తండ్రుల్లో ఉండే పొగతాగే అలవాటు పిల్లల పాలిట శాపంలా పరిణమిస్తోంది. బ్రాడ్‌ఫోర్ట్‌ యూనివర్సిటీ అధ్యయనం ప్రకారం తల్లిదండ్రుల్లో పొగతాగే అలవాటు ఉంటే పిల్లలకు క్యాన్సర్లు... అందునా ప్రధానంగా ల్యుకేమియా వచ్చే అవకాశం ఎక్కువని తేలింది. దీనికి కారణాన్ని కూడా శాస్త్రవేత్తలు చెబుతున్నారు. తమ జన్యువులను పిల్లలకు అందించే వీర్యకణాల్లోని డీఎన్‌ఏ... పొగవల్ల దెబ్బతింటుంది. దాంతో లోపభూయిష్టమైన డీఎన్‌ఏ వల్ల పిల్లల్లో క్యాన్సర్‌ అవకాశాలు ఎక్కువ. అయితే ఈ రిస్క్‌ను తప్పించుకునేందుకు ఒక ఉపాయం కూడా ఉంది. దంపతులు గర్భధారణకు ప్లాన్‌ చేసుకున్న సమయం కంటే... కనీసం మూడు నెలల ముందే పొగతాగే అలవాటు మానేస్తే ఆరోగ్యకరమైన పిల్లలు పుట్టే అవకాశం ఉందని చెబుతున్నారు ఈ పరిశోధనల్లో పాల్గొన్న డాక్టర్‌ డయానా యాండర్సన్‌. ఒక వీర్యకణం ఉద్భవించాక అది పూర్తిస్థాయిలో పరిణతి చెందేందుకు కనీసం మూడు నెలల సమయం అవసరం. అందుకే కనీసం మూణ్ణెల్ల పాటు పొగతాగే అలవాటుకు దూరంగా ఉంటే డీఎన్‌ఏ దెబ్బతిన్న వీర్యకణాల స్థానంలో ఆరోగ్యకణాలు వస్తాయి కాబట్టి పిల్లల్లో క్యాన్సర్‌ అభివృద్ధి చెందే అవకాశాలు గణనీయంగా తగ్గిపోతాయంటున్నారామె. తమ పిల్లలు ఆరోగ్యంగా ఉండటానికైనా పొగతాగకుండా ఉండాలని ఈ అధ్యయనం చెబుతోంది.  


 
 లండన్: సాధారణంగా పిల్లల ఆలనాపాలనా అంతా తల్లే చూస్తుంది. చంటి పిల్లలు రాత్రిళ్లు ఏడ్చినా, నిద్రపోకుండా అల్లరి చేసినా లాలించో, ఆడించో జో కొట్టి నిద్ర పుచ్చడం, నేపీలు మార్చడం వంటి బాధ్యతలను తల్లులే నిర్వర్తిస్తారు. అయితే ప్రస్తుతం ట్రెండ్ మారింది. ఒకప్పుడు గుర్రుపెట్టి నిద్రపోయే నాన్నలు.. ఇప్పుడు రాత్రిళ్లు పిల్లల నేపీలు మార్చే పనిలో పడి నిద్రను మరచిపోతున్నారట.
 
 
 బ్రిటన్‌లో అర్ధరాత్రి పూట చంటిబిడ్డల నేపీలు మార్చేందుకు తల్లుల కంటే తండ్రులే అధికంగా నిద్రలేస్తున్నారట. ప్రతి పది మంది తండ్రుల్లో ఏడుగురు.. పిల్లల ఆలనాపాలనా చూసేందుకు రాత్రిపూట నిద్ర లేస్తున్నట్లు ఓ సర్వేలో వెల్లడైంది. అదే తల్లుల విషయానికి వస్తే ప్రతి ముగ్గురిలో ఇద్దరు మాత్రమే ఆ బాధ్యత తీసుకుంటున్నట్లు తేలింది. మొత్తం మీద నాన్నల పాత్ర క్రమేపీ పెరుగుతోందని తాజా సర్వే వెల్లడించింది.