న్యూఢిల్లీ: మీడియా, ఎంటర్‌టైన్‌మెంట్ రంగంలో నియామకాలు పెరిగాయి. ఈ రంగంలో నియామకాల వృద్ధి గతేడాది మే నెలతో పోలిస్తే ఈ ఏడాది అదే సమయంలో 9 శాతం పెరిగింది. నియామకాల పెరుగుదలకు డిజిటల్ మీడియా, శాటిలైట్ టీవీ వంటి తదితర విభాగాల విస్తరణే కారణం. ఈ విషయం టైమ్స్‌జాబ్స్‌డాట్‌కామ్ సర్వేలో వెల్లడైంది.
 
 గత ఏడాది కాలంలో ఎంటర్‌టైన్‌మెంట్, మీడియా, జర్నలిజం నిపుణుల డిమాండ్ బాగా పెరిగింది. వీరిలో ముఖ్యంగా ప్రారంభ స్థాయి, ఐదేళ్లలోపు అనుభవం ఉన్న వారికి డిమాండ్ ఎక్కువగా (60 శాతంగా) ఉంది. ఈ డిమాండ్‌లో 50 శాతం ముంబై, ఢిల్లీ-ఎన్‌సీఆర్ ప్రాంతాల నుంచే ఉంది.  తర్వాతి స్థానాల్లో హైద రాబాద్, పుణే, అహ్మదాబాద్‌లు ఉన్నాయి.  స్మార్ట్‌ఫోన్ల వినియోగం పెరగడంతో మీడియా సంబంధిత యాప్‌ల వినియోగం పెరిగిందని తద్వారా సోషల్ మీడియా నిపుణులకు మంచి డిమాండ్ ఏర్పడింఈని టైమ్స్‌జాబ్స్‌డాట్‌కామ్ వెల్లడించింది.


 న్యూఢిల్లీ: గత నెల మార్చిలో ఉద్యోగ నియామకాల వృద్ధి 18 శాతంగా నమోదైంది. ఉద్యోగ నియామకాలు ఐటీ, టెలికం రంగాల్లో అత్యధికంగా ఉన్నాయని టైమ్స్‌జాబ్స్.కామ్ పేర్కొంది. ఐటీ, టెలికం రంగాలలో నిపుణుల డిమాండ్ 31 శాతం పెరిగినట్లు తెలిపింది. పెట్రో కెమికల్స్, ఆయిల్, గ్యాస్, పవర్, ట్రావెల్, హాస్పిటాలిటీ రంగాలలో ఉద్యోగ నియామకాల వృద్ధి 16-19 శాతంగా ఉన్నట్లు పేర్కొంది.
 
 బహుళ అంతర్జాతీయ కంపెనీల దృష్టిని భారత ఆర్థిక వృద్ధి ఆకర్షించిందని, ఇది నిపుణుల డిమాండ్ పెరగడానికి దోహదపడిందని టైమ్స్‌జాబ్స్. కామ్ సీఓఓ వివేక్ మధుకర్ అన్నారు. టైమ్స్‌జాబ్స్ నివేదిక ప్రకారం గత నెల మార్చిలో టైర్-2, టైర్-3 పట్టణాలలో ఉద్యోగ నియామకాలు బాగా పెరిగాయి. గతేడాదితో పోలిస్తే ఈ ఏడాది ప్రారంభ స్థాయి ఉద్యోగులు, అనుభవం ఉన్న పాలనా సిబ్బంది డిమాండ్ 19 శాతం పెరిగింది.