నూజివీడు: టయోటా వాహనంలో మంటలు చెలరేగి కొన్ని నిమిషాల్లోనే వాహనం దగ్ధమైంది. ఈ ఘటన కృష్ణా జిల్లా నూజివీడు మండలం బత్తులవారిగూడెంలో శుక్రవారం రాత్రి చోటుచేసుకుంది. ఆ వివరాలిలా ఉన్నాయి.. మైలవరం ఫారెస్ట్ అధికారి, అతడి సోదరుడు టయోటా వాహనంలో పనిమీద వెళ్తున్నారు.
 ఇంతలో వారు ప్రయాణిస్తున్న వాహనంలో అకస్మాత్తుగా మంటలు చెలరేగి కొన్ని నిమిషాల్లో టయోటా దగ్ధం అయింది. అయితే మంటలు చెలరేగిన వెంటనే వాహనాన్ని రోడ్డు పక్కన ఆపి వారు అందులోంచి దిగేయడంతో ప్రమాదం నుంచి సురక్షితంగా బయటపడ్డారు. ఇంజన్లో సమస్య రావడంతో ఈ ప్రమాదం జరిగి ఉండొచ్చునని భావిస్తున్నారు. పూర్తి వివరాలు తెలియాల్సి ఉంది.


 గుంటూరు (తాడేపల్లి): గుంటూరు జిల్లా తాడేపల్లి మండలంలోని పలు గ్రామాల్లో శనివారం అగ్నిప్రమాదం చోటుచేసుకుంది. చిరావూరు గ్రామంలో కరెంటు తీగలు తెగి మంటలు చెలరేగటంతో అరటి తోట దగ్ధం కాగా, పాతూరులో గుర్తుతెలియని వ్యక్తులు మొక్కజొన్న తోటకు నిప్పుపెట్టారు. కుంచనపల్లిలో శ్రీనివాస్‌రావు అనే రైతుకు చెందిన ఆకుకూర పంటకి నిప్పుపెట్టటంతో పంట బుగ్గిపాలయింది. ఆ సమయంలో పక్కనే ఉన్న పలగాని వెంకటేశ్వరరావుకి చెందిన ద్విచక్ర వాహనం కూడా కాలపోయింది. గుండెమడ, చిరావూరు మధ్యలో కృష్ణా నదిలోని ఇసుక దిబ్బలో ఉన్న 25 ఎకరాల విస్తీర్ణంలోని పశుగ్రాసానికి గుర్తుతెలియని వ్యక్తులు నిప్పుపెట్టడంతో పూర్తిగా కాలిపోయింది.