చదివింత...
  ‘ఎరక్కపోయి వచ్చాను... ఇరుక్కుపోయాను’’ అంటూ తీరిగ్గా రోజుల తరబడి విచారిస్తూ కూర్చున్నాడు ఆ దొంగ. ఆ కూర్చోవడం కూడా ఒక ఎయిర్ కండిషనింగ్ యూనిట్ మీద. చైనాలోని గువాంగ్‌డంగ్ ప్రావిన్స్ ప్రాంతంలో ఒక బహుళ అంతస్థుల భవనంలో చోరీకి ప్రయత్నించాడతను. ఆ ప్రయత్నంలో ఒక ఏసీ యూనిట్ మీదకు ఎక్కి అక్కడి నుంచి ఎలా దిగాలో తెలియక అక్కడే కూర్చుండిపోయాడు. తెల్లవారుఝామున మూడు గంటల ప్రాంతంలో అలా ఇరుక్కుపోయిన ఈ దొంగగారిని భవనంలోని వారు గుర్తించి, ‘‘చోరుడా... ఇదేమీ చోద్యమురా?’’ అని కోపగించుకోకపోగా అయ్యో పాపం అనుకుంటూ అతనికి సాయం చేసేందుకు ప్రయత్నించారు.
 
 అయితే వారి సాయాన్ని తీసుకోవడానికి ముఖం చెల్లని ఆ దొంగ అదే చోట అలాగే కూర్చుండిపోయాడు. అదీ అరవై గంటల పాటు. దీంతో కాళ్ల దగ్గర తీవ్రమైన వాపు వచ్చేసరికి ఇక సాయం తీసుకోక తప్పలేదు. ఏకంగా అన్ని గంటల పాటు ఆహారం ఏమీ తీసుకోకుండా కేవలం నీళ్లు తప్ప అన్నీ వద్దన్న ఈ దొంగ ప్రస్తుతం పోలీసుల ఆతిథ్యంలో ఉన్నాడు.
                                                                                             ...::: సత్యవర్షి


 దొంగల్లోనూ మంచోళ్లు ఉంటారని నిరూపించాడు ఓ చైనా దొంగ. తాను కొట్టేసిన ఐఫోన్లోని సమాచారాన్ని బాధితుడికి పంపి కొంచెం మంచోడనిపించుకున్నాడు. అయితే ఫోన్ మాత్రం వెనక్కి పంపలేదండోయ్. జిన్హువా వార్తా సంస్థ ఈ కథనాన్ని వెల్లడించింది.
 
 చైనాలోని సెంట్రల్ ప్రావిన్స్ హునన్కు చెందిన జో బిన్.. షేరింగ్ టాక్సీలో ప్రయాణిస్తూ తన యాపిల్ ఐఫోన్ పోగొట్టుకున్నాడు. తన ఫోన్ చోరీకి గురైందని గుర్తించి దొంగకు ఒక టెక్ట్స్ మెసేజ్ పంపాడు. తన ఫోన్లో ఉన్న నంబర్ల బ్యాకప్ లేదని, దయచేసి ఐఫోన్ తిరిగిచ్చేయాలని కోరాడు. ఫోన్ తన అడ్రస్కు పంపాలని అందులో  విజ్ఞప్తి చేశాడు.
 
 కొద్దిరోజుల తర్వాత తనకు అందించిన ప్యాకేట్ చూసి జో బిన్ ఆశ్చర్యానికి లోనయ్యాడు. ఫోన్లో ఉన్న 1000 నంబర్లను చేతితో రాసిన 11 పేజీలు అందులో ఉండడం చూసి అతడు అవాక్కయ్యాడు. అయితే దొంగిలించిన ఐఫోన్ మాత్రం పంపలేదు. ఫోన్లో సేవ్ చేసిన నంబర్లు, వారి పేర్లు  స్వదస్తూరీతో రాశానని జో బిన్కు సందేశంలో దొంగ పేర్కొన్నాడు.