పోలీస్, దేవా, సాంబయ్య తదితర చిత్రాలతో మంచి యాక్షన్ దర్శకుడు అనిపించుకున్న కేయస్ నాగేశ్వరరావు ‘బాల భగత్‌సింగ్’ పేరుతో ఓ సినిమా చేయబోతున్నారు. ఆ విశేషాలను ఆయన తెలియజేస్తూ -‘‘మన దేశానికి స్వాతంత్య్రం రావడం కోసం తన ప్రాణాలను పణంగా పెట్టి మరీ పోరాడిన యోధుడు భగత్‌సింగ్. ఆయన జీవిత చరిత్ర రాబోయే తరాలకు కూడా ఓ ఇన్‌స్పిరేషన్. అందుకే ఆయన జీవిత చరిత్రను తెరకెక్కించబోతున్నా. అందరూ బాలతారలతోనే ఈ సినిమా చేయబోతున్నా. టైటిల్ రోల్‌ని మాస్టర్ మిథున్ పోషిస్తారు. మిగతా బాలనటుల ఎంపిక జరుగుతోంది. పూర్తి వివరాలు త్వరలో తెలియజేస్తాం’’ అన్నారు. ఈ చిత్రానికి సంగీతం: శివ కాకాని, మాటలు: సురేష్ కుమార్.