టైటిల్‌ : విక్రాంత్‌ రోణ నటీనటులు :కిచ్చా సుదీప్‌, నిరూప్‌ భండారి, నీతా అశోక్‌, జాక్వెలిన్‌ ఫెర్నాండేజ్‌, మధుసూదన్‌ రావు తదితరులు నిర్మాత: జాక్‌ మంజునాథ్‌, అలంకార్‌ పాండియన్‌ దర్శకత్వం: అనూప్‌ భండారి సంగీతం : అజనీష్‌ లోకనాథ్‌ సినిమాటోగ్రఫీ: విలియం డేవిడ్‌ విడుదల తేది: జులై 28, 2022 కథేంటంటే.. కొమరట్టు గ్రామంలో వరుస హత్యలు జరుగుతుంటాయి. ఆ ఊర్లో ఓ పాడుబడ్డ ఇంట్లోని బావిలో శవాలు కనిపిస్తుంటాయి. బ్రహ్మరాక్షసుడే వీరందరినీ చంపుతున్నాడని గ్రామస్తుల నమ్మకం. ఊరిపెద్ద జనార్థన్‌ గంభీర్‌(మధుసూదన్‌రావు), అతని తమ్ముడు ఏక్‌నాథ్‌ గంభీర్‌(రమేశ్‌ రాయ్‌)కూడా గ్రామ ప్రజలకు ఇదే విషయాన్ని చెప్పి ఆ ఇంటివైపు ఎవరినీ వెళ్లకుండా చేస్తారు. అయితే ఓ సారి ఆ ఊరి ఎస్సై ఆ పాడుబడ్డ ఇంటికి వెళ్లగా.. తెల్లారి బావిలో శవమై కనిపిస్తాడు. అతని మొండెం మాత్రమే లభిస్తుంది కానీ తల కనిపించదు. ఈ హత్య కేసును చేధించడానికి ఆ ఊరికి కొత్త ఎస్సై వస్తాడు. అతనే విక్రాంత్‌ రోణ(కిచ్చా సుధీప్‌). ఈ కేసు విచారణలో అతనికి ఆసక్తికరమైన విషయాలు తెలుస్తాయి. ఆ గ్రామానికి చెందిన స్కూల్‌ పిల్లలు పదుల సంఖ్యలో హత్యకు గురయ్యారని తెలుస్తుంది. మరి పిల్లల హత్యకు కారకులు ఎవరు? ఎందుకు హత్య చేశారు? ఆ ఊరికి కొత్తగా వచ్చిన సంజు(నిరూప్‌ భండారి)ఎవరు? గ్రామస్తులను భయపెడుతున్న బ్రహ్మరాక్షసుడు ఎవరు? ఎస్సై హత్య కేసుతో విక్రాంత్‌ వ్యక్తిగత జీవితానికి ఉన్న సంబంధం ఏంటి? తదితర విషయాలు తెలియాలంటే విక్రాంత్‌ రోణ సినిమా చూడాల్సిందే.  ఎలా ఉందంటే.. విక్రాంత్‌ రోణ..ఇదొక యాక్షన్‌ ఎమోషనల్‌ ఫాంటసీ అడ్వెంచర్‌ కథా చిత్రమని తొలి నుంచి చిత్రబృందం చెప్పుకుంటూ వచ్చింది. ట్రైలర్‌, టీజర్‌లో కూడా ఆ విధంగానే చూపించింది. పైగా పాన్‌ ఇండియా మూవీ అనగానే.. కేజీయఫ్‌ తర్వాత కన్నడ నుంచి మరో భారీ మూవీ రాబోతుందని సినీ ప్రియులు ఆసక్తిగా ఎదురుచూశారు. ఇది కూడా కేజీయఫ్‌ రేంజ్‌లో ఉంటుందని ఊహించారు. కానీ దర్శకుడు అనూప్‌ భండారి నిరాశపరిచాడు. తెరపై విజువల్స్‌, వీఎఫ్‌ఎక్స్‌ అద్భుతంగా ఉన్నప్పటికీ.. కథలో పసలేదు. అసలు దర్శకుడు ఏ జానర్‌లో ఈ కథను తెరకెక్కించాలనుకున్నాడో సరైన క్లారిటీ లేదనిపిస్తుంది. ఓ తల్లీకూతుళ్లు అర్ధరాత్రి కొమరట్టుకు బయలుదేరగా.. ముసుగులో ఉన్న కొంతమంది వారిని హత్య చేయడంతో కథ ప్రారంభమవుతుంది. ఆ ఊరిలో ఏదో జరుగుతుంది. ఆ పాడుబడ్డ ఇంట్లో ఎవరు ఉన్నారనే ఆసక్తి ప్రేక్షకుల్లో మొదలవుతుంది. ఎస్సై విక్రాంత్‌ రోణ ఎంట్రీతో కథలో స్పీడ్‌ పెరుగుతుంది.  యాక్షన్‌ ఎపిసోడ్‌ బాగున్నప్పటికీ.. వరుస హత్యల రహస్యాన్ని చేధించే సీన్స్‌ ఆసక్తికరంగా సాగవు. దానికి తోడు సంజు లవ్‌ట్రాక్‌, మదర్‌ సెంటిమెంట్‌ అంతగా ఆకట్టుకోకపోవడం సినిమాకు పెద్ద మైనస్‌. మధ్య మధ్య వచ్చే కొన్ని భయంకర సన్నివేశాలు మినహా.. కథ ఎక్కడా ఆకట్టుకునే విధంగా ఉండదు. ఎవరెలా చేశారంటే.. విక్రాంత్‌ రోణ పాత్రలో సుదీప్‌ ఒదిగిపోయాడు. తెరపై చాలా స్టైలీష్‌గా కనిపించాడు. యాక్షన్‌ సీన్స్‌ అదరగొట్టేశాడు. సంజుగా నిరూప్‌ బండారి పర్వాలేదు. క్లైమాక్స్‌లో అతని పాత్ర సర్‌ప్రైజ్‌ చేస్తుంది. అపర్ణగా నీతా అశోక్‌ తనదైన నటనతో ఆకట్టుకుంది. ఫక్రూగా కార్తీక్‌ రావు నవ్వించే ప్రయత్నం చేశాడు. ఇక రక్కమ్మగా జాక్వెలిన్‌ తనదైన అందచందాలతో ఆకట్టుకుంది. మిగిలిన నటీనటుల పాత్రలకు అంతగా ప్రాధాన్యత లేకున్నా.. తమ పాత్రల పరిధిమేర ఆకట్టుకున్నారు. ఇక సాంకేతిక విషయానికొస్తే.. అజనీష్‌ నేపథ్య సంగీతం చాలా బాగుంది. రారా రక్కమ్మ పాట మినహా మిగతావేవి అంతగా ఆకట్టుకోలేవు. శివ కుమార్‌ ఆర్ట్‌వర్క్‌ అద్భుతంగా ఉంది. ప్రేక్షకులను మరో ప్రపంచంలోకి తీసుకెళ్తోంది. విలినియం సినిమాటోగ్రఫీ అద్భుతంగా ఉంది. ఎడిటర్‌ తన కత్తెరకు ఇంకాస్త పనిచెప్పాల్సింది. నిర్మాణ విలువలు సినిమా స్థాయికి తగినట్లుగా ఉన్నాయి.

కన్నడ హీరో కిచ్చా సుదీప్‌ ప్రధాన పాత్రలో నటించిన చిత్రం ‘విక్రాంత్‌ రోణ’. జాక్వెలిన్‌ ఫెర్నాండెజ్, నిరూప్‌ భండారి, నీతా అశోక్‌ ముఖ్య పాత్రల్లో నటించారు. అనూప్‌ భండారి దర్శకుడు. జాక్‌ మంజునాథ్, షాలినీ మంజునాథ్‌ నిర్మించారు. గురువారం ఈ సినిమా నుంచి ట్రైలర్‌ రిలీజైంది. 'ఆ ఊరే ఒక మర్మమైన ఊరు. ఆ ఊరి ప్రజలు ఏదో ఒక భయంకరమైన కథని దాచాలనుకుంటున్నారు. కథని దాచగలరు, కానీ భయాన్ని దాచలేరు, ఆ కథ మళ్లీ మొదలైంది. ఆ డెవిల్‌ మళ్లీ వచ్చాడు..' అంటూ ట్రైలర్‌ ప్రారంభమవుతుంది. భయం నిండిన ఆ ఊరిలో భయం అంటే ఏమిటో తెలియని ఒకడు వచ్చాడు అంటూ విక్రాంత్‌ రోణగా సుదీప్‌ పాత్రను పరిచయం చేశారు. ట్రైలర్‌ చూస్తుంటే అద్భుతంగా ఉంది. కాగా ఈ సినిమాకు ఓటీటీ సంస్థ ఫ్యాన్సీ ఆఫర్‌  (దాదాపు రూ. 100 కోట్లు) ఇచ్చేందుకు ముందుకు వచ్చిందట. కానీ ప్రేక్షకులకు ఓ గొప్ప సినిమాటిక్‌ ఎక్స్‌పీరియన్స్‌ ఇవ్వడానికి దీన్ని థియేటర్‌లోనే రిలీజ్‌ చేస్తున్నట్లు ఆ మధ్య ఓ ఇంటర్వ్యూలో చెప్పుకొచ్చాడు డైరెక్టర్‌ అనూప్‌. ఈ సినిమా నుంచి ఇదివరకే రిలీజైన ‘రా రా రాక్కమ్మా’ సాంగ్‌ విశేష ఆదరణ పొందిన విషయం విదితమే! రామజోగయ్య శాస్త్రి సాహిత్యం అందించిన ఈ సాంగ్‌ను మంగ్లీ, నకాష్‌ అజీజ్‌ పాడారు. ఈ త్రీడీ చిత్రం కన్నడ, తెలుగు, తమిళ, మలయాళ, హిందీ భాషల్లో జూలై 28న విడుదలవుతోంది’ చదవండి: 

కోలీవుడ్‌, మాలీవుడ్‌ యంగ్ హీరోలు టాలీవుడ్ లో ప్రతినాయకులుగా కనిపించేందుకు ఇంట్రస్ట్ చూపిస్తున్నారు. ఇప్పటికే ఆది, ఉన్ని ముకుందన్‌ లాంటి స్టార్‌లు టాలీవుడ్‌ లో మంచి విజయాలు సాధించారు. తాజాగా మరో కోలీవుడ్ నటుడు విలన్‌ రోల్‌ లో కనిపించనున్నాడు. తెలుగు, కన్నడ భాషల్లో ఒకేసారి రూపొందుతున్న రాజరథం సినిమాలో తమిళ నటుడు ఆర్య ప్రతినాయక పాత్రలో కనిపించనున్నాడు. సినిమాలో కీలకమైన బస్సు పాత్రకు టాలీవుడ్ యంగ్ హీరో రానా డబ్బింగ్ చెబుతుండటంతో టాలీవుడ్ లోనూ ఈసినిమాపై మంచి హైప్‌ క్రియేట్‌ అయ్యింది. అనూప్‌ బండారీ దర్శకత్వంలో నిరూప్‌ బండారీ, అవంతిక శెట్టి హీరో హీరోయిన్లుగా తెరకెక్కిన సినిమా రాజరథం. ఈ సినిమాలో ఆర్య కీలక పాత్రలో నటిస్తున్నట్టుగా ఇన్నాళ్లు ప్రచారం జరిగింది. అయితే తాజా సమాచారం ప్రకారం ఈ సినిమాలో ఆర్యది విలన్‌ రోల్‌ అని తెలుస్తోంది. మరి నిజంగా ఆర్య నెగెటివ్‌ రోల్‌ లో నటిస్తున్నాడా లేదా తెలియాలంటే మాత్రం రిలీజ్ వరకు వెయిట్ చేయాల్సిందే.


 బెంగళూరు: టీమిండియా మాజీ క్రికెటర్లు మహేంద్రసింగ్‌ ధోని, సచిన్‌ టెండూల్కర్, అజారుద్దీన్‌ జీవిత కథల ఆధారంగా బాలీవుడ్‌లో ఇప్పటికే సినిమాలు తెరకెక్కాయి. ‘మిస్టర్‌ డిపెండబుల్‌’ రాహుల్‌ ద్రవిడ్‌ జీవితకథను కూడా సిల్వర్‌ స్క్రీన్‌పైకి తీసుకొచ్చే ప్రయత్నం జరుగుతోంది. రంగి తరంగ సినిమాతో మంచి పేరు సంపాదించుకున్న ప్రముఖ కన్నడ దర్శకుడు అనూప్‌ భండారి, నటుడు నిరూప్‌ భండారి ఈ చిత్రాన్ని రూపొందించేందుకు ముందుకు వచ్చారు. క్రికెట్‌లోనూ ప్రావీణ్యమున్న వీరిద్దరూ  తమకు ఆరాధ్యుడైన ద్రవిడ్‌ జీవిత కథను సినిమాగా తీయాలనుకుంటున్నట్టు వెల్లడించారు.
 
 ‘కర్ణాటక రాష్ట్రానికి చెందిన ద్రవిడ్‌ గురించి ఎవరైనా సినిమా తీయాలనుకుంటే కళ్లుమూసుకుని నిరూప్‌ను ప్రధాన పాత్రకు తీసుకోవచ్చు. అతడి స్వభావం, వ్యక్తిత్వం, మూర్తిమత్వం ద్రవిడ్‌కు దగ్గరకు ఉంటుంది. ఎవరైనా మంచి స్క్రిప్ట్‌తో వస్తే తెరకెక్కించడానికి నేను సిద్ధంగా ఉన్నాను. ద్రవిడ్‌ అనుమతి ఇస్తేనే ఈ సినిమా రూపొందిస్తాన’ని దర్శకుడు అనూప్‌ భండారి తెలిపారు. వ్యక్తిగత జీవితం గురించి బయట చర్చించడానికి ఇష్టపడని రాహుల్‌ ద్రవిడ్‌ దీనికి ఒప్పుకుంటాడో, లేదో చూడాలి.