ఆ ఏటీఎం కార్డులను బ్లాక్‌ చేస్తున్న ఎస్‌బీఐ

సాక్షి, న్యూఢిల్లీ: ప్రభుత్వం రంగ దిగ్గజ బ్యాంకు స్టేట్‌ బ్యాంకు ఆఫ్‌ ఇండియా(ఎస్‌బీఐ) కొందరి ఖాతాదారుల డెబిట్‌ కార్డులను శాశ్వతంగా బ్లాక్‌ చేస్తోంది. ఇప్పటికే దీనికి సంబంధించి సమాచారాన్ని కస్టమర్లకు మెసేజ్‌ల రూపంలో అందిస్తోంది. అయితే ఏ కారణంతో ఈ నిర్ణయం తీసుకోవాల్సి వచ్చిందో కూడా ఎస్‌బీఐ తన వెబ్‌సైట్‌లో పేర్కొంది. భద్రతా కారణాల నేపథ్యంలో మ్యాగ్‌స్ట్రైప్‌ డెబిట్‌ కార్డులను ఈవీఎం చిప్‌ డెబిట్‌ కార్డులతో భర్తీ చేయాలని నిర్ణయించినట్టు బ్యాంకు తన వెబ్‌సైట్‌లో పేర్కొంది. ఆర్బీఐ మార్గదర్శకాలకు అనుగుణంగా, భద్రతా కారణాలతో మ్యాగ్‌స్ట్రైప్‌ డెబిట్‌ కార్డును శాశ్వతంగా బ్లాక్‌ చేయనున్నట్టు వెల్లడించింది. ఈ కార్డులను మార్చుకోవడానికి ఖాతాదారులు వెంటనే బ్యాంకును కాంటాక్ట్‌ చేయాలని లేదా ఇంటర్నెట్‌ బ్యాంకింగ్‌(www.onlinesbi.com ) ద్వారా కార్డులను మార్చుకోవాలని బ్యాంకు సూచించింది. ఈవీఎం చిప్ డెబిట్‌ కార్డులను బ్యాంకు ఉచితంగానే కస్టమర్లకు అందిస్తోంది.