బైక్‌ అదుపు తప్పి కిందపడటంతో ఒకరి మృతి
 
 మరొకరికి తీవ్ర గాయాలు
 
 అశ్వారావుపల్లి(రఘునాథపల్లి) : మండలంలోని అశ్వారావుపల్లి రిజర్వాయర్‌ వద్ద స్నేహితులతో సరదాగా గడిపి తిరిగి వెళ్తున్న ఓ యువకుడు రోడ్డు ప్రమాదంలో మృత్యువాత పడ్డాడు. ఈ సంఘటన అశ్వారావుపల్లి శివారులో శనివారం చోటుచేసుకుంది. ఈ ప్రమాదంలో ఒకరు అక్కడికక్కడే మృతిచెందగా, మరో స్నేహితుడు తీవ్ర గాయాలతో ఆసుపత్రిలో చికిత్సపొందుతున్నాడు. స్థానికులు, పోలీసుల కథనం ప్రకారం.. రఘునాథపల్లికి చెందిన ఎండీ మహ్మద్‌ దస్తగిరి, బదర్‌బీ దంపతులకు కుమారుడు ఎండీ.ఆసిఫ్‌(22), నలుగురు కుమార్తెలు ఉన్నారు. కుమారుడు ఆసిఫ్‌ హైదరాబాద్‌లో ఉంటూ డిగ్రీ చదువుతున్నాడు. సెలవులు కావడంతో రెండు రోజుల క్రితం ఇంటికి వచ్చాడు. శనివారం తన ఐదుగురు స్నేహితులు రాజయ్య, జ్ఞానారెడ్డి, బడితె సాయి, హరీష్, షాబాజ్‌లతో కలిసి మూడు ద్విచక్రవాహనాలపై అశ్వారావుపల్లి రిజర్వాయర్‌ డ్యామ్‌ వద్ద సరదాగా గడిపారు. తిరుగు ప్రయాణంలో ఆసిఫ్‌ తన బైక్‌పై స్నేహితుడు షాబాజ్‌తో కలిసి ఇంటికి బయలుదేరాడు. బైక్‌ను అతి వేగంగా నడుపుతుండగా అశ్వారావుపల్లి దాటిన తర్వాత లోలెవల్‌ కాజ్‌ వే వద్ద వాహనం అదుపు తప్పి కిందపడిపోయారు. దీంతో ఆసిఫ్‌ అక్కడికక్కడే దుర్మరణం చెందగా, షాబాజ్‌ తీవ్ర గాయాలపాలయ్యాడు. స్థానికులు వెంటనే ఆటోలో షాబాజ్‌ను జనగామ ఏరియా ఆసుపత్రికి తరలించారు. తమ కుమారుడు ఆసిఫ్‌ మృతదేహాన్ని చూసి తల్లిదండ్రులు గుండెలవిసేలా రోదించారు. ఎస్సై రంజిత్‌రావు కేసు నమోదు చేసుకొని దర్యాప్తు చేస్తున్నారు.  


 సిమ్లా: స్వాతంత్ర్య సమరయోధుడు భగత్ సింగ్ ముని మనవడు అభితేజ్ సింగ్ రోడ్డు ప్రమాదంలో మృతిచెందాడు. హిమాచల్ ప్రదేశ్ లో రామ్ పూర్ సమీపంలో ఆదివారం ఈ ఘటన చోటుచేసుకుంది. పోలీసుల కథనం ప్రకారం... అభితేజ్ సింగ్(27) ఏదో పని నిమిత్తం బయటకు వెళ్లాడు. మిత్రుడు సనావార్ తో కలిసి బైక్ పై ఇంటికి వెళ్తున్నాడు. వీరి వెనకాలే గురుపాల్ సింగ్, అభితేష్ కారులో ప్రయాణమయ్యారు. రామ్ పూర్ సమీపంలో మ్యాంగ్లాడ్ వద్ద బైక్ అదుపు తప్పింది. బైక్ పై వెళ్తోన్న అభితేజ్, సనావార్ కింద పడ్డారు. అయితే అభితేజ్ కు మాత్రం తల, పక్కటెముకల భాగంలో తీవ్ర గాయాలయ్యాయి.
 
 చికిత్స నిమిత్తం రామ్ పూర్ ఆస్పత్రికి తరలించగా చికిత్స పొందుతూ కొన్ని నిమిషాల్లోనే అతడు చనిపోయాడు. రోడ్డు తడిగా ఉండటంతో బైక్ అదుపుతప్పడంతో ఈ ప్రమాదం జరిగిందని అభితేజ్ స్నేహితులు చెప్పారు. పోస్టుమార్టం చేసిన తర్వాత మృతదేహాన్ని కుటుంబానికి అప్పగించారు. మోహాలీలో సోమవారం అంత్యక్రియలు నిర్వహిస్తారని పోలీసులు తెలిపారు.


 నేరేడుచర్ల: అదుపుతప్పి ఓ బైక్ బోల్తా పడగా, ద్విచక్రవాహనదారుడి తలపై నుంచి లారీ వెళ్లిపోవడంతో ఆ వ్యక్తి అక్కడికక్కడే మృతి చెందాడు. నల్లగొండ జిల్లా నేరేడుచర్ల మండలం రామగిరి వద్ద మంగళవారం సాయంత్రం ఈ ఘటన జరిగింది. మిర్యాలగూడ సీతారామపురంకు చెందిన ఖలీల్ నేరేడుచర్లలో పని పూర్తి చేసుకుని బైక్‌పై తిరుగు ప్రయాణం అయ్యాడు.
 రామగిరి వద్దకు వచ్చేసరికి బైక్ అదుపుతప్పడంతో బండితోపాటు ఖలీల్ కిందపడిపోయాడు. అదే సమయంలో వెనుక నుంచి వచ్చిన బోర్‌వెల్ లారీ ఖలీల్ తలపై నుంచి ముందుకు వెళ్లింది. తల ఛిద్రమై ఖలీల్ అక్కడికక్కడే ప్రాణాలు విడిచాడు.


 సోంపేట(శ్రీకాకుళం): రోడ్డు ప్రమాదంలో ఓ వ్యక్తి ప్రాణాలు కోల్పోయాడు. ఈ ఘటన శ్రీకాకుళం జిల్లా సోంపేట మండలంలో మంగళవారం రాత్రి చోటుచేసుకుంది. సోంపేట మండల కేంద్రం శివారులో బైకు అదుపు తప్పి చెట్టును ఢీకొంది. దీంతో బైకు నడుపుతున్న వ్యక్తి అక్కడికక్కడే మృతి చెందాడు. మృతుడు కంచిలి మండలం ఉప్పరపేటకు చెందిన నక్క వెంకట్రావుగా పోలీసులు నిర్ధారించారు.