విశాఖ : తూర్పు నావికాదళం ప్రధాన అధికారిగా వైస్ అడ్మిరల్ సతీశ్ సోని సోమవారం పదవీ బాధ్యతలు స్వీకరించారు. 2012 నుంచి  దక్షిణ నౌకాదళాధిపతిగా బాధ్యతలు నిర్వహించిన ఆయన భారత నౌకాదళంలోని పలు కీలక విభాగాల్లో పనిచేశారు. ఇప్పటివరకు విశాఖలో విధులు నిర్వర్తించిన వైస్ అడ్మిరల్ అనిల్ చోప్రా ముంబయి పశ్చిమ తీర నౌకాధిపతిగా బదిలీ అయ్యారు. చోప్రా నుంచి సతీశ్ సోని బాధ్యతలు స్వీకరించారు.
 
  


 విశాఖపట్నం,న్యూస్‌లైన్: చైనా నావికా దళానికి చెందిన రెండు నౌకలు శనివారం విశాఖలోని తూర్పు నావికా దళానికి చేరుకోనున్నాయి.  నాలుగు రోజుల పర్యటనలో భాగంగా పీఎల్‌వీ నేవీకి చెందిన జింఘీ, వీఫింగ్ అనే ఈ రెండు నౌకలు రానున్నాయి.  నౌకలతో పాటు వచ్చే చైనా నావికాదళాధికారులు ఈఎన్‌సీ చీఫ్ వైస్ అడ్మిరల్ అనిల్ చోప్రాతో భేటీ అవుతారు. అన ంతరం విశాఖలోని పలు యూనిట్లను సందర్శించనున్నారు.
 
 ఈ సందర్భంగా ఈస్ట్రన్ ఫ్లీట్ జట్లతో పిఎల్‌ఎ నేవీ దళ సభ్యులు బాస్కెట్‌బాల్, ఫుట్‌బాల్ మ్యాచ్‌లు అడనున్నారు. భారత్‌తో పాటు ఆసియన్ దేశాలైన మయన్మార్, ఇండోనేషియా, వియత్నాంలతో సత్సంబంధాలలో బాగంగా ఈ యుద్ధ నౌకలు విశాఖ వస్తున్నాయి. 20న విశాఖ నుంచి నౌకలు తిరుగు పయనం కానున్నాయి.
  


 రాబోయే రెండు సంవత్సరాలలో అత్యాధునిక ఆయుధ సంపత్తిని సమకూర్చుకుంటున్నట్లు తూర్పు నౌకా దళం ప్రధాన అధికారి అనిల్ చోప్రా తెలిపారు. జనవరి నుంచి విశాఖపట్నంలో రోజుకు 24 గంటల పాటు విమానాల రాకపోకలకు అనుమతులు వస్తాయని, అలాగే రానున్న రెండేళ్లలో కొత్తగా నాలుగు ఎయిర్‌వే స్టేషన్లు ఏర్పాటుకు సన్నాహాలు చేస్తున్నామని ఆయన చెప్పారు.
 
 ప్రజలతో మరింత భాగస్వామ్యం కోసం నౌకాదళం పూర్తిస్థాయిలో కృషి చేస్తోందని చోప్రా తెలిపారు. విశాఖలో మారిటైమ్ యూనివర్సిటీ వస్తే చాలా సంతోషిస్తామని ఆయన అన్నారు.