ఆదాయపు పన్ను రిటర్నులు దాఖలు చేయడం వల్ల ప్రయోజనాలు ఉన్నాయా. రిటర్న్‌ వేయకుండా ఉంటే పెన్షన్‌ ఉండదంటున్నారు చాలా మంది. –  కే.యస్‌. చైతన్య, హైదరాబాద్‌  రిటర్నులు వేయకపోతే ఎటువంటి నోటీసులు రావు అని, ఎవరికీ తెలియదు అని.. ఏమీ అడగరు అని చాలా మంది అనుకుంటారు. కానీ ఇది నిజం కాదు. అపోహ మాత్రమే. ఈ వాదనలో ఎటువంటి పసలేదు. చట్టరీత్యా మీకు ట్యాక్సబుల్‌ ఇన్‌కం దాటి ఆదాయం ఉంటే, మీరే స్వంతంగా రిటర్న్‌ దాఖలు చేయాలి. అది మీ విధి. కర్తవ్యం. పరోక్షంగా మీరు దేశ ఆర్థికాభివృద్ధికి దోహదపడుతున్నారన్న మాట. మనం కట్టే పన్నుల్లో నుంచే దేశాభివృద్ధికి ప్రభుత్వం ఖర్చు పెడుతుంది. ఇక మరో విషయం ఏమిటంటే ఇది మీ స్టేటస్‌ సింబల్‌ .. గౌరవం కూడా. అటు పైన మీరు రుణం తీసుకోవాలన్నా బ్యాంకర్లు, ఇతరులు.. అందరూ అడిగే మొట్టమొదటి డాక్యుమెంట్‌ మీ ఇన్‌కం ట్యాక్స్‌ రిటర్నే. పెద్ద పెద్ద ఆర్థిక వ్యవహారాలు చేయాలంటే పాన్‌ ఉండాల్సిందే. బ్యాంకు అకౌంట్‌ తెరవాలంటే పాన్‌ ఉండాలి. విదేశీయానానికి కావాల్సిన వీసా తీసుకోవడానికి వెళ్లాలన్నా ఈ డాక్యుమెంట్లు ఉపయోగకరంగా ఉంటాయి. వ్యాపారం, వృత్తి చేయాలంటే, స్థిరాస్థుల క్రయవిక్రయాల్లో, ఇన్సూరెన్స్‌లో, ఇన్వెస్ట్‌మెంట్లలో .. ఇలా ఎన్నో రోజువారీ కార్యకలాపాలకు పాన్‌ తప్పనిసరి. కాబట్టి రిటర్ను వేయడం మానేయడం కన్నా వేస్తే ఎన్నో ప్రయోజనాలు పొందవచ్చు.  మా అత్తగారు, మావగారు ప్రస్తుతం మాతో అమెరికాలో ఉన్నారు. వచ్చే జనవరి వరకు భారత్‌కి రారు. గడవు తేదిలోగా రిటర్ను వేయలేకపోవచ్చు. ఇప్పుడు ఏం చేయాలి – పాలగుమ్మి అరుణ, వర్జీనియా (ఈమెయిల్‌ ద్వారా)  మీ అత్తగారు, మావగారి దగ్గర ఆదాయానికి సంబంధించి పూర్తి సమాచారం సిద్ధంగా ఉంటే మీరు అక్కడి నుంచే ఆన్‌లైన్‌లో రిటర్నులు దాఖలు చేయవచ్చు. దీనినే ఈ–ఫైలింగ్‌ అంటారు. ఇది సులువు. త్వరగా అవుతుంది. కష్టపడక్కర్లేదు. డిపార్ట్‌మెంట్‌ వీటిని త్వరితగతిన ప్రాసెసింగ్‌ చేస్తారు. సెప్టెంబర్‌ 2021లో వేసినవారికి అక్టోబర్‌లో రిఫండ్‌లు వచ్చాయి. ప్రస్తుతం గడువు తేది 31–12–2021. వారు భారత్‌ వచ్చే దాకా ఆగకండి.  ఇక్కడికి వచ్చి, ఇక్కడే వేయనవసరం లేదు. వేచి ఉండక్కర్లేదు. ఈ లోగా సమగ్ర సమాచారం సేకరించలేకపోతే డిసెంబర్‌ తర్వాత వేయండి. వడ్డీ, పెనాల్టీలు పడతాయి.  నేను ప్రైవేట్‌ సంస్థలో పనిచేస్తున్నాను. నా సేవింగ్స్‌ను పరిగణనలోకి తీసుకోకుండా ఫారం 16 జారీ చేశారు. అలాగే ఫారం 26 అ లో తప్పులున్నాయి. రివైజ్‌ చేయడానికి సంస్థ ముందుకు రావడం లేదు. – సామవేదం లావణ్య, సికింద్రాబాద్‌  ఈ విషయం గతంలో ఎన్నో సార్లు ప్రస్తావించాం. ఎన్నో సంస్థలు ఫారం 16, ఫారం 16 అల జారీలో తప్పులు చేస్తున్నాయి. ఫారం 26 అ లో కూడా తప్పులు దొర్లుతున్నాయి. మీ దగ్గరున్న సమాచారం సరైనది, సమగ్రమైనది అయితే, తగిన కాగితాలు ఉంటే, ఆ మేరకు రిటర్నులు వేసినప్పుడు సరిదిద్దండి. సరిగ్గా వేయండి. ఎటువంటి సమస్యా ఉండదు. అవసరం అయినప్పుడు సమీక్షించుకోవాలి - కేసీహెచ్‌ ఏవీఎస్‌ఎన్‌ మూర్తి, కేవీఎన్‌ లావణ్య


 శ్రీకాకుళం కలెక్టరేట్, న్యూస్‌లైన్:  ఆదాయ  పన్ను ఫారం-16ను విధిగా ఆన్‌లైన్‌లోనే సమర్పించాలని ఆదాయ పన్ను శాఖ సహాయ కమిషనర్ యు.వి. కృష్ణారావు స్పష్టం చేశారు. ఆదాయ పన్ను మదింపుపై మంగళవారం వరం రెసిడెన్సీలో వివిధ శాఖలు, బ్యాంకులు, బీమా కంపెనీల డ్రాయింగ్ అండ్ డిస్బర్సింగ్ అధికారులకు అవగాహన సదస్సు జరిగింది. ఈ సందర్భంగా ఆయన మాట్లాడుతూ గతంలో ఫారం 16 మాన్యువల్‌గా నింపి సమర్పించేవారని, ప్రస్తుతం ఆ విధంగా  సమర్పించడానికి ఎటువంటి చట్టబద్ధత లేదన్నారు.
  
  హెచ్‌టీటీపీ://డబ్ల్యుడబ్ల్యుడబ్ల్యుడాట్‌టీడీఎస్‌సీపీసీడాట్‌జీవోవీడాట్‌ఇన్ వెబ్‌సైట్‌లో ట్రెసెస్‌పోర్టల్‌లో ప్రవేశించి ఫారం 16ను నింపాలని సూచించారు. ఫారం 16బీను మాత్రం మాన్యువల్‌గా నింపాలన్నారు. ఫారాన్ని పూర్తి చేసినప్పుడు పాన్, టీఏఎన్ నంబరు, బ్యాంకులు అందించే సీఐఎన్ నంబరు, ఐటీఎన్‌సీ చలాన 281, 94 సీ, 94ఐ కోడ్, 200 కింద రెగ్యులర్ పేమెంట్ చేసే హెడ్ నంబరు విధిగా పేర్కొనాలని స్పష్టం చేశారు. ఉద్యోగులు అందించే వివరాల ఆధారంగా ఆన్‌లైన్‌లో పూర్తి చేసేటప్పుడు ప్రతి విషయాన్ని డీడీవోలు విపులంగా పరిశీలించాలన్నారు. అందించే సమాచారంలో తప్పులు దొర్లితే డీడీవోలు బాధ్యత వహిస్తారని పేర్కొన్నారు. 
  
  ప్రస్తుతం డీడీవోలకు తప్పులకు పెనాల్టీ పడే చట్టాలు వచ్చాయని చెప్పారు. కార్యక్రమంలో ఆదాయపు పన్ను అధికారులు ఏవీ చంద్రశేఖర్, ఎస్‌ఎస్ ఎడ్విన్, డి.సంధ్యారాణి, చార్టెడ్ అకౌంటెంట్ వి.చంద్రశేఖర్, సెట్‌శ్రీ సీఈవో వీవీఆర్‌ఎస్ మూర్తి, గృహ నిర్మాణ సంస్థ పీడీ బి.వి.నర్శింగరావు, ఏపీఎంఐపీ పీడీ పద్మజ, వివిధ శాఖల డీడీవోలు, ఉద్యోగులు పాల్గొన్నారు.