లాస్‌ఏంజెల్స్‌: ఎయిర్‌పోర్ట్‌లో దిగాల్సిన విమానం ఒక్కసారిగా రద్దీ రోడ్డు మీదికి దూసుకొచ్చేసరికి జనం భీతిల్లిపోయారు. రోడ్డు నిండా కార్లు.. ఇరువైపులా కరెంటు తీగలు.. ఏ కొంచెం అటుఇటైనా పర్యవసానం తీవ్రంగా ఉండేది. వెంట్రుకవాసిలో ప్రమాదం తప్పినా ఆ పైలట్‌ చేసిన పనికి వాహనదారుల గుండెలు గుభేల్‌మన్నాయి. అమెరికాలో అత్యంత జనసమ్మర్థం గల రెండో అతిపెద్ద నగరం లాస్‌ఏంజెల్స్‌లో శుక్రవారం చోటుచేసుకున్న ఈ సంఘటన తాలూకు వీడియోలూ వైరల్‌ అయ్యాయి. అరుదైన ఎమర్జెన్సీ ల్యాండింగ్‌: సెస్నా 172 రకానికి చెందిన తేలికపాటి విమానం జాన్‌ వెయిన్‌ ఎయిర్‌పోర్టు నుంచి టేకాఫ్‌ తీసుకున్న కొద్ది సేపటికే ఇంజన్‌లో లోపం తలెత్తింది. ఎయిర్‌పోర్టుకు తిరిగెళదామని పైలట్‌ అనుకునేలోపే మొత్తానికే పనిచేయడం ఆగిపోయింది. క్రాష్‌ ల్యాండింగ్‌ తప్పదనుకున్నా.. చివరి ప్రయత్నంగా హంటింగ్టన్‌ బీచ్‌ రోడ్డుపై ఎమర్జెన్సీ ల్యాండింగ్‌కు ప్రయత్నించిందామె. వెంట్రుకవాసిలో కార్లను, కరెంటు తీగల్ని దాటుకుంటూ మొత్తానికి సురక్షితంగా ల్యాండ్‌ అయింది. విమానంలో మహిళా పైలట్‌ ఒక్కరే ఉన్నారని, ఈ ఘటనలో రోడ్డుపై ఉన్నవారిలో ఏ ఒక్కరూ గాయపడలేదని, విమాన సర్వీసులకు కూడా ఆటంకం కలుగలేదని ఎల్‌ఏపీడీ, ఏవియేషన్‌ అధికారులు తెలిపారు. అయితే జాగ్రత్త చర్యల్లో భాగంగా విమానం ఎమర్జెన్సీ ల్యాండైన హంటిగ్టన్‌ రోడ్డును కొద్ది గంటలపాటు మూసేశారు. ఇది అత్యంత అరుదైన ఎమర్జెన్సీ ల్యాండింగ్‌ అని, పైలట్‌ అద్భుతం సృష్టించారని కొందరు ఏవియేషన్‌ నిపుణులు వ్యాఖ్యానించారు. ఇంతకీ ఆ మహిళా పైలట్‌ ఎవరన్న విషయాన్ని మాత్రం అధికారులు గోప్యంగా ఉంచారు. ఆమె ఆరెంజ్‌ కంట్రీ ఫ్లైట్‌ క్లబ్‌లో శిక్షణ పొందుతున్నారని, సదరు విమానం జేజీ క్యాపిటల్‌ హోల్డింగ్స్‌ సంస్థకు చెందినదని తెలిసింది.


 బెతుల్: గాలిలో ఎగరాల్సిన విమానం అకస్మాత్తుగా నడిరోడ్డుపై దిగింది. ఈ ఘటన మధ్యప్రదేశ్‌లోని బెతుల్‌లో మంగళవారం ఉదయం జరిగింది. దీంతో రోడ్డుపై ట్రాఫిక్‌ను నిలిపేశారు. శామ్ వర్మ అనే ఎన్నారైకి చెందిన చిన్నపాటి విమానం గాలిలో ఎగురుతుండగా బలమైన గాలులు వీచాయి. వాతావరణం సరిగాలేకపోవడంతో పైలట్ నాలుగు లేన్ల రహదారిపై అత్యవసరంగా దింపేశారు. అందులో ఆయన ఒక్కరే ఉన్నారు. ఆయనకు ఎలాంటి గాయాలు కాలే దు. విమానం సురక్షితంగా దిగేందుకు పోలీసులు రోడ్డుపై ట్రాఫిక్‌ను నిలిపేయడంతో పెద్ద ముప్పు తప్పింది. పైలట్ ముందుగా సప్నా డ్యామ్ వద్ద దిగేం దుకు అనుమతికోరగా భద్రతా కారణాలరీత్యా అనుమతించలేదు. ఈ ఘట నపై డెరైక్టర్ జనరల్ ఆఫ్ సివిల్ ఏవియేషన్ (డీజీసీఏ) విచారణ చేపట్టింది.