నంద్యాల ఘనీకృత వీర్య కేంద్రం రంకేస్తోంది. మేలు రకం ఆబోతుల నుంచి నాణ్యమైన వీర్యాన్ని సేకరిస్తూ ఏటా లక్ష్యాన్ని సాధిస్తోంది. అంతరిస్తున్న అరుదైనపశుజాతులను ఉత్పత్తి చేయడంలో కీలక పాత్రపోషిస్తోంది.  ఏటా 10 లక్షల నుంచి 20 లక్షల వరకు డోస్‌ల వీర్యాన్ని ఉత్పత్తి చేస్తూ రాష్ట్రంలోనే ప్రథమ స్థానంలో నిలుస్తోంది.  ఎక్కడ లేని విధంగా  10 జాతుల పశువుల వీర్యాన్ని సేకరించి, భద్రపరిచి అవసరమైన జిల్లాలతో పాటు ఇతర రాష్ట్రాలకు  సరఫరా చేస్తూ అరుదైన గుర్తింపు పొందిన నంద్యాల ఘనీకృత వీర్యకేంద్రంపై ప్రత్యేక కథనం సాక్షి, కర్నూలు : రాష్ట్రంలో ఎక్కడా లేని విధంగా నంద్యాల ఘనీకృత వీర్య కేంద్రంలో పలు జాతుల పశువుల నుంచి వీర్యాన్ని సేకరిస్తున్నారు. పట్టణంలోని కడప–కర్నూలు జాతీయ రహదారి పక్కన నూనెపల్లెలోని  15.27 ఎకరాల విస్తీర్ణంలో ఆంధ్రప్రదేశ్‌ పశు గణనాభివృద్ధి సంస్థ, ఘనీకృత వీర్యకేంద్రం ఉంది. 1976 డిసెంబర్‌ 7న ఈ కేంద్రాన్ని ప్రారంభించారు. ఇందులో డిప్యూటీ డైరెక్టర్, అసిస్టెంట్‌ డైరెక్టర్‌తో పాటు ముగ్గురు వెటర్నరీ అసిస్టెంట్‌ సర్జన్‌లు, సిబ్బంది పని చేస్తున్నారు. ఘనీకృత వీర్య కేంద్రానికి చెందిన భవనాలు ఐదు ఎకరాల్లో ఉండగా, మిగతా 10.27 ఎకరాల్లో ఆబోతులకు అవసరమైన సూపర్‌ నేపియర్, కాకిజొన్న, గనిగడ్డి లాంటి నాణ్యమైన పశుగ్రాసాన్ని సాగు చేస్తున్నారు. వీర్య నాశికలను సరైన సమయంలో ఉత్పత్తి చేసి సరఫరా చేయడం. నిరంతరం వీర్య నాణ్యతను పరిశీలిస్తూ గవర్నమెంట్‌ ఆఫ్‌ ఇండియా సూచించిన మినిమం స్ట్రాడెడ్స్‌ ప్రొటోకాల్‌ను పాటించడం ఈ కేంద్రం ముఖ్య ఉద్దేశం. 1982లో ఘనీకృత పశువీర్యాన్ని నంద్యాలలోనే ఉత్పత్తి చేయడం ప్రారంభించారు. ఇక్కడ ఉన్న ఆబోతులను బయోసెక్యూలర్‌ జోన్‌లో ఉంచి వాటికి క్రమం తప్పకుండా టీకాలు వేసి ఎటువంటి వ్యాధులు రాకుండా జాగ్రత్త వహిస్తారు. ఈ కేంద్రంలో ఉత్పత్తి చేసిన వీర్యనాశికలు మన రాష్ట్రంలోని జిల్లాలకే కాకుండా తమిళనాడు, తెలంగాణ, కేరళ, కలకత్తా, భోపాల్, మధ్యప్రదేశ్‌ రాష్ట్రాలకు సరఫరా చేస్తున్నారు. 2000లో ఈ కేంద్రం అభివృద్ధి చెందడంతో ఆంధప్రదేశ్‌ పశుగణనాభివృద్ధి సంస్థలో చేర్చారు.    నాణ్యమైన వీర్య ఉత్పత్తి ఇలా..  ఒక్కొక్క వీర్యనాశికలో 0.25 ఎం.ఎల్‌. వీర్యం ఉంటుంది. అందులో దాదాపుగా 2కోట్ల వీర్యకణాలు ఉంటాయి. వీర్యాన్ని సేకరించిన తర్వాత దానిని పరీక్షించి భద్రపరుస్తారు. ఉత్పత్తి చేసిన వీర్యంతో పశువుకు గర్భదారణ చేసిన అనంతరం పశువు అనారోగ్యానికి గురి కాకుండా చూస్తారు. వీర్యంలో నిర్దేశించిన కణాల శాతం కచ్చితంగా ఉండేలా చూస్తారు.  అనంతరం ఈ వీర్యాన్ని విశాఖపట్నంలోని ఆండ్రాలజీ ల్యాబోరేటరీకి పంపి నాణ్యతను పరీక్షించి అనంతరం ఇక్కడ నుంచి ఇతర జిల్లాలు, రాష్ట్రాలకు సరఫరా చేస్తారు.    సంస్థ సాధించిన విజయాలు..  2007లో మానిటరింగ్‌ యూనిట్‌చే నాణ్యమైన వీర్యాన్ని ఉత్పత్తి చేయడంలో ఏ–గ్రేడ్‌ సాధించింది. 2010లో బీ–గ్రేడ్‌ను సాధించింది.   2013లో సెంట్రల్‌ మానిటరింగ్‌ యూనిట్‌ వారు నంద్యాల ఘనీకృత వీర్యకేంద్రానికి ఏ–గ్రేడ్‌ రెండవ సారి ప్రదానం చేశారు. ఈ సంవత్సరంలోనే నంద్యాల నుంచి జేకే ట్రస్ట్‌ ద్వారా అదిలాబాద్, మెదక్, నిజామాబాద్‌లతో పాటు కర్ణాటక రాష్ట్రంలోని బాసరా, తమిళనాడు రాష్ట్రాలకు వీర్యనాశికులు సరఫరా చేసింది.   2016–17లో సెంట్రల్‌ మానిటరింగ్‌ యూనిట్‌ నుంచి మూడవసారి నాణ్యమైన వీర్య ఉత్పత్తిలో ఏ–గ్రేడు సాధించింది.        

బంగారం.. వజ్రాభరణాలే కాదు.. ‘సంతాన భాగ్యాన్ని’ ప్రత్యేక  ‘క్రయో ప్రిజర్వేషన్‌’ బ్యాంకుల్లో భద్రపరిచే సౌకర్యం సిటీలో అందుబాటులోకి వచ్చింది. మీ కలల ప్రతిరూపాలను సిద్ధం చేసే అండాలనూ పదికాలాల పాటు సురక్షితంగా ఉంచే ఎగ్‌ బ్యాంక్‌లు ఇప్పడు నగరంలో వెలిశాయి. కెరీర్‌..ఉద్యోగం...బిజీలైఫ్‌తో పిల్లలను కనడం వాయిదా వేసుకునే దంపతులకు ఈ ఎగ్, స్పెర్మ్‌ బ్యాంకులు ఆదరువులా మారాయి. నగరంలో ఇప్పటికే పాతిక వరకు ఎగ్‌ బ్యాంక్‌లు (అండాలను భద్రపరిచే) ఏర్పాటయ్యాయి. వయసులో ఉన్నప్పుడు అండాలను ఆయా బ్యాంకుల్లో ఐదు నుంచి పదేళ్ల వరకు భద్రపరచి.. తమకు కావాలనుకున్నప్పుడు సంతానం పొందేలా అత్యాధునిక వైద్య పద్ధతులు అందుబాటులోకి రావడం పలువురికి ఉపయోగకరంగా మారింది. సాక్షి, సిటీబ్యూరో:ఒకప్పుడు పాతికేళ్లకే పెళ్లి చేసుకుని, ఏడాది తిరక్క ముందే పండంటి బిడ్డకు జన్మనిచ్చేవారు. కానీ ప్రస్తుతం చాలా మంది ఉన్నత చదువులు, ఉద్యోగ అవకాశాల వేటలో పడి 30 ఏళ్లు దాటిన తర్వాతే పెళ్లికి సిద్ధపడుతున్నారు. భార్య ఒక షిప్ట్‌లో పని చేస్తుంటే, భర్త మరో షిప్టులో పని చేస్తుండటం వల్ల కనీస దాంపత్యానికి నోచుకోలేక పోతున్నారు. యుక్తవయసు దాటిన తర్వాత వివాహం చేసుకోవడంతో పాటు కెరీర్‌ వేటలో పడి చాలా మంది మహిళలు పిల్లలను వాయిదా వేసుకుంటున్నారు. ఒక వయసు దాటిన తర్వాత పిల్లల కోసం ప్రయత్నించినా ఆశించిన స్థాయిలో ఫలితాలు రాకపోవడంతో చాలా మంది ముందే జాగ్రత్త పడుతున్నారు. భార్య అండాల(ఎగ్‌)తో పాటు, భర్త వీర్యకణాల(స్పెర్మ్‌)ను సేకరించి భద్రపరుచుకునే వెసులుబాటు అందుబాటులోకి వచ్చింది. యుక్తవ యసులోనే తమ అండాలను సేకరించి భద్రపరుచుకుంటున్న వారి సంఖ్య ఇటీవల క్రమంగా పెరుగుతుండటంతో ప్రస్తుతం నగరంలో ఈ బ్యాంక్‌ల సంఖ్య పెరుగుతోంది. ప్రస్తుతం నగరంలో 28 ఇన్‌ఫెర్టిలిటీ సెంటర్లు ఉండగా, వీటిలో చాలా వరకు ఈ ‘క్రయో ప్రిజర్వేషన్‌’ బ్యాంకులను ఏర్పాటు చేసుకోవడం గమనార్హం. కేన్సర్‌ బాధితులు కూడా... బిజీ లైఫ్, ఒత్తిడి, నియమాలు లేని ఆహారపు అలవాట్లు స్త్రీ, పురుషుల హార్మోన్లపై తీవ్ర ప్రభావం చూపుతోంది. వీకెండ్‌ పార్టీల పేరుతో పీకలదాక తాగడం వల్ల అనేక సమస్యలు తలెత్తుతున్నాయి. పెళ్‌లై నాలుగైదేళ్లు దాటినా పిల్లలు పుట్టకపోవతో చివరకు సంతాన సాఫల్య కేంద్రాకు పరుగులు తీస్తున్నారు. ఇన్‌విట్రో ఫెర్టిలైజేషన్‌ అండ్‌ ఎంబ్రియో ట్రాన్స్‌ఫర్‌(ఐవీఎఫ్‌), ఇంట్రాసైటో ప్లాస్మిక్‌ స్పెర్మ్‌ ఇంజెక్షన్‌(ఐసీఎస్‌ఐ)చికిత్సలు సైతం ఆశించిన ఫలితాలు ఇవ్వడం లేదనే విమర్శలు కూడా లేకపోలేదు. వైద్యరంగంలో అనేక సాంకేతిక మార్పులు చోటు చేసుకోవడం, చికిత్సలపై దంపతుల్లో అవగాహన పెరగడం వల్ల చాలా మంది ముందే మేల్కొంటున్నారు. యుక్త వయసులో ఉన్నప్పుడు ఎగ్, స్పెర్మ్‌ సెల్స్‌ యాక్టివ్‌గా ఉంటుండటంతో పాటు త్వరగా ఫలదీకరణం చెందే గుణంఉండటం వల్ల ముందే భద్రపరుచుకోవాలని భావిస్తున్నారు. కేవలం ఉద్యోగులే కాకుండా కేన్సర్‌ వంటి జబ్బులతో బాధపడుతూ చికిత్స పొందుతున్న రోగులు కూడా వీటిని ఆశ్రయిస్తుండటానికి మరో కారణం.  ఒకసారి భద్రపరిస్తే..పదేళ్ల వరకు డోకా ఉండదు మహిళల్లో పీరియడ్స్‌ వచ్చిన తర్వాత హార్మోన్స్‌ను సేకరిస్తారు. దీన్ని పరీక్షించి ఆరోగ్యంగా ఉన్నట్లు నిర్ధారించుకుంటారు. ఆ తర్వాత వరుసగా పది రోజుల పాటు ప్రత్యేక ఇంజక్షన్లు ఇస్తారు. ఎగ్‌(అండం) సైజ్‌ను ఓ స్థాయికి వృద్ధి చేసి, ఆ తర్వాత ప్రత్యేక నీడిల్‌ సహాయంతో అండాలను బయటికి తీస్తారు. ఇలా సేకరించిన అండాలను లిక్విడ్‌ నైట్రోజన్‌తో కూడిన క్రయోప్రిజర్వేషన్‌ బాక్స్‌లో భద్రపరుస్తారు. ఇలా భద్రపరిచిన అండాలు పదేళ్ల వరకు ఆరోగ్యంగా ఉంటాయి. మహిళ వయసు, మోనోపాజ్‌ను దృష్టిలో ఉంచుకుని వైద్యులు సిఫార్సు చేస్తారు. ఉదాహరణకు 30 ఏళ్ల వయసులో అండాలను సేకరించి భద్రపరిస్తే..ఐదేళ్లలో వినియోగించుకోవాల్సిందిగా సూచిస్తున్నారు. ఇందుకు రూ.లక్ష నుంచి లక్షన్నర వరకు ఛార్జీ చేస్తుండటం వల్ల మధ్య తరగతి దంపతులు కూడా ఈ కేంద్రాలపై ఆసక్తి పెంచుకుంటున్నారు. ఇదే తరహాలో పురుషుల నుంచి స్పెర్మ్‌ను కూడా సేకరించి భద్రపరుస్తుంటారు. అయితే ఎగ్‌బ్యాంక్‌లను ఆశ్రయిస్తున్న వారిలో పురుషులతో పోలిస్తే..మహిళలే ఎక్కువగా ఉండటం విశేషం. ఎగ్‌ బ్యాంక్‌లు దంపతులకు ఓ వరం మారిన జీవనశైలి వల్ల చాలా మంది మహిళల్లో చిన్న వయసులోనే మోనోపాజ్‌ మొదలవుతుంది. శరీరానికి కనీస వ్యాయాయం లేకపోవడం, ఏదీపడితే అది తినడం వల్ల అధిక బరువు సమస్యతో బాధపడుతున్నారు. ఇవి పునరుత్పత్తిపై తీవ్ర ప్రభావం చూపుతున్నాయి. కనాల్సిన వయసులో పిల్లలు కనకపోవడం వల్ల ఆ తర్వాత ప్రయత్నించినా ఫలితం ఉండటం లేదు. ఇలాంటి వారికి ఎగ్‌బ్యాంకులు ఓ వరం లాంటివే. మా ఆస్పత్రిలో నాలుగేళ్ల క్రితమే ఈ బ్యాంక్‌ను ఏర్పాటు చేసినప్పటికీ..వీటిని ఆశ్రయిస్తున్న వారి సంఖ్య ఇప్పుడిప్పుడే పెరుగుతోంది. నోవా ఇన్‌ఫెర్టిలిటీ సెంటర్‌లో ఇప్పటికే 15 మంది తమ ఎగ్స్‌ను భద్రపరుచుకున్నారు.– డాక్టర్‌ సరోజ కొప్పాల, ఫెర్టిలిటీ కన్సల్టెంట్, నోవా ఆస్పత్రి 


 బీజింగ్: యుద్ధ సమయాల్లో దేశరక్షణకు కలిసి రావాలని యువతకు దేశాలు పిలుపు ఇవ్వడం సర్వసాధారణ విషయం. దేశం కోసం వీరత్వం అవసరం లేదు వీర్యం ఇవ్వండి చాలు అంటూ చైనా పిలుపు ఇచ్చింది.  వినడానికి కాస్త వింతగా ఉన్నా ఇది నిజం. వీర్యం దానం చేయాలని 20 నుంచి 45 ఏళ్ల మధ్య వయస్కులకు విజ్ఞప్తి చేసింది. వీర్య కణాల కొరత కారణంగా చైనాలోని స్పెర్మ్ బ్యాంకులు నిండుకున్నాయి.
 
 రెండో సంతానం పొందేందుకు ప్రభుత్వం అనుమతి ఇవ్వడంతో వీర్య కణాలకు డిమాండ్ ఒక్కసారిగా పెరిగింది. దీంతో స్పెర్మ్ బ్యాంకులు ఒక్కసారిగా ఖాళీ అయ్యాయి. దీంతో వీర్య దాతల కోసం విపరీతంగా వెదుకుతున్నారు. సోషల్ మీడియా ద్వారా యువకులకు వల వేస్తున్నారు. భారీ మొత్తంలో డబ్బు ఇస్తామని, రోజ్-గోల్డ్ ఐఫోన్ సొంతం చేసుకోవచ్చని ఆఫర్లు ప్రకటిస్తున్నారు. 'ఐఫోన్ కోసం కిడ్నీలు అమ్మడం అవుట్ ఆఫ్ ఫ్యాషన్. ఐఫోన్ కోసం కిడ్నీలు అమ్మాల్సిన పనిలేదు. వీర్య దానంతో ఐఫోన్ కలను నెరవేరచ్చకోండి' అంటూ షాంఘై స్పెర్మ్ బ్యాంకు ఆన్లైన్ లో ప్రకటన ఉంచింది. 
 
 'వీర్యం దానం చేయండి, మీ దేశభక్తిని నిరూపించుకోండి' అంటూ స్పెర్మ్ బ్యాంకులు ప్రచారం చేస్తున్నాయి. దేశాన్ని వృద్ధాప్యం నుంచి బయటపడేసేందుకు వీర్యం దానం చేయాలని ప్రభుత్వ వార్తా సంస్థ కోరింది. సంబంధంలేని వ్యక్తుల వీర్యంతో పిల్లల్ని కనడం కన్ఫ్యూసియనిజం విలువలకు  విరుద్ధమని కొంత మంది వాదిస్తున్నారు. సమాజానికి ఎంతో కొంత తిరిగి ఇవ్వాలని.. వీర్యం, రక్తం దానం చేయడం ఒకటేనని బీజింగ్ స్పెర్మ్ బ్యాంకు కౌంటర్ ఇచ్చింది.