సాక్షి,భువనగిరిఅర్బన్‌ : అగి ఉన్న లారీని బైక్‌ ఢీ కొట్టడంతో ద్విచక్రవాహనంపై ఉన్న నవ దంపతులు మృతి చెందిన సంఘటన సోమవారం మండలంలోని కూనూరు గ్రామంలో చోటు చేసుకుంది. స్థానికులు, పోలీసులు తెలిపిన వివరాల ప్రకారం గుండాల మండలంలోని బ్రహ్మణపల్లి గ్రామానికి చెందిన బేజాడి కుమారస్వామి కుమారుడు బేజాడి నరేష్‌(29) సికింద్రాబాద్‌లోని గాంధీ ఆస్పత్రిలో 108 వాహనం డ్రైవర్‌గా పని చేస్తున్నాడు. బేజాడి నరేష్‌కు ఈ ఏడాది ఫిబ్రవరి 22వ తేదీన భువనగిరి మండలంలోని కేసారం గ్రామానికి చెందిన బాల్ద మల్లేష్‌ కుమార్తె దివ్య(21)తో వివాహమైంది. కాగా బ్రహ్మణపల్లి గ్రామం నుంచి బేజాడి నరేష్‌ తన బైక్‌పై భార్య దివ్యతో కేసారం గ్రామానికి బయలుదేరారు. ఈ క్రమంలో మోత్కూర్‌ వైపు నుంచి రాయగిరి వైపునకు వస్తుండగా మండలంలోని కూనూరు గ్రామ శివారులోని యాదాద్రి ఫంక్షన్‌హాల్‌ వద్ద అగి ఉన్న ఓ ట్రాన్స్‌ఫోర్టు లారీని ఢీకొట్టాడు. దీంతో బైక్‌పై ప్రయాణిస్తున్న దంపతులు రోడ్డుపై ఎగిరిపడటంతో వారి తలలకు తీవ్ర గాయాలై అక్కడిక్కక్కడే మృతిచెందారు. విషయం తెలుసుకున్న పోలీస్‌లు వెంటనే సంఘటన స్థలానికి చేరుకొని ప్రమాద వివరాలను స్థానికులను అడిగి తెలుసుకున్నారు. పోస్టుమార్టం నిమిత్తం మృతదేహాలను భువనగిరి ఏరియా ఆస్పత్రికి తరలించారు.  మిన్నంటిన రోదనలు   ఆలయంలో నిద్ర చేసేందుకు వెళ్లి తిరిగి వస్తుండగా రోడ్డు ప్రమాదంలో నవదంపతులు నరేష్, దివ్య మృతి చెందడంతో వారి కుటుంబాల్లో విషాదఛాయలు అలముకున్నాయి. పోస్టుమార్టం నిమిత్తం మృతదేహాలను ఆస్పత్రికి తీసుకెళ్లడంతో ఇరు కుటుంబాల బంధువులు అక్కడికి చేరుకున్నారు. మృతుల తల్లిదండ్రులు, బంధువులు రోదిస్తున్న తీరు పలువురిని కంటతడి పెట్టించింది. మృతుడి తండ్రి కుమారస్వామి ఇచ్చిన ఫిర్యాదు మేరకు కేసు నమోదు చేసుకొని దర్యాప్తు చేస్తునట్లు రూరల్‌ ఎస్‌ఐ రాఘవేందర్‌గౌడ్‌ తెలిపారు.    


 లారీ-బైకు ఢీకొని ఒక వ్యక్తి మృతి చెందిన సంఘటన ఆదిలాబాద్ జిల్లాలో శనివారం చోటుచేసుకుంది. లక్సెట్టిపేట జాతీయ రహదారిపై లక్ష్మీపూర్ స్టేజి వద్ద సిమెంట్ లారీ, బైక్‌ను ఢీ కొట్టింది. ఈ ఘటనలో బైక్‌పై వెళ్తున్న బెక్కమ్ రవి(23) అనే వ్యక్తి అక్కడిక్కడే మృతి చెందాడు. బాలరావుపేటకు చెందిన రవి బైక్ మెకానిక్‌గా పని చేస్తున్నాడు. ప్రమాదస్థలికి చేరుకున్న పోలీసులు పంచనామా నిర్వహించి పోస్టుమార్టం నిమిత్తం శవాన్ని లక్సెట్టిపేటలోని ప్రభుత్వాసుపత్రికి తరలించారు. చేతికి అందివచ్చిన కొడుకు కానరాని లోకాలకు చేరడంతో తల్లిదండ్రులు శోకసంద్రంలో మునిగిపోయారు.


 కొడవటూరు: ఆగి ఉన్న లారీని బైక్ ఢీకొని తండ్రి, కొడుకులు మృతి చెందిన ఘటన నెల్లూరు జిల్లా బొగోలు మండలంలో రాయచర్ల పాడు రహదారిపై గురువారం జరిగింది. బొగోలు మండలం తాల్లూరు గ్రామానికి చెందిన తండ్రీకొడుకులు ఓడ మహేష్(47), మధు(17)లు కొత్త బైక్ కొనడానికి ద్విచక్ర వాహనంపై నెల్లూరుకు వెళ్తున్నారు.
 ఈ క్రమంలో రాయచర్లపాడు రహదారి వద్ద ఆగి ఉన్న లారీని వీరి బైక్ ఢీకొట్టడంతో తండ్రీకొడుకులు అక్కడికక్కడే మృతి చెందారు. కాగా, ఓడ మహేష్ కుమారుడు మధు ప్రస్తుతం ఇంటర్మీడియెట్ చదువుతున్నాడు.


 గుంటూరు: గుంటూరు జిల్లాలో శుక్రవారం అర్ధరాత్రి జరిగిన రోడ్డు ప్రమాదంలో ఇద్దరు యువకులు మృతి చెందగా మరో యువకుడికి గాయాలయ్యాయి. నల్లపాడు శ్రీనివాస కాలనీ నుంచి తెనాలి వైపు వెళుతుండగా అర్ధరాత్రి 2 గంటల సమయంలో యువకులు ప్రయాణిస్తున్న బైక్‌ను ఎదురుగా వచ్చిన గ్యాస్ లారీ ఢీకొట్టింది. ఈ ప్రమాదంలో బైకుపై ప్రయాణిస్తున్న తెనాలి వాసి వెంకటేష్(22), ఏటుకూరు వాసి నరేంద్రకుమార్(25) అక్కడికక్కడే ప్రాణాలు కోల్పోగా, తీవ్ర గాయాలపాలైన రాజేష్(22)ను ఆస్పత్రికి తరలించారు.