ర, రాష్ట్ర ప్రభుత్వాల నిరంకుశ పాలనకు అందరూ వ్యతిరేకించాలన్నారు. ఈ మేరకు కేంద్ర కమిటీ పిలుపుమేరకు ఏప్రిల్‌ 1న బ్లాక్‌ డేగా పాటించామన్నారు. గతంలో ఉన్న కార్మిక చట్టాలను కొనసాగించి, అమలు చేయాలని లేనిపక్షంలో భవిష్యత్‌లో ఉద్యమాలు తీవ్రం చేస్తామని వారు చెప్పారు. కార్మిక సంఘాల జిల్లా కార్యదర్శి రాంబాబు, ఉపాధ్యక్షుడు కృష్ణ, నాయకులు శివశంకర్‌, లక్ష్మయ్య, సత్తిబాబు పాల్గొన్నారు.

ఆంధ్రా–ఒడిశా సరిహద్దు ప్రాంతం ప్రకృతి రమణీయతకు అద్దంపడుతోంది. పర్యాటకులనే కాకుండా సినీ ప్రపంచాన్నీ ఆకర్షిస్తోంది. దీంతో ఎన్నో సినిమా సన్నివేశాలకు నిలయంగా మారింది. పలు సుందర దృశ్యాలు కెమెరాలకు చిక్కుతున్నాయి. ఈ సుందర ప్రదేశాల్లో మౌలిక సదుపాయాలు కల్పిస్తే రానున్న కాలంలో మరింత ప్రాధాన్యతను సంతరించుకుంటుంది.సినిమా షూటింగ్‌లు జరిగేతారబు జలపాతంఏవోబీలోముంచంగిపుట్టు: మన్యం.. ప్రకృతి అందాలకు పేరుగాంచింది. ఇందులోనూ ఆంధ్ర–ఒడిశా సరిహద్దు ప్రాంతం మరింత ప్రత్యేకతను సంతరించుకుంది. ఒకవైపు దీవులను తలపించే జోలాపుట్టు అందాలు మరోవైపు పచ్చని కొండలతో నిండిన ప్రశాంత వాతావరణం ప్రకృతి ప్రేమికులను ఎంతగానో ఆకట్టుకుంటుంది. ఈ ప్రాంతంలోని సుందర ప్రకృతి దృశ్యాలు సినీ దర్శకులను సైతం కట్టిపడేస్తోంది. దీంతో సినిమా షూటింగ్‌లు తరచూ జరుగుతున్నాయి. చిత్రీకరణ జరిగే ప్రాంతాలు జోలాపుట్టు జలాశయం ఆంధ్రా–ఒడిశా రాష్ట్రాల సరిహద్దులో సుమారు 250 పైగా గ్రామాలకు విస్తరించి ఉంది. జలాశమం మధ్యలో మట్టిదిబ్బలు అందమైన దీవులను తలపించేలా దర్శనమిస్తున్నాయి. ఇక్కడున్న మత్స్యగెడ్డ అందాలు అందరిని కట్టిపడేస్తున్నాయి. మెలికలు తిరుగుతూ ఎత్తైన గిరుల మధ్య ప్రవాహించే మత్స్యగెడ్డ అందాలు ప్రత్యేక ఆకర్షణగా నిలుస్తున్నాయి. ఇక్కడున్న మాచ్‌ఖండ్‌ జలవిద్యుత్‌ కేంద్రానికి చేరేందుకు ఏర్పాటుచేసిన వించ్‌ ప్రయాణం ఓ అద్భుతం.. ఈ ప్రయాణాన్ని కూడా సినిమాల్లో చిత్రీకరిస్తున్నారు. డుడుమ, మాచ్‌ఖండ్‌, మత్స్యగెడ్డ సుందర ప్రదేశాలకు వచ్చి లోకేషన్‌లు చూసిన ప్రముఖ డైరెక్టర్లు, ఫోటోగ్రాఫర్లు కెమెరాలో బంధించి వెళ్తున్నారు. చిత్రీకరించిన సినిమాలు ● 2021లో ‘హనుమాన్‌’ సినిమా షూటింగ్‌ జరిగింది. ప్రశాంత్‌ వర్మ దర్శకత్వంలో హిరోగా తేజ సజ్జా, హిరోయిన్‌గా అమృత అయ్యర్‌లపై పలు పాటాలు, సన్నివేశాలను చిత్రీకరించారు. ● 2022లో ‘ఇట్లు మారేడుమిల్లి ప్రజానీకం’ సినిమా షూటింగ్‌కు మూడు రోజులు పాటు జరిగింది. హిరో అల్లరి నరేష్‌, హిరోయిన్‌ ఆనందిపై పాటను మత్స్యగెడ్డ ఒడ్డున చిత్రీకరించారు. ● 2023లో ఏవోబీ సరిహద్దు ప్రాంతమైన వంతాల ఘాట్‌లో ‘పుష్ప–2’ సినిమాలో లారీ ఛేజింగ్‌ సన్నివేశాలను దర్శకుడు సుకుమార్‌ చిత్రీకరించారు. ● 2024లో మాచ్‌ఖండ్‌ జలవిద్యుత్‌ కేంద్రం పరిసరాల ప్రాంతాల్లో ప్రముఖ సినీ డైరెక్టర్‌ జాగర్లమూడి రాధాక్రిష్ణ(క్రిష్‌) దర్శకత్వంలో ‘ఘాటీ’ సినిమా షూటింగ్‌ జరిగింది. హిరోయిన్‌ అనుష్క శెట్టి, ప్రముఖ నటుడు జగపతిబాబు, జాన్‌ విజయ్‌లపై సన్నివేశాలు, యాక్షన్‌ సీన్లు చిత్రీకరించారు. ● 2024 సంవత్సరం అక్టోబర్‌లో ‘రాబిన్‌హుడ్‌’ చిత్రంలోని హీరో నితిన్‌, హీరోయిన్‌ శ్రీలీలపై కొన్ని సన్నివేశాలు షూటింగ్‌ తీశారు. ● 2025లో సరిహద్దులోని పలు ప్రాంతాల్లో దర్శకుడు రాజమౌళి, హీరో మహేష్‌బాబుల షూటింగ్‌ గుట్టు చప్పుడు కాకుండా జరిగింది. మౌలిక సదుపాయాలు లేక అవస్థలు ప్రకృతి అందాలకు నిలయంగా మారిన ఏవోబీలోని తరచూ సినిమా షూటింగ్‌లు జరుతున్నా కనీస మౌలిక సదుపాయాలు లేక సిని చిత్ర బృందం అవస్థలు పడుతున్నారు. సినిమా షూటింగ్‌లు, పర్యాటకులు పెరుగుతున్న సౌకర్యాలు కల్పన లేక ప్రభుత్వాలు విఫలమైయ్యాయి. బస చేసేందుకు కాటేజీలు, రెసిడెన్సీలు లేక పర్యాటకులు ఉండలేకపోతున్నారు. ఇక్కడ బస చేసేందుకు కాటేజీలు, హోటళ్లు లేకపోవడంతో సినిమా షూటింగ్‌ చేసే వారు అరకు, పాడేరు తదితర ప్రాంతాల నుంచి సుమారు 50 నుంచి 70 కిలోమీటర్లు ప్రయాణించి ఈ ప్రాంతానికి రావాల్సిన పరిస్థితి నెలకొంది. దీంతో సమయం వృథా అవుతుంది. ఇరు రాష్ట్రాల ప్రభుత్వాలు స్పందించి ఈ ప్రాంతంలో మౌలిక సదుపాయాలు కల్పిస్తే పర్యాటకుల సంఖ్య పెరుగుతుందని పలువురు చెబుతున్నారు. డుడుమ జలాశయంపై షూటింగ్‌లో జగపతిబాబుసుజనకోట మత్స్యగెడ్డ ఒడ్డున షూటింగ్‌ సందడి అందాలు అద్భుతం ఏవోబీ ప్రకృతి అందాలు అద్భుతంగా ఉన్నాయి. డుడుమ జలపాతం, మాచ్‌ఖండ్‌ వించ్‌ హౌస్‌లో ప్రయా ణం మధుర అనుభూతి ఇస్తుంది. సినిమా షూటింగ్‌లకు అనువైన ప్రాంతం. మొదట వారం రోజులు సినిమా షూటింగ్‌ చేస్తే చాలు అనుకున్నాను. కానీ రెండు వారాలుగా సినిమా షూటింగ్‌ జరుగుతుంది. నేను చూసిన అందమైన లొకేషన్‌లో మాచ్‌ఖండ్‌ జలవిద్యుత్‌ కేంద్రం, డుడుమ జలపాతం ఒకటి. ఈ ప్రాంతం చిత్రీకరణకు బాగుంది. – జాగర్లపూడి రాధాక్రిష్ణ(క్రిష్‌), ప్రముఖ సినీ దర్శకుడు ప్రకృతి అందాలకు నెలవుగా సరిహద్దు ప్రాంతం సినిమా షూటింగ్‌లతో నిత్యం సందడి తరలివస్తున్న చిత్ర యూనిట్లు మౌలిక సదుపాయాలు కల్పిస్తే మరింత ఆదరణ షూటింగ్‌లకు అనువైన ప్రాంతం కేరళ, గోవాలలోనే సినిమా షూటింగ్‌కు మంచి లోకేషన్‌ లు ఉన్నాయని అనుకుంటారు. కాని ఆంధ్ర–ఒడిశా సరిహద్దు ప్రాంతమైన మాచ్‌ఖండ్‌ జలవిద్యుత్‌ కేంద్రం పరిసర ప్రాంతాల్లో చాలా అందమైన లోకేషన్లు ఉన్నాయి. ఎతైన కొండల నడుమ మత్స్యగెడ్డ ఒంపులు తిరుగుతూ వెళ్తున్న దృశ్యం చూస్తూ చాలా ఎంజాయ్‌ చేస్తున్నాను. ఇక్కడి ప్రకృతి అందాలు బాగున్నాయి. రానున్న రోజుల్లో ఎక్కువ షూటింగ్‌లు జరిగే అవకాశాలున్నాయి. – జగపతిబాబు, ప్రముఖ సినీ నటుడు

పాడేరు/గూడెం కొత్తవీది : ఏజెన్సీలో పలు ప్రాంతాల్లో మంగళవారం ఉరుములు, మెరుపులు, భీరక శబ్ధాలతో భారీ వర్షం కురిసింది. రహదారులు జలమయమయ్యాయి. గెడ్డలు పొంగి ప్రవహిస్తున్నాయి. పాడేరు పరిసర ప్రాంతాల్లో ఏకధాటిగా రెండు గంటల పాటు జోరు వానా కురిసింది. దీంతో రెండు గంటల పాటు జనజీవనం స్తంబించింది. విద్యుత్‌ సరఫరాకు కూడా కాస్త అంతరాయం ఏర్పడింది. రోడ్లన్ని పూర్తిగా జలమయమయ్యాయి. భారీ వర్షం కారణంగా పంట పొలాల్లో భారీగా వర్షపు నీరు చేరింది. వేసవి దుక్కులను ఎంతో అనుకూలంగా ఉంటుందని రైతులు ఆశాభావం వ్యక్తం చేశారు. జి.మాడుగుల: మండలంలో కురిసిన భారీ వర్షానికి పాడేరు–జి.మాడుగుల, చింతపల్లి వెళ్లే మార్గం జలమయమైంది. మండలంలో నుర్మతి, మద్దగరువు రోడ్డు, లువ్వాసింగి, సొలభం, వంజరి, గెమ్మెలి పోయే రోడ్డు మార్గాల్లో రాకపోకలు సాగించే ద్విచక్ర వాహహనదారులు వర్షానికి ఇబ్బందులు పడ్డారు. జి.మాడుగుల సంతబయలు గ్రామంలో జరిగిన వారపు సంతలో దుకాణదారులు అవస్థలు ఎదుర్కొన్నారు. పాడేరు మార్గంలో జాతీయ రహదారిలో బొక్కెళ్లు వద్ద ముంచెత్తిన వర్షపు నీటి వలన వాహనదారులు ఇబ్బందులు పడ్డారు.

● పాడేరు డీఎస్పీ అభిషేక్‌ ● భూసిపుట్టు వారపు సంతలో ఆపరేషన్‌ వజ్ర ప్రహార్‌ ముంచంగిపుట్టు: డ్రగ్స్‌ రహిత సమాజానికి ప్రజలంతా సహకరించాలని పాడేరు డీఎస్పీ ఆర్‌ఆర్‌విఎస్‌ అభిషేక్‌ అన్నారు. జిల్లా ఎస్పీ అమిత్‌ బర్ధర్‌ ఆదేశాల మేరకు మండలంలోని భూసిపుట్టు పంచాయతీ కేంద్రంలో పోలీసులు ఆపరేషన్‌ వజ్ర ప్రహార్‌ కార్యక్రమాన్ని మంగళవారం నిర్వహించారు. పాడేరు డీఎస్పీ అభిషేక్‌ ఆధ్వర్యంలో జరిగిన ఈ కార్యక్రమంలో గంజాయి నివారణ, సైబర్‌ నేరాలు, రహదారి భద్రతపై గ్రామస్తులకు అవగాహన కల్పించారు. ఈ సందర్భంగా డీఎస్పీ ఆర్‌ఆర్‌విఎస్‌ అభిషేక్‌ మాట్లాడుతూ మాదకద్రవ్యాల వినియోగంతో జీవితాలు నాశనం అవుతాయన్నారు. ముఖ్యంగా యువత భవిష్యత్తు జైల్‌ పాలు అవుతుందని. దీంతో వారి కుటుంబంపై తీవ్ర ప్రభావం చూపుతాయన్నారు. గంజాయి రవాణా, సాగుకు దూరంగా ఉండాలని సూచించారు. గంజాయి లేదా ఇతర మాదకద్రవ్యాలపై ఎటువంటి సమాచారం ఉన్న 1972 టోల్‌ ఫ్రీ నంబర్‌కు సమాచారం అందించాలన్నారు. ప్రజలంతా పోలీసుశాఖకు సహకరించాలని ఆయన కోరారు. డ్రగ్స్‌కు వ్యతిరేకంగా గ్రామస్తులచే ప్రతిజ్ఞ చేయించారు. జి.మాడుగుల సీఐ శ్రీనివాసరావు, ఎస్‌ఐ నాని, పోలీసులు, గిరిజనులు పాల్గొన్నారు.

ముంచంగిపుట్టు: గిరిజన గ్రామాల రహదారి పనుల్లో కాంట్రాక్టర్లు నాణ్యత ప్రమాణాలు పాటించాలని అరకు ఎమ్మెల్యే రేగం మత్స్యలింగం అన్నారు. మండలంలోని జర్రెల పంచాయతీ కేంద్రంలో మంగళవారం అరకు ఎమ్మెల్యే రేగం మత్స్యలింగం పర్యటించారు. గ్రామంలో నిర్మించిన పంచాయతీ భవనాన్ని ఆయన ప్రారంభించారు. అనంతరం జర్రెల నుంచి మండిభ వరకు పంచాయతీరాజ్‌ ద్వారా నిర్మించనున్న రోడ్డు పనులకు ఎమ్మెల్యే మత్స్యలింగం శంకుస్థాపన చేశారు. ఈ సందర్భంగా ఏర్పాటు చేసిన సభలో ఎమ్మెల్యే రేగం మత్స్యలింగం మాట్లాడుతూ గత వైఎస్సార్‌సీపీ ప్రభుత్వ హయాంలో గిరిజన గ్రామాల్లో సంక్షేమ పాలన జరిగిందని, నేడు చంద్రబాబు ప్రభుత్వం ఏజెన్సీ ప్రాంతాన్ని కనీసం పట్టించుకోవడం లేదన్నారు. బడులు లేక విద్యార్థుల అవస్థలు పాడేరు ఐటిడిఏ పరిధిలో 168 పాఠశాలలకు భవనాలు లేక గిరిజన విద్యార్థులు పడరాని పాట్లు పడుతున్నారన్నారు. గత వైఎస్సార్‌సీపీ ప్రభుత్వ పాలనలో నాడు–నేడు ద్వారా నాటి ముఖ్యమంత్రి వైఎస్‌ జగన్‌మోహన్‌రెడ్డి చొరవతో అనేక ప్రభుత్వ పాఠశాలల రూపురేఖలు మారాయని గుర్తు చేశారు. సచివాలయ వ్యవస్థను తీసుకువచ్చి గడప గడపకు సంక్షేమాన్ని అందించారన్నారు. ఇంటి వరకు పింఛన్లు, రేషన్‌ సరకులు అందించిన ఘనత నాటి ముఖ్యమంత్రి జగన్‌మోహన్‌రెడ్డికే దక్కిందన్నారు. నేడు చంద్రబాబు ప్రభుత్వం మాటల్లోనే తప్ప ఆచరణలో లేదని స్పష్టం చేశారు. పింఛన్ల పంపిణీలో తీసుకువచ్చిన మార్పులతో పింఛన్‌దారులు తీవ్ర ఇబ్బందులు పడుతున్నారని, రేషన్‌ సరకుల కోసం కిలోమీటర్లు నడిచి వెళ్లి తీసుకు రావాల్సిన దుస్థితి నెలకొందని ఆయన ఆవేదన వ్యక్తం చేశారు. రోడ్డు పనులకు బిల్లుల విషయంలోనే నేటి ప్రభుత్వం అసత్యం ప్రదర్శిస్తుందన్నారు. రోడ్ల నిర్మాణాల్లో నాణ్యత కోరవడుతుందన్నారు. గిరిజన ప్రాంతానికి మేలు జరిగేలా పాలన అందించాలన్నారు. ఎంపీపీ సీతమ్మ, సర్పంచులు భాగ్యవతి, నరసింగరావు, రమేష్‌, బాబూరావు, ఎంపీటీసీ సుబ్బలక్ష్మీ, వైఎస్సార్‌సీపీ ముంచంగిపుట్టు, పెదబయలు మండలాల అధ్యక్షులు పద్మరావు, చంద్రుబాబు, నాయకులు సురేష్‌, సుందరరావు, రాంప్రసాద్‌, సన్యాసిరావు, పాపారావు, దేవ, దాసు, తిరుపతి, రామ్మూర్తి, పులిరాజు, కొండలరావు పాల్గొన్నారు. అరకు ఎమ్మెల్యే రేగం మత్స్యలింగం

● అలసత్వం వహిస్తే అధికారులపై కఠిన చర్యలు ● ఇన్‌చార్జి జాయింట్‌ కలెక్టర్‌, ఐటీడీఏ పీవో తిరుమణి శ్రీపూజ పాడేరు: రెవెన్యూ సమస్యల పరిష్కారంపై అధికారులు ప్రత్యేక దృష్టి సారించాలని, విధి నిర్వాహణలో అధికారులు అసలత్వం వహిస్తే కఠిన చర్యలు తప్పవని ఇన్‌చార్జి జాయింట్‌ కలెక్టర్‌, ఐటీడీఏ పీవో తిరుమణి శ్రీపూజ హెచ్చరించారు. కలెక్టరేట్‌ వీడియో కాన్పరెన్స్‌ హాల్‌ నుంచి జిల్లాలోని రెవెన్యూ అధికారులతో మంగళవారం ఆమె వీడియో కాన్ఫరెన్స్‌ నిర్వహించారు. పీజీఆర్‌ఎస్‌, ఐవీఆర్‌ఎస్‌ కాల్స్‌, కేవైసీ, రేషన్‌ పంపిణీ, పట్టదారు పుస్తకాల పంపిణీ తదితర వాటిపై సమీక్షించారు. ఆమె మాట్లాడుతూ రెవెన్యూ సమస్యలపై గ్రామాల్లో అవగాహన సదస్సులు నిర్వహించాలన్నారు. ప్రజా సమస్యల ఫిర్యాదులను క్షుణ్ణంగా పరిశీలించి వారి సమస్యకు మార్గం చూపాలన్నారు. పట్టాదారు పాసుపుస్తకాలను క్షుణ్ణంగా పరిశీలించి లబ్ధిదారులకు అందజేయాలని సూచించారు. సివిల్‌ సప్‌లై అధికారులు నిరంతరంగా రేషన్‌ దుకాణాలు, డీఆర్‌ డిపోలను తనిఖీలు చేయాలన్నారు. కుల ధ్రువీకరణ పత్రాల జారీలో జాప్యం లేకుండా చూడాలని ఆదేశించారు. జిల్లా వ్యాప్తంగా ఇంటి పన్ను, నీటి పన్ను వసూళ్లపై అధికారులు ప్రత్యేక చొరవ చూపాలన్నారు. ఇన్‌చార్జి డీఆర్వో, స్పెషల్‌ డిప్యూటీ కలెక్టర్‌ బి.నీలకంఠేశ్వరరావు, ఇన్‌చార్జి ఆర్డీవో లోకేశ్వరరావు, కలెక్టరేట్‌ పరిపాలన అధికారి ప్రసాదరావు తదితరులు పాల్గొన్నారు.

పాడేరు రూరల్‌: రూప రిసార్ట్స్‌ నిర్వాహకులపై తక్షణమే చర్యలు తీసుకోవాలని (సీఆర్పీఎఫ్‌)బాలల పరిరక్షణ వేదిక రాష్ట్ర కో–కన్వీనర్‌ కాంగు శుభ(చిన్ని) డిమాండ్‌ చేశారు. ఈ సందర్భంగా ఆమె మంగళవారం విలేకరులతో మాట్లాడుతూ అరకులోయకు చెందిన రూప ప్రైవేట్‌ రిసార్ట్స్‌ నిర్వాహకులు అమాయక గిరిజనులను టార్గేట్‌ చేసుకుని గంజాయి రవాణా చేస్తున్నారన్నారని ఆరోపించారు. గతంలో ఇదే రూప రిసార్ట్స్‌ నిర్వాహకులు స్థానిక కొంతమంది గిరిజన యువకులకు డబ్బులు ఆశ చూపించి అరకులోయ ప్రాంతం నుంచి గంజాయి రవాణా చేయిస్తుండగా విజయవాడలో పట్టుబడ్డారన్నారు. వారిపై కేసు నమోదైనప్పటికీ రిసార్ట్స్‌ నిర్వాహకులపై చర్యలు తీసుకోలేదని ఆరోపించారు. ఇందులో భాగంగా రిసార్ట్స్‌ని కూడా సీజ్‌ చేయాల్సి ఉన్నప్పటికీ సంబంధిత అధికారులు నిర్లక్ష్యంతో నామమాత్రంగా సుమోటుగా కేసు నమోదు చేసి చేతులు దులుపుకున్నారన్నారు. ఈ విషయంపై ఇటీవల కలెక్టర్‌, ఐటీడీఏ పీవోకు ఫిర్యాదులు కూడా చేశామన్నారు. సానుకులంగా స్పందించిన వారు తక్షణం చర్యలకు ఆదేశాలిస్తామని హమీ ఇచ్చిన్నట్టు ఆమె తెలిపారు.

పద్మనాభం: గుంటూరులోని ఆచార్య నాగార్జున యూనివర్సిటీలో ఈ నెల 30, 31 తేదీల్లో జరిగిన రాష్ట్ర స్థాయి శాప్‌ లీగ్‌ మాస్టర్స్‌ అథ్లెటిక్‌ పోటీల్లో అనంతవరం గ్రామానికి చెందిన కొండిమాని రాంబాబు అద్భుత ప్రతిభ కనబరిచారు. సింహాచలం ఆర్టీసీ డిపోలో కండక్టర్‌గా విధులు నిర్వహిస్తున్న ఆయన, ఈ క్రీడల్లో రెండు బంగారు పతకాలు సాధించి జిల్లాకు గర్వకారణంగా నిలిచారు. విశాఖ జిల్లా తరపున 35, 45 సంవత్సరాల పురుషుల విభాగాల్లో రాంబాబు పాల్గొన్నారు. 100 మీటర్ల పరుగు పందెం, 4x100 మీటర్ల రిలే పరుగు పందెంలో బంగారు పతకాలను సాధించారు. ఈ సందర్భంగా రాంబాబు మాట్లాడుతూ.. ప్రభుత్వం, ఏపీఎస్‌ఆర్టీసీ యాజమాన్యం ప్రోత్సహిస్తే భవిష్యత్తులో మరిన్ని జాతీయ స్థాయి పతకాలు సాధిస్తానని ఆశాభావం వ్యక్తం చేశారు. కండక్టర్‌గా విధి నిర్వహణలో ఉంటూనే క్రీడల పట్ల ఆయన చూపుతున్న ఆసక్తిని పలువురు అభినందించారు.

చింతపల్లి: ఉన్నత సేవలతోనే మంచి గుర్తింపు ఉంటుందని ఏటీడబ్ల్యూవో జయనాగలక్ష్మి అన్నారు. లంబసింగి గిరిజన సంక్షేమ బాలకల ఆశ్రమ పాఠశాలలో పదవీ విరమణ పొందిన పీజీ హెచ్‌ఎం (పానల్‌ గ్రేడ్‌ హెచ్‌ఎం) జక్కు శంకరరావు దంపతులను దుశ్శాలువాతో ఘనంగా సన్మానించారు. ఈ సందర్భంగా ఆమె మాట్లాడుతూ గడిచిన 34 ఏళ్లుగా గిరిజన ప్రాంతంలో అనేక ప్రాంతాల్లో విధులు నిర్వహిస్తూ జక్కు శంకరరావు ఎంతో అంకితభావంతో పనిచేశారని కొనియాడారు. ఎంతోమంది గిరిజన విద్యార్థులను ఉన్నతులుగా తీర్చిదిద్దారన్నారు. ఉన్నత ఉపాధ్యాయుడిగా గుర్తింపు తెచ్చుకోగలగారన్నారు. ఈ సందర్భంగా పలువురు శంకరరావు సేవలను కొనియాడారు. పీజీ హెచ్‌ఎంలు రాజు, సాగిన రామరాజు పడాల్‌, సింహాచలం, రాజంనాయుడు, పూర్వ విద్యార్థులు నూకరాజు, వీరబాబు తదితరులు పాల్గొన్నారు.

పాడేరు : పట్టణంలోని ప్రభుత్వ డిగ్రీ కళాశాల వద్ద భద్రపరిచిన ఈవీఎం గోదాములను కలెక్టర్‌ దినేష్‌కుమార్‌ మంగళవారం వివిధ రాజకీయ పార్టీల ప్రతినిధులతో కలిసి తనిఖీలు చేశారు. ఈవీఎం గోదాముల వద్ద ప్రధాన ద్వారం సీల్‌ ఓపెన్‌ చేయించి గదుల్లో భద్రంగా ఉన్న ఈవీఎంలను రాజకీయ పార్టీల ప్రతినిధులతో కలిసి క్షుణ్ణుంగా తనిఖీలు చేసి అక్కడ పరిస్థితులను గమనించారు. సీసీ కెమెరాల పనితీరును అడిగి తెలుసుకున్నారు. అనంతరం ఈవీఎం గోదా ములను సీల్‌ వేయించారు, అక్కడ భద్రతగా ఉన్న పోలీస్‌ సిబ్బందికి పలు సలహాలు, సూచనాలు చేశా రు. అనంతరం విజిటింగ్‌ రిజిస్టర్‌లో సంతకం చేశారు. ఆయన వెంట తహసీల్దార్‌ బి.అరుణ్‌చంద్ర, కలెక్టరేట్‌ సూపరింటెండెంట్‌ లక్ష్మయ్య, ఎలక్షన్‌ సెల్‌ అధికారులు, వివిధ రాజకీయ పార్టీల ప్రతినిధులున్నారు.

డుంబ్రిగుడ: ఉపాధి హామీ పనుల ప్రగతి, కల్పనలో అలసత్యం వహిస్తే చర్యలు తప్పవని డ్వామా పీడీ విద్యాసాగర్‌ అన్నారు. మండల కేంద్రంలోని మండల పరిషత్‌ కార్యాలయ ఆవరణలో 16వ విడత సామాజిక తనిఖీ ప్రజా వేదికను మంగళవారం నిర్వహించారు. ఎంపీపీ బాకా ఈశ్వరి సమక్షంలో పనులు వివరాలను వివరించారు.ఉపాధి హామీ, పంచాయతీరాజ్‌, గిరిజన సంక్షేమశాఖ, సామాజిక పింఛన్లపై సామాజిక తనిఖీల వివరాలతో ప్రజావేదికను నిర్వహించారు. 2024–25 మార్చి 31 వరకు జరిగిన పనులపై సమగ్ర వివరాలతో ప్రజావేదికలో పొందుపరిచారు. 2024–25 ఆర్థిక సంవత్సరంలో వేతన రూపంలో రూ 29.46 కోట్లు, మెటీరియల్‌ రూపంలో రూ 74.21 లక్షలతో కలిపి రూ.30.20 కోట్ల పనులు, పంచాయతీరాజ్‌ శాఖ ద్వారా రూ.2.98కోట్లు, గిరిజన సంక్షేమ శాఖ ద్వారా రూ.14.68 కోట్లతో పనులు జరిగినట్టు వెల్లడించారు. జాబ్‌కార్డులు కలిగిన ప్రతి ఒక్కరికి పనులు కల్పించాలని, లేని పక్షంలో చర్యలు తీసుకుంటామని ఆయన హెచ్చరించారు. వైస్‌ ఎంపీపీ ఆనంద్‌రావు, ఏపీడీ పవన్‌కుమార్‌, ఇన్‌చార్జి ఎంపీడీవో విశ్వనాథ్‌, ఏపీవోలు సంగంనాయుడు, దొరబాబు, గిరిజన, పంచాయతీరాజ్‌ శాఖల అధికారులు అజయ్‌కుమార్‌, అభిషేక్‌, ఎన్‌ఆర్‌జీఎస్‌ సిబ్బంది పాల్గొన్నారు.డ్వామా పీడీ విద్యాసాగర్‌

సాక్షి, విశాఖపట్నం: ఒక ఫోన్‌ నంబర్‌.. 8 వారాలు.. 11 జిల్లాలు.. 11 సర్కిళ్లు.. 345 ఫిర్యాదులు.. వచ్చిన ప్రతి ఫిర్యాదు పరిష్కరించేందుకు ప్రయత్నిస్తున్న అధికారులు.. మొత్తంగా వినూత్నంగా తూర్పు ప్రాంత విద్యుత్‌ పంపిణీ సంస్థ ప్రారంభించిన ‘డయల్‌ యువర్‌ ఏపీఈపీడీసీఎల్‌ సీఎండీ’ కార్యక్రమానికి స్పందన వస్తోంది. ప్రతి సోమవారం నిర్వహిస్తున్న ఈ కార్యక్రమంలో సీఎండీ పృథ్వీతేజ్‌ ఇమ్మడి స్వయంగా ఫోన్‌ కాల్స్‌ మాట్లాడుతూ ప్రజల నుంచి ఫిర్యాదులు స్వీకరిస్తున్నారు. ఈ ఏడాది ఫిబ్రవరి 9 నుంచి ఈ కార్యక్రమానికి శ్రీకారం చుట్టారు. ప్రతి సోమవారం ఫిర్యాదులు తీసుకొని వాటిని పరిష్కరించేందుకు సంబంధిత విభాగాధికారులకు ఆదేశాలు జారీ చేస్తున్నారు. 345 ఫిర్యాదులు.. 35 పెండింగ్‌ ఇప్పటివరకు 8 వారాల పాటు డయల్‌యువర్‌ ఏపీఈపీడీసీఎల్‌ సీఎండీ కార్యక్రమాన్ని నిర్వహించారు. ఇప్పటివరకు 345 ఫిర్యాదులు వచ్చాయి. ఇందులో 310 ఫిర్యాదులను ఈపీడీసీఎల్‌ అధికారులు పరిష్కరించారు. ఫోన్‌లో ఫిర్యాదు చేసిన కొద్ది రోజులకే విద్యుత్‌ శాఖ అధికారులు సిబ్బంది ఆ గ్రామానికి రావడంతో ఈ కార్యక్రమంపై ప్రజల్లో అవగాహన పెరుగుతూ వస్తోంది. ఎక్కువగా లోవోల్టేజీ సమస్యపై ఫిర్యాదులు అందుతున్నాయి. ఇప్పటివరకు 76 వరకూ లోవోల్టేజీ ఫిర్యాదులు అందాయి. ఈ ఫిర్యాదులను ఆపరేషన్స్‌ డైరెక్టర్‌ సూర్యప్రకాష్‌ పర్యవేక్షిస్తూ.. పరిష్కరిస్తున్నారు. 76 ఫిర్యాదుల్లో 62 పరిష్కరించారు. లోవోల్టేజీని అధిగమించేందుకు... 43 ప్రాంతాల్లో ట్రాన్స్‌ఫార్మర్లు మార్చారు. లోవోల్టేజ్‌ ఉన్న ప్రాంతంలో 7.5 కి.మీ మేర పాత కండక్టర్లు మార్చడం విశేషం. మిస్డ్‌ కాల్స్‌పైనా దృష్టి పెడుతున్నాం.. ఈ కార్యక్రమానికి వినియోగదారుల నుంచి మంచి స్పందన వస్తోంది. ప్రతి సోమవారం ఉదయం 10.30 నుంచి 11.30 గంటల వరకూ ఫిర్యాదులు తీసుకుంటున్నాం. ఒక ఫిర్యాదు తీసుకున్న సమయంలో ఏవైనా మిస్డ్‌ కాల్స్‌ ఉంటే.. 11.30 గంటల తర్వాత ఆ నంబర్లకు ఫోన్‌ చేసి.. ఫిర్యాదులు స్వీకరిస్తున్నాం. ప్రతి సమస్య పరిష్కరించాలని అధికారులను ఆదేశించాం. విద్యుత్‌ అంతరాయాలు, వోల్టేజ్‌ సమస్యలు, కొత్త సర్వీస్‌ కనెక్షన్‌ జాప్యం, విద్యుత్‌ పునరుద్ధరణ, ట్రాన్స్‌ఫార్మర్ల మార్పిడి వంటి అంశాలను నేరుగా నా దృష్టికి తీసుకురావొచ్చు. –పృథ్వీతేజ్‌ ఇమ్మడి, ఏపీఈపీడీసీఎల్‌ సీఎండీదెబ్బలపాడు గ్రామస్తులతో ఈపీడీసీఎల్‌ అధికారులు, సిబ్బంది

మహారాణిపేట: పేదల ఆహార భద్రతకు అండగా ఉండాల్సిన రేషన్‌ దుకాణాలు ఇప్పుడు అరకొర సరఫరాలతోనే సరిపెట్టుకుంటున్నాయి. కూటమి ప్రభుత్వం అధికారంలోకి వచ్చిన 22 నెలలు దాటినా, ప్రజా పంపిణీ వ్యవస్థ ద్వారా పూర్తి స్థాయిలో నిత్యావసరాలు అందకపోవడం కార్డుదారుల్లో అసంతృప్తిని పెంచుతోంది. ఎన్నికల ముందు రేషన్‌ ద్వారా విభిన్న నిత్యావసరాలు అందిస్తామని హామీ ఇచ్చిన ప్రభుత్వం.. ప్రస్తుతం బియ్యం, పంచదారకే పరిమితమవుతోందని ప్రజలు విమర్శిస్తున్నారు. అప్పుడప్పుడు మాత్రమే కందిపప్పు, రాగులు పంపిణీ చేస్తూ ‘మూన్నాళ్ల ముచ్చట’గా మార్చేసిందనే ఆవేదన వ్యక్తమవుతోంది. పిండితో సరిపెడుతున్న సర్కార్‌ బియ్యం, పంచదార తప్ప మరేమీ ఇవ్వకుండానే కాలం గడిపేస్తున్న చంద్రబాబు సర్కార్‌, తాజాగా పట్టణ ప్రాంతాల్లో రూ. 20లకే గోధుమ పిండి ఇస్తున్నామని ప్రచారం చేసుకుంటోంది. అయితే, గ్రామీణ ప్రజలకు ఈ సౌకర్యం లేకపోవడంపై తీవ్ర నిరసన వ్యక్తమవుతోంది. పోషకాహారం పేరిట చేస్తున్న ఈ హడావుడి, క్షేత్రస్థాయిలో కేవలం కొందరికి మాత్రమే అందుతోంది. జిల్లాలో పరిస్థితి ఇలా... డీఎస్‌ఓ పరిధిలో మధురవాడ, ఆనందపురం, భీమిలి, పద్మనాభం, పెందుర్తి ప్రాంతాలు ఉండగా, జిల్లాలో 5.12 లక్షల తెలుపు కార్డులు, 600కు పైగా చౌకధరల దుకాణాలు ఉన్నాయి. అయినప్పటికీ సరఫరా లోపాలు సరిచేయడంలో అధికారులు విఫలమవుతున్నారనే విమర్శలు వెల్లువెత్తుతున్నాయి. పేదల ఆశలు... ఇంకా నిరీక్షణలోనే.. గడప గడపకు రేషన్‌ అని చెప్పిన పాలకులు, ఇప్పుడు రేషన్‌ షాపుల్లో సరుకులకే కత్తెర వేస్తున్నారు. రోజురోజుకూ పెరుగుతున్న ధరల నేపథ్యంలో, రేషన్‌ దుకాణాలపై ఆధారపడే కుటుంబాలు తీవ్ర ఇబ్బందులు ఎదుర్కొంటున్నాయి. కందిపప్పు, రాగులు వంటి అవసరమైన వస్తువులు అందకపోవడంతో పేదల భోజనంలో పోషకాహారం తగ్గిపోతోంది. ఇప్పటికై నా అధికారులు, పాలకులు స్పందించి కందిపప్పు, వంటనూనె వంటి నిత్యావసరాలను పునరుద్ధరించాలని జిల్లా ప్రజలు డిమాండ్‌ చేస్తున్నారు.రాగులు మున్నాళ్ల ముచ్చటే.. రాగులు మూడు కిలోలు ఇస్తామని చెప్పి చివరకు ఒక కిలోకే పరిమితం చేయడం కార్డుదారుల్లో అసంతృప్తిని పెంచింది. అంతేకాకుండా రాగులు ఇచ్చినప్పుడు బియ్యం కోటాలో కోత విధించడం మరో సమస్యగా మారింది. అది కూడా జనవరి నెల వరకే ఇచ్చారు. ఈనెల రాగులకు ఇండెంట్‌ పెట్టలేదు. అంటే ఈ నెల ఒక్క కిలో పంపిణీ చేసే అవకాశం లేదు.రేషన్‌ దుకాణాల్లో నిత్యావసరాల కోసం ఎదురు చూసే కార్డుదారులకు నిరాశే మిగులుతోంది. ఎన్నికల హామీల్లో చెప్పిన కందిపప్పు, రాగులు ఇప్పుడు మూన్నాళ్ల ముచ్చటగా మిగిలిపోగా, నెలల తరబడి సరఫరా లేక ప్రజలు తీవ్ర ఇబ్బందులు పడుతున్నారు. మార్కెట్‌లో అమాంతం పెరిగిన ధరల మధ్య రేషన్‌పై ఆధారపడే పేదలు కందిపప్పు, రాగుల కోసం కళ్లప్పగించి ఎదురుచూస్తుండటం పరిస్థితి తీవ్రతను చూపుతోంది. కందిపప్పు కోసం కళ్లప్పగింత గత ప్రభుత్వ హయాంలో ప్రతి కార్డుదారుడికి నెలకు ఒక కిలో కందిపప్పు అందించేవారు. ప్రస్తుతం అది గతస్మృతిగా మారింది. ఏప్రిల్‌లో కూడా కందిపప్పు పంపిణీ చేసే సూచనలు కనిపించడం లేదు. ఇందుకు సంబంధించి ఇండెంట్‌ కూడా పెట్టకపోవడం గమనార్హం. మార్కెట్‌లో కందిపప్పు ధరలు రూ.150 నుంచి రూ.180 వరకు పెరగడంతో, సాధారణ ప్రజలకు కొనుగోలు భారంగా మారింది. దీంతో రేషన్‌ ద్వారా తక్కువ ధరకు లభించే కందిపప్పుపైనే అనేక కుటుంబాలు ఆధారపడుతున్నాయి.

సింహాచలం: శ్రీ వరాహలక్ష్మీనృసింహస్వామి దేవస్థానం హౌస్‌ బిల్డింగ్‌ సొసైటీ ఎన్నికలు ప్రహ్లాదపురంలోని సొసైటీ కల్యాణమండపంలో మంగళవారం ప్రశాంతంగా జరిగాయి. ఉదయం 9 నుంచి సాయంత్రం 4 వరకు పోలింగ్‌ నిర్వహించారు. మొత్తం 206 ఓట్లకు 168 ఓట్లు పోలైనట్లు ఎన్నికల అధికారి నిరంజన్‌ పట్నాయక్‌ తెలిపారు. 9 మంది సభ్యులకు గాను పోటీలో 14 మంది(రిటైర్డ్‌ ఉద్యోగులు, ప్రస్తుతం విధుల్లో నిలిచిన ఉద్యోగులు) నిలిచారు. వీరిలో డి.వి.ఎస్‌.రామరాజు(హరి) ప్యానెల్‌ విజయం సాధించింది. డి.వి.ఎస్‌.రామరాజు, గొడవర్తి శ్రీనివాసాచార్యులు, సుంకర సన్యాసిరావు(తాతాజీ), టీపీఎన్‌ మూర్తి, వై.అప్పారావు, ముగ్గు వరహాలరావు, లంక సూరిబాబు, కోరాడ శ్రీనివాస సాయి, గెడ్డపు సన్యాసి విజయం సాధించారు. బుధవారం అధ్యక్ష, కార్యదర్శులను ఎన్నుకోనున్నారు.

● ఓ కార్మికుడి వీడ్కోలు స్టీల్‌ప్లాంట్‌ మెయిన్‌ గేటు వద్ద నమస్కారం చేస్తున్న అప్పలరాజు ఉక్కునగరం: విశాఖ ఉక్కు కర్మాగారం రుణం తీర్చుకోలేనిదని స్టీల్‌ప్లాంట్‌ కార్మికుడు గొందేశి అప్పలరాజు అన్నారు. స్టీల్‌ప్లాంట్‌ రోల్‌షాప్‌ అండ్‌ రిపేర్‌ షాప్‌ విభాగానికి చెందిన జనరల్‌ ఫోర్‌మెన్‌ అప్పలరాజు వాలంటరీ రిటైర్‌మెంట్‌ స్కీమ్‌ ద్వారా మంగళవారం పదవీ విరమణ చేశారు. విభాగంలో సహోద్యోగుల మధ్య జరిగిన కార్యక్రమాల అనంతరం ఆయన ఇంటికి బయల్దేరారు. స్టీల్‌ప్లాంట్‌ నుంచి బయటకు వచ్చిన అప్పలరాజు ఉద్వేగానికి లోనయ్యారు. స్టీల్‌ప్లాంట్‌ మెయిన్‌ గేటుకు నమస్కారం చేసి కన్నీటి పర్యంతమయ్యారు. 35 ఏళ్ల తన సేవలను పూర్తి చేసుకుని వెళ్లడం బాధగా ఉందన్నారు. తన కన్న తల్లి తర్వాత తల్లి లాంటి స్టీల్‌ప్లాంట్‌ తనకు మంచి జీవితం, కుటుంబాన్ని ఇచ్చిందన్నారు. స్టీల్‌ప్లాంట్‌ రుణం తీరుకోలేనిదంటూ భావోద్వేగానికి లోనయ్యారు. సహోద్యోగులు ఆయనను ఓదార్చి ఇంటికి పంపించారు.

మహారాణిపేట: ‘నా బిడ్డను అత్యంత క్రూరంగా హత్య చేశాడు. ఈ కష్టం పగవారికి కూడా రాకూడదు’అంటూ మౌనిక తండ్రి పొలిపల్లి వేణుగోపాల్‌ కన్నీటిపర్యంతమయ్యారు. మంగళవారం కేజీహెచ్‌ మార్చురీ వద్ద తన కుమార్తె మృతదేహాన్ని చూసి ఆయన బోరున విలపించారు. తన కుమార్తెను హత్య చేసిన చింతాడ రవీంద్రను ఉరిశిక్ష విధించాలని డిమాండ్‌ చేశారు. హత్య జరిగిన సమయంలో మౌనిక ఒంటిపై ఉన్న సుమారు రెండు తులాల బంగారు ఆభరణాలు మాయమయ్యాయని వేణుగోపాల్‌ తెలిపారు. ఈ కేసుపై ప్రభుత్వం, పోలీస్‌ శాఖ ప్రత్యేక దృష్టి సారించి, తమ కుటుంబానికి తగిన న్యాయం చేయాలని వేడుకున్నారు.

అల్లిపురం: నగరంలో ప్రజల భద్రతను మెరుగుపరచడం, సామాజిక అంశాలపై అవగాహన కల్పించడం, సమాజంలో సానుకూల మార్పు తీసుకురావడంలో సోషల్‌ మీడియా ఇన్‌ఫ్లూయెన్సర్లు భాగస్వాములు కావాలని నగర పోలీస్‌ కమిషనర్‌ డాక్టర్‌ శంఖబ్రత బాగ్చి కోరారు. పోలీస్‌ కమిషనర్‌ కార్యాలయ సమావేశ మందిరంలో నగరానికి చెందిన సుమారు 35 మంది ఇన్‌ఫ్లూయెన్సర్లతో మంగళవారం ఆయన సమావేశమయ్యారు. ఈ సందర్భంగా సీపీ మాట్లాడుతూ.. పోలీస్‌ శాఖ, సోషల్‌ మీడియా ప్రతినిధులు సమన్వయంతో పనిచేస్తే సమాజంలో గణనీయమైన మార్పు తీసుకురావచ్చని ఆశాభావం వ్యక్తం చేశారు. నిరుత్సాహంతో ఆత్మహత్యలకు పాల్పడుతున్న వారిలో ధైర్యం నింపడం, ఆన్‌లైన్‌ గ్యాంబ్లింగ్‌, చిట్‌ఫండ్‌ మోసాలు, ఆన్‌లైన్‌ మోసాల పట్ల ప్రజలను అప్రమత్తం చేయడం, డ్రగ్స్‌ వల్ల కలిగే అనర్థాలపై యువతకు అవగాహన కల్పించడం, హెల్మెట్‌ ధారణ ఆవశ్యకత, రోడ్డు ప్రమాద బాధితులను ఆదుకోవడం, పోలీస్‌ శాఖ ప్రవేశపెట్టిన స్పీడ్‌ లేజర్‌ గన్స్‌ పనితీరుపై సమాచారం అందించడం తదితర అంశాలపై వీడియోలు, సందేశాల రూపంలో విస్తృత ప్రచారం కల్పించాలని సీపీ కోరారు. అనంతరం ఇన్‌ఫ్లూయెన్సర్ల అభిప్రాయాలను అడిగి తెలుసుకున్నారు. ఇన్‌ఫ్లూయెన్సర్లకు సీపీ శంఖబ్రత బాగ్చి పిలుపు

మధురవాడ: ప్రభుత్వ భూముల ఆక్రమణలకు అక్రమార్కులు తెగబడుతున్నారు. మధురవాడ పరిధిలో కోట్లాది రూపాయల విలువైన భూమిని కొట్టేయడానికి నియోజకవర్గ ముఖ్యనేత పేరును వాడుకుంటూ దర్జాగా పనులు సాగిస్తున్నట్లు ఆరోపణలు వెల్లువెత్తుతున్నాయి. కబ్జాదారులకు అధికార పార్టీ అండదండలు ఉండటంతోనే రెవెన్యూ అధికారులు చర్యలు తీసుకోవడానికి వెనకాడుతున్నారని స్థానికులు చర్చించుకుంటున్నారు. రూ.3 కోట్లు విలువ చేసే భూమి విశాఖ రూరల్‌ మండలం, మధురవాడ రెవెన్యూ గ్రామం సర్వే నంబర్‌ 388 పరిసరాల్లో ఈ దందా సాగుతోంది. మధురవాడ హైవే నుంచి ఐటీ సెజ్‌కు వెళ్లే మార్గంలో, వికలాంగుల కాలనీ వద్ద అదానీ డేటా సెంటర్‌ రోడ్డును ఆనుకుని ఉన్న సుమారు 500 గజాల ప్రభుత్వ భూమిపై అక్రమార్కుల కన్ను పడింది. ఇక్కడ గజం ధర బహిరంగ మార్కెట్‌లో దాదాపు రూ.60 వేల వరకు పలుకుతోంది. అంటే సుమారు రూ.3 కోట్ల విలువైన ఈ భూమిని హస్తగతం చేసుకునేందుకు పక్కా పథకం రచించారు. గతంలో అక్రమంగా నిర్మించిన షెడ్‌లకు ఆనుకుని ఉన్న ఖాళీ స్థలంలోని తుప్పలను తొలగించి, కొండ భూమిని చదును చేసే పనులు మొదలుపెట్టారు. ఇంత దర్జాగా ప్రభుత్వ భూమిని ఆక్రమణకు తెరలేపడం పట్ల పలువురు విస్మయం వ్యక్తం చేస్తున్నారు. ఆక్రమణ పనుల్లో జీవీఎంసీ వాహనం ఈ కబ్జా పర్వంలో ఒక ఆసక్తికరమైన సంఘటన చోటు చేసుకుంది. ఉన్నతాధికారుల ఆదేశాల మేరకు భూ ఆక్రమణను అడ్డుకునేందుకు వచ్చిన గ్రేడ్‌–2 వీఆర్వో, అక్కడ జరుగుతున్న పనులను నిలిపివేయించారు. భూమిని చదును చేస్తున్న పొక్లెయిన్‌ను సీజ్‌ చేసి తహసీల్దార్‌ కార్యాలయానికి తరలించేందుకు ప్రయత్నించగా.. అది జీవీఎంసీ శానిటేషన్‌ విభాగానికి చెందిన వాహనమని తేలడంతో విస్తుపోయారు. అదే సమయంలో అధికార పార్టీకి చెందిన ఒక ప్రముఖ నేత నుంచి ‘సదరు వ్యక్తులు మనవారే.. వదిలేయండి’అంటూ హుకుం జారీ కావడంతో అధికారి వెనక్కి తగ్గినట్లు సమాచారం. ప్రభుత్వ భూమిని ఆక్రమించడానికి ఏకంగా ప్రభుత్వ వాహనాన్నే వాడటం చూస్తుంటే, ఈ వ్యవహారం ఎంతటి స్థాయి వ్యక్తుల కనుసన్నల్లో జరుగుతుందో అర్థమవుతోంది. అసలు సూత్రధారులు ఎవరు? అసలు అక్రమార్కుల పనులకు జీవీఎంసీ వాహనాన్ని పంపిన అధికారులు ఎవరు? ఈ కబ్జా వెనుక జీవీఎంసీలోని ఉన్నతాధికారుల ప్రమేయం ఉందా.. లేక ఎవరికీ అనుమానం రాకుండా ఉండేందుకే ఉద్దేశపూర్వకంగా ప్రభుత్వ వాహనాన్ని ఉపయోగించారా? అన్న అనుమానాలు వ్యక్తమవుతున్నాయి. ఇప్పటికై నా జిల్లా ఉన్నతాధికారులు స్పందించి, కోట్లాది రూపాయల విలువైన ప్రభుత్వ భూమిని కాపాడాలని స్థానికులు కోరుతున్నారు.

డుంబ్రిగుడ : మండలంలోని గోరాపూర్‌ రైల్వేస్టేషన్‌ సమీపంలోని ఆంధ్ర, ఒడిశా సరిహద్దులో ఎదురెదురుగా వస్తున్న రెండు బైక్‌లు ఢీకొన్న సంఘటనలో ఇద్దరు యువకులు మృతి చెందారు. ఎస్‌ఐ ఎల్‌.సురేష్‌ తెలిపిన వివరాల ప్రకారం సోమవారం అర్ధరాత్రి జరిగిన రోడ్డు ప్రమాదంలో అరకులోయ మండలం మాదల పంచాయతీ తోటవలస గ్రామానికి చెందిన కిల్లో జోషప్‌(23) అనే గిరిజన యువకుడు బంధువుల ఇంటి నుంచి స్వగ్రామానికి బయలుదేరగా, హుకుంపేట మండల గడుగుపల్లి గ్రామానికి చెందిన మువ్వల శ్రీను(28) అనే యువకుడు తన స్నేహితుడితో చటువాలో జరుగుతున్న పండగను చూసేందుకు బయలుదేరారన్నారు. గోరాపూర్‌ రైల్వేస్టేషన్‌ సమీపంలో కిలోమీటరు దూరంలో రాత్రి వేళ రెండు బైకులు బలంగా ఢీ కొన్నాయని చెప్పారు. సంఘటన స్థలంలోనే శ్రీను మృతి చెందగా, కొన ఊపిరితో కొట్టుమిట్టాడుతున్న జోషప్‌ అంబులెన్స్‌లో తరలిస్తుండగా మార్గమధ్యంలో యండపల్లివలసలో మృతి చెందారని ఎస్‌ఐ తెలిపారు. వారితో పాటు మరొకరు గాయాలతో ఉండగా ఆసుపత్రిలో చేర్పించారని తెలిపారు. మృతదేహాలను అరకులోయ ప్రాంతీయ ఆసుపత్రికి తరలించి పంచనామా నిర్వహించి మృతుల కుటుంబ సభ్యులకు మంగళవారం అప్పగించడం జరిగిందన్నారు. ఈ సంఘటనపై కేసు నమోదు చేసి దర్యాప్తు చేస్తున్నామని తెలిపారు. మృతి చెందిన మువ్వల శ్రీను, (ఫైల్‌)

దేవరాపల్లి : మండల కేంద్రంలో సోమవారం రాత్రి అనంతగిరి మండలం కొరపర్తికి చెందిన గిరిజన యువతి దూసరి లక్ష్మి ఆత్మహత్యకు పాల్పడిన ఘటనపై పోలీసు ఉన్నతాధికారులు మంగళవారం విచారణ చేపట్టారు. అనకాపల్లి ఇన్‌చార్జి డీఎస్పీ ఈ.శ్రీనివాసులు, కె.కోటపాడు సీఐ కె.కృష్ణ, స్థానిక ఎస్‌ఐ వి.సత్యనారాయణ ఘటనా స్థలాన్ని మంగళవారం పరిశీలించారు. యువతి ఉరి వేసుకున్న గదిలో క్లూస్‌ టీమ్‌ సిబ్బంది ఆధారాలు సేకరించారు. దేవరాపల్లికి చెందిన యువకుడు కొల్లి లోకేష్‌ ప్రేమ పేరుతో వంచించి మోసం చేయడాన్ని తట్టుకోలేక తమ కుమార్తె ఆత్మహత్యకు పాల్పడిందని తండ్రి పెంటయ్య ఇచ్చిన ఫిర్యాదులో పేర్కొన్నారని ఎస్‌ఐ వి.సత్యనారాయణ తెలిపారు. ఫిర్యాదు మేరకు కేసు నమోదు చేశామని, మృతురాలి కుటుంబ సభ్యులు పలు అనుమానాలు వ్యక్తం చేస్తున్న నేపథ్యంలో అన్ని కోణాల్లో లోతుగా దర్యాప్తు చేస్తున్నామని పోలీసులు తెలిపారు. కాగా మృతురాలి కుటుంబ సభ్యులు, బంధువులు మంళవారం స్థానిక పోలీస్‌స్టేషన్‌కు అధిక సంఖ్యలో తరలివచ్చి లక్ష్మి మృతికి కారకులైన నిందితులను కఠినంగా శిక్షించాలని డిమాండ్‌ చేశారు. ఎస్టీ కులానికి చెందిన యువతి కావడంతోనే సదరు యువకుడు పెళ్లికి నిరాకరించాడని, దీనిని తట్టుకోలేక తీవ్ర మనస్థాపంతో ఆత్మహత్య చేసుకుందని మృతురాలి బంధువులు ఆరోపించారు. కుటుంబానికి పెద్ద దిక్కుగా నిలుస్తూ తల్లిదండ్రులను ఇద్దరు తమ్ముళ్లు, చెల్లిని పోషిస్తున్న లక్ష్మి మృతితో ఆ కుటుంబం దుఃఖసాగరంలో మునిగిపోయింది. ఈ సందర్భంగా సీపీఎం జిల్లా కార్యదర్శి వర్గ సభ్యుడు డి. వెంకన్న మాట్లాడుతూ గిరిజన యువతి మృతిపై పోలీసులు నిష్పక్షపాతంగా విచారణ చేపట్టి దోషులను కఠినంగా శిక్షించాలని డిమాండ్‌ చేశారు. అలాగే ఎస్సీ, ఎస్టీ రక్షణ చట్టం కింద పరిహారం, బాధిత కుటుంబానికి రూ.25 లక్షల నష్ట పరిహారం, రెండు ఎకరాల భూమి, కుటుంబ సభ్యుడికి ప్రభుత్వ ఉద్యోగం కల్పించాలని ప్రభుత్వాన్ని డిమాండ్‌ చేశారు. కె.కోటపాడు సీహెచ్‌సీలో పోస్టుమార్టం అనంతరం మృతదేహాన్ని మంగళవారం సాయంత్రం కుటుంబ సభ్యులకు పోలీసులు అప్పగించారు.

అనకాపల్లి : ఆంగ్లభాష ప్రాముఖ్యత నేటి ఆధనిక ప్రపంచంలో ప్రచండ వేగంతో దూసుకుపోతుందని డీఈవో గిడ్డి అప్పారావు నాయుడు అన్నారు. జీవీఎంసీ విలీన గ్రామమైన కె.ఎన్‌.ఆర్‌.పేటలో ఏపీ ఎంఎస్‌ ప్రభుత్వ జూనియర్‌ కళాశాలలో విధులు నిర్వహిస్తున్న ఆంగ్ల అధ్యాపకుడు విల్లూరి ఉమామహేశ్వరరావు రచించిన ‘ట్రాన్స్‌మ్యుటేషన్‌ ఆఫ్‌ హిస్టరీ లిటరేచర్‌’ పుస్తకాన్ని మంగళవారం ఆయన ఆవిష్కరించారు. ఈ సందర్భంగా మాట్లాడుతూ పుస్తక సాహిత్యం ద్వారా ఆంగ్ల భాషాభివృద్ధి చేసుకోవాలనుకునే వారికీ, ఆంగ్లభాష వ్యక్తీకరణని అభివృద్ధి చేసుకోదలచుకునే వ్యక్తులకు క్లుప్తంగా ఆంగ్లభాషపై మంచి పట్టు సంపాదించుకుని తనదైన శైలిలో ఆంగ్లంలో భావప్రకటన చేయదలచుకునేందుకు ఎంతగానో ఉపయోగపడుతుందన్నారు. స్కూళ్లు, కళాశాలల విద్యార్థులు, ఇతర వర్గాల ప్రజలు సద్వినియోగం చేసుకోవాలన్నారు. పుస్తక రచయిత డాక్టర్‌ విల్లూరి ఉమామహేశ్వరరావు మాట్లాడుతూ బ్రిటిష్‌ వారి పరిపాలనా కాలంలో భారతీయుల స్థితిగతులు, వారి జీవన ప్రమాణాలు, వారు ఎదుర్కొన్న సవాళ్లు తదితర విషయాలను, వివిధ రకాల రచయితల రచనా పటిమను పరిగణనలోనికి తీసుకుంటూ రాసిన పుస్తకం ఆద్యంతం ఆసక్తిగా ఉంటుందన్నారు. కార్యక్రమంలో అధ్యాపకులు అప్పారావు, కిషోర్‌, సాయిరామ్‌. పలాసరావు(పోస్టల్‌ డెవలప్‌మెంట్‌ ఆఫీసర్‌), కాళిదాస్‌, టి.లక్ష్మీనాయుడు పాల్గొన్నారు.

గంజాయిని పట్టుకున్న సెక్యూరిటీ వింగ్‌ (ఆర్‌ఐ) టీం పెందుర్తి: ఉమ్మడి విశాఖ జిల్లా ఏజెన్సీ ప్రాంతం నుంచి నగరానికి తరలిస్తున్న గంజాయిని పెందుర్తి రైల్వే స్టేషన్‌ వద్ద సెక్యూరిటీ వింగ్‌(ఆర్‌ఐ) టీం పోలీసులు మంగళవారం పట్టుకున్నారు. నగర పోలీస్‌ కమిషనర్‌ శంఖబ్రత బాగ్చి ఆదేశాల మేరకు పెందుర్తి ప్రాంతంలో ఆర్‌ఐ బృందం తనిఖీలు నిర్వహించింది. నార్కోటిక్‌ డాగ్‌ సహాయంతో రైల్వే స్టేషన్‌ వద్ద 4 ప్యాకెట్లలో 15 కిలోల గంజాయిని గుర్తించారు. గంజాయితో పాటు తరలిస్తున్న వ్యక్తిని అదుపులోకి తీసుకుని స్థానిక పోలీస్‌ స్టేషన్‌కు అప్పగించారు. కేసు దర్యాప్తు చేస్తున్నారు.

అచ్యుతాపురం రూరల్‌ : ప్రమాదవశాత్తూ మేడపై నుంచి పడి అలబాని రామకృష్ణ (22) అనే యువకుడు మృతి చెందిన సంఘటన అచ్యుతాపురంలో చోటుచేసుకుంది. పోలీసులు తెలిపిన వివరాలిలా ఉన్నాయి. లారస్‌ పరిశ్రమలో విధులు నిర్వహిస్తున్న రామకృష్ణ అచ్యుతాపురం వేంకటేశ్వరస్వామి ఆలయానికి వెళ్లే దారిలో ఉన్న మనోహర్‌ హాస్టల్‌లో మూడో అంతస్తులో నివాసం ఉంటున్నాడు. మంగళవారం ఉదయం సుమారు 5.30 గంటల సమయంలో మూడో అంతస్తుపై నుంచి పడిపోవడం చుట్టుపక్కల వారు కొద్ది సేపటికి గమనించి 108 ఆంబులెన్స్‌ ద్వారా అచ్యుతాపురంలోని ఒక ప్రైవేట్‌ ఆసుపత్రికి తరలించారు. అక్కడ చికిత్స పొందుతూ సాయంత్రం 3 గంటల సమయంలో రామకృష్ణ మృతి చెందాడు. ఘటనపై తల్లిదండ్రులు ఇచ్చిన ఫిర్యాదు మేరకు సీఐ చంద్రశేఖర్‌రావు కేసు నమోదు చేసి దర్యాప్తు చేస్తున్నట్టు తెలిపారు.

మైనింగ్‌ సిబ్బందితో గ్రామస్తుల వాగ్వాదంరావికమతం : గ్రావెల్‌, రాయి ఏదైనా తెచ్చుకోవాలంటే మైనింగ్‌ సిబ్బందికి డబ్బులు కట్టాల్సిందే.. లేదంటే కుదరదంటున్నారు మైనింగ్‌ సిబ్బంది. మండలంలో గర్నికంలో ఇంటి నిర్మాణానికి రాయి పిక్కలను తీసుకొస్తుండగా ఏఎంఆర్‌ సంస్థ మైనింగ్‌ సిబ్బంది అడ్డుకోవడంపై మహిళలు తిరగబడ్టారు. కొండ ప్రాంతంలో రాయి పిక్కలు ఏరుకొని తీసుకొస్తుండగా టాక్స్‌ కట్టమనడం ఎంత వరకు సమంజసం.. అంటూ మైనింగ్‌ కంపెనీ సిబ్బందిని ప్రశ్నించారు. ఈ విషయమై సోమవారం గర్నికం గ్రామస్తులు, సర్పంచ్‌ భర్త నూకరాజు ిమైనింగ్‌ సిబ్బంది మధ్య వాగ్వాదం చోటు చేసుకుంది. గ్రామానికి చెంధిన కొందరు మహిళలు పక్కా ఇళ్లు నిర్మించుకుంటున్నారు. గచ్చులు చేయడానికి రాయి పిక్క అవసరం కావడంతో సమీపంలో గల మెట్ట ప్రాంతంలో చిన్న రాయి పిక్కలను పోగుచేసుకొని వాటిని ట్రాక్టర్‌లో వేసి తీసుకెళుతుండగా ఏఎంఆర్‌ మైనింగ్‌ సంస్థ సిబ్బంది టాక్స్‌ కట్టాలని అడ్డుకున్నారు. ప్రభుత్వం ఇళ్ల నిర్మాణానికి ఇసుక ఇస్తుంటే , రాయి పిక్కలకు ట్యాక్స్‌ కట్టడం ఏంటని ప్రశ్నించారు. దీంతో సర్పంచ్‌ భర్త నూకరాజు తదితరులు అక్కడికి చేరుకొని మైనింగ్‌ సంస్థను తప్పు బట్టారు. రాయి పిక్కలకు కూడా ట్యాక్స్‌ కట్టాలని ఉందా , ఉంటే అందుకు సంబంధించిన జీవో చూపించాలని నిలదీశారు. ప్రతి దానికి ట్యాక్స్‌ కట్టాల్సి వస్తే సామాన్యులు ఎలా బతకాలి... అని కూటమి ప్రభుత్వం సంపద సృష్టించడం అంటే ఇదేనా? అంటూ మహిళలు వాపోయారు.

పాడేరు: వ్యవసాయ, వ్యవసాయేతర రుణాలు పెంచుతూ కేంద్ర, రాష్ట్ర ప్రభుత్వ పథకాలు రైతులకు అందే విధంగా చూడాలని కలెక్టర్‌ దినేష్‌కుమార్‌ ఆదేశించారు. కలెక్టరేట్‌ సోమవారం కలెక్టర్‌ దినేష్‌కుమార్‌ అధ్యక్షతన లీడ్‌ బ్యాంకు మేనేజర్‌ ఆధ్వర్యంలో జిల్లా స్థాయి మూడో త్రైమాసిక బ్యాంకర్ల కమిటీ సమావేశం నిర్వహించారు. కలెక్టర్‌ దినేష్‌కుమార్‌ మాట్లాడుతూ రైతు ఉత్పత్తిదారులు, సంఘాలకు పెట్టుబడి రుణ సహాయంతో ప్రోత్సహించాలన్నారు. ఆర్‌ఓఎఫ్‌ఆర్‌ పట్టా కలిగిన రైతులకు రుణ వితరణ, కౌలు రైతులకు, పశు సంవర్ధక , పిషరీష్‌, పట్టు పరిశ్రమలకు కిసాన్‌ క్రెడిట్‌ కార్డుల ద్వారా రుణాలు మంజూరు చేయాలని సూచించారు. ప్రభుత్వ పథకాలు, రుణాలపై రైతులకు అవగాహన కల్పించాలని సూచించారు. వ్యవసాయ కోర్సుల్లో చదువుతున్న విద్యార్థులకు రుణాలు మంజూరు చేసి ప్రోత్సహించాలన్నారు. పరిశ్రమల శాఖకు సంబంధించి ముద్ర రుణాలు, తయారీ, సేవా రంగాలకు సంబంధించి కేంద్ర ప్రభుత్వ పీఎంఈజీపీ, పీఎంఎఫ్‌ఎంఈ, పీఎం విశ్వకర్మ రుణాలు మంజూరు చేయాలన్నారు. జిల్లాలో రూరల్‌ సెల్ఫ్‌ ఎంప్లాయీమెంట్‌ ట్రైనింగ్‌ ఇనిస్టిట్యూట్‌, యూనియన్‌ బ్యాంకు ఆధ్వర్యంలో అరకులోయలో ప్రారంభిస్తామన్నారు. ప్రతినెల రెండు ధఫాలుగా స్వయం ఉపాధి ద్వారా వ్యాపారం ప్రారంభిస్తామన్నారు. జిల్లాలో కొత్త బ్యాంకులను ప్రారంభించి మారుమూల గ్రామాలకు సేవలందించాలని కలెక్టర్‌ ఆదేశించారు. సమావేశంలో యూనియన్‌ బ్యాంక్‌ డిప్యూటీ రీజనల్‌ హెడ్‌ రాజ, ఆర్‌బీఐ లీడ్‌ జిల్లా అధికారి నవీన్‌, నాబార్డ్‌ డీడీఎం గౌరీశంకర్‌, లీడ్‌ బ్యాంకు మేనేజర్‌ మాతునాయుడు, ఎస్‌బీఐ, ఏపీజీవీబీ, బ్యాంక్‌ ఆఫ్‌ బరోడా, హెచ్‌డీఎఫ్‌సీ, ఇతర బ్యాంకుల మేనేజర్లు, పరిశ్రమల శాఖల అధికారులు పాల్గొన్నారు. జిల్లాలో రూ.2,730 కోట్ల క్రెడిట్‌ సామర్థ్యం అంచనా జిల్లాలో ఉన్న అన్ని బ్యాంకులు, జిల్లా అధికారులు సమన్వయంతో పనిచేసి క్రెడిట్‌ సామర్థ్యాన్ని పెంచేందుకు కృషి చేయాలని జిల్లా కలెక్టర్‌ దినేష్‌కుమార్‌ ఆదేశించారు. జిల్లా సంప్రదింపుల కమిటీ సమావేశంలో ఆయన మాట్లాడుతూ 2026–27 ఆర్ధిక సంవత్సరానికి రూ.2,730 కోట్ల క్రెడిట్‌ సామర్థ్యాన్ని గుర్తించామన్నారు. వ్యవసాయం, సూక్ష్మ, చిన్న, మధ్య తరహా పరిశ్రమల (ఎంఎస్‌ఎంఈ) రంగాలపై ప్రత్యేక దృష్టి సారించాలన్నారు. అనంతరం జిల్లా స్థాయి క్రెడిట్‌ ప్లాన్‌ పుస్తకాన్ని ఆవిష్కరించారు. కలెక్టర్‌ దినేష్‌కుమార్‌

అర్జీదారుల సమస్యలను వింటున్న ఎస్పీ తుహిన్‌ సిన్హా అనకాపల్లి : ఎస్పీ కార్యాలయంలో సోమవారం పీజీఆర్‌ఎస్‌కు 64 అర్జీలు వచ్చాయి. జిల్లాలో వివిధ ప్రాంతాల నుంచి అర్జీదారులు ఎస్పీ తుహిన్‌ సిన్హాకు వివరించారు. ఈ సందర్బంగా ఎస్పీ మాట్లాడుతూ ప్రజా ఫిర్యాదుల వేదికలో వచ్చి అర్జీలు పూర్తి స్థాయిలో పరిష్కరించేందుకు చర్యలు చేపట్టడం జరుగుతుందన్నారు. భూ తగాదాలు–31, కుటుంబ కలహాలు–2, మోసపూరిత వ్యవహారాలు–5, ఇతర విభాగాలకు చెందినవి–26 వచ్చినట్టు తెలిపారు. చట్టపరిధిలో ఉన్న సమస్యలను వారం రోజుల్లో పరిష్కరించేందుకు చర్యలు చేపట్టడం జరుగుతుందన్నారు. ఈ కార్యక్రమంలో అదనపు ఎస్పీ ఎల్‌.మోహనరావు, సిబ్బంది పాల్గొన్నారు.

దేవరాపల్లి: గిరిజన యువతి దూసరి లక్ష్మి(22) సోమవారం రాత్రి దేవరాపల్లిలో ఫ్యాన్‌కు ఉరేసుకుని ఆత్మహత్య చేసుకుంది. అల్లూరి సీతారామరాజు జిల్లా అనంతగిరి మండలం పినకోట పంచాయతీ శివారు కొరపర్తి గ్రామానికి చెందిన పెంటయ్య, జమ్ములమ్మ దంపతుల ఇద్దరు కుమార్తెలు దేవరాపల్లిలో ఐదేళ్లగా నివసిస్తున్నారు. పెద్ద కుమార్తె లక్ష్మి స్థానిక ప్రైవేటు మెడికల్‌ ల్యాబ్‌లోను, చిన్న కుమార్తె భవాని సెల్‌ దుకాణంలోను పని చేస్తున్నారు. సోమవారం రాత్రి 7 గంటల సమయంలో తన అక్క ఫ్యాన్‌కు ఉరేసుకొని చనిపోతున్నట్లు వేరొక వ్యక్తి ఫోన్‌ ద్వారా తెలుసుకున్న చెల్లెలు భవాని వెంటనే తాము అద్దెకుంటున్న గదికి పరుగులు తీసింది. అప్పటికే అక్క చున్నీతో ఉరేసుకొని విగతజీవిగా ఉండటాన్ని చూసి బోరున విలపించింది. ఈమె ఆత్మహత్యకు ప్రేమ వ్యవహారమే కారణమని మృతురాలి చెల్లెలు భవాని చెప్పినట్లు తెలిసింది. స్థానిక ఎస్‌ఐ వి.సత్యనారాయణ ఘటనా స్థలాన్ని పరిశీలించారు. మృతిరాలి తల్లిదండ్రులకు సమాచారం అందించారు. మృతదేహాన్ని కె.కోటపాడు సీహెచ్‌సీకి తరలిస్తున్నట్లు తెలిపారు. గిరిజన యువతి ఆత్మహత్యతో దేవరాపల్లిలోపాటు కొరపర్తిలో విషాద ఛాయలు అలుముకున్నాయి.

ఫారెస్ట్‌ రేంజర్‌ మురళీకృష్ణముంచంగిపుట్టు: అడవులకు నిప్పు పెట్టకుండా ప్రకృతి సంపదను ప్రతి ఒక్కరూ కాపాడుకోవాలని ఫారెస్ట్‌ రేంజర్‌ ఎం.మురళీకృష్ణ అన్నారు.మండలంలోని రంగబయలు పంచాయతీ గొబ్బరిపడ గ్రామంలో సోమవారం జరిగిన కార్యక్రమంలో అడవులకు నిప్పు పెట్టడం వలన కలిగే అనర్థాలపై అటవీశాఖాధికారులు గిరిజనులకు అవగాహన కార్యక్రమం నిర్వహించారు. వేసవిలో అడవుల పట్ల తీసుకోవాల్సిన జాగ్రత్తలను వివరించారు. ఈ సందర్భంగా ఫారెస్ట్‌ రేంజర్‌ ఎం.మురళీకృష్ణ మాట్లాడుతూ అడవులకు నిప్పు పెట్టడం వల్ల పర్యావరణ వ్యవస్థ, వన్యప్రాణులు, మానవాళికి తీవ్ర ముప్పు కలుగుతుందని, అమూల్యమైన ప్రకృతి సంపద, చెట్లు, జీవ వైవిధ్యాన్ని నాశనమవుతుందన్నారు. వేసవిలో వ్యవసాయ వ్యర్థాలు, ఎండుగడ్డిని కాల్చవద్దని, ఎక్కడైనా మంటలు కనిపిస్తే వెంటనే అగ్నిమాపక సిబ్బంది, అటవీ అధికారులకు సమాచారం అందించాలని, అడవులను రక్షించుకోవడం ప్రతి ఒక్కరి బాధ్యత అని ఆయన అన్నారు. అనంతరం జోడిగుమ్మ నుంచి గొబ్బరిపడ వరకు వచ్చే ఆర్‌వోఎఫ్‌ఆర్‌ రహదారిపై ఫారెస్ట్‌ అధికారులు, పిఆర్‌ అధికారులు సర్వే వేశారు. పీఆర్‌ ప్రాజెక్ట్సు ఏఈ అశోక్‌, ఫారెస్ట్‌ బీట్‌ అధికారి శ్రీను, అసిస్టెంట్‌ ఫారెస్ట్‌ బీట్‌ అధికారి రామారావు తదితరులు పాల్గొన్నారు.

సొంత స్థలంలో ఇల్లు నిర్మించుకుని చీకట్లోనే నివాసముంటున్నామని, నూతన విద్యుత్‌ మీటర్‌కు ఫీజు కట్టి ఐదు నెలలు అవుతున్నా విద్యుత్‌ శాఖ సిబ్బంది మీటర్‌ వేసి విద్యుత్‌ సౌకర్యం కల్పించడం లేదని, తక్షణమే తమకు విద్యుత్‌ సౌకర్యం కల్పించాలంటూ మాడుగుల మండలం చింతలూరు గ్రామానికి చెందిన భార్యభర్తలు గుడేపు దుర్గాలు, లక్ష్మి పీజీఆర్‌ఎస్‌లో వినతి అందించారు. రజక వృత్తి చేసుకుంటూ జీవనం సాగించే తాము చీకట్లోనే నివాసముండాల్సి వస్తుందని, చుట్టుపక్కల అందరికీ అందించిన విద్యుత్‌ సౌకర్యం తమకు కూడా అందించి న్యాయం చేయాలని ఆమెను కోరారు. –గుడేపు లక్ష్మి అధికారుల అండతో అక్రమ రిజిస్ట్రేషన్లు రిజిస్టర్డ్‌ దస్తావేజు ద్వారా కొనుగోలు చేసిన భూమిని తన పేరున కాకుండా రెవెన్యూ అధికారులు రీసర్వేలో ఇతరుల పేరున ఆన్‌లైన్‌ చేయడంతో తన భూమిపై అక్రమ రిజిస్ట్రేషన్లు జరుగుతున్నాయని, తక్షణమే రిజిస్ట్రేషను జరగకుండా నిలిపివేసి తన పేరున ఆన్‌లైన్‌ చేయాలంటు కశింకోట మండలం అచ్చెర్ల గ్రామానికి చెందిన కర్రి రాజేశ్వరి రెవెన్యూ క్లినిక్‌లో ఫిర్యాదు చేశారు. దస్తావేజు నెం.2199/2023 దిన ఉన్నప్పటికీ 2024లో జరిగిన రీసర్వేలో ఇతరుల పేరున వీఆర్‌వో ఆన్‌లైన్‌ చేయడం దారుణమని, తక్షణమే విచారణ చేపట్టి న్యాయం చేయాలని కోరారు. –కర్రి రాజేశ్వరి

పీజీఆర్‌ఎస్‌–167, రెవెన్యూ క్లినిక్‌కు 181 అర్జీలుతుమ్మపాల : పీజీఆర్‌ఎస్‌, రెవెన్యూ క్లినిక్‌లకు వచ్చే అర్జీదారుల సమస్యలను అధికారులు వ్యక్తిగతంగా క్షేత్ర స్థాయిలో పర్యటించి అర్జీదారులు సంతృప్తి చెందేలా పరిష్కరించాలని వివిధ శాఖల జిల్లా అధికారులను కలెక్టర్‌ విజయకృష్ణన్‌ ఆదేశించారు. సోమవారం కలెక్టరేట్‌ సమావేశ మందిరం–1, 2లో నిర్వహించిన పీజీఅర్‌ఎస్‌, రెవెన్యూ క్లినిక్‌ల కార్యక్రమంలో ఆమెతో పాటు జాయింట్‌ కలెక్టర్‌ శౌర్యమాన్‌ పటేల్‌, డీఆర్వో వై.సత్యనారాయణరావు ప్రజల నుంచి అర్జీలు స్వీకరించారు. డివిజన్‌, మండల, గ్రామ, వార్డు స్థాయిల్లో నిర్వహించే పీజీఆర్‌ఎస్‌ కార్యక్రమానికి సంబంధిత అధికారులు హాజరై ఆయా స్థాయిల్లోనే సమస్యలను పరిష్కరించాలన్నారు. పరిష్కారం కాని దరఖాస్తులపై కారణాలు అర్జీదారులకు వివరంగా తెలియజేయాలన్నారు. పీజీఅర్‌ఎస్‌కు 167, రెవిన్యూ క్లినిక్‌లో 181 మొత్తం 348 అర్జీలు స్వీకరించడం జరిగిందని తెలిపారు. కార్యక్రమంలో ప్రత్యేక ఉప కలెక్టర్లు మనోరమ, రామ మాణి, మెప్మా పీడీ కె.సరోజిని, ఐసీడీఎస్‌ పీడీ సూర్యలక్ష్మి, జిల్లా ఎక్త్సెజ్‌ అధికారి వి.సుధీర్‌, వివిధ శాఖల జిల్లా అధికారులు పాల్గొన్నారు. అర్జీల్లో భూ సమస్యలు అధికంగా ఉన్నాయి...పలు అర్జీదారుల ఫిర్యాదుల వివరాలిలా ఉన్నాయి... మైనింగ్‌ అధికారులపై ఫిర్యాదు చింతలూరు సర్వే నెం.379–1 లో గ్రాంట్‌ ఆర్డర్‌ లేకుండా జరిగిన 3వేల క్యూబిక్‌ మీటర్ల అక్రమ మైనింగ్‌పై విచారణ కోరుతూ నర్సీపట్నం మైనింగ్‌ అధికారులకు చేసిన ఫిర్యాదుపై ముందు తేదీలతో తప్పుడు నివేదికలు ఇచ్చి, ప్రత్యక్ష సాక్షుల స్టేట్‌మెంట్లను ఉద్దేశపూర్వకంగా నిరాకరించడం, గ్రామస్తులను మోసం చేసి సంతకాలు సేకరించడంపై క్రిమినల్‌ చర్యలు తీసుకోవాలని మాడుగుల మండలం, చింతలూరు గ్రామానికి చెందిన మెలిపాక మణికంఠ కలెక్టరేట్‌లో ఫిర్యాదు చేశారు. సర్వే నంబర్‌ 379–1లో అక్రమాలపై చేసిన ఆరు ఫిర్యాదులను నీరు గార్చడానికి మైనింగ్‌ అధికారులు, క్వారీ నిర్వాహకులు కలిసి నేరపూరిత చర్యలకు పాల్పడారని వారిపై చర్యలు తీసుకోవాలని, మైనింగ్‌ అధికారుల ప్రమేయం లేకుండా స్వతంత్ర టాస్క్‌ఫోర్స్‌ కమిటీతో పునర్విచారణ జరిపించాలని డిమాండ్‌ చేశారు. కలెక్టరేట్‌ గేటు వద్ద బీజేపీ నాయకులతో కలిసి నిరసన తెలిపారు.

తుమ్మపాల : కౌమార దశలో (చిన్న వయసులో) గర్భం దాల్చడం వల్ల కలిగే అనర్ధాలను వివరిస్తూ ప్రజల్లో చైతన్యం తీసుకురావాలని కలెక్టర్‌ విజయకృష్ణన్‌ పిలుపునిచ్చారు. సోమవారం కలెక్టరేట్‌ సమావేశ మందిరంలో జిల్లా మహిళాభివృద్ధి, శిశు సంక్షేమ శాఖ ఆధ్వర్యంలో రూపొందించిన ‘కౌమార దశలో గర్భధారణ – కారణాలు, దుష్ప్రభావాలు అవగాహన‘ గోడ పత్రికలను ఆమెతో పాటు జాయింట్‌ కలెక్టర్‌ శౌర్యమాన్‌ పటేల్‌, డీఆర్వో వై.సత్యనారాయణరావు ఆవిష్కరించారు. ఈ సందర్భంగా కలెక్టర్‌ మాట్లాడుతూ సమాజంలో ఇంకా అక్కడక్కడా బాల్య వివాహాలు జరుగుతుండడం విచారకరమని, దీనివల్ల బాలికలు శారీరక, మానసిక సమస్యలకు గురవుతున్నారని అన్నారు. లైంగిక అవగాహన లోపం, బాల్య వివాహాలు, పేదరికం, సరైన తల్లిదండ్రుల పర్యవేక్షణ లేకపోవడం వల్ల ఈ సమస్యలు తలెత్తుతున్నాయన్నారు. బాల్య వివాహాలను అరికట్టడం, బాలికల విద్యను ప్రోత్సహించడం, అనుమానాస్పద సంఘటనలపై తక్షణమే అధికారులకు ఫిర్యాదు చేయడం ద్వారా ఆరోగ్యవంతమైన సమాజాన్ని నిర్మించగలమన్నారు. కార్యక్రమంలో జిల్లా మహిళాభివృద్ధి, శిశు సంక్షేమ శాఖ అధికారి సూర్యలక్ష్మి, జిల్లా వైద్య ఆరోగ్య శాఖ అధికారి డాక్టర్‌ హైమావతి, సిబ్బంది పాల్గొన్నారు. జీరో పావర్టీ పీ4 కార్యక్రమం తొలి వార్షికోత్సవం కార్యక్రమాన్ని సోమవారం సాయంత్రం కలెక్టర్‌ కార్యాలయ సమావేశ మందిరంలో కలెక్టర్‌ విజయ కృష్ణన్‌ జ్యోతి ప్రజ్వలన చేసి ప్రారంభించారు. తిరుపతి పద్మావతీ మహిళా యూనివర్సిటీలో పీ4 వార్షికోత్సవాలు వీడియో కాన్ఫరెన్స్‌ ద్వారా కలెక్టరేట్‌లో ఆమెతో పాటు జేసీ, గవర కార్పొరేషన్‌ చైర్మన్‌ మళ్ల సురేంద్ర, కొప్పుల వెలమ కార్పొరేషన్‌ చైర్మన్‌ కుమార్‌ పాల్గొన్నారు.

పూర్వం నుంచి తమ ఆక్రమణలో ఉన్న పీడబ్ల్యూడీ భూమిలో పెంచుకున్న జీడిమామిడి, పనస చెట్లను దౌర్జన్యంగా నరికివేసి తన భూమిలోకి అక్రమంగా చొరబడి ఆక్రమించేందుకు ప్రయత్నించిన విషయమై తహసీల్దార్‌ ఇచ్చిన ఎండార్స్‌మెంట్‌ ఆధారంగా పోలీసులు కేసు నమోదు చేయడం లేదని, దీంతో ఆక్రమణదారులు రౌడీలతో తమపై దాడులకు దిగుతున్నారని, వారి నుంచి తమకు రక్షణ కల్పించడంతో పాటు నా భూమిని రక్షించాలంటూ అనకాపల్లి మండలం దిబ్బపాలెం గ్రామానికి చెందిన భార్యభర్తలు కాండ్రేగుల సత్యవతి, సూర్యారావు ఫిర్యాదు చేశారు. చెట్ల నరికివేతపై పోలీసులు కేసు నమోదు చేసేలా ఆదేశించాలని పీజీఆర్‌ఎస్‌లో కలెక్టర్‌ను కోరారు. – కాండ్రేగుల సూర్యారావు

వాటర్‌ ఏరోడ్రోమ్‌ ప్రాజెక్టు కోసం ప్రజాభిప్రాయ సేకరణ ముంచంగిపుట్టు: జోలాపుట్టు పంచాయతీ కేంద్రంలో వాటర్‌ ఏరోడ్రోమ్‌ ప్రాజెక్ట్‌ ఏర్పాటుకై బుధవారం ప్రజాభిప్రాయ సేకరణ సదస్సును నిర్వహించనున్నట్టు తహసీల్దార్‌ భాస్కరఅప్పారావు తెలిపారు. ఆయన సోమవారం విలేకరులతో మాట్లాడుతూ ఆంధ్రప్రదేశ్‌ ఎయిర్‌పోర్ట్‌ డెవలప్‌మెంట్‌ కార్పొరేషన్‌ లిమిటెడ్‌ ఆధ్వర్యంలో రూ.16.45కోట్లతో సర్వే నెం.5లోని జోలాపుట్టు పంచాయతీలో వాటర్‌ ఏరోడ్రోమ్‌ ప్రాజెక్టుకు సంబంధించిన ప్రజాభిప్రాయ సేకరణ సదస్సు నిర్వహించనున్నట్టు తెలిపారు. ఆ రోజు ఉదయం 11 గంటలకు జోలాపుట్టు గ్రామ సచివాలయంలో సదస్సు నిర్వహిస్తామని, ప్రజాప్రతినిధులు, స్థానికులు హాజరై తమ యొక్క అభిప్రాయాలను తెలియజేయాలని ఆయన కోరారు. ఆర్‌ఐ భాస్కర్‌, వీర్వోలు తదితరులు పాల్గొన్నారు.

డుంబ్రిగుడ: మండలం కేంద్రంలోని శాఖ గ్రంథాలయంలో ఉమ్మడి జిల్లాల చైర్మన్‌ వన్నెంరెడ్డి సతీష్‌ సోమవారం ఆకస్మిక తనిఖీ చేశారు. పోటీ పరీక్షలకు సిద్ధమవుతున్న విద్యార్థులు, పాఠకులను అడిగి గ్రంథాలయంలో గల సౌకర్యలపై ఆరా తీశారు. శాఖ గ్రంథాలయంలో కావలసిన అవసరాలను గురించి గ్రంథాలయ అధికారి సునీతకు అడిగి తెలుసుకున్నారు. విద్యార్థులు కొత్తగా వచ్చిన పుస్తకాలు కొనుగోలు చేయమని కోరారు. పుస్తక పఠనం అలవర్చుకోవాలని, దీంతో విస్తృతంగా విజ్ఞానం పొందవచ్చన్నారు. వైఫై సేవలు ఆధునీకరణ చేస్తామని చైర్మన్‌ అన్నారు. పాఠకులు తదితరులు పాల్గొన్నారు.

చింతపల్లి: జిల్లాలో రానున్న ఐదు రోజుల్లో తేలికపాటి వర్షాలు పడే అవకాశాలున్నట్టు చింతపల్లి వ్యవసాయ పరిశోధనా స్థానం ఏడీఆర్‌, వాతావరణ విభాగ నోడల్‌ అధికారి డాక్టర్‌ ఆళ్ల అప్పలస్వామి తెలిపారు. ఆయన సోమవారం విలేకరులతో మాట్లాడుతూ మంగళవారం నుంచి ఐదు రోజుల పాటు అల్లూరి జిల్లా పరిధిలో వాతావరణ వివరాలను వెల్లడించారు. డివిజన్‌ల పరిధిలో వర్షపాతం 0.2 నుంచి 6.0 మిల్లీ మీటర్లు నమోదయ్యే అవకాశం ఉందన్నారు. గరిష్ణ ఉష్ణోగ్రతలు 32.2 డిగ్రీలు నుంచి 32.9 డిగ్రీలు మధ్య, కనిష్ణ ఉష్ణోగ్రతలు 16 డిగ్రీల నుంచి 16.9 డిగ్రీల మధ్య ఉండవచ్చన్నారు. గాలిలో తేమ శాతం ఉదయం వేళల్లో 77 నుంచి 82 శాతం మధ్యాహ్న సమయాల్లో 50 నుంచి 75 శాతం మధ్యలో ఉంటుందన్నారు. గాలి గంటకు ఆరు కిలోమీటర్లు వేగంతో వీచే సూచనలు ఉన్నట్టు తెలిపారు. ఆకాశం పాక్షికంగా మేఘావృతమై ఉంటుందన్నారు. రైతులు పంటలు విషయంలో తగు జాగ్రత్తలు పాటించాలని ఏడీఆర్‌ తెలిపారు.

ఆనందపురం: గంభీరం రిజర్వాయర్‌లో ఆదివారం సాయంత్రం జరిగిన ప్రమాదంలో ఒక ఇంజినీరింగ్‌ విద్యార్థి ప్రాణాలు కోల్పోయాడు. పోలీసులు తెలిపిన వివరాలివి. అనకాపల్లి జిల్లా నక్కపల్లి మండలం కాగిత గ్రామానికి చెందిన మలిరెడ్డి నితిన్‌ (20), తగరపువలసలోని అవంతి ఇంజినీరింగ్‌ కళాశాలలో సీఎస్‌డీ మూడవ సంవత్సరం చదువుతున్నాడు. మధురవాడలోని సోషల్‌ వెల్ఫేర్‌ హాస్టల్‌లో ఉంటున్న నితిన్‌.. ఆదివారం మధ్యాహ్నం హాస్టల్‌ అధికారులకు సమాచారం ఇవ్వకుండా తన స్నేహితులతో కలిసి ఆటోలో గంభీరం రిజర్వాయర్‌ సందర్శనకు వెళ్లాడు. రిజర్వాయర్‌లో స్నేహితులు ఈతకు దిగగా, నితిన్‌ ఒడ్డున ఉన్న సిమెంట్‌ గోడపై కూర్చున్నాడు. ఈ క్రమంలో అదుపు తప్పి నీటిలో పడిపోయాడు. గమనించిన స్నేహితులు కాపాడే ప్రయత్నం చేసినప్పటికీ ప్రయోజనం లేకపోయింది. అపస్మారక స్థితిలో నితిన్‌ను బయటకు తీసి, 108కు సమాచారం ఇచ్చారు. వారు ఘటనా స్థలానికి చేరుకుని నితిన్‌ను పరీక్షించి.. అప్పటికే మరణించినట్లు నిర్ధారించారు. మృతుడి సోదరుడు, ఐసీఐసీఐ బ్యాంకులో డిప్యూటీ మేనేజర్‌గా పనిచేస్తున్న మలిరెడ్డి దీక్షిత్‌ ఫిర్యాదు మేరకు ఆనందపురం పోలీసులు కేసు నమోదు చేశారు. సోమవారం కేజీహెచ్‌లో పోస్టుమార్టం నిర్వహించి మృతదేహాన్ని కుటుంబ సభ్యులకు అప్పగించారు. చేతికి అందొచ్చిన కుమారుడు ఇలా అర్ధాంతరంగా తనువు చాలించడంతో ఆ కుటుంబంలో విషాద చాయలు అలముకున్నాయి. ఎస్‌ఐ పి.శివ కేసు దర్యాప్తు చేస్తున్నారు. రిజర్వాయర్‌లో పడి ఇంజినీరింగ్‌ విద్యార్థి దుర్మరణం

పాడేరు: జిల్లాలో పలుచోట్ల చేపడుతున్న అభివృద్ధి పనులు నిర్ణీత గడువులోగా పూర్తి చేయాలని రాష్ట్ర గిరిజన సంక్షేమ శాఖ మంత్రి గుమ్మడి సంధ్యారాణి అధికారులను ఆదేశించారు. కలెక్టరేట్‌ సమావేశ మందిరంలో సోమవారం జిల్లా అధికారులతో సమీక్షా సమావేశం నిర్వహించారు. జిల్లా బడ్జెట్‌ రూ.3,067.076కోట్లు కాగా అరకు నియోజకవర్గానికి రూ.1545.823 కోట్లు, పాడేరు నియోజకవర్గానికి రూ.1460.793 కోట్లతో అంచనాలను రూపొందించారు. ఆయా నియోజకవర్గాలకు ఐదుగురు అధికారులతో నియోజకవర్గ స్థాయి కమిటీలను ఏర్పాటు చేశారు. ఈ సందర్భంగా మంత్రి సంధ్యారాణి మాట్లాడుతూ అర్హులందరికీ సంక్షేమ పథకాలు అందేలా చూడాలన్నారు. వేసవి సెలవుల అనంతరం పాఠశాలల పునఃప్రారంభ దశలో వారానికి రెండుసార్లు సమీప ఆస్పత్రుల్లో విద్యార్థులకు వైద్య పరీక్షలు చేయాలని ఆదేశించారు. జిల్లా వ్యాప్తంగా 3426 పీఎం జన్‌మన్‌ గృహాలకు 1385 గృహాలు పూర్తయినట్టు చెప్పారు. అనంతరం ఆమె మండలంలోని గొండెలి పంచాయతీ పిల్లిపుట్టు గ్రామంలో నాలుగు గృహాలను ప్రారంభించారు. గృహాలన్నీ త్వరితగతిన పూర్తి చేసేలా చర్యలు తీసుకోవాలని అధికారులను ఆదేశించారు. సమావేశంలో కలెక్టర్‌ దినేష్‌కుమార్‌, ఐటీడీఏ పీవో, ఇన్‌చార్జి జేసీ తిరుమణి శ్రీపూజ, అసిస్టెంట్‌ కలెక్టర్‌ సాహిత్‌, జీసీసీ చైర్మన్‌ కిడారి శ్రవణ్‌కుమార్‌, రాష్ట్ర జానపద కళలు, సాంస్కృతిక అకాడమి చైర్మన్‌ వంపూరి గంగులయ్య, జిల్లా గ్రంథాలయ సంస్థ చైర్మన్‌ సతీష్‌, పలు శాఖల అధికారులు పాల్గొన్నారు. గిరిజన సంక్షేమ శాఖ మంత్రి సంధ్యారాణి

మహారాణిపేట: గ్రామ పంచాయితీల సర్పంచుల పదవీకాలం ముగియక ముందే వారి అధికారాలను కూటమి ప్రభుత్వం పరిమితం చేయడం వివాదాస్పదంగా మారింది. ఏప్రిల్‌ 2తో సర్పంచుల పదవీకాలం ముగియనున్న నేపథ్యంలో, నిధుల దుర్వినియోగం జరుగుతుందనే అనుమానంతో ప్రభుత్వం ముందస్తుగా పలు ఆంక్షలు విధించింది. ఇప్పటివరకు స్వేచ్ఛగా చెక్కులు జారీ చేసిన సర్పంచులు, ఇప్పుడు వాటిని నేరుగా వినియోగించలేని పరిస్థితి ఏర్పడింది. చెక్కుల మంజూరు అధికారాన్ని డివిజన్‌ లెవల్‌ డెవలప్‌మెంట్‌ ఆఫీసర్ల (డీఎల్‌డీవో) చేతుల్లోకి మార్చారు. దీంతో గ్రామ పాలనలో సర్పంచుల పాత్ర గణనీయంగా తగ్గింది. పెత్తనమంతా డీఎల్‌డీవోలదే.. గతంలో ఎన్నడూ లేని విధంగా ఈసారి సర్పంచుల అధికారాలపై తీవ్రస్థాయిలో ఆంక్షలు అమలవుతున్నాయి. జిల్లాలోని 79 గ్రామ పంచాయతీల్లో మెజారిటీ సర్పంచులు వైఎస్సార్‌సీపీ సానుభూతిపరులు కావడమే ఈ ఆంక్షలకు ప్రధాన కారణమన్న విమర్శలు వినిపిస్తున్నాయి. సర్పంచులు జారీ చేసే చెక్కులను నేరుగా ఆమోదించకుండా, పంచాయతీ అధికారుల ద్వారా డివిజన్‌ లెవల్‌ డెవలప్‌మెంట్‌ ఆఫీసర్‌ అనుమతిని తప్పనిసరి చేశారు. వృథా ఖర్చులు చేస్తారనే సాకుతో పాలక వర్గాలను ఆర్థికంగా కట్టడి చేయడంపై సర్పంచులు ఆగ్రహం వ్యక్తం చేస్తున్నారు. రాజకీయ కక్షసాధింపేనా? జిల్లాలోని మూడు వంతుల పంచాయతీల్లో వైఎస్సార్‌సీపీ మద్దతుదారులే సర్పంచులుగా ఉండటంతో, వారిని ఇబ్బంది పెట్టేందుకే ప్రభుత్వం కొత్త నిబంధనలను తెరపైకి తెచ్చిందని రాజకీయ వర్గాల్లో చర్చ నడుస్తోంది. గతంలో పదవీ కాలం ముగిసే వరకు సర్పంచులకు పూర్తి స్వేచ్ఛ ఉండేదని, కానీ ఇప్పుడు కొత్త పద్ధతుల పేరుతో తమను అధికారులు వేధిస్తున్నారని సర్పంచులు ఆవేదన వ్యక్తం చేస్తున్నారు. ఏప్రిల్‌ 3 నుంచి ’స్పెషల్‌’ పాలన జిల్లాలోని పంచాయతీల రూపురేఖలు ఏప్రిల్‌ 3 నుంచి మారనున్నాయి. భీమిలి మండలం రేఖవానిపాలెం మినహా (దీనికి ఇంకా ఏడాది గడువు ఉంది), మిగిలిన 78 గ్రామ పంచాయతీల్లో ప్రత్యేక అధికారుల పాలన సాగనుంది. ఏప్రిల్‌ 2వ తేదీ అర్ధరాత్రితో సర్పంచుల పదవీ కాలం ముగియనుండటంతో, మరుసటి రోజు నుంచే పగ్గాలు చేపట్టేందుకు 78 మంది స్పెషల్‌ ఆఫీసర్ల నియామక ప్రక్రియను ప్రభుత్వం వేగవంతం చేసింది.

గొలుగొండ: మండలంలోని సీహెచ్‌ నాగాపురం చెరువు గర్భంలో శ్మశాన వాటిక పనులు చేయకూడదని కోర్టు ఇచ్చిన ఆదేశాలను అధికారులు ధిక్కరించారు. మళ్లీ పనులు చేయడంతో గ్రామస్తులు ఆగ్రహం వ్యక్తం చేస్తున్నారు. గ్రామంలో శ్మశాన వాటిక ఉంది. ఆ స్థలాన్ని వదిలేసి కూటమి నేతలు రైతులకు ఉపయోగపడే చెరువు గర్భంలో శ్మశాన వాటిక పనులు చేస్తున్నారు. ప్రస్తుతం చెరువు గర్భంలో ఏర్పాటు చేస్తున్న శ్మశాన వాటిక పాఠశాలకు ఆనుకుని ఉండటం వల్ల విద్యార్థులు భయాందోళనకు గురవుతారని ప్రజలు ఆర్నెల్ల క్రితం వ్యతిరేకించారు. దీంతోపాటు రైతులు ఇబ్బందులు పడే అవకాశముందని గ్రామస్తులు, పంచాయతీ పాలకులు కోర్టును ఆశ్రయించారు. దాంతో చెరువు గర్భంలో పనులు నిలుపుదల చేయాలని నాలుగు నెలలు క్రితం కోర్టు ఎంపీడీవో, పీఆర్‌, రెవెన్యూ అధికారులకు ఆదేశాలు ఇచ్చింది. ఈ మేరకు అధికారులు పనులు నిలుపుదల చేశారు. మళ్లీ రెండు రోజుల నుంచి గుట్టుచప్పుడు కాకుండా పనులు చేయడంపై గ్రామస్తులు ఆగ్రహిస్తున్నారు. కోర్టు ఆదేశాలు ధిక్కరించి పనులు చేస్తున్న అధికారులుపై జిల్లా అధికారులు తగు చర్యలు తీసుకోవాలని, లేనిపక్షంలో ఆందోళన చేస్తామని హెచ్చరించారు.

ఆశ్రమ పాఠశాలలు, హాస్టళ్లలో గ్యాస్‌ కొరతకట్టెలపొయ్యిలే ఆధారం నిర్వాహకులఅవస్థలుపట్టించుకోని అధికారులు పెదబయలు: మండలంలో వంటగ్యాస్‌ కొరత ఏర్పడింది. మండలంలోని 14 గిరిజన సంక్షేమ ఆశ్రమ పాఠశాల వసతి గృహాలతో పాటుగా గురుకుల పాఠశాల వసతి గృహాలకు గ్యాస్‌ కొరత వేధిస్తోంది. గత పది రోజుల నుంచి కట్టెల పొయ్యిపైనే వంటలు చేయాల్సిన దుస్థితి నెలకొంది. పెదబయలు భారత్‌ గ్యాస్‌ గోదాములో గ్యాస్‌ స్టాక్‌ లేకపోవడంతో వినియోగదారులు ముంచంగిపుట్టు, పాడేరు. ఇతర ప్రాంతాల నుంచి అధిక రేట్లకు గ్యాస్‌ కొనుగోలు చేసుకోవాల్సిన పరిస్థితి ఏర్పడింది. స్థానిక ఆశ్రమ పాఠశాలలకు సరఫరా చేసే గ్యాస్‌కు సంబంధించి ఆన్‌లైన్‌లో అప్‌లోడ్‌ చేయకపోవడంతో కొరత నెలకొందని దీంతో సరఫరాలో జాప్యం జరిగినట్టు పలువురు చెబుతున్నారు. రిజిస్ట్రేషన్‌ కోసం అవస్థలు పెదబయలు భారత్‌ గ్యాస్‌ గోదాములో సోమవారం ఉదయం గ్యాస్‌ లోడ్‌ వచ్చింది. దీంతో గొదాము వద్ద వినియోగదారులు బారులు తీరారు. గ్యాస్‌ కోసం ఆన్‌లైన్‌లో రిజిస్ట్రేషన్‌ చేసుకున్న వారికే సరఫరా జరుగుతుందని జీసీసీ సిబ్బంది ప్రకటించారు. దీంతో రిజిస్ట్రేషన్‌ కోసం వినియోగదారులు అవస్థలు పడ్డారు. కాగా రిజిస్ట్రేషన్‌ చేసుకున్న వారికి కూడా గ్యాస్‌ అందకపోవడంతో వినియోగదారులు నానా అవస్థలు పడ్డారు. కొన్ని ఆశ్రమ పాఠశాలలకు మాత్రమే సిలిండర్లు సరఫరా చేశారు. ఆశ్రమ హాస్టళ్లు, పాఠశాలలకు నాలుగు రోజుల్లో గ్యాస్‌ సరఫరా చేస్తామని గొదాము సిబ్బంది హామీ ఇచ్చి ఆయా పాఠశాలల నిర్వాహకులను పంపినట్టు తెలిసింది. ఇప్పటికై నా ప్రభుత్వం, జీసీసీ ఉన్నతాధికారులు స్పందించి గ్యాస్‌ కొరత లేకుండా చర్యలు తీసుకోవాలని వినియోగదారులు కోరుతున్నారు. గ్యాస్‌ కొరత వాస్తవమే ఆశ్రమ పాఠశాలలు, హాస్టళ్లలో గ్యాస్‌ కొరత ఉంది. వారం రోజుల నుంచి కట్టెల పొయ్యిపై వండుతున్నారు. సోమవారం స్థానిక గ్యాస్‌ గోదాముకు లోడ్‌ వచ్చినా సంక్షేమ పాఠశాలలు, ఆశ్రమ హాస్టళ్లకు సరఫరా చేయలేదు. అయితే ముంచింగిపుట్టు గ్యాస్‌ గోదాము నుంచి అత్యవసరంగా తీసుకొచ్చేందుకు చర్యలు తీసుకుంటున్నాం. –జగత్‌రాయ్‌, ఏటీడబ్ల్యూవో, పెదబయలు కొరత లేకుండా చర్యలు గ్యాస్‌ స్టాక్‌ రెండు వారాల అనంతరం రావడం జాప్యం వల్ల కొరత ఏర్పడింది. అత్యవసరంగా హాస్టల్స్‌కు కావాల్సి వస్తే ముంచంగిపుట్టు గోదాము నుంచి సరఫరా చేయిస్తాం. ఒక్క లోడ్‌ వచ్చినా సరిపడడం లేదు. మరో లోడ్‌ కోసం ఆర్డర్‌ పెట్టాం. మరో నాలుగు రోజుల్లో లోడ్‌ రావచ్చు. గ్యాస్‌ కొరత లేకుండా చర్యలు తీసుకుంటాం. –సుబ్బారెడ్డి, గ్యాస్‌ గోదాము ఇన్‌చార్జి

జిల్లాలో హిందు దేవాలయాల భూముల ఆక్రమణలపై విచారణ చేపట్టి భూములను రక్షించడంతో పాటు శిథిలావస్థలో ఉన్న ఆలయాలను పునఃనిర్మాణం చేయాలని బీజేపీ జనతా వారధి కోకన్వీనర్‌ జిల్లా ఉపాధ్యక్షుడు దొగ్గా ఈశ్వరప్రసాధ్‌ కలెక్టర్‌కు వినతిపత్రం అందించారు. ప్రైవేటు భూములు దేవాలయ భూముల జాబితాలో కలిసిపోయాయనే నెపంతో వందల ఎకరాల దేవాలయ భూములను ఆక్రమించేస్తున్నారని, దీంతో పాటు 33 ఏళ్ల పాటు దేవాలయ భూముల లీజు విధానం సరైంది కాదని అధికారులు పునఃపరిశీలన చేయాలన్నారు. జీవో నెం.139ను పూర్తిగా రద్దు చేయాలని, ఆక్రమణను రెగ్యులరైజ్‌ చేయడం నిలిపివేయాలని, దేవాలయాల ఆదాయాన్ని ఆలయ అభివృద్ధికే ఖర్చుచేసేలా చట్టం చేయాలని డిమాండ్‌ చేశారు. దింతో పాటు ఏళ్ల తరబడి సంచార జాతులగా నివాసముంటున్న కుటుంబాలను గుర్తించి వారికి కులధ్రువీకరణ పత్రాలు అందించి ప్రభుత్వ సంక్షేమ పథకాలు అందించాలని మరో వినతి పత్రం అందించారు. –దొగ్గా ఈశ్వరప్రసాధ్‌

సింహాచలం: శ్రీ వరాహ లక్ష్మీనృసింహస్వామి వార్షిక కల్యాణోత్సవాల్లో భాగంగా మూడవరోజు సోమవారం స్వామికి శేషతల్పవాహనంపై విశేషంగా తిరువీధి నిర్వహించారు. స్వామి కల్యాణ ఉత్సవమూర్తులు గోవిందరాజస్వామి, శ్రీదేవి, భూదేవిలను శేషతల్పంపై వేంచేపు చేసి, సింహగిరి మాడవీధిలో ఊరేగించారు. ఈ వేడుకల్లో పెద్ద ఎత్తున భక్తులు పాల్గొన్నారు. ఊరేగింపులో ఏర్పాటు చేసిన కోలాటం, పలు సాంస్కృతిక ప్రదర్శనలు భక్తులను విశేషంగా ఆకట్టుకున్నాయి. తిరువీధి అనంతరం రాత్రి వేళ ఆరాధన, విశేష హోమాలు, గ్రామబలిహరణం, మంగళాశాసనం వంటి కార్యక్రమాలను శాస్త్రోక్తంగా నిర్వహించారు. ప్రధానార్చకులు కరి సీతారామాచార్యులు, ఇతర అర్చక బృందం ఆధ్వర్యంలో ఈ క్రతువులు జరిగాయి. కల్యాణోత్సవాల్లో భాగంగా నాలుగోరోజు మంగళవారం ఉదయం 7 గంటలకు వైదిక సదస్యం, మధ్యాహ్నం 3.30 గంటల నుంచి 5.30 గంటల వరకు పండిత సదస్సు నిర్వహించనున్నారు. సాయంత్రం 6 గంటలకు స్వామి వారు సర్వజన మనోరంజని వాహనంపై భక్తులకు దర్శనమివ్వనున్నారు. కాగా మంగళవారం స్వామి మూలవిరాట్‌ స్వర్ణ నారసింహుడి అలంకారంలో భక్తులకు దర్శనమివ్వనున్నారు. స్వామివారి దర్శనాలు ఉదయం 8 గంటలకు ప్రారంభమై, రాత్రి 7 గంటల వరకు మాత్రమే అందుబాటులో ఉంటాయని దేవస్థానం అధికారులు తెలిపారు.నేడు పండిత సదస్సు

విదేశాల్లో మంచి గిరాకీ ఉన్న అవకాడో (బటర్‌ ఫ్రూట్‌) సాగుపై చింతపల్లి ఉద్యానవన పరిశోధనా స్థానం ప్రత్యేక దృష్టి సారించింది. కాఫీ, మిరియాలు తరహాలోనే ఏజెన్సీలో అవకాడోను ఒక ప్రధాన వాణిజ్య పంటగా మార్చేందుకు శాస్త్రవేత్తలు ప్రయోగాత్మకంగా సాగు చేపట్టారు. మెరుగైన రకాలను గుర్తించి, రైతులకు మేలైన గిట్టుబాటు ధర అందించడమే లక్ష్యంగా ఇక్కడ పరిశోధనలు ముమ్మరం చేశారు.చింతపల్లి: అల్లూరి జిల్లాలోని ఏజెన్సీ ప్రాంతం విదేశీ పంటలకు నిలయంగా మారుతోంది. ఇప్పటికే స్ట్రాబెర్రీ, లిచీ, డ్రాగన్‌ ఫ్రూట్‌ వంటి పంటలు ఇక్కడ విజయవంతం కాగా, తాజాగా ఆ జాబితాలో అవకాడో (వెన్న పండు) వచ్చి చేరింది. గిరిజన రైతులకు ఈ పంటను మరింత చేరువ చేసేందుకు చింతపల్లి ఉద్యాన పరిశోధనా స్థానంలో శాస్త్రవేత్తలు ప్రయోగాత్మక సాగు చేపట్టారు. రకాల గుర్తింపు: సుమారు ఎకరా విస్తీర్ణంలో ఆరు రకాల దేశీ, విదేశీ అవకాడో రకాలను దిగుమతి చేసుకుని శాస్త్రవేత్తలు సాగు చేస్తున్నారు. ఏజెన్సీ వాతావరణానికి తట్టుకుని అధిక దిగుబడినిచ్చే రకాలను గుర్తించడమే ఈ ప్రయోగం ప్రధాన లక్ష్యం. ⇒ ఐటీడీఏ ద్వారా గతంలోనే యాపిల్, అవకాడో, డ్రాగన్‌ ఫ్రూట్‌ వంటి మొక్కలను రైతులకు సరఫరా చేశారు. ప్రస్తుతం జాతీయ ఉపాధి హామీ పథకం ద్వారా గిరిజన రైతులకు ఈ మొక్కలను ఉచితంగా పంపిణీ చేస్తున్నారు. ⇒ రెండు దశాబ్దాల క్రితం కాఫీ తోటల్లో నీడ కోసం కాఫీ బోర్డు అధికారులు గొందిపాకల పంచాయతీలోని పలు గ్రామాల్లో ఈ మొక్కలను పంపిణీ చేశారు. అప్పట్లో రైతులకు వీటి విశిష్టత తెలియక, పండ్లు నేలరాలినా పట్టించుకోకుండా వృథాగా వదిలేసేవారు. అయితే, కొన్ని ఏళ్ల క్రితం ఒక స్వచ్ఛంద సంస్థ ప్రతినిధి ఈ పండ్ల విలువను, మార్కెట్‌ డిమాండ్‌ను వివరించడంతో రైతులు వీటి అమ్మకాలు ప్రారంభించారు. ప్రస్తుతం వ్యాపారులు నేరుగా గ్రామాలకు వచ్చి రైతుల వద్ద నుంచి పండ్లను కొనుగోలు చేస్తున్నారు. పోషకాల పండు.. : అవకాడోలో అత్యధిక పోషక విలువలు, ఔషధ గుణాలు ఉన్నాయని నిపుణులు చెబుతున్నారు.క్యాన్సర్‌ కారకాలను నిరోధించడంతో పాటు కంటి చూపు మెరుగుదలకు, మధుమేహం, స్థూలకాయం తగ్గడానికి ఈ పండు ఎంతో తోడ్పడుతుంది. సంతానోత్పత్తి సామర్థ్యం పెంచడానికి, జీవక్రియను మెరుగుపరచడానికి ఇది ఉపయోగపడుతుందని పరిశోధనలు వెల్లడిస్తున్నాయి.మంచి గిరాకీ చింతపల్లి ఉద్యానవన పరిశోధనా కేంద్రంలో అవకాడో సాగుపై విస్తృత ప్రయోగాలు జరుగుతున్నాయి. ఇప్పటికే సాగులో ఉన్న కేడీ–1, హోస్‌ రకాలతో పాటు పింకిర్టన్, ప్యూర్డ్‌ వంటి కొత్త రకాలను పరిశీలిస్తున్నాం. గిరిజన రైతులు పండించే పంటకు శాస్త్రీయ గుర్తింపు కల్పించి, మార్కెట్‌లో మంచి గిట్టుబాటు ధర అందించడమే లక్ష్యంగా కృషి జరుగుతోంది. భవిష్యత్తులో కాఫీ, మిరియాల తరహాలోనే అవకాడోను కూడా ఏజెన్సీలో ప్రధాన పంటగా మార్చేందుకు ఈ పరిశోధనలు కీలకం కానున్నాయి. – రమణ, ప్రధాన శాస్త్రవేత్త, ఉద్యానవన పరిశోధనా స్థానం, చింతపల్లి

● దేవరాపల్లి పార్కులో శిలాఫలకాల ఏర్పాటులో ప్రొటోకాల్‌కు తూట్లు ● గత వైఎస్సార్‌సీపీ ప్రభుత్వంలో నిర్మాణ పనులకు శ్రీకారం ● శంకుస్థాపన చేసి, శిలాఫలకం ఆవిష్కరించిన అప్పటి డిప్యూటీ సీఎం బూడి ● తాజాగా పార్కు ప్రారంభోత్సవ శిలాఫలకాన్ని ఏర్పాటు చేసిన అధికారులు ● శంకుస్థాపన చేసిన శిలాఫలకాన్ని మూలన పడేసిన వైనం దేవరాపల్లి: మండల కేంద్రంలో నూతనంగా నిర్మించిన పార్కులో శంకుస్థాపన శిలాఫలకాన్ని ఏర్పాటు చేయకుండా మూలన పడేయడం వివాదస్పదమైంది. తాజాగా పార్కు ప్రారంభోత్సవ శిలాఫలకాన్ని ఏర్పాటు చేసిన వీఎంఆర్డీఏ అధికారులు శంకుస్థాపన శిలాఫకం ఏర్పాటులో పక్షపాత వైఖరిని ప్రదర్శించడంపై స్థానికులు ఆగ్రహం వ్యక్తం చేస్తున్నారు. వైఎస్సార్‌సీపీ ప్రభుత్వ హయాంలో... స్థానిక పోలీస్‌స్టేషన్‌కు ఎదురుగా శిథిలావస్థకు చేరుకుని దశాబ్దాలుగా అధ్వానంగా ఉన్న ఇరిగేషన్‌ క్వార్టర్స్‌ను తొలగించి ఆహ్లాదకర పార్కు, యోగా భవనం, వాకింగ్‌ ట్రాక్‌ నిర్మించాలని గత వైఎస్సార్‌సీపీ ప్రభుత్వ హయాంలో అప్పటి డిప్యూటీ సీఎం బూడి ముత్యాలనాయుడు సంకల్పించారు. అప్పట్లోనే వీఎంఆర్డీఏ నుంచి రూ. 75 లక్షలు మంజూరు చేసి శిలాఫలకాన్ని ఆవిష్కరించి, నిర్మాణ పనులకు ఆయన శ్రీకారం చుట్టారు. సగం పనులను సైతం అప్పట్లోనే పూర్తి చేశారు. సార్వత్రిక ఎన్నికల కోడ్‌ రావడంతో నిర్మాణ పనులకు ఆటంకం ఏర్పడింది. ఆ తర్వాత అధికారంలోకి వచ్చిన కూటమి ప్రభుత్వం మిగిలిన పనులను పూర్తి చేసింది. ఈ నెల 13న పార్క్‌ను స్థానిక ఎమ్మెల్యే బండారు సత్యనారాయణ మూర్తి, వీఎంఆర్డీఏ కమిషనర్‌ తేజ్‌ భరత్‌తో కలిసి ప్రారంభించారు. పైలాన్‌ నిర్మించి ప్రారంభోత్సవ శిలాఫలకాన్ని ఏర్పాటు చేసిన అధికారులు, పార్కు నిర్మాణ సమయంలో వేసిన శంకుస్థాపన శిలాఫలకాన్ని యోగా భవనంలో మూలన విడిచిపెట్టడం సర్వత్రా విమర్శలు వెల్లువెత్తుతున్నాయి. పారదర్శకంగా వ్యవహరించాల్సిన అధికారులు కూటమి నేతల మెప్పు కోసమే ఇలా వ్యవహరించారని స్థానికులు విమర్శలు గుప్పిస్తున్నారు. ప్రారంభోత్సవ శిలాఫలకంలో పేర్లు రాయించడంలోను వీఎంఆర్డీఏ అధికారులు ప్రొటోకాల్‌కు తూట్లు పొడిచారు. ఎంపీపీ, జెడ్పీటీసీ పేర్లు లేకుండా చేసి ప్రొటోకాల్‌ నిబంధనలకు విరుద్ధంగా వ్యవహరించారు. ప్రొటోకాల్‌ పాటించకుండా పక్షపాతంగా వ్యవహరించిన వీఎంఆర్డీఏ అధికారుల తీరుపై కలెక్టర్‌కు ఫిర్యాదు చేసేందుకు వైఎస్సార్‌సీపీ శ్రేణులు సిద్ధమవుతున్నట్లు తెలిసింది.

● ప్రమాద సమయంలో లేని విద్యార్థులు ● తప్పిన పెనుప్రమాదం మాకవరపాలెం: హాస్టల్లో అగ్ని ప్రమాదం జరిగింది. ఆ సమయంలో విద్యార్థులు లేకపోవడంతో పెను ప్రమాదం తప్పింది. మండలంలోని కొండల అగ్రహారంలో ఇమ్మానుయేలు సంస్థ నిర్వహిస్తున్న హాస్టల్లో ఆదివారం ఈ ఘటన చోటు చేసుకుంది. ఇక్కడ ఉమ్మడి జిల్లాకు చెందిన 80 మంది విద్యార్థులు ఉంటున్నారు. వీరంతా నిత్యం ఉదయం తామరంలో సంస్థకు చెందిన ఎడ్యుకేషన్‌ క్యాంపస్‌లోని స్కూల్‌కు బస్సుపై వెళ్లి తిరిగి సాయంత్రం హాస్టల్‌కు చేరుకుంటారు. ఆదివారం మధ్యాహ్నం 12 గంటల ప్రాంతంలో మూడు అంతస్థులు కలిగిన హాస్టల్‌ భవనంలో గ్రౌండ్‌ ఫ్లోర్‌లో ఒక్కసారిగా మంటలు చెలరేగాయి. ఆ సమయంలో స్థానికులు గమనించిన వెంటనే స్పందించి మంటలు చెలరేగిన గదుల్లో ఎవరూ లేకపోవడంతో రెండో అంతస్థులో ఉన్న పది మంది విద్యార్థులను బయటకు తీసుకువచ్చారు. వెంటనే అగ్నిమాపక కేంద్రానికి సమాచారం ఇవ్వడంతో సిబ్బంది సకాలంలో చేరుకుని మంటలను అదుపు చేశారు. అయితే ప్రతి ఆదివారం ఈ విద్యార్థులంతా హాస్టల్‌కు సమీపంలో సంస్థకు చెందిన చర్చికు వెళతారు. ఆదివారం కూడా సుమారు 70 మంది వరకు చర్చికి వెళ్లడంతో ఎవరికీ ఎలాంటి ప్రమాదం జరగలేదు. ఇదే అగ్నిప్రమాదం రాత్రి వేళలో జరిగితే ఎందరో విద్యార్థులు మృత్యువాత పడే అవకాశం ఉందని స్థానికులు ఆందోళన వ్యక్తం చేశారు. మధ్యాహ్నం 2 గంటల తర్వాత జరిగి నా గాయపడేవారన్నారు. ఈ సంఘటనలో హాస్టల్లో ఉన్న ఒక బైక్‌తోపాటు విద్యార్థుల పుస్తకాలు, బట్టలు ఉంచిన పెట్టెలు కాలిపోయాయి. విద్యార్థులంతా క్షేమంగా ఉండటంతో అందరూ ఊపిరి పీల్చుకున్నా రు. కాగా విద్యుత్‌ షార్ట్‌ సర్క్యూట్‌ కారణంగా ఈ అగ్ని ప్రమాదం జరిగి ఉండవచ్చని అనుమానిస్తున్నారు. హాస్టల్‌ను పరిశీలించిన ఎంఈవో హాస్టల్‌ను ఎంఈవో మూర్తి పరిశీలించారు. ఈ సందర్భంగా మంటలు చెలరేగిన హాస్టల్‌ భవనం, కాలిపోయిన విద్యార్థులు పెట్టెలను పరిశీలించారు. హాస్టల్‌లో ఉంటున్న విద్యార్థుల సంఖ్యను తెలుసుకున్నారు. నివేదికను డీఈవోకు అందజేశామని, విద్యార్థులను ఇక్కడి నుంచి తామరంలో ఇమ్మానుయేలు సంస్థకు చెందిన మరో హాస్టల్‌కు తరలించామని తెలిపారు. షార్ట్‌ సర్క్యూట్‌ కారణంగా ప్రమాదం జరిగినట్టు ప్రాథమికంగా అంచనా వేశామన్నారు.

నక్కపల్లిలో ఎదురు సన్నాహ మహోత్సవం నిర్వహిస్తున్న దృశ్యం నక్కపల్లి: ప్రాచీన శైవక్షేత్రం ఉపమాకలో భువనేశ్వరి సమేత లక్ష్మణేశ్వరాలయంలో వార్షిక కల్యాణోత్సవాలు ఆదివారం ఘనంగా ప్రారంభమయ్యాయి. శైవాగమన సంప్రదాయం ప్రకారం కల్యాణోత్సవాలు జరిపేందుకు నిర్ణయించారు. ఇందులో భాగంగా రాత్రి స్వామివారిని సప్పర వాహనంలోను, పార్వతీ దేవిని పల్లకిలో అలంకరించి కోలాట ప్రదర్శనలతో నక్కపల్లిలో మైలవరభట్ల జోగారావు ఇంటి వద్దకు తీసుకెళ్లారు. అక్కడ డాక్టర్‌ గొట్టుముక్కల గాయత్రీదేవి ఆది దంపతుల పెళ్లి చూపులు, పెళ్లిమాటల కార్యక్రమాన్ని కళ్లకు కట్టినట్లు వివరించారు. అనంతరం మంచిరాజు సూర్యనారాయణ మూర్తి (సహరాపంతులు), శింగంశెట్టి నాని కుటుంబ సభ్యులు ఆధ్వర్యంలో ఎదుర్కోలు ఉత్సవానికి ఘనంగా ఏర్పాట్లు చేశారు. పెండ్లిమాట తంతు అనంతరం స్వామివారి ఉత్సవమూర్తులను ఉపమాక ఆలయానికి ఊరేగింపుగా తరలించారు. అర్ధరాత్రి స్వామివారి కల్యాణం అంగరంగ వైభవంగా నిర్వహించారు. కార్యక్రమంలో ప్రధానార్చకులు వెలవలపల్లి మహేష్‌, పీఏసీఎస్‌ పర్సన్‌ ఇన్‌చార్జి కొప్పిశెట్టి బుజ్జి వేదపండితులు పసర కొండ పండు, బ్రాహ్మణ సంఘ ప్రతినిధులు డీవిరామారావు, శ్రీపాద ప్రణవ్‌రామ్‌ పాల్గొన్నారు.

యలమంచిలి రూరల్‌: మండలంలోని మర్రిబంద కాలనీకి చెందిన మామిడి వెంకటేష్‌(34) ఆదివారం ఇంట్లో ఎవరూ లేని సమయంలో ఉరి వేసుకుని ఆత్మహత్య చేసుకున్నట్టు యలమంచిలి రూరల్‌ ఎస్‌ఐ ఎం.ఉపేంద్ర తెలిపారు. వివరాలివి. మృతుడికి బాగా మద్యం సేవించే అలవాటు ఉండడం వల్ల భార్యతో తరచూ గొడవలు జరిగేవి. ఆదివారం బంధువులతో కలిసి తలుపులమ్మలోవ దర్శనానికి వెళ్లడానికి అందరూ తయారు కాగా అంతకుముందే ఉదయం వెంకటేష్‌ మద్యం సేవించడంతో మళ్లీ భార్యభర్తలకు చిన్న గొడవ జరిగింది. దీంతో వెంకటేష్‌ తలుపులమ్మలోవకు వెళ్లకుండా ఇంటి వద్దే ఉండిపోయాడు. సాయంత్రం కుటుంబసభ్యులు ఇంటికి తిరిగి వచ్చేసరికి పడకగదిలో చీరతో వెంకటేష్‌ ఉరి వేసుకుని చనిపోయి ఉన్నాడు. భార్య ఉమ ఇచ్చిన ఫిర్యాదు మేరకు కేసు నమోదు చేసి దర్యాప్తు చేస్తున్నట్టు ఎస్‌ఐ తెలిపారు.

ప్రమాద స్థలంలో లోకేష్‌ మృతదేహం మాకవరపాలెం: మండలంలోని తామరం వేంకటేశ్వర ఆలయ సమీపంలో శనివారం అర్ధరాత్రి లారీ ఢీకొని యువకుడి దుర్మరణం చెందాడు. విజయనగరం జిల్లా ఎస్‌.కోటకు చెందిన చింతాడ లోకేష్‌(25) కశింకోట మండలం సుందరయ్యపేటలోని ఓ కంపెనీలో పనిచేస్తున్నాడు. ఈ క్రమంలో అతడు తన మోటార్‌ సైకిల్‌పై మాకవరపాలెం వైపు వస్తున్నాడు. అదే సమయంలో నర్సీపట్నం నుంచి తాళ్లపాలెం వైపు ఎదురుగా వస్తున్న లారీ ఢీకొట్టింది. దీంతో లోకేష్‌ తలకు బలమైన గాయాలు కావడంతో అక్కడికక్కడే మృతి చెందాడు. దీనిపై లోకేష్‌ కుటుంబ సభ్యులు ఇచ్చిన ఫిర్యాదు మేరకు కేసు నమోదు చేసినట్టు ఎస్‌ఐ దామోదర్‌నాయుడు ఆదివారం తెలిపారు. లారీని పట్టుకున్నామన్నారు.

తాటిచెట్లపాలెం: వేసవి సీజన్‌లో ప్రయాణికుల రద్దీ దృష్ట్యా ప్రస్తుతం నడుస్తున్న ప్రత్యేక రైళ్లను మరో మూణ్నెల్ల పాటు పొడిగిస్తున్నట్లు వాల్తేర్‌ డివిజన్‌ సీనియర్‌ డివిజనల్‌ కమర్షియల్‌ మేనేజర్‌ కె.పవన్‌కుమా ర్‌ ఒక ప్రకటనలో తెలిపారు. ● విశాఖపట్నం –షాలిమర్‌ (08508) స్పెషల్‌ రైలు ప్రతి మంగళవారం విశాఖపట్నంలో ఉదయం 11.20 గంటలకు బయల్దేరి మరుసటిరోజు తెల్ల వారు 3 గంటలకు షాలిమర్‌ చేరుకుంటుంది. ఈ రైలును జూన్‌ 30 వరకు పొడిగించారు. షాలిమర్‌–విశాఖపట్నం (08507) స్పెషల్‌ ప్రతీ బుధవారం షాలిమర్‌లో తెల్లవారుజాము 5గంటలకు బయల్దేరి అదే రోజు రాత్రి 8.50 గంటలకు విశాఖపట్నం చేరుకుంటుంది. ఈ రైలును జూలై 1వ తేదీ వరకు పొడిగించారు. ● సంబల్‌పూర్‌– ఈరోడ్‌ (08311) వీక్లీ స్పెషల్‌ ప్రతి బుధవారం సంబల్‌పూర్‌లో ఉదయం 11.35 గంటలకు బయల్దేరి అదే రోజు రాత్రి 9.30 గంటలకు దువ్వాడ చేరుకుంటుంది. అక్కడ్నుంచి 9.32 గంటలకు బయల్దేరి మరుసటిరోజు రాత్రి 10.50 గంటలకు ఈరోడ్‌ వెళ్తుంది. ఈ రైలును మే 27వ తేదీ వరకు పొడిగించారు. ఈరోడ్‌–సంబల్‌పూర్‌ (08312) వీక్లీ స్పెషల్‌ను మే 29వ తేదీ వరకు పొడిగించారు. ఈ రైలు ఈరోడ్‌లో ప్రతి శుక్రవారం మధ్యాహ్నం 2.35గంటలకు బయల్దేరి మరుసటిరోజు మధ్యాహ్నం 1.08 గంటలకు దువ్వాడ చేరుకుంటుంది. అక్కడ్నుంచి 1.10 గంటలకు బయల్దేరి శనివారం రాత్రి 11.15 గంటలకు సంబల్‌పూర్‌ వెళ్తుంది. ● భువనేశ్వర్‌–యశ్వంత్‌పూర్‌(02811) వీక్లీ ఏసీ స్పెషల్‌ను జూన్‌ 27వ తేదీ వరకు పొడిగించారు. ఈ రైలు ప్రతి శనివారం భువనేశ్వర్‌లో రాత్రి 7.15 గంటలకు బయల్దేరి మరుసటిరోజు తెల్లవారు 1.53 గంటలకు దువ్వాడ చేరుకుంటుంది. అక్కడ నుంచి 1.55 గంటలకు బయల్దేరి సోమవారం తెల్లవారుజాము 12.15 గంటలకు యశ్వంత్‌పూర్‌ వెళ్తుంది. యశ్వంత్‌పూర్‌–భువనేశ్వర్‌ (02812) వీక్లీ ఏసీ స్పెషల్‌ను జూన్‌ 29వ తేదీ వరకు పొడిగించారు. ఈ రైలు ప్రతి సోమవారం తెల్లవారుజాము 4.30 గంటలకు బయల్దేరి అదే రోజు రాత్రి 10.53 గంటలకు దువ్వాడ చేరుకుంటుంది. అక్కడ నుంచి 10.55గంటలకు బయల్దేరి మరుసటిరోజు ఉదయం 6గంటలకు భువనేశ్వర్‌ వెళ్తుంది. ● యశ్వంత్‌పూర్‌–కతిహార్‌(06571) వీక్లీ ఏసీ స్పెషల్‌ను జూలై 14వ తేదీ వరకు పొడిగించారు. ఈ రైలు ప్రతి మంగళవారం యశ్వంత్‌పూర్‌లో ఉదయం 7 గంటలకు బయల్దేరి మరుసటిరోజు తెల్లవారుజాము 5 గంటలకు విజయనగరం చేరుకుంఉటంది. అక్కడి నుంచి 5.10 గంటలకు బయల్దేరి గురువారం తెల్లవారుజాము 4.30గంటలకు కతిహార్‌ వెళ్తుంది. కతిహార్‌–యశ్వంత్‌పూర్‌ (06572) వీక్లీ ఏసీ స్పెషల్‌ను జూలై 17వ తేదీ వరకు పొడిగించారు. ఈ రైలు ప్రతి శుక్రవారం తెల్లవారుజాము 5.15 గంటలకు బయల్దేరి మరుసటిరోజు తెల్లవారుజాము 3.40 గంటలకు విజయనగరం చేరుకుంటుంది. అక్కడ నుంచి 3.50 గంటలకు బయల్దేరి మరుసటిరోజుఉదయం 4గంటలకు భువనేశ్వర్‌ వెళ్తుంది. ● ఎస్‌ఎంవీ బెంగళూరు–మాల్డా టౌన్‌(06565) స్పెషల్‌ రైలును జూలై 12వతేదీ వరకు పొడిగించారు. ఎస్‌ఎంవీ బెంగళూరులో ఈ రైలు ప్రతి ఆదివారం రాత్రి 11.40 గంటలకు బయల్దేరి మరుసటిరోజు సాయంత్రం 6.13 గంటలకు దువ్వాడ చేరుకుంటుంది. అక్కడ నుంచి 6.15గంటలకు బయల్దేరి మంగళవారం సాయంత్రం 4.30 గంటలకు మాల్డా టౌన్‌ వెళ్తుంది. మాల్డా టౌన్‌– ఎస్‌ఎంవీ బెంగళూరు(06566) స్పెషల్‌ను జూలై 15వ తేదీ వరకు పొడిగించారు. ఈ రైలు బుధవారాల్లో సాయంత్రం 4గంటలకు మాల్డా టౌన్‌లో బయల్దేరి మరుసటిరోజు మధ్యాహ్నం 3.33గంటలకు దువ్వాడ చేరుకుంటుంది. అక్కడ నుంచి 3.35గంటలకు బయల్దేరి మరుసటిరోజు శుక్రవారం మధ్యా హ్నం 12.45 గంటలకు ఎస్‌ఎంవీ బెంగళూరు వెళ్తుంది.

రాష్ట్ర ఎస్సీ కమిషన్‌ సభ్యుడు సీతారాం నర్సీపట్నం: అన్యాక్రాంతమైన దళితుల భూ సమస్యల పరిష్కారానికి కృషి చేస్తానని రాష్ట్ర ఎస్సీ కమిషన్‌ సభ్యుడు రావాడ సీతారాం పేర్కొన్నారు. గొలుగొండ మండలం జోగంపేట గ్రామంలో ఆదివారం ఆయన పర్యటించి దళితల భూ సమస్యలను అడిగి తెలుసుకున్నారు. తాండవ నిర్వాసితులమైన తమకు కోటవురట్ల మండలం పందూరు గ్రామంలో అసైన్డ్‌ భూములు ప్రభుత్వం ఇచ్చిందని బాధిత దళిత రైతులు కమిషన్‌ సభ్యుడి దృష్టికి తీసుకువెళ్లారు. ఏ సంబంధం లేని పెత్తందారులు తమ భూముల్లో ఫలసాయాన్ని అనుభవిస్తున్నారని వాపోయారు. రెవెన్యూ అధికారులు పట్టించుకోవడం లేదని వివరించారు. దీనికి సీతారాం స్పందిస్తూ కమిషన్‌ చైర్మన్‌ దృష్టికి తీసుకువెళ్లి పరిష్కారానికి కృషి చేస్తానన్నారు. అనంతరం బాలుర గురుకుల కళాశాల, పాఠశాలను పరిశీలించి విద్యార్థులతో మాట్లాడారు. ఎస్సీ కార్పొరేషన్‌ స్టేట్‌ డైరెక్టర్‌ కె.మరిడియ్య, గురుకుల పాఠశాల విద్యా కమిటీ చైర్మన్‌ చిట్ల చతపతిరావు, తహసీల్దార్‌ కె.నూకరాజు, ఎంపీడీవో శ్రీనువాసరావు, ఎస్సై రామారావు, రుషికేశ్వరరావు, ఏఎస్‌డబ్ల్యూవో బాబూరావు, డీహెచ్‌పీఎస్‌ నాయకులు డీసీహెచ్‌ రాజు, డీవీఎంఎస్‌ సభ్యులు సహదేవుడు, ఈరెల్లి చిరంజీవి తదితరులు పాల్గొన్నారు.

ఉమ్మలాడ శారదానదిలో స్నానానికి వెళ్లి ఇద్దరు మృతి మునగపాక: వారిద్దరూ ప్రాణ స్నేహితులు.. ఎక్కడకు వెళ్లినా ఇద్దరూ కలిసే వెళ్లేవారు. చివరకు శారదానదిలో స్నానానికి వెళ్లి ఒకేసారి మృతి చెందారు. ఈ ఘటన మండలంలోని ఉమ్మలాడలో తీవ్ర విషాదాన్ని మిగిల్చింది. ఆదివారం ఇక్కడ శారదానదిలో స్నానానికి వెళ్లిన ఇద్దరూ మునిగిపోయి మృతి చెందారు. ఎస్‌ఐ పి.ప్రసాదరావు తెలిపిన వివరాలు ప్రకారం.. అనకాపల్లి మండలం కొత్తూరు పంచాయతీ పరిధి ముత్రాసు కాలనీకి చెందిన చింతా రోహిణ్‌కుమార్‌ (26), తాడి హర్షవర్దన్‌ (24) అనకాపల్లిలోని వేర్వేరు చోట్ల పనులు చేసుకుంటూ కుటుంబానికి చేదోడువాదోడుగా ఉంటున్నారు. ఇరువురు కలిసి సమీపంలోని ఉమ్మలాడ శారదానదిలో స్నానానికి వెళ్లారు. స్నానానికి వెళ్లిన ఇద్దరూ నదిలో ఒక్కసారిగా మునిగిపోయారు. గమనించిన స్థానికులు మునగపాక పోలీసులకు సమాచారం అందించారు. విషయం తెలుసుకున్న ఎస్‌ఐ సంఘటనా స్థలానికి చేరుకొని మృతదేహాలను బయటకు తీసి అనకాపల్లి రెండొందల ఆస్పత్రికి పోస్టుమార్టం కోసం తరలించారు. కాగా అందివస్తారనుకున్న కొడుకులు నదిలో మునిగిపోయి ఇలా విగతజీవులుగా మారడంతో తల్లిదండ్రులు బోరున విలపిస్తున్నారు. కేసు దర్యాప్తు చేస్తున్నట్లు ఎస్‌ఐ ప్రసాదరావు తెలిపారు.

ఎంవీపీకాలనీ: నగరంలోని కమ్యూనిటీ ప్రాంతాల అభివృద్ధికి త్వరలో శ్రీకారం చుట్టనున్నట్లు జీవీఎంసీ కమిషనర్‌ కేతన్‌ గార్గ్‌ తెలిపారు. ఆదివారం ఎంవీపీకాలనీలోని అప్పుఘర్‌, వాసవానిపాలెం సాగర తీర ప్రాంతాల్లో ఆయన పర్యటించారు. ఈ సందర్భంగా ఆయన మాట్లాడుతూ.. బ్లూమ్‌బర్గ్‌ ఫిలాంత్రోపీస్‌ 2025–2026 మేయర్స్‌ చాలెంజ్‌కు ప్రపంచవ్యాప్తంగా ఎంపికై న 24 నగరాల్లో విశాఖ ఒకటిగా నిలవడం గర్వకారణమన్నారు. ఈ విజయం ఫలితంగా నగరంలో ‘వి–పుల్‌’(విశాఖ–ప్రజాముఖి అర్బన్‌ లివింగ్‌ ల్యాబ్‌) కార్యక్రమం ద్వారా పెద్ద ఎత్తున కమ్యూనిటీ ప్రాంతాలను అభివృద్ధి చేయనున్నట్లు వెల్లడించారు. పర్యటనలో భాగంగా శివగణేష్‌నగర్‌, వాసవానిపాలెంలోని మత్స్యకారులతో మాట్లాడి, ఆయా ప్రాంతాల్లోని సమస్యలు, అభివృద్ధి పనులపై చర్చించారు. పారిశుధ్యం, తాగునీరు, రోడ్లు, కాలువల మరమ్మతులతో పాటు గ్రీన్‌ బెల్ట్‌లను అభివృద్ధి చేయాలని మత్స్యకార గ్రామాల పెద్దలు కమిషనర్‌కు విన్నవించారు. ‘వి–పుల్‌’ద్వారా ప్రజా భాగస్వామ్యంతో ఈ ప్రాంతాలను అభివృద్ధి చేసేందుకు జీవీఎంసీ సిద్ధంగా ఉందని, త్వరలోనే పనులు ప్రారంభిస్తామని హామీ ఇచ్చారు. జెడ్సీ శివప్రసాద్‌, వైద్యాధికారి ప్రసాదరావు, పలువురు వైఎస్సార్‌సీపీ, టీడీపీ నాయకులు పాల్గొన్నారు. జీవీఎంసీ కమిషనర్‌ కేతన్‌గార్గ్‌

అనకాపల్లి: అత్యాశకు పోయి జీవితాలను నాశనం చేసుకోవద్దని, ఐపీఎల్‌ క్రికెట్‌ మ్యాచ్‌లు ప్రారంభమైన నేపథ్యంలో జిల్లాలో క్రికెట్‌ బెట్టింగ్‌లకు పాల్పడే వారిపై ఉక్కుపాదం మోపుతామని ఎస్పీ తుహిన్‌ సిన్హా అదివారం ఒక ప్రకటనలో పేర్కొన్నారు. జిల్లా వ్యాప్తంగా బెట్టింగ్‌ నిర్వాహకులపై ఆన్‌లైన్‌ బుకీలపై ప్రత్యేక పోలీస్‌ బృందాలతో నిరంతర నిఘా ఏర్పాటు చేశామన్నారు. బెట్టింగ్‌ నిర్వహించినా, ప్రోత్సహిహించినా, పాల్గొన్నా ఏపీ జూద చట్టం ప్రకారం అరెస్టు చేయడం జరుగుతుందన్నారు. తక్కువ సమయంలో ఎక్కువ డబ్బులు సంపాదించవచ్చనే ఆశతో బెట్టింగ్‌ యాప్‌ల ఉచ్చులో పడవద్దన్నారు. తల్లిదండ్రులు తమ పిల్లలపై ప్రత్యేక దృష్టి సారించాలన్నారు.

దేవరాపల్లి: మండలంలోని చింతలపూడి పంచాయతీ శివారు మదనగురువులో గిరిజనులు మంచినీటి కోసం నానా అవస్థలు పడుతున్నారు. తాగునీటి సదుపాయం లేకపోవడంతో గ్రామానికి దూరంగా ఉన్న గెడ్డలో ఊట నీరే తమకు శరణ్యమని ఆవేదన వ్యక్తం చేస్తున్నారు. సీఎం చంద్రబాబు, డిప్యూటీ సీఎం పవన్‌ కల్యాణ్‌, కలెక్టర్‌ స్పందించి తక్షణమే తాగునీటి సమస్య పరిష్కరించాలని డిమాండ్‌ చేస్తూ ఆదివారం చేతులు జోడించి వేడుకున్నారు. వీరికి సీపీఎం జిల్లా కార్యదర్శి వర్గ సభ్యుడు డి. వెంకన్న, మండల కార్యదర్శి బి.టి. దొర మద్దతు పలికారు. అటవీ ప్రాంతంలో జీవిస్తున్న గిరిజనులను అడవి జంతువుల కంటే హీనంగా చూస్తున్నారని సీపీఎం నాయకులు విమర్శించారు. గిరిజనులను ఉద్ధరించేందుకు అడవి బాట పట్టిన డిప్యూటీ సీఎం పవన్‌ కల్యాణ్‌కు ఇక్కడ కష్టాలు కనిపించడం లేదా అని ప్రశ్నించారు. గెడ్డలో కలుషిత నీరు తాగడం వల్ల మలేరియా, టైఫాయిడ్‌, డెంగ్యూ తదితర విష జ్వరాల బారినపడుతున్నారని వాపోయారు. ప్రభుత్వ పాలకులు యుద్ధప్రాతిపదికన స్పందించి మంచినీటి సదుపాయం కల్పించాలని, లేకుంటే వచ్చే నెల 2న కలెక్టర్‌ కార్యాలయం ఎదుట ఆందోళన చేపడతామని బాధిత గిరిజనులు హెచ్చరించారు. కార్యక్రమంలో పాంగి కన్నయ్య, పాంగి రామన్న, మామిడి చిన్నయ్య, పాంగి పెద భీమన్న, పాంగి చిన బీరాజు, పాంగి సన్యాసమ్మ, పి. దేముడమ్మ, సూకురి లక్ష్మి, మామిడి సీతమ్మ తదితరులు పాల్గొన్నారు.ప్రభుత్వం స్పందించి సమస్య పరిష్కరించాలి నిరసన

గాజువాక: చినగంట్యాడలోని మణికంఠ ఇండేన్‌ గ్యాస్‌ ఏజెన్సీకి చెందిన గ్యాస్‌ డెలివరీ బాయ్‌ ఎన్నశెట్టి అప్పారావును గాజువాక పోలీసులు అరెస్టు చేశారు. గ్యాస్‌ బుక్‌ చేసుకున్న వినియోగదారులనుంచి ఖాళీ సిలిండర్లను, ఓటీపీలను సేకరించి పరారైన విషయం తెలిసిందే. తమకు సిలిండర్లు ఇవ్వకుండానే డెలివరీ చేసినట్టు మొబైల్‌ ఫోన్‌ద్వారా మెసేజ్‌లు రావడంతో సంబంధిత గ్యాస్‌ ఏజెన్సీవద్ద వినియోగదారులు ఆందోళన వ్యక్తం చేయడంతో ఏజెన్సీ మేనేజర్‌ ఎదరపల్లి విజయ రామమోహన్‌రాజు గాజువాక పోలీసులకు ఫిర్యాదు చేయడంతో ఈ మోసం వెలుగు చూసింది. దీనిపై సీఐ పార్థసారధి నేతృత్వంలో ఎస్‌ఐ జగదీష్‌, సిబ్బందితో కలిసి విచారించి 24 గంటల్లో అప్పారావును అరెస్టు చేశారు. నిందితుడు అప్పారావు వినియోగదారలవద్ద సేకరించిన ఖాళీ సిలిండర్లు, ఓటీపీలద్వారా గ్యాస్‌ ఏజెన్సీ నుంచి గ్యాస్‌ నింపిన సిలిండర్లను సేకరించాడు. వాటిని వినియోగదారులకు ఇవ్వకుండా అధిక మొత్తాలకు బ్లాక్‌ మార్కెట్‌లో విక్రయించాడు. వినియోగదారుల నుంచి 33 సిలిండర్లను, ఏజెన్సీకి చెందిన తొమ్మిది సిలిండర్లను సేకరించి అక్రమంగా అమ్ముకున్నట్టు సౌత్‌ ఏసీపీ వై.శ్రీనివాసరావు తెలిపారు. గ్యాస్‌ డెలివరీ కోసం కొంతమంది వినియోగదారులనుంచి రూ.13,500 వసూలు చేసి ఆ నగదును కూడా సొంతానికి వాడుకున్నట్టు పోలీసులు తెలిపారు. కాగా, బ్లాక్‌ మార్కెట్‌లో సిలిండర్లు ఎవరైనా అమ్మడానికి ప్రయత్నిస్తే తమకు సమాచారం ఇవ్వాలని ఏసీపీ శ్రీనివాసరావు కోరారు.

అరకులోయటౌన్‌: వైఎస్సార్‌సీపీ అధినేత, మాజీ ముఖ్యమంత్రి వైఎస్‌ జగన్‌మోహన్‌రెడ్డి ప్రభుత్వ హయాంలో రాష్ట్రంలోని అన్ని ప్రాంతాల అభివృద్ధి జరిగిందని, కూటమి ప్రభుత్వంలో మాత్రం చంద్రబాబు బినామీల కోసమే అమరావతి రాజధాని నిర్మాణం చేపడుతున్నారని అరకులోయ ఎమ్మెల్యే రేగం మత్స్యలింగం విమర్శించారు. ఆయన ఆదివారం విలేకరులతో మాట్లాడారు. పరిపాలన రాజధాని అమరావతి, ఆర్థిక రాజధానిగా విశాఖపట్నం, న్యాయ రాజధానిగా కర్నూల్‌ను ఎంపిక చేసిన విషయం తెలిసిందేనన్నారు. కూటమి నేతలైన చంద్రబాబు, పవన్‌ కల్యాణ్‌ డైవర్షన్‌ పాలిటిక్స్‌ చేస్తూ 2028 లోపు అమరావతి నిర్మాణం పూర్తి చేస్తామని, అమరావతే రాజధాని అని అసెంబ్లీలో తీర్మానం చేయడం సిగ్గు చేటన్నారు. విచ్చలవిడిగా బెల్టుషాపులు కూటమి ప్రభుత్వ పాలనలో మద్యం ఏరులై పారుతోందని అరకులోయ ఎమ్మెల్యే రేగం మత్స్యలింగం అన్నారు. కూటమి ప్రభుత్వం అన్ని ప్రాంతాల్లో మద్యం దుకాణాలు ఏర్పాటుచేసి, మారుమూల గ్రామాల్లో విచ్చలవిడిగా బెల్టు షాపులతో మద్యపానాన్ని ప్రోత్సహిస్తుందన్నారు. అమాయక గిరిజనులపై కేసులు పెట్టడం సరికాదన్నారు. మద్యం దుకాణాలు మూసివేయాలన్నారు. ఉమ్మడి విశాఖ జిల్లా ఎస్టీ సెల్‌ మాజీ అధ్యక్షుడు కమిడి అశోక్‌ కుమార్‌, మండల పార్టీ అధ్యక్ష, ఉపాధ్యక్షుడు స్వాభి రామ్మూర్తి, పల్టాసింగ్‌ విజయ్‌ కుమార్‌, పార్టీ నాయకులు కొర్రా అర్జున్‌రావు, విజయదశమి, శెట్టి మోహన్‌ పాల్గొన్నారు. వైఎస్సార్‌సీపీ ప్రభుత్వ హయాంలో అభివృద్ధికి ప్రాధాన్యం కూటమి ప్రభుత్వంలో ఏరులై పారుతున్న మద్యం అరకులోయ ఎమ్మెల్యే రేగం మత్స్యలింగం

పాడేరు : టీడీపీకి చెందిన ఇచ్ఛాపురం ఎమ్మెల్యే, ప్రభుత్వ విప్‌ బెందాళం అశోక్‌ ఆదివాసీలపై చేసిన వాఖ్యలు ఏ మాత్రం కూడా క్షమించరానివని ఆయనపై ఎస్సీ, ఎస్టీ అట్రాసిటీ కేసు నమోదు చేసి కఠినంగా శిక్షించాలని ఆదివాసీ జేఏసీ జిల్లా కన్వీనర్‌ రామారావు దొర డిమాండ్‌ చేశారు. ఆయన చేసిన వాఖ్యలకు నిరసనగా ఆదివారం సాయంత్రం జిల్లా కేంద్రమైన పాడేరు పట్టణంలోని పాత బస్టాండ్‌ అంబేడ్కర్‌ విగ్రహం వద్ద ఆదివాసీ జేఏసీ నాయకులు ఆందోళన కార్యక్రమం చేపట్టారు. ఈ సందర్భంగా రామారావు దొర మాట్లాడుతూ ఆదివాసీలు తమ సమస్యను చెప్పుకునేందుకు ఇచ్ఛాపురం ఎమ్మెల్యే బెందాళం అశోక్‌ను కలిసేందుకు వెళ్తే ఆయన పరుషపదజాలంతో ఆదివాసీల ఆత్మగౌరవాన్ని కించపరిస్తూ బహిరంగంగా దూషించడంపై ఆదివాసీ సమాజం అంతా తీవ్ర ఆగ్రహంతో ఉన్నారన్నారు. ఆదివాసీల పట్ల కనీసం గౌరవం లేకుండా వ్యవహరించడం ఏ మాత్రం సరికాదన్నారు. గిరిజనేతర కులాలను ఎస్టీ జాబితాలో చేర్చేందుకు అశోక్‌ చేస్తున్న ప్రయాత్యాన్ని ప్రశ్నించడమే ఆదివాసీల తప్పా అన్నారు. ఓర్పు, సహనం కోల్పోయి కుల, ధనంహాకారం, అధికార మదంతో ఆదివాసీలపై విచక్షణ కోల్పోయి కించపర్చేలా మాట్లాడటం రాజ్యంగా విరుద్ధమన్నారు. ఈ విషయంలో సీఎం చంద్రబాబు నాయుడు స్పందించి తక్షణమే ఆయనను పదవి నుంచి తొలగించి, పార్టీ నుంచి సస్పెండ్‌ చేయాలని డిమాండ్‌ చేశారు. సోమవారం జిల్లా ఎస్పీను కలిసి ఎమ్మెల్యే అశోక్‌పై ఫిర్యాదు చేస్తామన్నారు. ఈ వ్యవహారంపై క్షమాపణతో ఊరుకోమన్నారు. అశోక్‌పై కఠిన చర్యలు తీసుకునేంత వరకు ఆదివాసీలంతా పెద్ద ఎత్తున పోరాటాలు చేస్తారని ఆయన స్పష్టం చేశారు. కార్యక్రమంలో ఆదివాసీ జేఏసీ ప్రతినిధులు ఆల్‌ ఇండియా ఆదివాసీ ఎంప్లాయీస్‌ ఫెడరేషన్‌ స్టేట్‌ వర్కింగ్‌ ప్రెసిడెంట్‌ చిట్టపులి శ్రీనివాస పడాల్‌, స్టేట్‌ కో–ఆర్డినేటర్‌ సోమెలి సింహాచలం, జిల్లా అసోసియేట్‌ ప్రెసిడెంట్‌ జీజేఆర్‌ మజ్జి, గిరిజన విద్యార్థి సంఘం జిల్లా ప్రధాన కార్యదర్శి బూడిదే మాధవరావు, జీఎస్‌యూ రాష్ట్ర సమన్వయకర్త కిరసాని కిశోర్‌, జీఎస్‌యూ నాయకులు పార్థసారధి, సత్య, ఆదివాసీ జేఏసీ జిల్లా ప్రతినిధులు నాగరాజు, శంకర్‌ పాల్గొన్నారు. పదవికి రాజీనామా చేయించి, టీడీపీ నుంచి సస్పెండ్‌ చేయాలి ఆదివాసీలపై అనుచిత వాఖ్యలను సహించం క్షమాపణలతో ఊరుకునేది లేది ఆదివాసీ జేఏసీ జిల్లా కన్వీనర్‌ రామారావు దొర పాడేరులో ఆందోళన

● కార్యకలపాలపై పటిష్టమైన నిఘా ● ప్రత్యేక పోలీసు బృందాల ఏర్పాటు ● జిల్లా ఎస్పీ అమిత్‌బర్ధర్‌ పాడేరు : ప్రస్తుతం ఐపీఎల్‌ క్రికెట్‌ సీజన్‌ ప్రారంభమైన దృష్ట్యా క్రికెట్‌ ఆన్‌లైన్‌, ఆఫ్‌లైన్‌ బెట్టింగులు జరగకుండా పటిష్టమైన నిఘా ఏర్పాటు చేశామని బెట్టింగులు నిర్వహించి పట్టుబడితే కఠిన చర్యలు తప్పవని జిల్లా ఎస్పీ అమిత్‌బర్ధర్‌ హెచ్చరించారు. ఈ మేరకు ఆదివారం విలేకరులకు ప్రకటన విడుదల చేశారు. జిల్లా వ్యాప్తంగా బెట్టింగ్‌ నిర్వాహకులు, ఏజెంట్లు, ఆన్‌లైన్‌ బుకీలపై నిఘా ఉంచేందుకు ప్రత్యేక పోలీస్‌ బృందాలను ఏర్పాటు చేశామన్నారు. సులభంగా డబ్బు సంపాదించాలనే అత్యశతో యువత బెట్టింగ్‌ల జోలికి వెళ్లి నష్టపోవద్దన్నారు. బెట్టింగ్‌ అనేది సరదా, వినోదం కోసం కాదని, అసంఘటిత నేరాలు, ఆర్ధిక మోసాలు, దోపి డీతో సంబంధాలు కలిగి ఉండటమన్నారు. బెట్టింగ్‌ల జోలికి వెళ్లి ఆర్ధికంగా నష్టపోయి అప్పుల పాలై విలువైన జీవితాలను పాడుచేసుకోవద్దని ఆయన సూచించారు.

సింహగిరి భక్తజన సంద్రమైంది. గోవింద నామస్మరణతో ప్రతిధ్వనించింది. చైత్రశుద్ధ ఏకాదశి పర్వదినాన్ని పురస్కరించుకుని, లోక కల్యాణార్థం శ్రీ వరాహ లక్ష్మీనృసింహస్వామి శ్రీదేవి, భూదేవి సమేతుడై పెళ్లిపీటలెక్కారు. విశేష అలంకరణలో దేవేరులతో కూడిన స్వామి దివ్య మంగళ స్వరూపాన్ని చూసి భక్తులు పరవశించిపోయారు. అంబరాన్నంటిన రథోత్సవం, వేద మంత్రాల సాక్షిగా జరిగిన కల్యాణ ఘట్టంతో సింహగిరి ఆధ్యాత్మిక కాంతులతో విరాజిల్లింది. – సింహాచలం ప్రత్యేక అలంకరణలో అప్పన్నశ్రీ వరాహ లక్ష్మీనృసింహస్వామి వార్షిక కల్యాణ మహోత్సవం ఆదివారం రాత్రి వైభవంగా జరిగింది. శ్రీమహా విష్ణువు అవతారమైన శ్రీవరాహ లక్ష్మీనృ సింహస్వామిని పెళ్లికుమారుడిగా, శ్రీదేవి, భూదేవి అమ్మవార్లను పెళ్లికుమార్తెలుగా అలంకరించి నిర్వహించిన ఈ వేడుకను చూసి భక్తులు పులకించిపోయారు. నృసింహ నామస్మరణతో ఆలయ ప్రాంగణం మార్మోగింది. కొట్నాల ఉత్సవంతో ప్రారంభం పాంచరాత్ర ఆగమ శాస్త్రాన్ని అనుసరించి ఆదివారం మధ్యాహ్నం 3 గంటల నుంచే కల్యాణోత్సవ ఘట్టాలు ప్రారంభమయ్యాయి. తొలుత ఆలయ నీలాద్రి గుమ్మం వద్ద అర్చకులు, ముత్తయిదువలు పసుపుకొమ్ములను దంచి కొట్నాల ఉత్సవాన్ని నిర్వహించారు. అనంతరం ధ్వజారోహణం చేపట్టారు. ముక్కోటి దేవతలను కల్యాణోత్సవానికి ఆహ్వానిస్తూ ధ్వజస్తంభంపై గరుడాళ్వార్‌ చిత్రపటాన్ని అర్చకులు ఎగురవేశారు. రసవత్తరంగా ఎదురు సన్నాహోత్సవం కల్యాణ వేడుకల్లో భాగంగా నిర్వహించిన ఎదురు సన్నాహోత్సవం భక్తులను విశేషంగా ఆకట్టుకుంది. స్వామివారి ఉత్సవమూర్తి గోవిందరాజస్వామిని బంగారు వర్ణపు పల్లకీలో, అమ్మవార్లను ముత్యాల పల్లకీలో వేంచేపు చేశారు. సింహగిరి మాడ వీధుల్లో పల్లకీలను ఊరేగిస్తూ, పశ్చిమ మాడ వీధిలోని జోడు భద్రాల వద్ద ఎదురెదురుగా ఉంచారు. స్వామి, అమ్మవార్ల వైభవాన్ని చాటిచెబుతూ సాగిన ఈ కార్యక్రమం ఆద్యంతం రసవత్తరంగా సాగింది. అర్చకులు పూలదండలతో నృత్యాలు చేస్తూ ఉత్సవాన్ని రక్తి కట్టించారు. పుల్లెల సత్యనారాయణ శర్మ, ముష్టి పవన్‌ కుమార్‌ శర్మ వ్యాఖ్యాతలుగా వ్యవహరించారు. హోరెత్తిన రథోత్సవం సింహగిరి మాడ వీధుల్లో నిర్వహించిన రథోత్సవం కనులవిందుగా సాగింది. ఉత్సవమూర్తులను రథంపై అధిష్టింపజేశారు. జాలరి పెద్ద కదిరి లక్ష్మణరావు రథ సారథిగా వ్యవహరించగా, విశాఖ నలుమూలల నుంచి అమ్మవారి బంధువులుగా వచ్చిన జాలర్లు రథాన్ని లాగే బాధ్యతను భక్తిశ్రద్ధలతో నిర్వహించారు. వేలాదిగా తరలివచ్చిన భక్తులు రథం తాళ్లను లాగుతూ స్వామి వారిని సేవించుకున్నారు. కనులపండువగా కల్యాణోత్సవం ఉత్తర రాజగోపురం ఎదురుగా ఉన్న ప్రాంగణంలో రాత్రి 10.30 గంటలకు స్వామి వార్షిక కల్యాణోత్సవం ప్రారంభమైంది. రథోత్సవం అనంతరం స్వామి, అమ్మవార్లను కల్యాణ ప్రాంగణంలోకి తీసుకొచ్చి, కల్యాణ వేదికపై వేంచేపు చేశారు. విష్వక్సేన పూజ, పుణ్యాహవాచనం, సంకల్పం, కంకణధారణ, యజ్ఞోపవీతం, జీలకర్ర బెల్లం, మాంగల్యధారణ, తలంబ్రాలు తదితర ఘట్టాలను శాస్త్రోక్తంగా నిర్వహించారు. అనంతరం భక్తులకు తలంబ్రాలు, లడ్డూ ప్రసాదాలను పంపిణీ చేశారు. ఈ వేడుకలను దేవస్థానం స్థానాచార్యులు టి.పి.రాజగోపాల్‌, ప్రధానార్చకులు గొడవర్తి శ్రీనివాసాచార్యులు, కరి సీతారామాచార్యుల పర్యవేక్షణలో అర్చక బృందం నిర్వహించారు. ఆల్‌ ఇండియా రేడియో వ్యాఖ్యాతలు రాంభట్ల నృసింహశర్మ, శేషాచారి వ్యాఖ్యానం అందించారు. దేవస్థానం ఈవో జె. వెంకటరావు ఏర్పాట్లను పర్యవేక్షించగా, గోపాలపట్నం సీఐ సన్యాసినాయుడు ఆధ్వర్యంలో సుమారు 100 మంది పోలీసులతో బందోబస్తు నిర్వహించారు. నయనానందకరంగా అప్పన్న వార్షిక కల్యాణోత్సవం విశేషంగా ఎదురు సన్నాహోత్సవం పరవశించిన భక్తజనం ఆధ్యాత్మిక కాంతులతో విరాజిల్లిన సింహగిరి

సీతంపేట: ఆదివాసీల భాషలను పరిరక్షించడమే కాకుండా వారి అస్తిత్వం, సాహిత్యంపై విస్తృత పరిశోధనలు జరగాల్సిన అవసరం ఉందని జయపూర్‌ సంస్థానాధీశుడు రాజా విశ్వేశ్వర్‌ చంద్ర చూడ్‌ దేవ్‌ పిలుపునిచ్చారు. ఆదివారం ద్వారకానగర్‌ పౌరగ్రంథాలయంలో జరిగిన ‘కళింగాంధ్ర లిటరేచర్‌ ఫెస్టివల్‌’కు ఆయన ముఖ్య అతిథిగా హాజరై మాట్లాడారు. కళింగాంధ్ర చరిత్రకు, సాహిత్యానికి ఎంతో ప్రాముఖ్యత ఉందని తన పూర్వీకుడు విక్రమ్‌దేవ్‌ వర్మ కాలం నుంచే ఈ ప్రాంతంతో తమకు విడదీయలేని అనుబంధం ఉందని గుర్తుచేసుకున్నారు. కార్యక్రమ అధ్యక్షత వహించిన ఆచార్య కేఎస్‌ చలం మాట్లాడుతూ, కళింగ సీమ చరిత్ర తీవ్ర నిర్లక్ష్యానికి గురైందని ఆవేదన వ్యక్తం చేశారు. ప్రకృతి వనరుల దోపిడీ వల్ల తూర్పు కనుమల మనుగడకే ముప్పు వాటిల్లుతోందని, ఈ ప్రాంత అస్తిత్వాన్ని కాపాడుకోవడానికి మరిన్ని రచనలు రావాలని ఆకాంక్షించారు. రైటర్స్‌ అకాడమీ అధ్యక్షులు వి.వి. రమణమూర్తి మాట్లాడుతూ, కార్పొరేట్‌ శక్తుల దోపిడీపై అక్షరంతో పోరాటం చేయాల్సిన సమయం ఆసన్నమైందని పేర్కొన్నారు. ఈ సందర్భంగా ప్రసాద్‌ మూర్తి, బొబ్బిలి శ్రీధర్‌, దుప్పల రవికుమార్‌, పిల్లా తిరుపతిరావు తదితర రచయితలు రాసిన పలు పుస్తకాలను అతిథులు ఆవిష్కరించారు. కార్యక్రమంలో సమన్వయకర్తలు డాక్టర్‌ మాటూరి శ్రీనివాస్‌, బండి సత్యనారాయణ, గంటేడ గౌడ్‌ నాయుడు, అట్టాడ అప్పలనాయుడుతో పాటు పలువురు ప్రముఖ కవులు, రచయితలు పాల్గొన్నారు.

● వివాహాలకు గ్యాస్‌ సెగ ● తీవ్ర కొరతతో అల్లాడుతున్న వైనం ● చేతులెత్తేస్తున్న క్యాటరింగ్‌ నిర్వాహకులు మహారాణిపేట: వేల రూపాయలు ఖర్చు చేసి కల్యాణ మండపాలు బుక్‌ చేసుకుని, బంధుమిత్రులకు ఆహ్వాన పత్రికలు పంపి పెళ్లి పనుల్లో మునిగిపోయిన వారికి ఇప్పుడు కొత్త చిక్కు వచ్చి పడింది. అదే ‘వంట గ్యాస్‌’ కొరత. పశ్చిమ ఆసియాలో యుద్ధ జ్వాలలు ఎగిసిపడుతుండటంతో దాని సెగ కాస్తా మన వంటింట్లో గ్యాస్‌ సిలిండర్‌కు తగిలింది. దేశవ్యాప్తంగా గ్యాస్‌ కష్టాలు రెట్టింపు అవుతుండటంతో, విశాఖలోనూ దాని ప్రభావం స్పష్టంగా కనిపిస్తోంది. ముఖ్యంగా ఏప్రిల్‌ నుంచి డిసెంబర్‌ వరకు వరుసగా పెళ్లి ముహూర్తాలు ఉండటంతో, కేటరింగ్‌ వ్యాపారులు ఇప్పుడు కఠినమైన షరతులు విధిస్తున్నారు. ‘మీరు సిలిండర్లు ఇస్తేనే మేము వంట చేస్తాం, లేదంటే మా వల్ల కాదు’ అని కేటరింగ్‌ సిబ్బంది, వంట బ్రాహ్మణులు తెగేసి చెబుతుండటంతో పెళ్లి బృందాలు బెంబేలెత్తిపోతున్నాయి. నగరంలో ప్రస్తుతం గ్యాస్‌ బుకింగ్‌ల వెల్లువ కొనసాగుతోంది. ఇప్పటికే సుమారు ఒక లక్షా 65 వేల మందికి పైగా గ్యాస్‌ బుక్‌ చేసుకోగా, సరఫరాలో తీవ్ర జాప్యం జరుగుతోంది. గతంలో మొబైల్‌కు ఓటీపీ వచ్చిన వెంటనే సిలిండర్‌ డెలివరీ అయ్యేది. కానీ ఇప్పుడు ఓటీపీ వచ్చి పది రోజులు గడుస్తున్నా గ్యాస్‌ రాని పరిస్థితి నెలకొంది. బుక్‌ చేసిన 25 రోజుల తర్వాత గానీ సిలిండర్‌ వచ్చే సూచనలు కనిపించడం లేదు. అధికారులు మాత్రం గ్యాస్‌ కొరత లేదని చెబుతున్నప్పటికీ, క్షేత్రస్థాయిలో పరిస్థితి మాత్రం అందుకు భిన్నంగా ఉంది. గ్యాస్‌ ఏజెన్సీల వద్ద వినియోగదారులు బారులు తీరుతుండటం, నిరీక్షణ కాలం పెరుగుతుండటం ఆందోళన కలిగిస్తోంది. బ్లాక్‌ మార్కెట్‌దే హవా.. ఈ గందరగోళాన్ని ఆసరాగా చేసుకుని కొందరు అక్రమార్కులు బ్లాక్‌ మార్కెట్‌కు తెరలేపారు. ప్రభుత్వం వాణిజ్య సిలిండర్ల వినియోగంపై ఆంక్షలు విధించడంతో, గృహ అవసరాలకు వాడే సిలిండర్లకు డిమాండ్‌ అమాంతం పెరిగింది. ఒక్కో సిలిండర్‌పై రూ. 300 నుంచి రూ. 600 వరకు అదనంగా వసూలు చేస్తూ గుట్టుచప్పుడు కాకుండా విక్రయిస్తున్నారు. పెళ్లిళ్లు, గృహప్రవేశాలు వంటి శుభకార్యాలు నిశ్చయించుకున్న వారు తప్పనిసరి పరిస్థితుల్లో ఎంత ధరైనా వెచ్చించి సిలిండర్లను సమకూర్చుకుంటు న్నారు. యుద్ధ మేఘాలు తొలగి సరఫరా సాధారణ స్థితికి వచ్చే వరకు ఈ గ్యాస్‌ గండం తప్పేలా లేదని వినియోగదారులు వాపోతున్నారు.

డాబాగార్డెన్స్‌: నగరంలోని పలు జేసీఐ సంస్థల సంయుక్త ఆధ్వర్యంలో ఆదివారం ఒక హోటల్‌లో ‘ఎఫెక్టివ్‌ పబ్లిక్‌ స్పీకింగ్‌’ కార్యక్రమం నిర్వహించా రు. జేసీఐ వాల్తేర్‌, వైజాగ్‌ అచీవర్స్‌, స్మార్ట్‌, రాయల్స్‌, పెందుర్తి పర్ల్స్‌, మధురవాడ మ్యాగ్నెట్స్‌, వైజాగ్‌ కింగ్స్‌ , అరకు న్యూలైట్స్‌ సంస్థలు కలిసి ఈ శిక్షణను ఏర్పాటు చేశాయి. కార్యక్రమానికి ముఖ్య అతిథిగా హాజరైన జేసీఐ ఇండియా జోన్‌–4 అధ్యక్షుడు ఆర్‌పీపీ చైతన్య వసంతవాడ మాట్లాడుతూ.. సభ్యులు తాము నేర్చుకున్న నైపుణ్యాలను నిత్య జీవితంలో ఉపయోగించుకోవాలని సూచించారు. జోన్‌ వైస్‌ ప్రెసిడెంట్‌ ఆర్‌పీపీ బి. దిలీప్‌ కుమార్‌ పాల్గొని సభ్యులను ఉత్సాహపరిచారు. ప్రధాన శిక్షకులుగా డాక్టర్‌ శివ సత్యనారాయణ, సహ శిక్షకులుగా సేన్‌ సంతోష్‌ నిమ్మని వ్యవహరించి, వక్తృత్వ కళలో మెళకువలు, ఆత్మవిశ్వాసాన్ని పెంపొందించుకునే విధానాలపై శిక్షణ ఇచ్చారు. జోన్‌ కో–ఆర్డినేటర్‌ శ్రవణ్‌ కుమార్‌ నేతృత్వంలో జరిగిన ఈ కార్యక్రమంలో యశోద కృష్ణ, బి. శిరీష, మోనిక శ్రీనివాస్‌, టి. ప్రవీణ్‌ కుమార్‌, లంక బేబి, అశోక్‌ కుమార్‌ పాల్గొన్నారు.

● కలెక్టర్‌ దినేష్‌కుమార్‌ బదిలీ పాడేరు : అల్లూరి సీతారామరాజు జిల్లా కలెక్టర్‌ దినేష్‌కుమార్‌ బదిలీ అయ్యారు. రాష్ట్రంలో పలువురు ఐఏఎస్‌ల బదిలీ కారణంగా దినేష్‌కుమార్‌ ను ఏపీఐఐసీ ఎండీగా బదిలీ చేశారు. ఆయన స్థానంలో 2017బ్యాచ్‌కు చెందిన ఐఏఎస్‌ అధికారి, డాక్టర్‌ అంబేడ్కర్‌ కోనసీమ జిల్లాలో జాయింట్‌ కలెక్టర్‌గా విధులు నిర్వహిస్తున్న టి.నిశాంతిను అల్లూరి సీతారామరాజు జిల్లా కలెక్టర్‌గా నియమించారు. ఆమె రెండు, మూడు రోజుల్లో బాధ్యతలు స్వీకరించనున్నట్టు తెలిసింది.

మద్దిలపాలెం: గుజరాత్‌లోని సర్దార్‌ పటేల్‌ యూనివర్సిటీలో ‘అప్లైడ్‌ సైకాలజీ ప్రస్తుత సవాళ్లు – భవిష్యత్తు అవకాశాల దార్శనికత’ అనే ఇతివృత్తంతో జరిగిన ఇండియన్‌ అసోసియేషన్‌ ఆఫ్‌ అప్లైడ్‌ సైకాలజీ 61వ జాతీయ, 30వ అంతర్జాతీయ కాన్ఫరెన్స్‌లో ఆంధ్ర విశ్వవిద్యాలయం విద్యార్థులు పలు అవార్డులు సాధించారు. ప్రొఫెసర్‌ ప్రమోద్‌కుమార్‌ యంగ్‌ సైకాలజిస్ట్‌ అవార్డును ఏయూ ఎం.ఎస్సీ సైకాలజీ విద్యార్థినులు జె.మనీషా, ముడిదన కారుణ్య అందుకున్నారు. ‘యూనివర్సిటీ విద్యార్థుల్లో నిద్ర నాణ్యత, విద్యాపరమైన జాప్యంపై డిజిటల్‌ వ్యసనం ప్రభావం’ అనే అంశంపై వారు చేసిన పరిశోధనకు ఈ గుర్తింపు లభించింది. నైనా సింగ్‌ మెమోరియల్‌ అవార్డును ఏయూ ఎం.ఎస్సీ విద్యార్థిని గౌరీలక్ష్మి కొరిబిల్లి పొందారు. ‘యువతలో ప్రకృతితో అనుబంధం, అది వారి భావోద్వేగ నియంత్రణపై చూపే ప్రభావం’ అనే అంశంపై చేసిన అధ్యయనానికి ఈ అవార్డు దక్కింది. ఈ సందర్భంగా అవార్డులు సాధించిన విద్యార్థులను ఏయూ వీసీ ఆచార్య జి.పి.రాజశేఖర్‌ శనివారం తన కార్యాలయంలో అభినందించారు. ఏయూ సైకాలజీ విభాగాధిపతి, సైన్స్‌ కళాశాల ప్రిన్సిపాల్‌ ఆచార్యఎం.వి.ఆర్‌.రాజు పాల్గొన్నారు.

● నౌపడలో వైఎస్సార్‌ సీపీ భారీ బహిరంగ సభ రేపు ● పార్టీ జిల్లా అధ్యక్షుడు కేకే రాజు సాక్షి, విశాఖపట్నం: ఉత్తరాంధ్ర అభివృద్ధికి చిహ్నమైన మూలపేట పోర్టు పనులను త్వరితగతిన పూర్తి చేయాలని డిమాండ్‌ చేస్తూ సోమవారం శ్రీకాకుళం జిల్లా నౌపడలో నిర్వహించే భారీ బహిరంగ సభను విజయవంతం చేయాలని వైఎస్సార్‌ సీపీ జిల్లా అధ్యక్షుడు కేకే రాజు పిలుపునిచ్చారు. శనివారం ఆయన మాట్లాడుతూ.. గత వైఎస్సార్‌ సీపీ ప్రభుత్వ హయాంలో రూ. 4,361.91 కోట్లతో ప్రారంభించిన ఈ పోర్టు పనులు ఇప్పటికే 70 శాతం పూర్తయ్యాయని, అయితే ప్రస్తుత కూటమి ప్రభుత్వం వచ్చాక పనులు నత్తనడకన సాగుతున్నాయని విమర్శించారు. ఈ సభకు ఉమ్మడి విశాఖ జిల్లా నుంచి పార్టీ శ్రేణులు భారీగా తరలిరావాలని కోరారు. సోమవారం ఉదయం 7.30 గంటలకు మద్దిలపాలెం పార్టీ కార్యాలయం నుంచి నాయకులు బయలుదేరతారని ఆయన వెల్లడించారు.

పాడేరు రూరల్‌: ఆదివాసీలను దూషిస్తూ అనుచిత వ్యాఖ్యలు చేసిన ప్రభుత్వ విప్‌, ఇచ్ఛాపురం ఎమ్మెల్యే బెందాళం అశోక్‌పై అట్రాసిటీ కేసు నమోదు చేసి కఠిన చర్యలు తీసుకోవాలని ఆదివాసీ జేఏసీ జిల్లా చైర్మన్‌ రామరావుదొర డిమాండ్‌ చేశారు. శనివారం ఆయన విలేకరులతో మాట్లాడుతూ ఒడిశా నుంచి ఆంధ్రా ప్రాంతంలోకి వలస వచ్చి ఎస్టీ బెంతు ఒరియాలుగా చెలామణి అవుతూ తమ ప్రయోజనాలు దెబ్బతీస్తున్న విషయాన్ని చెప్పుకునేందుకు వెళ్లిన ఆదివాసీలను ‘ఆఫ్‌ నాలెడ్జీ ఫెలోస్‌, బ్లేడి బాస్టేట్స్‌’అంటూ అవమానకరంగా ఎమ్మెల్యే వ్యాఖ్యలు చేయడం సరైన పద్ధతి కాదన్నారు. రాజ్యాంగబద్ధ పదవిలో ఉండి ఇలా వ్యాఖ్యలు చేయడం దారుణమన్నారు. ఇప్పటికే వలసవాదులైన ఇతరులు ఆంధ్రాలో చొరబడి నకిలీ ధ్రువపత్రాలతో ఎస్టీలుగా వివిధ ఉద్యోగాలు సాధించారని ఆరోపించారు. దీంతో నిజమైన ఎస్టీలకు మనుగడ లేకుండా పోతుందని ఆయన ఆందోళన వ్యక్తం చేశారు. అధికార అండ దండలతో 27 వేల మంది గిరిజనేతరులను ఎస్టీలో కూడా చేర్పించాలని ఎమ్మెల్యే అశోక్‌ ప్రయత్నం చేస్తున్నట్లు తమ వద్ద సమాచారం ఉందన్నారు. చంద్రబాబు ప్రభుత్వానికి ఆదివాసీలపై చిత్తశుద్ధి ఉంటే ఎమ్మెల్యేపై తక్షణం అట్రాసిటీ కేసు నమోదు చేయాలన్నారు. లేని పక్షంలో ఉద్యమానికి పిలుపునిస్తామని ఆయన హెచ్చరించారు. ఈ కార్యక్రమంలో ఆదివాసీ జేఏసీ మీడియా విభాగం ప్రతినిధి బాబూజీ, తదితరులు పాల్గొన్నారు.

డుంబ్రిగుడ: అరకు–పాడేరు జాతీయ రహదారిని దాటుతున్న పాడేరు మండలం మోదపల్లి పంచాయతీ బుర్రగురువు గ్రామానికి చెందిన కొర్రా కాసులమ్మ బైక్‌ ఢీకొని గాయాలు పాలైంది. వివరాలిలా ఉన్నాయి. అరకులోయలో నాంది ఫౌండేషన్‌ ఆధ్వర్యంలో కాఫీ రైతులకు నిర్వహించిన సన్మాన కార్యక్రమానికి పలువురు మహిళలు బయలుదేరి వెళ్లారు. కురిడి సమీపంలోని పెద్దబ్రిడ్జి వద్ద జాతీయ రహదారిలో వ్యక్తిగత అవసరాల నిమిత్తం తోటి మహిళలతో కలిసి కాసులమ్మ దిగి రోడ్డు దాటే క్రమంలో అరకు నుంచి వస్తున్న బైక్‌ బలంగా ఢీకొంది. గాయపడిన ఆమెను డుంబ్రిగుడ ఆస్పత్రిలో చేర్చారు. వైద్య పరీక్షలు నిర్వహించి మెరుగైన వైద్యం కోసం 108 వాహనంలో అరకులోయ ఏరియా ఆస్పత్రికి తరలించారు.

● ఉమ్మడి విశాఖ జెడ్పీ చైర్‌పర్సన్‌ సుభద్ర ● నిధుల కొరతపై సభ్యుల పెదవి విరుపు ● జెడ్పీ సభలో వాడీవేడి చర్చ సాక్షి, అనకాపల్లి/మహారాణిపేట(విశాఖ): ప్రజా సమస్యల పరిష్కారంలో అధికారులు సానుకూల దృక్పథంతో వ్యవహరించాలని, నిర్ణీత సమయంలో నాణ్యమైన రీతిలో పరిష్కారం చూపించి ప్రజలకు భరోసా కల్పించాలని జిల్లా పరిషత్‌ చైర్‌పర్సన్‌ జల్లిపల్లి సుభద్ర అన్నారు. శనివారం విశాఖ జెడ్పీ సమావేశ మందిరంలో ఆమె అధ్యక్షతన జరిగిన జిల్లా పరిషత్‌ సర్వ సభ్య సమావేశంలో పలు అభివృద్ధి పనులపై సుదీర్ఘ చర్చ జరిగింది. ఈ సందర్భంగా ఆమె మాట్లాడుతూ అన్ని వర్గాల వారికి ప్రభుత్వ సేవలు పారదర్శకంగా అందేలా చర్యలు తీసుకోవాలని, క్షేత్రస్థాయిలో మౌలిక వసతులను మరింత విస్తరించాలని సూచించారు. ముఖ్యంగా వేసవిని దృష్టిలో ఉంచుకుని తాగునీటి ఎద్దడి రాకుండా ముందస్తు చర్యలు తీసుకోవాలని అధికారులను ఆదేశించారు. చంద్రబాబు ప్రభుత్వం అధికారంలోకి వచ్చినప్పటి నుంచి అన్ని విభాగాల్లో సమస్యలు అధికంగా ఉండి, నిధులు మాత్రం శూన్యంగా ఉన్నాయని అధికారులు సభలో వెల్లడించడం చర్చనీయాంశమైంది. సభ్యులు అడిగిన ప్రతి అభివృద్ధి పనికి ‘నిధుల కొరత’అనే సమాధానమే వినిపించింది. చివరకు ఆర్‌అండ్‌బీ రోడ్ల గుంతలు పూడ్చేందుకు కూడా నిధుల్లేవని అధికారులు పేర్కొన్నారు. గిరిజన ప్రాంత వాసుల సౌకర్యార్థం మహాప్రస్థానం వాహనాల సేవలను విస్తరిస్తామని విశాఖ జిల్లా కలెక్టర్‌ ఎం.ఎన్‌.హరేందిర ప్రసాద్‌ హామీ ఇచ్చారు. సమావేశంలో ఎమ్మెల్సీ వరుదు కల్యాణి, అనకాపల్లి, అల్లూరి జిల్లాల కలెక్టర్లు విజయకృష్ణన్‌, దినేష్‌ కుమార్‌, జెడ్పీ సీఈవో నారాయణ మూర్తి, జెడ్పీ సభ్యులు ఈర్లె అనురాధ, సామి సత్యనారాయణ, పైలా సన్యాసిరావు, దూలీ నాగరాజు, ఇతర ప్రజాప్రతినిధులు పాల్గొన్నారు. ● ఏజెన్సీ ప్రాంత జెడ్పీటీసీలు గంగరాజు, బొంజిబాబు, పోతల బాలయ్య, ఎంపీపీలు చేసిన విజ్ఞప్తి మేరకు కేజీహెచ్‌లో మాదిరిగానే నర్సీపట్నం ఏరియా ఆస్పత్రిలో ఎస్టీ సెల్‌ ఏర్పాటు చేసి అంబులెన్సులను అందుబాటులో ఉంచాలని జెడ్పీ చైర్‌పర్సన్‌ కోరారు. పాడేరు నుంచి రిఫరల్‌ కేసులను కేజీహెచ్‌కు తీసుకొచ్చేందుకు అంబులెన్స్‌ సమస్య ఉత్పన్నం కాకుండా జాగ్రత్తలు తీసుకోవాలన్నారు. అలాగే మృతదేహాల తరలింపునకు సంబంధించి తగినన్ని మహా ప్రస్థానం వాహనాలను సమకూర్చాలని, గిరిజన ప్రాంత వాసులకు ఎలాంటి ఇబ్బందీ లేకుండా చూడాలని ఆమె ఆదేశించారు. సమస్యలపై సభ్యుల ఏకరువు ● అల్లూరి జిల్లా డీఎంహెచ్‌వోను తక్షణం సరెండర్‌ చేయాలని సభ్యులు గంగరాజు, తదితరులు డిమాండ్‌ చేశారు. డీఎంహెచ్‌వో సక్రమంగా విధులు నిర్వహించడం లేదని, గిరిజన రోగుల బాగోగులు చూసుకోవడంలో డీఎంహెచ్‌వో విఫలమయ్యారని ఆరోపించారు. ● ఉపాధి హామీ పథకం అమలులో పారదర్శకత పాటించాలని, సోషల్‌ ఆడిట్‌ ప్రక్రియను పక్కాగా నిర్వహించాలని సభ్యులు కర్రి సత్యం, ఈర్లె అనురాధ కోరారు. సభ్యులు లేవనెత్తిన అంశాలను సీరియస్‌గా తీసుకొని త్వరగా పరిష్కార చర్యలు తీసుకోవాలని చైర్‌పర్సన్‌ అధికారులను ఆదేశించారు. 15 అంబులెన్స్‌ల కొనుగోలుకు ప్రతిపాదనలు గిరిజన ప్రాంత ప్రజల సౌకర్యార్థం కేంద్ర సంస్థ నిధులతో కొత్తగా 15 అంబులెన్స్‌లను కొనుగోలు చేసేందుకు ప్రతిపాదించామని, వీలైనంత త్వరగా కార్యరూపం దాల్చేలా చర్యలు తీసుకుంటామని అల్లూరి సీతారామరాజు జిల్లా కలెక్టర్‌ దినేశ్‌కుమార్‌ పేర్కొన్నారు. కేంద్ర సంస్థ నుంచి సుమారు కోటిన్నర వరకు ఆర్థిక సాయం అందుతుందని, వాటితో కొత్తవి కొనడంతో పాటు, పాత వాటికి మరమ్మతులు చేపడతామన్నారు. పాడేరు నుంచి కేజీహెచ్‌కు రిఫరల్‌ కేసుల తరలింపు, మృతదేహాల తరలింపులో ఉన్న సమస్యలను అధిగమిస్తామన్నారు.

చింతపల్లి: లంబసింగి పరిసర గ్రామ గిరిజనులకు అవసరమైన సోలార్‌ పంపు సెట్‌లు, వాటర్‌ వీల్స్‌ను స్థానిక పాఠశాల ఆవరణలో శనివారం ఎస్‌ఎన్‌ఎఫ్‌ ఇండియా ప్రైవేట్‌ లిమిటెడ్‌, రోటరీ క్లబ్‌ విశాఖపట్నం ప్రతినిధులు పంపిణీ చేశారు. ఈ సందర్భంగా ఎస్‌ఎన్‌ఎఫ్‌ మేనేజింగ్‌ డైరెక్టర్‌ రాజేంద్రన్‌ మాట్లాడుతూ గిరిజనుల సౌకర్యార్థం తమ సంస్థ తరఫున 200 మందికి నడిపించుకుని తాగునీటిని తెచ్చుకొనే వీలర్స్‌, సోలార్‌ పంపు సెట్లు అందజేశామన్నారు. రోటరీ క్లబ్‌ అధ్యక్షుడు పి.వి.రఘుపతి మాట్లాడుతూ గిరిజన రైతులు, మహిళలు ఆర్థికంగా అభివృద్ధి చెందినప్పుడే కుటుంబాలు ఆనందదాయకంగా జీవించే అవకాశం ఉంటుందన్నారు. ఈ కార్యక్రమంలో ఎస్‌ఎన్‌ఎఫ్‌ డైరెక్టర్‌ శశిప్రభ, సిబ్బంది హరిప్రసాద్‌, కాంతారావు, మధు, వంశీ, నర్సింగరావు పాల్గొన్నారు.

మన్యంలో గ్యాస్‌ కష్టాల తీవ్రతకు ఈ చిత్రమే నిదర్శనం. అరకులోయ తహసీల్దార్‌ కార్యాలయ ఆవరణలో శనివారం గ్యాస్‌ బండ్ల కోసం ప్రజలు బారులు తీరారు. మైదాన ప్రాంతాలైన ఎస్‌.కోట, వడ్డాది మాడుగుల నుంచి భారత్‌, హెచ్‌పీ ఏజెన్సీల నుంచి గ్యాస్‌ బండ్లను ఇక్కడి తీసుకువచ్చి సరఫరా చేస్తుంటారు. స్థానికంగా ఇండియన్‌ గ్యాస్‌ బండ్లను పంపిణీ చేస్తున్నారు. భారత్‌ గ్యాస్‌ వినియోగదారులు తెల్లవారుజాము నుంచి తహసీల్దార్‌ కార్యాలయానికి చేరుకుని రోజూ ఖాళీ బండ్లతో క్యూ కడుతున్న పరిస్థితులు నెలకొన్నాయి. మండు టెండలో గ్యాస్‌ కోసం పడిగాపులు కాస్తున్నారు. గ్యాస్‌ సరఫరా విషయంలో ఎటువంటి అపోహాలకు పోవద్దని గ్యాస్‌ కంపెనీల ఏజెన్సీలు చెబుతున్నా.. బుక్‌ చేసి రోజులు గడుస్తున్నా గ్యాస్‌ బండ్లు ఇంటికి రాకపోవడంతో వినియోగదారులు ఆందోళన చెందుతున్నారు. మరో పక్క కమర్షియల్‌ గ్యాస్‌ బండ్ల సరఫరా లేకపోవడంతో పలు హోటళ్ల యజమానులు కట్టెల పొయ్యిలతో వంటలు చేస్తున్నారు. – అరకులోయటౌన్‌

గూడెంకొత్తవీధి: మండలంలో శనివారం చింతపల్లి ఏఎస్పీ నవజ్యోతి మిశ్రా పర్యటించారు. గూడెంకొత్తవీధిలో జరుగుతున్న పదో తరగతి పరీక్ష కేంద్రాలను ఆయన తనిఖీ చేశారు. అంతకు ముందు రోడ్డు ప్రమాదాలు జరిగే ప్రాంతాలను పరిశీలించారు. ఎంవీఐ సాయిరమేష్‌, సీఐ సుధాకర్‌కు పలు సూచనలు చేశారు. రోడ్డు ప్రమాదాల నివారణపై ప్రత్యేక దృష్టి సారించి అవసరమైన చర్యలు తీసుకోవాలన్నారు. నిబంధనలు పాటించని వాహన చోదకులపై కేసులు నమోదు చేయడంతో పాటు కౌన్సెలింగ్‌ ఇవ్వాలన్నారు. గూడెంకొత్తవీధిలో ఏ, బీ పరీక్షా కేంద్రాలను తనిఖీ చేసిన ఆయన పరీక్షలు జరుగుతున్న తీరును గమనించారు. చింతపల్లి: మండల కేంద్రం చింతపల్లిలో జరుగుతున్న పదో తరగతి పరీక్ష కేంద్రాలను స్ధానిక ఏఎస్‌పీ నవజ్యోతి మిశ్రా పరిశీలించారు. మాస్‌ కాపియింగ్‌ జరగకుండా జాగ్రత్తలు తీసుకోవాలని సూచించారు. ఈ కార్యక్రమంలో సీఐ వినోద్‌బాబు, ఎస్‌ఐ వీరబాబు, వెంకటరమణ, ఎంఈవో ప్రసాద్‌ పాల్గొన్నారు.

సింహాచలం: చైత్ర శుద్ధ ఏకాదశిని పురస్కరించుకుని సింహగిరిపై వేంచేసిన శ్రీ వరాహ లక్ష్మీనృసింహస్వామి వార్షిక కల్యాణోత్సవం ఆదివారం అత్యంత వైభవంగా జరగనుంది. దేవస్థానం ఈవో జె. వెంకటరావు ఆధ్వర్యంలో అధికారులు, వైదిక వర్గాలు ఇందుకు సంబంధించి ఏర్పాట్లు పూర్తి చేశారు. పాంచరాత్ర ఆగమశాస్త్రం ప్రకారం ఆదివారం మధ్యాహ్నం 3 గంటలకు ఆలయ నీలాద్రి గుమ్మం వద్ద జరిగే కొట్నాల ఉత్సవంతో వేడుకలు ప్రారంభమవుతాయి. అనంతరం సాయంత్రం 4.30 గంటలకు ధ్వజారోహణం, 6.30 గంటలకు ఉత్సవమూర్తులతో ఎదురు సన్నాహోత్సవం నిర్వహిస్తారు. రాత్రి 8.30 గంటలకు మాడ వీధుల్లో రథోత్సవం, రాత్రి 10.30 గంటలకు ఉత్తర రాజగోపురం వద్ద ఏర్పాటు చేసిన సుందరమైన వేదికపై స్వామివారి వార్షిక కల్యాణాన్ని జరిపిస్తారు. ఈ వేడుకకు సుమారు 15 వేల మంది భక్తులు వస్తారని అంచనా వేసిన అధికారులు, వారందరికీ అన్నప్రసాదం, పంపిణీకి తలంబ్రాలు, లడ్డూ ప్యాకెట్లను సిద్ధం చేశారు. భక్తుల సౌకర్యార్థం కొండపైన, దిగువన ఎల్‌ఈడీ స్క్రీన్లు, చలువ పందిళ్లు, తాగునీరు వైద్య శిబిరాలను ఏర్పాటు చేశారు. ఆర్టీసీ ఆధ్వర్యంలో 15 షటిల్‌ సర్వీసులతో పాటు నగరం నలుమూలలకు ప్రత్యేక బస్సులు నడపనున్నారు. భద్రత కోసం 100 మంది పోలీసులతో బందోబస్తు ఏర్పాటు చేశారు. కల్యాణం సందర్భంగా ఆదివారం మధ్యాహ్నం 2 గంటల వరకు మాత్రమే అప్పన్న మూలవిరాట్‌ దర్శనాలు లభిస్తాయి, తిరిగి రాత్రి 8.30 గంటల నుంచి 10.30 గంటల వరకు భక్తులను అనుమతిస్తారు. శనివారం ఉదయం రథ కదలికలను అధికారులు శాస్త్రోక్తంగా పరిశీలించి రథోత్సవానికి గ్రీన్‌ సిగ్నల్‌ ఇచ్చారు.సింహగిరిపై కల్యాణం ప్రాంగణంలో, మాడ వీధిలో, సింహగిరి బస్టాండ్‌, అన్నప్రసాద భవనం వద్ద, కొండదిగువ బస్టాండ్‌లో ఎల్‌ఈడీ స్క్రీన్లు ఏర్పాటుచేశారు. ఫైర్‌ సేఫ్టీ సిలిండర్లు, అగ్నిమాపక శకటం అందుబాటులో ఉంచారు. దేవస్థానంలో రెగ్యులర్‌ సీసీ కెమెరాలతో పాటు కల్యాణోత్సవం ప్రాంగణం తదితర ప్రాంతాల్లో అదనంగా సీసీ కెమెరాలు ఏర్పాటు చేశారు. విద్యుత్‌ వెలుగుల్లో సింహగిరి

డుంబ్రిగుడ: మండలంలో పర్యావరణ పరిరక్షణ అందరి బాధ్యత అని ఇన్‌చార్జీ ఎంపీడీవో విశ్వనాథ్‌ అన్నారు. మండల పరిషత్‌ కార్యాలయ ఆవరణలో స్వచ్ఛరథాన్ని వైస్‌ ఎంపీపీలు శెట్టి ఆనంద్‌రావు, లలిత అధికారుల సమక్షంలో శనివారం ప్రారంభించారు. ఈ సందర్భంగా విశ్వనాథ్‌ మాట్లాడుతూ ప్లాస్టిక్‌ రహిత గ్రామాలుగా తీర్చిదిద్దడానికి ప్రభుత్వం ప్రత్యేక వాహనం సమకూర్చిందన్నారు. ముందుగా స్వచ్ఛాంధ్ర ప్రతిజ్ఞ చేశారు. ఇనుము, ప్లాస్టిక్‌ వస్తువులు, అట్ట పెట్టెలు, తదితర సామాన్లు అందజేస్తే ధరను బట్టి గిరిజనులకు వస్తువులు అందజేస్తారన్నారు. ఈ కార్యక్రమంలో ఈవోఆర్డీ నర్సింగరావు, తదితరులు పాల్గొన్నారు.

దేవదాయ శాఖ కమిషనర్‌ ఆదేశం సింహాచలం: చందనోత్సవం ఏర్పాట్లను ఏప్రిల్‌ 10వతేదీ నాటికల్లా పూర్తిచేయాలని రాష్ట్ర దేవదాయశాఖ కమిషనర్‌ కె.రామచంద్రమోహన్‌ సింహాచలం దేవస్థానం ఇంజనీరింగ్‌ అధికారులను ఆదేశించారు. సింహగిరిపై జరుగుతున్న చందనోత్సవం ఏర్పాట్లను శనివారం ఆయన పరిశీలించారు. భక్తుల కోసం ఏర్పాటు చేసే క్యూలు ఎక్కడెక్కడ నుంచి ప్రారంభమవుతాయో ఆయా ప్రదేశాల్లో ఆయన క్షుణ్ణంగా పరిశీలన చేశారు. పకడ్బందీగా క్యూలను ఏర్పాటు చేయాలని ఆదేశించారు. పలు చోట్ల ఇంకా సిమెంట్‌ వర్క్‌లు జరుగుతుండటంతో ఎన్ని రోజులపాటు చేస్తారని అసంతృప్తి వ్యక్తం చేశారు. అనవసరమైన పనులు చేయకుండా, భక్తులకు ఉపయోగపడే పనులు చేయాలని ఆదేశించారు. దక్షిణ రాజగోపురం నుంచి అన్నదాన భవనం వరకు ఏర్పాటు చేసే ఫుట్‌ ఓవర్‌ బ్రిడ్జి విషయంపై ఆరా తీశారు. రూ.1500, రూ.1000,రూ.300 క్యూల వద్ద భక్తులకు తెలిసే విధంగా సూచిక బోర్డులు ఏర్పాటు చేయాలని సూచించారు. సింహగిరిపై బస్‌ కాంప్లెక్స్‌ వద్ద భక్తుల రద్దీని నియంత్రించేందుకు పటిష్టమైన బారికేడ్లు ఏర్పాటు చేయాలని సూచించారు. ఏప్రిల్‌ 10 నాటికల్లా అన్ని పనులు పూర్తి కావాల్సిందే అని ఆదేశించారు. దేవస్థానం ఈవో జె.వెంకటరావు, ఈఈలు రమణ, రామకృష్ణ, రాంబాబు, డీఈ హరి తదితరులు పాల్గొన్నారు.

చింతపల్లి: జాతీయ స్థాయి ఖేల్‌ ఇండియా కుస్తీ పోటీలకు స్థానిక డిగ్రీ కళాశాల నుంచి ఇద్దరు విద్యార్థినులు రాష్ట్రం తరఫున ఎంపికయ్యారు. గత నెలలో న్యూఢిల్లీలో జరిగిన ఖేల్‌ ఇండియా క్రీడా పోటీల్లో కళాశాల నుంచి పాల్గొన్న బీఏ ప్రథమ సంవత్సరం చదువుతున్న బి.భార్గవి, కె.కేసియా ప్రతిభ కనబరిచారు. వీరికి ఆదివారం నుంచి ఛత్తీస్‌గఢ్‌లో జరగనున్న జాతీయ స్థాయి క్రీడా పోటీల్లో పాల్గొనేందుకు ఆహ్వానం అందిందని ప్రిన్సిపాల్‌ డాక్టర్‌ ఎం.విజయ భారతి తెలిపారు. జాతీయ స్థాయిలో కూడా మంచి ప్రతిభ కనబరచాలని ఆకాంక్షిస్తున్నామన్నారు. ఈ సందర్భంగా విద్యార్థినులకు తర్ఫీదునిచ్చిన పీడీ శివరాంను ప్రిన్సిపాల్‌, అధ్యాపకులు అభినందించారు.

అరకులోయటౌన్‌: మన్యంలో ప్రస్తుతం ఇటుకల పండుగ సందడి నెలకొంది. అన్ని గిరిజన పల్లెల్లో సందడి వాతావరణం కనిపిస్తోంది. మండలంలోని పెదలబుడు, మాడగడ, గన్నెల, లోతేరు ముఠా పరిధిలోని గ్రామాల్లోని గిరిజనులు ఈ పండగ సందర్భంగా సందడి చేస్తున్నారు. రహదారులపై మహిళలు తాళ్లు, వెదురు గడలతో గేట్లను పెట్టి వాహనదారుల నుంచి నుంచి పండగ చందాలు(పజోరు) వసూలు చేస్తున్నారు. గిరిరైతులు వ్యవసాయ పనులు ప్రారంభానికి ముందు చేపట్టే ఈ పండుగకు ఎంతో ప్రాధాన్యత ఉంది. ఏజెన్సీలో ఏటా ఈ నెలలో ఇటుకల పండుగ చేసుకోవడం ఆచారం. ఉగాది పండుగనే మన్యంలో గిరిజనులు ఇటుకల పండగగా నిర్వహిస్తుంటారు. ఈ పండగను వారం రోజుల పాటు జరుపుకొంటారు. ఈ పండగ జరిగే వారం రోజులూ ఎవ్వరూ బయటకు వెళ్లి పనులు చేయకూడదనే ఆచారం ఉంది. మహిళలందరూ గ్రామాల్లో ఇంటింటికి తిరిగి రంగు నీళ్లు చేతపట్టుకుని తమకు వరుస అయ్చేవారిపై నీళ్లను పోసి ఆట పట్టిస్తారు. పురుషులు ఆడవిలో వేటాడాల్సిందే.. పురుషులంతా అడవికి వెళ్లి జంతువులను వేటాడాలన్న నిబంధన ఉంది. ఏదైనా జంతువును వేటాడిన వ్యక్తిని గ్రామ పొలిమేర నుంచి మంచం మీద కూర్చోబెట్టి ఊరేగిస్తూ గ్రామ దేవత వద్దకు తీసుకువస్తారు. ఒక వేళ వేటకు వెళ్లకపోయినా, బయట పనులకు వెళ్లినా పురుషులకు జరిమానా విధించి కొంత డబ్బులు వసూలు చేస్తారు. గ్రామాల్లోని మహిళలంతా కలిసి గ్రామంలోని ప్రధాన రహదారుల వద్దకు చేరి గేట్లు వేసి పజోర్‌(డబ్బులు) వసూలు చేస్తారు. ఇటుకల పండగ చివరి రోజు గ్రామ పెద్దలు పూజలు నిర్వహించిన విత్తనాలను గ్రామంలోని రైతులకు పంచిపెడతారు. తొలకరి వర్షం తరువాత గ్రామ పెద్దలు ఇచ్చిన విత్తనాలను ముందుగా పంట పొలాల్లో చల్లి వ్యవసాయ పనులు ప్రారంభించడం ఆనవాయితీ. ఇందుకోసం ఊరి పొలిమేరలో గేటు పెట్టి, అలా వచ్చే వారి నుంచి డబ్బులు వసూలు చేసే వారు. ఈ డబ్బులతో పండుగకు అవసరమైన దినుసులు కొనుగోలు చేసి ఊరంతా సహపంక్తి భోజనాలు చేస్తారు. సాయంత్రం పూట ఆదివాసీ మహిళలు థింసా నృత్యాలతో అలరిస్తారు. కానీ మారుతున్న కాలంతో పాటు గిరిజనులు కూడా తమ ఆచారాలను క్రమేణా విస్మరిస్తున్నారు. అడవుల్లో వణ్యప్రాణులు, క్రూరజంతువులు పూర్తిగా తగ్గిపోయాయి. దీనికితోడు వన్యప్రాణులను వధిస్తే చట్ట ప్రకారం తీవ్ర శిక్షలు పడే అవకాశం ఉండడంతో అడవుల్లో వేటకు వెళ్లే వారి సంఖ్య తగ్గిపోయింది. గ్రామాల్లో గేట్లు పెట్టే సంప్రదాయాన్ని వదిలేశారు. రహదారులపై గేట్లు పెట్టి రాకపోకలు సాగించే వారి నుంచి డబ్బులు వసూలు చేస్తున్నారు. రహదారులపై గేట్లు ఏర్పాటు చేసి పండగ చందాలు వసూలు అడవిలో వేటాడితేనే గ్రామంలోకి పురుషులకు ప్రవేశం లేదంటే కట్టుబాటు మేరకు జరిమానా

పాడేరు : శ్రీరామనవమి వేడుకలు శుక్రవారం పాడేరు పట్టణంలో ఘనంగా నిర్వహించారు. పాత పాడేరు వద్ద నిర్వహించిన వేడుకల్లో పాడేరు ఎమ్మెల్యే, వైఎస్సార్‌సీపీ జిల్లా అధ్యక్షుడు మత్య్సరాస విశ్వేశ్వరరాజు ప్రత్యేక పూజలు నిర్వహించారు.స్వామివారి కల్యాణాన్ని కనులారా వీక్షించారు. భక్తులకు అన్నదానం చేశారు. సుండ్రుపుట్టు రామాలయంలో సీతారాముల కల్యాణాన్ని అధిక సంఖ్యలో భక్తులు వీక్షించి తరించారు. అనంతరం తీర్థ ప్రసాదాలను స్వీకరించారు. సాంస్కృతిక కార్యక్రమాలు అలరించాయి. ముంచంగిపుట్టు: మండలంలో శ్రీరామనవమి వేడుకలు శుక్రవారం ఘనంగా జరిగాయి. స్థానిక రామాలయంలో జెడ్పీ చైర్‌ పర్సన్‌ జల్లిపల్లి సుభద్ర, మూర్తి దంపతలు, పలువురు దంపతులు కల్యాణం నిర్వహించారు. అధిక సంఖ్యలో భక్తులు పాల్గొని ప్రత్యేక పూజలు నిర్వహించారు.అనంతరం ఆలయం వద్ద దాతల సహకారంతో భారీగా అన్నసమారాధన ఏర్పాటుచేశారు. సీతారాముల విగ్రహాలను డప్పు వాయిద్యాలు, థింసా నృత్యాలతో ఊరేగించారు. జోలాపుట్టు, బొండ్రుగూడ, దొడిపుట్టు, కిలగాడ, దార్రెల, పెదగూడ గ్రామాల్లో వేడుకలు, అన్నసమారాధన నిర్వహించారు. ఆధ్యాత్మికతతోనే మానసిక ప్రశాంతత : అరకు ఎమ్మెల్యే రేగం మత్స్యలింగం హుకుంపేట: ఆధ్యాత్మిక జీవనం మానవాళికి ఎంతో ప్రశాంతతను ఇస్తుందని అరకు ఎమ్మెల్యే రేగం మత్స్యలింగం పేర్కొన్నారు. శుక్రవారం తన స్వగ్రామమైన కొంతిలిలో పర్యటించిన ఆయన, అక్కడ నిర్వహించిన శ్రీరామనవమి వేడుకల్లో పాల్గొన్నారు. ఈ సందర్భంగా రామాలయంలో ప్రత్యేక పూజలు నిర్వహించారు. అనంతరం ఆయన మాట్లాడుతూ.. ప్రజలందరూ ఆధ్యాత్మిక చింతన కలిగి ఉండాలని, భక్తి మార్గంలో నడవడం ద్వారా ప్రశాంతత లభిస్తుందని తెలిపారు. ఈ కార్యక్రమంలో సీఐ సన్యాసి నాయుడు, స్థానిక సర్పంచ్‌ రేగం రమేష్‌, మండల పార్టీ అధ్యక్షుడు పాంగి అనిల్‌, వైఎస్సార్‌సీపీ జిల్లా ఉపాధ్యక్షుడు బత్తిరి రవిప్రసాద్‌, హుకుంపేట సర్పంచ్‌ సమిడ వెంకటపూర్ణిమ, మండల పార్టీ ఉపాధ్యక్షుడు వెంకటరావు పాల్గొన్నారు. జి.మాడుగుల: రెండవ భద్రాద్రిగా పేరొందిన జి.మాడుగుల రామకోవెలలో శ్రీరామనవమి పురస్కరించుకుని శుక్రవారం సీతారాముల కల్యాణ మహోత్సవం కన్నులపండువగా జరిగింది. విశాఖ వేద పండితులు గోపాలశాస్త్రి బృందం వేదమంత్రోచ్ఛరణల మధ్య 100 జంటలతో కలిసి ఈ వేడుకను నిర్వహించారు. మాజీ మంత్రి, ఆలయ ధర్మకర్త మత్స్యరాస బాలరాజు–రూపవతి దంపతులు, మాజీ ఎంపీపీ మత్స్యరాస వెంకటగంగరాజు,పద్మ, జెడ్పీటీసీ మత్స్యరాస వెంకటలక్ష్మి, సన్యాసినాయుడు దంపతులు ఈ కల్యాణంలో పాల్గొన్నారు. స్వామివారికి ప్రత్యేక పూజలు, శాంతి హోమం, పూర్ణాహుతి అనంతరం భక్తులకు భారీ అన్నసమారాధన నిర్వహించారు. సాయంత్రం మేళతాళాలు, థింసా నృత్యాలు, బాణసంచా పేలుళ్ల మధ్య పురవీధుల్లో ఉత్సవమూర్తుల ఊరేగింపు సాగింది. అనంతరం దేవుని గెడ్డ వద్ద అనుపు ఉత్సవం నిర్వహించారు. మండలంలోని జీఎం కొత్తూరు, వంజరి, బందవీధి, నుర్మతి, గెమ్మెలి తదితర గ్రామాల్లోనూ రామనవమి వేడుకలు ఘనంగా జరిగాయి. ఈ కార్యక్రమంలో ఉత్సవ కమిటీ అధ్యక్షుడు మత్స్యరాస మత్స్యరాజు, ఆర్గనైజర్‌ రామరాజు, సభ్యులు వెంకటరమణ, కొత్తందొర, కోటేశ్వరరావు తదితరులు పాల్గొన్నారు. కొయ్యూరు: మండలంలోని రామాలయాల్లో శ్రీరామనవమి వేడుకలు ఘనంగా నిర్వహించారు. రాజేంద్రపాలెం, కాకరపాడు, కొయ్యూరు, మంప, రేవళ్లు, ఆడాకుల, శరభన్నపాలెం, మర్రివాడ తదితర రామాలయాల్లో సీతారాముల కల్యాణం శాస్తోక్త్రంగా నిర్వహించారు. రాజేంద్రపాలెంలో నిర్వహించిన అన్నసమారాధనలో వైస్‌ ఎంపీపీ నూకాలు, సర్పంచ్‌ సింహాచలం, స్థానికులు పాల్గొన్నారు. చింతపల్లి: మండలంలోని చౌడుపల్లి, పశువులుబంద, బయిలుకించంగి, గొందిపాకలు, బౌడ, తాజంగి, లంబసింగి, కొత్తపాలెం, అంజలిశనివారం తదితర గ్రామాల్లోని రామాలయాల్లో శ్రీరామ నవమి వేడుకలు ఘనంగా నిర్వహించారు. సీతారాముల కల్యాణాన్ని జరిపించారు. ఈ సందర్భంగా అన్నసమారాధనలు ఏర్పాటుచేశారు. భక్తులు అధిక సంఖ్యలో పాల్గొన్నారు. సీలేరు: స్థానిక శ్రీ కోదండ రామాలయంలో సీతారాముల కల్యాణం శాస్త్రోక్తంగా నిర్వహించారు. వలస గెడ్డ రామాలయంలో స్వామివారికి ప్రత్యేక పూజలు నిర్వహించిన అనంతరం హోమం చేపట్టారు. మహిళలు కోలాటం నిర్వహించారు. దుప్పులవాడ, దారకొండ గ్రామాల్లో స్వామివారి కల్యాణం వేడుకగా నిర్వహించారు. అన్నదాన కార్యక్రమాలు ఘనంగా నిర్వహించారు. ముంచంగిపుట్టులో అన్నసమారాధనలో భక్తులు వాడవాడలా ఘనంగా శ్రీరామనవమి వేడుకలు భారీగా తరలివచ్చిన భక్తజనం మార్మోగిన రామనామం భక్తిభావంతో పులకించిన మన్యం

రాత్రి 8.30కు విద్యుత్‌ దీపాలు ఆఫ్‌ చేయండి డాబాగార్డెన్స్‌: పర్యావరణ పరిరక్షణలో భాగంగా ప్రపంచవ్యాప్తంగా నిర్వహించే ‘ఎర్త్‌ అవర్‌–2026’ కార్యక్రమంలో నగర ప్రజలందరూ భాగస్వాములు కావాలని జీవీఎంసీ కమిషనర్‌ కేతన్‌ గార్గ్‌ విజ్ఞప్తి చేశారు. శనివారం రాత్రి 8.30 గంటల నుంచి 9.30 గంటల వరకు గంట పాటు అనవసరమైన విద్యుత్‌ దీపాలను స్వచ్ఛందంగా ఆపివేయాలని ఆయన కోరారు. 2007లో ‘వరల్డ్‌ వైడ్‌ ఫండ్‌ ఫర్‌ నేచర్‌–ఇండియా’ ప్రారంభించిన ఈ ఉద్యమం, ప్రస్తుతం 190కి పైగా దేశాల్లో విస్తరించి అతిపెద్ద పర్యావరణ ఉద్యమంగా మారిందని ఆయన గుర్తు చేశారు. ఈ ఏడాది ఎర్త్‌ అవర్‌ ఉద్యమం 20 ఏళ్లు పూర్తి చేసుకోవడం విశేషమని కమిషనర్‌ పేర్కొన్నారు. వాతావరణ మార్పులపై అవగాహన, విద్యుత్‌ ఆదా, జీవ వైవిధ్య పరిరక్షణే లక్ష్యంగా సాగే ఈ కార్యక్రమంలో ప్రభుత్వ, ప్రైవేట్‌ కార్యాలయాలు, వ్యాపార సంస్థలు, విద్యాసంస్థలు, గృహ సముదాయాల నివాసితులు స్వచ్ఛందంగా పాల్గొనాలని సూచించారు. నివాసిత సంక్షేమ సంఘాలు, యువత, స్వచ్ఛంద సంస్థలు సమన్వయంతో కదిలి మన భూమిని, భవిష్యత్‌ తరాలను కాపాడడంలో బాధ్యతగా వ్యవహరించాలని ఆయన పిలుపునిచ్చారు.

గ్యాస్‌ సరఫరా కోసం ఖాళీ కంచాలతో నిరసన తెలుపుతున్న గిరిజనులు రావికమతం: మండలంలో చీమలపాడు పంచాయతీ పరిధి గిరిజన గ్రామాలకు గ్యాస్‌ సరఫరా చేయాలని కోరుతూ శుక్రవారం కల్యాణపులోవలో ఖాళీ సిలిండర్లతో ఖాళీ కంచాలు పట్టుకుని గిరిజనులు నిరసన తెలియజేశారు. ఈ సందర్భంగా సీపీఎం జిల్లా కార్యవర్గ సభ్యుడు కె. గోవిందరావు మాట్లాడుతూ కొన్ని రోజులు నుంచి గిరిజన గ్రామాలకు గ్యాస్‌ సరఫరా చేయలేకపోవడంతో గిరిజనులు చాలా ఇబ్బందులు పడుతున్నారని వాపోయారు. ఆన్‌లైన్‌లో బుక్‌ చేసుకొని రావికమతం వస్తేనే గ్యాస్‌ ఇస్తామని ఇక్కడ గ్యాస్‌ ఏజెన్సీ వారు చెబుతున్నారని తెలిపారు. గ్యాస్‌ బుక్‌ చేసుకుందామంటే ఏజెన్సీ గ్రామాల్లో తరుచూ సిగ్నల్‌ సమస్య వస్తుందన్నారు. దిగువ గ్రామాలకు వచ్చి ఆన్‌లైన్లో గ్యాస్‌ బుక్‌ చేసుకుని రావికమతం ఏజెన్సీ వద్దకు వెళ్తే నాలుగు రోజులు తర్వాత ఇస్తామని చెప్పుతున్నారని వాపోయారు. గ్యాస్‌ ఏజెన్సీ వారు గిరిజన గ్రామాలకు గ్యాస్‌ సరఫరా చేయాలని డిమాండ్‌ చేశారు.

జీవీఎంసీ అభివృద్ధిని బళ్లారి ప్రతినిధులకువివరిస్తున్న కమిషనర్‌ కేతన్‌గార్గ్‌ డాబాగార్డెన్స్‌: అధ్యయన యాత్రలో భాగంగా బళ్లారి మేయర్‌ పి.గాదెప్ప, అర్బన్‌ డెవలప్‌మెంట్‌ అథారిటీ చైర్మన్‌ జె.ఎస్‌. ఆంజనేయులు శుక్రవారం కమిషనర్‌ కేతన్‌ గార్గ్‌ను మర్యాదపూర్వకంగా కలిశారు. ఈ సందర్భంగా నగర సుందరీకరణ, అభివృద్ధి కార్యక్రమాలపై వారు సుదీర్ఘంగా చర్చించారు. విశాఖలో అమలవుతున్న ‘ఆపరేషన్‌ లంగ్స్‌’, 24 గంటల నీటి సరఫరా, మురుగునీటి శుద్ధి ద్వారా ఆదాయం..వంటి అంశాలను కమిషనర్‌ వారికి వివరించారు. అలాగే ప్రజా సమస్యల పరిష్కారానికి ఐవీఆర్‌ఎస్‌, టోల్‌ఫ్రీ నంబర్ల పనితీరును తెలియజేశారు. జీవీఎంసీ కార్యాచరణ ఇతర నగరాలకు ఆదర్శంగా ఉందని మేయర్‌ గాదెప్ప కొనియాడారు. త్వరలోనే బళ్లారి నుంచి ఒక ప్రత్యేక సాంకేతిక బృందాన్ని అధ్యయనం కోసం విశాఖకు పంపిస్తామని, వారికి సహకరించాలని కోరారు. ఈ కార్యక్రమంలో బళ్లారి టౌన్‌ ప్లానింగ్‌ అధికారి తిప్పేస్వామి తదితరులు పాల్గొన్నారు.

తాటిచెట్లపాలెం: సాలగ్రామపురంలో దక్షిణ భారతదేశంలోనే రెండవ అతిపెద్ద మాల్‌గా పేరుగాంచిన ‘ఇనార్బిట్‌ మాల్‌’ శుక్రవారం అట్టహాసంగా ప్రారంభమైంది. ఇనార్బిట్‌ మాల్‌ సీఈవో రజనీష్‌ మహాజన్‌, చీఫ్‌ బిజినెస్‌ ఆఫీసర్‌ రోహిత్‌ గోప్లాని, ప్రాజెక్ట్స్‌ అండ్‌ డిజైన్స్‌ సీనియర్‌ వైస్‌ ప్రెసిడెంట్‌ యూసఫ్‌ సయ్యద్‌, చీఫ్‌ ఫైనాన్స్‌ ఆఫీసర్‌ హిమాంశు ధడుధాలు పాల్గొన్నారు. విభిన్న ప్రతిభావంతులైన క్రీడాకారులు షేక్‌ కౌసర్‌ సాహిల్‌, యాళ్ల సత్తిబాబు, గాలిదేవర శివగంగ దుర్గా, అడ్డగుదురు ప్రణయ్‌ల చేతుల మీదుగా ఈ ప్రారంభోత్సవ కార్యక్రమం నిర్వహించడం విశేషం. మాల్‌ ప్రారంభం సందర్భంగా మొదటి 500 మందికి ‘గోల్డెన్‌ టికెట్‌’ గిఫ్ట్‌లు ప్రకటించడంతో ఉదయం నుంచే నగరవాసులు భారీగా తరలివచ్చారు. జనం ఒక్కసారిగా లోపలికి రావడంతో స్వల్ప తోపులాట జరగగా, ఫోర్త్‌ టౌన్‌ పోలీసులు రంగప్రవేశం చేసి పరిస్థితిని అదుపులోకి తెచ్చారు. పలు అవుట్‌లెట్లు ఇంకా ప్రారంభం కావాల్సి ఉన్నప్పటికీ, నగరంలోని అతిపెద్ద మాల్‌ను చూసేందుకు ప్రజలు ఆసక్తిగా బారులు తీరారు.

సింహాచలం: శ్రీరామనవమిని పురస్కరించుకుని విజయనగరం జిల్లా రామతీర్థంలో శుక్రవారం జరిగిన సీతారాముల కల్యాణోత్సవానికి సింహాచలం శ్రీ వరాహ లక్ష్మీనృసింహస్వామి దేవస్థానం నుంచి పట్టువస్త్రాలను, ముత్యాల తలంబ్రాలను వైదిక, అధికారులు తీసుకెళ్లారు. రామతీర్థంలో జరిగే సీతారాముల కల్యాణోత్సవానికి రాష్ట్ర ప్రభుత్వం తరపున సింహాచలం దేవస్థానం పట్టువస్త్రాలు, ముత్యాల తలంబ్రాలు గత 11 ఏళ్ల నుంచి అందిస్తోంది. దీనిలో భాగంగా ఈ ఏడాది కూడా అక్కడికి పట్టువస్త్రాలు, ముత్యాల తలంబ్రాలను దేవస్థానం ఈవో జె.వెంకటరావు, అర్చకులు, అధికారులు తీసుకెళ్లారు.

అనకాపల్లి: చంద్రబాబు ప్రభుత్వం మండలంలో మైనింగ్‌ను ఏఎంఆర్‌ సంస్థలకు అప్పగించి, ప్రజల ప్రాణాలతో చెలగాటమాడుతుందని సీఐటీయూ జిల్లా అధ్యక్షుడు వి.వి.శ్రీనివాసరావు ఆగ్రహం వ్యక్తం చేశారు. స్థానిక ఎన్టీఆర్‌ ఆస్పత్రి ఆవరణలో శుక్రవారం ఆయన విలేకరుల సమావేశంలో మాట్లాడుతూ మైనింగ్‌ చెక్‌పోస్టులు వద్ద కార్మికులు 24 గంటలూ విధుల్లో ఉండడంతో అనారోగ్యానికి గురై మృత్యవాత పడుతున్నట్లు వాపోయారు. కార్మికుల చట్టాలను ఏఎంఆర్‌ సంస్థ నీరుగారుస్తుందన్నారు. మండలంలో మామిడిపాలెం ఏఎంఆర్‌ మైనింగ్‌ చెక్‌ పోస్ట్‌లో మొబైల్‌ స్క్వాడ్‌ విధుల్లో ఉండి రోడ్డు ప్రమాదానికి గురై మృతి చెందిన తాడేపల్లి గూడెంకు చెందిన ముప్పిడి రామిరెడ్డి కుటుంబానికి సదరు సంస్థ రూ.50 లక్షల నష్టపరిహారం చెల్లించాలని డిమాండ్‌ చేశారు. అదే ప్రమాదంలో క్షతగాత్రుడైన కూండం గ్రామానికి చెందిన జగదీష్‌కు పూర్తి వైద్యం అందించాలని కోరారు. మైనింగ్‌ చెక్‌ పోస్ట్‌లో పనిచేస్తున్న కార్మికులు తీవ్ర అభద్రతాభావంలో ఉన్నారని, పీఎఫ్‌, ఈఎస్‌ఐ వంటి కనీస సౌకర్యాలు కల్పించడంలో విఫలమైందన్నారు. ప్రాణాలకు తెగించి రేయంబవళ్లు మైనింగ్‌ ప్రాంతాలను చెక్‌ చేయడంతోపాటు నిత్యం ప్రమాదాలు గురవుతున్న వారికి ఎటువంటి ఇన్సూరెన్స్‌ సౌకర్యం లేదన్నారు. కనీస వేతనాలు అమలు కావడం లేదని, పనిగంటలు అదనంగా చేయించుకోవడంతో తీవ్ర ఇబ్బందులకు గురవుతున్నట్లు వాపోయారు. లేబర్‌ అధికారులు చెక్‌పోస్టుల వద్ద తనిఖీలు నిర్వహించాలని డిమాండ్‌ చేశారు. కార్యక్రమంలో సీఐటీయూ జిల్లా ప్రధాన కార్యదర్శి ఆర్‌.శంకరరావు, ఉపాధ్యక్షుడు గంటా శ్రీరామ్‌ తదితరులు పాల్గొన్నారు.

కొయ్యూరు: శ్రీరామనవమి పర్వదినాన్ని పురస్కరించుకుని శుక్రవారం ’వేద సంకల్ప సేవా ట్రస్ట్‌’ ఆధ్వర్యంలో పలు రామాలయాలకు ఆర్థిక సాయం అందజేశారు. కొయ్యూరు మండలంలోని రేవళ్లు, కాకరపాడు, శరభన్నపాలెం గ్రామాల్లోని రామాలయాలకు, అవసరమైన వస్తువుల కొనుగోలు నిమిత్తం ఒక్కో ఆలయానికి రూ. 10 వేలు చొప్పున విరాళం అందించారు. ధార్మిక సంస్థల సేవా ప్రతినిధి డీవీడీ ప్రసాద్‌, పాడేరు మార్కెట్‌ కమిటీ చైర్మన్‌ మంగతల్లి, బీజేపీ మహిళా మోర్చా జిల్లా కార్యదర్శి గౌరి పార్వతి చేతుల మీదుగా ఈ సాయాన్ని అందజేశారు. తెలుగు రాష్ట్రాల్లో దాదా పు 63కు పైగా రామాలయాలకు వేద సంకల్ప ట్రస్ట్‌ ఆర్థిక సాయం అందజేసిందని ఈ సందర్భంగా వారు పేర్కొన్నారు. కొయ్యూరు మండలంలోని మూడు ఆలయాలకు ఈ సాయం అందడంపై వారు హర్షం వ్యక్తం చేశారు. బీజేపీ మండల అధ్యక్షుడు శివకుమార్‌ పాల్గొన్నారు.