సింగరేణి(కొత్తగూడెం): సింగరేణి సంస్థ ఈ ఆర్థిక సంవత్సరం (2021– 2022)లో 70 మిలియన్‌ టన్నుల లక్ష్యాన్ని నిర్ధేశించుకుంది. అయితే ఏప్రిల్‌ నుంచి జూన్‌ వరకు మొదటి మూడు మాసాల్లో 16.44 మిలియన్‌ టన్నుల లక్ష్యానికి 15.56 మిలియన్‌ టన్నుల ఉత్పత్తి (95%)నే సాధించగలిగింది. మొత్తంగా ఐదు ఏరియాల్లో వంద శాతం ఉత్పత్తి సాధించగా, మిగిలిన ఆరు ఏరియాలు వెనుకంజలో ఉన్నట్లు అధికారిక గణాంకాల్లో వెల్లడించారు. కొత్తగూడెం రీజియన్‌లోని కొత్తగూడెం ఏరియా 29.75 లక్షల టన్నుల లక్ష్యానికి 29.76 (100%) టన్నులు, ఇల్లందు ఏరియా 14.71 లక్షల టన్నుల లక్ష్యానికి 15.44 లక్షల (105%) టన్నులు, మణుగూరు ఏరియా 26.72 లక్షల టన్నుల లక్ష్యానికి 32.97 (123%) సాధించి సింగరేణివ్యాప్తంగా అగ్రస్థానంలో నిలవడం విశేషం. ఇక రామగుండం రీజియన్‌లోని రామగుండం–2 ఏరియాలో 19.35 లక్షల టన్నుల లక్ష్యానికి 19.87 లక్షల (103%) టన్నులు, రామగుండం–3 ఏరియా 14.80 లక్షల టన్నుల లక్ష్యానికి 15.38 లక్షల (104%) ఉత్పత్తి సాధించాయి.  వెనుకబడిన ఆరు ఏరియాలు  ఏప్రిల్‌ నుంచి జూన్‌ వరకు ఏరియాల వారీ ఉత్పత్తి వివరాలను సింగరేణి తాజాగా వెల్లడించింది. మణుగూరు, ఇల్లెందు, రామగుండం–3, 2, కొత్తగూడెం ఏరియాలు లక్ష్యానికి మించి ఉత్పత్తి సాధించాయి. రామగుండం–1 ఏరియాలో పరిస్థితి మెరుగ్గానే ఉన్నా, మందమర్రి, శ్రీరాంపూర్, బెల్లంపల్లి, భూపాలపల్లి, ఆండ్రియాల ఏరియాలు వెనుకబడ్డాయి. ఆండ్రియాలలోనైతే 37 శాతం లక్ష్యాన్నే సాధించడం గమనార్హం.  జూన్‌లో 102% ఉత్పత్తి  సింగరేణిలో గడిచిన జూన్‌లో 20 ఓపెన్‌కాస్ట్‌ గనులు, 25 భూగర్భ గనుల్లో 51.83 లక్షల టన్నుల లక్ష్యానికి 52.71 లక్షల టన్నులు అంటే 102% ఉత్పత్తి సాధించింది. ఇందులోనూ కేవలం ఆరు ఏరియాల్లో వంద శాతం ఉత్పత్తి సాధించగా, మిగిలిన ఐదు ఏరియాలు వెనుకబడ్డాయి. ఇందులో రామగుండం–3 ఏరియా (139%) అగ్రస్థానంలో నిలిచింది. అయితే, జూన్‌తో పాటు త్రైమాసికం కలిపి పరిశీలిస్తే కొత్తగూడెం రీజియన్‌లోని మణుగూరు టాప్‌గా నిలిచింది. ఈ ఏరియాలో త్రైమాసికం ఉత్పత్తి 26,72,000 టన్నుల లక్ష్యానికి 32,79,877 టన్నులు అంటే 123%, జూన్‌లో 8,96,000 టన్నుల లక్ష్యానికి 11,83,879 (132%) టన్నుల ఉత్పత్తి సాధించి సింగరేణి వ్యాప్తంగా అగ్రస్థానంలో, ఇతర ఏరియాలకు ఆదర్శంగా నిలిచింది.  వెనకబడిన ఏరియాల్లో పనితీరు మారాలి  త్రైమాసిక, నెలవారీ ఉత్పత్తి సాధనలో వెనకబడిన ఏరియాల్లో తీరుమారాలి. రోజు, నెలవారీ, వార్షిక లక్ష్యాల సాధనకు కృషి జరగకపోతే బాధ్యులపై వేటు తప్పదు. బొగ్గు ఉత్పత్తిలో అధికారులు, సూపర్‌వైజర్లు, కార్మికులు అంకితభావంతో పనిచేయాలి. – ఎన్‌.శ్రీధర్, సింగరేణి సీఅండ్‌ఎండీ    


 
 తెలంగాణ విద్యుత్‌ అవసరాలు తీర్చాలి
 
 ఆర్జీ–1 సీజీఎం వెంకటేశ్వర్‌రావు
 
 గోదావరిఖని : తెలంగాణ రాష్ట్ర విద్యుత్‌ అవసరాలను తీర్చేందుకు ప్రతీ సింగరేణీయుడు చేయిచేయి కలిపి బొగ్గును ఉత్పత్తి పెంచాలని ఆర్జీ–1 సీజీఎం వెంకటేశ్వర్‌రావు సూచించారు. జీడీకే–2ఎ గనిపై  శుక్రవారం ఏర్పాటు చేసిన మల్టీ డిపార్ట్‌మెంట్‌ కమిటీ సమావేశంలో మాట్లాడారు. ఉత్పత్తి, ఉత్పాదకత విషయంలో గనిని ముందుకు తీసుకెళ్లాలని, అందుకు ప్రతి ఒక్కరూ పట్టుదలతో, అంకిత భావంతో పనిచేయాలని కోరారు. వర్షాల కారణంగా సెప్టెంబర్‌  వరకు ఉత్పత్తి, ఉత్పాదకతలో కొంత వెనుకబడి ఉన్నామని, దీనిని అధిగమించి నాణ్యతతో కూడిన ఉత్పత్తి, ఉత్పాదకతలు పెంచుకుంటూ సంస్థను లాభాల్లో నడిపించాలన్నారు. ఐఈడీ ఏజీఎం ప్రసాదరావు, పర్సనల్‌ డీజీఎం బి.హనుమంతరావు, ఫైనాన్స్‌ డీజీఎం రాజేశ్వర్‌రావు, క్వాలిటీ భైరయ్య, ఏరియా సేఫ్టీ ఆఫీసర్‌ కేవీ.రావు సాధించాల్సిన ఉత్పత్తి, ఉత్పాదకత వివరాలు, కంపెనీ ఎదుర్కొంటున్న సవాళ్లు, రక్షణ పరమైన చర్యలు, సంక్షేమ కార్యక్రమాలు, అందరి బాధ్యత తదితర విషయాలపై పవర్‌పాయింట్‌ ప్రజెంటేషన్‌ ప్రొజెక్టర్‌ ద్వారా ఉద్యోగులకు తెలిపారు. అనంతరం టీబీజీకేఎస్‌ గని ఫిట్‌ సెక్రటరీ దాసరి మొగిళి మాట్లాడుతూ ఉత్పత్తి పెంచేందుకు రెండు కొత్త ఎస్‌డీఎల్‌ యంత్రాలను ఇవ్వాలని కోరారు. అదేవిధంగా ఇసుక రవాణా కూడా స్పష్టమైన విధానం ఉండాలని, బంకర్ల నుంచి కోల్‌ట్రాన్స్‌పోర్ట్‌ కోసం తగినన్ని లారీలు ఏర్పాటు చేయాలని, గనిలో ఎస్‌డీఎల్‌ నడిచే ప్రదేశంలో బురదగా ఉండకుండా తగిన ఏర్పాట్లు చేయాలని సూచించారు. కార్యక్రమంలో ఎస్‌ఓటూ సీజీఎం సుధాకర్‌రెడ్డి, జీడీకే–1వ గని గ్రూప్‌ ఏజెంట్‌ సాంబయ్య, ఈఅండ్‌ఎం ఏజీఎం సాయిరాం, ఫైనాన్స్‌ డీజీఎం రాజేశ్వర్‌రావు, డివైఎస్‌ఈ రమేశ్, గని మేనేజర్‌ గోపాల్‌సింగ్, అధికారులు కిరణ్‌కుమార్, నాయకులు యాదగిరి సత్తయ్య, జూపాక రాజయ్య తదితరులు పాల్గొన్నారు.