మెక్సికో: యూఎస్-మెక్సికో మధ్య అమెరికా అధ్యక్షుడు డోనాల్డ్‌ ట్రంప్‌ నిర్మించే గోడకు తాము ఒక్క పైసా కూడా ఇవ్వబోమని మెక్సికో అధ్యక్షుడు ఎన్రిక్‌ పెనానీతో స్పష్టం చేశారు. గోడలకు తాము వ్యతిరేకం అని, మెక్సికోకు ఇరు దేశాల మధ్య అడ్డుగా నిర్మించే గోడలపై అస్సలు నమ్మకం లేదని అన్నారు. గురువారం ఆయన తమ దేశ పౌరులకు సందేశం ఇచ్చే సందర్భంగా మీడియాతో మాట్లాడుతూ..
 
 ‘నేను ఇంతకుముందు చెప్పాను మరోసారి స్పష్టంగా చెబుతున్నాను. మెక్సికో ఏ గోడకు కూడా ఎలాంటి డబ్బులు చెల్లించదు. కలిసి ఉండకుండా గత కొంతకాలంగా అమెరికా గోడను నిర్మిస్తూ ఉండటాన్ని దానిని పూర్తి చేస్తానని ట్రంప్‌ ప్రకటించడాన్ని చూసి నేను సిగ్గుగా భావిస్తున్నాను. అమెరికా నిర్ణయాన్ని ఖండిస్తున్నాను. కలిపి ఉంచేలా ప్రయత్నించాల్సి పోయి ఇలాంటి పనులు చేస్తున్నందుకు బాధగా ఉంది’ అని అన్నారు. అయితే, ఈ నెల తన అమెరికా పర్యటన రద్దు చేసుకుంటారా.!కొనసాగిస్తారా! అనే విషయాన్ని మాత్రం ఆయన చెప్పలేదు.
 
 వాషింగ్టన్‌కు ఈ నెల 31న డోనాల్డ్‌ ట్రంప్‌ను ఎన్రిక్‌ కలిసేందుకు వెళ్లనున్నారు. వివాదాస్పద ‘యూఎస్‌- మెక్సికో సరిహద్దు గోడ’ను ఖచ్చితంగా నిర్మిస్తామని ట్రంప్‌ చెప్పడమే కాకుండా ఆ ఫైలుపై బుధవారం సంతకం చేశారు. అంతకుముందు యూఎస్‌- మెక్సికోల మధ్య గోడను కట్టబోతున్నాం’ అని అధ్యక్షుడు ట్రంప్‌ ట్విట్టర్‌ ద్వారా తెలిపిన విషయం తెలిసిందే.


 మెక్సికో సిటీ: అమెరికా అధ్యక్ష ఎన్నికల ప్రచార సమయంలో, విజయం సాధించిన తరువాత ట్రంప్‌ పదేపదే చెబుతున్న మాట.. మెక్సికో సరిహద్దులో కట్టబోయే గోడ గురించే. అక్రమ వలసదారులను దేశంలోకి రానివ్వకుండా మెక్సికో సరిహద్దులో భారీ గోడ కడతాం అని తాజాగా నిర్వహించిన ప్రెస్‌ కాన్ఫరెన్స్‌లో సైతం ట్రంప్‌ మరోసారి స్పష్టం చేశారు. అంతేకాదు గోడ నిర్మాణ ఖర్చును కూడా పొరుగుదేశం పంచుకుంటుందని ఆయన తెలిపారు.
 
 ఈ నేపథ్యంలో మెక్సికో అధ్యక్షుడు ఎన్రిక్‌ పెన నీటో 'ట్రంప్‌ గోడ'పై స్పందించారు. అమెరికా కొత్త ప్రభుత్వంతో తమకు కొన్ని విభేదాలున్నాయనడానికి ఇది నిదర్శనం అన్న ఆయన.. గోడకు తమ వైపు నుంచి ఎలాంటి చెల్లింపులు ఉండబోవని తెలిపారు. గత సెప్టెంబర్‌లో ట్రంప్‌తో సమావేశమైన సందర్భంలో కూడా నీటో ఇదే విషయాన్ని వెల్లడించిన విషయం తెలిసిందే. ట్రంప్‌ మాత్రం బుధవారం ప్రెస్‌మీట్‌లో గోడ కోసం మెక్సికో ఇచ్చే డబ్బులను మళ్లీ రీయింబర్స్‌ చేస్తామని చెప్పడమే కాకుండా.. ‘గుర్తుంచుకోండి ఇది జరుగుతుంది’ అని కాన్ఫిడెంట్‌గా అన్నారు. చూడాలి మరి మెక్సికో సహకారంతోనే గోడ నిర్మాణం జరుగుతుందో.. లేక అమెరికా సొంతంగానే ఈ పనికి పూనుకోవాల్సి వస్తుందో.