న్యూఢిల్లీ: ఐటీ సంస్థ సిగ్నిటీ టెక్నాలజీస్‌ తాజాగా 10 మిలియన్‌ డాలర్ల (సుమారు రూ. 76 కోట్లు) ఆర్డరు దక్కించుకుంది. అమెరికాకు చెందిన అతి పెద్ద ఆర్థిక సేవల సంస్థల్లో ఒక దాన్నుంచి ఈ వార్షిక కాంట్రాక్టును దక్కించుకున్నట్లు సంస్థ సీఈవో శ్రీకాంత్‌ చక్కిలం వెల్లడించారు.  భారీ డీల్స్‌ దక్కించుకోవడంలో తమ సామర్థ్యాలకు ఇది నిదర్శనమని ఆయన వివరించారు. తమ ఆదాయాల్లో బీఎఫ్‌ఎస్‌ఐ వాటా మరింత పెరిగేందుకు ఈ డీల్‌ తోడ్పడగలదని శ్రీకాంత్‌ చెప్పారు.


 హైదరాబాద్: గ్లోబల్ బీపీవో, ఐటీ ఔట్‌సోర్సింగ్ రీసెర్చ్ అండ్ అనాలసిస్ సంస్థ ‘నెల్సన్‌హాల్’.. సాఫ్ట్‌వేర్ టెస్టింగ్ సర్వీసెస్‌కు సంబంధించి ఇటీవల రూపొందించిన నివేదిక ప్రకారం ‘సిగ్నిటి టెక్నాలజీస్’ ప్యూర్-ప్లే మార్కెట్ విభాగంలో అగ్రస్థానాన్ని కైవసం చేసుకుంది. అలాగే డిజిటల్, కన్సల్టింగ్ వంటి మార్కెట్ విభాగాల్లోనూ టాప్‌లో నిలిచినట్లు సంస్థ ఒక ప్రకటనలో తెలిపింది. ఉద్యోగుల పరంగా చూస్తే.. రెండో అతిపెద్ద ప్యూర్-ప్లే సాఫ్ట్‌వేర్ టెస్టింగ్ సర్వీసెస్ కంపెనీగా ఆవిర్భవించామని పేర్కొంది.