చంద్రన్న విలేజ్‌ మాల్స్‌... ప్రభుత్వం ఆర్భాటంగా ఆరంభించింది. కాని చిత్తశుద్ధి లోపంతో అటు వినియోగదారులకు కొరగాకుండా, ఇటు నిర్వాహకులైన డీలర్లకు ప్రయోజనం లేకుండా ఉన్నాయి. ఆదాయం లేని మాల్స్‌ ఏర్పాటుకు రేషన్‌ డీలర్లు వెనుకంజ వేస్తున్నారు. వెయ్యికి పైగా దరఖాస్తుదారులు ముందుకొచ్చినా ఆర్నెల్లలో రాష్ట్రంలోని వివిధ జిల్లాల్లో కేవలం వందకు మించి మాల్స్‌ ఏర్పాటు చేయలేకపోవడం ఇందుకు నిదర్శనం. హోల్‌సేల్‌ మార్కెట్‌ ధరలను పరిగణనలోకి తీసుకోకుండా, సరుకుల  ధరల నిర్ణయం, విధివిధానాల్లో డీలర్ల అభిప్రాయాలను పరిగణనలోకి తీసుకోకపోవడం ఇందుకు కారణాలు. ఇలాగే కొనసాగితే చంద్రన్న విలేజ్‌ మాల్స్, నాటి గృహమిత్ర పథకంలాగే చరిత్రకు పరిమితమయ్యే ప్రమాదం ఉంది. తెనాలి:రాష్ట్రంలోని 13 జిల్లాల్లో 6,500 చంద్రన్న విలేజ్‌ మాల్స్‌ ఏర్పాటుకు ప్రభుత్వం సన్నాహాలు చేస్తోందని, వీటిని నిర్వహించే డీలర్లకు నెలకు రూ.10–15 వేల ఆదాయం కల్పించడం తమ ధ్యేయంగా రాష్ట్ర పౌరసరఫరాలశాఖ మంత్రి ప్రత్తిపాటి పుల్లారావు గత మార్చి 30న తెనాలిలో చంద్రన్న విలేజ్‌ మాల్‌ ప్రారంభ సభలో ప్రకటించారు. మంత్రి చేసిన ప్రకటన వాస్తవరూపం దాల్చనేలేదు. నిజానికి 2017 డిసెంబరులో ఆరంభించిన ఈ పథకంలో ఇప్పటికి కేవలం 100 మాల్స్‌ మాత్రమే నడుస్తున్నాయి. మాల్‌లో అన్ని రకాల సరుకులను బయట మార్కెట్‌ కన్నా 5–10 శాతం తక్కువ ధరలతో విక్రయించేలా చూస్తామని చెప్పిన దానికి భిన్నంగా, నూనెలు మినహా నిత్యావసరాలు దాదాపుగా బయట మార్కెట్‌కన్నా ఎక్కువగా ఉండడంతో వినియోగదారుల ఆదరణ కోల్పోతున్నాయి. కందిపప్పు కిలో బయ ట మార్కెట్లో రూ.63కు విక్రయిస్తుంటే విలేజ్‌ మాల్స్‌లో రూ.69కు అమ్ముతున్నారు. ఈ లెక్కన అర కిలో ప్యాకెట్‌ను రూ.37కు ఇస్తున్నారు. అంటే రెండుసార్లుగా రెండు అరకిలోల కందిపప్పును కొనుగోలు చేసే పేద వినియోగదారుడు రూ.74 చెల్లించాల్సి వస్తోంది. సబ్బులు, రవ్వలు మినహా ఇతర సరకుల ధరలు మార్కెట్‌కు మించి రూ.5–12 శాతం హెచ్చుగా ఉంటున్నాయి.   మాల్‌ ఏర్పాటు వ్యయం, సరుకుల అమ్మకాల్లో ఇచ్చే కమీషనుపై చెప్పిన మాటలకు ఆచరణకు పొంతన లేకపోవడంతో నష్టానికి వ్యాపారం ఎలా చేస్తామంటూ, డీలర్లు సణుగుతున్నారు. పైలెట్‌ ప్రాజెక్టుగా 2017 డిసెంబరులో ఆరంభించినపుడు 2 నెలలపాటు డీలరుకు నూనెలపై 3.4 శాతం, ఇతర సరుకులపై 8 శాతం కమీషను ఇచ్చారు. ఇదేదో బాగుందనుకుంటూ రాష్ట్రమంతా డీలర్లు ముందుకొచ్చారు. మార్చి నుంచి ప్రారంభించిన విలేజ్‌మాల్స్‌కు పప్పులు, నూనెలపై ప్యాకెట్ల లెక్కన కిలోకు రూపాయి, ఇతర సరుకులపై 3.5 నుంచి 4 శాతం కమీషనునే ఇస్తున్నారు. డీలర్ల అభిప్రాయాలను పరిగణనలోకి తీసుకోకుండా ఏకపక్షంగా 50 శాతం మార్జిను తగ్గించేశారు. దీనితో నెలలో రూ.2 లక్షల విలువైన సరుకులు అమ్మితే రూ.8 వేలు వస్తే, అన్‌లోడింగ్‌ చార్జీలు, అదనపు అద్దె, కరెంటు బిల్లు, సహాయకుడి వేతనం, పేపర్‌ రోల్స్‌ ఖర్చులు లెక్కించుకుంటే మిగిలేదేమీ ఉండడం లేదని డీలర్ల ఆవేదన. రేషను దుకాణాన్ని చంద్రన్న విలేజ్‌మాల్‌గా తీర్చిదిద్దడానికయే వ్యయంలో 25 శాతం డీలరు, 25 శాతం ప్రభుత్వం, మిగిలిన 50 శాతం రిలయన్స్‌/ ఫ్యూచర్‌  కంపెనీ భరిస్తుందని చెప్పారు. డీలరు వాటాను ముద్ర రుణంగా ఇప్పిస్తామని నమ్మబలికారు. తర్వాత తన వాటా లేకుండా ప్రభుత్వం చేతులు దులుపుకొంది. దీంతో 50 శాతం ఖర్చును డీలర్లే భరించాల్సివచ్చింది. తీరా ఇప్పుడు చంద్రన్న బోర్డు, ర్యాక్‌లు మాత్రమే రిలయన్స్‌ సప్లయి చేస్తుందని, మిగిలిన ఖర్చంతా డీలరే భరించాలనీ, కావాలంటే ఆ మొత్తాన్ని రిలయన్స్‌ సంస్థ 8 శాతం వడ్డీకి సమకూరుస్తుందన్న ప్రచారం జరుగుతోంది. ఈ మార్పుపై డీలర్లకు ఎలాంటి సమాచారం లేదంటున్నారు.

సాక్షి, న్యూఢిల్లీ:  చంద్రన్న విలేజ్‌ మాల్స్‌ పేరుతో రాష్ట్ర ప్రభుత్వం ఒక కుంభకోణానికి తెరలేపిందని వైఎస్సార్‌ కాంగ్రెస్‌ పార్టీ ఎంపీ వైవీ సుబ్బారెడ్డి కేంద్ర ప్రభుత్వానికి ఫిర్యాదు చేశారు. ఈ మేరకు ఆయన మంగళవారం ఢిల్లీలో కేంద్ర ఆహార, పౌర సరఫరాలశాఖ మంత్రి రాంవిలాస్‌ పాశ్వాన్‌కు ఒక వినతిపత్రం అందజేశారు. ‘‘నిరుపేదలకు నిత్యావసర వస్తువులను రాయితీతో అందించడం ద్వారా వారికి పోషకాహారాన్ని సమకూర్చడం, ధరల పెరుగుదల ప్రభావం వారిపై పడకుండా చూడడమన్నది పౌర సరఫరా వ్యవస్థ మౌలిక లక్ష్యం. అయితే ఇప్పుడు ఏపీ ప్రభుత్వం రాష్ట్రంలో ఉన్న 28 వేల రేషన్‌ షాపుల్లో 6,500 షాపులను చంద్రన్న విలేజ్‌మాల్స్‌గా మార్చింది. డిసెంబర్‌ 12న గుంటూరు, విజయవాడలో పైలట్‌ ప్రాజెక్టుగా దీన్ని ప్రారంభించింది. సీఎం, ఆయన కుటుంబ సభ్యులకు వాటాలున్న రిలయన్స్‌ రిటైల్, ఫ్యూచర్‌ గ్రూప్‌ సంస్థలకు దాదాపు రూ.9,600 కోట్ల వ్యాపారాన్ని అప్పగించేందుకు పథకం సిద్ధం చేశారు. ఈ సంస్థలతో ఇప్పటికే ప్రభుత్వం ఎంవోయూలు కుదుర్చుకుంది. బ్రాండెడ్‌ ఉత్పత్తులను గరిష్ట చిల్లర ధరకంటే 35 శాతం తక్కువకే అందించేందుకు ఈ విలేజ్‌ మాల్స్‌ పెట్టామని సీఎం చంద్రబాబు చెప్పినప్పటికీ వాస్తవం వేరేవిధంగా ఉంది. మార్కెట్‌ ధరలకంటే కొన్ని వస్తువుల ధరలు రెట్టింపుగా ఉన్నాయి. ఇదొక స్కామ్‌. అందువల్ల మీరు ఈ వ్యవహారంలో జోక్యం చేసుకుని నిత్యావసరాలను బహిరంగ మార్కెట్‌ కంటే 35 శాతం తక్కువకే అమ్మేలా చర్యలు తీసుకోవాలి’’అని వైవీ కోరారు.