బెరైటీస్‌ ఎగుమతుల్లో ఏపీఎండీసీ (ఆంధ్రప్రదేశ్‌ ఖనిజాభివృద్ధి సంస్థ) సరికొత్త రికార్డు సృష్టించింది. అమెరికా బెరైటీస్‌ మార్కెట్‌లో 44 శాతం వాటాను సొంతం చేసుకుంది. ఈ మేరకు అంతర్జాతీయ బెరైటీస్‌ అసోసియేషన్‌ ఇటీవల వెల్లడించింది. అమెరికా మార్కెట్‌లో ఒక దేశం గానీ, సంస్థ గానీ ఇంత శాతం వాటాను చేజిక్కించుకోవడం ఇదే తొలిసారి. గత సంవత్సరం 30 శాతం వాటాను దక్కించుకున్న ఏపీఎండీసీ.. ఈ సంవత్సరం దాన్ని మరో 14 శాతం పెంచుకుని ప్రపంచ మార్కెట్‌లో సుస్థిర స్థానం సాధించింది. మరోవైపు ఈ ఆర్థిక సంవత్సరం 3 మిలియన్‌ టన్నుల బెరైటీస్‌ ఉత్పత్తి లక్ష్యాన్ని పెట్టుకున్న ఏపీఎండీసీ  దాన్ని సాధించింది. గత సంవత్సరం బెరైటీస్‌పై ఏపీఎండీసీకి రూ.900 కోట్ల ఆదాయం రాగా ఈ ఏడాది అది రూ.1,300 కోట్లకు పెరిగింది.  మంగంపేటలో విస్తారంగా బెరైటీస్‌.. బెరైటీస్‌ నిక్షేపాలు ఆంధ్రప్రదేశ్‌లోని అన్నమయ్య జిల్లా మంగంపేటలో విస్తారంగా ఉన్నాయి. చమురు, సహజవాయువుల రంగానికి బెరైటీస్‌ అత్యంత కీలకం కావడం, అతి తక్కువ దేశాల్లో మాత్రమే ఇది దొరకడంతో అంతర్జాతీయంగా దీనికి డిమాండ్‌ ఉంది. భారత్‌లో ఉన్న బెరైటీస్‌ నిక్షేపాల్లో 98 శాతం మంగంపేటలోనే ఉన్నాయి. ఇక్కడ 74 మిలియన్‌ టన్నుల నిల్వలున్నాయి. ఇక్కడి నుంచి సుమారు 30 దేశాలకు బెరైటీస్‌ ఎగుమతి అవుతోంది. ఇప్పటి వరకు ఇక్కడ 40 మిలియన్‌ టన్నుల బెరైటీస్‌ ఖనిజాన్ని వెలికితీశారు. బెరైటీస్‌ను ఎందుకు వాడతారంటే.. బెరైటీస్‌ ఖనిజాన్ని అనేక ఉత్పత్తులో ఉపయోగిస్తారు. ముఖ్యంగా పెయింట్, ప్లాస్టిక్‌లలో పూరకం, ఇంజన్ కంపార్ట్‌మెంట్లలో సౌండ్ తగ్గించడానికి, ఆటోమొబైల్ ఉత్పత్తులో నునుపు, తుప్పు నిరోధకత కోసం వినియోగిస్తారు. అలాగే ట్రక్కులు, ఇతర వాహనాల్లో ఘర్షణ కలిగించే ఉత్పత్తులు, రేడియేషన్ షీల్డింగ్ కాంక్రీటు, గ్లాస్ సిరామిక్, వైద్య ఉత్పత్తుల్లో విస్తృతంగా ఉపయోగిస్తున్నారు.


 ఓబులవారిపల్లె: వైఎస్‌ఆర్ జిల్లాలోని మంగంపేట బెరైటీస్‌కు ఈ నెల 8న గ్లోబల్ టెండర్లు నిర్వహిస్తున్నామని, ఆ తర్వాతే ఖనిజ విక్రయం మొదలవుతుందని ప్రభుత్వ రంగ సంస్థల కమిటీ చైర్మన్ కాగిత వెంకట్రావు తెలిపారు. కమిటీ సభ్యులైన ఎమ్మెల్యేలు చంద్రశేఖర్‌రావు, శ్రీనివాసులురెడ్డి, శ్రీకాంత్‌రెడ్డితో కలిసి బుధవారం ఆయన ఏపీఎండీసీ ఆధ్వర్యంలోని మంగంపేట బెరైటీస్ ప్రాజెక్టును సందర్శించారు. అనంతరం విలేకరులతో మాట్లాడుతూ.. ఆదాయ వనరులు పెంచుకునే మార్గాన్ని రాష్ట్ర ప్రభుత్వం అన్వేషిస్తోందని, అందులో భాగంగానే అసెంబ్లీ కమిటీని రాష్ట్ర ప్రభుత్వం గనుల పరిశీలనకు పంపిందన్నారు.
 ఈ మేరకు తమ బృందం ఖనిజం వెలికితీత, మార్కెటింగ్ అంశంపై అధ్యయనం చేసి ప్రభుత్వానికి నివేదిస్తుందన్నారు. సంస్థలో పని చేసే ఔట్‌సోర్సింగ్ కార్మికుల సమస్య తమ దృష్టికి వచ్చిందని చెప్పారు. గనుల నిలకడపై కార్మికుల భవిష్యత్తు ఆధారపడి ఉంటుందని స్పష్టం చేశారు. నెలాఖరులోగా ప్రభుత్వం కొత్త మైనింగ్ విధానాన్ని తీసుకురానుందని చెప్పారు.