హైదరాబాబ్ : సికింద్రాబాద్ తుకారాంగేటు పోలీస్ స్టేషన్ పరిధిలో బుధవారం ఉదయం  తృటిలో పెను ప్రమాదం తప్పింది. ఉదయం ఆరు గంటల సమయంలో ఓ కారు రైలు నిలయం సమీపంలో బీభత్సం సృష్టించింది.  ఐ20 కారు అదుపు తప్పి ఫుట్పాత్ పైకి ఎక్కి గోడను ఢీకొంది. ఈ ఘటనలో ఫుట్పాత్ పైన ఉన్న చెరుకు బండి,టీ బండి ధ్వంసం కాగా, గోడ కూలిపోయింది.
 అయితే నిత్యం రద్దీగా ఉండే ఆ ప్రాంతం... ఉదయంపూట కావడంతో ఆ సమయంలో ఎవరూ లేకపోవడంతో  ప్రాణ నష్టం తప్పింది. మరోవైపు  సమయానికి ఎయిర్ బ్యాగ్స్ తెరుచుకోవడంతో కారులో ప్రయాణిస్తున్నవారు కూడా సురక్షితంగా బయటపడ్డారు. అతి వేగం కారణంగానే ఈ ప్రమాదం జరిగినట్లు తెలుస్తోంది. కారు డ్రైవర్ పై పోలీసులు కేసు నమోదు చేసి, దర్యాప్తు చేపట్టారు. ఇందుకు సంబంధించి పూర్తి వివరాలు తెలియాల్సి ఉంది.