న్యూఢిల్లీ: రాజకీయ కురువృద్ధుడు నారాయణ్‌ దత్‌ తివార్‌(92) ఆరోగ్య పరిస్థితి తీవ్ర విషమంగా ఉన్నట్లు ఉత్తరాఖండ్‌ సీఎం త్రివేంద్ర రావత్‌ తెలిపారు. బ్రెయిన్‌ స్ట్రోక్‌కు గురైన తివారీని కుటుంబసభ్యులు గత ఏడాది సెప్టెంబర్‌ 20న ఢిల్లీలోని ఓ ప్రైవేటు ఆస్పత్రిలో చేర్పించారు. అప్పటి నుంచి అక్కడే చికిత్స పొందుతున్నారు. కీలక అవయవాలు పనిచేయక పోవటంతో ఐసీయూలో ఉంచి చికిత్స అందిస్తున్నారని రావత్‌ చెప్పారు. మంగళవారం ఆస్పత్రికి చేరుకున్న రావత్‌.. తివారీ ఆరోగ్య పరిస్థితిపై వైద్యులను అడిగి తెలుసుకున్నారు. కిడ్నీలు పనిచేయడం లేదనీ, కడుపులో ఇన్‌ఫెక్షన్‌కు వైద్యులు చికిత్స అందిస్తున్నారని తివారీ కొడుకు చెప్పారు. తివారీ మూడుసార్లు ఉత్తరప్రదేశ్‌కు, ఒకసారి ఉత్తరాఖండ్‌కు సీఎంగా పనిచేశారు. ఉమ్మడి ఆంధ్రప్రదేశ్‌కు గవర్నర్‌గా బాధ్యతలు నిర్వర్తించారు. 


 ఫైజాబాద్(యూపీ): గుజరాత్ ముఖ్యమంత్రి, బీజేపీ ప్రధాని అభ్యర్థి నరేంద్ర మోడీపై కాంగ్రెస్ సీనియర్ నేత ఎన్డీ తివారి ప్రశంసలు కురిపించారు. విశ్వ హిందూ పరిషత్(వీహెచ్పీ) నాయకులతో వేదిక పంచుకోవడమే కాకుండా కాషాయపార్టీ నాయకుడిని పొగడ్తల్లో ముంచెత్తారు. అయోధ్యలో నిర్వహించిన ఓ కార్యక్రమంలో తివారి పాల్గొన్నారు. రామజన్మభూమి న్యాస్ అధ్యక్షుడు, వీహెచ్పీ సీనియర్ నేత మహంత్ నృత్య గోపాల్ దాస్లతో కలిసి ఆయన వేదిక పంచుకున్నారు.
 
 ఈ సందర్భంగా మాట్లాడుతూ... గుజరాత్ను అభివృద్ధి చేయడానికి మోడీ ఎంతో పాటు పడ్డారని ప్రశంసించారు. గుజరాత్ను ప్రగతిపథంలో నడిపిన మోడీ బీజేపీ ప్రధాని అభ్యర్థిగా నిలిచారని పేర్కొన్నారు. ఆయన చేపట్టిన వివిధ ప్రాజెక్టులను కొనియాడారు. దేశాభివృద్ధికి మోడీ అధిక ప్రాధాన్యత ఇస్తారని తివారి విశ్వాసం వ్యక్తం చేశారు. మోడీని తివారి ప్రశంసించడాన్ని సమాజ్వాది పార్టీ తప్పుబట్టింది. 2002లో గుజరాత్లో జరిగిన మారణకాండను మరువరాదని సూచించింది.