సాక్షి, హైదరాబాద్‌:  తెలంగాణ సీనియర్‌ రాజకీయ నేత ధర్మపురి శ్రీనివాస్‌(74) హెల్త్‌ బులిటెన్‌ విడుదల అయ్యింది. ఆయన ఆరోగ్య పరిస్థితి అత్యంత విషమంగానే ఉన్నట్లు ఆస్పత్రి వర్గాలు వెల్లడించాయి. ఈ మేరకు మంగళవారం మధ్యాహ్నాం రిలీజ్‌ చేసిన హెల్త్‌ బులిటెన్‌లో పేర్కొన్నాయి.   శ్వాస సంబంధిత సమస్యలతో సోమవారం మధ్యాహ్నాం నగరంలోని ఓ ఆస్పత్రిలో ఆయన్ని చేర్పించారు. అప్పటి నుంచే ఆయన ఐసీయూలో చికిత్స పొందుతున్నారు. ఈ క్రమంలోనే ఆయన ఆరోగ్యం ఇవాళ మరింత విషమించినట్లు తెలుస్తోంది.  ‘‘ఆయన శ్వాస తీస్కోవడంలో ఇబ్బంది పడుతున్నారు. ICU లో ట్రీట్మెంట్ అందిస్తున్నాం. వయసు రీత్యా  ఆరోగ్య ఇబ్బందులు తలెత్తాయి. ఆస్తమా, కిడ్నీల సమస్య, బీపీ పడిపోవడం లాంటి సమస్యలున్నాయి. 48 గంటలు గడిస్తే కానీ హెల్త్ కండిషన్ చెప్పలేం.  :::సిటీ న్యూరో వైద్యుడు ప్రవీణ్ నిజామాబాద్‌ జిల్లా డిచ్‌ పల్లి, నిజామాబాద్‌ రూరల్‌ నుంచి ధర్మపురి శ్రీనివాస్‌ ఎమ్మెల్యేగా గెలుపొందారు. 2004లో ఉమ్మడి ఆంధ్రప్రదేశ్‌ లో కాంగ్రెస్‌ పార్టీ అధికారంలోకి వచ్చినప్పుడు డి. శ్రీనివాసే పీసీసీ ప్రెసిడెంట్‌ గా ఉన్నారు.  డీఎస్‌ ఉమ్మడి ఏపీలో రెండుసార్లు మంత్రిగా, తెలంగాణ రాష్ట్రం ఏర్పడ్డాక బీఆర్‌ఎస్‌(అప్పటి టీఆర్‌ఎస్‌)లో రాజ్యసభ సభ్యుడిగానూ పని చేశారు. ఆయన కొడుకులు ఇద్దరూ రాజకీయాల్లో ఉండగా.. చిన్న కుమారుడు ధర్మపురి అర్వింద్‌ నిజామాబాద్‌ ఎంపీ. అనారోగ్యం కారణంగా డీఎస్‌ కొంతకాలంగా క్రియాశీలక రాజకీయాలకు దూరంగా ఉంటున్నారు. 


 భువనగిరి, న్యూస్‌లైన్:  మూడు రోజులుగా చలి తీవ్రత అధికం కావడంతో ప్రజలు గజగజ వణికిపోతున్నారు. పడమర, ఉత్తరం వైపు నుంచి వీస్తున్న బలమైన చలిగాలులతో ప్రజలు ఇళ్లలోంచి బయటకు రాలేకపోతున్నారు. అలాగే ఉత్తర భారతం నుంచి విపరీతంగా వీస్తున్న చలిగాలులతో ప్రజలు వణికిపోతున్నారు. గడిచిన నాలుగు రోజుల్లో ఉష్ణోగ్రతలు 29 డిగ్రీల నుంచి 14 డిగ్రీల కనిష్టస్థాయికి చేరాయి.
 రోజురోజుకూ ఉష్ణోగ్రతలు క్షీణిస్తుండడంతో  ప్రజలు చలి నుంచి రక్షించుకోవడానికి ప్రత్నామ్నాయమార్గాలను అవలంబిస్తున్నారు. ప్రధానంగా శనివారం ఉదయం నుంచి చలి ప్రభావం విపరీతంగా కనిపిస్తోంది. దీంతో ఉదయం వేళపనులకు వెళ్లేవారు, రాత్రి పూట విధుల్లో ఉన్న వారు చలికి గజగజలాడుతున్నారు. కొందరు అందుబాటులో ఉన్న ఉన్ని దుస్తులను వాడుతున్నారు.
  రోగాల బారిన పడే అవకాశం
  పేద కుటుంబాల్లో చిన్న పిల్లలు, వృద్ధుల విషయంలో తగిన జాగ్రత్తలు తీసుకునేవారు లేక చలి గాలులతో జలుబు, దగ్గు, అస్తమా, నిమోనియా వంటి శ్వాస సంబంధమైన రోగాల బారిన పడుతున్నారు. ఈ సమస్యలు పసి పిల్లల్లో మరీ ఎక్కువగా కనిపిస్తున్నాయి.
  మధ్యాహ్నం చలితోపాటు ఎండ
  సాయంత్రం నుంచి ఉదయం 10 గంటల వరకు చలి ప్రభావం తీవ్రంగా చూపుతుండగా, మధ్యాహ్నం వేళ ఎండ వేడిమితో పాటు చలి కూడా ఉంటోంది. వాతావరణంలో వస్తున్న మార్పులతో ప్రజలు పడరాని పాట్లు పడుతున్నారు.
  ఉన్ని దుస్తులకు పెరిగిన గిరాకీ
  ఒక్కసారిగా పెరిగిన చలినుంచి తట్టుకోవడానికి ప్రజలు ఉన్ని వస్త్రాలను ఆశ్రయిస్తున్నారు. పాత వాటిని బయటకు తీయడంతోపాటు కొత్తవాటిని కొనుగోలు చేస్తున్నారు. మరికొందరు చలిమంటలను ఆశ్రయిస్తున్నారు.