సాక్షి, హైదరాబాద్‌: ఎంపీ రఘురామకృష్ణరాజుకు ప్రజా సంఘాల ఆందోళనల సెగ తగిలింది. ఆయన భీమవరానికి రావడానికి చేస్తున్న ప్రయత్నాలను విరమించుకోవాలంటూ ఆదివారం రాత్రి ఏపీలోని పలు ప్రాంతాల్లోని రైల్వేస్టేషన్ల వద్ద ప్రజా సంఘాల నేతలు నిరసన కార్యక్రమాలు చేపట్టారు. చదవండి: మంత్రి బుగ్గన వేసిన ప్రశ్నలకు సమాధానం ఇవ్వగలరా? ‘రఘురామకృష్ణరాజు గో బ్యాక్‌.. గో బ్యాక్‌’ అంటూ విజయవాడ, గుంటూరు రైల్వే స్టేషన్ల వద్ద పెద్దపెట్టున నినాదాలు చేశారు. ఆయనకు వ్యతిరేకంగా సోషల్‌ మీడియాలో పోస్టులు కూడా పెట్టారు. దీంతో హైదరాబాద్‌లోని లింగంపల్లి నుంచి ఆదివారం రాత్రి రైల్లో భీమవరం బయలుదేరిన రఘురామ.. ప్రజా సంఘాల నిరసనల నేపథ్యంలో మధ్యలో బేగంపేటలో రైలు దిగి వెనక్కి వెళ్లిపోయారు.


 గుడుంబా నిర్మూలన కోసం ప్రవేశపెడతామన్న సర్కారు
 * ప్రతిపక్షాలు, ప్రజా సంఘాల ఆందోళనతో ‘తాత్కాలిక’ వెనకడుగు
 * ప్రజల్లో చర్చకు పెట్టి తరువాత అధికారికంగా గ్రామాల్లోకి పంపే యోచన
 సాక్షి, హైదరాబాద్: రాష్ట్రంలో గుడుంబాను అరికట్టేందుకు ‘చౌక మద్యం’ ప్రవేశపెడతామన్న రాష్ట్ర ప్రభుత్వం.. దీనిపై ప్రతిపక్షాలు, సంఘాల నుంచి వ్యతిరేకత వ్యక్తం కావడంతో పిల్లిమొగ్గలు వేస్తోంది. ఈ సంవత్సరానికి చౌక మద్యం ఉండదని, పాత చీప్ లిక్కర్ విక్రయాలే కొనసాగుతాయని స్పష్టం చేసింది.
 
 అయితే ఈ ప్రకటన వెనుక ‘గుడుంబాకు బదులు చౌక మద్యం ప్రవేశపెట్టాలి’ అనే రీతిలో ప్రజలను మానసికంగా సిద్ధం చేసే ఆలోచన సర్కారుకు ఉన్నట్లు తెలుస్తోంది. బుధవారం జరిగిన కేబినెట్ భేటీలో మంత్రుల అభిప్రాయాల పేరుతో ‘ఈ సంవత్సరం పాత విధానాన్నే కొనసాగిస్తున్నట్లు’ సీఎం కేసీఆర్ చెప్పారు. ప్రతిపక్షాలకు ఆయుధం ఇవ్వకుండా ప్రజల్లో చర్చకు పెట్టి.. ఆ తరువాత అనుకున్న విధంగా చౌకమద్యాన్ని రిటైల్ దుకాణాలకు సరఫరా చేసే యోచన ప్రభుత్వానికి ఉన్నట్లు తెలుస్తోంది.
 
 ఈ పరిస్థితుల్లో ప్రస్తుతం విక్రయిస్తున్న చీప్ లిక్కర్‌నే కొంతకాలం పాటు విక్రయించాలని, క్రమక్రమంగా చౌక మద్యాన్ని ప్రవేశపెట్టాలని సీఎం సహా ఉన్నతాధికారులు నిర్ణయించినట్లు సమాచారం. అందుకే సీఎం మీడియా సమావేశంలో ఎక్కడా చీప్‌లిక్కర్‌ను తీసుకురావడం లేదని కుండబద్దలు కొట్టినట్లు చెప్పలేదు. 2016 జూన్ 30 వరకు అంటే 9 నెలలు మాత్రమే మంత్రివర్గం ఆమోదించిన నూతన మద్యం పాలసీ ఆచరణలో ఉంటుంది.
  
 మండలం యూనిట్‌కు కారణమదే!
 చౌక మద్యం ఆలోచనతోనే మండలాలు యూనిట్‌గా మద్యం పాలసీకి రూపకల్పన జరిగింది. మండలం లెసైన్సు పొందిన వారే గ్రామాల్లో బి-లెసైన్సు దుకాణాలు ఏర్పాటు చేసుకొని విక్రయించుకునే వెసులుబాటు కొత్త విధానంలో లభించనుంది. తద్వారా గుడుంబా విక్రయాలను నిలువరించే పనిని లెసైన్సుదారులకు అప్పగించాలని భావించారు. తాజాగా చౌకమద్యంపై సర్కారు వెనక్కి తగ్గినప్పటికీ మండలం యూనిట్‌గా లెసైన్సు, బి-లెసైన్సు దుకాణాల్లో పాత పద్ధతిలోనే రూ.60, రూ.35 ధరలకే చీప్ లిక్కర్ విక్రయిస్తారు.
  
 వెనకడుగు తాత్కాలికమే!
 రాష్ట్రంలో గుడుంబాకు విరుగుడుగా చౌకమద్యం ప్రవేశపెడతామని సీఎం 6 నెలలుగా చెబుతూ వచ్చారు. ఈ నేపథ్యంలో 20 ఏళ్ల క్రితం రద్దు చేసిన సారాను తెరపైకి తేవాలని తొలుత భావించారు. కానీ దీనిపై వ్యతిరేకత వ్యక్తమవుతుందేమోనన్న భావనతో కొం దరు అధికారులను ఇతర రాష్ట్రాలకు పంపి చౌక మద్యంపై అధ్యయనం చేయించారు. మహారాష్ట్రతో పాటు పలు రాష్ట్రాల్లో రూ.20 లోపు ధరలో 90ఎంఎల్ మద్యం అందుబాటులో ఉందని తేలడంతో గుడుంబా విక్రయించే ధర(రూ.10)కే మద్యం విక్రయించాలని సీఎం కేసీఆర్ నిర్ణయించారు. అయితే అది వీలుకాదని అధికారులు చెప్పడంతో రూ.15కు 90ఎంఎల్ మద్యం అందుబాటులో ఉంచాలని సూచించారు.
 
 ఈ మేరకు ప్రభుత్వ ముఖ్య కార్యదర్శి అజయ్‌మిశ్రా, ఎక్సైజ్ కమిషనర్ చంద్రవదన్ పలుమార్లు సీఎం, సీఎస్‌లతో చర్చలు జరిపారు. ఆరు డిస్టిలరీలతో మాట్లాడి అక్టోబర్ ఒకటి కల్లా చీప్‌లిక్కర్‌ను సరఫరా చేసేలా అన్ని ఏర్పాట్లు చేశారు. అయితే చౌక మద్యంపై కల్లుగీత కార్మిక సంఘాలు, మహిళా సంఘాల నుంచి వచ్చిన విజ్ఞప్తుల నేపథ్యంలో... ఉన్నతస్థాయిలో చర్చలు జరిపి, చౌక మద్యం అంశాన్ని తాత్కాలికంగా పక్కనపెట్టాలనే నిర్ణయానికి వచ్చారు.


 చిక్కబళ్లాపురం : బయలు సీమ ప్రాంతాలకు శాశ్వత నీటి వనరులు కల్పించాలంటూ సోమవారం చిక్కబళ్లాపురంలో ఏడవ జాతీయరహదారిపై ప్రజా సంఘాలు ఆందోళన చేపట్టాయి. జిల్లా శాశ్వత నీరావరి సమితి, జిల్లా రైతు సంఘం, మల్బరీ సమితి, ఒక్కలిగ సేనె, మహిళా సంఘటనల నేతృత్వంలో ఉదయం పది గంటల నుంచి మధ్యాహ్నం రెండు గంటల వరకు రాస్తారోకో నిర్వహించారు. రైతులు తమ ట్రాక్టర్లను రోడ్డుకు అడ్డంగా పెట్టి వాహనాల రాకపోకలను అడ్డుకున్నారు. దీంతో కిలోమీటర్ల మేర వాహనాలు నిలిచిపోయాయి.
 
 ఈ సందర్భంగా శాశ్వత నీరావరి పోరాట సమితి అధ్యక్షుడు ఆంజనేయరెడ్డి మాట్లాడుతూ....  బడ్జెట్‌లో ప్రభుత్వం నీరావరి ప్రాజెక్ట్ కోసం ఏ మాత్రం నిధులు కేటాయించలేదని మండిపడ్డారు. ఇప్పటికే బయలుసీమ జిల్లాల్లో భూగర్భ జలాలు అడుగంటి నీటిలో ఫ్లోరైడ్ శాతం గణనీయంగా పెరగడంతో తాగేందుకు సైతం పనికిరాకుండా పోతోందని ఆందోళన వ్యక్తం చేశారు. బయలు సీమ జిల్లా వాసులను ఆదుకునేందుకు తక్షణం డాక్టర్ పరమశివయ్య నివేదికను అమలు చేయాలని డిమాండ్ చేశారు. కార్యక్రమంలో ఒక్కలిగ సేనె రాష్ర్ట సంచాలకుడు యలువహళ్లి రమేష్, జిల్లా మల్బరీ సమితి అధ్యక్షుడు సొణ్ణేగౌడ, కరవే రాష్ర్ట సంచాలకుడు చలపతి, జిల్లా రైతు సంఘం అధ్యక్షుడు భక్తరహళ్లి బైరేగౌడ, లక్ష్మిదేవమ్మ, రాధమ్మ, అంతర్జాతీయ అథ్లెట్ మంచనబలె శ్రీనివాస్, రైతులు పాల్గొన్నారు.