వైఎస్సార్‌ జిల్లా :  ప్రొద్దుటూరులోని అనిబిసెంట్‌ మున్సిపల్ ఉన్నత పాఠశాల శతాబ్ది ఉత్సవాల్లో ఉపరాష్ర్టపతి వెంకయ్యనాయుడు పాల్గొన్నారు. ఈ సందర్భంగా మాట్లాడుతూ..కన్నతల్లి, మాతృభూమి, మాతృభాష, మాతృదేశాన్ని మరచినవాడు మనిషి కాదని వ్యాఖ్యానించారు. ప్రధాని నరేంద్ర మోది వీధి బడిలో చదివి రైల్వేష్టేషన్లో టీ అమ్మాడని, వీధిబడుల్లో చదివి ఆస్ధాయికి ఎదిగాడని, నేటి విద్యార్ధులు ఆయనను ఆదర్శంగా తీసుకోవాలని సూచించారు. తాను కష్టపడే ఈస్ధాయికి ఎదిగానని తెలిపారు.  ప్రతి ఒక్కరిలో దేశభక్తి, క్రమశిక్షణ, అంకితభావం ఉండాలన్నారు. కడప, బయ్యారంలలో  ఉక్కు ఫ్యాక్టరీల ఏర్పాటుకు కేంద్ర ఉక్కు శాఖ మంత్రి సుముఖత వ్యక్తం చేశారు. త్వరలొనే సానుకూల నిర్ణయం వస్తుందని ఆశాభావం వ్యక్తం చేశారు. ఈ కార్యక్రమంలో మంత్రులు సోమిరెడ్డి చంద్రమోహన్‌ రెడ్డి, పి. నారాయణ, కడప ఎంపీ అవినాష్‌ రెడ్డి, ప్రొద్దుటూరు ఎమ్మెల్యే రాచమల్లు ప్రసాద్‌ రెడ్డి, తదీతరులు పాల్గొన్నారు.


 – ఘనంగా అనిబిసెంట్‌ జయంతి
 మదనపల్లె అర్బన్‌: బిటి కళాశాల వ్యవస్థాపకులు, విద్యాప్రదాత అనిబిసెంట్‌ జయంతిని శనివారం ఘనంగా నిర్వహించారు. బిటి కళాశాల ప్రిన్సిపాల్‌ స్వర్ణరాణి ఆధ్వర్యంలో అధ్యాపకులు, విద్యార్థులు కళాశాల నుంచి బెంగుళూరు రోడ్డులోని అనిబిసెంట్‌ సర్కిల్‌కు ఊరేగింపుగా చేరుకున్నారు. అక్కడ అనిబిసెంట్‌ విగ్రహానికి పూలమాల వేసి నివాళులు అర్పించారు. బిసెంట్‌హాల్‌లో కరస్పాండెంట్‌ ఎస్‌కె.వివేకానంద అధ్యక్షతన సమావేశం నిర్వహించారు. ప్రిన్సిపాల్‌ మాట్లాడుతూ పాశ్చాత్యదేశంలో జన్మించిన అనిబిసెంట్‌ మదనపల్లె వాతావరణానికి ముగ్దులయ్యారని తెలిపారు. ఇక్కడి ప్రజల వెనుకబాటుతనాన్ని దూరం చేయాలనే ఉద్దేశంతో రాయలసీమలోనే తొలిసారిగా బిటికళాశాలను స్థాపించారని పేర్కొన్నారు. వందేళ్ల క్రితం నిర్మించిన కళాశాలలో చదివిన వారు అనేక మంది గొప్ప స్థానాలకు చేరుకున్నారని వివరించారు. కార్యక్రమంలో లైజనింగ్‌ ఆఫీసర్‌ కామకోటి ప్రసాదరావు, రేస్‌ బీఈడీ కళాశాల కరస్పాండెంట్‌ రంగాచార్యులు, పూర్వ విద్యార్థి మార్పూరి నాగార్జునబాబు తదితరులు పాల్గొన్నారు. 
 ఆకట్టుకున్న అనిబిసెంట్‌ చిత్రం
 బిటి కళాశాల వ్యవస్థాపకురాలు డాక్టర్‌ అనిబిసెంట్‌ చిత్రాన్ని పూర్వ విద్యార్థులు, బిసెంట్‌ కల్చరల్‌ టీం కలిసి అనిబిసెంట్‌ చిత్రాన్ని పూలు, ఉప్పుతో ఆకర్షనీయంగా తీర్చిదిద్దారు. ఈ కార్యక్రమంలో వెల్‌విషర్స్‌ సంస్థ వ్యవస్థాపకులు గిరీష్, వెంకటేష్, నాగరాజు,దిలీప్, నరేంద్ర తదితరులు పాల్గొన్నారు.