ముంబై: దక్షిణాదిన అగ్రస్థానంలో తారగా కొనసాగుతున్న తరుణంలో బాలీవుడ్‌లోకి అడుగుపెట్టి తొలిప్రయత్నంలోనే పరాజయాన్ని చవిచూసినా తాను నిరాశ పడలేదని అంటోంది తమన్నా. తెలుగు, తమిళ చిత్రాలు చేతినిండా ఉన్నప్పుడే బాలీవుడ్‌లోకి అడుగుపెట్టి అజయ్ దేవ్‌గణ్‌తో ‘హిమ్మత్‌వాలా’ సినిమా చేసిన విషయం తెలిసిందే. 80వ దశకంలో శ్రీదేవి, జితేంద్ర నటించిన సినిమాను అదే పేరుతో దర్శకుడు సాజిత్‌ఖాన్ రీమేక్ చేసిన ఈ సినిమా బాక్సాఫీసు వద్ద బోల్తా కొట్టింది. ఈ విషయమై తమన్నా మాట్లాడుతూ... ‘రీమేక్ చిత్రాలను బాలీవుడ్ అభిమానులు ఆదరిస్తున్నప్పటికీ 1980 నాటి చిత్రాలను రీమేక్ చేయడం ప్రేక్షకులను ఆకట్టుకోలేకపోయింది. సినిమా కూడా అదే రీతిలో సాగడాన్ని ప్రేక్షకులు స్వాగతించలేకపోయారు.
 
 ‘హిమ్మత్‌వాలా’లో నటించడం ద్వారా ఓ పెద్ద అడుగు వేశానని భావించాను. సినిమా అనుకున్న స్థాయిలో విజయం సాధించలేదు. అయినా నేను నిరాశపడలేదు. సినిమా ఎంపిక ఎలా ఉండాలనే విషయమై ఓ పాఠం నేర్చుకున్నాననిపించింది. ప్రతి నటుడికి, నటికి ఇలాంటి అనుభవం ఎదురవుతూనే ఉంటుంది. కెరీర్‌లో ఎన్నో విజయాలు, అపజయాలు ఎదుర్కొన్నాను. దీనిని కూడా అదేవిధంగా భావించాన’ని చెప్పింది. మళ్లీ సాజిద్‌ఖాన్ దర్శకత్వంలోనే ‘హమ్‌షకల్’తో మళ్లీ ప్రేక్షకుల ముందుకు వస్తోంది. ఈ సినిమా జూన్ 20 విడుదల కానుంది. మళ్లీ సాజిద్‌తోనే ఎందుకు పనిచేస్తున్నారు? అని పాత్రికేయులు అడిగిన ప్రశ్నకు సమాధానమిస్తూ... చేసిన దర్శకుడితోనే మళ్లీ సినిమా చేయడం తప్పేమీ కాదే... ఆయనతో పనిచేయడంలో నాకెలాంటి భయం, ఇబ్బందీ లేద’ని చెప్పింది. జీవితంలో ఎవరైనా ఎత్తుపల్లాలను ఎదుర్కొనక తప్పదని, ఈసారి మా ప్రయత్నం తప్పక సత్ఫలితాలనిస్తుందని ధీమా వ్యక్తం చేసింది.


  లిప్ కిస్సులకు నో అంటోంది తమన్న. తమిళం, తెలుగు భాషలలో అగ్రస్థాయికి చేరుకున్న ఈ బ్యూటీ హిమ్మత్‌వాలా చిత్రంతో బాలీవుడ్‌లో కూడా రంగ ప్రవేశం చేసింది. అక్కడే తొలి చిత్రం ఫ్లాప్ అయినా ప్రస్తుతం అదే చిత్ర దర్శకుడు సాజిత్ ఖాన్ తెరకెక్కిస్తున్న హంస కల్ చిత్రంలో తమన్నానే హీరోయిన్‌కావడం విశేషం. కోలీవుడ్‌లో వీరం చిత్రం హిట్ అయినా కొత్తగా అవకాశాలు రావడంలేదు. అయితే టాలీవుడ్‌లో, బాలీవుడ్ చిత్రాలతో ఈ మిల్క్ బ్యూటీ బిజీగానే ఉంది. తమన్నా మాట్లాడుతూ హిమ్మత్‌వాలా చిత్ర దర్శక, నిర్మాతలు తనపై నమ్మకంతో హీరోయిన్‌గా ఎన్నుకున్నారన్నారు. అయితే ఆ చిత్రం ఆశించిన విజయం సాధించలేదన్నది వాస్తవమే. 
  
  అయినా అది తన తొలి హిందీ చిత్రం మాత్రం కాదని అంతకు ముందే హిందీలో నటించానని చెప్పింది. అదే విధంగా దక్షిణాది చిత్ర పరిశ్రమలో తనకంటూ ఒక మార్కెట్ ఉందని పేర్కొంది. నిజం చెప్పాలంటే రాత్రికి రాత్రి స్టార్ డమ్ పొందిన నటిని కాదని చెప్పింది. ఈ స్థాయికి చేరుకోవడానికి చాలా ఏళ్లు శ్రమించానని పేర్కొంది. పలు చిత్రాలు అందులోను చాలా చిత్రాలు విజయం సాధించడం వల్లే ఉన్నత స్థాయికి ఎదగగలిగానని చెప్పింది. ఉత్తరాది అభిమానులకు దక్షిణాది అభిమానులకు అభిరుచిలో వ్యత్యాసం ఉందని తెలిపింది. ఇక్కడ కాస్త బొద్దుగా ఉండే హీరోయిన్లను కోరుకుంటారని బాలీవుడ్‌లో మాత్రం స్లిమ్‌గా ఉండాలని అక్కడ అభిమానుల మనసు దోచుకోవడానికి నాజూగ్గా తయారయ్యే ప్రయత్నం చేస్తున్నానని చెప్పింది. 
  
  ఒక చిత్రం అంగీకరించే ముందు షరతులు చాలా ముఖ్యం అని అంది. ప్రధానంగా ఈత దుస్తులు ధరించను, లిప్ కిస్సులకు అంగీకరించను వంటి విషయాలను ముందే దర్శక నిర్మాతలకు చెప్పేస్తానంది. దీనివల్ల షూటింగ్ స్పాట్‌లో ఎలాంటి సమస్యలు తలెత్తే అవకాశం ఉండదని చెప్పింది. నటిగా తనకంటూ కొన్ని హద్దులున్నాయని వాటిని మీరడం జరగదని పేర్కొంది. అదే విధంగా తాను అందం కోసం శస్త్ర చికిత్స చేయించుకున్నట్లు జరుగుతున్న ప్రచారంలో నిజం లేదని తన తల్లిదండ్రులు కూడా చాలా అందంగా ఉంటారు కాబట్టి సహజంగానే తాను అందగత్తెనని అంది. అలాగే తన ఆలోచనలు అందంగా ఉంటాయని అందువల్ల తాను అందం కోసం ఎలాంటి శస్త్ర చికిత్స చేయించుకోవలసిన అవసరం లేదని తమన్న పేర్కొంది.