న్యూఢిల్లీ: ప్రచురణకర్తలు దేశ సాంస్కృతిక రాయబారుల్లాంటి వారని ఎమెస్కో పబ్లిషర్స్‌ అధినేత ధూపాటి విజయకుమార్‌ అన్నారు. రచయితలకూ, ప్రజలకూ మధ్య వారధిలా ఉంటూ పుస్తకాల్లో నిక్షిప్తమై ఉండే విజ్ఞాన వ్యాప్తికి ప్రచురణకర్తలు దోహదం చేస్తారని ఆయన చెప్పారు.  శనివారం ఇక్కడి కేంద్ర సాహిత్య అకాడమీలో ‘భారతీయ సాహిత్యంలో ప్రచురణ కర్తల పాత్ర’ అన్న అంశంపై ఆయన ప్రసంగించారు. దేశంలోని వివిధ భాషల ప్రచురణకర్తలతో కేంద్ర సాహిత్య అకాడమీ ఏటా ఒక సమ్మేళనం ఏర్పాటు చేసి వారి మధ్య ఒప్పందాలకు వీలు కల్పించాలని సూచించారు. జ్ఞానపీఠ ఫౌండేషన్‌ నిర్దేశకుడు లీలాధర్‌ మాండ్లోయి అధ్యక్షత వహించిన ఈ కార్యక్రమంలో డి.కె. ఏజెన్సీస్‌ అధినేత రమేశ్‌ మిట్టల్, డీసీ పబ్లిషర్స్‌ అధినేత రవి డీసీ తదితరులు మాట్లాడారు. 


 జంట ఆస్కార్‌లు సాధించిన  ఏఆర్ రెహమాన్ ప్రపంచమంతా పేరున్న సంగీత దర్శకుడు. తన సంగీతంతో ఖండాంతరాలకు విస్తరిస్తున్న ఈ స్వరకర్త ఇటీవలే ‘ప్రాఫెట్ ఆఫ్ మహమ్మద్’ అనే ఇరానీ చిత్రానికి సంగీతం అందించి ప్రపంచ సినీ అభిమానుల మనసు దోచుకున్నారు. తాజాగా ఆయనకు మరో గౌరవం దక్కింది. సీషెల్స్ ప్రభుత్వం తమ దేశ సాంస్కృతిక రాయబారిగా ఏఆర్ రెహ్మాన్‌ను నియమిస్తున్నట్టు ప్రకటించింది. ఆ దేశపు ప్రశంసా పత్రాన్ని రెహ్మాన్ ట్విట్టర్‌లో పోస్ట్ చేశారు. సీషెల్స్‌కు సాంస్కృతిక రాయబారిగా అంతకుముందు ఇళయరాజా కొన్నేళ్లపాటు సేవలందించారు. ఆ తర్వాత ఎంపికైన వారిలో రెహమాన్ రెండో సంగీత దర్శకుడు.