తిరుపతి లీగల్‌: తమిళనాడు తిరువణ్ణా­మలై జిల్లా పోలూరు తాలూకా, ఇరుంజీ గ్రా­మా­నికి చెందిన ఎర్రచందనం స్మగ్లర్‌ ధనపాల్‌ రాజా కు ఐదేళ్లు జైలు శిక్ష, రూ.పది లక్షల జరిమానా విధిస్తూ రాష్ట్ర ఎర్రచందనం కేసుల విచారణ సెషన్స్‌ కోర్టు జడ్జి నాగరాజు సోమవారం తీర్పు చెప్పినట్లు ఆ కోర్టు ఏపీపీ కె.నగేష్‌ తెలిపారు. కోర్టు కానిస్టేబుళ్లు నందకుమార్, శివకుమార్‌ తెలిపిన కేసులోని వివరాల మేరకు.. శేషాచలం అటవీ ప్రాంతంలోని ఎర్రచందనం దుంగల రక్షణ కోసం ఎస్‌వీఎన్‌పీ శ్యామల రేంజ్‌ నాగపట్ల సెక్షన్‌ అసిస్టెంట్‌ బీట్‌ ఆఫీసర్‌ హరిబాబు, సిబ్బంది 2016 ఆగస్టు 29వ తేదీ సాయంత్రం కూంబింగ్‌ నిర్వహించారు. చెట్లు నరుకుతున్న శబ్దం విని పోలీసులు తోళ్లగుంట రిజర్వు ఫారెస్ట్‌ వద్దకు వెళ్లగా సుమారు 20 నుంచి 30 మంది స్మగ్లర్లు పోలీసులపై మారణాయుధాలతో దాడికి పా­ల్ప­డ్డారు. దీంతో పోలీసులు తమ రక్షణ కోసం ఉన్నతాధికారుల ఆదేశాలతో రెండు రౌండ్లు గాలిలోకి కాల్పులు జరి­పారు. దీంతో స్మగ్లర్లు పరారయ్యారు. 2016 ఆగస్టు 30వ తేదీ రాత్రి పోలీసులు అదే ప్రాంతంలో కూంబింగ్‌ నిర్వహించి నిందితుడు ధనపాల్‌ రాజాని అదుపులోకి తీసుకున్నారు.  అతన్ని కోర్టులో హాజరుపరిచారు.  కేసు పూర్వాపరాలు పరిశీలించిన జడ్జి నిందితుడు ధనపాల్‌ రాజాకు శిక్ష విధిస్తూ తీర్పు చెప్పారు. జరిమానా సొమ్ము చెల్లించని యెడల మరో రెండేళ్లు  అధికంగా శిక్ష అనుభవించాల్సి ఉంటుందని తీర్పులో పేర్కొన్నారు. 


 చిత్తూరు: ఎర్రచందనం స్మగ్లింగ్‌ చేస్తున్న తమిళ కూలీలు మరోసారి రెచ్చిపోయారు. శేషాచలం అడవుల్లో కూంబింగ్‌ నిర్వహిస్తున్న స్పెషల్‌ టాస్క్‌ఫోర్స్‌ పోలీసులపై కూలీలు బుధవారం రాళ్ల దాడి చేశారు. దీంతో అప్రమత్తమైన పోలీసులు ముగ్గురు తమిళ కూలీలను అరెస్ట్‌ చేశారు.
 
 వారి వద్ద నుంచి 67 ఎర్రచందనం దుంగలు స్వాధీనం చేసుకున్నారు. సుమారు 100 మంది తమిళ కూలీలు ఉన్నట్లు గుర్తించిన పోలీసులు పరారైన వారి కోసం ముమ్మరంగా గాలింపు చేస్తున్నారు. విషయం తెలుసుకున్న పోలీసు ఉన్నతాధికారులు సంఘటనా స్థలానికి చేరుకొని పరిస్థితిని సమీక్షిస్తున్నారు.