‘‘ఈ చిత్రంలో నాలుగు విభిన్నమైన పాత్రల్లో కనిపిస్తాను. మనిషిలో ఉండే నాలుగు కోణాలను ఇందులో చూపించారు. నా ‘రఘువరన్ బీటెక్ ’ చిత్రాన్ని తెలుగు ప్రేక్షకులు బాగా ఆదరించారు. ఆ ఉత్సాహంతో మరిన్ని సినిమాలు చేస్తా’’ అని తమిళ నటుడు  ధనుష్ తెలిపారు. ఆయన హీరోగా నటించిన ‘అనేకుడు’ పాటల వేడుక హైదరాబాద్‌లో జరిగింది. ఎ.జి.ఎస్ ఎంటెర్‌టైన్‌మెంట్ పతాకంపై కల్పాత్తి ఎస్.అఘోరం, కల్పాత్తి ఎస్.గణేష్, కల్పాత్తి ఎస్.సురేశ్ ఈ చిత్రాన్ని నిర్మించారు. ఎన్వీ ప్రసాద్ ఈ చిత్రాన్ని తెలుగు ప్రేక్షకులకు అందిస్తున్నారు.
 
 ‘రంగం’ ఫేం కె.వి. ఆనంద్ దర్శకుడు. ముఖ్య అతిథిగా హాజరైన దర్శకుడు వీవీ వినాయక్ ఆడియో సీడీని ఆవిష్కరించారు. ఈ సందర్భంగా కె.వి. ఆనంద్ మాట్లాడుతూ- ‘‘డిఫరెంట్ స్క్రీన్‌ప్లేతో ఉండే రొమాంటిక్ లవ్ స్టోరీ ఇది. హారీస్ జైరాజ్  మంచి పాటలతో పాటు, మంచి నేపథ్య సంగీతం అందించారు’’ అని చెప్పారు. ‘‘‘ఈ చిత్రం ప్రచార చిత్రాలు చూస్తుంటే కథ ఏమై ఉంటుందా అనే కుతూహలం కలుగుతోంది’’ అని వినాయక్ అన్నారు. నిర్మాత అశ్వనీదత్ మాట్లాడుతూ-‘‘ ఆనంద్ మొదట నాకే కథ చె ప్పారు. ఆయన చెప్పినదానికన్నా ఇంకా అందంగా ఈ చిత్రాన్ని తెరకెక్కించారు’’ అని తెలిపారు నిర్మాతలు. ఠాగూర్ మధు, మల్టీడెమైన్షన్ వాసు, కొడాలి వెంకటేశ్వరరావు తదితరులు ఈ వేడుకలో పాల్గొన్నారు.


 ‘వై దిస్ కొలవెరి...’ పాటను విచిత్రమైన శైలిలో పాడి, కోలీవుడ్‌నే కాకుండా టాలీవుడ్, శాండిల్‌వుడ్.. ఇలా అన్ని వుడ్స్‌నీ ఆకట్టుకున్నారు తమిళ హీరో ధనుష్. ఉత్తమ నటుడిగా జాతీయ అవార్డు అందుకున్న ఈ బక్క పలచని హీరో.. మంచి గాయకుడు కూడా. తన చిత్రాలకే కాకుండా అడపా దడపా బయటి హీరోల చిత్రాలకు కూడా పాడుతుంటారు. అయితే, ఇప్పటివరకు తమిళ చిత్రాలకే పాడిన ధనుష్ ఇప్పుడు ఓ కన్నడ చిత్రం కోసం పాట పాడారు. కన్నడ స్టార్ హీరో శివరాజ్‌కుమార్ నటిస్తున్న ‘వజ్రకాయ’ చిత్రం కోసం ధనుష్ పాడగా, ఇటీవల ఈ పాటను రికార్డ్ చేశారు.
 
 శివరాజ్, ధనుష్ మంచి స్నేహితులు. సరదాగా స్నేహితుడి కోసం పాడినప్పటికీ, ఆ చిత్రనిర్మాతలు సీఆర్ మనోహర్, సీఆర్ గోపి మాత్రం ధనుష్‌ని ఉత్తి చేతులతో పంపించడానికి ఇష్టపడలేదట. క్యాష్ ఇస్తే బాగుండదని ఓ చేతి గడియారాన్ని బహుమతిగా ఇచ్చారట. దాని విలువ అక్షరాలా నాలుగు లక్షలని సమాచారం. అంటే.. రెగ్యులర్ టాప్ సింగర్స్ తీసుకునే పారితోషికం అన్నమాట.


 తిరుమల: ప్రముఖ హిందీ నటుడు అమితాబ్‌బచ్చన్‌తో తాను నటిస్తున్న చిత్రం వచ్చే ఏడాది ఫిబ్రవరి 6న విడుదల కానుందని తమిళ సినీ హీరో ధనుష్ తెలిపారు. ప్రస్తుతం తమిళంలో మూడు చిత్రాల్లో నటిస్తున్నట్లు వివరించారు. తెలుగులో మంచి కథ కోసం ఎదురుచూస్తున్నానన్నారు. తమ మామగారు రజనీకాంత్ తో కలిసి నటించే విషయం ఇప్పుడే చెప్పలేనని పేర్కొన్నారు. అన్నీ కుదిరితే ఆయనతో కలిసి నటించేందుకు తనకెటువంటి అభ్యంతరం లేదని వెల్లడించారు.
 
 తన భార్య ఐశ్వర్యతో కలిసి ఆదివారం ఉదయం నైవేద్య విరామ సమయంలో తిరుమల వేంకటేశ్వరస్వామిని ధనుష్ దర్శించుకున్నారు. ఈ సందర్భంగా ఆలయం వెలుపల మీడియాతో మాట్లాడుతూ శ్రీవారిని దర్శించడం చాలా సంతోషంగా ఉందన్నారు. వీరితోపాటు సంగీత దర్శకుడు అనిరుధ్ రవిచందర్ కూడా వేంకటేశ్వరస్వామిని దర్శించుకున్నారు. సినీ నటి ప్రణీత కూడా కుటుంబ సభ్యులతో కలిసి శ్రీవారి దర్శనం చేసుకున్నారు.