రాజమహేంద్రవరం సిటీ :
 సిఫి ఆలిండియా జూనియర్‌ ర్యాంకింగ్‌ బ్యాడ్మింటన్‌ టోర్నమెంట్‌–2016 అండర్‌–17 బాయ్స్‌ డబుల్స్‌ విభాగంలో రాజమహేంద్రవరానికి చెందిన కర్రి సాయి పవన్‌ బంగారు పతకం సాధించాడు. ఈ నెల 21–28 తేదీల మధ్య తిరుపతిలో జరిగిన  ఈ పోటీల్లో పాల్గొన్న సాయి పవన్‌ అండర్‌–19 విభాగంలో సైతం పాల్గొని కాంస్య పతకం సాధించాడని అతడి తండ్రి నాగేశ్వరరావు మంగళవారం ఒక ప్రకటనలో తెలిపారు. అండర్‌–17 విభాగంలో త్రివేండ్రం, హైదరాబాద్, తిరుపతిల్లో జరిగిన జూనియర్‌ ర్యాంకింగ్‌ టోర్నమెంట్‌లలో విజేతగా నిలిచి హ్యాట్రిక్‌ సాధించాడన్నారు. సాయిపవన్‌ను వైఎస్సార్‌సీపీ యువజన విభాగం రాష్ట్ర అధ్యక్షుడు జక్కంపూడి రాజా అభినందించారు.
  


 ఆలిండియా ర్యాంకింగ్ బ్యాడ్మింటన్ టోర్నమెంట్
  
 సాక్షి, హైదరాబాద్: ఆలిండియా ర్యాంకింగ్ జూనియర్ బ్యాడ్మింటన్ టోర్నమెంట్‌లో అండర్-17 బాలుర డబుల్స్ విభాగంలో సాయి కృష్ణ పొదిలి (తెలంగాణ)-కర్రి సాయి పవన్ (ఏపీ) జోడి విజేతగా నిలిచింది. తిరుపతిలో శనివారం ముగిసిన ఈ టోర్నమెంట్ ఫైన ల్లో సాయి కృష్ణ-సాయి పవన్ ద్వయం 19-21, 21-14, 21-10తో ఖదీర్ మొయినుద్దీన్-విష్ణువర్ధన్ గౌడ్ (తెలంగాణ) జంటపై విజయం సాధిం చి టైటిల్‌ను కై వసం చేసుకుంది.
  
 అండర్-17 బాలికల డబుల్స్ ఫైనల్లో సామియా ఫరూఖి-పుల్లెల గాయత్రి (తెలంగాణ) జోడి 19-21, 17-21తో అశ్విని భట్- మిథులా (కర్ణాటక) జంట చేతిలో ఓడిపోయి రన్నరప్‌తో సరిపెట్టుకుంది. అండర్-17 బాలికల సింగిల్స్ విభాగంలో హైదరాబాద్ అమ్మాయి ప్రాశి జోషి రన్నరప్‌గా నిలిచింది. ఎయిరిండియాకు ప్రాతినిధ్యం వహిస్తున్న ప్రాశి జోషి ఫైనల్లో 19-21, 14-21తో ఆకర్షి కశ్యప్ (చత్తీస్‌గఢ్) చేతిలో ఓడిపోయింది.
 
 బాలుర ఫైనల్స్‌లో కార్తికేయ గుల్షాన్ (ఎయిరిండియా) 21-15, 19-21, 21-13తో మైస్నమ్ (మణిపూర్)పై గెలుపొంది విజేతగా నిలిచాడు. అండర్-19 బాలుర సింగిల్స్ విభాగంలో ఎయిరిండియాకు ఆడిన తెలుగు ప్లేయర్ ఎం.కనిష్క్ రన్నరప్‌తో సరిపెట్టుకున్నాడు. ఫైనల్లో కనిష్క్ 15-21, 15-21తో లక్ష్య సేన్ (ఉత్తరాఖండ్) చేతిలో ఓడిపోయాడు. బాలికల సింగిల్స్ ఫైనల్లో ఆకర్షి కశ్యప్ (చత్తీస్‌గఢ్) 17-21, 21-7, 21-13తో శిఖా (కర్ణాటక)ను ఓడించింది. అండర్-19 బాలుర డబుల్స్ ఫైనల్లో కృష్ణ ప్రసాద్ (ఏపీ)-ధ్రువ్ జంట 21-13, 21-12తో గౌస్ షేక్- బషీర్ సయ్యద్ (ఏపీ) జంటపై నెగ్గింది. బాలికల డబుల్స్ ఫైనల్లో మహిమ- శిఖా గౌతమ్ (పీఎన్‌బీ) జంట 18-21, 21-15, 21-17తో అశ్విని- మిథులా (కర్ణాటక) జోడిపై నెగ్గింది. అండర్-19 మిక్స్‌డ్ డబుల్స్ ఫైనల్లో కృష్ణ ప్రసాద్ (ఏపీ)- మహిమ (కర్ణాటక) జోడి 21-16, 21-14తో ధ్రువ్- కుహు గార్గ్ (ఉత్తరాఖండ్)పై గెలిచింది.