యాడికి (తాడిపత్రి టౌన్‌) :  యాడికి మండలం వేములపాడు వద్ద బుధవారం తెల్లవారుజామున లారీ బోల్తా పడి క్లీనర్‌ మరణించగా, డ్రైవర్‌ గాయపడినట్లు ఎస్‌ఐ కత్తి శ్రీనివాసులు తెలిపారు. కర్ణాటక నుంచి సిమెంట్‌ లోడుతో చెన్నై బయలుదేరిన లారీ మార్గమధ్యంలోని వేములపాడు వద్దకు రాగానే అదుపు తప్పి బోల్తాపడింది. ఘటనలో ఉత్తరప్రదేశ్‌ రాష్ట్రానికి చెందిన క్లీనర్‌ విశాల్‌(20) అక్కడికక్కడే మరణించినట్లు వివరించారు. డ్రైవర్‌ కూడా తీవ్రంగా గాయపడినట్లు చెప్పారు. ఘటనపై కేసు నమోదు చేసుకుని మృతదేహాన్ని పోస్టుమార్టం కోసం తాడిపత్రి ప్రభుత్వాస్పత్రికి తరలించినట్లు పేర్కొన్నారు. 


 తాడిపత్రి రూరల్‌ : పట్టణంలోని గెర్దావ్‌ స్టీల్‌ ప్లాంటులో డోలమైట్‌ ఫౌడర్‌ అన్‌లోడ్‌ చేస్తుండగా ప్రమాద వశాత్తు లారీ డోర్‌ తగిలి కర్నూల్‌ జిల్లా డోన్‌ మండలం కొత్తచెరువు గ్రామానికి చెందిన లారీ క్లీనర్‌ తిమ్మా గురుడు (40) మంగళవారం రాత్రి మృతి చెందాడు. పోలీసుల వివరాల మేరకు..డోన్‌కు చెందిన లారీ తాడిపత్రి నియోజకవర్గంలోని కిష్టపాడు గ్రామంలో లారీలో డోలమైట్‌ లోడ్‌ చేసుకుని గెర్దావ్‌ స్టీల్‌ ప్లాంటుకు తీసుకొచ్చారు.
 
 స్టీల్‌ ప్లాంటులో డోలమైట్‌ అన్‌లోడ్‌ చేస్తుండగా క్లీనర్‌ తిమ్మాగురుడుకు డోర్‌ తగిలి కింద పడ్డాడు. గమనించని డ్రైవర్‌ లారీ డోర్‌ తీశాడు. దీంతో లిఫ్ట్‌ ఓపన్‌ అయ్యి ఫౌడర్‌ అన్‌లోడ్‌ అయ్యింది. తిమ్మాగురుడుపై ఫౌడర్‌ పడటంతో ఊపిరి ఆడక అక్కడిక్కడే మృతి చెందాడు. సమాచారం తెలుసుకున్న రూరల్‌ ఎస్‌ఐ నారాయణరెడ్డి సిబ్బందితో సంఘటన స్థలం చేరుకుని మృతదేహాన్ని పరిశీలించి, పోస్టుమార్టం నిమిత్తం మృతదేహాన్ని తాడిపత్రి ప్రభుత్వాస్పత్రికి తరలించారు. మృతుడి కుటుంబ సభ్యుల ఫిర్యాదు మేరకు కేసు నమోదు చేసుకున్నారు.


 చిలమత్తూరు : మండలంలోని 44వ నంబర్‌ జాతీయ రహదారి కోడూరు తోపు సమీపంలో గల జువారి ఫ్యాక్టరీ ఎదుట గురువారం ఉదయం జరిగిన రోడ్డు ప్రమాదంలో పరిగి మండలం కొడిగెనహళ్లికి చెందిన మహమ్మద్‌ మన్సూర్‌(35) మతి చెందినట్లు ఎస్‌ఐ జమాల్‌బాషా తెలిపారు. హైదరాబాద్‌ నుంచి బెంగళూరు బయలుదేరిన (బెంగళూరులోని నేషనల్‌ ట్రావెల్స్‌కు చెందిన) బస్సు కోడూరు సమీపంలోని జువారి ఫ్యాక్టరీ వద్దకు రాగానే లారీని ఓవర్‌టెక్‌ చేయబోయి ఢీకొనడంతో బస్సు క్లీనర్‌గా పని చేసే మన్సూర్‌ అక్కడికక్కడే మరణించినట్లు వివరించారు. మతునికి భార్య, కుమారుడు, కుమార్తె ఉన్నారన్నారు. కేసు నమోదు చేసుకుని దర్యాప్తు చేస్తున్నట్లు చెప్పారు.