‘హుషారు’ ఫేమ్‌ దినేష్‌ తేజ్‌ హీరోగా, శ్వేతా అవస్తీ హీరోయిన్‌గా నటించిన చిత్రం ‘మెరిసే మెరిసే’. పవన్‌ కుమార్‌ .కె దర్శకత్వంలో వెంకటేష్‌ కొత్తూరి నిర్మించిన ఈ సినిమా పోస్ట్‌ ప్రొడక్షన్‌ కార్యక్రమాలు పూర్తయ్యాయి. పవన్‌ కుమార్‌ .కె మాట్లాడుతూ–‘‘కామెడీ, లవ్, ఎమోష¯Œ ్సతో కూడిన చిత్రమిది. ఇటీవల విడుదలైన మా సినిమా థీమ్‌ పోస్టర్, ఫస్ట్‌ లుక్‌కు మంచి స్పందన వచ్చింది’’ అన్నారు. ‘‘సినిమా ఔట్‌పుట్‌ బాగా వచ్చింది. త్వరలోనే విడుదల తేదీని ప్రకటిస్తాం’’ అన్నారు వెంకటేష్‌ కొత్తూరి.

గోపీకృష్ణ, ప్రియాంకా చౌదరి జంటగా నటించిన చిత్రం ‘ఎక్కడికో ఈ అడుగు’. ‘ఎఫెక్ట్స్‌ రాజు’గా చిత్రపరిశ్రమకు సుపరిచితుడైన శ్రవణ్‌ బొనగాని దర్శకత్వంలో అట్లూరి శ్రీనివాస్‌ నిర్మించారు. ‘‘విభిన్న ప్రేమకథా చిత్రమిది. 1990లో జరిగిన వాస్తవ సంఘటన ఆధారంగా గ్రామీణ నేపథ్యంలో ఈ చిత్రాన్ని రూపొందించాం. ప్రస్తుతం పోస్ట్‌ ప్రొడక్షన్‌ కార్యక్రమాలు జరుగుతున్నాయి. త్వరలోనే ఫస్ట్‌ లుక్‌ విడుదల చేస్తాం’’ అని చిత్రవర్గాలు పేర్కొన్నాయి. ఈ చిత్రానికి సంగీతం: దిలీప్‌ బండారి, కెమెరా: ఈశ్వర్‌ ఎల్లుమహంతి.


 ‘ప్రేమంటే ఓ బంధం కాదు.. ప్రేమ అనేది ఒక బాధ్యత’ అని చాటిచెప్పేలా నిర్మించిన చిత్రం ‘ప్రేమాంజలి’. ‘ఓ ప్రేమజంట కథ’ అనేది ఉపశీర్షిక. సుజయ్, శ్వేతానీల్, వినయ్ తేజ్ ప్రధాన పాత్రల్లో ఆర్.వరుణ్ దొరను దర్శకునిగా పరిచయం చేస్తూ శ్రీ వినాయక క్రియేషన్స్ పతాకంపై ఆర్‌వీ నారాయణరావు, ఆర్‌బీ ఆర్య నిర్మించిన ‘ప్రేమాంజలి’ ప్రస్తుతం పోస్ట్ ప్రొడక్షన్ పనులు జరుపుకుంటోంది. ‘‘ప్రేమంటే ఫ్యాషన్‌గా మారిపోతున్న ఈ రోజుల్లో ప్రేమకు గౌరవం కల్పిస్తూ ఈ చిత్రం తెరకెక్కించాం. సినిమా బాగా వచ్చింది. త్వరలోనే పాటలు విడుదల చేస్తాం’’ అని దర్శకుడు అన్నారు. ఈ చిత్రానికి సంగీతం: పీజీ వర్ధన్, కెమేరా: భాస్కర్ దొర్నాల.