సాక్షి, న్యూఢిల్లీ: కంటోన్మెంట్ ప్రాంతంలోని రహదారులు అన్ని వే ళల్లో తెరిచి ఉంచేందుకు రక్షణ శాఖ వీలుకల్పించిందని టీడీపీ ఎంపీ మల్లారెడ్డి చెప్పారు. ఈ మేరకు త్రివిధ దళాధిపతులకు రక్షణ శాఖ మంత్రి మనోహర్ పారికర్ ఆదేశాలు జారీ చేశారని ఆయన శుక్రవారం ఏపీభవన్‌లో మీడియాకు తెలిపారు. సికింద్రాబాద్‌లోని కంటోన్మెంట్‌లో రాత్రి 10 గంటల నుంచి ఉదయం 7 గంటల వరకు దారులు మూసేయడంతో వాహనదారులు పది కిలోమీటర్ల మేర చుట్టూ తిరిగి ప్రయాణం చేయాల్సివస్తోందని చెప్పారు. ఈ సమస్య పరిష్కారించినందుకు కేంద్ర మంత్రులు మనోహర్ పారికర్, ఇంద్రజిత్ సింగ్‌కు ఆయన కృతజ్ఞతలు తెలిపారు.