టెక్నాలజీ పెరుగుతున్న కొద్ది వాటివల్ల లాభాలతో పాటు నష్టాలు కూడా అదే స్థాయిలో పెరిగిపోతున్నాయి. ముఖ్యంగా సోషల్ మీడియా అభివృద్ది చెందుతున్న కొద్ది దాని వల్ల ఇబ్బంది పడుతున్న సెలబ్రిటీల సంఖ్య కూడా అదే స్థాయిలో పెరుగుతోంది. తాజాగా కోలీవుడ్ హీరోయిన్ లక్ష్మీ మీనన్కు ఇలాంటి పరిస్థితే ఎదురైంది. ట్విట్టర్లో లక్ష్మీ మీనన్ పేరుతో ఓ అకౌంట్ క్రియేట్ చేసిన ఆకతాయిలు అదే అఫీషియల్ అకౌంట్ అంటూ ప్రచారం చేశారు. దీంతో పెద్ద సంఖ్యలో అభిమానులతో పాటు కొంతమంది లక్ష్మీ మీనన్ సన్నిహితులు కూడా ఆ ఖాతాను ఫాలో అయ్యారు.
 
 ఈ విషయం లక్ష్మీ మీనన్ వరకు వెళ్లటంతో అది తన అకౌంట్ కాదంటూ ప్రకటించింది ఈ కోలీవుడ్ బ్యూటీ. ఇప్పటికే ఫేస్బుక్లో అప్పుడప్పుడు అభిమానలుకు అందుబాటులో ఉండే లక్ష్మీ మీనన్ తన పేరుతో క్రియేట్ అయిన ట్విట్టర్ అకౌంట్ అఫీషియల్ కాదంటూ ఓ వీడియో మెసేజ్ను రిలీజ్ చేసింది. కుంకీ, జిగర్తాండ సినిమాలతో మంచి గుర్తింపు తెచ్చుకున్న లక్ష్మీ మీనన్ ఇటీవల మిరుథన్ సినిమాలో హీరోయిన్గా నటించింది. ప్రస్తుతం విజయ్ సేతుపతి సరసన రెక్క సినిమాలో  నటిస్తోంది.


 ఇండియన్ స్క్రీన్ మీద డ్రాక్యులా, ప్రిడేటర్, జాంబీ తరహా సినిమాలు చాలా అరుదు, అలాంటి అరుదైన జానర్‌లో త్వరలో ఓ సినిమా రాబోతోంది. అది కూడా మన సౌత్ ఇండస్ట్రీలో కావటం మరో విశేషం. ఇటీవల తనీఒరువన్ సినిమాతో దేశవ్యాప్తంగా సంచలనం సృష్టించిన జయం రవి మరో ప్రయోగాత్మక చిత్రంతో ప్రేక్షకుల ముందుకు వస్తున్నాడు.
 
 ఒక వైరస్ కారణంగా మృగాలుగా మారిన మనుషులను ఓ వ్యక్తి ఎలా ఎదుర్కొన్నాడనే కథతో రూపొందిన మిరుదన్ సినిమాతో త్వరలోనే థియేటర్లలో సందడి చేయనున్నాడు. సాధారణంగా ఇలా జాంబీ జానర్‌లో తెరకెక్కిన సినిమాలు మన ఇండస్ట్రీలలో కనిపించవు. అయితే ఇటీవల కాలంలో మారుతున్న ప్రేక్షకుల అభిరుచికి తగ్గట్టుగా అంతర్జాతీయస్థాయి సినిమాలు ప్రాంతీయభాషల్లో కూడా వస్తున్నాయి.
 
 జయం రవి, లక్ష్మీ మీనన్ హీరో హీరోయిన్లుగా తెరకెక్కిన ఈ సినిమాతో శక్తి సౌందర్ రాజన్ అనే కొత్త దర్శకుడు పరిచయం అవుతున్నాడు. హాలీవుడ్ స్టార్ విల్ స్మిత్ హీరోగా తెరకెక్కిన ఐయామ్ లెజెండ్ తరహాలో కనిపిస్తున్న ఈ సినిమా దక్షిణాది ప్రేక్షకులను ఏ స్థాయిలో అలరిస్తుందో చూడాలి.