‘దృశ్యం’ హిందీ రీమేక్‌లో పోలీస్‌గా నటించిన తబు మరో సారి ఓ సౌత్ రీమేక్‌లో లాఠీ ఝళిపించడానికి సిద్ధమవుతున్నారు. చిన్న సినిమాగా వచ్చి, పెద్ద సినిమా రేంజ్‌లో ఆ మధ్య బాక్సాఫీస్ దగ్గర వసూళ్లు కురిపించిన చిత్రం ‘క్షణం’. సస్పెన్స్, థ్రిల్లర్ నేపథ్యంలో నూతన దర్శకుడు రవికాంత్ పేరేపు తెరకెక్కించిన ఈ చిత్రానికి నటుడు అడివి శేష్ కథ-స్క్రీన్‌ప్లే అందించిన విషయం తెలిసిందే.
  
  ఈ సినిమా సాధించిన వసూళ్లు చూసి బాలీవుడ్ కూడా ఈ చిత్రాన్ని రీమేక్ చేయడానికి సన్నాహాలు చేస్తోంది. తెలుగులో అనసూయ పోషించిన నెగటివ్ టచ్ ఉన్న పాత్ర కు హిందీ వెర్షన్‌లో తబును ఖరారు చేశారు దర్శక-నిర్మాతలు. అనసూయ పోషించిన పోలీస్ క్యారెక్టర్‌లో అనేక వేరియేషన్స్ ఉండటంతో ఈ పాత్రకు తబు వెంటనే గ్రీన్ సిగ్నల్ ఇచ్చారట. పైగా హిందీలో తబు పోలీస్ పాత్రకు మరింత ప్రాధాన్యం ఉండేలా స్క్రిప్ట్‌లో మార్పులు చేర్పులు చేస్తున్నారు. అడివి శేష్ పాత్రను సల్మాన్‌ఖాన్ పోషించే అవకాశం ఉందని ఒక వార్త ముంబయ్‌లో షికారు చేస్తోంది.