డబ్బు సంపాదించాలని ఎవరి ఉండదు.. ఉద్యోగం, వ్యాపారం, కూలీపని, ఆన్‌లైన్‌ ప్లాట్‌ఫామ్‌ల్లో ఆర్జించడం.. ఇలా ఏది చేసినా డబ్బుకోసమే. మన చదువు, మనం చేసే పనినిబట్టి డబ్బు సంపాదన మారుతోంది. అయితే చదువు అయిపోయిన వెంటనే కొందరు ఉద్యోగంలో స్థిరపడుతారు. మరికొందరికి కొన్ని కారణాల వల్ల కొంచెం సమయం పడుతుంది. చదువుకున్న గ్రాడ్యుయేట్లు కేవలం ఉద్యోగం ద్వారానే కాకుండా ఎన్నో మార్గాల వల్ల డబ్బు సంపాదించవచ్చు. మన నైపుణ్యాలు, ఆసక్తులు, కెరీర్ లక్ష్యాల ఆధారంగా గ్రాడ్యుయేట్‌ల సంపాదన మారవచ్చు. డబ్బు సంపాదించే కొన్ని మార్గాలను నిపుణులు సూచిస్తున్నారు. అవేంటో ఇప్పుడు తెలుసుకుందాం.  1. ఫుల్‌టైం ఉ‍ద్యోగం: ఇది సంప్రదాయ మార్గం. గ్రాడ్యుయేషన్‌ అయిన వెంటనే దరఖాస్తు చేసుకుని ఉద్యోగం సంపాదించవచ్చు. అందులోనే స్థిరపడవచ్చు. అయితే కెరీర్ లక్ష్యాలకు అనుగుణంగా ఉన్న కంపెనీలను పరిశోధించడం ముఖ్యం. స్థిరమైన ఉద్యోగం, ఉద్యోగ భద్రతతో ఎన్నో ‍ప్రయోజనాలు, మంచి ఆదాయాన్ని సమకూర్చుకోవచ్చు.  2. ఫ్రీలాన్సింగ్: నిర్దిష్ట నైపుణ్యాలు (రైటింగ్, గ్రాఫిక్ డిజైన్, ప్రోగ్రామింగ్, సోషల్ మీడియా మేనేజ్‌మెంట్)ఉంటే  ఫ్రీలాన్సర్‌గా సేవలు అందించవచ్చు. అందుకు కొన్ని ఆన్‌లైన్‌ ప్లాట్‌ఫామ్‌లు నైపుణ్యాలను అభివృద్ధి చేసుకునేలా శిక్షణ ఇస్తున్నాయి.  3. కన్సల్టింగ్: నిర్ణీత రంగంలో నైపుణ్యం ఉన్న గ్రాడ్యుయేట్లు కన్సల్టెంట్‌లుగా మారవచ్చు. వీరు వ్యాపారాలు లేదా వ్యక్తులకు సలహాలు, సమస్యలకు పరిష్కారాలు అందించాల్సి ఉంటుంది. ఇందుకోసం మేనేజ్‌మెంట్‌, మార్కెటింగ్, ఫైనాన్స్ లేదా ఐటీ వంటి వివిధ రంగాల్లోని కంపెనీలను సంప్రదించవచ్చు. 4. సొంత వ్యాపారం: మంచి వ్యాపార ఆలోచనతో కొంత పెట్టుబడితో డబ్బు సంపాదించవచ్చు. ఇందులో భాగంగా ఏదైనా ఉత్పత్తులు తయారుచేయడం, వాటికి సేవలు  అందించడం వంటి విభాగాల్లో వ్యాపారం ప్రారంభించే అవకాశం ఉంటుంది.  5. టీచింగ్/ ట్యూటర్‌: సంబంధిత సబ్జెక్టులో పరిజ్ఞానం ఉన్న గ్రాడ్యుయేట్లు ఇతర విద్యార్థులకు ట్యూటరింగ్ సేవలను అందించవచ్చు. కొన్ని ఆన్‌లైన్‌ ప్లాట్‌ఫామ్‌ల్లో వివరాలు నమోదుచేసుకుని ఈ పనిని ప్రారంభించే అవకాశం ఉంది. ప్రత్యామ్నాయంగా పాఠశాల ఉపాధ్యాయులుగా లేదా కళాశాల ప్రొఫెసర్‌గా మారవచ్చు. 6. ఆన్‌లైన్ కంటెంట్ క్రియేషన్‌: ఆన్‌లైన్‌ బ్లాగ్, యూట్యూబ్‌ ఛానెల్ లేదా పోడ్‌క్యాస్ట్‌ని ఏర్పాటు చేసుకోవచ్చు. మన ఛానెల్‌కు ఫాలోవర్లు పెరిగిన తర్వాత ప్రకటనలు, స్పాన్సర్‌షిప్‌లు, మార్కెటింగ్ లేదా వస్తువులు విక్రయించడం ద్వారా డబ్బు ఆర్జించవచ్చు. 7. ఆన్‌లైన్ కోర్సులు: ఆన్‌లైన్‌ కోర్సులు అందించే ఎన్నో ప్లాట్‌ఫామ్‌లు ఇప్పుడు అందుబాటులో ఉన్నాయి. వాటిల్లో కోర్సులను సిద్ధం చేసి విక్రయించవచ్చు. అయితే ఈ కోర్సులు మన అధ్యయన రంగానికి, నైపుణ్యాలకు సంబంధించి ఉంటే మరీ మంచిది. 8. పెట్టుబడులు: స్టాక్‌లు, బాండ్‌లు, రియల్ఎస్టేట్ వంటి మార్గాల్లో డబ్బును పెట్టుబడి పెట్టాలి. ఆయా విభాగాల్లో ర్యాలీనిబట్టి  మనకొచ్చే ఆదాయం పెరుగుతుంది. అయితే ఏ రంగంలో పెట్టుబడి పెట్టాలన్నా స్పష్టమైన అవగాహన ఎంతో అవసరం. 9. పార్ట్‌టైమ్‌ ఉద్యోగాలు: చదువుతున్న వారైనా, చదువు పూర్తయిన వారైనా స్థిరమైన ఆదాయ మార్గం వచ్చేంత వరకు పార్ట్‌టైమ్‌ ఉద్యోగాలు చేయవచ్చు. రిటైల్, కస్టమర్ సర్వీస్, హాస్పిటాలిటీ వంటి రంగాల్లో ఈ ఉద్యోగాల పాత్ర కీలకం. రిమోట్ వర్క్, గిగ్ ఎకానమీ ఉద్యోగాలు, మార్కెటింగ్, ఫొటోగ్రఫీ, వీడియోగ్రఫీ, ఈకామర్స్ వంటి ఎన్నో రంగాల్లో పని చేస్తూ డబ్బు సంపాదించవచ్చు. Follow the Sakshi TV channel on WhatsApp


 'నల్ల డబ్బు ఎక్కడో లేదు. బులియన్‌ మార్కెట్‌లో, బినామీ భూదందాల్లో, విదేశీ కరెన్సీల్లో ఉంది. నల్లడబ్బును వెలుగులోకి తీసుకరావడానికి పెద్దనోట్లను రద్దు చేయడం వల్ల పెద్ద ప్రయోజనమేమీ ఉండదు. 1946, 1978లలో రెండుసార్లు పెద్దనోట్లను రద్దుచేసినా ఎలాంటి ప్రయోజనం కలగలేదు' ఈ వ్యాఖ్యలు చేసింది రాజకీయ నాయకులెవరూ కాదు. కేంద్ర ప్రత్యక్ష పన్నుల బోర్డు 'మెజర్స్‌ టు టాకిల్‌ బ్లాక్‌మనీ ఇన్‌ ఇండియా అండ్‌ అబ్రాడ్‌' పేరిట 2012లో విడుదల చేసిన ఓ నివేదికలో నిపుణులు ఈ వ్యాఖ్యలు చేశారు. 
  
 ఈ నివేదిక గురించి 2014లో అధికారంలోకి వచ్చిన నరేంద్రమోదీ ప్రభుత్వానికి తెలియకపోవచ్చు. ఇప్పుడు ప్రతిపక్షంలో ఉండి, అప్పుడు అధికారంలో ఉన్న యూపీఏ ప్రభుత్వానికి కచ్చితంగా తెలిసే ఉంటుంది. మోదీ తీసుకున్న నిర్ణయాన్ని కేవలం రాజకీయ కోణంతో చూడకుండా ప్రజా ప్రయోజనాలే పరమావధిగా భావించే కోణంలోనే చూడాలి. ప్రస్తుత పార్లమెంటు సమావేశాల్లో నానారభస సష్టించి తద్వారా వాటిని వాయిదా వేయించడం ద్వారా రాజకీయ పబ్బం గడుపుకోవాలని ఏ ప్రతిపక్ష పార్టీ ప్రయత్నించరాదు. 
  
 మోదీ ప్రభుత్వ నిర్ణయం కారణంగా దేశంలో ఏర్పడిన ఆర్థిక కల్లోల పరిస్థితులపై పార్లమెంటులో నిర్మాణాత్మక చర్చకు కృషి చేయాలి. వాస్తవ అవాస్తవాలు ప్రజలకు తెలియాలి. మోదీ నిర్ణయం వెనక లెక్కలేమిటో నిలదీయాలి. పరిస్థితులేమిటో పసిగట్టాలి, ప్రశ్నించాలి. రాజకీయ పార్టీలు, నాయకుల అవినీతే నల్లడబ్బుకు దారితీస్తోందని అరవింద్‌ కేజ్రీవాల్‌ లాంటి వాళ్లు చేసిన వ్యాఖ్యలపై కూడా చర్చ జరగాలి. ప్రభుత్వం తీసుకున్న నిర్ణయం వల్ల నాలుగు రోజుల్లోనే మూడు లక్షల కోట్ల రూపాయల డిపాజిట్లు వచ్చాయని ప్రభుత్వం ప్రకటించిన లెక్కల్లో నల్ల డబ్బు ఎంతో, తెల్లడబ్బు ఎంతో తేల్చాలి. ఆర్థిక సంక్షోభ పరిస్థితుల కారణంగా ఇప్పటివరకు ఎంత మంది అమాయకులు మరణించారో, వారి ప్రాణం ఖరీదు ఎంతో కూడా లెక్క చూపాలి. 
 -ఓ సెక్యులరిస్ట్‌ కామెంట్‌